L-irkupru ta’ talbiet relatati ma’ taxxi, dazji u miżuri oħra

 

SOMMARJU TA’:

Id-Direttiva 2010/24/UE, li tinkoraġġixxi l-assistenza reċiproka bejn il-pajjiżi tal-UE għall-irkupru ta’ talbiet relatati ma’ taxxi, dazji u miżuri oħra

X’INHU L-GĦAN TAD-DIRETTIVA?

Din id-Direttiva għandha l-għan li tiġġieled l-evażjoni tat-taxxa billi tiżgura li l-pajjiżi tal-UE jikkooperaw aktar mill-qrib (jeħtiġilhom jipprovdu assistenza) rigward l-irkupru ta’ talbiet relatati ma’ taxxi, dazji u miżuri oħra imposti f’pajjiż ieħor tal-UE.

PUNTI EWLENIN

• Din id-Direttiva tapplika għat-talbiet relatati ma’ dawn li ġejjin:
  • it-taxxi u d-dazji kollha imposti minn jew f’isem kwalunkwe pajjiż tal-UE jew f’isem l-UE fl-intier tagħha;
  • ir-rifużjonijiet, l-interventi u miżuri oħra li jiffurmaw parti mis-sistema ta’ finanzjament totali jew parzjali tal-Fond Agrikolu Ewropew ta’ Garanzija (FAEG) u l-Fond Agrikolu Ewropew għall-Iżvilupp Rurali (FAEŻR);
  • l-imposti u dazji oħra fis-suq tas-settur taz-zokkor.
• Il-pajjiżi tal-UE kellhom jinfurmaw lill-Kummissjoni Ewropea bl-awtorità jew l-awtoritajiet nazzjonali kompetenti tagħhom sal-20 ta’ Mejju 2010 għall-pubblikazzjoni f’Il-Ġurnal Uffiċjali tal-UE. Kull awtorità kompetenti jeħtiġilha taħtar uffiċċju ċentrali ta’ kollegament li se jkollu r-responsabbiltà għall-kuntatti mal-pajjiżi l-oħrajn tal-UE f’dan il-qasam.

Talba għal informazzjoni

Awtorità kompetenti hija obbligata tipprovdi lil awtorità kompetenti oħra kwalunkwe informazzjoni rilevanti għal dik l-awtorità applikanti għall-irkupru tat-talbiet tagħha ħlief jekk:

• l-awtorità li ssirilha t-talba ma tkunx tista’ tikseb din l-informazzjoni bil-għan li tirkupra talbiet simili li jinqalgħu f’pajjiżha stess;
• din l-informazzjoni tkun tiddivulga kwalunkwe sigriet kummerċjali, industrijali jew professjonali;
• id-divulgazzjoni tal-informazzjoni tkun tpoġġi f’riskju s-sigurtà tal-pajjiż tal-UE li ssirlu t-talba jew tmur kontra l-politika pubblika tiegħu.

Talba għan-notifika ta’ dokumenti

• Fuq it-talba għal notifika ta’ dokumenti relatati ma’ talbiet, l-awtorità li ssirilha t-talba jeħtiġilha tinnotifika lid-destinatarju d-dokumenti kollha relatati ma’ talba jew l-irkupru tagħha, li jkunu ġejjin mill-pajjiż applikanti tal-UE.
• It-talba għan-notifika trid tinkludi l-informazzjoni rilevanti, bħal: l-isem u l-indirizz tad-destinatarju, l- għan tan-notifika, deskrizzjoni tan-natura u l-ammont tat-talba, u d-dettalji ta’ kuntatt tal-uffiċċji responsabbli għad-dokumenti u għall-ksib ta’ aktar informazzjoni.

