12.5.2017   

MT

Il-Ġurnal Uffiċjali tal-Unjoni Ewropea

L 121/3

(1)

Il-Kummissjoni Ewropea (“il-Kummissjoni”) fit-13 ta' Frar 2016 bdiet investigazzjoni wara lment ippreżentat fl-4 ta' Jannar 2016 mill-Kumitat tad-Difiża tal-industrija tat-tubi tal-azzar mingħajr ġonġituri tal-Unjoni Ewropea (“l-ilmentatur”) f'isem il-produtturi li jirrappreżentaw iktar minn 25 % tal-produzzjoni totali tal-Unjoni tal-prodott simili. L-ilment kien fih evidenza ta' dumping tal-prodott imsemmi u ta' dannu materjali bħala riżultat ta' dan, li tqies biżżejjed biex jiġġustifika l-bidu ta' investigazzjoni.

(2)

Fit-12 ta' Novembru 2016 hija imponiet dazju antidumping provviżorju fuq l-importazzjonijiet ta' ċerti pajpijiet u tubi mingħajr ġonġituri, tal-ħadid (ħlief tal-ħadid fondut) jew tal-azzar (ħlief tal-azzar inossidabbli), ta' sezzjoni trasversali tonda, ta' dijametru estern li jaqbeż l-406,4 mm, li joriġinaw mir-Repubblika tal-Poplu taċ-Ċina (“RPĊ”, “iċ-Ċina” jew “il-pajjiż ikkonċernat”) permezz tar-Regolament tal-Kummissjoni (UE) 2016/1977 (2) (“ir-Regolament provviżorju”).

(3)

Wara li ġew żvelati l-fatti u l-kunsiderazzjonijiet essenzjali, li abbażi tagħhom ġie deċiż li jkun impost dazju provviżorju tal-antidumping (“l-iżvelar provviżorju”), produtturi tal-Unjoni, produtturi esportaturi Ċiniżi, u assoċjazzjoni ta' produtturi esportaturi Ċiniżi ressqu sottomissjonijiet bil-miktub. Il-partijiet li talbu li jinstemgħu ngħataw din l-opportunità.

(4)

Il-Kummissjoni kkunsidrat il-kummenti ppreżentati mill-partijiet interessati, u fejn kien xieraq, immodifikat il-konklużjonijiet provviżorji skont dan.

(5)

Il-Kummissjoni għarrfet lill-partijiet kollha dwar il-fatti u l-kunsiderazzjonijiet essenzjali li abbażi tagħhom biħsiebha timponi dazju antidumping definittiv fuq l-importazzjonijiet ta' ċerti pajpijiet u tubi mingħajr ġonġituri (“l-iżvelar definittiv”). Il-partijiet kollha ngħataw perjodu li fih setgħu jagħmlu l-kummenti tagħhom dwar l-iżvelar definittiv. Il-kummenti ppreżentati mill-partijiet interessati tqiesu u fejn xieraq ittieħdu inkunsiderazzjoni.

(6)

Fil-premessi minn (7) sa (9) tar-Regolament provviżorju, il-Kummissjoni stiednet kummenti dwar ir-rappreżentattività ta' wieħed mill-produtturi tal-Unjoni fil-kampjun.

(7)

Produttur esportatur Ċiniż sostna li l-produttur tal-Unjoni għandu jitneħħa mill-kampjun billi d-dejta tiegħu toħloq distorsjoni fil-konklużjonijiet għall-industrija sħiħa. Produttur esportatur Ċiniż ieħor enfasizza li Vallourec kienet l-ikbar kumpanija il-kampjun, għalhekk ma kienx ċar jekk il-kampjun kienx rappreżentattiv tal-industrija tal-Unjoni. L-ilmentatur argumenta li l-produtturi Ċiniżi qegħdin dejjem iktar jikkompetu wkoll fi prodotti mfassla apposta u ta' livell għoli. Huwa indika wkoll li l-prodotti taż-żejt u tal-gass huma esportati l-iktar barra mill-Unjoni, għalhekk din id-differenza fil-firxa tal-prodott għandha biss rwol żgħir fis-suq tal-Unjoni.

(8)

Il-Kummissjoni talbet dejta addizzjonali u għamlet żjara ta' verifika ulterjuri fil-post tax-xogħol tal-produttur tal-Unjoni. Il-konklużjonijiet urew li l-produttur tal-Unjoni jipproduċi firxa usa' ta' tipi ta' prodotti mill-produtturi tal-Unjoni l-oħra fil-kampjun, imma din il-firxa wiesgħa ta' prodott, inklużi pajpijiet għall-ġenerazzjoni tal-enerġija, iż-żejt u l-gass u l-kostruzzjoni, kienet fid-definizzjoni tal-prodott. Kemm il-produtturi tal-Unjoni kif ukoll il-produtturi Ċiniżi huma involuti fiż-żewġ prodotti ta' komodità u prodotti ta' livell għoli. Il-produttur tal-Unjoni speċifiku jirrappreżenta parti kbira tal-produzzjoni tal-Unjoni. Il-Kummissjoni għalhekk ikkonkludiet li l-produttur tal-Unjoni huwa parti mill-industrija tal-Unjoni, u ma hemmx raġunijiet biex jiġi eskluż mill-kampjun. Kull impatt bla bżonn tas-sitwazzjoni speċifika ta' din il-kumpanija fl-ambitu tad-dannu ġie ttrattat permezz ta' aġġustamenti tal-ispejjeż u l-ponderazzjoni, kif spjegat fil-premessi (81), (84) u (146).

(9)

L-assoċjazzjoni ta' produtturi esportaturi Ċiniżi tenniet il-kummenti ta' qabel tagħha kontra l-bidu ta' investigazzjoni, fosthom l-oppożizzjoni tagħha għall-metodu li jiġi stabbilit kampjun preliminari qabel il-bidu. Hija allegat ukoll li l-ilment ma ġiex issostanzjat, kien ta' kwalità baxxa u bbażat fuq suppożizzjonijiet, id-definizzjoni tal-prodott kienet wiesgħa wisq u tiġbor flimkien prodotti differenti wisq, u kien hemm wisq elementi kunfidenzjali.

(10)

Il-Kummissjoni fakkret li l-għażla preliminari ta' kumpaniji fil-kampjun kienet miftuħa għal kummenti mill-partijiet interessati. Il-kummenti tal-assoċjazzjoni Ċiniża ġew riċevuti biss wara d-data tal-iskadenza, sa liema stadju l-kampjun kien diġà ġie kkonfermat. Għalhekk ġie miċħud. Fir-rigward tal-oġġezzjonijiet l-oħra, il-Kummissjoni indikat li fl-istadju tal-ilment, ma kienx meħtieġ li jkun hemm diġà l-istess evidenza ta' dumping u dannu li tkun neċessarja għall-impożizzjoni ta' miżuri. L-oġġezzjonijiet dwar l-annessi kunfidenzjali tal-ilment ġew eżaminati u ġiet ikkonfermata l-ġustifikazzjoni għall-kunfidenzjalità. F'kull każ, l-assoċjazzjoni Ċiniża rċeviet risposta ddettaljata għall-oġġezzjonijiet tagħha kontra l-bidu.

(11)

Fin-nuqqas ta' kummenti oħra rigward il-metodu ta' kampjunar, il-konklużjonijiet provviżorji stabbiliti fil-premessi (10) sa (13) tar-Regolament provviżorju ġew ikkonfermati.

(12)

Kif imsemmi fil-premessa (14) tar-Regolament provviżorju tliet produtturi esportaturi li ma kinux inklużi fil-kampjun talbu li jiġi stabbilit marġni individwali ta' dumping skont l-Artikolu 17(3) tar-Regolament bażiku. Madankollu, wara l-pubblikazzjoni tal-miżuri provviżorji, tnejn minnhom iddeċidew li jirtiraw it-talba tagħhom għal eżami individwali. L-uniku produttur esportatur li kkonferma t-talba inizjali tiegħu għal eżami individwali kien Zhejiang Gross Seamless Steel Tube Co., Ltd.

(13)

Ma ġew sottomessi l-ebda formoli għal trattament ta' ekonomija tas-suq minn ebda produtturi esportaturi matul l-investigazzjoni. Għaldaqstant, is-sejbiet tal-premessa (15) tar-Regolament provviżorju ġew ikkonfermati.

(14)

Flimkien mal-kwestjonarji u ż-żjarat deskritti fil-premessi (16) u (17) tar-Regolament provviżorju, il-Kummissjoni bagħtet domandi addizzjonali lill-ilmentatur u lil produttur tal-Unjoni sabiex twettaq il-verifiki dwar id-dannu u l-kawżalità identifikati fir-Regolament provviżorju. Barra minn hekk, produttur esportatur Ċiniż irċieva kwestjonarju għal eżami individwali.

(15)

Saru żjarat ta' verifika fl-istabbilimenti tal-partijiet li ġejjin:

(16)

L-assoċjazzjoni ta' produtturi esportaturi Ċiniżi kkritikaw il-punt tal-bidu tal-perjodu kkunsidrat (2012), u sostnew li s-sena 2011 kienet tkun punt ta' bidu iktar xieraq. Ġie sostnut li l-importazzjonijiet miċ-Ċina lejn l-UE tal-prodott ikkonċernat naqas mill-2011 (46 657 tunnellata) għall-2012 (39 195 tunnellata). Bħala riżultat, l-2012 bħala sena bażi turi żieda ta' importazzjonijiet matul il-perjodu kkunsidrat (għal 42 539 tunnellata), filwaqt li fl-2011 bħala s-sena bażi turi tnaqqis ta' importazzjonijiet miċ-Ċina. Talbet spjegazzjoni ulterjuri dwar l-għażla tal-2012.

(17)

Il-Kummissjoni osservat li l-perjodu kkunsidrat ġie stabbilit skont il-prassi standard. Kif spjegat fil-premessa (18) tar-Regolament provviżorju, il-perjodu kkunsidrat ikopri tliet snin kalendarji sħaħ ta' qabel il-perjodu ta' investigazzjoni. Ma hemm l-ebda bażi sabiex jingħażel perjodu differenti. Il-kumment għalhekk ma ntlaqax. F'kull każ, id-dejta miġbura mill-partijiet interessati kopriet biss il-perjodu kkunsidrat. Id-determinazzjoni tal-indikaturi tad-dannu kienet possibbli biss mill-perjodu 2012 sal-2015. Għalhekk, id-dejta fuq il-volumi ta' importazzjoni miċ-Ċina mill-2011 ma kinitx tippemetti lill-Kummissjoni li tiġbed konklużjonijiet dwar l-iżvilupp kumplessiv tas-sitwazzjoni tal-industrija tal-Unjoni. Fid-dawl tax-xejra tal-profittabbiltà li qed tonqos mill-2012, kif deskritt fil-premessi minn (91) sa (92), l-inklużjoni tas-sena 2011 fil-perjodu kkunsidrat kieku kienet turi żvilupp negattiv iktar serju fis-sitwazzjoni tal-industrija tal-Unjoni.

(18)

Wara divulgazzjoni definittiva, poduttur esportatur Ċiniż u l-assoċjazzjoni ta' produtturi esportaturi Ċiniżi saħqu li fil-premessa (59) (li tikkorrispondi għall-premessa (47) tad-Dokument ta' Divulgazzjoni Ġenerali) l-ispjegazzjoni tal-Kummissjoni għad-differenzi fil-volumi tal-esportazzjoni ma kienet ibbażata fuq l-ebda evidenza.

(19)

Il-Kummissjoni ċċarat li l-premessa (59) ma kenitx tikkonċerna t-talba tal-inklużjoni tas-sena 2011 fil-perjodu tal-investigazzjoni, iżda minflok kienet tirreferi għal kumment differenti mingħand parti interessata oħra, li kienet iddikjarat inkonsistenza fil-konfornt ta' investigazzjoni preċedenti tal-istess prodott. Id-dikjarazzjonijiet tal-assoċjazzjoni Ċiniża tal-produtturi esportaturi li kienu jikkonċernaw il-perjodu ta' investigazzjoni ġew indirizzati fil-premessa (17).

(20)

Fin-nuqqas ta' kummenti oħrajn dwar il-perjodu tal-investigazzjoni, ġiet ikkonfermata l-premessa (18) tar-Regolament provviżorju.

(21)

Produttur esportatur Ċiniż sostna li d-definizzjoni tal-prodott kienet wiesgħa żżejjed billi tinkludi tipi ta' prodott ta' azzar illigat li l-kosti u l-prezzijiet rispettivi tagħhom jiddevjaw b'mod sinifikanti mill-prodott standard ikkonċernat. Huwa talab l-esklużjoni tat-tipi tal-prodott magħmulin mill-azzar illigat u azzar illigat ħafna (3) mid-definizzjoni tal-prodott.

(22)

L-assoċjazzjoni ta' produtturi esportaturi Ċiniża sostniet li d-definizzjoni tal-prodott iġġib flimkien tliet setturi tas-suq differenti: (a) żejt/gass, (b) impjanti tal-enerġija u (c) kostruzzjoni, u li dak id-dannu kellu jiġi evalwat separatament għal kull segment. Jingħad li l-prodott intiż għal segment tas-suq wieħed huwa meħtieġ għall-konformità ma' standards industrijali speċifiċi u għalhekk ma jistax jintuża f'segment ieħor. Bħala prova ta' dan tal-aħħar, hija rriferiet għall-prattika fil-Kanada u l-Istati Uniti, fejn investigazzjonijiet antidumping kienu sseparaw il-pajpijiet u t-tubi prodotti għas-settur taż-żejt/gass minn pajpijiet u tubi prodotti għal setturi oħrajn.

(23)

Fir-rigward tal-oġġezzjoni tal-aħħar, parti waħda interessata sostniet li l-esportazzjonijiet tagħhom lejn l-Unjoni kienu relatati biss mas-settur tal-kostruzzjoni.

