Ambjent mingħajr karti għad-dwana u l-kummerċ

 

SOMMARJU TA’:

Deċiżjoni Nru 70/2008/KE li tissostitwixxi l-proċeduri tad-dwana bil-karti ma’ dawk elettroniċi fl-UE kollha

X’INHU L-GĦAN TAD-DEĊIŻJONI?

Għandha l-għan li tippromwovi d-dwana elettronika fil-Kummissjoni Ewropea. Sistemi bħal dawn jiffaċilitaw il-kummerċ billi jnaqqsu l-ispejjeż u jikkoordinaw il-proċeduri. Jippermettu wkoll l-iskambju ta’ data bejn l-amministrazzjonijiet doganali tal-pajjiżi tal-UE, il-kummerċjanti u l-Kummissjoni. B’dan il-mod, itejbu u jiffaċilitaw il-katina tal-provvista tal-loġistika u l-proċessi doganali.

PUNTI EWLENIN

Wara l-komunikazzjoni tal-2003 dwar il-ħolqien ta’ ambjent sempliċi u mingħajr karti għad-dwana u l-kummerċ, skont din id-deċiżjoni ġie miftiehem li l-Kummissjoni u l-pajjiżi tal-UE jistabbilixxu:

• sistemi elettroniċi doganali siguri;
• integrati;
• interoperabbli; u
• aċċessibbli għall-iskambju tad-
  • data fid-dokumenti tad-dikjarazzjonijiet doganali
  • li jakkumpanjaw id-dikjarazzjonijiet u ċ-ċertifikati doganali u
  • informazzjoni rilevanti oħra.

Il-Kummissjoni u l-pajjiżi tal-UE għandhom jistabbilixxu l-istruttura u l-mezzi għall-operazzjoni ta’ dawn is-sistemi elettroniċi doganali.

Miżuri

Biex tilħaq l-għanijiet stabbiliti fid-deċiżjoni, l-UE għandha:

• tarmonizza l-iskambju ta’ informazzjoni;
• tirrevedi l-proċessi doganali bil-għan li tottimizza l-effiċjenza u l-effettività tagħhom;
• toffri lill-kummerċjanti firxa wiesgħa ta’ servizzi doganali elettroniċi.

Ir-rwol tal-Kummissjoni

Il-Kummissjoni għandha tikkoordina:

• l-istabbiliment, l-ittestjar, it-tħaddim u l-manutenzjoni tal-komponenti tal-UE tas-sistemi kompjuterizzati;
• is-sistemi u s-servizzi stabbiliti f’din il-proposta ma’ proġetti oħra li jikkonċernaw servizzi elettroniċi tal-gvern;
• l-iżvilupp parallel tal-elementi nazzjonali u tal-UE;
• servizzi doganali awtomatiċi u s-servizzi ta’ tieqa unika* fil-livell tal-UE;
• it-tlestija tal-kompiti allokati lilha taħt pjan strateġiku multiannwali;
• ħtiġijiet ta’ taħriġ.

Il-Kummissjoni għandha tissorvelja wkoll il-progress fir-rigward tal-Grupp tal-Politika Doganali. Għandha wkoll tibda konsultazzjonijiet regolari mal-partijiet interessati ekonomiċi kkonċernati.

Ir-rwol tal-pajjiżi tal-UE

Il-pajjiżi tal-UE għandhom jiżguraw dan li ġej:

• l-istabbiliment, l-ittestjar, it-tħaddim u l-manutenzjoni tal-komponenti nazzjonali tas-sistemi kompjuterizzati;
• il-koordinazzjoni tas-sistemi u s-servizzi previsti f’din id-deċiżjoni ma’ proġetti rilevanti oħrajn relatati mal-gvern elettroniku fil-livell nazzjonali;
• it-tlestija tal-kompiti allokati lilhom taħt il-pjan strateġiku multiannwali u l-programmi ta’ ħidma — l-aħħar programm ta’ ħidma jinsab fid-Deċiżjoni ta’ Implimentazzjoni tal-Kummissjoni (UE) 2016/578 dwar l-iżvilupp u t-tnedija tas-sistemi elettroniċi meħtieġa għall-implimentazzjoni tal-Kodiċi Doganali tal-UE (li ssostitwixxa l-Kodiċi Doganali Komunitarju);
• il-promozzjoni u l-implimentazzjoni fil-livell nazzjonali tas-servizzi doganali elettroniċi u s-servizzi ta’ tieqa unika;
• taħriġ għall-uffiċjali.

Skeda ta’ żmien għal servizzi doganali awtomatizzati

Id-deċiżjoni fiha lista ta’ sistemi u bażijiet ta’ data u tistabbilixxi l-iskeda ta’ żmien għall-implimentazzjoni tagħhom. Is-servizzi ta’ tieqa unika għandhom ikunu disponibbli fi żmien 6 snin.

Finanzjament

Id-deċiżjoni tiddikjara li l-ispejjeż għall-implimentazzjoni tagħha kellhom jinqasmu bejn l-UE u l-pajjiżi tal-UE abbażi tal-karattru tal-UE jew nazzjonali tagħhom. Il-pajjiżi tal-UE kellhom jiżviluppaw mudelli ta’ kondiviżjoni tal-ispejjeż. Bħalissa, l-aspetti tal-UE ta’ ħidma għall-immodernizzar tad-dwana jirċievu fondi skont il-programm ta’ azzjoni Dwana 2020.

MINN META TAPPLIKA D-DEĊIŻJONI?

Ilha tapplika mill-15 ta’ Frar 2008.

SFOND

Għal aktar informazzjoni, ara:

• Dwana elettronika (Kummissjoni Ewropea).

TERMINI EWLENIN

DOKUMENT EWLIENI

Deċiżjoni Nru 70/2008/KE tal-Parlament Ewropew u tal-Kunsill tal-15 ta’ Jannar 2008 dwar ambjent mingħajr karti għad-dwana u l-kummerċ (ĠU L 23, 26.1.2008, pp. 21-26).

DOKUMENTI RELATATI

Deċiżjoni ta’ Implimentazzjoni tal-Kummissjoni (UE) 2016/578 tal-11 ta’ April 2016 li tistabbilixxi Programm ta’ Ħidma relatat mal-iżvilupp u t-tnedija tas-sistemi elettroniċi previsti fil-Kodiċi Doganali tal-Unjoni (ĠU L 99, 15.4.2016, pp. 6-20)

Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni (riformulazzjoni) (ĠU L 269, 10.10.2013, pp. 1-101)

L-emendi suċċessivi għar-Regolament (UE) Nru 952/2013 ġew inkorporati fid-dokument oriġinali. Din il-verżjoni konsolidata hija ta’ valur dokumentarju biss.

Komunikazzjoni mill-Kummissjoni lill-Kunsill, lill-Parlament Ewropew u lill-Kumitat Ekonomiku u Soċjali Ewropew — Ambjent sempliċi u mingħajr karti għad-dwana u l-kummerċ (COM(2003) 452 final, 24.7.2003)

Ir-Regolament tal-Kunsill (KEE) Nru 2913/92 tat-12 ta’ Ottubru 1992 li jwaqqaf il-Kodiċi Doganali tal-Komunità (ĠU L 302, 19.10.1992, pp. 1-50)

Ara l-verżjoni konsolidata.

l-aħħar aġġornament 06.02.2019