FTEHIM TA' SĦUBIJA EKONOMIKA INTERIM

bejn il-Côte d'Ivoire, fuq naħa, u l-Komunità Ewropea u l-Istati Membri tagħha, fuq in-naħa l-oħra

WERREJ

PREAMBOLU

5

TITOLU I:

L-GĦANIJIET

6

TITOLU II:

SĦUBIJA GĦALL-IŻVILUPP

6

TITOLU III:

L-ISKEMA KUMMERĊJALI GĦALL-MERKANZIJA

7

KAPITOLU 1:

Id-dazji doganali u l-miżuri li mhux marbuta ma' tariffi

7

KAPITOLU 2:

L-istrumenti ta' protezzjoni kummerċjali

10

KAPITOLU 3:

Il-proċeduri doganali u l-iffaċilitar tal-kummerċ

12

KAPITOLU 4:

L-ostakoli tekniċi għall-kummerċ u miżuri sanitarji u fitosanitarji

14

TITOLU IV

SERVIZZI, INVESTIMENTI U REGOLI MARBUTA MAL-KUMMERĊ

15

TITOLU V:

IL-PREVENZJONI U R-RIŻOLUZZJONI TAT-TILWIM

16

KAPITOLU 1:

L-għan u l-ambitu

16

KAPITOLU 2:

Il-konsultazzjoni u l-medjazzjoni

16

KAPITOLU 3:

Il-proċeduri u tar-riżoluzzjoni tat-tilwim

17

KAPITOLU 4:

Dispożizzjonijiet ġenerali

19

TITOLU VI:

EĊĊEZZJONIJIET ĠENERALI

20

TITOLU VII:

ID-DISPOŻIZZJONIJIET ISTITUZZJONALI, ĠENERALI U FINALI

21

“IR-REPUBBLIKA TAL-CÔTE D'IVOIRE,

fuq naħa waħda,

u

IR-RENJU TAL-BELĠJU,

IR-REPUBBLIKA TAL-BULGARIJA,

IR-REPUBBLIKA ĊEKA,

IR-RENJU TAD-DANIMARKA,

IR-REPUBBLIKA FEDERALI TAL-ĠERMANJA,

IR-REPUBBLIKA TAL-ESTONJA,

L-IRLANDA,

IR-REPUBBLIKA ELLENIKA,

IR-RENJU TA' SPANJA,

IR-REPUBBLIKA FRANĊIŻA,

IR-REPUBBLIKA TALJANA,

IR-REPUBBLIKA TA' ĊIPRU,

IR-REPUBBLIKA TAL-LATVJA,

IR-REPUBBLIKA TAL-LITWANJA,

IL-GRAN DUKAT TAL-LUSSEMBURGU,

IR-REPUBBLIKA TAL-UNGERIJA

MALTA,

IR-RENJU TAL-OLANDA,

IR-REPUBBLIKA TAL-AWSTRIJA,

IR-REPUBBLIKA TAL-POLONJA,

IR-REPUBBLIKA TAL-PORTUGALL,

IR-RUMANIJA,

IR-REPUBBLIKA TAS-SLOVENJA,

IR-REPUBBLIKA TAS-SLOVAKKJA,

IR-REPUBBLIKA TAL-FINLANDJA,

IR-RENJU TAL-IŻVEZJA,

IR-RENJU UNIT TAL-GRAN BRITTANJA U TAL-IRLANDA TA' FUQ,

u

IL-KOMUNITÀ EWROPEA,

fuq in-naħa l-oħra,

PREAMBOLU

WARA LI KKUNSIDRAW il-partenarjat bejn il-Membri tal-Grupp ta' l-Istati Afrikani, tal-Karibew u tal-Paċifiku, min-naħa waħda u l-Komunità Ewropea u l-Istati Membri tagħha, min-naħa l-oħra, iffirmat f'Cotonou fit-23 ta' Ġunju 2000, rivedut fil-Lussemburgu fil-25 ta' Ġunju 2005, minn issa 'l quddiem imsejjaħ “il-Ftehim ta' Cotonou”;

WARA LI KKUNSIDRAW li l-iskema kummerċjali preferenzjali transitorja tal-ftehim ta' Cotonou tiskadi fil-31 ta' Diċembru 2007;

WARA LI KKUNSIDRAW l-impatt negattiv possibbli tal-iskadenza ta' dawn il-preferenzi kummerċjali transitorji previsti fil-ftehim ta' Cotonou dwar l-iskambji kummerċjali bejn iż-żewġ partijiet jekk ma jiġix konkluż ftehim kompatibbli mar-regoli tal-Organizzazzjoni Dinjija tal-Kummerċ (WTO) sal-1 ta' Jannar 2008 biex jeħodlu postu;

WARA LI GĦARFU għalhekk il-bżonn li jistabbilixxu ftehim ta' sħubija ekonomika interim biex iħarsu l-interessi ekonomiċi u kummerċjali tal-partijiet;

WARA LI KKUNSIDRAW ix-xewqa tal-partijiet li jsaħħu r-relazzjonijiet ekonomiċi u kummerċjali tagħhom u li jistabbilixxu relazzjonijiet sostenibbli bbażati fuq is-sħubija u l-kooperazzjoni;

WARA LI KKUNSIDRAW ir-rabta tal-partijiet mal-prinċipji u r-regoli li jsostnu l-kummerċ internazzjonali, partikolarment id-drittijiet u l-obbligi li jirriżultaw mid-dispożizzjonijiet tal-Ftehim Ġenerali dwar it-Tariffi Doganali u l-Kummerċ tal-1994 (GATT tal-1994) u minn ftehimiet oħra multilaterali annessi mal-ftehim li jistabbilixxi l-Organizzazzjoni Dinjija tal-Kummerċ (Ftehim li jistabbilixxi l-WTO), u l-bżonn li dawn jiġu applikati b'mod trasparenti u mingħajr diskriminazzjoni;

WARA LI KKONFERMAW l-impenn tagħhom għar-rispett tad-drittijiet tal-bniedem, il-prinċipji demokratiċi u tas-supremazija tad-dritt, li jikkostitwixxu elementi essenzjali tal-ftehim ta' Cotonou, u l-governanza tajba, li tikkostitwixxi l-element fundamentali tal-Ftehim ta' Cotonou;

WARA LI KKUNSIDRAW il-bżonn li jippromwovu u jgħaġġlu l-iżvilupp ekonomiku, kulturali u soċjali tal-Istati tal-Afrika tal-Punent, bħala kontribuzzjoni għall-paċi u għas-sigurtà u biex jippromwovu ambjent politiku stabbli u demokratiku;

WARA LI KKUNSIDRAW l-importanza li l-partijiet jagħtu lill-għanijiet għall-iżvilupp miftiehma fuq il-livell internazzjonali u għall-miri tal-Millennju għall-iżvilupp tan-Nazzjonijiet Uniti;

WARA LI KKONFERMAW l-impenn tagħhom biex jaħdmu flimkien għat-twettiq tal-għanijiet tal-Ftehim ta' Cotonou, partikolarment il-qerda tal-faqar, l-iżvilupp sostenibbli u l-integrazzjoni progressiva tal-membri tal-grupp tal-Istati tal-Afrika, tal-Karibew u tal-Paċifiku (l-Istati AKP) fl-ekonomija tad-dinja;

WARA LI WREW IX-XEWQA li joħolqu opportunitajiet ġodda għall-impjieg, jattiraw l-investiment, u jtejbu l-kundizzjonijiet tal-ħajja fit-territorju tal-partijiet, filwaqt li jippromwovu l-iżvilupp sostenibbli;

WARA LI KKUNSIDRAW l-importanza tar-rabtiet tradizzjonali eżistenti, u partikolarment ir-rabtiet storiċi, politiċi u ekonomiċi stretti bejn il-Komunità Ewropea, l-Istati Membri tagħha u l-Istati tal-Afrika tal-Punent;

WARA LI GĦARFU d-differenza tal-livell tal-iżvilupp ekonomiku u soċjali li jeżisti bejn l-Istati tal-Afrika tal-Punent u l-Komunità Ewropea;

KONVINTI li dan il-Ftehim se joħloq klima ġdida aktar favorevoli għar-relazzjonijiet tagħhom fl-oqsma tat-tmexxija ekonomika, tal-kummerċ u tal-investimenti u se jiftaħ perspettivi ġodda ta' tkabbir u ta' żvilupp;

WARA LI GĦARFU l-importanza tal-kooperazzjoni għall-iżvilupp għall-implimentazzjoni ta' dan il-ftehim;

FILWAQT LI JISTENNEW il-firma ta' Ftehim ta' sħubija ekonomika globali bejn l-Afrika tal-Punent u l-Unjoni Ewropea li jrid jiżgura l-iżvilupp u l-integrazzjoni sostnuti u armonjużi tar-Reġjun tal-Afrika tal-Punent;

WARA LI KKONFERMAW l-impenn tagħhom li jsostnu l-proċess ta' integrazzjoni reġjonali fi ħdan l-Afrika tal-Punent, u partikolarment li jippromwovu l-integrazzjoni ekonomika reġjonali bħala strument essenzjali għall-integrazzjoni tagħha fl-ekonomija dinjija, filwaqt li jgħinuha tegħleb l-isfidi ta' globalizzazzjoni u twettaq l-iżvilupp ekonomiku u soċjali li tixtieq;

QABLU FUQ ID-DISPOŻIZZJONIJIET LI ĠEJJIN:

TITOLU I

L-GĦANIJIET

Artikolu 1

Il-Ftehim interim

Dan il-ftehim jistabbilixxi qafas inizjali għal ftehim ta' sħubija ekonomika (FSE).

Artikolu 2

Għanijiet

L-għanijiet ta' dan il-ftehim huma dawn li ġejjin:

(a)

li jippermetti lill-parti Côte d'Ivoire li tibbenefika mill-aċċess għal suq aħjar li qed toffri l-parti KE fil-qafas tan-negozjati FSE u, permezz ta' dan, tevita interruzzjoni fil-kummerċ bejn il-Côte d'Ivoire u l-Komunità Ewropea mat-tmiem tal-iskema ta' transizzjoni tal-ftehim ta' Cotonou tal-31 ta' Diċembru 2007, sakemm jiġi konkluż FSE komplet;

(b)

li jistabbilixxi l-bażijiet għan-negozjar ta' FSE li jikkontribwixxi għat-tnaqqis tal-faqar, jippromwovi l-integrazzjoni reġjonali, il-kooperazzjoni ekonomika u t-tmexxija tajba fl-Afrika tal-Punent u jtejjeb il-kapaċitajiet tal-Afrika tal-Punent fil-qasam ta' politika kummerċjali u fuq il-kwistjonijiet marbuta mal-kummerċ;

(ċ)	li jippromwovi l-integrazzjoni armonjuża u progressiva tal-Afrika tal-Punent fl-ekonomija dinjija, skont l-għażliet politiċi tagħhom u l-prijoritajiet tal-iżvilupp;

(d)	li jsaħħaħ ir-relazzjonijiet eżistenti bejn il-partijiet fuq bażi ta' solidarjetà u ta' interess reċiproku;

(e)	li joħloq ftehim kompatibbli mal-Artikolu XXIV tal-GATT ta' l-1994.

TITOLU II

SĦUBIJA GĦALL-IŻVILUPP

Artikolu 3

Il-kooperazzjoni għall-iżvilupp fil-qafas ta' dan il-ftehim

Il-partijiet jimpenjaw ruħhom li jikkooperaw sabiex jimplimentaw dan il-Ftehim u sabiex jikkontribwixxu biex jakkumpanjaw lill-parti Côte d'Ivoire fil-ksib tal-għanijiet tal-FSE. Din il-kooperazzjoni tieħu forom finanzjarji u mhux finanzjarji.

Artikolu 4

Il-kooperazzjoni għall-iffinanzjar tal-iżvilupp fil-qafas ta' dan il-ftehim

1.   Id-dispożizzjonijiet tal-ftehim ta' Cotonou dwar il-kooperazzjoni u l-integrazzjoni ekonomiċi u reġjonali se jiġu implimentati sabiex jimmassimizzaw il-benefiċċji ta' dan il-Ftehim.

2.   Il-finanzjament tal-Komunità Ewropea (1) dwar il-kooperazzjoni għall-iżvilupp bejn il-parti Côte d'Ivoire u l-Komunità Ewropea li fuqha tibbaża l-implimentazzjoni ta' dan il-ftehim se titwettaq fil-qafas tar-regoli u l-proċeduri adattati previsti mill-ftehim Cotonou, partikolarment il-proċeduri tal-programmazzjoni tal-Fond Ewropew għall-Iżvilupp (FED) u fil-qafas tal-istrumenti pertinenti ffinanzjati mill-Baġit Ġenerali tal-Unjoni Ewropea. F'dan il-kuntest, l-appoġġ għall-implimentazzjoni ta' dan il-FSE se jkun waħda mill-prijoritajiet.

3.   L-Istati Membri tal-Komunità Ewropea jimpenjaw ruħhom kollettivament biex isostnu, permezz tal-politiki u l-istrumenti għall-iżvilupp rispettivi tagħhom, l-azzjonijiet ta' żvilupp favur il-kooperazzjoni ekonomika reġjonali u l-implimentazzjoni ta' dan il-Ftehim, kemm fil-livell nazzjonali u kemm f'dak reġjonali, skont il-prinċipji tal-effikaċja u ta' komplimentarjetà tal-għajnuna.

4.   Il-partijiet se jikkooperaw biex jiffaċilitaw l-intervent ta' donaturi oħra lesti li jsostnu l-isforzi tal-parti Côte d'Ivoire biex iwettqu l-għanijiet ta' dan il-Ftehim.

5.   Il-partijiet jagħrfu l-utilità tal-mekkaniżmi ta' finanzjament reġjonali bħalma hu fond reġjonali FSE stabbilit minn u għar-reġjun biex il-finanzjament jiġi mmirat fil-livell reġjonali u nazzjonali u għall-implimentazzjoni b'mod effikaċi tal-miżuri ta' akkompanjament għal dan il-Ftehim. Il-Komunità Ewropea timpenja ruħha li timmira l-isforzi tagħha kemm permezz ta' mekkaniżmi ta' finanzjament tar-reġjun stess, u kemm dawk magħżula mill-pajjiżi li jagħmlu parti minn dan il-Ftehim fir-rispett tar-regoli u l-proċeduri previsti fil-Ftehim ta' Cotonou u skont il-prinċipji tal-effikaċja tal-għajnuna tad-dikjarazzjoni ta' Pariġi, sabiex tkun żgurata implimentazzjoni semplifikata, effikaċi u mgħaġġla.

6.   Fl-implimentazzjoni tad-dispożizzjonijiet tal-paragrafi 1 sa 5 ta' dan l-Artikolu, il-partijiet jimpenjaw ruħhom li jikkooperaw b'mod finanzjarju u mhux finanzjarju fl-oqsma definiti fl-Artikoli 5, 6, 7, u 8 hawn taħt.

Artikolu 5

Il-qasam tax-xogħol

Il-partijiet iqisu li l-qasam tax-xogħol jikkostitwixxi faċilitatur tal-iżvilupp ekonomiku, u li għalhekk, id-dispożizzjonijiet ta' dan l-ftehim għandhom l-għan li jikkontribwixxu għal dan l-għan komuni. Il-Côte d'Ivoire, li ffirmat it-Trattat tal-Organizzazzjoni għall-Armonizzazzjoni fl-Afrika tal-Liġi tax-Xogħol (OHADA), terġa' ssostni l-impenn tagħha biex tapplika d-dispożizzjonijiet ta' dan it-Trattat.

Il-partijiet jimpenjaw ruħhom, skont id-dispożizzjonjiet tal-Artikolu 4, li jaħdmu bis-sħiħ għat-titjib tal-qasam tax-xogħol.

