Rakkomandazzjoni għal DEĊIŻJONI TAL-KUNSILL li tinnomina l-Kapitali Ewropea tal-Kultura għas-sena 2018 fil-Pajjiżi l-Baxxi /* COM/2014/0253 final */
MEMORANDUM TA' SPJEGAZZJONI Id-Deċiżjoni Nru 1622/2006/KE
tal-Parlament Ewropew u tal-Kunsill tal-24 ta' Ottubru 2006 li
tistabbilixxi azzjoni Komunitarja għall-avveniment tal-Kapitali Ewropea
tal-Kultura għas-snin mill-2007 sal-2019[1],
tistipula l-proċedura tan-nomina tal-Kapitali Ewropej tal-Kultura. Skont
l-Artikolu 2 ta' din id-Deċiżjoni, mill-2009 'l quddiem,
żewġt ibliet ta' żewġ Stati Membri se jiġu nnominati
bħala l-Kapitali Ewropej tal-Kultura għal kull sena, fl-ordni
kronoloġika stabbilita fl-Anness tad-Deċiżjoni. Malta u
l-Pajjiżi l-Baxxi huma intitolati li jospitaw l-avveniment fl-2018. Malta
ddeċidiet li tibda l-proċedura tal-għażla tagħha sena
qabel l-iskeda ta' żmien normali, u l-Belt Valletta ġiet innominata
bħala l-"Kapitali Ewropea tal-Kultura 2018" f'Malta
bid-Deċiżjoni tal-Kunsill 2013/286/UE
tas-17 ta' Mejju 2013[2]. In-nomina għall-Kapitali Ewropea
tal-Kultura għall-2018 fil-Pajjiżi l-Baxxi ġiet sottomessa
għall-proċess li ġej. L-Istat Membru kkonċernat
joħroġ sejħa biex jitressqu applikazzjonijiet tal-anqas sitt
snin qabel l-avveniment. Bord tal-għażla magħmul minn 13-il
espert indipendenti fis-settur kulturali jiltaqa’ għal laqgħa ta'
preselezzjoni mhux aktar tard minn ħames snin qabel l-avveniment. Dan il-bord
tal-għażla jivvaluta l-applikazzjonijiet imressqa skont il-kriterji
stabbiliti fl-Artikolu 4 tad-Deċiżjoni Nru 1622/2006/KE, u
jaqbel dwar lista qasira ta' bliet kandidati li jridu jibqgħu jitqiesu
wara li jlestu l-applikazzjoni tagħhom. L-Istat Membru kkonċernat ilaqqa' l-bord
għall-għażla finali, disa' xhur wara l-laqgħa ta'
preselezzjoni. Wara valutazzjoni estensiva tal-bliet magħżula minn
qabel, ibbażata fuq il-kriterji stipulati għall-azzjoni, il-bord
jirrakkomanda belt waħda għat-titlu fl-Istat Membru kkonċernat. Abbażi ta' dawn ir-rakkomandazzjonijiet,
l-Istat Membru jinnomina belt waħda biex tkun il-Kapitali Ewropea
tal-Kultura, u jinnotifika lill-Parlament Ewropew, lill-Kunsill,
lill-Kummissjoni u lill-Kumitat tar-Reġjuni sa mhux aktar tard minn erba'
snin qabel ma jibda l-avveniment. Il-Parlament Ewropew jista' jibgħat
opinjoni lill-Kummissjoni sa mhux aktar tard minn tliet xhur wara li jaslu
n-nomini. Il-Kunsill, filwaqt li jaġixxi fuq
rakkomandazzjoni tal-Kummissjoni, jaħtar uffiċjalment il-bliet
inkwistjoni għas-sena li għaliha jkunu ġew innominati. Wara li tlestew iż-żewġ
fażijiet tal-kompetizzjoni deskritti hawn fuq, il-bord irrakkomanda li
Leeuwarden (il-Pajjiżi l-Baxxi) tospita l-avveniment fl-2018 fir-rapport
tiegħu ta' Settembru 2013. Il-Pajjiżi l-Baxxi għarrfu b'dan
lill-Parlament Ewropew, lill-Kunsill, lill-Kummissjoni u lill-Kumitat
tar-Reġjuni f'Diċembru 2013. Il-Parlament Ewropew bagħat opinjoni
pożittiva tiegħu lill-Kummissjoni fi Frar 2014. Konsegwentament, il-Kummissjoni, b’konformità
mal-Artikolu 9(3) tad-Deċiżjoni Nru 1622/2006/KE,
qiegħda tressaq lill-Kunsill ir-rakkomandazzjoni mehmuża
għall-ħatra uffiċjali ta’ Leeuwarden għall-avveniment
tal-Kapitali Ewropea tal-Kultura 2018 fil-Pajjiżi l-Baxxi. Rakkomandazzjoni għal DEĊIŻJONI TAL-KUNSILL li tinnomina l-Kapitali Ewropea tal-Kultura
għas-sena 2018 fil-Pajjiżi l-Baxxi
IL-KUNSILL TAL-UNJONI EWROPEA, Wara li kkunsidra t-Trattat dwar il-Funzjonament
tal-Unjoni Ewropea, Wara li kkunsidra d-Deċiżjoni
Nru 1622/2006/KE tal-Parlament Ewropew u tal-Kunsill
tal-24 ta' Ottubru 2006 li tistabbilixxi azzjoni Komunitarja
għall-avveniment tal-Kapitali Ewropea tal-Kultura għas-snin mill-2007
sal-2019[3],
u b'mod partikolari l-Artikolu 9(3) tagħha, Wara li kkunsidra
r-rakkomandazzjoni mill-Kummissjoni Ewropea, Wara li kkunsidra
r-rapport tal-Bord tal-Għażla ta' Settembru 2013 dwar
il-proċess tal-għażla tal-Kapitali Ewropea tal-Kultura
fil-Pajjiżi l-Baxxi, Billi: Filwaqt li jqis
li l-kriterji msemmija fl-Artikolu 4 tad-Deċiżjoni
Nru 1622/2006/KE ntlaħqu kollha, ADOTTA DIN ID-DEĊIŻJONI: Artikolu 1 Il-belt ta' Leeuwarden hija maħtura
bħala l-“Kapitali Ewropea tal-Kultura 2018” fil-Pajjiżi l-Baxxi. Artikolu 2 Din id-Deċiżjoni għandha
tidħol fis-seħħ l-għada tal-jum tal-pubblikazzjoni
tagħha f'Il-Ġurnal Uffiċjali tal-Unjoni Ewropea. Magħmul fi Brussell, Għall-Kunsill Il-President [1] ĠU L 304, 3.11.2006, p. 1. [2] ĠU L 162, 14.6.2013, p. 9. [3] ĠU L 304, 3.11.2006, p. 1.