Regoli tal-oriġini preferenzjali pan-Ewro-Mediterranji

 

SOMMARJU TA’:

Id-Deċiżjoni 2013/94/UE — il-konklużjoni tal-Konvenzjoni Reġjonali dwar ir-regoli preferenzjali tal-oriġini pan-Ewro-Mediterranji

X’INHU L-GĦAN TA’ DIN ID-DEĊIŻJONI?

• Hija tiffinalizza l-Konvenzjoni Reġjonali dwar ir-regoli preferenzjali tal-oriġini* pan-Ewro-Mediterranji.
• Din il-konvenzjoni tippermetti lill-pajjiżi taż-żona pan-Ewro-Mediterranja (elenkati fil-punti ewlenin hawn taħt) sabiex jibbenefikaw minn regoli komuni u trattament doganali preferenzjali.
• Hija timmira li tippromwovi integrazzjoni ekonomika aħjar u rabtiet kummerċjali aktar b’saħħithom fiż-żona.

PUNTI EWLENIN

Konvenzjoni reġjonali dwar l-oriġini tal-merkanzija nnegozjata fiż-żona pan-Ewro-Mediterranja ġiet iffirmata f’isem l-UE f’April 2011. Il-konvenzjoni tlaqqa’ flimkien fi strument legali uniku r-regoli kollha fir-rigward tal-oriġini tal-merkanzija nnegozjata fil-kuntest ta’ madwar 60 ftehim bilaterali ta’ kummerċ ħieles (FTAs) bejn pajjiżi taż-żona pan-Ewro-Mediterranja inkluż il-proċess ta’ Stabbilizzazzjoni u Assoċjazzjoni tal-UE (PSA).

Partijiet kontraenti

Minbarra l-UE, il-partijiet kontraenti għal din il-konvenzjoni huma:

• l-Istati tal-Assoċjazzjoni Ewropea tal-Kummerċ Ħieles (EFTA): l-Iżlanda, il-Liechtenstein, in-Norveġja u l-Iżvizzera;
• il-firmatarji għad-dikjarazzjoni ta’ Barċellona: l-Alġerija, l-Eġittu, l-Iżrael, il-Ġordan, il-Libanu, il-Marokk, l-Awtorità Palestinjana, is-Sirja, it-Tuneżija u t-Turkija;
• il-Gżejjer Faroe;
• il-parteċipanti fil-proċess PSA: il-Bożnija-Ħerzegovina, il-Kroazja, l-Eks-Repubblika Jugoslava tal-Maċedonja, l-Albanija, il-Montenegro u s-Serbja, kif ukoll il-Kosovo (¹);
• ir-Repubblika tal-Moldova, il-Georgia u l-Ukrajna.

Prodotti oriġinarji

Sabiex il-preferenzi tariffarji jiġu applikati, trid tiġi stabbilita l-oriġini tal-merkanzija. Il-merkanzija titqies bħala prodotti li joriġinaw fiż-żona ta’ kulminazzjoni pan-Ewro-Mediterranja jekk:

• tinkiseb b’mod sħiħ (eż. imminata, maħsuda jew, fil-każ tal-annimali ħajjin, imwielda u mrobbija) fit-territorju ta’ parti kontraenti;
• tkun komposta minn materjali li joriġinaw f’pajjiżi li mhumiex firmatarji tal-konvenzjoni (materjali mhux oriġinarji), iżda li ġew maħduma jew ipproċessati biżżejjed fit-territorju ta’ parti kontraenti (l-Anness II tal-Appendiċi I);
• tkun ġiet importata miż-Żona Ekonomika Ewropea (ŻEE) u esportata f’parti kontraenti oħra.

Iż-żona ta’ kumulazzjoni pan-Ewro-Mediterranja

Il-konvenzjoni topera fuq il-bażi ta’ sistema ta’ akkumulazzjoni fejn il-partijiet kontraenti jistgħu jużaw prodotti oriġinarji minn ta’ xulxin bħallikieku dawn ġew prodotti domestikament. Skont is-sistema ta’ kumulazzjoni ta’ oriġini pan-Ewro-Mediterranja, sistema ta’ kumulazzjoni djagonali li topera bejn l-UE u ħafna mill-pajjiżi inkwistjoni.

Prova ta’ oriġini

• L-awtoritajiet doganali tal-pajjiż ta’ esportazzjoni joħorġu ċertifikati tal-moviment EUR.1 jew EUR-MED tal-pajjiż ta’ esportazzjoni bħala prova tal-istqarrijiet ta’ oriġini. Dan jippermetti lill-importaturi f’partijiet kontraenti oħrajn sabiex jibbenefikaw mill-arranġamenti tariffarji preferenzjali.
• Dikjarazzjoni ta’ oriġini jew dikjarazzjoni ta’ oriġini EUR-MED tista’ tingħata wkoll minn esportatur approvat.

Arranġamenti għal kooperazzjoni amministrattiva

L-awtoritajiet doganali tal-partijiet se jikkoordinaw ma’ xulxin (eż. billi jaqsmu kampjuni ta’ marki ta’ timbri użati għall-ħruġ ta’ ċertifikati ta’ moviment EUR.1 u EUR-MED jew biex jivverifikaw provi ta’ oriġini.)

Ġesjoni u implimentazzjoni

Kumitat konġunt magħmul minn rappreżentanti tal-partijiet kontraenti kollha jiżgura l-immaniġġjar u l-implimentazzjoni tal-konvenzjoni.

(¹) Din id-deżinjazzjoni hija mingħajr ħsara għall-pożizzjonijiet dwar l-istatus u hija konformi mar-Riżoluzzjoni 1244 tal-Kunsill tas-Sigurtà tan-Nazzjonijiet Uniti u l-Opinjoni tal-Qorti Internazzjonali tal-Ġustizzja dwar id-Dikjarazzjoni tal-Indipendenza tal-Kosovo.

MINN META TIBDA TAPPLIKA D-DEĊIŻJONI?

Din ilha tapplika mis-26 ta’ Marzu 2012.

SFOND

Għal aktar informazzjoni, ara:

• Kumulazzjoni pan-Ewro-Mediterranja u l-Konvenzjoni PEM (Kummissjoni Ewropea).

TERMINI EWLENIN

DOKUMENT EWLIENI

Id-Deċiżjoni tal-Kunsill 2013/94/UE tas- 26 ta’ Marzu 2012 dwar il-konklużjoni tal-Konvenzjoni Reġjonali dwar ir-regoli preferenzjali tal-oriġini pan-Ewro-Mediterranji (ĠU L 54, 26.2.2013, pp. 3-158)

DOKUMENTI RELATATI

Id-Deċiżjoni tal-Kunsill 2013/93/UE tal- 14 ta’ April 2011 dwar l-iffirmar, f’isem l-Unjoni Ewropea, tal-Konvenzjoni Reġjonali dwar ir-regoli tal-oriġini preferenzjali pan-Ewro-Mediterranji (ĠU L 54, 26.2.2013, pp. 1-2)

l-aħħar aġġornament 09.02.2018