(1)

Ir-Regolament ta’ Delega tal-Kummissjoni (UE) Nru 1062/2014 (2) jistabbilixxi lista ta’ sustanzi attivi eżistenti li jridu jiġu evalwati biex possibbilment jiġu approvati għall-użu fil-prodotti bijoċidali. Dik il-lista tinkludi ċ-ċjanammid (Nru KE: 206-992-3; Nru CAS: 420-04-2).

(2)

Iċ-ċjanammid ġie evalwat għall-użu fil-prodotti bijoċidali għat-tip ta’ prodott 3, fil-prodotti bijoċidali għall-iġjene veterinarja u fit-tip ta’ prodott 18, fl-insettiċidi, fl-akariċidi, u fil-prodotti għall-kontroll ta’ artropodi oħra, kif deskritt fl-Anness V tad-Direttiva 98/8/KE tal-Parlament Ewropew u tal-Kunsill (3), li jikkorrispondu rispettivament mat-tipi ta’ prodotti 3 u 18 kif deskritti fl-Anness V tar-Regolament (UE) Nru 528/2012.

(3)

Il-Ġermanja ġiet iddeżinjata bħala l-Istat Membru relatur u l-awtorità kompetenti tagħha għall-evalwazzjoni ressqet ir-rapport ta’ valutazzjoni flimkien mal-konklużjonijiet tagħha lill-Kummissjoni fit-30 ta’ Lulju 2013. Wara t-tressiq tar-rapport ta’ valutazzjoni, saru diskussjonijiet f’laqgħat tekniċi organizzati mill-Aġenzija Ewropea għas-Sustanzi Kimiċi (“l-Aġenzija”).

(4)

Mill-Artikolu 90(2) tar-Regolament (UE) 528/2012 isegwi li jenħtieġ li s-sustanzi li għalihom l-evalwazzjoni tal-Istati Membri tlestiet sal-1 ta’ Settembru 2013 jiġu vvalutati f’konformità mad-dispożizzjonijiet tad-Direttiva 98/8/KE.

(5)

F’konformità mal-Artikolu 75(1)(a), tar-Regolament (UE) Nru 528/2012, il-Kumitat dwar il-Prodotti Bijoċidali hu responsabbli għat-tħejjija tal-opinjoni tal-Aġenzija dwar l-applikazzjonijiet għall-approvazzjoni tas-sustanzi attivi. F’konformità mal-Artikolu 7(2) tar-Regolament Delegat (UE) Nru 1062/2014, il-Kumitat dwar il-Prodotti Bijoċidali adotta l-opinjonijiet tal-Aġenzija fis-16 ta’ Ġunju 2016 (“l-opinjonijiet tas-16 ta’ Ġunju 2016) (4), wara li kkunsidra l-konklużjonijiet tal-awtorità kompetenti għall-evalwazzjoni.

(6)

Skont l-opinjonijiet tas-16 ta’ Ġunju 2016, iċ-ċjanammid issodisfa l-kriterji biex jiġi kklassifikat bħala karċinoġenu tal-kategorija 2 u tossiku għar-riproduzzjoni tal-kategorija 2 f’konformità mar-Regolament (KE) Nru 1272/2008 tal-Parlament Ewropew u tal-Kunsill (5), u għalhekk tqies li għandu wkoll proprjetajiet li jfixklu s-sistema endokrinali f’konformità mal-Artikolu 5(3) tar-Regolament (UE) Nru 528/2012, sakemm jiġu adottati atti delegati li jispeċifikaw il-kriterji xjentifiċi għad-determinazzjoni tal-proprjetajiet li jfixklu s-sistema endokrinali. L-opinjonijiet tas-16 ta’ Ġunju 2016 qiesu wkoll li r-riskji għal saħħet il-bniedem u għall-ambjent mill-użu tal-prodotti bijoċidali rappreżentattivi ppreżentati fl-applikazzjoni għall-approvazzjoni taċ-ċjanammid għat-tipi ta’ prodotti 3 u 18 kienu aċċettabbli soġġetti għal miżuri xierqa ta’ mitigazzjoni tar-riskji. Madankollu, il-valutazzjoni tar-riskju ppreżentata f’dawk l-opinjonijiet ma qisitx ir-riskji li jirriżultaw mill-proprjetajiet li jfixklu s-sistema endokrinali taċ-ċjanammid.

