30.9.2014 |
MT |
Il-Ġurnal Uffiċjali tal-Unjoni Ewropea |
L 284/1 |
REGOLAMENT TA' DELEGA TAL-KUMMISSJONI (UE) Nru 1025/2014
tal-25 ta' Lulju 2014
li jemenda l-Anness I għar-Regolament tal-Kunsill (KE) Nru 1528/2007 li japplika l-arranġamenti għall-prodotti li joriġinaw f'ċerti stati li huma parti mill-Grupp ta' Stati Afrikani, tal-Karibew u tal-Paċifiku (AKP) provdut għalihom fi ftehimiet li jistabbilixxu, jew li jwasslu biex jiġu stabbiliti, Ftehim ta' Sħubija Ekonomika, kif emendat bir-Regolament (UE) Nru 38/2014 tal-Parlament Ewropew u tal-Kunsill li jemenda ċerti Regolamenti relatati mal-politika kummerċjali komuni fir-rigward tal-għoti ta' setgħat iddelegati u ta' implimentazzjoni għall-adozzjoni ta' ċerti miżuri
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament tal-Kunsill (KE) Nru 1528/2007 tal-20 ta' Diċembru 2007 li japplika l-arranġamenti għall-prodotti li joriġinaw f'ċerti stati li huma parti mill-Grupp ta' Stati Afrikani, tal-Karibew u tal-Paċifiku (AKP) provdut għalihom fi ftehimiet li jistabbilixxu, jew li jwasslu biex jiġu stabbiliti, Ftehim ta' Sħubija Ekonomika (1) kif emendat bir-Regolament (UE) Nru 38/2014 tal-Parlament Ewropew u tal-Kunsill tal-15 ta' Jannar 2014 li jemenda ċerti Regolamenti relatati mal-politika kummerċjali komuni fir-rigward tal-għoti ta' setgħat iddelegati u ta' implimentazzjoni għall-adozzjoni ta' ċerti miżuri (2), u b'mod partikolari L-Artikolu 2(2) tiegħu,
Billi:
(1) |
Il-lista ta' pajjiżi benefiċjarji tar-reġim ta' importazzjoni tal-UE mingħajr dazju mingħajr kwoti hija stabbilita mill-Anness I għar-Regolament (KE) Nru 1528/2007 (ir-Regolament dwar l-Aċċess għas-Suq). |
(2) |
Il-Botswana, il-Kamerun, il-Côte d'Ivoire, il-Fiġi, il-Gana, il-Kenja, in-Namibja u s-Sważiland ma kinux ħadu l-passi meħtieġa lejn ir-ratifika tal-Ftehim rispettiv tagħhom u għalhekk, skont l-Artikolu 2(3) tar-Regolament (KE) Nru 1528/2007, u b'mod partikolari l-punt (b) tiegħu, mhux se jibqgħu jkunu koperti mill-arranġament dwar l-aċċess għas-suq permess mir-Regolament (KE) Nru 1528/2007, mill-1 ta' Ottubru 2014. Dan jirriżulta mir-Regolament (UE) Nru 527/2013 tal-Parlament Ewropew u tal-Kunsill (3). |
(3) |
Il-Côte d'Ivoire u l-Gana, u l-Unjoni Ewropea u l-Istati Membri tagħha, ikkonkludew in-negozjati dwar Ftehim ta' Sħubija Ekonomika fit-30 ta' Ġunju 2014. |
(4) |
Il-Botswana, in-Namibja u s-Sważiland, u l-Unjoni Ewropea u l-Istati Membri tagħha, ikkonkludew in-negozjati dwar Ftehim ta' Sħubija Ekonomika fil-15 ta' Lulju 2014. |
(5) |
Il-Kummissjoni għandha s-setgħa li tadotta atti delegati skont l-Artikolu 24a tar-Regolament (KE) Nru 1528/2007 biex temenda l-Anness I għal dak ir-Regolament sabiex iżżid reġjuni jew stati mill-Grupp ta' Stati tal-AKP li kkonkludew negozjati dwar ftehim bejn l-Unjoni Ewropea u li jissodisfa r-rekwiżiti tal-Artikolu XXIV GATT 1994. |
(6) |
Wara d-data ta' applikazzjoni ta' dan ir-Regolament, iż-żieda tal-Botswana, il-Côte d'Ivoire, il-Gana, in-Namibja u s-Sważiland mal-Anness I għar-Regolament dwar l-Aċċess għas-Suq se tkun soġġetta għall-kundizzjonijiet tal-Artikolu 2(3) ta' dak ir-Regolament u b'mod partikolari l-punt (b) tiegħu, |
ADOTTAT DAN IR-REGOLAMENT:
Artikolu 1
Iż-żieda tal-pajjiżi mal-Anness I
Fl-Anness I għar-Regolament (KE) Nru 1528/2007 jiddaħħlu l-pajjiżi li ġejjin:
|
Ir-Repubblika tal-Botswana; |
|
Ir-Repubblika tal-Côte d'Ivoire; |
|
Ir-Repubblika tal-Gana; |
|
Ir-Repubblika tan-Namibja; |
|
Ir-Renju tas-Sważiland. |
Artikolu 2
Dħul fis-seħħ
Dan ir-Regolament jidħol fis-seħħ fil-jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Huwa japplika mill-1 ta' Ottubru 2014.
Dan ir-Regolament jorbot fl-intier tiegħu u japplika direttament fl-Istati Membri kollha.
Magħmula fi Brussell, il-25 ta' Lulju 2014.
Għall-Kummissjoni
Il-President
José Manuel BARROSO
(1) ĠU L 348 tal-31.12.2007, p. 1.
(2) ĠU L 18, 21.1.2014, p. 52.
(3) Ir-Regolament (UE) Nru 527/2013 tal-Parlament Ewropew u tal-Kunsill tal-21 ta' Mejju 2013 li jemenda r-Regolament tal-Kunsill (KE) Nru 1528/2007 fir-rigward tal-esklużjoni ta' għadd ta' pajjiżi mil-lista ta' reġjuni jew stati li kkonkludew in-negozjati (ĠU L 165, 18.6.2013, p. 59).