(24)

Fir-rigward tal-ewwel oġġezzjoni dwar l-azzar illigat u l-azzar illigat ħafna, il-Kummissjoni nnutat li d-definizzjoni tal-prodott ikkonċernat tkopri varjetà wiesgħa ta' tipi ta' prodotti li jaqsmu l-istess karatteristiċi bażiċi tekniċi u fiżiċi jew simili għalihom. Il-Kummissjoni qieset id-differenzi fost it-tipi ta' prodotti u żgurat li jkun hemm paragun ġust. Ġie allokat numru tal-kontroll tal-prodotti (product control number — PCN) uniku għal kull tip ta' prodott li jiġi prodott u mibjugħ mill-produtturi esportaturi Ċiniżi u għal kull wieħed prodott u mibjugħ mill-industrija tal-Unjoni. Il-PCN kien jiddependi fuq il-karatteristiċi ewlenin tal-prodott, f'dan il-każ, it-tip ta' prodott, id-dijametru estern, il-ħxuna tal-ħajt, it-tberrid u l-ittemprar, it-tul, l-estremità tat-tubu, u l-ittestjar. Għaldaqstant, it-tipi ta' prodott importati miċ-Ċina ġew imqabbla abbażi tal-PCN mal-prodotti li ġew prodotti u mibjugħa mill-industrija tal-Unjoni li għandhom l-istess karatteristiċi jew karatteristiċi simili. B'mod partikolari, l-ewwel karatteristika (tip ta' prodott) isseparat azzar mhux illigat, illigat u illigat ħafna. Għalhekk id-differenzi f'kosti u prezzijiet ġejjin minn azzar illigat u lligat ħafna ttieħdu inkunsiderazzjoni fil-paraguni. Skont il-ġurisprudenza (4), meta jiġi ddeterminat jekk il-prodotti humiex simili biex jiffurmaw parti mill-istess prodott, jeħtieġ li jiġi vvalutat jekk għandhomx l-istess karatteristiċi tekniċi u fiżiċi, u għandhomx l-istess użi finali bażiċi u l-istess relazzjoni bejn il-prezz u l-kwalità. F'dak ir-rigward, l-interskambjabbiltà ta', u l-kompetizzjoni bejn, dawk il-prodotti għandhom jiġu vvalutati wkoll. L-investigazzjoni sabet li t-tipi kollha ta' prodott huma magħmula mill-azzar bl-użu ta' proċessi ta' manifattura meħtieġa għall-produzzjoni ta' pajpijiet mingħajr ġonġituri, b'hekk bl-użu ta' magni simili, b'tali mod li l-produtturi jistgħu jaqilbu bejn varjanti differenti tal-prodott, skont id-domanda. Għaldaqstant, għalkemm it-tipi differenti tal-prodott mhumiex direttament interskambjabbli, il-produtturi qed jikkompetu għal ordnijiet li jkopru firxa wiesgħa ta' tipi ta' prodotti. Barra minn hekk, dawn it-tipi ta' prodotti huma prodotti u mibjugħa kemm mill-industrija tal-Unjoni kif ukoll mill-produtturi esportaturi Ċiniżi bl-użu ta' metodu simili ta' produzzjoni.

(25)

Fir-rigward tat-tieni oġġezzjoni dwar is-segmenti tas-suq, l-oġġezzjoni ma tissostanzjax fuq liema bażi tipi ta' prodotti ta' segment tas-suq wieħed jew ieħor għandhom jiġu esklużi mid-definizzjoni tal-prodott. Lanqas ma huwa spjegat għaliex għandha ssir evalwazzjoni tad-dannu separata skont is-segment. Id-definizzjoni tal-prodott ikkonċernat, li tkopri pajpijiet u tubi mingħajr ġonġituri b'dijametru estern li jaqbeż 406, 4 mm, la ġiet ikkontestata wara n-Notifika ta' bidu, u lanqas fir-risposti tal-kwestjonarju u ż-żjarat ta' verifika. Kif spjegat fil- premessa(24), il-PCN hija bbażata fuq karatteristiċi bażiċi fiżiċi u tekniċi, mhux fuq l-użu finali potenzjali jew is-segment tas-suq. F'kull każ, l-investigazzjoni wriet li kemm il-produtturi esportaturi Ċiniżi kif ukoll il-produtturi tal-Unjoni jikkompetu fit-tliet segmenti kollha. Barra minn hekk, ir-rati tad-dazju għal kull produttur esportatur Ċiniż huma kkalkulati fuq il-bażi ta' medja ponderata skont it-tip ta' prodott. Bħala riżultat, id-dazji totali li għandhom jitħallsu jibqgħu identiċi għal taħlita ta' prodott partikolari. Filwaqt li ċerti tipi ta' prodott jiksbu marġni iktar baxxi u oħrajn marġni ogħla, is-somma tal-marġni kollha tkun ugwali għall-ponderazzjoni medja tat-tipi kollha tal-prodott.

(26)

Wara divulgazzjoni definittiva, produttur esportatur Ċiniż u l-assoċjazzjoni ta' produtturi esportaturi Ċiniżi komplew jikkontestaw l-ambitu tal-prodott. Huma argumentaw li, minħabba r-rekwiżiti differenti f'termini ta' standards, kontenut ta' liga, u użi finali, il-prodotti għas-segment taż-żejt u tal-gass kienu differenti mill-prodotti għaż-żewġ segmenti l-oħrajn, u mhux interskambjabbli. Allegatament, il-PCN ma setax jippermetti tqabbil xieraq bejn it-tipi ta' prodotti, billi l-ambitu stess tal-prodott ma kienx definit kif xieraq. Fir-rigward tal-produtturi li jdawru l-attenzjoni tagħhom minn segment għal ieħor, huma ddikjaraw li d-diffikultajiet fiż-żewġ segmenti l-oħrajn għaldaqstant kienu r-riżultat tal-forzi tas-suq u mhux relatati mal-importazzjonijiet miċ-Ċina. Barra minn hekk, huma allegaw li t-tidwir fl-attenzjoni tal-produtturi tal-Unjoni lejn segmenti oħrajn kien strateġija kummerċjali li bilfors kienet timplika tnaqqis fid-dħul, minħabba t-tnaqqis fil-prezzijiet tal-bejgħ fis-segmenti l-oħrajn meta mqabbla mal-prodotti taż-żejt u tal-gass.

(27)

Il-Kummissjoni rreferiet għall-premessa (24) fejn ikkonkludiet li filwaqt li wħud mit-tipi ta' prodotti differenti ma kinux direttament interskambjabbli, speċjalment minħabba r-rekwiżiti differenti f'termini ta' standards u materji primi, madankollu kellhom l-istess karatteristiċi tekniċi u fiżiċi bażiċi, jew karatteristiċi simili. Fir-rigward tat-tidwir fl-attenzjoni lejn segmenti oħrajn, il-kummenti minn partijiet interessati ma kkontestawx il-kapaċità li l-produtturi jdawru l-attenzjoni tagħhom minn segment għal ieħor. Għaldaqstant, il-kummenti kkonfermaw is-sejbiet fil-premessa (24) li l-prodotti għal segmenti differenti kienu prodotti mill-istess produtturi, b'magni simili, u li l-produtturi jistgħu jibdlu bejn varjanti differenti. Għaldaqstant, il-Kummissjoni kkonkludiet li l-ambitu tal-prodott kien korrett, u allura t-tqabbil bejn it-tipi ta' prodotti kien possibbli abbażi tal-PCN. Għaldaqstant, hija kkonkludiet li dawn id-dikjarazzjonijiet ma kkontradixxewx is-sejbiet tal-investigazzjoni.

(28)

Għalhekk il-Kummissjoni kkonkludiet li t-tipi kollha ta' prodott ikkonċernat jaqsmu l-istess karatterisitiċi bażiċi fiżiċi u tekniċi. B'konsegwenza ta' dan, id-dikjarazzjonijiet ta' hawn fuq ġew miċħuda u l-konklużjonijiet tal-premessi minn (19) sa (22) tar-Regolament provviżorju ġew ikkonfermati.

(29)

Kif imsemmi fil-premessi (24) sa (28) tar-Regolament provviżorju, intgħażel il-Messiku bħala l-pajjiż analogu xieraq sabiex jiġu stabbiliti l-valuri normali għar-RPĊ skont l-Artikolu 2(7) tar-Regolament bażiku.

(30)

Wara l-impożizzjoni ta' miżuri provviżorji, parti interessata waħda sostniet li l-Korea ta' Isfel għandha tiġi kkunsidrata bħala pajjiż analogu aħjar billi l-kosti ta' produzzjoni u l-proċess ta' produzzjoni f'impjanti Koreani jixbah ferm iżjed dak tal-impjanti Ċiniżi. Intqal ukoll li hemm differenzi sinjifikanti f'termini ta' kosti u teknoloġija użati fil-proċess ta' produzzjoni bejn uħud mill-produtturi esportaturi Ċiniżi u l-produttur tal-pajjiż analogu jew produtturi tal-Unjoni. Il-proċess ta' produzzjoni taċ-Ċiniżi huwa allegatament iktar avvanzat u għandhom isiru ċerti aġġustament sabiex jiġi ggarantit tqabbil ġust.

(31)

Ta' min jinnota li l-prodott ikkonċernat jikkostitwixxi suq niċċa u għalhekk numru relattivament żgħir ta' produtturi huma kapaċi jipproduċuh. Barra minn hekk, il-kooperazzjoni mal-pajjiż analogu hija volontarja. Ghalkemm CISA ssuġġeriet li l-Korea ta' Isfel tkun għażla iktar xierqa għal pajjiż analogu, ma pproponietx produttur Korean speċifiku li kien lest jikkoopera. Qed jitfakkar hawnhekk, li fl-istadju provviżorju l-Kummissjoni talbet il-kooperazzjoni minn 13-il kumpanija fi 8 pajjiżi. Anki għalkemm kumpanija fil-Korea ta' Isfel kienet fost dawn il-kumpaniji, il-kumpanija speċifika qatt ma wieġbet għat-talba. Skont tiftix fuq l-internet u konsultazjoni tas-siti web tal-kumpaniji ta' 41 produttur ta' prodotti tal-azzar fil-Korea ta' Isfel, instab li tlieta minnhom biss ipproduċew pajpijiet u tubi mingħajr ġonġituri. Tnejn minn dawn tal-aħħar ipproduċew pajpijiet u tubi ta' dijametru żgħir li mhuwiex il-prodott ikkonċernat u l-uniku produttur fil-Korea ta' Isfel li pproduċa l-prodott ikkonċernat, għamel użu minn teknoloġija ta' produzzjoni li mhijiex paragunabbli mat-teknoloġiji ta' produzzjoni li kienu użati l-iktar mill-produtturi Ċiniżi. L-evidenza misjuba matul l-investigazzjoni tindika li l-Korea ta' Isfel kienet qed tipproduċi b'mod predominanti pajpijiet u tubi mingħajr ġonġituri ta' dijametru żgħir, li mhux il-prodott li qed jiġi investigat, jew tagħmel użu minn teknoloġija ta' produzzjoni li mhix kumpatibbli ma' dik tal-produtturi Ċiniżi tal-prodott ikkonċernat. Għaldaqstant, il-Kummissjoni kkonkludiet li l-Korea ta' Isfel ma setgħetx tiġi kkunsidrata bħala pajjiżi analogu adegwat.

(32)

Barra minn dan, għalkemm teżisti varjetà ta' proċessi ta' produzzjoni fost il-produtturi Ċiniżi, il-proċess ta' produzzjoni tal-produttur Messikan huwa wieħed mill-proċessi użati mill-produtturi Ċiniżi. Ix-xebh tal-proċessi tal-produzzjoni bejn il-Messiku u ċ-Ċina sostna iktar il-konklużjoni li l-Messiku kien pajjiż analogu xieraq għal din l-investigazzjoni.

(33)

Il-parti interessata ma ssottomettietx evidenza suffiċjenti sabiex tispjega u tikkwantifika f'termini ta' kosti d-differenzi bejn it-teknoloġija ta' produzzjoni allegatament avvanzata tagħha u t-teknoloġija li tintuża fil-Messiku. Ma pprovdiet l-ebda informazzjoni tal-kosti ta' produttur Ċiniż speċifiku, lanqas għas-settur ta' attività fiċ-Ċina, lanqas ma rriferiet għal xi produttur ieħor li juża proċessi ta' produzzjoni simili, li kienu jippermettu lill-Kummissjoni li tivvaluta d-differenzi allegati bejn it-teknoloġija użata fiċ-Ċina u l-produttur Messikan li kkoopera, u l-impatt, jekk kien hemm, f'kemm kien xieraq il-Messiku bħala pajjiż analogu. Barra minn hekk, ma kien hemm l-ebda koperazzjoni mill-Korea ta' Isfel. Għalhekk, it-talba ġiet miċħuda. Għaldaqstant, il-Kummissjoni kkonfermat il-Messiku bħala l-uniku pajjiż analogu xieraq disponibbli.

(34)

Wara divulgazzjoni definittiva, produttur esportatur Ċiniż iddikjara li l-Kummissjoni aċċettat lill-Messiku bħala l-pajjiż analogu mingħajr kritika minħabba r-raġuni li din l-għażla kienet tissodisfa l-ħtiġijiet tagħha li ssib marġini ta' dumping għoljin.

(35)

It-talba speċifika kienet sempliċi dikjarazzjoni u l-parti interessata ma ssostanzjatx l-asserzjoni tagħha u lanqas ma pprovdiet evidenza li l-Messiku ma kenitx pajjiż analogu xieraq. Fi kull każ, il-Kummissjoni tfakkar li meta tirċievi biss kooperazzjoni mingħand produttur esportatur wieħed f'pajjiż b'ekonomija tas-suq, il-Kummissjoni hija obbligata, abbażi tas-sentenza GLS (C-338/10), li tuża dak il-pajjiż. Għalhekk, it-talba ġiet miċħuda.

(36)

Id-dettalji għall-kalkolu tal-valur normali huma stabbiliti fil-premessi (29) sa (37) tar-Regolament provviżorju.

