Is-sikurezza marittima: Kumitat dwar Ibħra Sikuri

Ir-regolament jistabbilixxi Kumitat għall-Ibħra Sikuri u għall-Prevenzjoni ta’ Tniġġis minn Vapuri (COSS). Dan jassisti u jagħti pariri lill-Kummissjoni Ewropea rigward l-implimentazzjoni tal-liġi tal-UE dwar is-sikurezza marittima, il-prevenzjoni tat-tniġġis u l-kundizzjonijiet tax-xogħol u tal-għajxien abbord għall-ekwipaġġ.

ATT

Ir-Regolament (KE) Nru 2099/2002 tal-Parlament Ewropew u tal-Kunsill tal-5 ta' Novembru ta' l-2002 li jistabbilixxi Kumitat dwar l-Ibħra Protetti u l-Prevenzjoni ta' Tniġġis minn Bastimenti (COSS) u li jemenda r-Regolamenti dwar is-sigurtà marittima u l-prevenzjoni ta' tniġġis minn bastimenti

SOMMARJU

X’JAGĦMEL DAN IR-REGOLAMENT?

Huwa jistabbilixxi l-Kumitat COSS, li jinkludi rappreżentanti tal-pajjiżi tal-UE u li huwa ppresedut mill-Kummissjoni. L-irwol tiegħu huwa li jassisti fl-aġġornament u l-emendar f’waqthom tal-leġiżlazzjoni marittima tal-UE. Huwa jiċċentralizza l-ħidma mwettqa preċedentement minn għadd ta’ kumitati mwaqqfa skont liġijiet tal-UE differenti fil-qasam.

PUNTI EWLENIN

Kamp ta’ applikazzjoni

Il-ħidma tas-COSS tittratta firxa wiesgħa ta’ aspetti koperti mil-leġiżlazzjoni marittima tal-UE bħal:

• faċilitajiet ta’ akkoljenza fil-portijiet: (fejn il-vapuri jistgħu jiddepożitaw l-iskart jew ir-residwi mill-merkanzija tagħhom) sabiex inaqqsu r-rimi fil-baħar u b’hekk jipprevjenu t-tniġġis tal-baħar;
• tagħmir tal-baħar: is-sikurezza tal-prodotti - iżda wkoll tas-servizzi - fornuti għall-bini, għall-konverżjoni u għall-manutenzjoni tal-vapuri (fuq il-baħar u fuq l-art) u għall-istrutturi marittimi, bħal pjattaformi taż-żejt;
• il-vapuri tal-passiġġieri, is-sikurezza tal-laneċ u tal-bastimenti għall-kruċieri u l-kundizzjonijiet tal-għajxien abbord;
• il-livelli minimi ta’ taħriġ tal-baħħara.

Regoli internazzjonali

Ħafna żviluppi fil-liġi marittima tal-UE huma xprunati mill-bidliet maqbula f’organizzazzjonijiet internazzjonali, bħall-Organizzazzjoni Marittima Internazzjonali jew l-Organizzazzjoni Internazzjonali tax-Xogħol.

Proċedura ta’ verifika tal-konformità

Sabiex jiġi żgurat li ma jkun hemm ebda kunflitt bejn il-liġi marittima tal-UE u l-ftehimiet milħuqa fil-livell internazzjonali, il-pajjiżi tal-UE u l-Kummissjoni jikkooperaw u jikkoordinaw flimkien sabiex jiddefinixxu pożizzjoni komuni tal-UE.

Teżisti proċedura ta’ verifika tal-konformità li tippermetti lis-COSS jeżamina kwalunkwe emendi għal konvenzjoni jew riżoluzzjoni adottata fil-livell internazzjonali li jkollha l-effett li tbaxxi l-istandards tal-UE. Tista’ tissejjaħ laqgħa ta’ emerġenza tas-COSS fuq inizjattiva tal-Kummissjoni jew fuq talba ta’ pajjiż tal-UE sabiex jiġu eżaminati l-emendi involuti u sabiex tinħareġ opinjoni dwar miżuri tal-UE xierqa.

Bħala prekawzjoni, il-Kummissjoni tista’ wkoll, fejn xieraq, titlob lill-pajjiżi tal-UE biex jissospendu jew idewmu kwalunkwe pjanijiet sabiex jaċċettaw jew japplikaw l-emenda internazzjonali kkonċernata.

Is-setgħat tas-COSS

Il-ħidma tas-COSS tħaffef u tissimplifika l-inkorporazzjoni tar-regoli internazzjonali fil-leġiżlazzjoni tal-UE billi tippermetti li l-emendi għal dawn ir-regoli jiġu applikati direttament, soġġetti għal verifika tal-konformità minn qabel.

Ir-Regolament (UE) Nru 182/2011 li jistabbilixxi r-regoli u l-prinċipji li jikkonċernaw is-setgħat ta’ implimentazzjoni tal-Kummissjoni Ewropea (komitoloġija). Permezz tas-COSS, il-pajjiżi tal-UE jikkontrollaw l-eżerċitar mill-Kummissjoni tas-setgħat ta’ implimentazzjoni ddelegati lilha mid-diversi direttivi u regolamenti adottati fil-qasam tal-liġi marittima tal-UE.

MINN META JAPPLIKA R-REGOLAMENT?

Mid-19 ta' Diċembru 2002.

Għal aktar tagħrif, ara s-sit elettroniku tad-Direttorat Ġenerali għall-Mobbiltà u t-Trasport tal-Kummissjoni Ewropea.

l-aħħar aġġornament 15.03.2015