Proċeduri ta’ rkupru

• Qabel ma l-awtorità applikanti tagħmel talba għall-irkupru, trid tiġi applikata kwalunkwe proċedura xierqa ta’ rkupru disponibbli, għajr fis-sitwazzjonijiet li ġejjin:
  • fejn ikun ovvju li m’hemmx assi suffiċjenti għall-irkupru fil-pajjiż applikanti tal-UE, iżda li l-persuna kkonċernata għandha l-assi meħtieġa fil-pajjiż tal-UE li ssirlu t-talba;
  • fejn ir-rikors għal tali proċeduri jagħti lok għal diffikultà sproporzjonata.
• Kwalunkwe talba għall-irkupru trid tkun akkumpanjata minn strument uniformi li jippermetti l-infurzar fil-pajjiż tal-UE li ssirlu t-talba.
• L-awtorità kompetenti li ssirilha t-talba se tagħmel użu mis-setgħat u l-proċeduri pprovduti skont il-liġijiet, ir-regolamenti jew id-dispożizzjonijiet amministrattivi tal-pajjiż tal-UE li ssirlu t-talba fir-rigward tat-talbiet li jikkonċernaw l-istess taxxa jew dazju jew taxxa jew dazju simili. Jekk l-awtorità li ssirilha t-talba ma tkunx tqis li l-istess taxxi jew dazji jew oħrajn simili huma applikabbli fil-pajjiż tal-UE li ssirlu t-talba, din minflok għandha tapplika r-regoli relatati mat-taxxa imposta fuq l-introjtu personali.

Tilwim

• Tilwim dwar it-talba, l-istrument inizjali jew uniformi li jippermetti l-infurzar u l-validità ta’ notifika li tkun saret mill-awtorità applikanti jkun responsabbiltà tal-awtoritajiet kompetenti tal-pajjiż applikanti tal-UE. Tilwim li jirrigwarda l-validità ta’ notifika li tkun saret minn awtorità kompetenti tal-pajjiż tal-UE li ssirlu t-talba se jitressaq quddiem l-awtorità kompetenti ta’ dak il-pajjiż tal-UE.
• L-awtorità applikanti tista’ tressaq talba għall-irkupru ta’ talba kkontestata. Jekk it-talba tkun ta’ suċċess, l-awtorità applikanti se tkun responsabbli għar-rimborż tal-ammont irkuprat, b’żieda ma’ kwalunkwe kumpens dovut.

Emenda jew tneħħija tat-talba għal assistenza għall-irkupru

L-awtorità applikanti jenħtiġilha tgħarraf lill-awtorità li ssirilha t-talba immedjatament b’kull emenda tat-talba tagħha għall-irkupru jew bit-tneħħija tagħha billi tindika fid-dettall ir-raġunijiet għall-emenda jew għat-tneħħija.

Talba għal miżuri ta’ prekawzjoni

Meta t-talba jew l-istrument li jippermetti l-infurzar fil-pajjiż applikanti tal-UE jkunu kkontestati fiż-żmien meta ssir it-talba, l-awtorità li ssirilha t-talba se tieħu miżuri ta’ prekawzjoni, b’konformità mal-liġi nazzjonali tagħha, biex tiżgura l-irkupru meta tintalab tagħmel dan mill-awtorità applikanti.

Limiti għall-obbligi tal-awtorità li ssirilha t-talba

L-awtorità li ssirilha t-talba ma tkunx obbligata li tagħti l-assistenza għall-irkupru jekk:

• l-irkupru tat-talba jikkawża diffikultajiet ekonomiċi jew soċjali serji fil-pajjiż tal-UE li ssirlu t-talba;
• it-talba inizjali għal assistenza tirrigwarda talbiet li jmorru lura aktar minn 5 snin;
• l-ammont totali tat-talbiet ikun inqas minn EUR 1 500.

Regoli ġenerali

• Kwalunkwe informazzjoni jew dokument iddivulgati skont din id-Direttiva se jkunu koperti bl-obbligu ta’ segretezza uffiċjali u għalhekk se jkunu protetti skont il-liġi nazzjonali rilevanti tal-pajjiż tal-UE li jkun irċevieha.
• Din id-Direttiva tħassar id-Direttiva2008/55/KE mill-1 ta’ Jannar 2012 ’il quddiem. Ir-referenzi għad-Direttiva mħassra se jiġu interpretati bħala referenzi għal din id-Direttiva.

ID-DIRETTIVA META DAĦLET FIS-SEĦĦ?

Ilha fis-seħħ mill-20 ta’ April 2010. Il-pajjiżi tal-UE kellhom jinkorporawha fil-liġi nazzjonali sal-31 ta’ Diċembru 2011.

DOKUMENT EWLIENI

Direttiva tal-Kunsill 2010/24/UE tas-16 ta’ Marzu 2010 dwar l-assistenza reċiproka għall-irkupru ta’ talbiet relatati ma’ taxxi, dazji u miżuri oħra (ĠU L 84, 31.3.2010, pp. 1-12)

l-aħħar aġġornament 30.10.2017