(37)

Produttur esportatur Ċiniż sostna li l-parti l-kbira tad-dejta biex jiġi stabbilit il-marġni tad-dumping inżamm kunfidenzjali b'mod mhux raġonevoli. Il-parti kkummentat b'mod speċjali fuq il-fatt li l-valur normali tal-produttur li kkoopera ma ġiex żvelat.

(38)

Skont l-Artikolu 19(1) tar-Regolament bażiku, informazzjoni ta' natura kunfidenzjali hija informazzjoni li l-iżvelar tagħha jista' jikkawża: (1) żvantaġġ sinifikanti għal kompetitur, jew (2) effett negattiv sinifikanti fuq persuna li tipprovdi l-informazzjoni jew fuq persuna li l-informazzjoni tkun waslet mingħandha. Billi d-dejta rigward il-bejgħ u l-ispejjeż għandha natura kunfidenzjali, fir-Regolament provviżorju d-dejta rigward profitt, bejgħ, spejjeż ġenerali u amministrattivi tal-produttur tal-pajjiż analogu ġiet ipprovduta fuq bażi perċentwali f'firxiet, u għalhekk tipprovdi trasparenza sal-ikbar estent possibbli mingħajr ma tikser in-natura kunfidenzjali tagħha. Il-produttur tal-pajjiż analogu talab u ġġustifika trattament ta' kunfidenzjalità tad-dejta tal-bejgħ u l-ispejjeż tiegħu, li l-iżvelar tagħhom jista' jagħmel ħsara lill-pożizzjoni kompetittiva tal-kumpanija. Barra minn hekk, l-iżvelar tal-valur normali jista' jipprovdi l-possibbiltà li kompetitur jibni l-prezzijiet u l-ispejjeż b'lura tal-produttur tal-pajjiż analogu. Għalhekk, it-talba ġiet miċħuda.

(39)

Fin-nuqqas ta' kwalunkwe kummenti oħra dwar il-valur normali, il-premessi minn (29) sa (37) tar-Regolament provviżorju ġew ikkonfermati.

(40)

Wara divulgazzjoni definittiva, produttur esportatur Ċiniż, Zhejiang Gross Seamless Steel Tube Co., Ltd (“Gross”) iddikjara li l-Kummissjoni użat valur normali maħdum biss għas-27 tip ta' prodotti li Gross esporta matul il-perjodu tal-investigazzjoni, mingħajr ma ddistingwa bejn it-tipi differenti ta' azzar u l-kostijiet għat-tberrid u t-temprar fil-proċess tal-produzzjoni tiegħu. Id-dikjarazzjoni speċifika kienet ibbażata fuq il-qari u l-interpretazzjoni tal-partijiet individwali tad-dokument ta' divulgazzjoni ġenerali billi jiżolaw it-tifsira tagħhom mit-tifsira tad-dokument sħiħ.

(41)

Il-Kummissjoni tfakkar hawnhekk li d-dettalji sabiex jiġi kkalkolat il-marġni ta' dumping kienu stabbiliti fil-premessi minn (44) sa (47) tar-Regolament provviżorju u msemmija fil-premessa (41) tad-dokument ta' divulgazzjoni ġenerali. Il-premessa (44) tar-Regolament provviżorju semmiet b'mod preċiż li l-Kummissjoni qabblet il-valur normali mal-prezz tal-esportazzjoni għal kull tip ta' prodott waħdu u qatt ma użat valur normali wieħed għat-tipi kollha ta' prodotti. It-tipi ta' prodotti li ntużaw għat-tqabbil kienu definiti fil-kwestjonarji li ntbagħtu lill-produttur ta' pajjiż analogu, lill-produtturi esportaturi Ċiniżi u lill-produtturi tal-Unjoni. Il-grad tal-azzar, it-tberrid u t-temprar u karatteristiċi oħrajn kienu speċifikati u meqjusa biex jiġi kkalkulat il-kost tal-produzzjoni u l-kostruzzjoni tal-valur normali għal kull tip ta' prodott b'mod separat, billi jsir aġġustament għal kull karatteristika kif xieraq. Billi d-dikjarazzjoni kienet ibbażata fuq miżinterpretazzjoni tad-dokument ta' divulgazzjoni ġenerali, din ġiet miċħuda.

(42)

Gross iddikjara wkoll li l-Kummissjoni jinħtieġ li telimina mill-bejgħ tagħha b'esportazzjoni dawk it-tipi ta' prodotti li TAMSA, il-produttur Messikan tal-pajjiż analogu, ma jipproduċix.

(43)

Il-prattika tal-Kummissjoni wara s-sentenza tad-WTO dwar il-każ “European Communities — Definitive Anti-Dumping Measures on Certain Iron or Steel Fasteners from China” (5) hi li jinħtieġ li jinstab jew jinbena valur normali għat-tipi kollha esportati mill-produttur esportatur. Għaldaqstant, il-Kummissjoni tiċħad din id-dikjarazzjoni.

(44)

Fin-nuqqas ta' kwalunkwe kummenti dwar il-prezz tal-esportazzjoni, il-premessi (38) u (39) tar-Regolament provviżorju ġew ikkonfermati.

(45)

Id-dettalji għall-metodu użat għall-paragun bejn il-valur normali u l-prezz tal-esportazzjoni tal-produtturi esportaturi fil-kampjun huma stabbiliti fil-premessi (40) sa (43) tar-Regolament provviżorju.

(46)

Hawnhekk jiġi mfakkar li ċ-Ċina tapplika politika tar-rimborż tal-VAT b'mod parzjali biss fil-mument tal-esportazzjoni. Sabiex jiġi żgurat li l-valur normali jiġi espress fl-istess livell ta' tassazzjoni bħal tal-prezz tal-esportazzjoni, il-valur normali fir-Regolament provviżorju ġie ddeterminat bl-inklużjoni tal-VAT impost fuq l-esportazzjonijiet ta' pajpijiet u tubi mingħajr ġonġituri ta' dijametru kbir li ma ġiex rimborżat lill-produtturi esportaturi Ċiniżi. Il-VAT speċifikat mhux rimborżabbli kien fil-livell ta' 8 % għat-tipi kollha ta' prodotti.

(47)

F'dan ir-rigward, l-ilmentaturi kkumentaw li l-VAT rimborżabbli fiċ-Ċina ma kienx l-istess għat-tipi kollha ta' prodotti. Speċifikament, għal pajpijiet u tubi użati fit-negozju tal-esplorazzjoni taż-żejt u l-gass, il-VAT rimborżabbli kien ta 13 % u għat-tipi l-oħra ta' prodotti kien ta' 9 %. L-ilmentatur stqarr li l-marġnijiet ta' dumping għandhom jiġu kkalkolati mill-ġdid skont dan u talab konferma li l-VAT speċifikat effettivament tħallas qabel isir ir-rimborż.

(48)

Peress li l-VAT fiċ-Ċina kien l-istess għat-tipi kollha ta' prodotti fil-livell ta' 17 %, il-VAT mhux rimborżabbli għall-pajpijiet u t-tubi użati fit-negozju tal-esplorazzjoni taż-żejt u l-gass għalhekk kien ta' 4 % u għat-tipi l-oħra ta' prodotti kien ta' 8 %.

(49)

Għalhekk, il-Kummissjoni rrevediet l-aġġustamenti għall-kumpaniji li rrappurtaw il-VAT attwali rimborżat fuq il-bażi ta' tranżazzjoni tranżazzjoni fit-tweġibiet tagħhom għall-kwestjonarju. Il-produtturi esportaturi speċifiċi kienu Yangzhou Lontrin Steel Tube Co., Ltd. u Hengyang Valin MPM Co., Ltd. Il-marġnijiet ta' dumping għal dawk il-kumpaniji ġew ikkalkulati mill-ġdid skont dan. Il-kalkolu mill-ġdid li jqis ir-rati speċifiċi ta' VAT mhux rimborżabbli wassal għal marġnijiet ta' dumping kemxejn iktar baxxi. Il-marġnijiet ta' dumping tal-kumpaniji l-oħrajn fil-kampjun baqgħu fil-livell provviżorju.

(50)

Matul iż-żjarat ta' verifika ġie kkonfermat li l-VAT effettivament tħallas qabel ġie rimborżat.

(51)

Id-dettalji tal-kalkolu tad-dumping ġew stabbiliti fil-premessi (44) sa (47) tar-Regolament provviżorju.

(52)

Rigward il-produtturi esportaturi fil-kampju, l-aġġustamenti tal-VAT l-iktar preċiżi fuq il-valuri normali wasslu għal marġnijiet tad-dumping definittivi, espressi bћala perċentwali tal-prezz CIF fuq il-fruntiera tal-Unjoni, bid-dazju mhux imħallas, kif ġej:

Għall-uniku produttur esportatur li talab eżami individwali, Zhejiang Gross Seamless Steel Tube Co., Ltd, il-marġni tad-dumping definittiv fid-dokumenti ta' divulgazzjoni ġenerali huwa ta' 66,0 %.

(53)

Wara d-divulgazzjoni definittiva, produttur esportatur Ċiniż (Zhejiang Gross Seamless Steel Tube Co., Ltd (“Gross”)) iddikjara li l-marġni ta' dumping tiegħu (66,0 %) ma jistax ikun ogħla mill-marġni ta' dumping ta' Yangzhou Chengde Steel Pipe Co., Ltd, (“Chengde”) u Yangzhou Lontrin Steel Tube Co., Ltd (“Lontrin”) li kienu 45,4 % u 39,9 % rispettivament. Id-dikjarazzjoni kienet ibbażata fuq il-konġunzjoni ta' żewġ kunsiderazzjonijiet: (i) is-suppożizzjoni li l-valur normali li ntuża biex jiġu kkalkulati l-marġnijiet tad-dumping kien l-istess għat-tliet esportaturi Ċiniżi, u (ii) il-fatt li, skont l-istatistika kummerċjali Ċiniża fil-livell tal-kodiċijiet doganali, il-prezz medju unitarju tal-esportazzjoni kien ogħla mill-prezzijiet rispettivi ta' Chengde u Lontrin.

(54)

Fir-rigward tas-suppożizzjoni li għamel Gross, il-Kummissjoni tfakkar li l-kalkolu tal-marġni tad-dumping ma kienx ibbażat fuq valur normali medju għal kull produttur esportatur, iżda fuq il-valur normali ta' kull tip ta' prodott li ġie esportat lejn is-suq tal-Unjoni minn dan il-produttur esportatur. Għaldaqstant, it-taħlit tal-prodotti li ġew esportati iddetermina l-kalkulazzjoni tal-marġni medju peżat ta' dumping. Billi t-tliet produtturi esportaturi ma esportawx l-istess taħlit ta' prodotti matul il-perjodu ta' investigazzjoni, is-suppożizzjoni li għamel Gross mhijiex korretta. Barra minn hekk, il-prezzijiet unitarji tal-esportazzjoni li ntużaw biex jiġi kkalkulat il-marġni ta' dumping kienu bbażati fuq it-tranżazzjonijiet attwali ta' esportazzjoni u mhux fuq dejta statistika. Fl-istess ħin, il-prezzijiet unitarji ta' esportazzjoni ġew determinati fil-livell tat-tipi ta' prodotti li ma kkorrispondewx mal-livell tal-kodiċi doganali li Gross uża fid-dikjarazzjoni tiegħu. Billi d-dikjarazzjoni kienet ibbażata fuq suppożizzjonijiet żbaljati u mhux biżżejjed fatti, din ġiet miċħuda. Madankollu, il-korrezzjoni ta' xi żbalji ta' kopjar li nkixfu matul l-eżami mill-ġdid tal-kalkoli tal-marġni ta' dumping wassal għal tnaqqis fil-marġni ta' dumping definittiv minn 66,0 % għal 52,3 %.

(55)

Fin-nuqqas ta' kummenti oħrajn rigward l-industrija tal-Unjoni, il-premessi minn (49) sa (51) tar-Regolament provviżorju ġew ikkonfermati.

(56)

Il-kummenti għall-premessa (52) tar-Regolament provviżorju rigward it-teħid ta' kampjuni tal-industrija tal-Unjoni ġew ittrattati hawn fuq flimkien mal-kummenti għall-premessi minn (7) sa (9) tar-Regolament provviżorju.

(57)

Fin-nuqqas ta' kummenti rigward il-konsum tal-Unjoni, il-konklużjonijiet stabbiliti fil-premessa (53) tar-Regolament provviżorju ġew ikkonfermati.

(58)

Wara d-divulgazzjoni proviżorja, produttur esportatur Ċiniż ikkontesta l-volum ta' importazzjoni tal-2012 fil-premessa (54) tar-Regolament provviżorju, fejn stqarr li l-volum kien differenti mid-dejta użata f' investigazzjoni mitmuma qabel li kienet ikkonċernat l-istess prodott.

(59)

Il-Kummissjoni ċċarat li l-ilment f'dik l-investigazzjoni preċedenti kienet ippreżentata f'Diċembru 2012. Għalhekk, ma kienx fiha l-volumi tal-importazzjoni għas-sena sħiħa 2012, iżda minflok kienet ibbażata fuq it-tieni nofs tal-2011 u l-ewwel nofs tal-2012. Id-dejta użata fil-premessa (54) tar-Regolament provviżorju rriflettiet id-dejta tal-Eurostat għas-snin kollha mill-2012 sal-2015. Għaldaqstant, id-dikjarazzjoni ġiet miċħuda.

(60)

Wara divulgazzjoni definittiva, produttur esportatur Ċiniż u l-assoċjazzjoni ta' produtturi esportaturi Ċiniżi ddikjaraw li fil-premessa (59) l-ispjegazzjoni tal-Kummissjoni ma kenitx tindirizza d-dikjarazzjoni tagħhom li s-sena 2011 kienet tkun aktar xierqa bħala sena ta' bidu tal-perjodu ta' investigazzjoni.

(61)

Il-Kummissjoni ċċarat li l-premessa (59) tirreferi għal dikjarazzjoni differenti minn parti interessata differenti. Id-dikjarazzjoni rigward il-perjodu ta' investigazzjoni ġiet indirizzata fil-premessa (17).

