Wara li kkunsidrat ir-Regolament (UE) Nru 952/2013 tal-Parlament Ewropew u tal-Kunsill tad-9 ta' Ottubru 2013 li jistabbilixxi l-Kodiċi Doganali tal-Unjoni (1), u b'mod partikolari l-Artikolu 57(4) u l-Artikolu 58(2) tiegħu,

Il-prodotti deskritti fil-kolonna (1) tat-tabella stabbilita fl-Anness għandhom jiġu kklassifikati fin-Nomenklatura Magħquda taħt il-kodiċi NM indikat fil-kolonna (2) ta' dik it-tabella.

L-informazzjoni vinkolanti dwar it-tariffi li ma tkunx konformi ma' dan ir-Regolament tista' tibqa' tiġi invokata skont l-Artikolu 34(9) tar-Regolament (UE) Nru 952/2013 għal perjodu ta' tliet xhur minn meta jidħol fis-seħħ dan ir-Regolament.

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

(2) Ir-Regolament tal-Kunsill (KEE) Nru 2658/87 tat-23 ta' Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta' Dwana. (ĠU L 256, 7.9.1987, p. 1).

ANNESS

Deskrizzjoni tal-prodotti

Klassifikazzjoni

(Kodiċi NM)

Raġunijiet

(1)

(2)

(3)

Apparat (l-hekk imsejħa “pjattaforma ta' ċċarġjar bla wajer”) li jikkonsisti f'adapter b'kejbil b'tul ta' madwar 180 cm u fi pjattaforma ta' ċċarġjar. Il-kejbil għandu konnettur biex tiġi konnessa miegħu l-pjattaforma ta' ċċarġjar. Il-pjattaforma għandha forma ċirkolari, hija għolja madwar 8 mm, b'dijametru ta' madwar 80 mm u tiżen 51 g.

L-adapter jeqleb (jirrettifika) il-kurrent alternat (AC — 240 V) f'kurrent dirett (DC — 12 V) u jittrasferih lill-pjattaforma. Fil-pjattaforma dan il-kurrent dirett jiġi kkonvertit (invertit) f'kurrent alternat u mbagħad dak il-kurrent alternat jiġi kkonvertit f'kamp elettromanjetiku.

L-apparat huwa mfassal biex jiċċarġja l-apparat bla wajer. Kemm il-pjattaforma kif ukoll l-apparat li qed jiġi ċċarġjat huma mgħammra b'teknoloġija “Qi” li hija standard għall-iċċarġjar bla wajer tal-apparat. L-iċċarġjar bla wajer isir permezz ta' kamp elettromanjetiku.

Ara l-istampa (*1)

8504 40 90

Il-klassifikazzjoni hija ddeterminata bir-regoli ġenerali (GIR) 1, 3(c) u 6 għall-interpretazzjoni tan-Nomenklatura Magħquda u bil-kliem tal-kodiċijiet NM 8504 , 8504 40 u 8504 40 90 .

Il-funzjonijiet tal-apparat (ir-rettifikar, l-inverżjoni u l-konverżjoni f'kamp elettromanjetiku) huma koperti bis-subintestatura 8504 40 . Għalhekk, l-apparat ma jistax jiġi kklassifikat taħt is-subintestatura 8504 50 .

Il-klassifikazzjoni taħt il-kodiċi NM 8504 40 30 bħala konvertitur statiku tat-tip użat ma' apparat tat-telekomunikazzjoni, magni awtomatiċi għall-ipproċessar tad-dejta u l-unitajiet tagħhom hija eskluża minħabba li l-adapter AC/DC huwa maħsub biex jipprovdi kurrent għal varjetà ta' apparat elettriku.

Peress li la r-rettifkar, la l-inverżjoni u lanqas il-konverżjoni tal-kurrent f'kamp elettromanjetiku ma jagħtu lill-apparat il-karattru essenzjali tiegħu, irid jiġi kklassifkat billi jiġu applikati r-regoli ġenerali 3(c).

Għaldaqstant, l-apparat irid jiġi kklassifikat taħt il-kodiċi NM 8504 40 90 , bħala converters statiċi oħrajn.

(*1) L-istampa qiegħda biss għal raġunijiet ta' informazzjoni.