5.6.2008   

MT

Il-Ġurnal Uffiċjali ta’ l-Unjoni Ewropea

L 146/3

(1)

Il-Ftehim ta’ Stabbilizzazzjoni u Assoċjazzjoni bejn il-Komunitajiet Ewropej u l-Istati Membri tagħhom, minn naħa waħda, u r-Repubblika tal-Montenegro, min-naħa l-oħra (‘il-Ftehim ta’ Stabbilizzazzjoni u Assoċjazzjoni’), kien iffirmat fil-Lussemburgu fil-15 ta’ Ottubru 2007. Il-Ftehim ta’ Stabbilizzazzjoni u Assoċjazzjoni qiegħed fil-proċess ta’ ratifika.

(2)

Fil-15 ta’ Ottubru 2007 ġie konkluż Ftehim Proviżorju dwar il-kummerċ u materji relatati mal-kummerċ bejn il-Komunità Ewropea, minn naħa waħda, u r-Repubblika tal-Montenegro min-naħa l-oħra (2) (‘il-Ftehim Temporanju’), li kien approvat permezz tad-Deċiżjoni tal-Kunsill 2007/855/KE tal-15 ta’ Ottubru 2007 (3). Il-Ftehim Temporanju jipprovdi għad-dħul fis-seħħ bikri tad-dispożizzjonijiet dwar il-kummerċ u dawk relatati mal-kummerċ tal-Ftehim ta’ Stabbilizzazzjoni u Assoċjazzjoni. Daħal fis-seħħ fl-1 ta' Jannar 2008.

(3)

Il-Ftehim Temporanju u l-Ftehim ta’ Stabilizzazzjoni u Assoċjazzjoni jistipulaw li ċertu ħut u prodotti tas-sajd li joriġinaw fil-Montenegro jistgħu jkunu importati fil-Komunità, fil-limiti tal-kwoti tariffarji Komunitarji, b’rata ta’ dazju mnaqqsa jew rata zero.

(4)

Il-kwoti tariffarji stipulati fil-Ftehim Temporanju u fil-Ftehim ta’ Stabbilizzazzjoni u Assoċjazzjoni huma annwali u ġew stipulati għal żmien indeterminat. Jeħtieġ li jinfetħu l-kwoti tariffarji Komunitarji għall-2008 u s-snin ta’ wara u li jsir provvediment għal sistema komuni għall-amministrazzjoni tagħhom.

(5)

Din l-amministrazzjoni komuni għandha tiżgura li l-importaturi kollha tal-Komunità għandhom aċċess indaqs u kontinwu għall-kwoti tariffarji u li r-rati stipulati għall-kwoti huma applikati mingħajr interruzzjoni għall-importazzjonijiet kollha tal-prodotti kkonċernati lejn l-Istati Membri kollha sakemm il-kwoti jintużaw kollha. Sabiex tkun żgurata l-effiċjenza tas-sistema, l-Istati Membri għandhom ikunu awtorizzati li jiġbdu mill-volumi tal-kwoti l-kwantitajiet meħtieġa li jikkorrispondu għall-importazzjonijiet attwali. Jeħtieġ kooperazzjoni mill-qrib bejn l-Istati Membri u l-Kummissjoni u din ta’ l-aħħar b’mod partikolari għandha tkun tista' tissorvelja r-rata ta' kif jintużaw il-kwoti u tinforma l-Istati Membri b'dan. Għalraġunijiet ta’ ħeffa u effiċjenza, il-komunikazzjoni bejn l-Istati Membri u l-Kummissjoni għandha, safejn hu possibbli, tkun elettronika.

(6)

Il-kwoti li nfetħu b’dan ir-regolament għalhekk għandhom jitmexxew skond is-sistema ta’ amministrazzjoni ta’ preferenzi tariffarji fi ħdan il-kwoti tariffarji mfassla għall-użu skond l-ordni kronoloġika tad-dati ta’ aċċettazzjoni tad-dikjarazzjonijiet doganali li huma stipulati fir-Regolament tal-Kummissjoni (KEE) Nru 2454/93 tat-2 ta’ Lulju 1993 li jiffissa d-dispożizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (4).

(7)

Skond il-Ftehim ta’ Stabilizzazzjoni u Assoċjazzjoni u l-Ftehim Temporanju, il-volumi tal-kwoti tariffarji għal sardin ippreparat jew ippreservat u għal inċova ppreparata jew ippreservata għandhom mill-1 ta’ Jannar tar-raba’ sena wara li jidħol fis-seħħ il-Ftehim Temporanju, jiżdiedu għal 250 tunnellata sakemm għall-anqas 80 % mill-ammont totali tal-kwoti tariffarji ta’ qabel ikunu ntużaw sal-31 ta’ Diċembru ta’ dik is-sena. Il-volumi tal-kwoti miżjuda, jekk implimentati, għandhom ikomplu japplikaw sakemm il-partijiet għall-Ftehim ta’ Stabilizzazzjoni u Assoċjazzjoni u l-Ftehim Temporanju jiftehmu mod ieħor.

(8)

Billi l-Ftehim Temporanju jidħol fis-seħħ fl-1 ta’ Jannar 2008, dan ir-Regolament għandu japplika mill-istess data u għandu jibqa' japplika wara li jidħol fis-seħħ il-Ftehim ta’ Stabilizzazzjoni u Assoċjazzjoni.

(9)

Il-miżuri pprovduti f'dan ir-Regolament huma skond l-opinjoni tal-Kumitat tal-Kodiċi Doganali,