Eżenzjoni mid-dazji doganali u imposti oħra: Konvenzjoni dwar l-Ammissjoni Temporanja

 

SOMMARJU TA’:

Id-Deċiżjoni 93/329/KEE li tirrigwarda l-konklużjoni tal-Konvenzjoni dwar l-Ammissjoni Temporanja u l-aċċettazzjoni tal-annessi tagħha

Konvenzjoni dwar l-ammissjoni temporanja (Konvenzjoni ta’ Istanbul)

X’INHU L-GĦAN TAD-DEĊIŻJONI U TAL-KONVENZJONI?

Id-Deċiżjoni tapprova f’isem il-Komunità Ekonomika Ewropea (issa l-UE) il-Konvenzjoni dwar l-Ammissjoni Temporanja* li sar qbil fuqha f’Istanbul fis-26 ta’ Ġunju 1990 u l-annessi tagħha, soġġett għal ċerti kondizzjonijiet.

L-għan tal-Konvenzjoni huwa li tiffaċilita l-ammissjoni temporanja billi tissimplifika u tarmonizza l-proċeduri permezz tal-adozzjoni ta’ dokumenti mudelli standardizzati bħal dokumenti doganali internazzjonali b’sigurtà internazzjonali, b’hekk tikkontribwixxi għall-iżvilupp tal-kummerċ internazzjonali.

PUNTI EWLENIN

Kull parti kontraenti għall-Konvenzjoni għandha d-dritt li tagħmel l-ammissjoni temporanja tal-oġġetti soġġetta għall-wiri ta’ dokument doganali, skont proċedura ssimplifikata, jekk ikun xieraq, u għall-ħlas ta’ garanzija ekwivalenti għal ammont li ma jaqbiżx l-ammont tad-dazji u taxxi ta’ importazzjoni li l-oġġetti huma eżentati minnhom.

L-ammissjoni temporanja tista’ tintemm:

• permezz ta’ esportazzjoni mill-ġdid tal-oġġetti;
• billi jitqiegħdu taħt proċedura doganali oħra bħal ikklerjar għal użu fid-dar;
• permezz tal-qerda totali tal-oġġetti.

Il-Konvenzjoni tippermetti l-istabbiliment ta’ kumitat amministrattiv biex jikkunsidra l-implimentazzjoni u l-interpretazzjoni tal-Konvenzjoni.

Dan jiddeskrivi fid-dettall ir-regoli applikabbli għal:

• dokumenti ta’ ammissjoni temporanja (ATA* u CPD* carnets);
• oġġetti għal wiri jew użu f’esebizzjonijiet, fieri, laqgħat jew avvenimenti simili;
• tagħmir professjonali;
• kontenituri, palits, imballaġġ, kampjuni u oġġetti oħra importati b’rabta ma’ operazzjoni kummerċjali;
• oġġetti importati b’rabta ma’ operazzjoni ta’ manifattura;
• oġġetti importati għal skopijiet edukattivi, xjentifiċi jew kulturali;
• effetti personali tal-vjaġġaturi u oġġetti importati għal skopijiet ta’ sport;
• materjal tal-pubbliċità tat-turisti;
• oġġetti importati bħala traffiku tal-fruntiera;
• oġġetti importati għal skopijiet umanitarji;
• mezzi ta’ trasport;
• annimali;
• oġġetti importati b’eżenzjoni parzjali mid-dazji u taxxi ta’ importazzjoni.

L-UE taċċetta l-annessi għall-Konvenzjoni, soġġett għal ċerti riservi.

DATA TA’ DĦUL FIS-SEĦĦ

Il-Konvenzjoni daħlet fis-seħħ fit-18 ta’ Settembru 1997.

TERMINI EWLENIN

DOKUMENTI EWLENIN

Id-Deċiżjoni tal-Kunsill 93/329/KEE tal-15 ta’ Marzu 1993 li tirrigwarda l-konklużjoni tal-Konvenzjoni dwar l-Ammissjoni Temporanja u l-aċċettazzjoni tal-annessi tagħha (ĠU L 130, 27.5.1993, pp. 1-3)

Konvenzjoni dwar l-ammissjoni temporanja (Konvenzjoni ta’ Istanbul) (ĠU L 130, 27.5.1993, pp. 4-75)

DOKUMENT RELATAT

Information (Informazzjoni) on the entry into force of the Convention on Temporary Admission and accepting its Annexes (dwar id-dħul fis-seħħ tal-Konvenzjoni dwar l-Ammissjoni Temporanja u l-aċettazzjoni tal-Annessi tagħha) (ĠU L 329, 29.11.1997, p. 69)

l-aħħar aġġornament 05.11.2018