1.

L-etil karbamat huwa kompost li jinsab b'mod naturali f'ikel iffermentat u fix-xorb alkoħoliku bħall-ħobż, il-jogurt, iz-zalza tas-sojja, l-inbid, il-birra u b'mod partikolari fl-ispirti tal-frott tal-għadma u fl-ispirti tal-karfa tal-frott tal-għadma magħsur, prinċipalment dawk magħmula miċ-ċirasa, l-għanbaqar, il-mirabelli u l-berquq.

2.

L-etil karbamat jista' jifforma minn diversi sustanzi inerenti fl-ikel u fix-xorb, inkluż iċ-ċjanur tal-idroġenu (jew l-aċidu idroċjaniku), l-urea, iċ-ċitrullina, u komposti oħra tal-N-karbamil. Fil-biċċa l-kbira tal-każijiet iċ-ċjanat huwa probabbilment l-aħħar prekursur, li jirreaġixxi mal-etanol biex jifforma l-etil karbamat.

3.

Fid-distillati tal-frott tal-għadma (l-ispirti tal-frott tal-għadma u l-ispirti tal-karfa tal-frott tal-għadma magħsur) l-etil karbamat jista' jifforma mill-glokosidi ċjanoġeniċi li huma kostitwenti naturali tal-għadam. Meta l-frott isir maxx, l-għadam jista' jinkiser u l-glokosidi ċjanoġeniċi mill-għadam jistgħu jiġu f'kuntatt mal-enżimi fil-maxx tal-frott. Il-glokosidi ċjanoġeniċi huma mbagħad degradati għal aċidu idroċjaniku/ċjanuri. L-aċidu idroċjaniku jista' wkoll jiġi rrilaxxat mill-għadam intatt matul ħażna itwal tal-maxx iffermentat. Matul il-proċess ta' distillazzjoni l-aċidu idroċjaniku jista' jiġi arrikkit fil-frazzjonijiet kollha. Taħt l-influwenza tad-dawl, iċ-ċjanur huwa ossidat għal ċjanat waqt li jirreaġixxi mal-etanol biex jifforma l-etil karbamat. Ladarba tkun bdiet ir-reazzjoni, ma tistax titwaqqaf. Ċerti kundizzjonijiet ambjentali bħall-esponiment għad-dawl, temperaturi għoljin u l-preżenza ta' joni tar-ramm jippromwovu l-formazzjoni tal-etil karbamat fid-distillat.

4.

Il-konċentrazzjoni tal-etil karbamat tista' titnaqqas sew bl-użu ta' żewġ strateġiji differenti: l-ewwel, billi titnaqqas il-konċentrazzjoni tas-sustanzi prekursuri prinċipali; it-tieni, billi titnaqqas it-tendenza li dawn is-sustanzi jirreaġixxu biex jiffurmaw iċ-ċjanat. Il-fatturi ewlenin li huma ta' influwenza huma l-konċentrazzjoni tal-prekursuri (eż. l-aċidu idroċjaniku u ċ-cjanuri) u l-kundizzjonijiet tal-ħażna, bħall-esponiment għad-dawl u t-temperatura.

5.

Għalkemm s'issa għad ma hemm l-ebda korrelazzjoni qawwija stabbilita bejn il-livell tal-aċidu idroċjaniku u l-etil karbamat, huwa evidenti li taħt ċerti kundizzjonijiet, il-konċentrazzjonijiet qawwija ta' aċidu idroċjaniku jistgħu jwasslu għal livelli ogħla ta' etil karbamat. Żieda potenzjali fil-formazzjoni tal-etil karbamat ġiet assoċjata ma' livelli ta' 1 mg/l jew iktar ta' aċidu idroċjaniku fid-distillat finali (1)  (2). Abbażi ta' esperjenzi prattiċi, jista' jiġi preżunt li minn 1 mg ta' aċidu idroċijaniku jista' jifforma sa 0,4 mg etil karbamat f'relazzjoni mhux ekwimolari.

6.

Il-Parti I tagħti dettalji dwar il-proċess ta' produzzjoni. Il-Parti II fiha rakkomandazzjonijiet speċifiċi msejsa fuq Prattika ta' Manifattura Tajba (PMT).

7.

