(1)

fil-Kapitolu 2, it-Taqsima 2.1 hija emendata kif ġej:

(2)

Fil-Kapitolu 3, it-Taqsima 3.2 tinbidel b'dan li ġej:

“3.2.   Kampjunar batterjoloġiku fil-biċċeriji u fi stabbilimenti li jipproduċu l-ikkapuljat, il-preparazzjonijiet tal-laħam, il-laħam separat b'mod mekkaniku u l-laħam frisk

Ir-regoli għall-kampjunar tal-karkassi tal-bovini, tal-ħnieżer, tan-nagħaġ, tal-mogħoż u taż-żwiemel

Il-metodi distruttivi u mhux distruttivi tal-kampjunar, tal-għażla tas-siti għall-kampjunar u r-regoli għall-ħażna u t-trasport tal-kampjuni li se jintużaw huma stabbiliti fl-istandard ISO 17604.

Jeħtieġ li jiġu kampjunati ħames karkassi magħżula b'mod aleatorju matul kull sessjoni tal-kampjunar. Is-siti tal-kampjuni għandhom jintgħażlu billi titqies it-teknoloġija tal-qatla użata f'kull impjant.

Waqt il-kampjunar għall-analiżijiet tal-għadd tal-kolonji Enterobacteriaceae u aerobiċi, għandhom jittieħdu kampjuni minn erba' siti għal kull karkassa. Erba' kampjuni ta' tessuti li jirrappreżentaw total ta' 20 cm2 għandhom jinkisbu bil-metodu distruttiv. Meta jintuża l-metodu mhux distruttiv għal dan l-għan, iż-żona ta' kampjunar għandha tkopri minimu ta' 100 cm2 (50 cm2 għal karkassi ta' bhejjem li jixtarru żgħar) għal kull sit ta' kampjunar.

Waqt il-kampjunar għal analiżijiet tas-Salmonella, għandu jintuża metodu ta' kampjunar bi sponża li tobrox. Għandhom jintgħażlu ż-żoni li l-aktar għandhom ċans li jiġu kkontaminati. Iż-żona totali għat-teħid tal-kampjuni għandha tkopri minimu ta' 400 cm2.

Meta l-kampjuni jittieħdu mis-siti differenti tal-kampjunar fuq il-karkassa, dawn għandhom jingħaqdu f'kampjun kompost qabel l-eżaminazzjoni.

Ir-regoli għall-kampjunar tal karkassi tat-tjur u tal-laħam frisk tat-tjur

Il-biċċeriji għandhom jieħdu kampjuni ta' karkassi sħaħ tat-tjur bil-ġilda tal-għonq għall-analiżijiet tas-Salmonella u tal-Campylobacter. Stabbilimenti tal-qtugħ u tal-ipproċessar ħlief dawk li jinsabu maġenb biċċerija li tqatta' u tipproċessa l-laħam li jkun ġej biss minn din il-biċċerija, ukoll għandhom jieħdu kampjuni għall-analiżi tas-Salmonella. Meta jagħmlu dan, għandhom jagħtu prijorità lill-karkassi sħaħ tat-tjur bil-ġilda tal-għonq, jekk disponibbli, iżda għandhom jiżguraw ukoll li anke porzjonijiet tat-tjur bil-ġilda u/jew porzjonijiet tat-tjur mingħajr ġilda jew b'ammont żgħir ta' ġilda jkunu koperti, u dik l-għażla għandha tkun ibbażata fuq ir-riskju.

Fil-pjanijiet tal-kampjunar tagħhom il-biċċeriji għandhom jinkludu karkassi tat-tjur minn qatgħat bi status għas-Salmonella mhux magħruf jew bi status għas-Salmonella Enteritidis jew għas-Salmonella Typhimurium li hu magħruf li huwa pożittiv.