(62)

Fin-nuqqas ta' xi kumment ieħor dwar il-volumi tal-importazzjoni, il-premessi (54) u (55) tar-Regolament provviżorju ġew ikkonfermati.

(63)

Wara divulgazzjoni definittiva, instab żball ta' kopjar rigward l-istatistika ta' importazzjoni fil-premessi minn (56) sa (58) u fil-premessa (105) tar-Regolament provviżorju.

(64)

B'riżultat ta' dan, il-konklużjonijiet tal-premessa (56) tar-Regolament provviżorju ġw riveduti kif ġej:

It-tabella ta' hawn taħt turi l-prezz medju tal-importazzjonijiet miċ-Ċina:

(65)

Is-sejbiet tal-premessa (57) tar-Regolament provviżorju ġew riveduti kif ġej:

Il-prezzijiet medji ta' importazzjoni ġew stabbiliti abbażi tal-istatistika tal-importazzjoni tal-Eurostat. Il-prezzijiet medji ta' importazzjoni miċ-Ċina baqgħu pjuttost stabbli matul il-perjodu meqjus. Il-prezzijiet ta' importazzjoni kienu kemxejn aktar baxxi fis-sena 2014 mis-snin preċedenti, iżda fl-2015 il-prezzijiet reġgħu żdiedu għal-livelli inizjali tagħhom.

(66)

Is-sejbiet tal-Premessa (58) tar-Regolament provviżorju ġw riveduti kif ġej:

Madankollu, il-prezzijiet medji tal-importazzjoni jiddependu fuq it-taħlita tal-prodotti, b'mod partikulari l-grad tal-azzar, li mhuwiex viżibbli fl-istatistika kummerċjali. Filwaqt li l-prezz medju tal-bejgħ bl-esportazzjoni tal-produtturi esportaturi Ċiniżi kollha kien ta' 1 099 EUR/tunnellata fil-PI, il-prezz medju tal-bejgħ bl-esportazzjoni tal-produtturi esportaturi Ċiniżi fil-kampjun kien ta' 1 102 EUR/tunnellata, b'firxa minn 946 EUR/tunnellata għal 1 444 EUR/tunnellata.

(67)

Fin-nuqqas ta' xi kumment ieħor dwar il-prezzijiet tal-importazzjoni, il-premessi minn (56) sa (59) tar-Regolament provviżorju ġew riveduti fil-premessi minn (64) sa (66).

(68)

Wara l-iżvelar provviżorju, produttur esportatur Ċiniż u l-assoċjazzjoni tal-produtturi esportaturi Ċiniżi talbu aktar ġustifikazzjoni għall-eliminazzjoni ta' żewġ karatteristiċi min-numri ta' kontroll tal-prodott (PCN) għall-finijiet tal-istabbiliment ta' marġnijiet ta' twaqqigħ tal-prezz u tad-dannu. Huma allegaw li t-tneħħija ta' dawn iż-żewġ karatteristiċi seta' wassal għal marġnijiet tad-dannu għoljin b'mod mhux raġonevoli. Huma talbu wkoll kjarifiki dwar għaliex il-214NN PCNs u 215NN esportati miċ-Ċina ma jaqblux mal-bejgħ tal-Unjoni tal-produtturi tal-Unjoni.

(69)

F'konformità mal-informazzjoni mogħtija lill-produtturi esportaturi fl-iżvelar provviżorju, il-Kummissjoni ċċarat li ma seta' jinstab ebda tqabbil suffiċjenti bl-użu tal-PCN sħiħ magħmul mis-seba' karatteristiċi. Il-PCN kien simplifikat bl-eliminazzjoni tal-karatteristiċi tal-prodott “tkessiħ u ttemprar” u “ittestjar”. Bħala riżultat tas-simplifikazzjoni, fl-istadju provviżorju 62 % sa 99 % tal-esportazzjonijiet tal-produtturi esportaturi Ċiniżi fil-kampjun qablu mat-tipi ta' prodotti mibjugħa fl-Unjoni mill-industrija tal-Unjoni. Kuntrarjament għal dak li kien allegat, ir-rata ta' tqabbil iktar għolja żgurat li s-sejbiet tad-danni saru fuq bażi rappreżentattiva milli fuq ftit tranżazzjonijiet. Wara t-talbiet tal-produtturi esportaturi Ċiniżi, il-Kummissjoni aġġustat il-metodu ta' paragun. Il-prezzijiet ta' importazzjoni tat-tipi ta' prodotti li jifdal li ma nbigħux mill-industrija tal-Unjoni ġew imqabbla mal-prezz tal-bejgħ tal-Unjoni maħluq, li kien ibbażat fuq il-prezz tal-bejgħ medju tal-Unjoni tal-eqreb grupp tat-tipi ta' prodotti, jiġifieri dawk bl-istess l-ewwel karatteristika tal-PCN. Bħala riżultat, 100 % tal-esportazzjonijiet tal-produtturi esportaturi Ċiniżi fil-kampjun tqabblu mal-bejgħ tal-Unjoni. Il-marġnijiet ta' twaqqigħ tal-prezz varjaw minn 15,2 % sa 29,1 %.

(70)

Fir-rigward tal-PCNs speċifiċi, il-Kummissjoni ċċarat li r-raġuni għan-nuqqas ta' qbil ta' dan il-bejgħ tal-esportazzjoni fl-istadju provviżorju kienet in-nuqqas ta' bejgħ tal-Unjoni ta' dan tip ta' prodott bi ħxuna tal-ħajt ikbar minn 30 mm. Fl-istadju definittiv, dawn it-tipi ta' prodotti ġew inklużi fil-paragun tal-prezzijiet skont il-metodu aġġustat spjegat hawn fuq.

(71)

Wara divulgazzjoni definittiva, produttur esportatur Ċiniż talab għal kjarifika ulterjuri dwar il-marġni tad-dannu individwali meta mqabbel mal-produtturi esportaturi Ċiniżi oħrajn, abbażi ta' tqabbil fil-prezzijiet tal-istatistika doganali. It-tieni nett, il-produttur esportatur ikkontesta s-simplifikazzjoni tal-kodiċi PCN billi elimina ż-żewġ karatterisitiċi, u ddikjara li s-simplifikazzjoni ma kenitx ġustifikata u setgħet twassal għal tqabbil f'livelli differenti. Minflok, huwa talab li l-Kummissjoni tagħmel aġġustament għal karatteristiċi fiżiċi għat-tberrid u t-temprar għal uħud mit-tipi ta' prodotti billi telimina l-kost medju tat-tberrid u t-temprar mill-bejgħ taħt il-prezz. It-tielet nett, l-istess produttur enfasizza li l-prezzijiet tal-bejgħ fl-Unjoni ma kinux isegwu xejriet loġiċi f'termini ta' tul u ħxuna tal-ħajt. Ir-raba' nett, talab ukoll għal kjarifika dwar is-sors tal-prezz tal-bejgħ fl-Unjoni maħdum li ġie stabbilit għat-tipi ta' prodotti li għalihom ma kien instab l-ebda bejgħ fl-Unjoni.

(72)

Fir-rigward tal-ewwel dikjarazzjoni, il-Kummissjoni spjegat li t-tqabbil fil-prezzijiet isir abbażi ta' kull tip ta' prodott. Minħabba din ir-raġuni, ir-riżultat mhux neċessarjament isegwi x-xejriet tal-prezzijiet medji fil-livell tal-kodiċijiet doganali, billi t-taħlit tal-prodotti fl-istess kodiċi doganali mhumiex identiċi għal żewġ produtturi esportaturi differenti. Fir-rigward tat-tieni dikjarazzjoni, il-Kummissjoni aċċettat it-talba għal aġġustament. Skont dan, il-marġni tad-dannu għal dan il-produttur esportatur kien rikalkulat fir-rigward tat-tipi ta' prodotti kkonċernati mit-talba. Instab li t-tberrid u t-temprar jikkonċerna inqas minn 5 % tal-volumi tal-bejgħ tal-Unjoni tal-prodotti kkonċernati. Instab li l-ispiża tat-trattament tat-tberrid u tat-temprar kien bejn 30-60 EUR/tunnellata abbażi ta' dejta disponibbli. L-impatt tal-aġġustament dwar il-marġni tad-dannu tal-produttur esportatur Ċiniż kien inqas minn 0,2 %. Fir-rigward tat-tielet dikjarazzjoni rigward ix-xejriet tal-prezzijiet, il-Kummissjoni ċċarat li l-prezzijiet medji tal-bejgħ fl-Unjoni kienu stabbiliti abbażi tat-tranżazzjonijiet verifikati tal-produtturi tal-Unjoni fil-kampjun. Il-prezzijiet kienu jiddependu fuq il-kundizzjonijiet tas-suq speċifiċi fil-ħin ta' kull tranżazzjoni. Ir-raba' nett, fir-rigward tas-sors tal-prezz maħdum tal-bejgħ, il-Kummissjoni ċċarat, f'konformità mal-informazzjoni pprovduta fid-dokumenti tad-divulgazzjoni, li l-prezz unitarju tal-bejgħ inħadem bħala l-medja tal-prezz tal-bejgħ fl-Unjoni tat-tipi tal-prodotti li għandhom l-istess karatteristika primarja tal-PCN.

(73)

Wara divulgazzjoni definittiva, produttur esportatur Ċiniż ieħor ikkontesta l-prezz maħdum tal-bejgħ fl-Unjoni. Huwa ddikjara li minflok ħadem il-prezzijiet tal-bejgħ fl-Unjoni abbażi tal-prezz medju tal-bejgħ fl-Unjoni tal-prodotti kollha fl-istess kategorija, kif spjegat fil-premessa (69), il-prezz tal-bejgħ fl-Unjoni jinħtieġ li jiġi stabbilit bħala l-medja tal-prezz tal-bejgħ fl-Unjoni ta' dwak it-tipi ta' prodotti biss li kienu ġew esportati mill-produttur esportatur Ċiniż individwali.

(74)

Il-Kummissjoni enfasizzat li dan il-metodu kien iwassal għal prezzijiet tal-bejgħ fl-Unjoni differenti għall-istess PCN, skont it-taħlita ta' prodotti ta' kull produttur esportatur individwali. Għaldaqstant, dan il-metodu ma jiggarantix trattament ugwali tal-produtturi esportaturi Ċiniżi. Is-sejbiet ibbażati fuq inqas tipi ta' prodotti kienu jkunu wkoll inqas rappreżentattivi mis-sejbiet ibbażati fuq it-tipi ta' prodotti kollha mibjugħa fl-Unjoni. Għalhekk, id-dikjarazzjoni ġiet miċħuda.

(75)

Il-produttur esportatur Ċiniż ikkontesta l-użu tal-prezzijiet tal-bejgħ tal-Unjoni għall-kalkolu tat-twaqqigħ tal-prezzijiet fil-premessa (60) u għall-kalkolu tal-livell ta' eliminazzjoni tad-dannu fil-premessi minn (138) sa (140) tar-Regolament provviżorju. Huwa sostna li l-metodu huwa żbaljat minħabba li r-riżultat medju tal-industrija tal-Unjoni probabbilment mhuwiex identiku għall-profitt speċifiku ta' kull PCN. Huwa sostna li l-paragun minflok kellu jsir fuq il-bażi tal-ispejjeż.

(76)

Il-Kummissjoni indikat li l-użu tal-ispejjeż tal-industrija tal-Unjoni minflok il-prezzijiet, kif sostnut mill-produttur esportatur Ċiniż, kien iwassal għal paragun inqas preċiż. Dan huwa minħabba li paragun ibbażat fuq l-ispejjeż ma setax ikun ġie aġġustat għal-livell tal-kummerċ, peress li l-livell tal-kummerċ jista' jittieħed inkunsiderazzjoni biss billi jiġu injorati tranżazzjonijiet speċifiċi ta' bejgħ, jiġifieri l-bejgħ dirett lil utenti finali. Kalkolu bbażat fuq l-ispejjeż, għall-kuntrarju, kien ikun ibbażat fuq l-ispejjeż tal-produzzjoni, u għalhekk jiġbor flimkien il-prodotti kollha. L-importazzjonijiet miċ-Ċina jsiru permezz ta' operaturi tas-suq. Il-bejgħ dirett lil utenti finali jinvolvi tipikament rekwiżiti addizzjonali speċifiċi, kif spjegat fil-premessa (61) tar-Regolament provviżorju. Kalkolu bbażat fuq l-ispejjeż għalhekk kien jirriżulta fit-tqabbil ta' tipi differenti ta' tranżazzjonijiet u prodotti ma' xulxin. Għalhekk, kuntrarjament għal dak li huwa allegat, il-kunsiderazzjoni tal-livell tal-kummerċ wassal għal marġnijiet ta' dannu iktar baxxi, peress li l-bejgħ ta' prezz għoli li sar direttament lil utenti finali ma kienx inkluż fil-kalkolu.

(77)

L-ilmentatur ikkontesta l-esklużjoni tal-bejgħ dirett lill-utenti finali fil-premessa (61) tar-Regolament provviżorju. Huwa sostna li anke jekk il-bejgħ tal-prodotti Ċiniżi jsir tassew permezz ta' distributuri, dak il-bejgħ jinkludi wkoll prodotti magħmulin apposta u li huma ta' kwalità għolja. Skont l-ilmentatur, għalhekk, ma hemmx raġuni li jiġi eskluż il-bejgħ dirett lill-utenti finali mill-paragun.

(78)

Il-Kummissjoni nnutat li kemm l-industrija tal-Unjoni kif ukoll l-esportaturi Ċiniż ibigħu l-iktar permezz ta' operaturi tas-suq. Għalhekk, hija kkunsidrat li paragun tal-prezzijiet fl-istess livell ta' kummerċ, deskritti fil-premessi (60) u (61) tar-Regolament provviżorju, huwa l-aktar metodu preċiż disponibbli sabiex jitqabblu l-prezzijiet tal-importazzjoni miċ-Ċina mal-aktar tranżazzjonijiet simili fil-bejgħ tal-Unjoni.

