23.4.2014   

MT

Il-Ġurnal Uffiċjali tal-Unjoni Ewropea

L 119/1

REGOLAMENT TA' IMPLIMENTAZZJONI TAL-KUNSILL (UE) Nru 397/2014

tas-16 ta' April 2014

li jimplimenta r-Regolament (UE) Nru 267/2012 dwar miżuri restrittivi kontra l-Iran

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament tal-Kunsill (UE) Nru 267/2012 tat-23 ta' Marzu 2012 dwar miżuri restrittivi kontra l-Iran (1), u b'mod partikolari l-Artikolu 46(2) tiegħu,

Billi:

(1)

Fit-23 ta' Marzu 2012, il-Kunsill adotta r-Regolament (UE) Nru 267/2012.

(2)

Permezz tas-sentenza tagħha tat-12 ta' Novembru 2013 fil-Kawża T-552/12 (2), il-Qorti Ġenerali tal-Unjoni Ewropea annullat ir-Regolament ta' Implimentazzjoni tal-Kunsill (UE) Nru 945/2012 (3) fir-rigward tal-inklużjoni ta' North Drilling Company (NDC) fil-lista ta' persuni u entitajiet soġġetti għal miżuri restrittivi li jinsabu fl-Anness IX għar-Regolament (UE) Nru 267/2012.

(3)

In-North Drilling Company (NDC) għandha terġa' tiġi inkluża fil-lista ta' persuni u entitajiet soġġetti għal miżuri restrittivi, abbażi ta' dikjarazzjoni ġdida tar-raġunijiet.

(4)

Entità waħda għandha titneħħa mil-lista ta' persuni u entitajiet soġġetti għal miżuri restrittivi stipulati fl-Anness IX għar-Regolament (UE) Nru 267/2012.

(5)

Għaldaqstant ir-Regolament (UE) Nru 267/2012 għandu jiġi emendat skont dan,

ADOTTA DAN IR-REGOLAMENT:

Artikolu 1

L-Anness IX għar-Regolament (UE) Nru 267/2012 għandu jiġi emendat kif jinsab fl-Anness għal dan ir-Regolament.

Artikolu 2

Dan ir-Regolament għandu jidħol fis-seħħ fil-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-16 ta' April 2014.

Għall-Kunsill

Il-President

D. KOURKOULAS

(1)  ĠU L 88, 24.3.2012, p. 1.

(2)  Kawża T-552/12 North Drilling Co. v Kunsill, sentenza tat-12 ta' Novembru 2013, għadha ma tniżżlitx fil-Ġabra.

(3)  Regolament ta' Implimentazzjoni tal-Kunsill (UE) Nru 945/2012 tal-15 ta' Ottubru 2012 li jimplimenta r-Regolament (UE) Nru 267/2012 dwar miżuri restrittivi kontra l-Iran (ĠU L 282, 16.10.2012, p. 16).

ANNESS

I.

L-entità elenkata hawn taħt għandha titniżżel fil-lista li tinsab fil-Parti I, Taqsima B (Entitajiet), tal-Anness IX għar-Regolament (UE) Nru 267/2012:

 

Isem

Informazzjoni ta' identifikazzjoni

Raġunijiet

Data tal-elenkar

118.

North Drilling Company (NDC)

No. 8 35th St.

Alvand St.

Argentine Sq.

Tehran

Iran

Tel. (+ 98) 2188785083-8

North Drilling tipprovdi appoġġ finanzjarju lill-Gvern tal-Iran billi kienet indirettament proprjetà tal-Mostazafan Foundation, entità parastatali kbira Iranjana kkontrollata mill-Gvern tal-Iran. North Drilling hija entità importanti fis-settur tal-enerġija li tipprovdi dħul sostanzjali lill-Gvern tal-Iran. Barra minn hekk, North Drilling għandha tagħmir ewlieni importat għall-industrija taż-żejt u l-gass, inklużi oġġetti pprojbiti. Għalhekk, North Drilling tagħti appoġġ lill-attivitajiet nukleari sensittivi f'termini ta' proliferazzjoni.

23.4.2014

II.

L-entità elenkata hawn taħt, u l-entrata relatata, għandhom jitħassru mil-lista li tinsab fl-Anness IX għar-Regolament (UE) Nru 267/2012.

Safa Nicu magħruf ukoll bħala “Safa Nicu Sepahan”, “Safanco Company”, “Safa Nicu Afghanistan Company”, “Safa Al Noor Company” u “Safa Nicu Ltd Company”.