Artikolu 6

Appoġġ għall-implimentazzjoni tar-regoli

Il- partijiet jaqblu li l-implimentazzjoni tar-regoli marbuta mal-kummerċ, li l-oqsma tal-kooperazzjoni tagħhom huma ddettaljati fil-kapitoli differenti ta' dan il-Ftehim, tikkostitwixxi element essenzjali biex jintlaħqu l-għanijiet ta' dan il-Ftehim. Il-kooperazzjoni f'dan il-qasam se tiġi implimentata skont it-termini previsti fl-Artikolu 4.

Artikolu 7

It-tisħiħ u l-aġġornament tas-setturi produttivi

Fil-qafas tal-implimentazzjoni ta' dan il-Ftehim, il-partijiet isostnu r-rieda tagħhom li jippromwovu l-aġġornament tal-kompetittività tas-setturi produttivi tal-Côte d'Ivoire affettwati minn dan il-Ftehim.

Il-partijiet jaqblu li jikkooperaw permezz tal-istrumenti ta' kooperazzjoni, u skont id-dispożizzjonijiet tal-Artikolu 4 u li jistabbilixxu:

—	il-pożizzjonar mill-ġdid tas-settur privat fir-rigward ta' opportunitajiet ekonomiċi ġodda maħluqa minn dan il-Ftehim;

—	id-definizzjoni u l-implimentazzjoni ta' strateġiji ta' aġġornament;

—	it-titjib tal-ambjent tas-settur privat u tal-klima tal-kwistjonijiet stipulati fl-Artikoli 5 u 6;

—	il-promozzjoni tas-sħubija bejn is-setturi privati tal-partijiet.

Artikolu 8

Il-kooperazzjoni fil-qasam ta' aġġustament fiskali

1.   Il-partijiet jagħrfu l-isfidi li l-eliminazzjoni jew it-tnaqqis sostanzjali tad-dazji doganali previsti minn dan il-Ftehim jistgħu jippreżentaw lill-Côte d'Ivoire, u li dawn jaqblu li jistabbilixxu djalogu u kooperazzjoni f'dan il-qasam.

2.   Fid-dawl tal-kalendarju ta' tneħħija approvat miż-żewġ partijiet f'dan il-Ftehim, dawn jaqblu li jistabbilixxu djalogu fil-fond dwar il-miżuri ta' adattament fiskali biex jassiguraw fit-tul il-bilanċ tal-baġit tal-Côte d'Ivoire.

3.   Il-partijiet jaqblu li jikkooperaw, fil-qafas tad-dispożizzjonijiet tal-Artikolu 4, partikolarment biex jiġu faċilitati l-miżuri ta' assistenza, fl-oqsma li ġejjin:

a)	il-kontribuzzjoni ta' proporzjonijiet sinifikanti li jassorbu l-impatt fiskali nett f'komplimentarjetà sħiħa mar-riformi fiskali;

b)	l-appoġġ għar-riforma flimkien mad-djalogu f'dan il-qasam.

Artikolu 9

Il-kooperazzjoni fil-fora internazzjonali

Il-partijiet se jagħmlu kull sforz biex jikkooperaw fil-fora internazzjonali kollha fejn jiġu ttrattati t-temi kollha li jinteressaw din is-sħubija.

TITOLU III

L-ISKEMA KUMMERĊJALI GĦALL-MERKANZIJA

KAPITOLU 1

Id-dazji doganali u l-miżuri li mhux marbuta ma' tariffi

Artikolu 10

Id-dazji doganali

1.   B'dazji doganali, wieħed jifhem id-dazji jew it-taxxi ta' kwalunkwe tip imħallsa matul l-importazzjoni jew l-esportazzjoni jew fil-każ tal-importazzjoni jew tal-esportazzjoni ta' merkanzija hekk kif previst mir-regoli tad-WTO.

Din id-dispożizzjoni m'għandiex tiġi interpretata bħala li tapplika għat-taxxi interjuri jew għal dawk ta' effett ekwivalenti, li jiġu imposti fil-mument tal-ħruġ mit-territorju.

2.   Għal kull prodott, id-dazju doganali bażiku li għalih japplika t-tnaqqis suċċessiv huwa dak speċifikat fil-kalendarji ta' tneħħija ta' tariffi ta' kull parti.

Artikolu 11

Ħlasijiet u spejjeż oħra

Il-partijiet isostnu l-impenn tagħhom li jirrispettaw id-dispożizzjonijiet tal-Artikolu VIII tal-GATT tal-1994.

Artikolu 12

Id-dazji doganali fuq il-prodotti li joriġinaw mill-Côte d'Ivoire

Il-prodotti li joriġinaw mill-Côte d'Ivoire huma importati fil-parti KE ħielsa mid-dazji doganali, ħlief għall-prodotti indikati u skont il-kundizzjonijiet definiti fl-Anness 1.

Artikolu 13

Id-dazji doganali fuq il-prodotti li joriġinaw mill-KE

Id-dazji doganali fuq il-prodotti li joriġinaw mill-KE li huma destinati għall-Côte d'Ivoire huma mnaqqsa jew eliminati skont il-kalendarju tat-tneħħija tat-tariffi fl-Anness 2.

Artikolu 14

Ir-regoli tal-oriġini

1.   Fis-sens ta' dan il-kapitolu, “ta' oriġini” tapplika għall-merkanzija li tikkonforma mar-regoli tal-oriġini fis-seħħ fl-1 ta' Jannar 2008 fuq it-territorju tal-partijiet.

2.   Il-partijiet għandhom jistabbilixxu skema komuni reċiproka li tiggverna r-regoli tal-oriġini sa mhux aktar tard mill-31 ta' Lulju 2008, ibbażata fuq ir-regoli tal-oriġini li ġejjin mill-ftehim ta' Cotonou u li tipprevedi s-simplifikazzjoni tagħhom filwaqt li jitqiesu l-għanijiet tal-iżvilupp tal-parti Côte d'Ivoire. Din l-iskema l-ġdida ser tkun integrata ma' dan il-ftehim permezz tad-deċiżjoni tal-Kumitat FSE. Jekk ma jkunx hemm ftehim bejn il-partijiet, l-iskema fis-seħħ se tkun l-aktar skema favorevoli għall-Côte d'Ivoire bejn l-iskema fis-seħħ fil-KE u r-regoli mtejbin li ġejjin mill-ftehim ta' Cotonou.

3.   Mhux aktar tard minn tliet snin wara d-data ta' dħul fis-seħħ ta' dan il-ftehim, il-partijiet għandhom jirrevedu d-dispożizzjonijiet fis-seħħ li fuqhom huma bbażati ir-regoli tal-oriġini, bl-għan li jissimplifikaw il-kunċetti u l-metodi utilizzati biex jiddeterminaw l-oriġini fir-rigward tal-għanijiet tal-iżvilupp tal-Kosta tal-Avorju skont dawk tal-Afrika tal-Punent. Fil-qafas ta' din ir-reviżjoni, il-partijiet għandhom jikkunsidraw l-iżvilupp teknoloġiku, il-proċessi tal-produzzjoni u kull fattur ieħor, inkluż ir-riformi preżenti li jikkonċernaw ir-regoli tal-oriġini li jistgħu jinħtieġu modifiki għall-iskema reċiproka nnegozjata. Kull emenda jew sostituzzjoni għandha ssir permezz ta' deċiżjoni tal-Kumitat FSE.

Artikolu 15

Statu quo

1.   L-ebda dazju doganali għall-importazzjoni ġdid ma għandu jiġi introdott fil-kummerċ bejn il-partijiet, u dawk li attwalment japplikaw għall-kummerċ bejn il-partijiet ma għandhomx jiġu miżjuda mid-data tad-dħul fis-seħħ tal-ftehim.

2.   Minkejja l-paragrafu 1, fil-qafas tal-finalizzazzjoni tal-istabbiliment tat-tariffa esterna komuni tal-Komunità Ekonomika tal-Istati tal-Afrika tal-Punent (ECOWAS), il-Côte d'Ivoire se tkun tista' tirrevedi d-dazji doganali ta' bażi li japplikaw għall-merkanzija li toriġina mill-Komunità Ewropea sal-31 ta' Diċembru 2011, sakemm l-inċidenza ġenerali ta' dawn id-dazji ma tkunx ogħla minn dik li tirriżulta mid-dazji msemmija fl-Anness 2. B'konsegwenza, il-Kumitat FSE jemenda l-Anness 2.

Artikolu 16

Id-dazji, it-taxxi jew dħul ieħor u spejjeż fuq l-esportazzjoni

1.   L-ebda dazju doganali fuq l-esportazzjoni ġdid jew spejjeż b'effett ekwivalenti ma għandhom jiġu introdotti, u lanqas ma għandhom jiġu miżjuda dawk li diġà japplikaw, fil-kummerċ bejn il-partijiet mid-data tad-dħul fis-seħħ ta' dan il-Ftehim.

2.   F'ċirkostanzi eċċezzjonali, jekk il-parti Côte d'Ivoire tkuntista' tiġġustifika bżonnijiet speċifiċi għad-dħul, ta' protezzjoni għall-industrija li qed tibda, jew ta' ħarsien għall-ambjent, din tista', temporanjament u wara konsultazzjoni mal-parti KE, tintroduċi dazji doganali fuq l-esportazzjonijiet jew spejjeż b'effett ekwivalenti fuq numru limitat ta' merkanzija addizzjonali, jew iżżid l-inċidenza ta' dawk eżistenti.

3.   Il-partijiet jaqblu li jirrevedu d-dispożizzjonijiet ta' dan l-artikolu fil-qafas tal- Kumitat FSE fi żmien tlett snin mid-dħul fis-seħħ ta' dan il-Ftehim, filwaqt li jikkunsidraw bis-sħiħ l-impatt tagħhom fuq l-iżvilupp u d-diversifikazzjoni tal-ekonomija tal-parti Côte d'Ivoire.

Artikolu 17

L-aktar trattamenti favorevoli li jirriżultaw mill-ftehimiet ta' skambju liberu

1.   Fir-rigward tal-oqsma koperti minn dan il-kapitolu, il-parti KE għandha tagħti dejjem lill-parti Côte d'Ivoire l-aktar trattament favorevoli li jista' jirriżulta mill-fatt li l-Komunità Ewropea ssir parti minn ftehim ta' skambju liberu ma' partijiet terzi wara li jiġi ffirmat dan il-ftehim.

2.   Fir-rigward tal-oqsma koperti minn dan il-kapitolu, il-parti Côte d'Ivoire għandha dejjem tagħti lill-parti KE l-aktar trattament favorevoli li jista' jirriżulta mill-fatt li l-parti Côte d'Ivoiressir parti fi ftehim ta' skambju liberu ma' sieħeb kummerċjali maġġuri wara l-iffirmar ta' dan il-ftehim.

3.   Jekk il-parti Côte d'Ivoire tikseb trattament sostanzjalment aktar favorevoli minn sħubija kummerċjali maġġuri minn dak offert mill-parti KE, il-partijiet għandhom jidħlu f'konsultazzjoni u flimkien jiddeċiedu l-implimentazzjoni tad-dispożizzjonijiet tal-paragrafu 2.

4.   Id-dispożizzjonijiet ta' dan il-kapitolu ma jistgħux jiġu interpretati bħallikieku qed jobbligaw lill-partijiet biex jiftiehmu reċiprokament dwar it-trattamenti preferenzjali li jkunu applikabbli minħabba li waħda mill-partijiet tkun parti minn ftehim ta' skambju liberu ma' parti terza fid-data tad-dħul fis-seħħ ta' dan il-Ftehim.

5.   Fil-qafas ta' dan l-Artikolu, “ftehim ta' skambju liberu” jinftiehem bħala ftehim li jillibera l-kummerċ sostanzjalment u li jistabbilixxi jew jelimina sostanzjalment id-diskriminazzjonjiet bejn il-partijiet, permezz tal-eliminazzjoni ta' miżuri ta' diskriminazzjoni eżistenti u ta' miżuri aktar diskriminatorji, kemm fid-dħul fis-seħħ ta' dan il-ftehim, kemm fuq il-bażi ta' kalendarju raġonevoli.

6.   Fil-qafas ta' dan l-Artikolu, “sieħeb kummerċjali maġġuri” jfisser kull pajjiż żviluppat, jew kull pajjiż li għandu parti mill-iskambji kummerċjali mondjali superjuri għal 1 fil-mija fis-sena ta' qabel id-dħul fis-seħħ tal-ftehim ta' skambju liberu previst fil-paragrafu 2, jew kull grupp ta' pajjiżi li jaġixxu b'mod individwali, kollettivament jew permezz ta' ftehim ta' skambju liberu li jkollu parti mill-iskambji kummerċjali mondjali superjuri għal 1,5 fil-mija fis-sena ta' qabel id-dħul fis-seħħ tal-ftehim ta' skambju liberu previst fil-paragrafu 2 (2).

Artikolu 18

Il-projbizzjoni tar-restrizzjonijiet kwantitattivi

Minkejja d-dispożizzjonijiet tal-Artikoli 23, 24 u 25, kull projbizzjonijiet jew restrizzjoni għall-importazzjoni jew għall-esportazzjoni li jaffettwaw il-kummerċ bejn il- partijiet huma eliminati mad-dħul fis-seħħ ta' dan il-Ftehim, minbarra d-dazji doganali, it-taxxi, il-ħlas u spejjeż oħra stipulati fl-Artikolu 11, kemm jekk ikunu implimentati permezz ta' miżuri ta' restrizzjoni, liċenzji għall-importazzjoni jew għall-esportazzjoni jew minn miżuri oħra. Ma tista' tiġi introdotta l-ebda miżura ġdida.

Artikolu 19

It-trattament nazzjonali fil-qasam tat-tassazzjoni u tar-regolamentazzjoni interni

1.   Il-prodotti importati ta' oriġini mill-parti l-oħra ma jistgħux ikunu suġġetti direttament jew indirettament għal taxxi interni jew spejjeż oħra interni ta' kwalunkwe tip li jaqbżu dawk li huma applikati direttament jew indirettament għal prodotti nazzjonali simili. Barra minn dan, kull parti timpedixxi l-applikazzjoni ta' kwalunkwe tip ta' taxxi jew spejjeż interni oħra bl-għan li tipprovdi protezzjoni għall-produzzjoni nazzjonali.

2.   Il-prodotti importati ta' oriġini mill-parti l-oħra jibbenefikaw minn trattament mhux anqas favorevoli mit-trattament mogħti lil prodotti nazzjonali simili fil-qafas tal-liġijiet, regolamentazzjonijiet u eżiġenzi kollha li japplikaw għall-bejgħ tagħhom, l-offerta tagħhom għall-bejgħ, ix-xiri tagħhom, it-trasportazzjoni tagħhom, it-tqassim tagħhom jew l-użu tagħhom fuq is-suq internazzjonali. Id-dispożizzjonijiet ta' dan il-paragrafu ma jimpedux l-applikazzjoni ta' tariffi għal trasporti interni differenti bbażati biss fuq l-użu ekonomiku tal-mezzi tat-trasport u mhux fuq l-oriġini tal-prodott.

3.   Minkejja d-dispożizzjonijiet fuq ir-regoli tal-oriġini, kull parti hija projbita li twaqqaf jew li żżomm fis-seħħ kwalunkwe regolamentazzjoni interna li tibbaża fuq it-taħlit, l-ipproċessar jew l-użu ta' prodotti skont kwantitajiet jew proporzjonijiet speċifiċi li jkun jinħtieġ, direttament jew indirettament, li kwantità jew proporzjon speċifiku minn prodott li huwa suġġett għal din ir-regolamentazzjoni jkun ġej minn sorsi nazzjonali. Barra minn dan, kull parti hija pprojbita milli tapplika kull tip ta' regolamentazzjoni kwantitattiva interna oħra bl-għan li tipprovdi protezzjoni għall-produzzjoni nazzjonali tagħha.

4.   Id-dispożizzjonijiet ta' dan l-Artikolu ma japplikawx għal-liġijiet, għar-regolamenti, għall-proċeduri jew għall-prattiki relatati mas-swieq pubbliċi.