Meta jkun qed isir l-ittestjar kontra l-kriterju tal-iġjene tal-proċess stabbilit fir-Ringiela 2.1.5 u fir-Ringiela 2.1.9 tal-Kapitolu 2 għas-Salmonella u għall-Campylobacter fil-karkassi tat-tjur fil-biċċeriji u t-testijiet għas-Salmonella u għall-Campylobacter, jitwettqu fl-istess laboratorju, għandhom jittieħdu kampjuni aleatorji tal-ġilda tal-għonq ta' mill-inqas 15-il karkassa tat-tjur wara t-tkessiħ matul kull sessjoni tal-kampjunar. Qabel l-eżaminazzjoni, il-kampjuni tal-ġilda tal-għonq ta' mill-inqas tliet karkassi tat-tjur mill-istess qatgħa ta' oriġini għandhom jingħaqdu f'kampjun wieħed kompost ta' 26 g. Għalhekk, il-kampjuni tal-ġilda tal-għonq jiffurmaw kampjuni finali ta' 5 × 26 g (jinħtieġu 26 g sabiex jitwettqu l-analiżijiet għas-Salmonella u għall-Campylobacter minn kampjun wieħed b'mod parallel). Il-kampjuni għandhom jinżammu wara li jittieħdu l-kampjuni u jiġu ttrasportati sal-laboratorju f'temperatura ta' mhux inqas minn 1 °C u mhux ogħla minn 8 °C u l-ħin bejn il-kampjunar u l-ittestjar għal Campylobacter għandu jkun ta' anqas minn 48 siegħa sabiex tkun żgurata ż-żamma tal-integrità tal-kampjuni. Kampjuni li jkunu laħqu temperatura ta' 0 °C m'għandhomx jintużaw biex tiġi vverifikata l-konformità mal-kriterju tal-Campylobacter. Il-kampjuni ta' 5 × 26 g għandhom jintużaw biex tiġi vverifikata l-konformità mal-kriterji dwar l-iġjene tal-proċess stabbiliti fir-Ringiela 2.1.5 u fir-Ringiela 2.1.9 tal-Kapitolu 2 u mal-kriterju tas-sikurezza tal-ikel stabbilit fir-Ringiela 1.28 tal-Kapitolu 1. Sabiex titħejja s-sospensjoni inizjali fil-laboratorju l-porzjon tat-test ta' 26 g għandu jiġi ttrasferit għal disa' volumi (234 ml) ta' ilma tal-peptun li jkun newtralizzat (Buffered Peptone Water). Il-BPW għandu jilħaq temperatura ambjentali qabel ma jiżdied. It-taħlita għanda tiġi ttrattata fi stomacher jew pulsifier għal madwar minuta. Ir-ragħwa għandha tiġi evitata billi l-arja titneħħa kemm jista' jkun mill-borża stomacher. 10 ml (~ 1 g) ta' din is-sospensjoni inizjali għandhom jiġu ttrasferiti f'tubu sterili vojt u 1 ml tal-10 ml għandu jintuża għall-enumerazzjoni tal-Campylobacter f'dixxijiet selettivi. Il-bqija tas-sospensjoni inizjali (250 ml ~ 25 g) għandha tintuża għad-detezzjoni tas-Salmonella.

Meta jkun qed isir l-ittestjar kontra l-kriterju tal-proċess tal-iġjene stabbilit fir-Ringiela 2.1.5 u fir-Ringiela 2.1.9 tal-Kapitolu 2 għas-Salmonella u għall-Campylobacter fil-karkassi tat-tjur fil-biċċeriji u t-testijiet għas-Salmonella u għall-Campylobacter jitwettqu f'żewġ laboratorji differenti, għandhom jittieħdu kampjuni aleatorji tal-ġilda tal-għonq ta' mill-inqas 20 karkassa tat-tjur wara t-tkessiħ matul kull sessjoni ta' kampjunar. Qabel l-eżaminazzjoni, il-kampjuni tal-ġilda tal-għonq ta' mill-inqas erba' karkassi tat-tjur mill-istess qatgħa ta' oriġini għandhom jingħaqdu f'kampjun wieħed kompost ta' 35 g. Għalhekk, il-kampjuni tal-ġilda tal-għonq jiffurmaw kampjuni ta' 5 × 35 g, li wara għandhom jinqasmu sabiex jinkisbu kampjuni finali ta' 5 × 25 g (li jridu jiġu ttestjati għas-Salmonella) u kampjuni finali ta' 5 × 10 g (li jridu jiġu ttestjati għall-Campylobacter). Il-kampjuni għandhom jinżammu wara li jittieħdu l-kampjuni u jiġu ttrasportati sal-laboratorju f'temperatura ta' mhux inqas minn 1 °C u mhux ogħla minn 8 °C u l-ħin bejn il-kampjunar u l-ittestjar għal Campylobacter għandu jkun ta' anqas minn 48 siegħa sabiex tkun żgurata ż-żamma tal-integrità tal-kampjuni. Kampjuni li jkunu laħqu temperatura ta' 0 °C m'għandhomx jintużaw biex tiġi vverifikata l-konformità mal-kriterju tal-Campylobacter. Il-kampjuni 5 × 25 g għandhom jintużaw biex tiġi vverifikata l-konformità mal-kriterji dwar l-iġjene tal-proċess stabbiliti fir-Ringiela 2.1.5 tal-Kapitolu 2 u mal-kriterju tas-sikurezza tal-ikel stabbilit fir-Ringiela 1.28 tal-Kapitolu 1. Il-kampjuni finali 5 × 10 g għandhom jintużaw biex tiġi vverifikata l-konformità mal-kriterju tal-proċess tal-iġjene stabbilit fir-Ringiela 2.1.9 tal-Kapitolu 2.

Għall-analiżi għas-Salmonella fil-laħam frisk tat-tjur apparti mill-karkassi tat-tjur, għandhom jinġabru ħames kampjuni ta' mill-inqas 25 g mill-istess lott. Il-kampjun meħud mill-porzjonijiet tat-tiġieġ bil-ġilda għandu jinkludi l-ġilda u porzjon irqiq ta' muskolu tas-superfiċe f'każ li l-ammont ta' ġilda mhuwiex biżżejjed biex jifforma unità ta' kampjun. Il-kampjun meħud mill-porzjonijiet tat-tjur mingħajr ġilda jew b'ammont żgħir ta' ġilda għandu jinkludi porzjon jew porzjonijiet irqaq ta' muskolu tas-superfiċe miżjuda ma' kwalunkwe ġilda preżenti biex jifforma unità suffiċjenti ta' kampjun. Il-porzjonijiet tal-laħam għandhom jittieħdu b'tali mod li jinkludu kemm jista' jkun is-superfiċi tal-laħam.