(79)

Bħala konsegwenza ta' dan, il-konklużjonijiet stabbiliti fil-premessi (60) sa (62) tar-Regolament provviżorju ġew ikkonfermati.

(80)

Il-premessi (8) u (107) tar-Regolament provviżorju enfasizzaw l-ispejjeż għoljin ta' wieħed mill-prodotturi tal-Unjoni fil-kampjun. Dan ġie investigat iktar wara l-impożizzjoni tal-miżuri provviżorji.

(81)

L-ewwel nett, l-effett tat-tħassir straordinarju ta' prodottur tal-Unjoni ma ġiex ikkunsidrat għall-profitabbiltà tal-bejgħ tal-Unjoni. It-tħassir straordinarju fil-kontijiet annwali kien relatat mal-telf tal-valur ta' ċerti assi, wara l-waqgħa fil-bejgħ għas-segment taż-żejt u l-gass barra mill-Unjoni. Dan ammonta għal total ta' madwar EUR 1 400 miljun għall-grupp fil-perjodu 2014-2015. Sehem mit-tħassir kien affettwa l-valur tal-assi tal-produzzjoni għall-prodott ikkonċernat fl-Ewropa u kien irreġistrat bħala spiża tal-produzzjoni. Dan is-sehem tat-tħassir għalhekk għamel il-bejgħ tal-Unjoni jidher li jagħmel aktar telf milli kieku kien jagħmel taħt struttura tal-ispejjeż ordinarji tal-bejgħ tal-Unjoni. Għalhekk dan id-deprezzament ma kienx inkluż fl-ispejjeż tal-bejgħ tal-Unjoni. Bħala riżultat ta' dan, l-ispiża medja tal-bejgħ tal-Unjoni tnaqqas b'60-80 EUR/tunnellata fl-2014 u l-2015.

(82)

Wara divulgazzjoni definittiva, produttur esportatur Ċiniż talab għal kjarifika dwar jekk il-Kummissjoni investigatx id-deprezzament tal-erba' produtturi kollha tal-Unjoni fil-kampjun u kif id-deprezzament ġie allokat għall-prodott ikkonċernat.

(83)

Il-Kummissjoni ċċarat li tqies id-deprezzament regolari tal-erba' produtturi kollha tal-Unjoni fil-kampun. F'dawk il-każijiet fejn l-assi ntużaw biex jipproduċu wkoll prodotti oħrajn għajr il-prodott ikkonċernat, tqies biss parti mid-deprezzament totali, li jikkorrispondi għas-sehem tal-volum tal-prodott ikkonċernat, bħala spiża tal-prodott ikkonċernat. L-aġġustament spjegat fil-premessa (81) ma bidilx l-impatt tad-deprezzamenti regolari. Kien jikkonċerna biss it-tħassir straordinarju ta' produttur tal-Unjoni fl-2014 u fl-2015.

(84)

It-tieni nett, l-ispejjeż fissi relatati mal-kapaċità ta' riserva mhux użata ta' dan il-prodottur tal-Unjoni fil-kampjun ma ġewx ikkunsidrati għall-profitabbiltà tal-bejgħ tal-Unjoni. Mill-2012 sal-2015, hija tilfet parti sinifikanti (20 % – 40 %) tal-bejgħ (l-aktar ddedikati għall-esportazzjoni). Il-kapaċità ma tnaqqsitx biex jirrifletti dan it-telf, iżda minflok baqgħet fis-seħħ, lesta biex tintuża meta d-domanda tkompliet. Għalhekk l-ispejjeż ta' din il-kapaċità ta' riserva ma kinux inklużi fl-ispejjeż tal-bejgħ tal-Unjoni.

(85)

Il-Kummissjoni vvalutat jekk ikunx ġustifikat li jsir l-istess aġġustament wkoll għall-produtturi l-oħrajn tal-Unjoni fil-kampjun. Hija sabet li l-produtturi l-oħrajn tal-Unjoni kienu wkoll tilfu bejgħ tal-esportazzjoni għalkemm fi grad inqas, filwaqt li żammew il-kapaċità tagħhom stabbli. Għall-finijiet ta' koerenza, il-Kummissjoni għamlet l-istess aġġustament għall-ispejjeż tal-produtturi kollha tal-Unjoni fil-kampjun, li madankollu kellu biss impatt żgħir (li ma jaqbiżx 0,5 punti perċentwali tal-marġni tad-dannu).

(86)

Bħala riżultat ta' dan, l-ispiża medja tal-bejgħ tal-Unjoni tnaqqas b'30-100 EUR/tunnellata fl-2014 u l-2015.

(87)

Wara divulgazzjoni definittiva, produttur esportatur Ċiniż talab għal aktar informazzjoni dwar l-aġġustament tal-kostijiet, id-diżaggregazzjoni tagħhom, u l-impatt tal-aġġustament. It-tieni nett, huwa ddikjara li r-rapporti finanzjarji ppubblikati ta' produttur tal-Unjoni fil-kampjun urew riżultati finanzjarji li kienu differenti mill-ispejjeż u l-profittabbiltà rrappurtati fid-divulgazzjoni definittiva.

(88)

Fir-rigward tad-divulgazzjoni tal-aġġustament tal-ispejjeż, il-Kummissjoni indikat li l-impatt totali tal-aġġustament għall-ispejjeż tal-2014 u tal-2015 ġie divulgat fil-premessa (86). Il-Kummissjoni ċċarat li l-aġġustament tal-ispejjeż qies il-kostijiet fissi kollha, inklużi l-ispejjeż ġenerali, ix-xogħol indirett, id-deprezzament, u l-bejgħ, u l-ispejjeż ġenerali u amministrattivi. Minħabba n-natura kummerċjalment sensittiva tad-dejta dwar l-ispejjeż tal-produtturi individwali tal-Unjoni, il-Kummissjoni ma setgħetx tiżvela diżaggregazzjoni dettaljata tal-ispejjeż. Minflok, il-Kummissjoni divulgat firxa tal-impatt. Fir-rigward tat-tieni dikjarazzjoni, il-Kummissjoni indikat li r-rapporti finanzjarji ppubblikati rreferew għar-riżultati tal-grupp sħiħ u tal-prodotti kollha. B'kuntrast ma' dan, is-sejbiet tal-investigazzjoni kienu jikkonċernaw b'mod speċifiku l-bejgħ fl-Unjoni tal-prodott ikkonċernat. Għaldaqstant, id-dejta dwar l-ispejjeż u dwar il-profittabbiltà miż-żewġ sorsi kienet differenti, għaliex ma kinux jirreferu għall-istess ambitu ta' attività.

(89)

L-aġġustamenti inaqqsu s-sehem tal-ispejjeż ġenerali allokati għall-bejgħ tal-Unjoni, u għalhekk inaqqsu t-telf tal-bejgħ tal-Unjoni fl-2014 u l-2015.

(90)

Bħala riżultat tal-aġġustamenti tal-ispejjeż, il-Kummissjoni rrevediet is-sejbiet stabbiliti fil-premessa (79) tar-Regolament provviżorju kif ġej:

Matul l-istess perjodu, l-ispejjeż tal-industrija tal-Unjoni baqgħu pjuttost stabbli, filwaqt li l-effetti tal-ispejjeż straordinarji u tal-kapaċità ta' riserva tneħħew. L-ispejjeż stabbli flimkien mat-tnaqqis tal-prezzijiet tal-bejgħ wasslu biex l-industrija tibda tagħmel it-telf mill-2013 'il quddiem.

(91)

Barra minn jekk, il-Kummissjoni rrevediet is-sejbiet stipulati fil-premessa (80) tar-Regolament provviżorju kif ġej:

Matul il-perjodu kkunsidrat, il-fluss tal-flus tal-produtturi tal-Unjoni, l-investiment, ir-redditu fuq l-investiment u l-kapaċità tagħhom li jiġġeneraw kapital żviluppaw kif ġej:

(92)

Finalment, il-Kummissjoni rrevediet is-sejbiet stipulati fil-premessa (88) tar-Regolament provviżorju kif ġej:

Kif muri hawn fuq, matul il-perjodu kkunsidrat, il-produzzjoni tal-industrija tal-Unjoni u konsegwentement l-impjiegi naqsu. L-industrija tal-Unjoni tilfet volumi ta' bejgħ u s-sehem mis-suq, filwaqt li l-importazzjonijiet miċ-Ċina waqqgħu l-prezzijiet tal-Unjoni, u b'hekk tefgħu pressjoni fuq il-prezzijiet. B'riżultat ta' dan, il-prezzijiet tal-bejgħ naqsu. L-aktar importanti, l-industrija bdiet tagħmel it-telf: il-profittabbiltà ddeterjorat matul il-perjodu kkunsidrat, u laħqet l-agħar riżultat fil-PI.

(93)

Wara l-iżvelar provviżorju, l-ilmentatur talab kjarifika ulterjuri dwar id-determinazzjoni tal-indikaturi tad-dannu f'sitwazzjonijiet fejn l-istess linja ta' produzzjoni tista' tintuża wkoll sabiex tipproduċi pajpijiet ta' dijametru iżgħar, kif imsemmi fil-premessi (68) sa (70) tar-Regolament provviżorju.

(94)

Il-Kummissjoni ċċarat li l-użu tal-kapaċità ġie stabbilit fuq il-bażi tal-użu tal-kapaċità totali mill-prodotti kollha fuq l-istess linji ta' produzzjoni. Għall-indikaturi l-oħrajn kollha tad-dannu, il-prodott ikkonċernat biss ġie meqjus.

(95)

L-ilmentatur ikkummenta li l-impatt tad-dumping ivvalutat fil-premessa (76) tar-Regolament provviżorju għandu jitqies bħala sinifikanti. Huwa talab ukoll kjarifika fuq il-konklużjoni li ma nstab ebda dumping preċedentement fil-premessa (77) tar-Regolament provviżorju.

(96)

Il-Kummissjoni ċċarat li fid-dawl tal-marġnijiet tad-dumping għoljin u l-volum u sehem tas-suq sinifikanti u prezzijiet aktar baxxi b'mod sinifikanti tal-importazzjonijiet miċ-Ċina, il-kobor tal-marġni tad-dumping huwa tali li jikkostitwixxi fattur ta' dannu li jkollu impatt fuq l-industrija tal-Unjoni skont l-Artikolu 3(5) tar-Regolament bażiku. Il-Kummissjoni ċċarat ukoll li l-premessa (77) tar-Regolament provviżorju tirreferi għall-fatt li l-Kummissjoni preċedentement ma għamlitx sejba ta' dumping għall-prodott ikkonċernat matul il-perjodu kkonċernat. Għalkemm investigazzjoni preċedenti nbdiet fl-2013, din intemmet sussegwentement mingħajr ma ġie konkluż li d-dumping kien sar fil-perjodu ta' investigazzjoni jew qabel.

(97)

Wara l-iżvelar provviżorju, produttur esportatur Ċiniż ikkontesta s-sejbiet fil-premessa (79) tar-Regolament provviżorju, b'mod partikolari staqsa għaliex l-ispiża medja tal-prodotti mibjugħa kien żdied bi 8 % matul il-perjodu kkunsidrat, u f'każ li din iż-żieda kienet dovuta biss għal produttur tal-Unjoni wieħed, jekk dan kienx jirrifletti d-dannu tal-industrija tal-Unjoni kollha.

(98)

Il-Kummissjoni nnutat li wara l-aġġustamenti tal-ispejjeż spjegati fil-premessi (81) u (84), l-ispiża medja tal-prodotti mibjugħa baqgħet ġeneralment stabbli matul il-perjodu kkunsidrat. Fl-istess ħin, il-prezzijiet medji tal-bejgħ fl-Unjoni naqsu b'14 %, kif jidher fil-premessi (78) u (79) tar-Regolament provviżorju. Dan wassal sabiex l-industrija tal-Unjoni bdiet tagħmel it-telf mill-2013 'il quddiem. Għalhekk għandu jiġi konkluż li l-industrija tal-Unjoni b'mod ġenerali batiet dannu bħala riżultat tal-prezzijiet tal-bejgħ li qed jonqsu.

(99)

L-assoċjazzjoni tal-produtturi esportaturi Ċiniżi talbet kjarifika ulterjuri dwar il-kostijiet lavorattivi fil-premessa (87) tar- Regolament provviżorju, u dwar l-impatt tal-ispejjeż ġenerali fuq il-prestazzjoni tal-industrija tal-Unjoni.

(100)

Il-Kummissjoni ċċarat li n-numru totali ta' impjegati naqas bi 13 % matul il-perjodu kkunsidrat, kif muri fil-premessa (75) tar-Regolament provviżorju, u l-kost lavorattiv medju għal kull impjegat naqas bi 8 %, kif muri fil-premessa (87) tar-Regolament provviżorju. Dan it-tnaqqis fil-kost lavorattiv għal kull impjegat huwa parzjalment minħabba tnaqqis tas-salarji, u parzjalment minħabba tnaqqis fin-numru ta' sigħat maħduma. It-tnaqqis fis-sigħat maħduma għal kull impjegat huwa rifless ukoll fil-produzzjoni medja minn kull impjegat, li naqset bi 13 %, kif muri fil-premessa (75) tar-Regolament provviżorju. Bħala riżultat, l-impatt globali tal-kostijiet lavorattivi għal kull tunnellata baqa' ġeneralment stabbli matul il-perjodu kkunsidrat, u għalhekk ma jistax jitqies li kien fattur ewlieni ta' dannu.

(101)

Fin-nuqqas ta' kummenti oħra rigward is-sitwazzjoni ekonomika tal-industrija tal-Unjoni, u wara l-bidliet li saru fil-premessi (79), (80) and (88), il-konklużjonijiet l-oħra stipulati fil-premessi (63) sa (89) tar-Regolament provviżorju ġew ikkonfermati.