5.   Id-dispożizzjonijet ta' dan l-Artikolu għandhom ikunu bla ħsara għall-kapitolu ta' dan il-Ftehim li jikkonċerna l-istrumenti ta' protezzjoni għall-kummerċ.

6.   Rigward il-kwistjonijiet relattivi għall-ħlas ta' sussidji lill-produtturi nazzjonali, il-partijiet għandhom jirreferu għall-WTO.

Artikolu 20

Is-sikurezza tal-ikel

Jekk l-implimentazzjoni ta' dan il-Ftehim twassal għal diffikultajiet fid-disponibbiltà jew l-aċċess għal prodotti tal-ikel neċessarji biex jassiguraw is-sikurezza tal-ikel, u meta din is-sitwazzjoni tippreżenta jew ikun hemm riskju li tippreżenta diffikultajiet maġġuri għall-Côte d'Ivoire, din tkun tista' tieħu miżuri adattati skont il-proċeduri stabbiliti fl-Artikolu 25.

Artikolu 21

Dispożizzjoni speċjali dwar il-kooperazzjoni amministrattiva

1.   Il-partijiet jaqblu li l-kooperazzjoni amministrattiva hija essenzjali għall-implimentazzjoni u l-kontroll tat-trattament preferenzjali mogħti f'dan il-Kapitolu u jenfasizzaw l-impenn tagħhom li jiġġieldu kontra l-irregolaritajiet u l-frodi fil-qasam tad-dwana u fl-oqsma relatati.

2.   Meta waħda mill-partijiet tosserva li, fuq bażi ta' informazzjoni oġġettiva, jkun hemm nuqqas ta' kooperazzjoni amministrattiva u/jew xi irrregolaritajiet jew xi frodi, il-parti kkonċernata tista' tissospendi temporanjament it-trattament preferenzjali mogħti għall-prodott(i) konċernat(i) konformement ma' dan l-Artikolu.

3.   Għall-finijiet ta' dan l-Artikolu, nuqqas ta' kooperazzjoni amministrattiva huwa definit, fost l-oħrajn, bħala:

a)	nuqqas ta' rispett rikorrenti għall-obbligu li jkun verifikat l-istat tal-oriġini tal-prodott jew prodotti konċernat(i);

b)	rifjut ripetut jew dewmien mhux neċessarju biex jitwettqu u/jew jiġu kkomunikati r-riżultati ta' verifika sussegwenti għall-prova tal-oriġini;

ċ)	rifjut ripetut jew dewmien mhux neċessarju għall-għotja tal-awtorizzazzjoni biex titwettaq missjoni ta' kooperazzjoni għall-verifika tal-awtentiċità tad-dokumenti jew l-eżattezza tal-informazzjoni pertinenti għall-għotja tat-trattament preferenzjali inkwistjoni.

4.   L-applikazzjoni ta' sospensjoni temporanja hija suġġetta għall-kundizzjonijiet li ġejjin:

a)

Il-parti li ġġib il-prova, fuq bażi ta' informazzjoni oġġettiva, ta' nuqqas ta' kooperazzjoni amministrattiva u/jew ta' irregolaritajiet jew frodi, għandha tinnotifika mingħajr dewmien lill-Kumitat FSE bil-kisba ta' din il-prova kif ukoll bl-informazzjoni oġġettiva, u għandha tibda l-konsultazzjoni mal-Kumitat FSE biex issib soluzzjoni aċċettabbli għaż-żewġ partijiet, fuq il-bażi tal-informazzjoni kollha pertinenti u provi oġġettivi.

b)

Meta l-Partijiet ikunu bdew il-konsultazzjoni mal-Kumitat FSE hekk kif previst hawn fuq, u ma jkunux jistgħu jiftiehmu fuq soluzzjoni aċċettabbli fi żmien tlett xhur wara n-notifika, il-parti konċernata tista' tissospendi temporanjament it-trattament preferenzjali mogħti lill-prodott(i) konċernat(i). Sospensjoni temporanja trid tiġi notifikata mingħajr dewmien lill-Kumitat FSE.

ċ)

Is-sospensjonijiet temporanji previsti minn dan l-Artikolu huma limitati għal dak li huwa meħtieġ għall-protezzjoni tal-interessi finanzjarji tal-parti konċernata. Dawn ma għandhomx jeċċedu perjodu ta' sitt xhur, li jista' jiġi mġedded. Is-sospensjonijiet temporanji għandhom jiġu notifikati lill-Kumitat FSE immedjatament wara l-adozzjoni tagħhom. Dawn għandhom ikunu suġġetti għal konsultazzjonijet perjodiċi fil-qafas tal-Kumitat FSE partikolarment bil-ħsieb tar-revoka tagħhom meta l-kundizzjonijiet għall-applikazzjoni tagħhom ma jeżistux aktar.

5.   Fl-istess żmien tan-notifika lill-Kumitat FSE prevista fil-paragrafu 4, il-punt (a) ta' dan l-Artikolu, il-parti kkonċernata għandha tippubblika avviż għall-importaturi fil-ġurnal uffiċjali tagħha. Dan l-avviż lill-importaturi għandu jindika li, għall-prodott konċernat, fuq il-bażi ta' informazzjoni oġġettiva, inkisbet prova tan-nuqqas ta' kooperazzjoni amministrattiva u/jew ta' irregolaritajiet jew ta' frodi.

Artikolu 22

Il-ġestjoni ta' żbalji amministrattivi

F'każ ta' żball tal-awtoritajiet kompetenti fil-ġestjoni tas-sistemi preferenzjali għall-esportazzjoni, u partikolarment fl-applikazzjoni tad-dispożizzjonijiet li jikkonċernaw id-definizzjoni tal-kunċett “prodotti ta' oriġini” u l-metodi ta' kooperazzjoni amministrattiva, meta dan l-iżball ikollu konsegwenzi f'termini ta' importazzjoni jew esportazzjoni, il-parti esposta għal dawn il-konsegwenzi tista' titlob lill-Kumitat FSE li jeżamina l-possibilitajiet għall-adozzjoni tal-miżuri kollha adattati bil-għan li jinstab rimedju għas-sitwazzjoni.

KAPITOLU 2

L-istrumenti ta' protezzjoni kummerċjali

Artikolu 23

Il-miżuri antidumping u ta' kumpens

1.   Skont id-dispożizzjonijiet ta' dan l-Artikolu, l-ebda parti minn dan il-Ftehim ma għandha ttellef il-parti KE jew lill-Côte d'Ivoire milli jadottaw miżuri ta' antidumping jew ta' kumpens skont il-ftehimiet tal-WTO pertinenti. Għall-finijiet ta' dan l-Artikolu, l-oriġini hija determinata skont ir-regoli tal-oriġini mhux preferenzjali tal-partijiet.

2.   Qabel ma jimponu l-miżuri ta' antidumping jew ta' kumpens fuq il-merkanzija, il-partijiet għandhom jikkunsidraw il-possibbiltà ta' soluzzjonijiet kostruttivi hekk kif previsti fil-ftehimiet tal-WTO pertinenti. Għalhekk, dawn jistgħu jorganizzaw konsultazzjonijiet kif jinħtieġ.

3.   Il-parti KE għandha tinnotifika lill-Côte d'Ivoire meta tirċievi lment dokumentat kif xieraq qabel ma tinfetaħ inkjesta.

4.   Id-dipożizzjonijiet ta' dan l-Artikolu huma applikabbli għall-inkjesti kollha li jinbdew wara d-dħul fis-seħħ ta' dan il-ftehim.

5.   Id-dispożizzjonijiet ta' dan l-Artikolu mhumiex suġġetti għad-dispożizzjonijiet tal-mekkaniżmu tar-riżoluzzjoni tat-tilwim f'dan il-ftehim.

Artikolu 24

Il-miżuri multilaterali għal ħarsien

1.   Skont id-dispożizzjonijiet ta' dan l-Artikolu, l-ebda parti minn dan il-ftehim ma għandha ttellef lill-Côte d'Ivoire u lill-parti KE milli jadottaw miżuri skont l-Artikolu XIX tal-GATT tal-1994, il-ftehim dwar is-Salvagwardja, u l-Artikolu 5 tal-Ftehim tal-WTO dwar l-Agrikoltura. Għall-finijiet ta' dan l-Artikolu, l-oriġini hija determinata f'konformità mar-regoli tal-oriġini mhux preferenzjali tal-partijiet.

2.   Bla ħsara għad-dispożizzjonijiet tal-paragrafu 1, fid-dawl tal-għanijiet ġenerali tal-iżvilupp ta' dan il-Ftehim u taċ-ċokon tal-ekonomija tal-Côte d'Ivoire, il-parti KE għandha teskludi l-importazzjonijiet tal-Côte d'Ivoire minn kull miżura li tittieħdet fl-applikazzjoni tal-Artikolu XIX tal-GATT tal-1994, tal-ftehim dwar is-Salvagwardja, u tal-Artikolu 5 tal-Ftehim tal-WTO dwar l-Agrikoltura.

3.   Id-dispożizzjonijiet tal-paragrafu 2 għandhom japplikaw għal perjodu ta' ħames snin, li jibdew jingħaddu mid-data tad-dħul fis-seħħ ta' dan il-Ftehim. Fi żmien 120 jum qabel it-tmiem ta' dan il-perjodu, il-Kumitat FSE se jerġa' jeżamina mill-ġdid l-implimentazzjoni ta' dawn id-dispożizzjonijiet fid-dawl tal-bżonnijiet tal-iżvilupp tal-Côte d'Ivoire, bil-għan li jiġi determinat jekk hemmx lok li tiġi estiża l-applikazzjoni tagħhom għal perjodu itwal.

4.   Id-dispożizzjonijiet tal-paragrafu 1 mhumiex suġġetti għad-dispożizzjonijiet tal-mekkaniżmu tar-riżoluzzjoni tat-tilwim f'dan il-Ftehim.

Artikolu 25

Il-miżuri ta' protezzjoni bilaterali

1.   Wara li tkun eżaminat is-soluzzjonijiet alternattivi, parti għandha tieħu miżuri għall-protezzjoni għal żmien limitat li jidderogaw id-dispożizzjonijiet tal-Artikoli 12 u 13, fil-kundizzjonijiet u skont il-proċeduri previsti f'dan l-Artikolu.

2.   Il-miżuri ta' protezzjoni previsti fil-paragrafu 1 jistgħu jittieħdu meta prodott ta' oriġini minn parti huwa importat fit-territorju tal-parti l-oħra fi kwantitajiet miżjuda u f'kundizzjonijiet tali li jikkawżaw jew jheddu li jikkawżaw:

(a)	ħsara gravi lill-industrija domestika li tipproduċi prodotti simili jew li jikkompetu direttament fuq it-territorju tal-parti importatriċi,

(b)	problemi fis-settur tal-ekonomija, partikolarment jekk dawn il-problemi joħolqu problemi soċjali importanti jew diffikultajiet li jistgħu joħolqu ħsara gravi fis-sitwazzjoni ekonomika tal-parti importatriċi, jew

(ċ)	l-interruzzjonijiet tas-swieq tal-prodotti agrikoli simili jew li jikkompetu direttament (3) jew tal-mekkaniżmi li jirregolaw dawn is-swieq fuq it-territorju tal- parti importatriċi.

3.   Il-miżuri ta' protezzjoni stipulati f'dan l-Artikolu ma għandhomx jeċċedu dak li huwa strettament neċessarju sabiex tkun rimedjata jew imwaqqfa l-ħsara gravi jew l-interuzzjonijiet, hekk kif definiti fil-paragrafi 2, 4 u 5. Dawn il-miżuri ta' protezzjoni tal-parti importatriċi jistgħu jikkonsistu biss f'waħda jew uħud mill-miżuri li ġejjin:

(a)	is-sospensjoni ta' kull tnaqqis fir-rata tad-dazju doganali għall-importazzjoni applikabbli għall-prodott ikkonċernat, hekk kif prevista f'dan il-Ftehim,

(b)	iż-żieda tad-dazju doganali għall-prodott konċernat f'livell li ma jeċċedix id-dazju doganali applikat għall-istati l-oħra tad-WTO, u

(ċ)	l-introduzzjoni ta' kwoti tariffarji fuq il-prodott konċernat.

4.   Bla ħsara għad-dispożizzjonijiet tal-paragrafi 1 u 2, meta prodott ta' oriġini mill-Côte d'Ivoire huwa importat fi kwantitajiet miżjuda u f'kundizzjonijiet tali li jistgħu jikkawżaw jew jheddu li jikkawżaw waħda mis-sitwazzjonijiet deskritti ta' hawn fuq fil-paragrafu 2, il-punti (a), (b) u (c) f'wieħed jew f'uħud mir-reġjuni l-aktar imbiegħda tal-parti KE, il-parti KE tista' tieħu miżuri ta' sorveljanza jew ta' protezzjoni, hekk kif previsti fil-paragrafu 3, limitati għar-reġjun jew għar-reġjuni konċernati, skont il-proċeduri definiti fil-paragrafi 6 sa 9.

5.

(a) Meta prodott ta' oriġini mill-parti KE huwa importat fi kwantitajiet miżjuda u f'kundizzjonijiet tali li tiġi kkawżata jew ikun hemm theddida li tiġi kkawżata waħda mis-sitwazzjonijiet deskritti fil-paragrafu 2, il-punti (a), (b) u (c) ta' hawn fuq, il-Côte d'Ivoire tista' tieħu miżuri ta' sorveljanza jew ta' protezzjoni limitati fuq it-territorju tagħha skont il-proċeduri definiti fil-paragrafi 6 sa 9. (b) Bla ħsara għad-dispożizzjonijiet tal-paragrafi 1 u 2, il-Côte d'Ivoire tista' tieħu miżuri ta' protezzjoni, hekk kif previst fil-paragrafu 3, meta prodott ta' oriġini mill-parti KE huwa importat fi kwantitajiet miżjuda u kundizzjonjiet tali li dawn jikkawżaw jew jheddu li jikkawżaw interruzzjonijiet għal industrija li qed tikber li tipproduċi prodotti simili jew li jikkompetu b'mod dirett.

Din id-dispożizzjoni hija applikabbli biss għal perjodu ta' għaxar snin li jibdew mid-data tad-dħul fis-seħħ ta' dan il-Ftehim. Madankollu, dan iż-żmien jista' jiġġedded bi ftehim bejn il-partijiet, meta minkejja l-potenzjal għall-iżvilupp tal-industrija u l-isforzi fil-fatt implimentati, dan l-għan ma ntlaħaqx, partikolarment minħabba żviluppi ekonomiċi globali jew problemi gravi li jaffettwaw lill-Côte d'Ivoire.

Il-miżuri jridu jittieħdu skont id-dispożizzjonijiet tal-paragrafi 6 sa 9.

6.

(a) Il-miżuri ta' protezzjoni stipulati minn dan l-Artikolu jinżammu biss għall-perjodu neċessarju biex jipprevjenu ħsara gravi jew l-interruzzjonijiet hekk kif definiti fil-paragrafi 2, 4 u 5, jew jirrimedjawhom. (b) Il-miżuri ta' protezzjoni stipulati minn dan l-Artikolu għandhom jiġu applikati għal perjodu li ma jeċċedix sentejn. Meta ċ-ċirkostanzi li jiġġustifikaw l-impożizzjoni tal-miżuri tal-protezzjoni jkomplu jeżistu, dawn il-miżuri jistgħu jiġu estiżi għal perjodu massimu ġdid ta' sentejn. Meta l-Côte d'Ivoire tapplika miżura ta' protezzjoni, jew meta l-parti KE tapplika miżura limitata għat-territorju ta' wieħed jew uħud mir-reġjuni l-aktar imbiegħda tagħha, madankollu, din il-miżura tista' tiġi applikata għal perjodu ta' mhux aktar minn erba' snin, u, meta ċ-ċirkostanzi li jiġġustifikaw l-impożizzjoni tal-miżuri ta' protezzjoni jkomplu jeżistu, tiġi estiża għal perjodu ġdid ta' erba' snin. (ċ) Il-miżuri ta' protezzjoni stipulati minn dan l-Artikolu li jeċċedu sena għandhom ikunu akkumpanjati minn elementi ċari li jwasslu progressivament għall-eliminazzjoni tal-kawżi tal-ħsara u tal-interuzzjonijiet u tal-miżuri sa mhux aktar tard mit-tmiem il-perjodu stabbilit. (d) Ħlief fil-każ ta' ċirkostanzi eċċezzjonali ppreżentati għall-approvazzjoni tal-Kumitat FSE, l-ebda miżura ta' protezzjoni stipulata minn dan l-Artikolu mhi se tkun applikata għal prodott li qabel kien suġġett għal tali miżura, għall-inqas għal perjodu ta' sena li jibda jgħodd mid-data tat-tmiem ta' din il-miżura.

