Il-Karta tad-Drittijiet Fundamentali applikata fil-prattika

 

SOMMARJU TA’:

Komunikazzjoni tal-Kummissjoni — Strateġija biex tissaħħaħ l-applikazzjoni tal-Karta tad-Drittijiet Fundamentali (2020)

Komunikazzjoni tal-Kummissjoni — Strateġija għall-implimentazzjoni effettiva tal-Karta tad-Drittijiet Fundamentali (2010)

X’INHU L-GĦAN TAL-ISTRATEĠIJA?

L-istrateġija 2020 tal-Kummissjoni Ewropea għandha l-għan li tagħmel il-Karta tad-Drittijiet Fundamentali tal-Unjoni Ewropea (EU) realtà għal kulħadd.

Hija titlob għal impenn mill-ġdid biex jiġi assigurat li l-istituzzjonijiet tal-UE u l-Istati Membri tal-UE jużaw il-potenzjal kollu tal-Karta. Hija tibni fuq l-istrateġija 2010.

PUNTI EWLENIN

L-istrateġija 2020 tal-Kummissjoni tiffoka fuq erba’ prijoritajiet.

Assigurazzjoni tal-implimentazzjoni effettiva tal-Karta mill-Istati Membri

ll-Karta torbot lill-Istati Membri meta jimplimentaw il-liġi tal-UE. Il-Kummissjoni ser taħdem mill-qrib mal-Istati Membri u ser tgħinhom jimplimentaw il-liġi tal-UE b’mod effettiv u billi jirrispettaw il-Karta bis-sħiħ. L-Istati Membri qed jintalbu jinnominaw punt fokali għall-Karta biex tiġi ffaċilitata l-koordinazzjoni u l-qsim tal-informazzjoni. Mill-2021, il-Kummissjoni ser tirrapporta fuq il-Karta kull sena, billi tħares iktar mill-qrib lejn l-implimentazzjoni tal-Karta fl-Istati Membri f’oqsma speċifiċi rregolati mill-liġi tal-UE.

Tagħti s-setgħa lill-organizzazzjonijiet tas-soċjetà ċivili, lid-difensuri tad-drittijiet u lill-prattikanti tal-ġustizzja

Organizzazzjonijiet tas-soċjetà ċivili u difensuri tad-drittijiet huma essenzjali għal demokrazija b’saħħitha u sabiex id-drittijiet fundamentali jsiru realtà fil-ħajja tan-nies. Huma qed jiffaċċjaw dejjem iktar sfidi.

Il-Kummissjoni se timmonitorja mill-qrib u tieħu azzjoni kontra miżuri nazzjonali li jaffettwaw l-attivitajiet tas-soċjetà ċivili li jmorru kontra l-liġi tal-UE. Xi Stati Membri xorta għad ma għandhomx istituzzjonijiet nazzjonali tad-drittijiet tal-bniedem li jiffunzjonaw kompletament, li huma ħoloq importanti bejn il-gvern u s-soċjetà ċivili. L-Istati Membri jintalbu jwaqqfu tali istituzzjonijiet u jassiguraw li għandhom il-mezzi biex jaħdmu b’mod kompletament indipendenti. Il-Kummissjoni ser tippromwovi wkoll taħriġ relatat mal-Karta għall-imħallfin, prattikanti oħra tal-ġustizzja u difensuri tad-drittijiet.

It-trawwim tal-użu tal-Karta bħala kumpass għall-istituzzjonijiet tal-UE

L-istituzzjonijiet tal-UE jeħtieġ li jikkonformaw mal-Karta fl-azzjonijiet tagħhom kollha. Il-Kummissjoni ser issaħħaħ il-kapaċità interna tagħha fuq il-konformità mal-Karta, inkluż permezz ta’ apprendiment elettroniku, gwida aġġornata għall-persunal u pjanijiet għal taħriġ. Il-Kummissjoni hija lesta li tgħin lill-Parlament Ewropew u lill-Kunsill biex tassigura li qed japplikaw il-Karta b’mod effettiv fix-xogħol tagħhom.

It-tisħiħ tas-sensibilizzazzjoni tan-nies dwar id-drittijiet tagħhom skont il-Karta

Stħarriġ tal-Ewrobarometru tal-2019 wera li 42 % biss ta’ dawk li wieġbu kienu semgħu bil-Karta u li mhux iktar minn 12 % kienu jafu tassew x’inhi. Minkejja dan, 6 minn 10 li wieġbu riedu jkunu jafu iktar dwar id-drittijiet tagħhom u riedu jiskopru lil min jkkuntattjaw jekk il-Karta tinkiser.