(102)

Wara divulgazzjoni proviżorja, l-assoċjazzjoni tal-produtturi esportaturi Ċiniżi kkummentat li, skont il-premessa (56) tar-Regolament provviżorju, l-ogħla punt tal-prezzijiet ta' importazzjoni Ċiniżi lejn l-Unjoni kien is-sena 2014, filwaqt li l-iżvilupp tal-indikaturi tad-dannu tal-industrija tal-Unjoni f'dik l-istess sena ma jkollux relazzjoni diretta max-xejriet ta' importazzjoni miċ-Ċina.

(103)

L-assoċjazzjoni tal-produtturi esportaturi Ċiniżi kkontestat ukoll il-konklużjonijiet fil-premessa (94) tar-Regolament provviżorju. Hija kkontestat l-eżistenza tar-rabta ta' kawżalità bejn l-importazzjonijiet miċ-Ċina u t-telf fl-industrija tal-Unjoni. Fl-ewwel lok, hija argumentat li d-diffikultajiet tal-industrija tal-Unjoni bdew ħafna qabel l-2013, kif muri mill-ilment preċedenti antidumping ippreżentat fl-2012. Fit-tieni lok, iż-żieda fl-importazzjonijiet miċ-Ċina ma tistax tiġi deskritta bħala li kienet sinifikanti. Fit-tielet lok, l-impatt tat-tnaqqis tal-importazzjonijiet miċ-Ċina fl-2013 ma ġiex spjegat. Fir-raba' lok, l-analiżi tad-danni ma għandhiex tiffoka fuq sena partikolari. Fil-ħames lok, il-prezzijiet tal-industrija tal-Unjoni żviluppaw b'mod pożittiv fl-2014, minkejja ż-żieda fl-importazzjonijiet miċ-Ċina. B'mod ġenerali, hija allegat li t-telf fl-industrija tal-Unjoni varja wisq biex ikun hemm konnessjoni mal-volumi tal-importazzjoni miċ-Ċina. Id-dannu lill-industrija tal-Unjoni għalhekk irid jkun ġie kkawżat minn fatturi oħra li ma humiex l-importazzjonijiet miċ-Ċina.

(104)

L-assoċjazzjoni tal-produtturi esportaturi Ċiniżi sostnietew ukoll li l-analiżi tal-ħsara kellha ssir separatament għal kull wieħed mit-tliet segmenti fi ħdan l-ambitu tal-prodott (żejt u gass, ġenerazzjoni tal-enerġija u mekkanika/kostruzzjoni). B'mod ieħor id-differenzi bejn il-prodotti u l-prezzijiet allegatament ma ppermettewx paragun xieraq. B'mod partikolari, l-importazzjonijiet miċ-Ċina kkonċernaw b'mod predominanti s-segment tal-mekkanika/kostruzzjoni, filwaqt li l-produtturi tal-Unjoni kienu relattivament aktar involuti fis-segmenti tal-ġenerazzjoni tal-enerġija u taż-żejt u l-gass.

(105)

Produttur esportatur Ċiniż ikkummenta li skont l-istatistika dwar il-kummerċ, il-prezzijiet medji miċ-Ċina baqgħu stabbli matul il-perjodu kkonċernat. Għalhekk, it-twaqqigħ tal-prezzijiet mill-importazzjonijiet miċ-Ċina ma setax ikun il-kawża tat-tnaqqis fil-volumi tal-bejgħ tal-industrija tal-Unjoni.

(106)

L-istess produttur esportatur ikkontesta wkoll il-prezzijiet tal-importazzjoni miċ-Ċina u minn pajjiżi oħra fil-premessa (105) tar-Regolament provviżorju. Huwa indika li l-prezzijiet tal-importazzjoni medji baxxi miċ-Ċina ma jirriflettux il-prezzijiet iktar għoljin tal-produtturi esportaturi Ċiniżi fil-kampjun.

(107)

Il-Kummissjoni qablet li l-indikaturi kollha tad-dannu ma jurux korrelazzjoni bejn sena u oħra mal-iżvilupp tal-importazzjonijiet miċ-Ċina. Madankollu, l-effetti huma mdewma minn sena għall-oħra peress li l-prezzijiet u r-relazzjonijiet kummerċjali jaġġustaw skont iż-żieda fil-kompetizzjoni inġusta. Peress li l-importazzjonijiet miċ-Ċina jseħħu permezz ta' kummerċjanti, l-investigazzjoni tal-importaturi mhux relatati uriet li hemm dewmien sinifikanti fiż-żmien bejn il-mument tal-ordni tal-prodotti miċ-Ċina u l-konsenja tagħhom lill-utent finali, li rriżulta mill-ħin ta' produzzjoni, trasport, ħażna fil-livell tal-kummerċjant u l-konsenja finali. L-impatt b'mod ġenerali tal-importazzjonijiet bi prezz baxx jista' jiġi osservat biss waqt il-perjodu kollu kkunsidrat. Ebda parti ma kkontestat il-konklużjonijiet fil-premessa (62) tar-Regolament provviżorju li l-importazzjonijiet miċ-Ċina daħlu fis-suq tal-Unjoni bi prezzijiet li jwaqqgħu b'mod sinifikanti l-prezzijiet tal-Unjoni. Lanqas ma ġie kkontestat li l-importazzjonijiet miċ-Ċina żdiedu f'termini assoluti matul il-perjodu kkunsidrat, f'kuntest ta' tnaqqis fil-konsum tal-Unjoni, li wassal għal żieda saħansitra akbar f'termini relattivi.

(108)

F'dak li jirrigwarda s-segmenti, il-Kummissjoni indikat li d-differenzi rilevanti bejn tipi ta' prodott huma riflessi fin-numru ta' kontroll tal-prodott (PCN), li jiżgura li prodotti paragunabbli biss jiġu pparagunati flimkien. Il-karatteristiċi ewlenin tas-segmenti huma distinti minħabba l-PCN: azzar illigat u azzar illigat ħafna (segment ta' ġenerazzjoni tal-enerġija), azzar mhux illigat (kostruzzjoni) u l-kategoriji ta' prodotti speċifiċi ta' pajpijiet lineari, kejsing, tubi u ajpijiet għat-tħaffir (segment taż-żejt u l-gass). Barra minn hekk, kif spjegat fil-premessa (25), anke jekk kienu jkunu stabbiliti marġnijiet tad-dannu separati għal kull segment, id-dazji totali li jridu jitħallsu għal taħlita tal-prodott partikolari kienu jibqgħu identiċi.

(109)

Fir-rigward tal-istatistika dwar il-kummerċ, il-Kummissjoni osservat li l-istatistika dwar il-kummerċ ma tikkunsidrax it-taħlita tal-prodott, kif spjegat fil-premessa (58) tar-Regolament provviżorju. Il-prezzijiet medji għalhekk jistgħu jirrappreżentaw prodotti differenti fi snin differenti. B'kuntrast, it-twaqqigħ tal-prezzijiet bejn 15,1 % u 30,2 % fil-premessa (62) tar-Regolament provviżorju ġie stabbilit permezz tal-paragun tal-prezzijiet tal-istess tipi ta' prodotti, mhux il-medji globali. Għalhekk, it-taħlit tal-prodotti differenti tal-produtturi esportaturi Ċiniżi fil-kampjun huma kkunsidrati fl-istabbiliment tal-marġnijiet tad-dannu individwali tagħhom.

(110)

Għalhekk, il-konklużjonijiet stabbiliti fil-premessi (91) sa (95) tar-Regolament provviżorju ġew ikkonfermati.

(111)

Skont il-premessa (114) tar-Regolament provviżorju, il-Kummissjoni kompliet tinvestiga r-raġunijiet li wasslu għal tnaqqis sinifikanti fil-profittabbiltà tal-industrija tal-Unjoni.

(112)

Kif mitlub fil-premessa (98) tar-Regolament provviżorju, l-ilmentatur ipprovda dejta li turi li l-konsum fuq livell dinji ta' pajpijiet u tubi mingħajr ġonġituri naqas b'iktar minn 10 % matul il-perjodu kkunsidrat. It-tnaqqis kien ikkonċentrat fir-reġjuni tal-produzzjoni taż-żejt, minħabba waqfien totali fit-tħaffir għaż-żejt u l-gass ikkawżat minn prezzijiet baxxi taż-żejt. B'kuntrast, is-segmenti tal-ġenerazzjoni tal-enerġija u tal-mekkanika ma ġewx affettwati direttament mid-diffikultajiet fis-segment taż-żejt u l-gass, iżda xorta esperjenzaw effett indirett. Skont l-industrija tal-Unjoni, fin-nuqqas ta' domanda mis-segment taż-żejt u tal-gass il-produtturi ppruvaw ibigħu lil segmenti oħra minflok, li jwassal għal pressjoni aktar kompetittiva fis-segmenti l-oħra wkoll.

(113)

Wara żvelar provviżorju, il-produtturi esportaturi Ċiniżi u l-assoċjazzjoni tagħhom talbu, flimkien mal-perċentwali fil-premessa (96) tar-Regolament provviżorju, id-dejta tal-esportazzjoni tal-industrija tal-Unjoni. Huma argumentaw ukoll li l-prestazzjoni dgħajfa tal-esportazzjoni, b'mod partikolari fis-segment taż-żejt u tal-gass, kienet ir-raġuni għad-dannu li ġarrbet l-industrija tal-Unjoni. Huma argumentaw li l-impatt tal-bejgħ mitluf kien iktar importanti miż-żieda relattivament żgħira tal-importazzjonijiet miċ-Ċina lejn l-Unjoni. Huma allegaw li r-raġuni wara t-telf tal-industrija tal-Unjoni huwa t-tnaqqis fil-produttività li jirriżulta minn volumi iktar baxxi ta' produzzjoni.

(114)

Il-Kummissjoni pprovdiet il-volumi ta' esportazzjoni mitluba hawn taħt:

(115)

Kif jidher, l-esportazzjonijiet tal-industrija tal-Unjoni naqsu b'31 % matul il-perjodu kkunsidrat. Dan it-tnaqqis tal-esportazzjonijiet għalhekk kien ikbar mit-tnaqqis tal-konsum fil-livell dinji. Kif imsemmi fil-premessa (96) tar-Regolament provviżorju, il-bejgħ tal-Unjoni naqas ukoll matul il-perjodu kkunsidrat, sabiex is-sehem tal-esportazzjonijiet baqa' għoli, b'56 % tal-bejgħ kollu fil-PI. Il-konklużjonijiet l-oħra stipulati fil-premessi (96) u (97) tar-Regolament provviżorju ġew ikkonfermati.

(116)

Il-Kummissjoni kkonkludiet li t-tnaqqis fil-bejgħ tal-esportazzjoni kellu impatt negattiv fuq is-sitwazzjoni finanzjarja tal-industrija tal-Unjoni u kkontribwixxa għad-dannu. It-tnaqqis fil-volumi tal-bejgħ wassal għal użu tal-kapaċità aktar baxxa u għalhekk żied il-piż tal-ispejjeż ġenerali fuq il-bejgħ kollu, kif ukoll fuq il-bejgħ tal-Unjoni. Il-prestazzjoni dgħajfa tal-esportazzjoni għalhekk kienet fattur li jikkontribwixxi għad-dannu mġarrab mill-industrija tal-Unjoni billi żiedet l-ispejjeż tal-bejgħ tal-Unjoni. Minħabba l-aġġustamenti għall-ispejjeż tal-produtturi tal-Unjoni spjegati fil-premessi (81) u (84), l-impatt ta' din il-kawża ġeneralment tneħħa mill-kalkolu tal-marġni tad-dannu. Sal-punt li l-effett ma kienx jitneħħa kompletament mill-aġġustamenti, kwalunkwe impatt li jifdal fuq il-livell tal-marġni tad-dannu kien ikun biss marġinali.

(117)

Il-prestazzjoni tal-esportazzjoni ma tistax tispjega d-dannu li jirriżulta miż-żieda fl-importazzjonijiet miċ-Ċina bi prezzijiet li jwaqqgħu l-prezzijiet tal-Unjoni, u t-tnaqqis konsegewenti tal-prezzijiet tal-Unjoni. Fin-nuqqas ta' importazzjonijiet li huma l-oġġett ta' dumping, il-produtturi tal-Unjoni setgħu jbigħu il-prodotti tagħhom fis-suq tal-Unjoni bi prezzijiet mhux dannużi. Għalhekk il-prestazzjoni tal-esportazzjoni ma kisritx ir-rabta kawżali bejn l-importazzjonijiet miċ-Ċina u d-dannu materjali mġarrab mill-industrija tal-Unjoni.

(118)

Fin-nuqqas ta' kummenti, il-konklużjonijiet stipulati fil-premessi (99) sa (100) tar-Regolament provviżorju ġew ikkonfermati.

(119)

Wara l-iżvelar provviżorju, produttur esportatur Ċiniż ikkummenta li ż-żieda fl-importazzjonijiet miċ-Ċina matul il-perjodu kkunsidrat kienet 3 344 tunnellata. Fl-istess ħin, il-konsum tal-Unjoni naqas bi 18 212-il tunnellata u l-importazzjonijiet minn pajjiżi terzi oħra żdiedu b'9 711-il tunnellata, li minnhom l-importazzjonijiet mill-Ġappun żdiedu bi 3 535 tunnellata. Huwa rrileva li dawn il-fatturi kollha kellhom impatt ikbar miż-żieda fl-importazzjonijiet miċ-Ċina.

(120)

Il-Kummissjoni qablet li l-konsum iktar baxx u ż-żieda fl-importazzjonijiet minn pajjiżi oħra setgħu wasslu għad-dannu mġarrab mill-industrija tal-Unjoni billi naqqsu l-volumi tal-bejgħ tal-industrija tal-Unjoni.