Il-linji gwida għall-kampjunar

Linji gwida aktar dettaljati dwar il-kampjunar tal-karkassi, b'mod partikolari dwar is-siti tal-kampjunar, jistgħu jiġu inklużi fil-gwidi għal prattika tajba msemmija fl-Artikolu 7 tar-Regolament (KE) Nru 852/2004.

Il-frekwenzi ta' kampjunar għall-karkassi, l-ikkapuljat, il-preparazzjonijiet tal-laħam u l-laħam isseparat b'mod mekkaniku u l-laħam tat-tjur frisk

L-operaturi tas-settur tal-ikel tal-biċċeriji jew tal-istabbilimenti li jipproduċu l-ikkapuljat, il-preparazzjonijiet tal-laħam, il-laħam isseparat b'mod mekkaniku jew il-laħam tat-tjur frisk għandhom jieħdu kampjuni għall-analiżi mikrobijoloġika minn tal-inqas darba fil-ġimgħa. Il-jum tal-kampjunar għandu jinbidel kull ġimgħa sabiex jiġi żgurat li jkun kopert kull jum tal-ġimgħa.

Fir-rigward tal-kampjunar tal-ikkapuljat u tal-preparazzjonijiet tal-laħam għall-analiżijiet tal-E. coli u tal-għadd tal-kolonji aerobiċi u l-kampjunar tal-karkassi għall-analiżijiet tal-għadd tal-kolonji Enterobacteriaceae u aerobiċi, il-frekwenza tista' titnaqqas għal ittestjar kull ħmistax jekk jinkisbu riżultati sodisfaċenti għal sitt ġimgħat konsekuttivi.

Fil-każ tal-kampjunar għall-analiżijiet għas-Salmonella tal-ikkapuljat, tal-preparazzjonijiet tal-laħam, tal-karkassi u tal-laħam frisk tat-tjur, il-frekwenza tista' titnaqqas għal kull ġimgħatejn jekk jinkisbu riżultati sodisfaċenti għal 30 ġimgħa konsekuttiva. Il-frekwenza tat-teħid ta' kampjuni għas-Salmonella tista' titnaqqas ukoll jekk ikun hemm programm nazzjonali jew reġjonali fis-seħħ għall-kontroll tas-Salmonella u jekk dan il-programm ikun jinkludi ttestjar li jissostitwixxi l-kampjunar stabbilit f'dan il-paragrafu. Il-frekwenza ta' kampjunar tista' titnaqqas ulterjorment jekk il-programm nazzjonali jew reġjonali għall-kontroll tas-Salmonella juri li l-prevalenza tas-Salmonella hija baxxa f'annimali mixtrija mill-biċċerija.

Fil-każ tat-teħid ta' kampjuni għall-analiżi għall-Campylobacter tal-karkassi tat-tjur, il-frekwenza tista' titnaqqas għal kull ħmistax jekk jinkisbu riżultati sodisfaċenti għal 52 ġimgħa konsekuttiva. Il-frekwenza tal-kampjunar għall-Campylobacter tista' titnaqqas, wara l-awtorizzazzjoni mill-awtorità kompetenti, jekk ikun hemm programm nazzjonali jew reġjonali fis-seħħ għall-kontroll tal-Campylobacter u jekk dan il-programm ikun jinkludi kampjunar u ttestjar ekwivalenti għall-kampjunar u l-ittestjar meħtieġ għall-verifika tal-konformità mal-kriterju tal-proċess tal-iġjene stabbilit fir-Ringiela 2.1.9 tal-Kapitolu 2. Jekk jiġi stabbilit livell baxx ta' kontaminazzjoni tal-qatgħat għall-Campylobacter fil-programm ta' kontroll, il-frekwenza tat-teħid tal-kampjuni tista' titnaqqas ulterjorment jekk dan il-livell baxx ta' kontaminazzjoni ta' Campylobacter jintlaħaq fuq perjodu ta' 52 ġimgħat fl-azjendi agrikoli ta' oriġini tat-tiġieġ tas-simna mixtrija mill-biċċerija. F'każ li l-programm ta' kontroll juri riżultati sodisfaċenti matul perjodu speċifiku tas-sena, il-frekwenza tal-analiżi għall-Campylobacter tista' wkoll tiġi aġġustata skont il-varjazzjonijiet staġjonali, wara l-awtorizzazzjoni mill-awtorità kompetenti.

Madankollu, meta jkun ġustifikat abbażi ta' analiżi tar-riskju u konsegwentement awtorizzat mill-awtorità kompetenti, il-biċċeriji u l-istabbilimenti żgħar li jipproduċu l-ikkapuljat, il-preparazzjonijiet tal-laħam u l-laħam frisk tat-tjur fi kwantitajiet żgħar, jistgħu jiġu eżentati minn dan in-numru frekwenti ta' kampjunar.”