Il-proċess ta' produzzjoni għall-ispirti tal-frott u l-ispirti tal-karfa tal-frott tal-għadma magħsur jinvolvi t-tgħaffiġ u l-fermentazzjoni tal-frotta kollha kemm hi, segwiti mid-distillazzjoni. Il-proċess isegwi b'mod tipiku l-istadji mniżżla hawn taħt:

8.

Matul id-distillazzjoni, il-kontenut “tal-bidu” jagħli l-ewwel. Dan jista' jiġi normalment rikonoxxut mis-solvent tiegħu jew mill-aromi tal-lostru. Din il-frazzjoni mhijiex ġeneralment tajba għall-konsum u għandha tiġi skartata.

9.

Matul il-proċess ta' distillazzjoni tan-nofs (il-“qalba”), l-alkoħol tal-etil (etanol), li hu l-alkoħol prinċipali fl-ispirti kollha, jiġi ddistillat. Din il-parti tal-proċess ta' distillazzjoni, fejn il-kontenut ta' volatili għajr l-etanol huwa l-aktar baxx u fejn jinstabu l-aromi tal-frott l-aktar puri, tinġabar dejjem.

10.

Il-“bqija” tad-distillazzjoni tinkludi l-aċidu aċetiku u ż-żjut fusel li ta' spiss huma identifikati minn aromi ta' ħall u aromi veġetali mhux pjaċevoli. Din il-parti hija wkoll skartata, iżda tista' tiġi distillata mill-ġdid minħabba li xi etanol huwa inkluż b'mod invarjabbli mal-bqija.

11.

Il-materja prima u l-preparazzjonijiet tal-maxx tal-frott għandhom ikunu xierqa biex jevitaw ir-rilaxx tal-aċidu idroċjaniku, li huwa prekursur tal-etil karbamat.

12.

Il-frott tal-għadma għandu jkun ta' kwalità għolja, mhux imħassar mekkanikament u mhux mgħarraq mikrobijoloġikament, billi l-frott imħassar jew mgħarraq jista' jkun fih aktar ċjanur ħieles.

13.

Il-frott għandu preferibbilment titneħħilu l-għadma.

14.

Jekk il-frott ma titneħħilux l-għadma, għandu jitgħaffeġ bil-mod biex jiġi evitat li l-għadam jitfarrku. Jekk possibbli, l-għadam għandhom jitneħħew mill-maxx.

15.

Tipi ta' ħmira magħżula għall-produzzjoni tal-alkoħol għandha tiġi miżjuda flimkien mal-frott maxx, skont l-istruzzjonijiet għall-utenti.

16.

Il-frott maxx iffermentat għandu jiġi ttrattat bi standards għolja ta' iġjene, u l-esponiment għad-dawl għandu jiġi mminimizzat. Il-maxx tal-frott iffermentat li jkun fih l-għadam għandu jinħażen għal żmien qasir kemm jista' jkun qabel id-distillazzjoni billi l-aċidu idroċjaniku jista' wkoll jiġi rrilaxxat mill-għadam intatt matul perjodu ta' ħażna itwal tal-maxx.

17.

It-tagħmir ta' distillazzjoni u l-proċess ta' distillazzjoni għandhom ikunu adattati, biex jiżguraw li l-aċidu idroċjaniku ma jiġix trasferit fid-distillat.

18.

It-tagħmir ta' distillazzjoni għandu jinkludi apparat ta' tlaħliħ awtomatiku u konvertituri katalitiċi tar-ramm. L-apparat ta' tlaħliħ awtomatiku għandu jżomm l-imqatar indaf waqt li l-konvertituri katalitiċi tar-ramm jgħaqqdu l-aċidu idroċjaniku qabel ma jgħaddi fid-distillat.

19.

L-apparat ta' tlaħliħ awtomatiku mhuwiex meħtieġ fil-każ ta' distillazzjoni li mhuwiex kontinwu. It-tagħmir ta' distillazzjoni għandu jitnaddaf permezz ta' proċeduri ta' tindif sistematiċi u bir-reqqa.

20.