(121)

Madankollu, dawn il-fatturi ma jistgħux jispjegaw iż-żieda fl-importazzjonijet miċ-Ċina bi prezzijiet li jwaqqgħu il-prezzijiet tal-Unjoni. L-importazzjonijiet miċ-Ċina żdiedu f'kuntest ta' tnaqqis fil-konsum fl-Unjoni. B'mod partikolari, kif jidher fil-premessi (101) sa (105) tar-Regolament provviżorju, il-prezzijiet tal-importazzjonijiet mill-pajjiżi l-oħra kienu iktar għoljin mill-prezzijiet tal-importazzjonijiet miċ-Ċina, il-prezzijiet medji tagħhom żdiedu matul il-perjodu kkunsidrat, u s-sehem tas-suq tagħhom baqa' żgħir. L-importazzjonijiet minn partijiet terzi għalhekk ma setgħux ikunu l-kawża tat-tnaqqis fil-prezzijiet tal-bejgħ tal-Unjoni. Għalhekk, id-dannu kkawżat mill-importazzjonijiet mill-pajjiżi terzi kemm għall-prezzijiet kif ukoll għall-volumi, jekk applikabbli, kien ikun marġinali. Għalhekk dawn il-fatturi ma kisrux ir-rabta ta' kawżalità bejn l-importazzjonijiet miċ-Ċina u d-dannu materjali mġarrab mill-industrija tal-Unjoni. Fi kwalunkwe każ, sal-punt li dawn il-fatturi kellhom impatt ikbar minn impatt marġinali, dawn huma riflessi fl-aġġustament li jikkonċerna kapaċità mhux użata fil-premessi minn (84) u (85).

(122)

Wara divulgazzjoni definittiva, produttur esportatur Ċiniż ikkontesta d-dejta statistika kummerċjali fil-premessa (105) tar-Regolament provviżorju, u ddikjara li l-prezzijiet ta' tunnellata tal-importazzjonijiet mill-pajjiżi għajr iċ-Ċina u l-Ġappun kienu għolji b'mod mhux normali. Il-produttur esportatur Ċiniż allega li r-raġuni sottostanti kienet sottodikjarazzjoni tal-kwantitajiet ta' importazzjoni, li rriżultat fi prezzijiet medji għoljin. B'riżultat ta' dan, huwa ddikjara li s-sejbiet tar-rabta ta' kawżalità kienu difettużi minħabba li naqsu milli jqisu l-volumi allegatament ogħla u l-prezzijiet aktar baxxi ta' importazzjonijiet minn pajjiżi terzi.

(123)

Il-Kummissjoni ċċarat li d-dejta fil-premessa (105) tar-Regolament provviżorju kienet ibbażata fuq dejta tal-Eurostat disponibbli pubblikament. Il-Kummissjoni mliet id-dejta fil-forma ta' tabella aktar komprensiva, li ddettaljat ukoll l-importazzjonijiet mill-Istati Uniti tal-Amerka u l-importazzjonijiet mill-pajjiżi l-oħra kollha għajr iċ-Ċina, il-Ġappun u l-Istati Uniti tal-Amerka. Ikkoreġiet ukoll l-iżbalji ta' kopjar li nkixfu wara divulgazzjoni definittiva. B'riżultat ta' dan, il-konklużjonijiet tal-premessa (105) tar-Regolament provviżorju ġew riveduti kif ġej:

Abbażi ta' dan ta' hawn fuq, ġie konkluż li l-impatt ta' dawn l-importazzjonijiet mhuwiex daqstant li tinkiser ir-rabta ta' kawżalità bejn l-importazzjonijiet Ċiniżi u d-dannu mġarrab mill-industrija tal-Unjoni.

(124)

L-istatistika dwar l-importazzjoni wriet li l-importazzjonijiet mill-Istati Uniti tal-Amerka kellhom prezz unitarju partikularment għoli matul il-PI. Il-prezzijiet tal-importazzjoni mill-pajjiżi terzi li jifdal kienu ġeneralment konformi mal-prezzijiet tal-Unjoni u baqgħu pjuttost stabbli matul iż-żmien. Għaldaqstant, il-prezzijiet medji tal-importazzjoni għolja kienu jirriflettu l-varjazzjonijiet tal-prezzijiet tal-importazzjoni mill-Istati Uniti tal-Amerka. Il-Kummissjoni nnutat li ma ġiet ippreżentata l-ebda evidenza li tappoġġa d-dikjarazzjoni li l-istatistika dwar l-importazzjoni kienet żbaljata. Fi kull każ, rigward il-prezzijiet relattivament għolja mill-Istati Uniti tal-Amerka anke matul is-snin preċedenti, u s-sehem mis-suq żgħir tagħhom, anki li kieku kien hemm żball fl-istatistika rigward l-Istati Uniti tal-Amerka, kif allegat mill-produttur esportatur Ċiniż, dan ma kienx jibdel is-sejbiet fil-premessa (121) li l-importazzjonijiet mill-pajjiżi terzi ma jiksrux ir-rabta ta' kawżalità bejn l-importazzjonijiet miċ-Ċina u d-dannu matejali mġarrab mill-industrija tal-Unjoni.

(125)

Fin-nuqqas ta' kummenti oħra, il-konklużjonijiet stipulati fil-premessi (101) sa (106) tar-Regolament provviżorju ġew ikkonfermati.

(126)

Skont il-premessi (107) u (110) tar-Regolament provviżorju, il-Kummissjoni eżaminat f'iktar dettall is-sitwazzjoni ta' wieħed mill-produtturi tal-Unjoni.

(127)

L-ispejjeż medji ta' dan il-produttur tal-Unjoni kienu fil-fatt iktar għoljin minn dawk tal-produtturi l-oħra tal-Unjoni. Madankollu, dan huwa spjegat bil-firxa wiesgħa ta' prodotti għajr produtturi oħra tal-Unjoni, inkluż proporzjon akbar tal-prodotti tal-azzar illigat u tal-azzar illigat ħafna li jiswew aktar. Il-produttur tal-Unjoni jbigħ ukoll prodotti magħmulin apposta direttament lil konsumaturi finali, minflok distributuri. Dan il-bejgħ tipikament jattira prezzijiet ogħla.

(128)

Il-produttur tal-Unjoni wera li wħud mill-produtturi esportaturi Ċiniżi kisbu ċ-ċertifikati ta' kwalità neċessarji sabiex jipprovdu wkoll l-iktar applikazzjonijiet kritiċi fl-Unjoni, u għalhekk kienu qed jikkompetu wkoll fis-segment ta' kwalità għolja fl-Unjoni għall-istess proġetti bħall-produttur tal-Unjoni, u qed jikkawżaw pressjoni fuq il-prezzijiet tal-bejgħ fl-Unjoni tiegħu.

(129)

Matul il-perjodu kkunsidrat, il-produttur tal-Unjoni tilef volumi ta' produzzjoni iktar malajr minn produtturi oħra tal-Unjoni, notevolment fl-esportazzjonijiet, li wassal għal żieda fil-piż tal-ispejjeż fissi. Sar tnaqqis straordinarju sabiex jirrifletti d-diffikultajiet fis-swieq taż-żejt u tal-gass. Finalment, il-profittabbiltà tal-bejgħ tal-Unjoni ġiet affettwata wkoll mit-tnaqqis fil-prezzijiet tal-bejgħ fl-Unjoni.

(130)

Għalkemm parti mit-telf tal-produttur tal-Unjoni sar minħabba l-volumi tal-bejgħ mitluf u l-użu baxx tal-kapaċità li jirriżulta, il-Kummissjoni sabet ukoll li parti mit-telf finanzjarju tagħha kien dovut għat-tnaqqis tal-prezzijiet fis-suq tal-Unjoni. Għalhekk hemm rabta ta' kawżalità bejn l-importazzjonijiet li kienu oġġett ta' dumping miċ-Ċina, it-twaqqigħ tal-prezzijiet tal-Unjoni, u d-dannu li ġarrab il-produttur tal-Unjoni. Din ir-rabta ta' kawżalità, li taffettwa l-prezzijiet tal-bejgħ tal-Unjoni, mhijiex miksura mill-ispejjeż speċifiċi tal-produttur tal-Unjoni fl-2014 — 2015.

(131)

Kif spjegat fil-premessi (81), (84), (85), (90) u (91), saru aġġustamenti għall-ispejjeż tal-produttur tal-Unjoni u l-profittabbiltà tal-bejgħ tal-Unjoni ġiet ikkalkulata mill-ġdid. L-aġġustamenti neħħew bil-kbir l-impatt tal-bejgħ tal-esportazzjoni u d-deprezzamenti relatati mas-sitwazzjoni speċifika fis-swieq taż-żejt u tal-gass. Sal-punt li l-effett ma kienx kompletament jitneħħa mill-aġġustamenti tal-ispejjeż, kwalunkwe impatt li jifdal fuq il-livell tal-marġni tad-dannu kien ikun marġinali biss. Anke wara l-aġġustamenti tal-ispejjeż, il-profittabbilità tal-produttur tal-Unjoni baqgħet affettwata b'mod negattiv mit-twaqqigħ tal-prezzijiet tal-bejgħ tiegħu fl-Unjoni.

(132)

Wara divulgazzjoni definittiva, kif spjegat fil-premessa (26), produttur esportatur Ċiniż u l-assoċjazzjoni ta' produtturi esportaturi Ċiniżi allegaw li d-diffikultajiet li ltaqgħet magħhom l-industrija tal-Unjoni fil-bejgħ fis-segmenti l-oħrajn għajr iż-żejt u l-gass kienu r-riżultat tal-forzi tas-suq, u mhux relatati mal-importazzjonijiet miċ-Ċina. Huma ddikjaraw ukoll li l-produtturi tal-Unjoni kienu għażlu strateġija kummerċjali biex iduru minn prodotti taż-żejt u tal-gass għal segmenti bi prezz aktar baxx, u dan ikkawża x-xejriet negattivi fil-profittabbiltà.

(133)

Il-Kummissjoni nnutat li l-importazzjonijiet iddampjati miċ-Ċina waqqgħu l-prezzijiet tal-Unjoni fl-ambitu tal-prodott kollu kemm hu, mhux fis-segment taż-żejt u tal-gass biss. Għaldaqstant, id-dannu kkawżat mill-importazzjonijiet miċ-Ċina ma kienx limitat għal segment partikulari. Fin-nuqqas tal-importazzjonijiet iddampjati li jwaqqgħu l-prezzijiet tal-Unjoni, l-industrija tal-Unjoni kienet tkun kapaċi tikseb prezzijiet ogħla fis-segmenti kollha, independentement mill-attenzjoni tal-produtturi tal-Unjoni. Sa fejn dan it-tidwir tal-attenzjoni kien sors ta' dannu, dan kien minħabba l-prestazzjoni tal-esportazzjoni u t-tnaqqis fil-konsum, li t-tnejn li huma ġew ivvalutati hawn fuq bħala fatturi potenzjali oħra li jikkawżaw dannu, bil-konklużjoni li dawn il-fatturi ma jistgħux jiksru r-rabta ta' kawżalità bejn l-importazzjonijiet iddampjati miċ-Ċina u d-dannu mġarrab mill-industrija tal-Unjoni. Għaldaqstant, id-dikjarazzjoni ġiet miċħuda.

(134)

Il-Kummissjoni kkonkludiet li l-kawżi l-oħra tad-dannu, kemm separatament kif ukoll flimkien, ma kisrux ir-rabta ta' kawżalità bejn l-importazzjonijiet li huma oġġett ta' dumping miċ-Ċina u d-dannu li ġarrbet l-industrija tal-Unjoni. Dan għaliex l-importazzjonijiet li huma oġġett ta' dumping b'mod ċar ikkawżaw dannu billi waqqgħu l-prezzijiet tal-Unjoni u għalhekk naqqsu l-prezzijiet tal-bejgħ fis-suq tal-Unjoni.

(135)

B'kuntrast ma' dan, il-kawżi l-oħra tad-dannu ma kinux relatati mat-twaqqigħ tal-prezzijiet tal-bejgħ tal-Unjoni u l-impatt kumulattiv tagħhom kien marġinali. Id-dannu kkawżat mit-tnaqqis fil-volumi ta' bejgħ ma kienx relatat mal-prezzijiet tal-Unjoni u l-effett tiegħu kien marġinali, jekk xejn, wara l-aġġustamenti tal-ispejjeż lill-produtturi tal-Unjoni. L-importazzjonijiet mill-pajjiżi terzi kienu żgħar, u seħħew bi prezzijiet għoljin u li baqgħu jiżdiedu. Għalhekk, ma kkawżax tnaqqis fil-prezz, u l-effett tagħhom, jekk applikabbli, kien marġinali. L-istruttura speċifika tal-ispejjeż ta' produttur tal-Unjoni kienet indirizzata bl-aġġustamenti tal-ispejjeż, u kwalunkwe effett li jifdal wara l-aġġustamenti tal-ispejjeż, jekk xejn, kien marġinali.

(136)

Wara divulgazzjoni definittiva, produttur esportatur Ċiniż argumenta li l-livell ġenerali tal-paga u tal-ispejjeż fiċ-Ċina kien aktar baxx milli fl-Unjoni, u dan jispjega għaliex il-prezzijiet taċ-Ċina kienu aktar baxxi mill-prezzijiet tal-Unjoni. Huwa ddikjara li, għaldaqstant, it-twaqqigħ fil-prezzijiet kien fenomenu normali, u li t-tqabbil bejn il-prezzijiet tal-Unjoni u l-prezzijiet tal-importazzjoni kien inġust.

(137)

Il-Kummissjoni enfasizzat li d-dazji antidumping kienu imposti biss f'sitwazzjonijiet fejn il-prezzijiet tal-bejgħ mill-esportazzjoni kienu aktar baxxi mill-valur normali. Għaldaqstant, l-argumenti rigward kostijiet aktar baxxi ma kinux pertinenti.

(138)

Wara divulgazzjoni definittiva, produttur esportatur Ċiniż ieħor u l-assoċjazzjoni ta' produtturi esportaturi Ċiniżi ikkontestaw is-sejbiet dwar il-kawżalità. Huma argumentaw li l-importazzjonijiet miċ-Ċina ma setgħux jispjegaw il-varjazzjonijiet tal-profittabbiltà tal-industrija tal-Unjoni. Huma allegaw li kawżi għajr l-importazzjonijiet miċ-Ċina kkawżaw id-dannu lill-industrija tal-Unjoni. Huma argumentaw li l-aġġustamenti fl-ispejjeż ma jistgħux jissostitwixxu l-analiżi tal-kawżalità.