7.   Għall-implimentazzjoni tal-paragrafi 1 sa 6, japplikaw id-dispożizzjonijiet li ġejjin:

(a)	meta parti hija tal-opinjoni li teżisti waħda miċ-ċirkostanzi definiti fil-paragrafi 2, 4 u/jew 5, hi għandha tgħarraf b'dan lill-Kumitat FSE immedjatament;

(b)

il-Kumitat FSE jista' jagħmel kwalunkwe rakkomandazzjoni neċessarja biex jirrimedja għaċ-ċirkostanzi li jkunu nħolqu. Jekk il-Kumitat FSE ma jkun għamel l-ebda rakkomandazzjoni biex jirrimedja għaċ-ċirkostanzi, jew ma tkun instabet l-ebda soluzzjoni sodisfaċenti fi żmien 30 jum wara n-notifika lil dan il-Kumitat, il-parti importatriċi tista' tadotta l-miżuri adegwati biex tirrimedja għaċ-ċirkostanzi, skont dan l-Artikolu;

(ċ)

qabel ma tittieħed miżura prevista minn dan l-Artikolu jew, fil-każijiet previsti fil-paragrafu 8, sakemm ikun possibbli, il-parti konċernata għandha tikkomunika lill-Kumitat FSE kull informazzjoni utli għall-eżaminazzjoni kompleta tas-sitwazzjoni, bil-ħsieb li tinsab soluzzjoni aċċettabbli għall-partijiet;

(d)	fl-għażla tal-miżuri tal-protezzjoni, il-prijorità għandha tingħata lil dawk li jippermettu l-korrezzjoni effikaċi u rapida tal-problema, mingħajr kemm jista' jkun ma ttellef milli dan il-ftehim jiffunzjona tajjeb;

(e)

kull miżura ta' protezzjoni li tittieħed skont dan l-Artikolu għandha tiġi notifikata immedjatament lill-Kumitat FSE u f'dan tkun suġġetta għal konsultazzjonijiet perjodiċi, partikolarment bil-ħsieb li jiġi stabbilit perjodu ta' żmien biex tinġieb fi tmiemha meta l-kundizzjonijiet ikunu jippermettu.

8.   Meta ċirkostanzi eċċezzjonali jeżiġu li jittieħdu miżuri immedjati, il-parti importatriċi konċernata, kemm jekk tkun il-parti KE u kemm il-Côte d'Ivoire, skont il-każ, tista' tieħu l-miżuri previsti fil-paragrafi 3, 4 u/jew 5 fuq bażi provviżorja, mingħajr ma tikkonforma mal-eżigenzi tal-paragrafu 7. Din l-azzjoni tista' tittieħed għal perjodu massimu ta' 180 jum meta l-miżuri jittieħdu mill-parti KE u 200 jum meta l-miżuri jittieħdu mill-Kosta tal-Avorju, jew meta l-miżuri tal-parti KE huma limitati għal wieħed jew uħud mir-reġjuni l-aktar imbiegħda tagħha. Il-tul ta' dawn il-miżuri provviżorji għandu jitqies bħala parti mill-perjodu inizjali jew minn kull estensjoni definita fil-paragrafu 6. Meta jittieħdu dawn il-miżuri proviżorji, għandhom jiġu kkunsidrati l-interessi tal-partijiet kollha li jeħduhom. Il-parti importatriċi konċernata għandha tinforma lill-parti l-oħra u taħtar immedjatament lill-Kumitat FSE biex teżamina dan is-suġġett.

9.   Jekk parti importatriċi tissuġġetta l-importazzjoni ta' prodott għal proċedura amministrattiva li jkollha l-għan li tipprovdi informazzjoni b'mod rapidu sabiex jevolvi l-fluss kummerċjali suxxettibbli li jikkawża l-problemi stipulati f'dan l-Artikolu, din għandha tinforma lill-Kumitat FSE b'dan mingħajr dewmien.

10.   M'għandiex issir referenza għall-ftehimiet tal-WTO biex itellef parti milli tadotta miżuri ta' protezzjoni skont id-dispożizzjonijiet ta' dan l-Artikolu.

Artikolu 26

Il-kooperazzjoni

1.   Il-partijiet jagħrfu l-importanza tal-kooperazzjoni fil-qasam tal-istrumenti tal-protezzjoni kummerċjali.

2.   Il-partijiet jaqblu li jikkooperaw, skont id-dispożizzjonijiet tal-Artikolu 4, inkluż permezz tal-faċilitazzjoni tal-miżuri tal-għajnuna, partikolarment fl-oqsma li ġejjin:

a)	l-iżvilupp tar-regolamentazzjoni u l-istituzzjonijiet biex jassiguraw il-protezzjoni kummerċjali;

b)	l-iżvilupp tal-kapaċitajiet għall-użu tal-istrumenti ta' protezzjoni kummerċjali previsti f'dan il-ftehim.

KAPITOLU 3

Il-proċeduri doganali u l-iffaċilitar tal-kummerċ

Artikolu 27

L-għanijiet

1.   Il-partijiet jagħrfu l-importanza tal-mistoqsijiet doganali u tal-iffaċilitar tal-kummerċ fil-kuntest tal-evoluzzjoni tal-kummerċ dinji. Huma jaqblu li jsaħħu l-kooperazzjoni tagħhom f'dan il-qasam sabiex jassiguraw ruħhom li l-leġiżlazzjoni u l-proċeduri pertinenti kif ukoll il-kapaċità amministrattiva tal-amministrazzjonijiet ikkonċernati jissodisfaw l-għanijiet stipulati fil-qasam tal-kontroll effettiv u tal-iffaċilitar tal-iskambji kummerċjali, u jikkontribwixxu għall-promozzjoni tal-iżvilupp u tal-integrazzjoni reġjonali tal-pajjiżi firmatarji.

2.   Il-partijiet jaqblu li l-għanijiet leġittimi tal-politika pubblika, inklużi l-għanijiet ta' sigurtà u ta' prevenzjoni tal-frodi, ma għandhom jiġu inklużi bl-ebda mod.

3.   Il-partijiet jimpenjaw ruħhom li jassiguraw iċ-ċirkolazzjoni libera tal-merkanzija koperta minn dan il-ftehim fit-territorji rispettivi tagħhom.

Artikolu 28

Il-kooperazzjoni doganali u amministrattiva

1.   Sabiex jassiguraw il-konformità mad-dispożizzjonijiet ta' dan it-titolu, u sabiex jirrispondu b'mod effikaċi għall-għanijiet definiti mill-Artikolu 27, il-partijiet:

(a)	jiskambjaw l-informazzjoni dwar il-leġiżlazzjoni u l-proċeduri doganali;

(b)	jiżviluppaw inizjattivi konġunti relatati mal-proċeduri tal-importazzjoni, ta' esportazzjoni u ta' tranżitu, kif ukoll l-inizjattivi bil-għan li jipproponu servizz effikaċi għall-komunità tal-kummerċ;

(ċ)	jikkooperaw fil-qassam tal-awtomazzjoni tal-proċeduri doganali u proċeduri kummerċjali oħra u, jekk ikun hemm bżonn, jaħsbu biex jistabbilixxu standards komuni għall-iskambju ta' dejta;

(d)

jistabbilixxu sakemm ikun possibbli, pożizzjonijiet komuni fi ħdan l-organizzazzjonijiet internazzjonali fil-qasam doganali, bħalma huma l-WTO, l-Organizzazzjoni Dinjija tad-Dwana (WCO), l-Organizzazzjoni tan-Nazzjonijiet Uniti(NU) u l-Konferenza tan-Nazzjonijiet Uniti dwar il-Kummerċ u l-Iżvilupp (UNCTAD);

(e)	jikkooperaw fil-qasam tal-ippjanar u l-implimentazzjoni tal-assistenza teknika, partikolarment biex jiffaċilitaw ir-riformi doganali u għall-iffaċilitar tal-kummerċ skont id-dispożizzjonijiet ta' dan il-ftehim; u

(f)	jinkoraġġixxu l-kooperazzjoni bejn l-aġenziji kollha kkonċernati kemm fil-pajjiż stess u kemm bejn il-pajjiżi.

2.   Minkejja l-paragrafu 1, l-amministrazzjonijiet tal-partijiet għandhom jipprovdu għajnuna amministrattiva reċiproka għall-kwistjonijiet ta' dwana, skont id-dispożizzjonijiet tal-Protokoll dwar l-assistenza amministrattiva reċiproka fil-qasam dognali.

Artikolu 29

Il-leġiżlazzjoni u l-proċeduri doganali

1.   Il-partijiet jaqblu li l-leġiżlazzjonijiet kummerċjali u doganali rispettivi tagħhom, id-dispożizzjonijiet tagħhom u l-proċeduri tagħhom huma bbażati fuq l-istrumenti u n-normi internazzjonali fl-oqsma doganali u kummerċjali, partikolarment l-elementi sostanzjali tal-Konvenzjoni Internazzjonali dwar is-Simplifikazzjoni u l-Armonizzazzjoni tal-Proċeduri Doganali magħmula fi Kyoto fit-18 ta' Mejju 1973, riveduta fi Brussell fis-26 ta' Ġunju 1999 (il-Konvenzjoni ta' Kyoto riveduta), il-Qafas tan-normi tal-WCO li jaħsbu bies jassiguraw u biex jiffaċilitaw il-kummerċ dinji, il-mudell ta' dejta tal-WCO u l-Konvenzjoni Internazzjonali dwar is-Sistema Armonizzata ta' Deskrizzjonijiet u ta' Kodiċijiet ta' Oġġetti (“SA”).

Il-partijiet għandhom iħarsu l-moviment liberu tal-merkanzija fit-territorju tagħhom, billi jiftiehmu l-itinerarju li huwa l-aktar adattat għat-transitu tagħhom.

Ir-restrizzjonijiet, il-kontrolli jew l-eżiġenzi jridu jkunu bbażati fuq għan leġittimu ta' politika pubblika, ikunu mhux diskriminatorji, proporzjonali u applikati b'mod uniformi.

Bla ħsara għat-tkomplija tal-kontrolli doganali leġittimi, il-partijiet għandhom jagħtu trattament mhux anqas favorevoli lill-merkanzija fi transitu li għandha d-destinazzjoni jew li ġejja mit-territorju tal-parti l-oħra, minn dak mogħti lill-merkanzija domestika, għall-prodotti esportati, importati u għall-moviment tagħhom.

Il-partijiet għandhom jistabbilixxu skemi ta' trasport taħt id-dwana, li jippermettu t-transitu tal-merkanzija mingħajr ma jkollhom iħallsu d-dazji doganali u spejjeż oħra, skont il-preżentazzjoni ta' garanziji xierqa.

Il-partijiet għandhom jimpenjaw ruħhom li jippromwovu u li jimplimentaw skemi ta' transitu reġjonali bil-ħsieb li jnaqqsu l-ostakoli għall-kummerċ.

Il-partijiet għandhom jirrikorru għan-normi u l-istrumenti internazzjonali fil-qasam ta' transitu ta' merkanzija.

Il-partijiet għandhom jassiguraw il-kooperazzjoni u l-koordinazzjoni tal-entitajiet kollha kkonċernati fit-territorji tagħhom biex jiffaċilitaw it-traffiku fi transitu u jippromwovu l-kooperazzjoni bejn il-fruntieri.

2.   Sabiex itejbu l-metodi tax-xogħol, u biex ikunu ċerti li l-prinċipji ta' nuqqas ta' diskriminazzjoni, ta' trasparenza, ta' effikaċja, ta' integrità u ta' responsabbiltà jiġu rispettati, il-partijiet iridu:

(a)	jieħdu l-miżuri neċessarji sabiex inaqqsu, jissimplifikaw u jistandardizzaw id-dejta u d-dokumenti meħtieġa mid-dwana u mill-entitajiet l-oħra li għandhom x'jaqsmu;

(b)	jissimplifikaw l-eżiġenzi u l-formalitajiet doganali sakemm ikun possibbli biex iwettqu r-rilaxx u l-ħlas ta' dazju rapidi tal-merkanzija;

(ċ)

jipprevedu proċeduri effikaċi, rapidi u mhux diskriminatorji li jassiguraw dritt għal rikors, kontra azzjonijiet amministrattivi, sentenzi, u deċiżjonijiet mid-dwana li jaffettwaw il-prodotti importati, esportati jew merkanzija fi transitu. Dawn il-proċeduri għandhom ikunu faċilment aċċessibbli għal dawk li jkollhom bżonnhom, inkluż l-intrapriżi ż-żgħar u ta' daqs medju, u l-ispejjeż tagħhom għandhom ikunu raġonevoli u proporzjonati mal-ispejjeż li wieħed jiltaqa' magħhom meta jippreżenta r-rikors;

(d)	jassiguraw iż-żamma ta' normi ta' integrità l-aktar għolja permezz tal-applikazzjoni ta' miżuri li jirriflettu l-prinċipji stabbiliti bil-ftehimiet internazzjonali pertinenti u tal-istrumenti f'dan il-qasam.

Artikolu 30

Ir-relazzjonijiet mal-komunità tal-kummerċ

Il-partijiet jaqblu:

(a)	li jissorveljaw li l-leġiżlazzjonijiet, il-proċeduri, il-ħlasijiet lura u l-ispejjeż, kif ukoll il-ġustifikazzjoni tagħhom, ikunu jistgħu jitħabbru lill-pubbliku, sakemm dan ikun possibbli permezz ta' mezzi elettroniċi;

(b)

dwar il-bżonn ta' sforzi magħmula f'waqthom u b'mod regolari mar-rappreżentanti tal-kummerċ fuq il-proposti leġiżlattivi u proċeduri relatati mal-kwistjonijiet tad-dwana u tal-kummerċ. Għalhekk, mekkaniżmi ta' konsultazzjoni adattati u regolari bejn l-amministrazzjonijiet u l-komunità tal-kummerċ huma stabbiliti minn kull parti;

(ċ)	li jrid ikun għadda żmien suffiċjenti bejn il-pubblikazzjoni u d-dħul fis-seħħ ta' leġiżlazzjoni, proċedura, liġi jew spiża ġodda jew emendati.

Il-partijiet jippubblikaw l-informazzjoni amministrattiva, partikolarment dwar l-eżiġenzi tal-aġenzija, il-proċeduri tad-dħul, is-siegħat tal-attività u l-proċeduri operazzjonali tad-dwana għall-portijiet u l-postijiet tal-fruntieri, kif ukoll fuq il-punti tal-kuntatt biex tinkiseb l-informazzjoni;

(d)	li jinkoraġġixxu l-kooperazzjoni bejn l-operaturi u l-amministrazzjonijiet kompetenti billi jiġu impjegati l-proċeduri mhux arbitrarji mhux arbitrarji u aċċessibbli għall-pubbliku hekk bħall-protokolli tal-ftehim ibbażati fuq dawk li li kienu ġew adottati mill-WTO;

(e)	li jissorveljaw li l-eżiġenzi doganali u l-preskrizzjonijiet rispettivi tagħhom u l-proċeduri li huma assoċjati magħhom ikomplu jirrispondu għall-bżonnijiet tal-komunità tal-kummerċ, li jsegwu l-aħjar prassi u jkunu l-anqas restrittivi possibbli għall-iskambji kummerċjali.