F'ċerti każijiet, fejn ma jintużaw l-ebda konvertituri katalitiċi tar-ramm jew separaturi oħra taċ-ċjanur, għandhom jiġu miżjuda l-aġenti tar-ramm mal-maxx tal-frott iffermentat qabel id-distillazzjoni. L-għan tal-aġenti tar-ramm hu li jgħaqqdu l-aċidu idroċjaniku. L-aġenti tar-ramm jinbiegħu fi ħwienet speċjalizzati u għandhom jintużaw b'reqqa kbira skont l-istruzzjonijiet tal-manifattur. Dawn il-preparazzjonijiet jinkludu joni tar-ramm (I) marbutin mal-aċidu idroċijaniku. Il-joni tar-ramm (II) huma mingħajr effett u ma għandhomx jintużaw.

21.

Filwaqt li l-joni tar-ramm jistgħu jimpedixxu l-formazzjoni tal-prekursuri tal-etil karbamat fil-maxx u fl-istill, huma jistgħu jippromwovu l-formazzjoni tal-etil karbamat fid-distillat. Għalhekk, l-użu ta' kondensatur tal-azzar inossidabbli fit-tarf tal-apparat tad-distillazzjoni minflok kondensatur tar-ramm jillimita l-preżenza tar-ramm fid-distillat u jnaqqas ir-rata tal-formazzjoni tal-etil karbamat.

22.

L-għadam li jkun baqa' fil-maxx iffermentat ma għandux jiġi ppumpjat fl-apparat tad-distillazzjoni.

23.

Id-distillazzjoni għandha titwettaq b'tali mod li l-alkoħol jagħli bil-mod (eż. bl-użu tal-fwar minflok fjamma diretta bħala s-sors tat-tisħin).

24.

L-ewwel frazzjonijiet tad-distillat, li jissejjaħ il-kontenut “tal-bidu”, għandha tiġżi sseparata bir-reqqa.

25.

Il-frazzjoni tan-nofs, imsejħa “l-qalba”, għandha mbagħad tinġabar u tinħażen fid-dlam. Meta l-kontenut tal-alkoħol jilħaq il-50 % tal-vol. fir-riċevitur, għandha mbagħad tinġabar “il-bqija”, biex kwalunkwe etil karbamat li seta' ġie ffurmat jiġi sseparat fil-frazzjoni tal-bqija.

26.

Il-bqija li tkun ġiet separata, li possibbilment ikun fiha l-etil karbamat, għandha tinġabar u jekk tintuża għad-distillazzjoni mill-ġdid, għandha tiġi ddistillata għal darb'oħra separatament. Madankollu, biex titnaqqas il-konċentrazzjoni tal-etil karbamat huwa preferibbli li l-bqija tintrema.

27.

Id-distillati għandhom jiġu vverifikati regolarment għal-livelli tagħhom ta' aċidu idroċjaniku. Id-determinazzjoni għandha titwettaq permezz ta' testijiet xierqa, jew b'settijiet għall-ittestjar rapidu tal-livelli tal-aċidu idroċjaniku, jew, inkella, permezz ta' laboratorju speċjalizzat.

28.

Jekk il-konċentrazzjoni tal-aċidu idroċjaniku fid-distillat taqbeż il-livell ta' 1 mg/l, hija rrakkomandata d-distillazzjoni mill-ġdid b'konvertituri katalitiċi jew b'aġenti tar-ramm (ara l-punti 18 u 20), fejn xieraq.

29.

Id-distillati b'livelli ta' aċidu idroċjaniku viċin ta' 1 mg/l għandhom idealment jiġu distillati mill-ġdid jew, fejn dan mhux possibbli, jinħażnu fi fliexken li ma jgħaddix dawl minnhom jew f'kaxex tal-għata b'perjodi ta' ħażna li jkunu qosra kemm jista' jkun u mhux f'temperaturi ogħla biex tiġi evitata l-formazzjoni tal-etil karbamat matul il-ħażna.

30.

L-ittestjar tal-etil karbamat huwa rrakkomandat għad-distillati li fihom il-kompost seta' diġà ġie ffurmat (eż. distillati bi storja ta' produzzjoni mhux magħrufa, livelli ogħla ta' ċjanur, ħażna mdawwla jew f'temperaturi ogħla). Il-livell ta' etil karbamat jistgħu jiġu ttestjati biss minn laboratorju speċjalista.

31.

Jekk id-distillat juri konċentrazzjoni ta' etil karbamat li taqbeż il-livell immirat ta' 1 mg/l, id-distillat għandu jiġi ddistillat mill-ġdid, meta xieraq.