(7)

Ir-Regolament Delegat tal-Kummissjoni (UE) 2017/2100 (6) li jistabbilixxi l-kriterji xjentifiċi għad-determinazzjoni tal-proprjetajiet li jfixklu s-sistema endokrinali skont ir-Regolament (UE) Nru 528/2012 daħal fis-seħħ fis-7 ta’ Diċembru 2017 u sar applikabbli fis-7 ta’ Ġunju 2018.

(8)

B’antiċipazzjoni tal-applikazzjoni tal-kriterji xjentifiċi l-ġodda stabbiliti fir-Regolament Delegat (UE) 2017/2100, u biex tiġi pprovduta ċarezza fir-rigward tal-proprjetajiet perikolużi u r-riskji li jirriżultaw mill-użu taċ-ċjanammid, fis-26 ta’ April 2018, skont l-Artikolu 75(1)(g) tar-Regolament (UE) Nru 528/2012, il-Kummissjoni talbet lill-Aġenzija (7) tirrevedi l-opinjonijiet tagħha tas-16 ta’ Ġunju 2016 u tiċċara jekk iċ-ċjanammid għandux ukoll proprjetajiet li jfixklu s-sistema endokrinali abbażi tal-kriterji xjentifiċi stabbiliti f’dak ir-Regolament Delegat. L-Aġenzija ntalbet taġġorna biss dik il-parti tal-opinjonijiet relatata mal-valutazzjoni tal-proprjetajiet li jfixklu s-sistema endokrinali, sakemm il-konklużjoni ta’ dik il-valutazzjoni ma taffettwax ir-riżultati tal-valutazzjoni tar-riskju diġà mwettqa jew ir-rakkomandazzjonijiet għall-approvazzjoni. Fil-każ ta’ dan l-aħħar, din il-valutazzjoni u dawn ir-rakkomandazzjonijiet kellhom jiġu aġġornati wkoll. Għat-tħejjija tal-opinjonijiet riveduti tal-Aġenzija, l-awtorità kompetenti għall-evalwazzjoni tal-Ġermanja stiednet lill-applikant iressaq informazzjoni addizzjonali fir-rigward tal-valutazzjoni tal-proprjetajiet li jfixklu s-sistema endokrinali taċ-ċjanammid f’konformità mal-kriterji stabbiliti fir-Regolament Delegat (UE) 2017/2100.

(9)

Il-Kumitat dwar il-Prodotti Bijoċidali adotta l-opinjonijiet riveduti tal-Aġenzija fl-10 ta’ Diċembru 2019 (“l-opinjonijiet tal-10 ta’ Diċembru 2019”) (8), wara li kkunsidra l-konklużjonijiet tal-awtorità kompetenti għall-evalwazzjoni.

(10)

Skont l-opinjonijiet tal-10 ta’ Diċembru 2019, iċ-ċjanammid għandu proprjetajiet li jfixklu s-sistema endokrinali li jistgħu jikkawżaw effetti negattivi fil-bnedmin u fl-ambjent (organiżmi li mhumiex fil-mira) abbażi tal-kriterji stabbiliti fir-Regolament Delegat (UE) 2017/2100. L-opinjonijiet irrimarkaw li ma hemm l-ebda metodoloġija maqbula għat-twettiq ta’ valutazzjoni tar-riskju tal-proprjetajiet li jfixklu s-sistema endokrinali u li, minħabba l-esponiment għaċ-ċjanammid tal-bnedmin u tal-ambjent, ma jistax jiġi eskluż riskju relatat mal-proprjetajiet li jfixklu s-sistema endokrinali.

