Taxxi indiretti fuq il-ġbir tal-kapital

 

SOMMARJU TA’:

Direttiva tal-Kunsill 2008/7/KE — dwar it-taxxi indiretti fuq il-ġbir tal-kapital

X’INHU L-GĦAN TAD-DIRETTIVA?

• Li tipprova tirregola t-taxxi indiretti imposti mill-pajjiżi tal-UE fuq il-ġbir tal-kapital. Taxxi indiretti huma dawk imposti fuq oġġetti u servizzi aktar milli fuq dħul jew profitti.
• Filwaqt li ġeneralment tipprojbixxi dawn it-taxxi, notevolment id-dazju fuq il-kapital*, din tippermetti lil ċerti pajjiżi li jimponuhom jekk jissodisfaw ċerti kundizzjonijiet eċċezzjonali.

PUNTI EWLENIN

It-taxxa u l-kumpaniji kkonċernati

L-għan tad-direttiva huwa li tirregola l-impożizzjoni ta’ taxxi indiretti fuq dawn li ġejjin:

• kontribuzzjonijiet ta’ kapital lil kumpaniji ta’ kapital;
• operazzjonijiet ta’ ristrutturar li jinvolvu kumpaniji ta’ kapital;
• il-ħruġ ta’ ċerti titoli u obbligazzjonijiet (titoli fuq perjodu twil li jagħtu rata fissa ta’ interess).

Id-direttiva tapplika għall-kumpaniji segwenti:

• kumpaniji limitati (kumpaniji privati li s-sidien tagħhom huma legalment responsabbli għad-djun tagħhom biss sal-limitu tal-ammont ta’ kapital li investew);
• sħubijiet limitati b’kapital azzjonarju (parti mill-kapital li jkun ġej mill-ħruġ ta’ ishma);
• kumpaniji b’responsabbiltà limitata.

F’din id-direttiva “kumpanija ta’ kapital” tfisser kwalunkwe kumpanija, ditta, assoċjazzjoni jew persuna ġuridika:

• li l-ishma tagħha jistgħu jiġu nnegozjati fil-borża;
• li l-membri tagħha jistgħu jiddisponu mill-ishma tagħhom liberament u huma responsabbli biss għad-djun tal-kumpanija sal-limitu tal-ishma tagħhom;
• u, bħala regola, kwalunkwe oħra li topera għal profitt.

Id-direttiva tiċċara x’inhu mfisser b’kontribuzzjonijiet ta’ kapital (inkluż il-formazzjoni ta’ jew konverżjoni f’kumpanija ta’ kapital jew iż-żidiet fil-kapital azzjonarju jew permezz ta’ kontribuzzjonijiet ta’ assi jew b’kapitalizzazzjoni ta’ profitti jew riżervi). Tiddefinixxi wkoll operazzjonijiet ta’ ristrutturar bħal inkorporazzjonijiet affettwati mill-kontribuzzjoni ta’ assi jew mill-iskambju ta’ ishma.

Projbizzjoni fuq l-impożizzjoni ta’ taxxa indiretta fuq il-ġbir tal-kapital

Il-pajjiżi tal-UE ma jistgħux jimponu taxxa indiretta fuq il-ġbir tal-kapital lil kumpaniji ta’ kapital.

Dawn it-tranżazzjonijiet jaffettwaw lil dawn li ġejjin b’mod partikolari:

• kontribuzzjonijiet ta’ kapital;
• self jew servizzi pprovduti bħala parti minn kontribuzzjonijiet ta’ kapital;
• reġistrazzjoni jew formalitajiet oħrajn meħtieġa qabel jinbeda negozju minħabba l-forma ġuridika tal-kumpanija;
• l-alterazzjoni tal-istrumenti kostitwenti ta’ kumpanija*;
• l-operazzjonijiet ta’ ristrutturar.

Id-direttiva tipprojbixxi wkoll it-taxxi indiretti fuq il-ħruġ ta’ ċerti titoli u obbligazzjonijiet. Madankollu, il-pajjiżi tal-UE jistgħu jimponu ċerti dazji ta’ trasferiment, tariffi, drittijiet jew it-taxxa fuq il-valur miżjud.

Eżenzjonijiet

Regoli speċjali japplikaw għall-pajjiżi tal-UE li imponew dazju fuq kontribuzzjonijiet ta’ kapital lil kumpaniji ta’ kapital (dazju fuq il-kapital) mill-1 ta’ Jannar 2006. Dawk il-pajjiżi jistgħu jkomplu jimponu d-dazju, li għandu jitħallas b’rata waħda li ma taqbiżx il-1% u jista’ jintalab biss fuq kontribuzzjonijiet ta’ kapital, jiġifieri dazju fuq il-kapital ma jistax jiġi impost fuq tranżazzjonijiet oħra bħal operazzjonijiet ta’ ristrutturar.

Id-dazju fuq il-kapital jista’ jiġi impost biss minn pajjiż tal-UE jekk effettivament iċ-ċentru ta’ ġestjoni tal-kumpanija ta’ kapital tkun tinsab f’dak il-pajjiż fiż-żmien meta sseħħ il-kontribuzzjoni. Barra minn hekk, id-dazju fuq il-kapital jista’ jiġi impost darba biss fl-UE.

Jistgħu jiġu applikati eżenzjonijiet mid-dazju fuq il-kapital għal kumpaniji ta’ kapital li jipprovdu servizz pubbliku jew li jwettqu esklussivament għan kulturali jew soċjali.

MINN META BDIET TAPPLIKA D-DIRETTIVA?

Ilha fis-seħħ mit-12 ta’ Marzu 2008. Kellha ssir liġi fil-pajjiżi tal-UE sal- 31 ta’ Diċembru 2008.

TERMINI EWLENIN

DOKUMENT EWLIENI

Direttiva tal-Kunsill 2008/7/KE tat-12 ta’ Frar 2008 dwar it-taxxi indiretti fuq il-ġbir tal-kapital (ĠU L 46, 21.2.2008, pp. 11-22)

L-emendi suċċessivi għad-Direttiva 2008/7/KE ġew inkorporati fit-test oriġinali. Din il-verżjoni konsolidata għandha valur dokumentarju biss.

l-aħħar aġġornament 07.11.2017