Il-Kummissjoni qed tindirizza d-differenza fis-sensibilizzazzjoni billi:

• tniedi kampanja ta’ informazzjoni biex iżżid is-sensibilizzazzjoni pubblika tad-drittijiet tan-nies u kif dawn jintużaw;
• timmira għas-sensibilizzazzjoni taż-żgħażagħ permezz tal-programm Erasmus+ kif ukoll dik tat-tfal permezz ta’ strateġija dwar id-drittijiet tat-tfal.

Hija titlob lill-Istati Membri jiżviluppaw inizzjattivi li jippromwovu s-sensibilizzazzjoni u jsaħħu l-korpi lokali u l-individwi konċernati.

Azzjoni futura

Il-Kummissjoni:

• ser tippreżenta rapporti annwali fuq l-implimentazzjoni tal-Karta, billi tiffoka fuq qasam tematiku regolat mil-liġi tal-UE;
• fl-2025, se tissottoetti rapport dwar l-implimentazzjoni tal-istrateġija;
• fl-2030 ser tniedi eżerċizzju ta’ rendikont mal-korpi u individwi prinċipali kkonċernati, biex tevalwa l-progress fis-sensibilizzazzjoni u fl-użu tal-Karta.

SFOND

• Il-Karta tad-Drittijiet Fundamentali tal-UE ilha torbot legalment mid-dħul fis-seħħ tat-Trattat ta’ Liżbona fl-1 ta’ Diċembru 2009 (ara s-sommarju). Hija tirrappreżenta l-valuri tal-UE u tafferma mill-ġdid li l-UE hija msejsa fuq id-drittijiet fundamentali, id-demokrazija u l-istat tad-dritt. Il-Karta tħaddan id-drittijiet fundamentali li n-nies igawdu fl-UE. Hija strument modern u komprensiv li jipproteġi u jippromwovi d-drittijiet u l-libertajiet tan-nies fid-dawl tat-tibdil fis-soċjetà, il-progress soċjali u l-iżviluppi xjentifiċi u teknoloġiċi.
• L-istrateġija 2020 hija parti mill-approċċ komprensiv tal-Kummissjoni biex tippromwovi u tipproteġi d-drittijiet u l-valuri fundamentali tal-UE. Hija tikkumplimenta:
  • il-pjan ta’ azzjoni dwar id-demokrazija Ewropea;
  • l-ewwel rapport dwar l-istat tad-dritt.
• L-Aġenzija tal-UE għad-Drittijiet Fundamentali tipprovdi data u informazzjoni dwar kwistjonijiet tad-drittijiet fundamentali fl-Istati Membri. Dan jgħin lill-istituzzjonijiet tal-UE u lill-Istati Membri jiżviluppaw politiki bbażati fuq l-evidenza.
• Għal iktar informazzjoni ara:
  • Applikazzjoni tal-Karta (Il-Kummissjoni Ewropea)
  • Strateġija tal-UE biex issaħħaħ l-applikazzjoni tal-Karta (Il-Kummissjoni Ewropea)
  • L-inkorporazzjoni tad-drittijiet fundamentali fil-proċess leġiżlattiv tal-UE (Il-Kummissjoni Ewropea).

DOKUMENTI PRINĊIPALI

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Strateġija biex issaħħaħ l-applikazzjoni tal-Karta għad-Drittijiet Fundamentali fl-UE (COM(2020) 711 final, 2.12.2020).

Komunikazzjoni tal-Kummissjoni: Strateġija għall-implimentazzjoni effettiva tal-Karta tad-drittijiet fundamentali tal-Unjoni Ewropea (COM(2010) 573 finali,19.10.2010).

DOKUMENTI RELATATI

Il-Karta tad-Drittijiet Fundamentali tal-Unjoni Ewropea (ĠU C 202, 7.6.2016, pp. 389–405).

Ir-Regolament tal-Kunsill (KE) Nru 168/2007 tal-15 ta’ Frar 2007 li jistabbilixxi Aġenzija tal-Unjoni Ewropea għad-Drittijiet Fundamentali (ĠU L 53, 22.2.2007, pp. 1–14).

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Strateġija tal-UE dwar id-drittijiet tat-tfal (COM(2021) 142 final, 24.3.2021).

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Dwar il-pjan ta’ azzjoni Ewropew għad-demokrazija (COM(2020) 790 final, 3.12.2020).

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Rapport tal-2020 dwar l-Istat tad-Dritt — Is-sitwazzjoni tal-istat tad-dritt fl-Unjoni Ewropea (COM(2020)580 final, 30.9.2020).

Dokument ta’ Ħidma tal-Persunal tal-Kummissjoni: Gwida Operazzjonali dwar it-teħid inkunsiderazzjoni tad-Drittijiet Fundamentali fil-Valutazzjonijiet tal-Impatt tal-Kummissjoni (SEC(2011) 567 final, 6.5.2011).

l-aħħar aġġornament 09.12.2021