Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Summaries of EU Legislation

Protezzjoni legali: Topografiji ta’ prodotti semikondutturi

 

SOMMARJU TA’:

Id-Direttiva 87/54/KEE dwar il-protezzjoni legali ta’ topografiji ta’ prodotti semikondutturi

X’INHU L-GĦAN TAD-DIRETTIVA?

  • Id-Direttiva għandha l-għan li tipprovdi sistema ċara u armonizzata madwar il-pajjiżi tal-UE għall-protezzjoni legali ta’ topografiji* (disinji ta’ tqassim) ta’ prodotti semikondutturi*.
  • L-għan ta’ din il-forma partikolari ta’ dritt ta’ proprjetà intellettwali huwa li jiġi evitat li l-mikroċipp oriġinali jew id-disinni taċ-ċirkwiti integrati jiġu kkupjati u sussegwentement kummerċjalizzati, jew kif inhuma, jew fi kwalunkwe prodott li jkunu inkorporati fih.

PUNTI EWLENIN

Kundizzjonijiet għall-għoti ta’ protezzjoni ta’ topografiji ta’ prodotti semikondutturi

Il-pajjiżi tal-UE:

  • għandhom jadottaw leġiżlazzjoni li tipproteġi topografiji ta’ semikondutturi fejn id-disinn tagħhom jissodisfa żewġ kundizzjonijiet:
    • huma r-riżultat tal-isforz intellettwali tal-kreatur tagħhom stess,
    • dawn mhumiex komuni fost l-industrija tas-semikondutturi. Fejn l-elementi tat-topografija ta’ prodott semikonduttur ikunu komuni fl-industrija, jistgħu jkunu protetti biss sal-punt li t-taħlita ta’ dawn l-elementi, meqjusa fit-totalità tagħhom, tissodisfa l-kundizzjoni t’hawn fuq;
  • għandu jingħata d-dritt għall-protezzjoni lill-persuna li toħloq it-topografija, jekk dik il-persuna hija individwu li huwa ċittadin ta’ pajjiż tal-UE jew li normalment huwa residenti hemmhekk. Madankollu, huma jistgħu jispeċifikaw lil min jingħata d-dritt fejn tinħoloq topografija matul l-impjieg tal-kreatur jew taħt kuntratt li ma jkunx kuntratt ta’ impjieg;
  • tista’, taħt ċerti kundizzjonijiet, tingħata protezzjoni lil individwi, kumpaniji jew persuni ġuridiċi oħra li jisfruttaw b’mod kummerċjali għall-ewwel darba topografija:
    • li qabel ma kinitx sfruttata b’mod kummerċjali,
    • li jkunu ġew awtorizzati esklussivament biex jisfruttaw it-topografija b’mod kummerċjali madwar l-UE mill-persuna intitolata li tawtorizzaha;
  • jistgħu jidħlu f’negozjati ma’ pajjiżi li mhumiex fl-UE biex jestendu d-dritt għall-protezzjoni lil persuni li mhumiex koperti mid-Direttiva. Meta jagħmlu dan, għandhom jinfurmaw lill-Kummissjoni Ewropea;
  • jistgħu jirrifjutaw jew ineħħu l-protezzjoni fir-rigward tat-topografija ta’ prodott semikonduttur fejn applikazzjoni għar-reġistrazzjoni f’forma xierqa ma tkunx ġiet ippreżentata lil awtorità pubblika fi żmien sentejn minn meta tkun ġiet sfruttata b’mod kummerċjali għall-ewwel darba;
  • jistgħu jirrikjedu li materjal li jidentifika jew li jagħti eżempju tat-topografija jiġi ddepożitat mal-awtoritajiet pubbliċi. Madankollu, dan il-materjal ma għandux ikun disponibbli għall-pubbliku meta jkun sigriet kummerċjali.

Drittijiet esklussivi

Id-drittijiet mogħtija huma drittijiet esklussivi. Dawn jinkludu:

  • id-dritt li tiġi awtorizzata jew ipprojbita r-riproduzzjoni ta’ topografija protetta; u
  • id-dritt li jiġi awtorizzat jew ipprojbit l-isfruttament kummerċjali jew l-importazzjoni għal dak l-iskop ta’ topografija jew ta’ prodott semikunduttur manifatturat bl-użu tat-topografija.

