Assistenza reċiproka f’materji kriminali bejn il-pajjiżi tal-Unjoni Ewropea

 

SOMMARJU TA’:

Konvenzjoni dwar l-Assistenza reċiproka f’Materji Kriminali bejn il-pajjiżi tal-Unjoni Ewropea

Att tal-Kunsill li jistabilixxi l-Konvenzjoni dwar l-Assistenza reċiproka f’Materji Kriminali bejn il-pajjiżi tal-Unjoni Ewropea

X’INHU L-GĦAN TAL-KONVENZJONI U TAL-ATT?

Il-konvenzjoni għandha l-għan li tinkoraġġixxi u tiffaċilita l-assistenza reċiproka bejn l-awtoritajiet ġudizzjarji, tal-pulizija u tad-dwana dwar kwistjonijiet kriminali u biex ittejjeb il-pass u l-effiċjenza tal-kooperazzjoni ġudizzjarja. Hija tissupplimenta l-Konvenzjoni tal-Kunsill tal-Ewropa tal-1959 dwar Assistenza Reċiproka f’Materji Kriminali u l-Protokoll tagħha tal-1978.

L-att japprova l-konvenzjoni f’isem il-pajjiżi tal-UE.

PUNTI EWLENIN

Talbiet għal assistenza reċiproka

• It-talbiet għandhom isiru bil-miktub, jiġu trażmessi u mwettqa direttament mill-awtoritajiet ġudizzjarji nazzjonali.
• It-talbiet għal trasferiment jew transitu temporanju ta’ persuni miżmuma f’kustodja u biex jintbagħtu avviżi ta’ informazzjoni minn rekords ġudizzjarji għandhom jintbagħtu mill-awtoritajiet ċentrali tal-pajjiżi tal-UE.
• F’sitwazzjonijiet ta’ emerġenza, jistgħu jsiru talbiet permezz tal-Interpol jew kwalunkwe korp kompetenti skont ir-regoli introdotti skont it-Trattat dwar l-Unjoni Ewropea.
• Il-pajjiż tal-UE mitlub li jipprovdi assistenza reċiproka (pajjiż mitlub) għandu jikkonforma mal-formalitajiet u l-proċeduri speċifikati mill-pajjiż tal-UE li għamel it-talba (pajjiż rikjedenti) u għandu jwettaq it-talba malajr kemm jista’ jkun, billi jieħu kont kemm jista’ jkun sħiħ tal-iskadenzi indikati.
• Il-pajjiżi tal-UE jridu jibagħtu dokumenti proċedurali maħsuba għal persuni li jinsabu f’pajjiż ieħor tal-UE direttament lilhom bil-posta, iżda f’xi każijiet, id-dokumenti jistgħu jintbagħtu permezz tal-awtoritajiet kompetenti tal-pajjiż mitlub.
• Awtorità ġudizzjarja jew awtorità ċentrali f’pajjiż wieħed tal-UE tista’ tagħmel kuntatt dirett mal-pulizija jew ma’ awtorità doganali minn pajjiż ieħor tal-UE jew, fir-rigward ta’ talbiet għal assistenza reċiproka fir-rigward ta’ proċedimenti, ma’ awtorità amministrattiva minn pajjiż ieħor tal-UE. Il-pajjiżi jistgħu jirrifjutaw li japplikaw din il-klawsola jew japplikawha biss skont ċerti kondizzjonijiet.
• Il-pajjiżi tal-UE jistgħu jaqsmu spontanjament informazzjoni dwar reati kriminali u ksur amministrattiv li l-piena jew it-trattament tagħhom huma r-responsabbiltà tal-awtorità riċeventi.

Forom speċifiċi ta’ assistenza reċiproka

• Oġġetti misruqa li jinsabu f’pajjiż ieħor tal-UE għandhom ikunu disponibbli għall-pajjiż rikjedenti sabiex ikunu jistgħu jiġu rritornati lis-sidien tagħhom.
• Persuna miżmuma fit-territorju ta’ pajjiż rikjedenti tista’, bil-kunsens tal-awtoritajiet, tiġi trasferita temporanjament lejn il-pajjiż li fih għandha ssir l-investigazzjoni. Meta wieħed mill-pajjiżi jeħtieġha, il-kunsens tal-persuna kkonċernata għandu jingħata qabel it-trasferiment.
• L-awtoritajiet ġudizzjarji ta’ pajjiż ieħor jistgħu jisimgħu xhud jew espert permezz ta’ vidjokonferenza jekk dan ma jmurx kontra l-prinċipji fundamentali tal-pajjiż mitlub, u jekk il-partijiet kollha kkonċernati jaqblu.
• Kunsinni kkontrollati* jistgħu jkunu permessi fit-territorju ta’ pajjiż ieħor tal-UE fil-kuntest ta’ investigazzjonijiet kriminali dwar reati ta’ estradizzjoni. L-awtoritajiet tal-pajjiż mitlub għandhom imexxuhom u jimmonitorjawhom.
• Żewġ pajjiżi jew aktar jistgħu jistabbilixxu tim konġunt ta’ investigazzjoni għal skop speċifiku u għal perjodu ta’ żmien limitat fuq il-bażi ta’ ftehim konġunt bejniethom. Uffiċjal mill-pajjiż li fih it-tim qiegħed jopera, jikkoordina u jmexxi l-attivitajiet tiegħu.
• Investigazzjonijiet jistgħu jitwettqu wkoll minn uffiċjali li jaġixxu taħt identità moħbija jew falza, sakemm jikkonformaw mal-liġi u l-proċeduri nazzjonali rilevanti.