(139)

Il-Kummissjoni nnutat li l-aġġustamenti fl-ispejjeż iddeterminaw l-ispiża attwali tal-industrija tal-Unjoni, kif spjegat fl-premessi (81), (84), (85) u (86). It-tieni nett, il-Kummissjoni nnutat li l-argumenti li qamu wara d-divulgazzjoni definittiva ma kkontestawx is-sejba li l-importazzjonijiet miċ-Ċina żdiedu matul il-perjodu kkunsidrat, f'kuntest ta' tnaqqis fil-konsum fl-Unjoni. L-argumenti lanqas ma kkontestaw is-sejba li l-importazzjonijiet miċ-Ċina kienu waqqgħu l-prezzijiet tal-Unjon, u għaldaqstant ikkawżaw dannu lill-industrija tal-Unjoni. Il-Kummissjoni vvalutat fid-dettall il-fatturi l-oħra li kkontribwew għad-dannu mġarrab mill-industruha tal-Unjoni fil-premessi minn (111) sa (135). L-analiżi ta' attribwizzjoni kumulattiva ta' fatturi oħrajn fil-premessi minn (134) u (135) uriet li l-fatturi l-oħra, kemm separatament kif ukoll meta meħuda flimkien, ma kisrux ir-rabta ta' kawżalità bejn l-importazzjonijiet iddampjati miċ-Ċina li jwaqqgħu l-prezzijiet tal-Unjoni u d-dannu mġarrab mill-industrija tal-UE, u li l-ebda dannu attribwibbli għal fatturi oħrajn ma ġie attribwit għall-importazzjonijiet iddampjati. Għaldaqstant, id-dikjarazzjoni ġiet miċħuda.

(140)

Għalhekk, anke meta l-effett kumulattiv tal-fatturi l-oħra li possibilment ikkontribwew għad-dannu ġie indirizzat, ir-rabta ta' kawżalità bejn id-dumping u d-dannu ma nkisritx. Fuq din il-bażi, il-konklużjonijiet stipulati fil-premessa (115) tar-Regolament provviżorju ġew konfermati.

(141)

Wara l-iżvelar provviżorju, produttur esportatur Ċiniż ma qabilx mal-konklużjonijiet stipulati fil-premessa (124) tar-Regolament provviżorju, skont liema hemm diversi sorsi alternattivi tal-provvista. Madankollu, it-talba ma kinitx sostanzjata. Il-konklużjonijiet tal-investigazzjoni juru li l-biċċa l-kbira tal-importaturi mhux relatati diġà jixtru minn sorsi oħra.

(142)

Id-dikjarazzjoniġiet miċħuda u l-konklużjonijiet stipulati fil-premessi minn (116) sa (132) tar-Regolament provviżorju ġew ikkonfermati.

(143)

Wara l-iżvelar provviżorju, produttur esportatur Ċiniż stqarr illi l-profitt fil-mira ta' + 5,7 % użat sabiex jiġi ddeterminat il-livell ta' eliminazzjoni tad-dannu kif stipulat fil-premessa (137) tar-Regolament provviżorju ma ntlaħaqx fil-kundizzjonijiet normali tal-kompetizzjoni. Madankollu t-talba ma kinitx sostanzjata u ma speċifikax liema metodu jew rata ta' profitt kellhom jintużaw minflok. It-talba għalhekk ma ntlaqgħetx.

(144)

L-ilmentatur argumenta li l-livell xieraq tal-profitt fil-mira għandu jkun + 15 %, peress li l-importazzjonijiet miċ-Ċina kienu diġà preżenti fl-2012. Huwa ssuġġerixxa li tintuża dejta tal-profitt mis-snin ta' qabel l-2012 sabiex jiġi appoġġjat tali livell.

(145)

Il-Kummissjoni nnutat li l-metodu għad-determinazzjoni provviżorja tal-profitt fil-mira fuq il-bażi tas-sena 2012 kien issuġġerit fl-ilment, u li l-livell kien ibbażat fuq dejta verifikata tal-produtturi tal-Unjoni. Il-produtturi tal-Unjoni ma pprovdewx dejta storika tal-profitt mis-snin qabel l-2012 li tista' tiġi vverifikata. It-talba għalhekk ma ntlaqgħetx u l-konklużjonijet stipulati fil-premessi (134) sa (137) tar-Regolament provviżorju ġew ikkonfermati, f'dak li jirrigwarda l-metodu tad-determinazzjoni tal-profitt fil-mira fuq il-bażi tas-sena 2012.

(146)

Fl-istadju provviżorju, il-prodotti bi prezz għoli ddeterminaw il-profittabbiltà medja sa livell għoli, minħabba li l-kalkolu kien ibbażat fuq valuri tal-bejgħ. Madankollu, il-biċċa l-kbira tal-bejgħ tal-Unjoni u tal-importazzjonijiet miċ-Ċina jikkonċernaw prodotti bażiċi bi prezz baxx. Il-metodu bbażat fuq valuri ta' bejgħ għalhekk jiddikjara b'mod eċċessiv l-importanza tal-prodotti bi prezz għoli meta paragunati mas-sehem attwali tagħhom tas-suq tal-Unjoni. Għal dawn ir-raġunijiet, għall-finijiet tal-kalkolu tal-livell ta' eliminazzjoni tad-dannu, il-piżijiet tal-produtturi tal-Unjoni kienu stabbiliti sabiex jikkorrispondu għas-sehem tagħhom tal-volum tal-bejgħ, għall-kuntrarju tal-valur tal-bejgħ.

(147)

Il-profitabbiltà medja ponderata hija kif ġej:

(148)

Għalhekk, il-profitt tas-sena 2012 inbidel minn + 5,7 % għal + 4,7 %. Il-profitt fil-mira għalhekk kien stabbilit għal + 4,7 %.

(149)

Il-profitabbiltà ponderata tal-industrija tal-Unjoni fil-PI u l-profitt fil-mira huma użati għall-kalkolu tal-prezzijiet li ma jikkawżawx dannu, b'mod konformi mal-premessi (139) u (140) tar-Regolament provviżorju.

(150)

Wara divulgazzjoni definittiva, produttur esportatur Ċiniż qajjem dubju dwar il-kalkolu tal-prezz unitarju fil-mira. Huwa ddikjara li l-prezzijiet unitarji fil-mira jinħtieġ li jkunu 4,7 % ogħla mill-prezzijiet tal-bejgħ tal-Unjoni, filwaqt li fid-divulgazzjoni definittiva id-differenza bejn iż-żewġ prezzijiet kienet ta' 9 %.

(151)

Il-Kummissjoni ċċarat li d-differenza bejn il-prezz tal-bejgħ tal-Unjoni u prezz unitarju fil-mira hija magħmula mit-telf medju (– 3,9 %) u mill-profitt fil-mira (+ 4,7 %). Dawn il-presentaġġi huma kkalkulati abbażi tal-prezzijiet tal-bejgħ tal-Unjoni, kif spjegat fil-premessa (139) tar-Regolament provviżorju. Dawn l-istess ammonti jwasslu għal differenza ta' 9 % meta espressi bħala persentaġġ tal-valuri CIF tal-importazzjoni.

(152)

Wara divulgazzjoni definittiva, produttur esportatur Ċiniż ieħor irrefera għall-kontijiet annwali ppubblikati ta' produttur tal-Unjoni fil-kampjun, u argumenta li l-produttur tal-Unjoni kien profittabbli fl-2014, u minkejja li għamel telf fl-2015, jista' jitqies profittabbli jekk l-ispejjeż jiġu aġġustati billi jiġi eliminat it-telf tal-valur tal-assi, jitnaqqsu l-ispejjeż tal-oġġetti mibjugħa f'konformità mal-bejgħ, u jitnaqqsu l-bejgħ, l-ispejjeż ġenerali u amministrattivi f'konformità mal-bejgħ. Abbażi ta' dan, il-produttur esportatur Ċiniż iddikjara li l-industrija tal-Unjoni kienet profittabbli fl-2013-2015, u għaldaqstant il-marġni tad-dannu jinħtieġ li ma jinkludi l-ebda profitt fil-mira, u jinħtieġ li lanqas ma jqis it-telf tal-industrija tal-Unjoni.

(153)

Il-Kummissjoni nnutat li r-riżultati finanzjarji fil-kontijiet annwali rreferew għar-riżultati tal-grupp kollu u għall-prodotti kollha, filwaqt li s-sejbiet tal-investigazzjoni kkonċernaw speċifikament għall-bejgħ tal-Unjoni tal-prodott ikkonċernat. Għaldaqstant, il-profittabbiltà tal-bejgħ tal-Unjoni tal-prodott ikkonċernat ma setgħetx tiġi kkalkulata abbażi tal-kontijiet pubblikati, billi ma rreferewx għall-istess ambitu tal-attività.

(154)

Il-kummenti li jikkonċernaw il-metodu għall-istabbiliment tal-livell ta' eliminazzjoni tad-dannu kienu indirizzati fil-premessi minn (75) sa (78). Fin-nuqqas ta' kummenti oħra, il-konklużjonijiet stipulati fil-premessi (138) sa (141) tar-Regolament provviżorju ġew ikkonfermati.

(155)

Fid-dawl tal-konklużjonijiet li saru fir-rigward tad-dumping, id-dannu, il-kawżalità u l-interess tal-Unjoni, u skont l-Artikolu 9(4) tar-Regolament bażiku, għandhom jiġu imposti miżuri antidumping definittivi fuq l-importazzjonijiet tal-prodott ikkonċernat, skont ir-regola tad-dazju inferjuri fl-Artikolu 7(2). Il-Kummissjoni pparagunat il-marġnijiet tad-dannu u l-marġnijiet tad-dumping. L-ammont tad-dazji jenħtieġ li jkun stabbilit fil-livell tal-iktar marġni baxx mill-marġnijiet tad-dumping u tad-dannu.

(156)

Fuq il-bażi ta' dan ta' hawn fuq, ir-rati tad-dazju antidumping definittiv, espressi skont il-prezz CIF fil-fruntiera tal-Unjoni, bid-dazju doganali mhux imħallas, għandhom ikunu kif ġej:

(157)

Ir-rati tad-dazju antidumping ta' kumpaniji individwali speċifikati f'dan ir-Regolament ġew stabbiliti abbażi tal-konklużjonijiet ta' din l-investigazzjoni. Gћaldaqstant, huma rriflettew il-qagħda li nstabet matul din l-investigazzjoni fir-rigward ta' dawn il-kumpaniji. Dawn ir-rati tad-dazju huma esklussivament applikabbli għall-importazzjonijiet tal-prodott ikkonċernat li joriġina mill-pajjiż ikkonċernat u magħmul mill-entitajiet ġuridiċi msemmija. L-importazzjonijiet tal-prodott ikkonċernat immanifatturat minn kwalunkwe kumpanija oħra mhux imsemmija b'mod speċifiku fil-parti operattiva ta' dan ir-Regolament, inklużi entitajiet relatati ma' dawk imsemmijin b'mod speċifiku, jenħtieġ li jkunu soġġetti għar-rata ta' dazju applikabbli għall-“kumpaniji l-oħrajn kollha”. Ma għandhom ikunu suġġetti għal ebda rata ta' dazju antidumping individwali.

(158)

Kumpanija tista' titlob l-applikazzjoni ta' dawn ir-rati ta' dazju antidumping individwali jekk sussegwentement tibdel l-isem tal-entità tagħha. It-talba trid tkun indirizzata lill-Kummissjoni (6). It-talba jrid ikun fiha l-informazzjoni rilevanti kollha li tippermetti li jintwera li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, avviż dwar il-bidla tal-isem jiġi ppubblikat f'Il-Ġurnal Uffiċjali tal-Unjoni Ewropea.

(159)

Sabiex ir-riskji ta' ċirkomvenzjoni minħabba differenza fir-rati ta' dazju jinżammu kemm jista' jkun baxxi, huma meħtieġa miżuri speċjali biex tkun żgurata l-applikazzjoni tad-dazji antidumping individwali. Kumpaniji b'dazji antidumping individwali jridu jippreżentaw fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stipulati fl-Artikolu 1(3) ta' dan ir-Regolament. L-importazzjonijiet li ma jkunux akkumpanjati minn din il-fattura jkunu soġġetti għad-dazju antidumping applikabbli għall-“kumpaniji l-oħrajn kollha”.

(160)

Biex ikun żgurat infurzar xieraq tad-dazji antidumping, id-dazju antidumping għall-kumpaniji l-oħrajn kollha jinħtieġ li japplika mhux biss għall-produtturi esportaturi li ma kkooperawx f'din l-investigazzjoni, imma anki għall-produtturi li ma esportawx lejn l-Unjoni matul il-perjodu tal-investigazzjoni.

(161)

Fid-dawl tal-marġnijiet tad-dumping misjuba u minħabba l-livell tad-dannu kkawżat lill-industrija tal-Unjoni, jenħtieġ li l-ammonti garantiti permezz ta' dazju provviżorju antidumping, imposti mir-Regolament provviżorju, jinġabru definittivament sal-estent tal-ammont tad-dazji definittivi.

(162)

Il-miżuri preveduti f'dan ir-Regolament huma skont l-opinjoni tal-Kumitat stabbilit fl-Artikolu 15(1) tar-Regolament (UE) 2016/1036,

(i)

ma esportax l-oġġetti deskritti fl-Artikolu 1(1) li joriġinaw miċ-Ċina matul il-perjodu ta' investigazzjoni (l-1 ta' Jannar sal-31 ta' Diċembru 2015)

(ii)

ma jiġix mill-esportatur jew il-produttur soġġett għall-miżuri imposti minn dan ir-Regolament; u

(iii)

jew effettivament esporta l-oġġetti kkonċernati jew daħal f'obbligu kuntrattwali irrevokabbli li jesporta kwantità sinifikanti lill-Unjoni wara t-tmiem tal-perjodu tal-investigazzjoni,