Eżenzjoni għall-akkordji ta’ riċerka u żvilupp

SOMMARJU TA’:

Ir-Regolament (UE) Nru 1217/2010 dwar l-applikazzjoni tal-Artikolu 101(3) tat-Trattat dwar il-Funzjonament tal-Unjoni Ewropea għal ċerti kategoriji ta’ akkordji ta’ riċerka u żvilupp

X’INHU L-GĦAN TAR-REGOLAMENT?

Artikolu 101 tat-Trattat dwar il-Funzjonament tal-Unjoni Ewropea (TFUE) jistabbilixxi regoli dwar prattiki u accordji bejn kumpaniji. Bħala regola ġenerali, tali prattiki u akkordji miftiehma huma pprojbiti sakemm ma jaqgħux fil-kamp ta’ applikazzjoni tal-Artikolu 101(3) meta jkunu eċċezzjonijiet għar-regola.
Ir-Regolament (UE) Nru 1217/2010 jiddikjara li l-Artikolu 101 ma japplikax għall-akkordji ta’ riċerka u żvilupp (R&Ż)* meta l-partijiet iwettqu R&Ż konġunti ta’ prodotti jew proċessi u esplojtazzjoni konġunta tar-riżultati ta’ dik ir-R&Ż, jew iwettqu waħda minn dawk l-attivitajiet f’iżolament.

PUNTI EWLENIN

L-Artikolu 101(1) tat-TFUE mhuwiex applikabbli għal ftehimiet ta’ R&Ż. Ir-Regolament (KEE) Nru 2821/71, madankollu, jipprovdi eżenzjoni għal ftehimiet ta’ R&Ż li fihom regoli relatati mal-assenjament jew mal-liċenzjar tad-drittijiet tal-proprjetà intellettwali sabiex jitwettqu r-R&Ż konġunti, ir-R&Ż imħallsa jew esplojtazzjoni konġunta, sakemm dawk id-dispożizzjonijiet ma jkunux l-għan primarju ta’ tali akkordji, iżda minflok ikunu direttament relatati ma’ u meħtieġa għall-implimentazzjoni tagħhom.
Ir-regolament jipprojbixxi wkoll esplojtazzjoni konġunta tar-riżultati tar-R&Ż li tkun twettqet mill-partijiet skont ir-regolament. Dan ir-regolament jissostitwixxi r-Regolament (KE) Nru 2659/2000 li skada fil-31 ta’ Diċembru 2010.

Kundizzjonijiet għall-eżenzjoni

Sabiex jiġi eżentat, l-akkordju jrid jiddikjara li l-partijiet kollha għandhom aċċess sħiħ għar-riżultati finali tar-R&Ż, inkluż kwalunkwe dritt ta’ proprjetà intellettwali u know-how li jirriżultaw, għall-finijiet ta’ aktar R&Ż u esplojtazzjoni. Jekk il-partijiet jillimitaw id-drittijiet ta’ esplojtazzjoni tagħhom, l-aċċess għar-riżultati għall-finijiet ta’ esplojtazzjoni jista’ jkun limitat kif xieraq.
Meta l-ftehim jipprevedi biss R&Ż konġunti jew ħlas għar-R&Ż, kull parti jeħtiġilha jkollha aċċess għal kwalunkwe know-how preeżistenti tal-partijiet l-oħra kkonċernati, jekk dan in-know-how ikun indispensabbli għall-esplojtazzjoni tar-riżultati. Dan l-iskambju ta’ know-how preeżistenti jista’ jiġi kkumpensat, iżda l-kumpens ma għandux ikun tant għoli li effettivament jipprevjeni tali aċċess.
Kwalunkwe esplojtazzjoni konġunta tista’ tikkonċerna biss riżultati li huma protetti mid-drittijiet tal-proprjetà intellettwali jew li tikkostitwixxi know-how, u li huma indispensabbli għall-manifattura tal-prodotti tal-kuntratt jew għall-applikazzjoni tat-teknoloġiji tal-kuntratt.