Artikolu 31

Il-valur tad-dwana

1.   L-Artikolu VII tal-GATT tal-1994 u tal-ftehim tad-WTO dwar l-implimentazzjoni tal-Artikolu VII tal-GATT tal-1994 li jsostnu r-regoli tad-determinazzjoni tal-valur tad-dwana applikati għall-kummerċ reċiproku bejn il-partijiet.

2.   Il-partijiet għandhom jikkooperaw bil-ħsieb li tintlaħaq strateġija komuni għall-kwistjonijiet li jikkonċernaw il-valur tad-dwana.

Artikolu 32

L-integrazzjoni reġjonali

Il-partijiet jaqblu li jmexxu 'l quddiem ir-riformi doganali li jaħsbu biex jiffaċilitaw l-iskambji kummerċjali fil-qafas reġjonali tal-Afrika tal-Punent.

Artikolu 33

It-tkomplija tan-negozjati fil-qasam tad-dwana u tal-iffaċilitar tal-kummerċ

Fil-qafas tan-negozjati tal-FSE globali, il-partijiet jaqblu li jkomplu n-negozjati dwar dan il-kapitolu sabiex jikkompletawh f'qafas reġjonali.

Artikolu 34

Il-kumitat speċjali fil-qasam tad-dwana u tal-iffaċilitar tal-kummerċ

Fil-qafas tal-Kumitat FSE, il-partijiet għandhom jistabbilixxu kumitat speċjali fuq id-dwana u l-iffaċilitar tal-kummerċ, magħmul minn rappreżentanti tal-partijiet. Dan il-kumitat għandu jirrapporta lill-Kumitat FSE. Dan għandu jiddiskuti l-kwistjonijiet doganali kollha sabiex jiffaċilita l-iskambji kummerċjali bejn il-partijiet u għandu jissorvelja l-implimentazzjoni u l-amministrazzjoni ta' dan il-kapitolu kif ukoll l-implimentazzjoni tar-regoli tal-oriġini.

Artikolu 35

Il-kooperazzjoni

1.   Il-partijiet jagħrfu l-importanza tal-kooperazzjoni fil-qasam doganali u tal-iffaċilitar tal-kummerċ għall-implimentazzjoni ta' dan il-ftehim.

2.   Il-partijiet jaqblu li jikkooperaw, skont id-dispożizzjonijiet tal-Artikolu 4, inkluż permezz tal-faċilitar tal-miżuri tal-assistenza, partikolarment fl-oqsma li ġejjin:

a)	l-elaborazzjoni tad-dispożizzjonijiet leġiżlattivi u regolamentari adattati u semplifikati;

b)	l-informazzjoni u s-sensibilizzazzjoni tal-operaturi, inkluż it-taħriġ tal-persunal konċernat;

ċ)	it-tisħiħ tal-kapaċitajiet, il-modernizzazzjoni u l-interkonnessjoni tal-amministrazzjoni doganali.

KAPITOLU 4

L-ostakoli tekniċi għall-kummerċ u miżuri sanitarji u fitosanitarji

Artikolu 36

L-obbligazzjonijiet multilaterali

Il-partijiet jerġgħu jsostnu d-drittijiet u l-obbligi tagħhom fit-termini tal-ftehim li jistabbilixxi l-WTO u, partikolarment, tal-ftehimiet tad-WTO dwar l-applikazzjoni tal-miżuri sanitarji u fitosanitarji (Ftehim SPS) u dwar l-ostakoli tekniċi għall-kummerċ (Ftehim TBT). Il-partijiet jerġgħu jsostnu wkoll id-drittijiet u l-obbligi tagħhom fit-termini tal-Ftehim Internazzjonali għall-Protezzjoni tal-Veġetali (IPPC), tal-Codex Alimentarius u l-Organizzazzjoni Dinjija tas-Saħħa tal-Annimali (OMSA).

Il-partijiet jerġgħu jsostnu l-impenn tagħhom li jtejbu s-saħħa pubblika fil-Côte d'Ivoire, partikolarment permezz tat-tisħiħ tal-kapaċitajiet tagħha li tidentifika l-prodotti li mhumiex konformi.

Dawn l-impenji, id-drittijiet u l-obbligi jiġbru flimkien l-attività tal-partijiet taħt dan il-kapitolu.

Artikolu 37

L-għanijiet

L-għanijiet ta' dan il-kapitolu huma li jiffaċilitaw il-kummerċ tal-merkanzija bejn il-partijiet, li jżidu l-kapaċitajiet tagħhom biex jidentifikaw, iħarsu u jeliminaw l-ostakoli għall-kummerċ li mhumiex neċessarji għar-regolamentazzjonijiet tekniċi, tan-normi u tal-proċeduri tal-evalwazzjoni tal-konformità applikati minn waħda mill-partijiet, filwaqt li titħares il-kapaċità tal-partijiet li jipproteġu s-saħħa pubblika, tal-annimali u tal-pjanti.

Artikolu 38

L-Ambitu u d-definizzjonijiet

1.   Id-dispożizzjonijiet ta' dan il-kapitolu japplikaw għar-regolamentazzjonijiet u n-normi tekniċi, kif ukoll il-proċeduri tal-evalwazzjoni tal-konformità definiti fil-ftehim TBT tal-WTO u għall-miżuri sanitarji u fitosanitarji (minn issa 'l quddiem imsejħa n-normi SPS), meta dawn jaffettwaw l-iskambji kummerċjali bejn il-partijiet.

2.   Għall-finijiet ta' dan il-kapitolu u sakemm ma jkunx hemm indikazzjoni kuntrarja, id-definizzjonjiet tal-ftehimiet SPS u TBT, tal-Codex Alimentarius, tal-IPPC u tal-OMSA japplikaw, inkluż għal kull referenza għal “prodotti” f'dan il-kapitolu u fl-Appendiċi ta' dan il-Ftehim.

Artikolu 39

L-awtoritajiet kompetenti

L-awtoritajiet tal-partijiet kompetenti għall-implimentazzjoni tal-miżuri previsti minn dan il-kapitolu huma indikati fl-Appendiċi II.

Konformement mal-Artikolu 41, il-partijiet jinfurmaw lil xulxin u fi żmien xieraq bil-bidliet kollha sinifikanti tal-awtoritajiet kompetenti li jidhru fl-Appendiċi II. Il-Kumitat FSE jadotta kull bidla neċessarja fl-Appendiċi II.

Artikolu 40

Id-determinazzjoni taż-żoni sanitarji u fitosanitarji

F'dak li jikkonċerna l-kundizzjonijiet tal-importazzjoni, il-partijiet jistgħu jipproponu u jidentifikaw għal kull każ żoni definiti għall-finijiet sanitarji u fitosanitarji, b'referenza għall-Artikolu 6 tal-Ftehim SPS.

Artikolu 41

It-trasparenza tal-kundizzjonijiet tal-kummerċ u l-iskambju tal-informazzjoni

1.   Il-partijiet għandhom jinfurmaw lil xulxin b'kull bidla fir-regolamenti tekniċi tagħhom għall-prodotti (partikolarment ta' annimali ħajjin u tal-veġetali).

2.   Il-partijiet għandhom jaqblu li jinfurmaw lil xulxin bil-miktub u mill-aktar fis possibbli, dwar il-miżuri li jittieħdu biex titwaqqaf l-importazzjoni tal-merkanzija bil-għan li jintervjenu fir-rigward ta' problema kwalunkwe li tikkonċerna s-saħħa (pubblika, tal-annimali jew fitosanitarja), il-prevenzjoni u l-ambjent, skont ir-rakkomandazzjonijiet previsti fil-Ftehim SPS.

3.   Il-partijiet għandhom jaqblu li jiskambjaw l-informazzjoni fi spirtu ta' kollaborazzjoni sabiex il-prodotti tagħhom jirrispettaw ir-regolamenti tekniċi u n-normi meħtieġa biex jippermettulhom li jeċċedu għas-swieq rispettivi tagħhom.

4.   Il-partijiet għandhom jiskambjaw ukoll direttament l-informazzjoni fuq oqsma oħra li fuqhom jaqblu l-partijiet, li huma jagħtu importanza potenzjali għar-relazzjonijiet kummerċjali tagħhom, inkluż il-kwistjonijiet ta' sikurezza tal-ikel, id-dehra f'daqqa ta' mard tal-annimali u veġetali, il-pariri xjentifiċi u avvenimenti oħra li ta' min jinnutahom, marbuta mas-sikurezza tal-prodotti. Partikolarment, il-partijiet jimpenjaw ruħhom li jinfurmaw lil xulxin meta dawn japplikaw il-prinċipju taż-żoni li ma fihomx parassiti jew mard, u żoni bi prevalenza dgħajfa ta' parassiti jew mard kif previst fl-Artikolu 6 tal-Ftehim SPS.

5.   Il-partijiet għandhom jaqblu li jiskambjaw l-informazzjoni dwar is-sorveljanza epidemoloġika tal-mard tal-annimali. F'dak li jikkonċerna l-protezzjoni fitosanitarja, il-partijiet għandhom jiskambjaw ukoll l-informazzjoni fuq id-dehra ta' parassiti li jippreżentaw periklu magħruf u immedjat għall-parti l-oħra.

6.   Il-partijiet għandhom jaqblu li jikkooperaw bil-ħsieb li javżaw lil xulxin u b'mod rapidu meta regoli reġjonali ġodda jista' jkollhom impatt fuq il-kummerċ reċiproku.

Artikolu 42

Il-kooperazzjoni fi ħdan l-organizzazzjonijiet internazzjonali

Il-partijiet għandhom jaqblu li jikkooperaw mal-organizzazzjonijiet internazzjonali ta' normalizzazzjoni, inkluż bil-għan nli jiffaċilitaw il-parteċipazzjoni tar-rappreżentanti tal-parti tal-Côte d'Ivoire fil-laqgħat ta' dawn l-organizzazzjonijiet.

Artikolu 43

Il-kooperazzjoni

1.   Il-partijiet jagħrfu l-importanza li jikkooperaw fl-oqsma tar-regolamentazzjoni teknika, tan-normi, u tal-evalwazzjoni tal-konformità biex jitwettqu l-għanijiet ta' dan il-kapitolu.

2.   Il-partijiet jaqblu li jikkooperaw, skont id-dispożizzjonijiet tal-Artikolu 4, bil-ħsieb li jtejbu l-kwalità u l-kompetitività tal-prodotti prijoritarji għall-Côte d'Ivoire u l-aċċess għas-suq tal-Komunità Ewropea, inkluż permezz ta' miżuri ta' assistenza partikolarment finanzjarja, fl-oqsma li ġejin:

a)	l-istabbiliment ta' qafas adattat ta' skambju ta' informazzjoni u qsim ta' għarfien bejn il-partijiet;

b)	l-adozzjoni tan-normi u regolamentazzjonijiet tekniċi, proċeduri tal-evalwazzjoni tal-konformità, u miżuri sanitarji u fitosanitarji armonizzati fil-livell reġjonali, fuq il-bażi ta' standards internazzjonali pertinenti;

ċ)	it-tisħiħ tal-kapaċitajiet ta' atturi pubbliċi u privati, inkluż l-informazzjoni u t-taħriġ, bil-ħseib li jikkonformaw man-normi, regolamentazzjonijiet u miżuri tal-Komunità Ewropea, u li jipparteċipaw f'organizzazzjonijiet internazzjonali;

d)	l-iżvilupp tal-kapaċitajiet nazzjonali għall-evalwazzjoni tal-konformità tal-prodotti u l-aċċess għas-suq tal-Komunità Ewropea.

TITOLU IV

SERVIZZI, INVESTIMENTI U REGOLI MARBUTA MAL-KUMMERĊ

Artikolu 44

Fuq il-bażi tal-Ftehim ta' Cotonou, il-partijiet jimpenjaw ruħhom li jieħdu l-miżuri kollha neċessarji jew li jikkooperaw biex jiffavorixxu n-negozjar u konklużjoni fl-iqsar żmien possibbli ta' FSE globali, skont id-dispożizzjonijiet pertinenti tal-WTO, bejn il-parti KE u l-Afrika tal-Punent kollha, fl-oqsma li ġejjin:

a)	il-kummerċ ta' servizzi u l-kummerċ elettroniku;

b)	l-investimenti;

ċ)	il-ħlasijiet kurrenti u ċ-ċaqliq tal-kapital;

d)	il-kompetizzjoni;

e)	il-proprjetà intelletwali;

f)	is-swieq pubbliċi;

g)	l-iżvilupp sostenibbli;

h)	il-protezzjoni tal-informazzjoni ta' tip personali.

Il-partijiet għandhom jieħdu d-dispożizzjonijiet kollha neċessarji bil-ħsieb li jiffavorixxu l-konklużjoni ta' FSE globali bejn il-parti KE u l-Afrika tal-Punent qabel it-tmiem tas-sena 2008.

TITOLU V

IL-PREVENZJONI U R-RIŻOLUZZJONI TAT-TILWIM

KAPITOLU 1

L-għan u l-ambitu

Artikolu 45

L-għan

L-għan ta' dan it-titolu huwa li jipprevjeni u li jirregola t-tilwim li jista' jinqala' bejn il-partijiet sabiex jaslu, safejn ikun possibbli, għal soluzzjoni sodisfaċenti għaż-żewġ partijiet.

Artikolu 46

L-ambitu

1.   Dan it-Titolu japplika għal kull tilwima rigward l-interpretazzjoni jew l-applikazzjoni ta' dan il-Ftehim, ħlief għad-dispożizzjonijiet tat-Titolu II u ħlief għal dispożizzjonijiet kuntrarji.

2.   Minkejja l-paragrafu 1, il-proċedura prevista fl-Artikolu 98 tal-Ftehim ta' Cotonou, hija applikabbli f'każ ta' tilwim li jikkonċerna l-finanzjament tal-kooperazzjoni għall-iżvilupp hekk kif definiti fil-Ftehim ta' Cotonou.

KAPITOLU 2

Il-konsultazzjoni u l-medjazzjoni

Artikolu 47

Il-konsultazzjonijiet

1.   Il-partijiet għandhom jimpenjaw ruħhom biex jirrisolvu t-tilwim li huma koperti mill-Artikolu 46 billi jagħmlu konsultazzjonijiet sabiex jaslu għal soluzzjoni sodisfaċenti għaż-żewġ partijiet.

2.   Parti li tkun tixtieq tibda konsultazzjonijiet għandha tagħmel dan billi tippreżenta talba bil-miktub lill-parti l-oħra, u tibgħat kopja lill-Kumitat FSE fejn tippreċiża l-miżura inkwistjoni u d-dispożizzjonijiet tal-Ftehim li, skont il-parir tagħha, il-miżura msemmija mhix konformi magħhom.

3.   Il-konsultazzjonijiet għandhom isiru fi żmien 40 jum mid-data tal-preżentazzjoni tar-rikjesta. Dawn jitqiesu konklużi fi żmien 60 jum mid-data tar-rikjesta sakemm il-partijiet ma jaqblux li jkompluhom lil hinn miż-żmien previst. L-informazzjoni skambjata matul il-konsultazzjonijiet għandha tibqa' kunfidenzjali.

4.   Fis-sitwazzjonijiet urġenti, partikolarment dawk li jinvolvu oġġetti tal-ikel li jiħżienu jew staġjonali, il-konsultazzjonijiet jinbdew fi żmien 15-il jum mid-data tal-preżentazzjoni tar-rikjesta u jitqiesu konklużi fi żmien 30 jum mid-data tal-preżentazzjoni tar-rikjesta.

