Id-Direttiva tal-Kunsill

tal-21 ta’ Diċembru 1977

li temenda d-Direttiva 70/156/KEE dwar l-approssimazzjoni tal-liġijiet ta’ l-Istati Membri li għandhom x’jaqsmu ma’ l-approvazzjoni tat-tip ta’ vetturi bil-mutur u l-karrijiet tagħhom

(78/315/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea, u b’mod partikolari l-Artikolu 100 tiegħu,

Wara li kkunsidra l-proposta mill-Kummissjoni,

Wara li kkunsidra l-opinjoni tal-Parlament Ewropew [1],

Wara li kkunsidra l-opinjoni tal-Kumitat Ekonomiku u Soċjali [2],

Billi xi sistemi jew partijiet ta’ vetturi li jiffurmaw unità teknika separata huma diġà mqiegħda fis-suq kemm separatament u wkoll wara li jitwaħħlu ma’ vettura; billi, jekk huwa possibbli li jkunu vverifikati dawn is-sistemi jew partijiet qabel ma jkunu mwaħħla ma’ vettura, il-moviment ħieles tagħhom jista’ jiġi ffaċilitat bl-introduzzjoni ta’ l-approvazzjoni tat-tip tal-KEE ukoll għal dawn l-unitajiet tekniċi separati;

Billi hu għalhekk mixtieq li d-Direttiva tal-Kunsill 70/156/KEE tas-6 ta’ Frar 1970 dwar l-approssimazzjoni tal-liġijiet ta’ l-Istati Membri li għandhom x’jaqsmu ma’ l-approvazzjoni tat-tip ta’ vetturi bil-mutur u l-karrijiet tagħhom [3] għandha tkun issupplimentata mingħajr dewmien b’disposizzjonijiet li jintroduċu din l-approvazzjoni tat-tip, mingħajr preġudizzju għal emendi oħrajn ta’ dik id-Direttiva, b’mod partikolari dawk li jinsabu fil-proposta tal-Kummissjoni tal-5 ta’ Jannar 1977;

Billi l-approvazzjoni tat-tip tal-KEE ta’ l-unitajiet tekniċi separati li għandhom jitwaħħlu ma’ vetturi tissimplifika l-proċedura ta’ l-approvazzjoni tat-tip ta’ vetturi bil-mutur billi tevita r-ripetizzjoni ta’ ċerti verifiki matul l-approvazzjoni tat-tip; billi għandu jkun possibbli, meta tingħata l-approvazzjoni tat-tip tal-KEE għal unitajiet tekniċi separati, li jkunu stabbiliti restrizzjonijiet għall-użu u/jew il-kondizzjonijiet għat-twaħħil tagħhom;

Billi għandu dejjem jibqa’ possibbli li jiġu adattati id-Direttivi separati għall-progress tekniku fil-produzzjoni ta’ unitajiet tekniċi separati; billi l-proċedura stabbilita fl-Artikolu 13 tad-Direttiva 70/156/KEE hija xierqa għal dan l-iskop,

ADOTTA DIN ID-DIRETTIVA:

Artikolu 1

L-Artikolu 9a li ġej għandu jiżdied wara l-Artikolu 9:

"Artikolu 9a

1. Meta d-Direttivi separati jagħmlu disposizzjonijiet espressi għal dan, l-approvazzjoni tat-tip tal-KEE tista’ wkoll tingħata lil tipi ta’ sistemi jew partijiet ta’ vetturi li jiffurmaw unità teknika separata.

2. Meta l-unità teknika separata li għandha tiġi approvata taqdi l-funzjoni tagħha jew toffri fattur speċifiku biss flimkien ma’ komponenti oħrajn tal-vettura u għal din ir-raġuni l-konformità ma’ ħtieġa waħda jew aktar tista’ tkun ivverifikata biss meta l-unità teknika separata li għandha tiġi approvata taħdem flimkien ma’ komponenti ta’ vetturi oħrajn, kemm jekk reali jew simulati, il-kamp ta’ applikazzjoni ta’ l-approvazzjoni tat-tip tal-KEE ta’ l-unità teknika separata għandu jiġi restritt kif xieraq. Iċ-ċertifikat ta’ l-approvazzjoni tat-tip tal-KEE għal unità teknika separata għandu mbagħad jinkludi kwalunkwe restrizzjoni fuq l-użu tagħha u għandu jindika kull kondizzjoni biex titwaħħal. L-osservanza ta’ dawn ir-restrizzjonijiet u l-kondizzjonijiet għandha tkun ivverifikata fil-waqt ta’ l-approvazzjoni tat-tip tal-KEE tal-vettura.

3. L-Artikoli 3 sa 9 u 14 għandhom japplikaw b’analoġija.

B’danakollu, id-detentur ta’ l-approvazzjoni tat-tip tal-KEE għal unità teknika separata mogħtija skond dan l-Artikolu għandu jkun obbligat mhux biss li jimla ċ-ċertifikat previst fl-Artikolu 5(2), imma wkoll li jwaħħal ma’ kull unità manifatturata b’konformità mat-tip approvat l-isem kummerċjali jew trade mark, it-tip u, jekk id-Direttiva separata hekk jipprovdu, in-numru ta’ l-approvazzjoni tat-tip."

Artikolu 2

Il-paragrafu li ġej għandu jiġi miżjud ma’ l-Artikolu 11:

"Din il-proċedura għandha wkoll tapplika għall-iskop ta’ l-introduzzjoni tad-disposizzjonijiet li għandhom x’jaqsmu ma’ l-approvazzjoni tat-tip tal-KEE għall-unitajiet tekniċi separati fid-Direttivi separati."

Artikolu 3

1. L-Istati Membri għandhom idaħħlu fis-seħħ id-disposizzjonijiet meħtieġa sabiex ikunu konformi ma’ din id-Direttiva fi żmien 18-il xahar min-notifika tagħha u għandhom minnufih jinformaw lill-Kumissjoni b’dan.

2. L-Istati Membri għandhom jassiguraw li t-testi tad-disposizzjonijiet ewlenija tal-liġi nazzjonali li huma jadottaw fis-settur kopert b’din id-Direttiva ikunu kkomunikati lill-Kummissjoni.

Artikolu 4

Din id-Direttiva hija indirizzata lill-Istati Membri.

Magħmula fi Brussel, fil-21 ta’ Diċembru 1977.

Għall-Kunsill

Il-President

J. Chabert

[1] ĠU C 118, tas-16.5.1977, p.29.

[2] ĠU C 114, tal-11.5.1977, p. 1.

[3] ĠU L 42, tat-23.2.1970, p.1.

--------------------------------------------------