Interċettazzjoni ta’ telekomunikazzjonijiet

• Telekomunikazzjonijiet jistgħu jiġu interċettati jekk mitluba minn awtorità kompetenti minn pajjiż ieħor tal-UE, li huwa maħtur biex jagħmel dan f’dak il-pajjiż tal-UE.
• Komunikazzjonijiet jistgħu jew jiġu interċettati u trażmessi direttament lill-pajjiż li jagħmel it-talba jew jiġu rreġistrati għal trażmissjoni aktar tard.
• Interċettazzjoni tista’ ssir ukoll f’pajjiż tal-UE fejn ikun jinsab tagħmir satellitari terrestri. Jekk l-assistenza teknika ta’ dak il-pajjiż ma tkunx meħtieġa, l-interċettazzjoni titwettaq mill-fornituri tas-servizz fil-pajjiż rikjedenti. Meta l-interċettazzjoni sseħħ f’pajjiż partikolari minħabba l-post li jinsab fih is-suġġett, iżda l-ebda għajnuna teknika ma tkun meħtieġa, il-pajjiż li jkun qed iwettaq l-interċettazzjoni għandu jinforma lill-pajjiż l-ieħor bl-azzjoni tiegħu.

Regoli speċjali għal ċerti pajjiżi tal-UE

Japplikaw regoli speċjali:

• għall-Irlanda u r-Renju Unit (1) (trażmissjoni ta’ talbiet għal assistenza);
• għal-Lussemburgu (protezzjoni tad-data personali); u
• għan-Norveġja u l-Iżlanda (regoli relatati mar-regoli ta’ Schengen u d-dħul fis-seħħ tal-konvenzjoni).

MINN META JAPPLIKAW L-ATT U L-KONVENZJONI?

Il-konvenzjoni daħlet fis-seħħ fit-23 ta’ Awwissu 2005.

SFOND

Għal iktar informazzjoni, ara:

• Kooperazzjoni ġudizzjarja (Kummissjoni Ewropea).

TERMINI EWLENIN

DOKUMENTI PRINĊIPALI

Konvenzjoni stabbilita mill-Kunsill skont Artikolu 34 tat-Trattat dwar l-Unjoni Ewropea, dwar l-Assistenza reċiproka f’Materji Kriminali bejn l-Istati Membri tal-Unjoni Ewropea — Dikjarazzjoni tal-Kunsill dwar l-Artikolu 10(9) — Dikjarazzjoni mir-Renju Unit (1) fuq l-Artikolu 20 (ĠU C 197, 12.7.2000, pp. 3-23)

Att tal-Kunsill tad-29 ta’ Mejju 2000 li jistabbilixxi skont l-Artikolu 34 tat-Trattat dwar l-Unjoni Ewropea l-Konvenzjoni dwar l-Assistenza Reċiproka f’Materji Kriminali bejn l-Istati Membri fl-Unjoni Ewropea (ĠU C 197, 12.7.2000, pp. 1-2)

DOKUMENTI RELATATI

Protokoll stabbilit mill-Kunsill skont l-Artikolu 34 tat-Trattat dwar l-Unjoni Ewropea, għall-Konvenzjoni dwar l-għajnuna reċiproka f’Materji Kriminali bejn l-Istati Membri tal-Unjoni Ewropea (ĠU C 326, 21.11.2001, pp. 2-8)

Komunikazzjoni mis-Segretarju-Ġenerali tal-Unjoni Ewropea skont l-Artikolu 30(2) tal-Konvenzjoni, stabbilita mill-Kunsill skont l-Artikolu 34 tat-Trattat dwar l-Unjoni Ewropea, dwar l-Assistenza Reċiproka f’Materji Kriminali bejn l-Istati Membri tal-Unjoni Ewropea (ĠU C 197, 12.7.2000, pp. 24-2)

l-aħħar aġġornament 10.09.2018

---

(1) Ir-Renju Unit joħroġ mill-Unjoni Ewropea u jsir pajjiż terz (pajjiż mhux tal-UE) mill-1 ta’ Frar 2020.