5.   Jekk il-konsultazzjonijiet ma jinbdewx fiż-żmien previst fil-paragrafu 3 jew il-paragrafu 4, jew jekk il-konsultazzjonjiet jiġu konklużi mingħajr ma tintlaħaq soluzzjoni sodisfaċenti għaż-żewġ partijiet, il-parti li tippreżenta l-ilment għandha l-opportunità li titlob li jiġi kostitwit grupp speċjali ta' arbitraġġ skont l-Artikolu 49.

Artikolu 48

Il-medjazzjoni

1.   Jekk il-konsultazzjonijiet ma jwasslu għall-ebda soluzzjoni sodisfaċenti għaż-żewġ partijiet, dawn jistgħu, bi ftehim amikevoli, jirrikorru għal medjatur. Sakemm il-partijiet ma jiddeċidux mod ieħor, it-termini ta' referenza tal-medjazzjoni għandhom ikunu dawk esposti matul ir-rikjesta għall-konsultazzjonijiet.

2.   Sakemm il-partijiet fit-tilwima ma jaqblux dwar medjatur fi żmien 10 ijiem mill-preżentazzjoni tat-talba ta' medjazzjoni, il-president tal-Kumitat FSE, jew ir-rappreżentant tiegħu, għandu jaħtar bil-polza medjatur fost l-individwi li jidhru fuq il-lista stipulata fl-Artikolu 64 u li mhumiex ċittadini tal-partijiet. L-għażla għandha ssir fi żmien 20 jum mill-preżentazzjoni tat-talba ta' medjazzjoni fil-preżenza ta' rappreżentant ta' kull waħda mill-partijiet. Il-medjatur għandu jsejjaħ laqgħa tal-partijiet fi żmien 30 jum wara li jkun inħatar. Il-medjatur għandu jirċievi s-sottomissjonjiet ta' kull parti fi żmien 15-il jum qabel il-laqgħa, u għandu jgħarraf l-opinjoni tiegħu fi żmien 45 jum wara li jkun inħatar.

3.   Il-medjatur jista' jipprepara r-rakkomandazzjonijiet dwar kif, fl-opinjoni tiegħu, għandha tissolva t-tilwima li jkunu konformi mad-dispożizzjonijiet stipulati fl-Artikolu 53. L-opinjoni tal-medjatur ma torbotx.

4.   Il-partijiet jistgħu jiftiehmu li jimmodifikaw iż-żmien stipulat fil-paragrafu 2. Il-medjatur jista' jiddeċiedi wkoll li jimmodifika dawn iż-żminijiet għat-talba ta' kwalunkwe waħda mill-partijiet jew fuq l-inizjattiva tiegħu skont id-diffikultajiet partikolari li jaffettwaw lill-parti konċernata jew minħabba l-kumplessità tal-kwistjoni.

5.   Il-proċeduri ta' medjazzjoni u partikolarment l-informazzjoni skambjata u l-pożizzjonijiet li jittieħdu mill-partijiet matul dawn il-proċeduri jibqgħu kunfidenzjali.

KAPITOLU 3

Il-proċeduri tar-riżoluzzjoni tat-tilwim

Sezzjoni I

Il-proċedura tal-arbitraġġ

Artikolu 49

Il-bidu tal-proċedura tal-arbitraġġ

1.   Jekk il-partijiet ma jaslux biex jirriżolvu t-tilwima tagħhom wara li jirrikorru għall-konsultazzjonijiet previsti fl-Artikolu 47 jew wara li jkunu rrikorrew għall-medjazzjoni stipulata fl-Artikolu 48, il-parti li tagħmel l-ilment tista' titlob li jiġi kkostitwit grupp speċjali tal-arbitraġġ.

2.   It-talba biex jiġi kostitwit grupp speċjali ta' arbitraġġ għandha ssir bil-miktub lill-parti intimata u lill-Kumitat FSE. Fit-talba tagħha, il-parti li tagħmel l-ilment għandha tippreċiża l-miżuri speċifiċi li jkunu qed jiġu diskussi u tispjega r-raġunijiet li għalihom dawn il-miżuri huma fi ksur tad-dispożizzjonijiet ta' dan il-Ftehim.

Artikolu 50

Il-kostituzzjoni ta' grupp speċjali tal-arbitraġġ

1.   Grupp speċjali tal-arbitraġġ huwa magħmul minn tliet arbitri.

2.   Fiż-żmien 10 ijiem mill-preżentazzjoni tat-talba biex jiġi kostitwit grupp speċjali tal-arbitraġġ lill-Kumitat FSE, il-partijiet jaħdmu sabiex jiftiehmu fuq il-kompożizzjoni tal-grupp speċjali tal-arbitraġġ.

3.   Fil-każ fejn il-partijiet ma jaslux biex jiftiehmu fuq il-kompożizzjoni tal-grupp speċjali tal-arbitraġġ fil-limitu taż-żmien previst fil-paragrafu 2, kull parti tista' titlob lill-president tal-Kumitat FSE jew lir-rappreżentant tiegħu li jagħżel it-tliet membri tal-grupp speċjali tal-arbitraġġ bix-xorti mil-lista stabbilita skont l-Artikolu 64, b'wieħed minn dawn il-membri minn fost il-persuni li nħatru mill-parti li qed tagħmel l-ilment, b'ieħor minn fost dawk li nħatru mill-parti intimata, u bit-tielet fost dawk li nħatru miż-żewġ partijiet sabiex jippresjedu fuq il-laqgħat. Jekk il-partijiet ikunu ftiehmu dwar l-għażla ta' wieħed jew diversi membri tal-grupp speċjali tal-arbitraġġ, il-membru jew membri li jibqgħu jintgħażlu skont l-istess proċedura.

4.   Il-president tal-Kumitat FSE jew ir-rappreżentant tiegħu għandu jagħżel l-arbitri fi żmien ħamest ijiem mit-talba stipulata fil-paragrafu 3 u li tiġi minn waħda mill-partijiet fil-preżenza ta' rappreżentant ta' kull parti.

5.   Id-data li fiha jiġi kostitwit il-grupp speċjali tal-arbitraġġ hija dik li fiha jkunu ntgħażlu t-tliet arbitri.

Artikolu 51

Ir-rapport temporanju tal-grupp speċjali tal-arbitraġġ

Il-grupp speċjali tal-arbitraġġ għandu jippreżenta rapport temporanju lill-partijiet li jinkludi fih kemm is-sezzjonijiet ta' deskrizzjoni u kemm in-noti u l-konklużjonijiet tiegħu, bħala regola ġenerali fi zmien 120 jum wara li jibdew jgħoddu minn meta jiġi kostitwit il-grupp speċjali tal-arbitraġġ. Fi żmien ħmistax-il jum mill-preżentazzjoni tar-rapport intermedjarju mill-grupp speċjali, kull parti tista' tippreżenta lill-grupp ir-rimarki tagħha bil-miktub, dwar aspetti preċiżi ta' dan ir-rapport.

Artikolu 52

Id-deċiżjoni tal-grupp speċjali tal-arbitraġġ

1.   Il-grupp speċjali tal-arbitraġġ għandu jippreżenta d-deċiżjoni tiegħu lill-partijiet u lill-Kumitat FSE fi zmien 150 jum wara li jibdew jgħoddu minn meta jiġi kostitwit. Jekk iqis li ma jistax iżomm ma' dan it-terminu ta' żmien, il-president tal-grupp speċjali tal-arbitraġġ għandu jinforma bil-miktub lill-partijiet u lill-Kumitat FSE, fejn jippreċiża r-raġunijiet għad-dewmien u d-data li fiha l-kumitat iqis li se jtemm ix-xogħlijiet tiegħu. Id-deċiżjoni tal-arbitraġġ fl-ebda ċirkostanza ma għandha tingħata aktar tard minn 180 jum wara, li jibdew jgħoddu minn meta jiġi kostitwit il-grupp speċjali tal-arbitraġġ.

2.   F'każijiet urġenti, inkluż f'dawk fejn huma involuti oġġetti tal-ikel li jiħżienu jew staġjonali, il-grupp speċjali tal-arbitraġġ għandu jeżerċita diliġenza biex jagħti d-deċiżjoni tiegħu fi żmien 75 jum minn meta jitwaqqaf. Fl-ebda każ ma għandu jagħti d-deċiżjoni tiegħu aktar tard minn 90 jum minn meta kien kostitwit. Matul l-10 ijiem wara li jkun ġie kostitwit, il-grupp speċjali jista' jagħti deċiżjoni preliminari fuq il-kwistjoni jekk iqis li l-każ huwa urġenti.

3.   Kull parti tista' titlob lill-grupp speċjali tal-arbitraġġ li jipprovdi rakkomandazzjonijiet fuq il-mod kif il-parti inkwistjoni tista' terġa' tikkonforma.

Sezzjoni II

Il-konformità

Artikolu 53

Il-konformità mad-deċiżjoni tal-grupp speċjali tal-arbitraġġ

Kull parti għandha tieħu l-miżuri kollha neċessarji biex timplimenta d-deċiżjoni tal-grupp speċjali tal-arbitraġġ, u l-partijiet jimpenjaw ruħhom biex jiftiehmu fuq żmien għat-twettiq tad-deċiżjoni.

Artikolu 54

Żmien raġonevoli għall-konformità

1.   Fi żmien tletin jum wara li l-partijiet ikunu ġew avżati bid-deċiżjoni tal-grupp speċjali tal-arbitraġġ, il-parti intimata għandha tavża bil-miktub lill-parti li tippreżenta l-ilment u lill-Kumitat FSE bit-tul ta' żmien li din tkun tinħtieġ biex tikkonforma (minn issa msejjaħ “żmien raġonevoli”).

2.   F'każ ta' nuqqas ta' ftehim bejn il-partijiet dwar x'jikkostitwixxi żmien raġonevoli biex din tikkonforma mad-deċiżjoni tal-grupp speċjali tal-arbitraġġ, il-parti li tippreżenta l-ilment, fi żmien 20 jum min-notifika ppreżentata mill-parti intimata, għandha titlob bil-miktub lill-grupp speċjali tal-arbitraġġ biex jiddetermina t-tul taż-żmien raġonevoli. Din it-talba għandha tiġi kkomunikata fl-istess ħin lill-parti l-oħra u lill-Kumitat FSE. Il-grupp speċjali tal-arbitraġġ għandu jgħarraf id-deċiżjoni tiegħu lill-partijiet u lill-Kumitat FSE fi żmien 30 jum minn meta tiġi ppreżentata t-talba.

3.   Biex jiġi determinat it-tul taż-żmien raġonevoli, il-grupp speċjali jrid jikkunsidra ż-żmien li l-parti intimata normalment ikollha bżonn biex tadotta l-miżuri leġiżlattivi jew amministrattivi mqabbla ma' dawk li l-parti li intimata tqis li jkunu meħtieġa biex jassiguraw il-konformità. Il-grupp speċjali jista' jikkunsidra wkoll il-limitazzjonijiet li jistgħu jaffettwaw l-adozzjoni tal-miżuri meħtieġa mill-parti intimata.

4.   Fil-każ li l-grupp speċjali tal-arbitraġġ oriġinali jew uħud mill-membri tiegħu ma jkunux jistgħu jerġgħu jiltaqgħu mill-ġdid, għandhom jiġu applikati l-proċeduri tal-Artikolu 50. Iż-żmien biex tittieħed deċiżjoni huwa ta' 45 jum mill-preżentazzjoni tat-talba stipulata fil-paragrafu 2.

5.   Iż-żmien raġonevoli jista' jiġi estiż bi ftehim bejn il-partijiet.

Artikolu 55

Eżami mill-ġdid tal-miżuri meħuda għall-konformità mad-deċiżjoni tal-grupp speċjali tal-arbitraġġ

1.   Il-parti intimata għandha tavża lill-parti l-oħra u lill-Kumitat FSE qabel it-tmiem tal-perjodu ta' żmien raġonevoli bil-miżuri li din tkun ħadet sabiex tikkonforma mad-deċiżjoni ta' arbitraġġ.

2.   F'każ ta' nuqqas ta' ftehim bejn il-partijiet dwar il-kompatibbiltà tal-miżuri notifikati fit-termini tal-paragrafu 1 mad-dispożizzjonijiet ta' dan il-Ftehim, il-parti li tippreżenta l-ilment tista' titlob lill-grupp speċjali tal-arbitraġġ bil-miktub biex jiddeċiedi dwar il-kwistjoni. It-talba għandha tippreċiża l-miżuri speċifiċi li qed jiġu diskussi, u tispjega r-raġunijiet li għalihom dawn mhumiex kompatibbli mad-dispożizzjonijiet ta' dan il-Ftehim. Il-grupp speċjali tal-arbitraġġ għandu jgħarraf id-deċiżjoni tiegħu fi żmien 90 jum wara l-preżentazzjoni tat-talba. Fil-każijiet urġenti, inkluż partikolarment f'dawk li jirrigwardaw oġġetti tal-ikel li jiħżienu u staġjonali, il-grupp speċjali tal-arbitraġġ għandu jgħarraf id-deċiżjoni tiegħu fi żmien 45 jum mill-preżentazzjoni tat-talba.

3.   Fil-każ fejn il-grupp speċjali tal-arbitraġġ oriġinali jew uħud mill-membri tiegħu ma jkunux jistgħu jerġgħu jiltaqgħu, għandhom jiġu applikati l-miżuri previsti fl-Artikolu 50. Iż-żmien għan-notifika tad-deċiżjoni huwa ta' 105 ijiem mill-preżentazzjoni tat-talba kif stipulat fil-paragrafu 2.

Artikolu 56

Rimedji temporanji f'każ ta' nuqqas ta' konformità

1.   Jekk qabel ma jiskadi ż-żmien raġonevoli l-parti intimata ma tgħarrafx il-miżuri li din tkun ħadet biex tikkonforma mad-deċiżjoni tal-grupp speċjali ta' arbitraġġ, jew jekk dan jiddeċiedi li l-miżuri notifikati skont l-Artikolu 55, il-paragrafu 1 mhumiex kompatibbli mal-obbligi ta' din il-parti fit-termini tad-dispożizzjonijiet previsti fl-Artikolu 53, il-parti intimata għandha, jekk din tkun mistiedna mill-parti li qed tagħmel l-ilment, li tagħmel offerta ta' kumpens temporanju.

2.   Jekk il-partijiet ma jaqblux dwar kumpens fi żmien it-30 jum li jibdew mit-tmiem taż-żmien raġonevoli jew mid-deċiżjoni tal-grupp speċjali ta' arbitraġġ, kif stipulat fl-Artikolu 55, fejn il-miżuri ta' konformità li jkunu ttieħdu ma jkunux kompatibbli mad-deċiżjonijiet stipulati fl-Artikolu 53, il-parti li tippreżenta l-ilment tista', wara li tkun innotifikat lill-parti l-oħra b'dan, tadotta miżuri adattati. Billi tadotta tali miżuri, il-parti li qed tippreżenta l-ilment għandha tagħżel miżuri li jkollhom l-anqas effett possibbli fuq il-kisba tal-għanijiet ta' dan il-ftehim, u għandha tikkunsidra l-impatt tagħhom fuq l-ekonomija tal-parti intimata.

Fi kwalunkwe każ, il-miżuri adottati skont dan il-paragrafu ma għandhomx jaffettwaw l-għotja ta' assistenza għall-iżvilupp tal-Kosta tal-Avorju.

3.   Il-parti KE għandha tkun moderata fit-talbiet għal kumpens jew fl-adozzjoni ta' miżuri adattati skont il-paragrafi 1 u 2, u tikkunsidra li l-parti tal-Côte d'Ivoire hija pajjiż li qed jiżviluppa.

4.   Il-miżuri adattati jew il-kumpens huma temporanji u jiġu applikati biss meta l-miżura li tkun ġiet rikonoxxuta li qed tikser id-dispożizzjonijiet stipulati fl-Artikolu 53 tkun ġiet imħassra jew emendata b'tali mod li din tikkonforma mad-dispożizzjonijiet imsemmija, jew sakemm il-partijiet jaslu għal ftehim.