Il-limitu tas-sehem mis-suq u t-tul tal-eżenzjoni

Meta l-partijiet għall-ftehim ta’ R&Ż ma jkunux impriżi konkorrenti, l-eżenzjoni prevista minn dan ir-regolament tkun applikabbli għal kemm idumu għaddejjin ir-R&Ż. Meta r-riżultati jkunu esplojtati b’mod konġunt, l-eżenzjoni tkompli tapplika għal 7 snin wara li l-prodotti tal-kuntratt jew it-teknoloġiji tal-kuntratt jitqiegħdu għall-ewwel darba fis-suq tal-Unjoni Ewropea (UE).
Meta l-partijiet ikunu impriżi kompetitriċi, fiż-żmien meta jidħol fis-seħħ il-ftehim ta’ R&Ż, l-eżenzjoni tkun applikabbli biss jekk:
- fil-każ ta’ akkordji konġunti ta’ R&Ż, is-sehem mis-suq ikkombinat tal-partijiet ma jaqbiżx il-25 % fis-swieq rilevanti tal-prodotti u tat-teknoloġija;
- fil-każ ta’ akkordji ta’ R&Ż imħallsa, is-sehem mis-suq ikkombinat tal-parti li tiffinanzja u l-partijiet kollha li magħhom il-parti li tiffinanzja daħlet f’akkordji ta’ R&Ż, relatati mal-istess prodotti kuntrattwali jew teknoloġiji kuntrattwali, ma jaqbiżx il-25 % fis-swieq rilevanti tal-prodotti u tat-teknoloġija.
Fi tmiem il-perjodu ta’ seba’ snin, l-eżenzjoni għandha tkompli tapplika sakemm is-sehem mis-suq ikkombinat tal-partijiet ma jaqbiżx il-25 % fis-swieq rilevanti.

Restrizzjonijiet fundamentali

L-eżenzjoni ma tapplikax għal akkordji ta’ R&Ż li, direttament jew indirettament, waħedhom jew flimkien ma’ fatturi oħra taħt il-kontroll tal-partijiet, għandhom bħala l-objettiv tagħhom:
- ir-restrizzjoni tal-libertà tal-partijiet li jwettqu r-R&Ż f’qasam mhux relatat;
- ir-restrizzjoni tal-libertà tal-partijiet li jsegwu r-R&Ż f’qasam relatat wara t-tlestija tal-ftehim ta’ R&Ż ikkonċernat;
- il-limitazzjoni tal-produzzjoni jew tal-bejgħ, b’ċerti eċċezzjonijiet.

Restrizzjonijiet esklużi

L-eżenzjoni ma tapplikax għall-obbligi li ġejjin li jinsabu f’akkordji ta’ R&Ż:
- l-obbligu li ma tiġix sfidata l-validità tad-drittijiet tal-proprjetà intellettwali relatati wara t-tlestija tar-R&Ż;
- l-obbligu li ma jingħatawx liċenzji lil partijiet terzi għall-manifattura tal-prodotti tal-kuntratt jew li japplikaw għal teknoloġiji tal-kuntratt, sakemm l-akkordju ma jipprevedix l-esplojtazzjoni tar-riżultati minn tal-anqas waħda mill-partijiet u din l-esplojtazzjoni sseħħ fis-suq intern fil-konfront ta’ partijiet terzi.

Linji gwida tal-Kummissjoni Ewropea

Fl- 2011, il-Kummissjoni Ewropea adottat linji gwida dwar l-interpretazzjoni u l-applikabbiltà tal-Artikolu 101 TFUE għal akkordji ta’ kooperazzjoni orizzontali*, li jinkludu ftehimiet ta’ R&Ż.(ara sommarju).

MINN META BEDA JAPPLIKA R-REGOLAMENT?

Dan ilu japplika mill-1 ta’ Jannar 2011 u se jiskadi fit-30 ta’ Ġunju 2023.

SFOND

Fl-2019, il-Kummissjoni bdiet evalwazzjoni biex teżamina jekk ir-regolamenti tal-UE li jittrattaw il-ftehimiet orizzontali jitħallewx jiskadu meta jiskadu f’Diċembru 2022, jew jekk jiġux estiżi jew emendati (u l-linji gwida dwar kif għandhom jiġu interpretati). Ir-riżultati tal-evalwazzjoni tagħha ġew ippubblikati f’Lulju 2021 (ara l-istqarrija għall-istampa). L-evalwazzjoni kkonkludiet li ċerti kwistjonijiet ikollhom jiġu indirizzati sabiex tittejjeb iċ-ċertezza legali. Il-Kummissjoni se tniedi l-fażi tal-valutazzjoni tal-impatt tar-rieżami biex teżamina l-kwistjonijiet identifikati matul l-evalwazzjoni, bil-ħsieb li jkun hemm regoli riveduti fis-seħħ sal-31 ta’ Diċembru 2022, meta jiskadu r-regoli kurrenti.