Id-dritt esklussiv li tiġi awtorizzata jew ipprojbita r-riproduzzjoni ma japplikax għar-riproduzzjoni:

  • għal skopijiet privati għal għanijiet mhux kummerċjali;
  • għall-iskop tal-analiżi, l-evalwazzjoni jew it-tagħlim tal-kunċetti, il-proċessi, is-sistemi jew it-tekniki inkorporati fit-topografija jew it-topografija nnifisha.

Il-protezzjoni mogħtija lit-topografiji ta’ prodotti semikondutturi ma testendi għall-ebda kunċett, proċess, sistema, teknika jew informazzjoni kkodifikata inkorporata fit-topografija minbarra t-topografija nnifisha.

Reġistrazzjoni

  • Fejn ir-reġistrazzjoni tat-topografija hija kundizzjoni għall-għoti ta’ drittijiet esklussivi, dawk id-drittijiet isiru applikabbli jew:
    • fid-data li fiha tiġi ppreżentata l-applikazzjoni għar-reġistrazzjoni; jew
    • fid-data li fiha t-topografija tiġi sfruttata għall-ewwel darba fi kwalunkwe post fid-dinja, skont liema tiġi l-ewwel.
  • Meta r-reġistrazzjoni ma tkunx kundizzjoni għall-għoti ta’ drittijiet esklussivi, id-drittijiet jibdew japplikaw meta t-topografija tkun sfruttata b’mod kummerċjali għall-ewwel darba fi kwalunkwe post fid-dinja jew meta tkun stabbilita għall-ewwel darba jew ikkodifikata.

L-iskadenza tad-drittijiet

Id-drittijiet esklussivi jiskadu 10 snin mit-tmiem tas-sena kalendarja li fiha t-topografija ġiet sfruttata b’mod kummerċjali għall-ewwel darba. Fejn tkun meħtieġa reġistrazzjoni, il-perjodu ta’ 10 snin jiġi kkalkulat:

  • mit-tmiem tas-sena kalendarja li fiha ġiet ippreżentata l-applikazzjoni għar-reġistrazzjoni; jew
  • mit-tmiem tas-sena kalendarja li fiha t-topografija ġiet sfruttata b’mod kummerċjali għall-ewwel darba, skont liema minnhom tiġi l-ewwel.

Estensjoni tal-protezzjoni legali għal pajjiżi mhux tal-UE

Il-protezzjoni legali ta’ topografiji ta’ prodotti semikondutturi ġiet estiża għal individwi, kumpaniji u persuni ġuridiċi oħra minn:

  • l-Istati Uniti (id-Deċiżjoni 93/16/KEE),
  • il-Kanada (id-Deċiżjoni 94/700/KE),
  • Membru tal-Organizzazzjoni Dinjija tal-Kummerċ (id-Deċiżjoni 94/824/KE), u
  • Isle of Man (id-Deċiżjoni 96/644/KE).

L-infurzar tad-DPI

Ir-Regolament (UE) Nru 608/2013 dwar l-infurzar doganali tad-drittijiet tal-proprjetà intellettwali, li ħassar ir-Regolament (KE) Nru 1383/2003, estenda l-lista ta’ drittijiet protetti biex jinkludi wkoll topografiji ta’ prodotti semikondutturi mill-1 ta’ Jannar 2014.

MINN META TAPPLIKA D-DIRETTIVA?

Id-Direttiva ilha tapplika mit-23 ta’ Diċembru 1986 u kellha ssir liġi fil-pajjiżi tal-UE sas-7 ta’ Novembru 1987.

SFOND

Fil-livell internazzjonali, fi ħdan l-Organizzazzjoni Dinjija tal-Proprjetà Intellettwali, it-Trattat ta’ Washington dwar il-Proprjetà Intellettwali fir-Rigward taċ-Ċirkwiti Integrati ġie adottat fl-1989. Dan jipprovdi protezzjoni għat-topografiji ta’ ċirkwiti integrati. Għalkemm it-trattat ma daħalx fis-seħħ, il-kontenut tiegħu ġie inkorporat b’referenza għall-Ftehim dwar l-Aspetti tad-Drittijiet tal-Proprjetà Intellettwali Relatati mal-Kummerċ (ġeneralment magħruf bħala l-Ftehim TRIPS – ara s-sommarju) iffirmat taħt l-Organizzazzjoni Dinjija tal-Kummerċ.