Artikolu 57

L-eżami tal-miżuri ta' konformità wara l-adozzjoni ta' miżuri xierqa

1.   Il-parti intimata għandha tinnotifika lill-parti l-oħra u lill-Kumitat FSE bil-miżuri li din tkun ħadet biex tikkonforma mad-deċiżjoni tal-grupp speċjali ta' arbitraġġ, u fin-notifika titlob lill-parti li tippreżenta l-ilment li għandhom jitwaqqfu l-miżuri adattati.

2.   Jekk il-partijiet ma jaslux biex jaqblu fuq il-kompatibbiltà tal-miżuri notifikati mad-dispożizzjonijiet ta' dan il-ftehim fi żmien 30 jum mill-preżentazzjoni tan-notifika, il-parti li tippreżenta l-ilment għandha titlob bil-miktub lill-grupp speċjali ta' arbitraġġ biex jiddeċiedi dwar il-kwistjoni. It-talba tiġi nnotifikata lill-parti l-oħra u lill-Kumitat FSE. Id-deċiżjoni tal-grupp speċjali ta' arbitraġġ tiġi kkomunikata lill-partijiet u lill-Kumitat FSE fi żmien 45 jum mill-preżentazzjoni tat-talba. Jekk il-grupp speċjali ta' arbitraġġ jiddeċiedi li kwalunkwe miżura li ttieħdet biex tintlaħaq il-konformità mhijiex konformi mad-dispożizzjonijiet ta' dan il-ftehim, dan jiddeċiedi jekk il-parti li qed tippreżenta l-ilment tistax tkompli tapplika l-miżuri adattati. Jekk il-grupp speċjali ta' arbitraġġ jiddeċiedi li kwalunkwe miżura li ttieħdet biex tintlaħaq il-konformità hija konformi mad-dispożizzjonijiet ta' dan il-ftehim, il-miżuri adattati għandhom jitwaqqfu.

3.   Fil-każ fejn il-grupp speċjali ta' arbitraġġ oriġinali jew uħud mill-membri tiegħu ma jkunux jistgħu jerġgħu jiltaqgħu mill-ġdid, għandhom jiġu applikati l-proċeduri previsti fl-Artikolu 50. Iż-żmien għan-notifika tad-deċiżjoni huwa ta' 60 jum mill-preżentazzjoni tat-talba stipulata fil-paragrafu 2.

Sezzjoni III

Id-dispożizzjonijiet komuni

Artikolu 58

Soluzzjoni sodisfaċenti għaż-żewġ partijiet

Fil-qafas ta' dan it-titolu, il-partijiet jistgħu fi kwalunkwe mument jiftiehmu dwar soluzzjoni li tissodisfa liż-żewġ partijiet f'tilwima. Dawn għandhom javżaw lill-Kumitat FSE bil-ftehim tagħhom dwar tali soluzzjoni. Malli tiġi adottata soluzzjoni sodisfaċenti għaż-żewġ partijiet, il-proċedura għandha titwaqqaf.

Artikolu 59

Ir-regolament tal-proċedura

1.   Il-proċeduri tar-riżoluzzjoni tat-tilwim previsti fil-Kapitolu 3 ta' dan it-titolu huma regolati mir-regolament tal-proċedura li se jiġi adottat mill-Kumitat FSE tliet xhur wara li jiġi kostitwit.

2.   Il-laqgħat tal-grupp speċjali tal-arbitraġġ huma miftuħa għall-pubbliku skont ir-regolament tal-proċedura, sakemm ma jiġix deċiż b'mod ieħor mill-grupp speċjali tal-arbitraġġ, fuq l-inizjattiva tiegħu jew fuq talba tal-partijiet.

Artikolu 60

Informazzjoni ġenerali u teknika

Fuq talba ta' waħda mill-partijiet jew fuq l-inizjattiva tiegħu, il-grupp speċjali tal-arbitraġġ jista' jikseb informazzjoni minn kwalunkwe sors, inkluż mingħand partijiet interessati mit-tilwima, jekk dan iqis li dan huwa meħtieġ għall-proċedura tal-arbitraġġ. Il-grupp speċjali tal-arbitraġġ għandu wkoll l-awtorità li jikseb l-opinjoni ta' esperti sakemm dan iqis li huwa meħtieġ. Il-partijiet interessati għandhom il-possibbiltà li jippreżentaw, bħala amicus curiae, in-noti tal-grupp speċjali tal-arbitraġġ skont ir-regolament tal-proċedura. Kull informazzjoni miksuba trid tingħata lil kull waħda mill-partijiet u huma jistgħu jagħmlu l-osservazzjonijiet tagħhom fuqha.

Artikolu 61

Il-lingwa tas-sottomissjonijiet

Is-sottomissjonijiet bil-fomm u bil-miktub għandhom jiġu ppreżentati fi kwalunkwe mil-lingwi uffiċjali tal-partijiet. Madankollu, il-partijiet għandhom jimpenjaw ruħhom, sakemm ikun possibbli, li jadottaw bħala lingwa tal-ħidma komuni xi lingwa uffiċjali komuni għaż-żewġ partijiet, u għandhom iqisu b'mod speċjali l-fatt li l-Côte d'Ivoire hu pajjiż li għadu qed jiżviluppa, partikolarment fir-rigward tad-diffikultajiet ta' traduzzjoni.

Artikolu 62

Ir-regoli tal-interpretazzjoni

Il-grupp speċjali tal-arbitraġġ huwa obbligat li jinterpreta d-dispożizzjonijiet ta' dan il-Ftehim skont ir-regoli normali tal-interpretazzjoni tad-dritt internazzjonali pubbliku, inkluż il-Konvenzjoni ta' Vjenna fuq il-Liġi tat-Trattati. Id-deċiżjonijiet tal-grupp speċjali tal-arbitraġġ ma jistgħux iżidu jew inaqqsu d-drittijiet u l-obbligi previsti mid-dispożizzjonijiet ta' dan il-ftehim.

Artikolu 63

Id-deċiżjonijiet tal-grupp speċjali ta' arbitraġġ

1.   Il-grupp speċjali ta' arbitraġġ għandu jimpenja ruħu biex jieħu d-deċiżjonijiet tiegħu b'konsensus. Madankollu, jekk ikun impossibbli li tintlaħaq deċiżjoni b'konsensus, il-kwistjoni tiġi deċiża skont il-maġġoranza tal-voti, imma fl-ebda każ ma jiġu ppubblikati l-opinjonijiet diverġenti tal-arbitri.

2.   Id-deċiżjoni tippremetti l-konstatazzjonijiet fuq il-fatti, l-applikabbiltà tad-dispożizzjonijiet pertinenti ta' dan il-Ftehim, u r-raġunament li jirfed il-konstatazzjonijiet u l-konklużjonijiet li jkun wasal għalihom il-grupp speċjali ta' arbitraġġ. Il-Kumitat FSE jgħarraf id-deċiżjoni ta' arbitraġġ tiegħu lill-pubbliku sakemm ma jiddeċidix b'mod ieħor.

KAPITOLU 4

Dispożizzjonijiet ġenerali

Artikolu 64

Il-lista tal-arbitri

1.   Fi żmien tliet xhur mill-applikazzjoni proviżorja ta' dan il-Ftehim, il-Kumitat FSE għandu jistabbilixxi lista ta' 15-il persuna li huma disposti u kapaċi jkunu arbitri. Kull parti magħżula għandha tagħżel ħames persuni kapaċi li jkunu arbitri. Iż-żewġ partijiet għandhom jiftiehmu wkoll fuq l-għażla tal-ħames individwi li mhumiex ċittadini ta' xi waħda mill-partijiet, u li jkunu jistgħu jissejħu biex jippresjedu fuq il-grupp speċjali ta' arbitraġġ. Il-Kumitat FSE huwa responsabbli biex iżomm din il-lista dejjem aġġornata.

2.   L-arbitri għandu jkollhom għarfien jew esperjenza speċjalizzata fil-liġi u fil-kummerċ internazzjonali. Għandhom ikunu indipendenti, jaġixxu fil-kapaċità individwali tagħhom u mhux skont l-ordnijiet ta' kwalunkwe organizzazzjoni jew gvern, ma jkunux membri tal-amministrazzjoni ta' xi waħda mill-partijiet, u josservaw il-kodiċi tal-kondotta anness mar-Regoli tal-Proċedura.

3.   Il-Kumitat FSE jista' jistabbilixxi lista supplementari ta' 15-il persuna li jkollhom għarfien settorjali speċjalizzat li għandu x'jaqsam mal- kwistjonijiet partikolari koperti minn dan il-Ftehim. Jekk isir rikors għall-proċedura ta' għażla prevista mill-Artikolu 50 (2), il-president tal-Kumitat FSE jista' juża din il-lista settorjali bl-approvazzjoni taż-żewġ partijiet.

Artikolu 65

Ir-relazzjoni mal-obbligi tad-WTO

1.   Is-seduti ta' arbitraġġ kostitwiti taħt dan il-ftehim mhumiex kompetenti biex jiddeċiedu dwar tilwim naxxenti mid-drittijiet u l-obbligi ta' kull parti fit-termini tal-ftehim li jistabbilixxi l- WTO.

2.   L-użu tad-dispożizzjonijiet tar-riżoluzzjoni tat-tilwim f'dan il-ftehim huwa bla ħsara għal kull azzjoni ppreżentata fil-qafas tal-WTO, inkluża azzjoni għar-riżoluzzjoni tat-tilwim. Madnakollu, meta parti tista' tibda proċedura għar-riżoluzzjoni tat-tilwim fir-rigward ta' miżura koperta, kemm mit-termini tal-Artikolu 49, il-paragrafu 1, kif ukoll mit-termini tal-Ftehim li stabilixxa l-WTO, hi ma tistax tibda proċedura għar-riżoluzzjoni tat-tilwim fuq l-istess miżura quddiem il-forum l-ieħor qabel il-konklużjoni tal-ewwel proċedura. Fis-sens ta' dan il-paragrafu, parti tkun bdiet proċedura għar-riżoluzzjoni tat-tilwim fit-termini tal-Ftehim li stabilixxa l-WTO meta din tkun ippreżentat talba biex jiġi kostitwit grupp speċjali taħt l-Artikolu 6 tal-Memorandum ta' Ftehim dwar ir-riżoluzzjoni tat-tilwim tal-WTO.

3.   Dan il-Ftehim ma jipprekludix lil parti milli tapplika sospensjoni tal-obbligazzjonijiet awtorizzata mill-entità għar-riżoluzzjoni tat-tilwim tad-WTO.

Artikolu 66

Termini ta' żmien

1.   It-termini ta' żmien previsti f'dan it-Titolu, inkluż it-terminu ta' żmien għan-notifika tad-deċiżjonijiet mill-gruppi speċjali ta' arbitraġġ, jingħadd fi ġranet tal-kalendarju mill-jum ta' wara l-att jew il-fatt li huma relatati miegħu.

2.   Kull terminu ta' żmien f'dan it-Titolu jista' jiġi estiż bi ftehim reċiproku tal-partijiet.

Artikolu 67

Modifika tat-Titolu V

Kemm il-Kumitat FSE u kif ukoll kull waħda mill-partijiet għandhom id-dritt li jitolbu li jiġi modifikat it-Titolu V. It-talbiet ta' modifika għandhom jiġu eżaminati mill-Kumitat FSE. Il-modifika ssir effettiva biss wara l-approvazzjoni mill-partijiet.

TITOLU VI

EĊĊEZZJONIJIET ĠENERALI

Artikolu 68

Il-klawżola ta' eċċezzjoni ġenerali

Minħabba l-bżonn li tali miżuri ma jkunux applikati b'mod li jikkostitwixxi mezz ta' diskriminazzjoni arbitrarja jew li ma tistax tiġi ġġustifikata bejn il-partijiet filwaqt li l-kundizzjonijiet ugwali huma prevalenti, jew restrizzjoni moħbija li taffettwa l-iskambji tal-prodotti u servizzi u l-istabbiliment, l-ebda dispożizzjoni ta' dan il-Ftehim ma tista' tiġi interpretata b'mod li tipprekludi l-adozzjoni jew l-applikazzjoni mill-partijiet b'miżuri li:

(a)	huma meħtieġa biex jassiguraw il-protezzjoni tas-sigurtà pubblika, tal-moralità pubblika jew biex iżommu l-ordni pubbliku;

(b)	huma meħtieġa għall-protezzjoni tal-ħajja jew għas-saħħa tal-bniedem, tal-annimali jew veġetali;

(ċ)

huma meħtieġa biex jassiguraw il-konformità mal-liġijiet jew regolamenti u li mhumiex inkompatibbli mad-dispożizzjonijiet ta' dan il-ftehim, inkluż miżuri li jaffetwaw: (i) il-prevenzjoni ta' prattiki żbaljati u ta' frodi u għall-mezzi biex jiġu trattati l-konsegwenzi ta' nuqqas ta' ħlas fil-qafas tal-kuntratti; (ii) il-protezzjoni tal-ħajja privata tal-individwi fil-kuntest tat-trattament u tat-tixrid ta' informazzjoni personali u għall-protezzjoni tas-sigriet tal-fajls u tal-kontijiet individwali; (iii) is-sigurtà; (iv) l-applikazzjoni tar-regolamenti u l-proċeduri doganali; jew (v) il-protezzjoni tal-liġijiet tal-proprjetà intellettwali;

(d)	li jikkonċernaw l-importazzjoni jew l-esportazzjoni ta' deheb u fidda;

(e)	huma meħtieġa għall-protezzjoni tat-teżori nazzjonali ta' valur artistiku, storiku jew arkeoloġiku;

(f)	li jikkonċernaw il-ħarsien ta' riżorsi naturali li ma jiġġeddux jekk dawn il-miżuri jimplikaw restrizzjonijiet fuq il-produzzjoni jew il-konsum domestiku ta' oġġetti, il-provvista jew il-konsum ta' servizzi domestiċi, u fuq l-investituri domestiċi;

(g)	li jikkonċernaw il-prodotti ta' xogħol fil-ħabs; jew

(h)

mhumiex kompatibbli mal-Artikolu 19 dwar it-trattament nazzjonali għalkemm id-differenza fit-trattament taħseb biex tiggarantixxi l-impożizzjoni jew il-perċezzjoni effettiva jew ekwitabbli ta' taxxi diretti fuq l-attivitajiet ekonomiċi ta' investituri jew ta' fornituri ta' servizzi tal-parti l-oħra.

Artikolu 69

Eċċezzjonijiet ta' sikurezza

1.   L-ebda waħda mid-dispożizzjonijiet ta' dan il-Ftehim ma tista' tiġi interpretata:

(a)	bħala li tobbliga l-partijiet biex jipprovdu informazzjoni li fl-opinjoni tagħhom it-tixrid tagħha hija kontrarja għall-ħtiġijiet ta' sikurezza tagħhom;

(b)

bħala li ttellef lill-partijiet milli jibdew azzjoni li huma jaħsbu li hija neċessarja għad-difiża tal-ħtiġijiet ta' sikurezza tagħhom: (i) rigward materjali li jistgħu jiġu maqsuma jew li jistgħu jiddewbu u jerġgħu jiġu magħquda flimkien, jew għal materjali li dawn ikunu ġejjin minnhom; (ii) rigward l-attivitajiet ekonomiċi li jinbdew direttament jew indirettament bil-għan li jipprovdu l-provvisti jew il-provviżjonijiet lil stabbiliment militari; (iii) marbuta mal-produzzjoni jew mal-kummerċ tal-armi, munizzjon u materjal tal-gwerra; (iv) rigward swieq pubbliċi indispensabbli għas-sigurtà nazzjonali jew għall-bżonnijiet tad-difiża nazzjonali; jew (v) deċiża fi żmien ta' gwerra jew fi kwalunkwe sitwazzjoni oħra ta' urġenza fir-relazzjonijiet internazzjonali; jew

(ċ)	bħala li jtellfu lill-partijiet milli jibdew kull azzjoni li tissodisfa l-obbligi li dawn ikunu aċċettaw bil-għan li jinżammu l-paċi u s-sigurtà internazzjonali.