TERMINI EWLENIN

Akkordju ta’ riċerka u żvilupp (R&Ż). Akkordju konkluż bejn żewġ partijiet jew aktar, relatat mal-kundizzjonijiet li taħthom il-partijiet isegwu:

ir-R&Ż konġunti ta’ prodotti tal-kuntratt jew teknoloġiji tal-kuntratt u esplojtazzjoni konġunta tar-riżultati ta’ dik ir-R&Ż;
esplojtazzjoni konġunta tar-riżultati tar-R&Ż ta’ prodotti tal-kuntratt jew ta’ teknoloġiji tal-kuntratt li tkun twettqet b’mod konġunt skont akkordju konkluż minn qabel bejn l-istess partijiet;
ir-R&Ż konġunti ta’ prodotti tal-kuntratt jew teknoloġiji tal-kuntratt eskluża l-esplojtazzjoni konġunta tar-riżultati;
R&Ż imħallsa ta’ prodotti tal-kuntratt jew teknoloġiji tal-kuntratt u esplojtazzjoni konġunta tar-riżultati ta’ dik ir-R&Ż;
esplojtazzjoni konġunta tar-riżultati tar-R&Ż imħallsa ta’ prodotti tal-kuntratt jew teknoloġiji tal-kuntratt skont akkordju konkluż minn qabel bejn l-istess partijiet;
ir-R&Ż imħallsa ta’ prodotti tal-kuntratt jew ta’ teknoloġiji tal-kuntratt eskluża l-esplojtazzjoni konġunta tar-riżultati.

Ftehimiet orizzontali. Ftehimiet konklużi bejn żewġ impriżi jew aktar li joperaw fl-istess livell fis-suq. Il-kooperazzjoni orizzontali tirrigwarda, fil-biċċa l-kbira tal-każijiet, il-kooperazzjoni bejn kompetituri attwali jew potenzjali f’oqsma bħar-R&Ż, il-produzzjoni, ix-xiri, il-kummerċjalizzazzjoni jew l-istandardizzazzjoni. Din tista’ tinvolvi wkoll l-iskambju ta’ informazzjoni, bħala ftehim awtonomu jew fil-kuntest ta’ tip ieħor ta’ ftehim ta’ kooperazzjoni orizzontali.

DOKUMENT EWLIENI

Ir-Regolament tal-Kummissjoni (UE) Nru 1217/2010 tal-20 ta’ April 2010 dwar l-applikazzjoni tal-Artikolu 101(3) tat-Trattat dwar il-Funzjonament tal-Unjoni Ewropea għal ċerti kategoriji ta’ akkordji ta’ riċerka u żvilupp (ĠU L 335, 18.12.2010, pp. 36-42).

L-emendi suċċessivi għar-Regolament tal-Kummissjoni (UE) Nru 1217/2010 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Verżjoni konsolidata tat-Trattat dwar il-Funzjonament tal-Unjoni Ewropea — It-Tielet Parti — Politika u azzjonijiet interni tal-Unjoni — Titolu VII — Regoli komuni fuq il-kompetizzjoni, fuq it-tassazzjoni u l-approssimazzjoni tal-liġijiet — Kapitolu 1 — Regoli li jirregolaw il-kompetizzjoni — Taqsima 1 — Regoli li japplikaw għal impriżi — l-Artikolu 101 (ex Artikolu 81 TKE) (ĠU C 202, 7.6.2016, pp. 88-89).

Komunikazzjoni tal-Kummissjoni — Linji Gwida dwar l-applikabbiltà tal-Artikolu 101 tat-Trattat dwar il-Funzjonament tal-Unjoni Ewropea għall-akkordji dwar kooperazzjoni orizzontali (ĠU C 11, 14.1.2011, pp. 1-72).

Ir-Regolament (KEE) Nru 2821/71 tal-Kunsill tal-20 ta’ Diċembru 1971 dwar l-applikazzjoni tal-Artikolu 85(3) tat-Trattat għal kategoriji ta’ ftehim, deċiżjonijiet u prattiċi miftiehma (ĠU L 285, 29.12.1971, p. 46-48).

Ara l-verżjoni konsolidata.

l-aħħar aġġornament 16.01.2023

Top