Għal aktar informazzjoni, ara:

TERMINI EWLENIN

Topografija: fil-każ ta’ prodott semikonduttur (ara t-terminu prinċipli li jmiss), serje ta’ immaġnijiet relatati, iżda fissi jew kodifikati:
  • li tirrappreżenta d-disinn tridimensjonali tas-saffi li jiffurmaw prodott semikonduttur;
  • kull immaġni fis-serje għandha d-disinn, jew parti mid-disinn, ta’ wiċċ tal-prodott semikonduttur fi kwalunkwe stadju tal-manifattura tiegħu.
Prodott semikonduttur: ċirkwiti integrati, magħrufa wkoll bħala mikroċipep (jew ċipep), huma l-forma finali jew intermedja ta’ kwalunkwe prodott:
  • li jikkonsisti minn qafas ta’ materjal li jinkludi saff ta’ materjal semikonduttur; u
  • li jkollu wieħed jew aktar saffi oħrajn magħmula minn materjal tal-konduttività, tal-insulazzjoni jew tas-semikondutturi, bis-saffi skont disinn tridimensjonali predeterminat; u
  • maħsub biex iwettaq, esklussivament jew flimkien ma’ funzjonijiet oħra, funzjoni elettronika.

Iċ-ċipep huma inkorporati f’ħafna oġġetti tal-konsumatur bħal tagħmir domestiku bħal magni tal-ħasil jew televiżjonijiet, kif ukoll f’karozzi, mowbajls, kompjuters, tagħmir mediku u magni.

DOKUMENT EWLIENI

Id-Direttiva tal-Kunsill 87/54/KEE tas-16 ta’ Diċembru 1986 dwar il-protezzjoni legali ta’ topografiji ta’ prodotti semikundutturi (ĠU L 24, 27.1.1987, pp. 36-40)

DOKUMENTI RELATATI

Ir-Regolament (UE) Nru 608/2013 tal-Parlament Ewropew u tal-Kunsill tat-12 ta’ Ġunju 2013 dwar l-infurzar doganali tad-drittijiet ta’ proprjetà intellettwali u li jħassar ir-Regolament tal-Kunsill (KE) Nru 1383/2003 (ĠU L 181, 29.6.2013, pp. 15-34)

Il-Ftehim dwar iż-Żona Ekonomika Ewropea — Anness XVII — Proprjetà intellettwali — Lista prevista fl-Artikolu 65(2) (ĠU L 1, 3.1.1994, pp. 482-483)

ESTENSJONI TAL-PROTEZZJONI GĦAL PAJJIŻI MHUX FL-UE

Id-Deċiżjoni tal-Kunsill 96/644/KE tal-11 ta’ Novembru 1996 dwar l-estensjoni tal-protezzjoni legali ta’ topografi ta’ prodotti semikondutturi lil persuni mill-Isle of Man (ĠU L 293, 16.11.1996, pp. 18-19)

Id-Deċiżjoni tal-Kunsill 94/824/KE tat-22 ta’ Diċembru 1994 dwar l-estensjoni tal-protezzjoni legali ta’ topografi ta’ prodotti tas-semikondutturi għal persuni minn Membru tal-Organizzazzjoni Dinjija tal-Kummerċ (ĠU L 349, 31.12.1994, pp. 201-202)

Id-Deċiżjoni tal-Kunsill 94/700/KE tal-24 ta’ Ottubru 1994 dwar l-estensjoni tal-protezzjoni legali ta’ topografi ta’ prodott semikondutturi lil persuni mill-Kanada (ĠU L 284, 1.11.1994, pp. 61-62)

Id-Decizjoni tal-Kunsill 93/16/KEE tal-21 ta’ Diċembru 1992 dwar l-estensjoni tal-protezzjoni legali tat-topografiji ta’ prodotti semikondutturi lil persuni mill-Istati Uniti tal-Amerka u ċerti territorji (ĠU L 11, 19.1.1993, pp. 20-21)

L-emendi suċċessivi għad-Deċiżjoni 93/16/KEE ġew inkorporati fit-test oriġinali. Din il-verżjoni konsolidata għandha valur dokumentarju biss.

l-aħħar aġġornament 04.11.2020

Top