2.   Il-Kumitat FSE safejn ikun possibbli għandu jinżamm infurmat bil-miżuri li jittieħdu skont il-paragrafu 1, il-punti (b) u (c) u tad-data li fihom jintemmu.

Artikolu 70

It-tassazzjoni

1.   L-ebda waħda mid-dispożizzjonijiet ta' dan il-Ftehim jew ta' kwalunkwe arranġament adottat fil-qafas tiegħu ma jista' jkun interpretat bħala li jipprekludi lill-partijiet milli jiddistingwu, fl-applikazzjoni tad-dispożizzjonijiet pertinenti għad-dazju fiskali tagħhom, bejn l-ammonti li jridu jiġu kontribwiti li mhumiex fl-istess sitwazzjoni, partikolarment fir-rigward tal-post ta' fejn joqogħdu jew tal-post fejn huwa investit il-kapital tagħhom.

2.   L-ebda waħda mid-dispożizzjonijiet ta' dan il-Ftehim jew ta' kwalunkwe ftehim adottat fil-qafas tiegħu ma tista' tiġi interpretata bħala li tipprekludi l-adozzjoni jew l-applikazzjoni ta' kull miżura li taħseb biex tipprevjeni l-evażjoni fiskali jew sabiex jiġi evitat il-ħlas ta' taxxi skont il-ftehimiet li jaħsbu biex tiġi evitata t-tassazzjoni doppja jew skont arranġamenti fiskali oħra jew leġiżlazzjonijiet fiskali nazzjonali.

3.   L-ebda waħda mid-dispożizzjonijiet ta' dan il-Ftehim ma għandha taffettwa d-drittijiet u l-obbligi tal-partijiet previsti minn xi ftehim fiskali ieħor. Fil-każ fejn ikun hemm nuqqas ta' kompatibbiltà bejn dan il-ftehim u dak il-ftehim l-ieħor, jipprevali dan tal-aħħar minħabba n-nuqqas ta' kompatibbiltà.

TITOLU VII

ID-DISPOŻIZZJONIJIET ISTITUZZJONALI, ĠENERALI U FINALI

Artikolu 71

It-tkomplija tan-negozjati u l-implimentazzjoni ta' dan il-Ftehim

1.   Il-partijiet għandhom ikomplu n-negozjati skont id-dispożizzjonijiet ta' dan il-Ftehim.

2.   Meta n-negozjati jiġu konklużi, l-abbozzi tal-emendi li jirriżultaw għandhom jitpoġġew għall-approvazzjoni mill-awtoritajiet interni pertinenti.

Artikolu 72

Id-definizzjoni tal-partijiet u t-twettiq tal-obbligi

1.   Il-partijiet kontraenti f'dan il-Ftehim huma r-Repubblika tal-Côte d'Ivoire, imsejħa “l-parti Côte d'Ivoire” jew “Côte d'Ivoire”, min-naħa, u l-Komunità Ewropea jew l-Istati Membri tagħha jew il-Komunità Ewropea u l-Istati Membri tagħha, fl-oqsma rispettivi ta' kompetenza previsti mit-Trattat li jistabbilixxi l-Komunità Ewropea, imsejħin “il-parti KE”, min-naħa l-oħra.

2.   Għall-finijiet ta' dan il-Ftehim, it-terminu “parti” tirreferi għall-Côte d'Ivoire jew għall-parti KE, skont il-każ. It-terminu “partijiet” jirreferi għall-Côte d'Ivoire u għall-Parti KE.

3.   Il-partijiet għandhom jieħdu kull miżura ġenerali jew partikolari meħtieġa għat-twettiq tal-obbligi tagħhom li ġejjin minn dan il-Ftehim u għandhom jimpenjaw ruħhom biex l-għanijiet definiti minn dan il-Ftehim jintlaħqu.

Artikolu 73

Kumitat FSE

1.   Għall-implimentazzjoni ta' dan il-Ftehim, għandu jiġi kkostitwit Kumitat FSE fi żmien tliet xhur mill-iffirmar ta' dan il-ftehim.

2.   Il-partijiet jaqblu li l-kompożizzjoni, l-organizzazzjoni u l-iffunzjonar tal-Kumitat FSE għandhom jirrispettaw il-prinċipju tal-ugwaljanza. Il-Kumitat FSE jiddetermina r-regoli tal-organizzazzjoni u tal-iffunzjonar tiegħu.

3.   Il-Kumitat FSE huwa responsabbli għall-amministrazzjoni tal-oqsma kollha koperti minn dan il-Ftehim u għat-twettiq tal-ħidmiet kollha msemmija f'dan il-Ftehim.

4.   Sabiex tkun iffaċilitata l-komunikazzjoni u tkun assigurata l-implimentazzjoni effikaċi ta' dan il-Ftehim, kull parti għandha taħtar korrispondent fil-Kumitat FSE.

5.   Il-laqgħat tal-Kumitat FSE jistgħu jkunu miftuħa għal partijiet terzi. Il-Kummissjonijiet tal-Unjoni Ekonomika u Monetarja tal-Afrika tal-Punent (WAEMU) u tal-ECOWAS jistgħu jkunu mistiedna għal-laqgħat tal-Kumitat FSE skont il-proċeduri interni tagħhom.

Artikolu 74

Ir-reġjuni l-aktar imbiegħda tal-Komunità Ewropea

1.   Meta titqies il-viċinanza ġeografika tar-reġjuni l-aktar imbiegħda tal-Komunità Ewropea u tal-Côte d'Ivoire, u sabiex jissaħħu r-relazzjonijiet ekonomiċi u soċjali bejn dawn ir-reġjuni u l-Côte d'Ivoire, il-partijiet għandhom jagħmlu ħilithom biex jiffaċilitaw il-kooperazzjoni fl-oqsma kollha koperti minn dan il-ftehim kif ukoll jiffaċilitaw il-kummerċ ta' beni u servizzi, li jippromwovu l-investimenti u li jinkoraġġixxu t-trasport u r-rabtiet ta' komunikazzjoni bejn ir-reġjuni l-aktar imbiegħda u l-Côte d'Ivoire.

2.   L-għanijiet iddikjarati fil-paragrafu 1 jiġu segwiti kemm jista' jkun billi tkun inkoraġġita l-parteċipazzjoni konġunta tal-Côte d'Ivoire u tar-reġjuni l-aktar imbiegħda fi programmi ta' qafas u fi programmi speċifiċi tal-Komunità Ewropea f'oqsma koperti minn dan il-ftehim.

3.   Il-parti KE għandha tagħmel sforz biex tassigura l-koordinazzjoni bejn l-istrumenti finanzjarji differenti ta' politiki ta' koeżjoni u tal-iżvilupp tal-Komunità Ewropea b'mod li jippromwovu l-kooperazzjoni bejn il-Côte d'Ivoire u r-reġjuni l-aktar imbiegħda tal-Komunità Ewropea fl-oqsma koperti minn dan il-ftehim.

4.   Xejn f'dan il-ftehim ma jipprekludi lill-parti KE milli tapplika l-miżuri eżistenti li jaħsbu biex jantiċipaw is-sitwazzjoni strutturali, soċjali u ekonomika tar-reġjuni l-aktar imbiegħda skont l-Artikolu 299, il-paragrafu 2 tat-Trattat li jistabbilixxi l-Komunità Ewropea.

Artikolu 75

Id-dħul fis-seħħ u d-denunzja

1.   Dan il-Ftehim għandu jiġi ffirmat, ratifikat jew approvat skont ir-regoli kostituzzjonali speċifiċi għal kull parti jew, f'dak li jikkonċerna l-parti KE, ir-regoli u l-proċeduri interni tagħha.

2.   Dan il-Ftehim jidħol fis-seħħ fl-ewwel jum tax-xahar ta' wara dak li matulu l-parti tal-Côte d'Ivoire u l-parti KE jkunu nnotifikaw lil xulxin bit-twettiq tal-proċeduri meħtieġa għal dan.

3.   In-notifiki għandhom jintbagħtu lis-segretarju ġenerali tal-Kunsill tal-Unjoni Ewropea, li se tkun id-depożitarju ta' dan il-Ftehim.

4.   Sakemm jidħol fis-seħħ dan il-Ftehim, il-partijiet jaqblu li japplikawh b'mod provviżorju, skont il-liġijiet rispettivi tagħhom u permezz tar-ratifika tal-Ftehim.

5.   Applikazzjoni provviżorja tiġi notifikata lid-depożitarju. Il-Ftehim għandu jiġi applikat b'mod provviżorju 10 ijiem wara li tasal l-aħħar notifika tal-applikazzjoni provviżorja mill-Komunità Ewropea jew mill-Côte d'Ivoire.

6.   Minkejja l-paragrafu 4, il-parti KE u l-Côte d'Ivoirejistgħu japplikaw il-Ftehim, kollu jew parti minnu, qabel l-applikazzjoni provviżorja tiegħu, sakemm dan ikun possibbli skont il-leġiżlazzjoni interna tagħhom.

7.   Kull parti tista' tinnotifika bil-miktub lill-parti l-oħra l-intenzjoni tagħha li tiddenunċja dan il-Ftehim. Id-denunzja ssir effettiva sitt xhur wara n-notifika mill-parti l-oħra.

8.   Dan il-Ftehim se jiġi sostitwit minn FSE globali konkluż fil-livell reġjonali mal-parti KE fid-data tad-dħul fis-seħħ tiegħu. F'dan il-każ, il-partijiet għandhom jimpenjaw ruħhom sabiex il-FSE globali fil-livell reġjonali jħares il-punti essenzjali tal-acquis tal-Côte d'Ivoire skont dan il-Ftehim.

Artikolu 76

L-applikazzjoni territorjali

Dan il-Ftehim huwa applikabbli min-naħa għat-territorji li fihom it-Trattat li jistabbilixxi l-Komunità Ewropea huwa applikat u dan, skont il-kundizzjonijiet iffissati f'dan it-Trattat, u min-naħa l-oħra l-Côte d'Ivoire.

Artikolu 77

L-adeżjonijiet tal-Istati l-Membri l-ġodda tal-Unjoni Ewropea

1.   Il-Kumitat FSE għandu jkun infurmat b'kull talba ta' Stat terz li jixtieq isir membru tal-Unjoni Ewropea. Matul in-negozjati bejn l-Unjoni Ewropea u l-Istat kandidat, il-parti KE għandha tipprovdi lill-Côte d'Ivoire kull informazzjoni pertinenti u l-Côte d'Ivoire għandha tinforma lill-parti KE bit-tħassib tagħha sabiex din tkun tista' tikkunsidrahom bis-sħiħ. Il-Côte d'Ivoire għandha tirċievi notifika ta' kull adeżjoni fl-Unjoni Ewropea.

2.   Kull Stat Membru ġdid tal-Unjoni Ewropea għandu jintrabat ma' dan il-Ftehim mid-data tal-adeżjoni tiegħu fl-Unjoni Ewropea fuq il-bażi ta' klawżola għal dan fl-Att tal-adeżjoni. Jekk l-att tal-adeżjoni fl-Unjoni Ewropea ma jipprevedix tali adeżjoni awtomatika tal-Istat Membru l-ġdid fl-Unjoni Ewropea f'dan il-Ftehim, l-Istat Membru kkonċernat għandu jingħaqad ma' dan il-Ftehim billi jippreżenta att ta' adeżjoni lis-Segretarjat Ġenerali tal-Kunsill tal-Unjoni Ewropea, li għandu jibgħat kopji ċertifikati lill-parti tal-Côte d'Ivoire.

3.   Il-partijiet għandhom jeżaminaw l-effetti tal-adeżjoni tal-Istati l-Membri l-ġodda tal-Unjoni Ewropea fuq dan il-Ftehim. Il-Kumitat FSE jista' jiddeċiedi fuq miżuri tranżitorji jew emendi neċessarji.

Artikolu 78

Id-djalogu fuq il-kwistjonijiet finanzjarji

Il-partijiet jaqblu li jippromwovu d-djalogu, it-trasparenza u li jaqsmu l-aqwa prattiki fil-qasam tal-politika u ta' amministrazzjoni fiskali.

Artikolu 79

Il-kollaborazzjoni fil-qasam tal-ġlieda kontra l-attivitajiet finanzjarji illegali

Il-parti KE u l-Côte d'Ivoire huma impenjati li jipprevjenu u jiġġieldu kontra l-attivitajiet illegali, frodulenti u ta' korruzzjoni, il-ħasil tal-flus u l-finanzjament tat-terroriżmu. Għal dan il-fini l-partijiet jieħdu miżuri leġiżlattivi u amministrattivi neċessarji biex jikkonformaw għan-normi internazzjonali, inkluż dawk definiti fil-Konvenzjoni tan-Nazzjonijiet Uniti kontra l-Korruzzjoni, il-Konvenzjoni tan-Nazzjonijiet Uniti kontra l-Kriminalità Transnazzjonali Organizzata u l-Protokolli tagħha, il-Konvenzjoni tan-Nazzjonijiet Uniti għar-Repressjoni tal-Finanzjament tat-Terroriżmu u r-rakkomandazzjonijiet tal-Grupp ta' l-Azzjoni Finanzjarja. Il-parti KE u l-Côte d'Ivoire jaqblu li jgħaddu għal skambju ta' informazzjoni u li jikkooperaw f'dawn l-oqsma.

Artikolu 80

Ir-rapporti ma' ftehimiet oħra

1.   Ħlief għall-Artikoli li jikkonċernaw il-kooperazzjoni għall-iżvilupp previst fit-Titolu II tal-Parti III tal-Ftehim ta' Cotonou, f'każ ta' nuqqas ta' koerenza bejn id-dispożizzjonijiet ta' dan il-Ftehim u dispożizzjonijiet tat-Titolu II tal-Parti III tal-Ftehim ta' Cotonou, id-dispożizzjonijiet ta' dan il-Ftehim għandhom jipprevalu.

2.   L-ebda dispożizzjoni ta' dan il-Ftehim ma għandha tiġi interpretata bħala li qed ittellef l-adozzjoni ta' miżuri mill-Komunità Ewropea jew mill-Côte d'Ivoire, inkluż miżuri kummerċjali, meqjusa adattati u previsti mill-Artikoli 11b, 96 u 97 tal-Ftehim ta' Cotonou.

3.   Il-partijiet jaqblu li l-ebda parti minn dan il-Ftehim ma jobbligahom li jaġixxu b'mod inkompatibbli mal-obbligi tagħhom fil-qafas tal-WTO.

Artikolu 81

It-testijiet awtentiċi

Dan il-ftehim huwa preparat f'żewġ kopji bil-Bulgaru, biċ-Ċek, bid-Daniż, bl-Olandiż, bl-Estonjan, bl-Ingliż, bil-Finlandiż, bil-Franċiż, bil-Ġermaniż, bil-Grieg, bl-Ungeriż, bit-Taljan, bil-Latvjan, bil-Litwan, bil-Malti, bil-Pollakk, bil-Portugiż, bir-Rumen, bis-Slovakk, bis-Sloven, bl-Ispanjol, u bl-Isvediż, u kull wieħed mit-testi huwa awtentiku b'mod ugwali.

F'każ ta' kontradizzjoni, għandha ssir referenza għal-lingwa li biha l-Ftehim ġie nnegozjat, f'dan il-każ il-Franċiż.

Artikolu 82

Annessi

L-appendiċi, l-annessi u l-Protokolli ta' dan il-Ftehim huma parti integrali minnu.

---

(1)  L-Istati Membri mhumiex inklużi.

(2)  Għal dan il-kalkolu, se tintuża l-informazzjoni uffiċjali tal-WTO dwar l-esportaturi dinjija tal-merkanzija prinċipali (li jeskludi l-kummerċ intra-UE).

(3)  Għall-finijiet ta' dan l-Artikolu, il-prodotti agrikoli huma dawk koperti mill-Anness I tal-Ftehim tad-WTO dwar l-Agrikoltura.