(11)

L-opinjonijiet tal-10 ta’ Diċembru 2019 ma kien fihom l-ebda informazzjoni dwar jekk jistax jinkiseb soll sikur fir-rigward tal-proprjetajiet li jfixklu s-sistema endokrinali taċ-ċjanammid, u, jekk dan hu l-każ, jekk ir-riskji tal-użu tal-prodotti bijoċidali rappreżentattivi ppreżentati fl-applikazzjoni għall-approvazzjoni taċ-ċjanammid għat-tipi ta’ prodotti 3 u 18 jistgħux jitqiesu aċċettabbli jew le, fir-rigward tal-proprjetajiet li jfixklu s-sistema endokrinali taċ-ċjanammid.

(12)

Fit-2 ta’ Settembru 2020, skont l-Artikolu 75(1)(g) tar-Regolament (UE) Nru 528/2012, il-Kummissjoni talbet lill-Aġenzija (9) tirrevedi l-opinjonijiet tagħha tal-10 ta’ Diċembru 2019 u tiċċara jekk jistax jinkiseb soll sikur fir-rigward tal-proprjetajiet li jfixklu s-sistema endokrinali taċ-ċjanammid, u tikkonkludi jekk ir-riskji għal saħħet il-bniedem u għall-ambjent jistgħux jitqiesu aċċettabbli jew le.

(13)

Il-Kumitat dwar il-Prodotti Bijoċidali adotta l-opinjonijiet riveduti tal-Aġenzija fit-30 ta’ Novembru 2021 (“l-opinjonijiet tat-30 ta’ Novembru 2021) (10), wara li kkunsidra l-konklużjonijiet tal-awtorità kompetenti għall-evalwazzjoni. Skont dawk l-opinjonijiet, peress li ma kienx possibbli li jinkiseb soll sikur fir-rigward tal-proprjetajiet li jfixklu s-sistema endokrinali taċ-ċjanammid, ma huwiex possibbli li jiġi konkluż jekk ir-riskji kemm għas-saħħa tal-pubbliku ġenerali kif ukoll għall-ambjent tal-prodott bijoċidali rappreżentattiv użat għat-tip ta’ prodott 3 (għad-diżinfezzjoni mill-utenti professjonali kontra l-Brachyspira hyodysenteriae tad-demel likwidu maħżun taħt il-paviment f’għamla ta’ gradilja fl-istalel tal-ħnieżer sabiex il-ħnieżer għas-simna jiġu protetti mill-marda tal-ħnieżer id-dissenterija) u tat-tip ta’ prodott 18 (għall-kontroll mill-utenti professjonali tal-Musca domestica fid-demel likwidu fl-istalel tal-ħnieżer) humiex aċċettabbli jew le. Għalhekk, ma setgħet tinsilet l-ebda konklużjoni dwar jekk iċ-ċjanammid jissodisfax il-kundizzjonijiet tal-approvazzjoni.

(14)

Għalhekk, minħabba li l-opinjonijiet tat-30 ta’ Novembru 2021 tal-Aġenzija ma jipprovdux konklużjoni pożittiva jew negattiva dwar jekk iċ-ċjanammid jissodisfax il-kundizzjonijiet tal-approvazzjoni, il-Kummissjoni tqis li fl-aħħar mill-aħħar ma ntweriex, abbażi tad-data disponibbli fl-applikazzjoni mressqa għall-approvazzjoni, li l-prodott bijoċidali rappreżentattiv li fih iċ-ċjanammid għat-tipi ta’ prodotti 3 u 18 jista’ jkun mistenni li ma jkollux effetti inaċċettabbli huwa stess, jew bħala riżultat tar-residwi tiegħu, fuq saħħet il-bniedem u fuq l-ambjent.

(15)

Filwaqt li tqiesu l-opinjonijiet tat-30 ta’ Novembru 2021, ma ntweriex li l-prodotti bijoċidali tat-tipi ta’ prodotti 3 u 18 li fihom iċ-ċjanammid jissodisfaw il-kriterji stabbiliti fl-Artikolu 5(1)(b)(iii) u (iv), meta jinqraw flimkien mal-Artikolu 10(1) tad-Direttiva 98/8/KE. Għaldaqstant, huwa xieraq li ċ-ċjanammid ma jiġix approvat għall-użu fil-prodotti bijoċidali għat-tipi ta’ prodotti 3 u 18.

(16)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Prodotti Bijoċidali,