52017PC0733

IL-KUMMISSJONI EWROPEA

Brussell, 4.12.2017

COM(2017) 733 final

2017/0325(NLE)

Proposta għal

REGOLAMENT TAL-KUNSILL

li jemenda r-Regolament (UE) Nru 1388/2013 li jiftaħ u jipprovdi għall-ġestjoni ta’ kwoti tariffarji awtonomi tal-Unjoni għal ċerti prodotti agrikoli u industrijali

MEMORANDUM TA’ SPJEGAZZJONI

1.KUNTEST TAL-PROPOSTA

•Raġunijiet u għanijiet tal-proposta

Ċertu prodotti jeħtieġu kwoti tariffarji awtonomi meta l-produzzjoni tagħhom fl-Unjoni Ewropea ma tkunx tlaħħaq mal-ħtiġijiet tal-industriji li jużawhom fl-UE. Jenħtieġ li l-kwoti tariffarji tal-UE jinfetħu b’rati ta’ dazju żero jew imnaqqsa għall-volumi x-xierqa, mingħajr ma jfixklu s-swieq ta’ prodotti bħal dawn.

Fis-17 ta’ Diċembru 2013, il-Kunsill tal-Unjoni Ewropea adotta r-Regolament (UE) Nru 1388/2013 li jiftaħ u jipprovdi għall-ġestjoni ta’ kwoti tariffarji awtonomi tal-UE għal ċerti prodotti agrikoli u industrijali sabiex id-domanda tal-UE għall-prodotti inkwistjoni tkun tista’ tintlaħaq bl-iżjed kundizzjonijiet favorevoli.

Ir-Regolament jiġi aġġornat kull sitt xhur biex jakkomoda l-ħtiġijiet tal-industrija tal-UE. Il-Kummissjoni, assistita mill-Grupp dwar il-Kwistjonijiet ta’ Ekonomija Tariffarja (ETQG), irrieżaminat it-talbiet kollha għal dazji tal-kwoti tariffarji awtonomi li bagħtulha l-Istati Membri.

Wara dan ir-rieżami, il-Kummissjoni hija tal-fehma li l-ftuħ tal-kwoti tariffarji awtonomi huwa ġġustifikat għal xi prodotti ġodda li bħalissa mhumiex elenkati fl-Anness tar-Regolament tal-Kunsill (UE) Nru 1388/2013. Fir-rigward ta’ xi prodotti oħra, jeħtieġ li tiżdied data tat-tmiem jew jiġi adattat il-volum tal-kwota inizjali.

•Konsistenza mad-dispożizzjonijiet eżistenti fil-qasam ta’ politika

Din il-proposta ma taffettwax lill-pajjiżi li għandhom ftehim ta’ kummerċ preferenzjali mal-UE, lill-pajjiżi kandidati jew lill-kandidati potenzjali għal ftehimiet preferenzjali mal-UE (eż. is-Sistema Ġeneralizzata ta’ Preferenzi; ir-reġim ta’ kummerċ tal-grupp tal-Afrika, il-Karibew u l-Paċifiku; il-Ftehimiet ta’ Kummerċ Ħieles).

•Konsistenza ma’ politiki oħra tal-Unjoni

Il-proposta tikkonforma mal-politiki tal-UE dwar l-agrikoltura, il-kummerċ, l-impriżi, l-iżvilupp u r-relazzjonijiet esterni.

2.BAŻI ĠURIDIKA, SUSSIDJARJETÀ U PROPORZJONALITÀ

•Bażi ġuridika

Il-bażi ġuridika ta’ din il-proposta hija l-Artikolu 31 tat-Trattat dwar il-Funzjonament tal-Unjoni Ewropea (TFUE).

•Sussidjarjetà (għall-kompetenza mhux esklużiva)

Il-proposta hija parti mill-kompetenza esklużiva tal-UE. Għalhekk, il-prinċipju tas-sussidjarjetà ma japplikax.

•Proporzjonalità

Il-proposta tikkonforma mal-prinċipju tal-proporzjonalità. Il-miżuri previsti jikkonformaw mal-prinċipji għas-simplifikazzjoni tal-proċeduri għall-operaturi involuti fil-kummerċ barrani, kif iddikjarat fil-Komunikazzjoni tal-Kummissjoni dwar is-sospensjonijiet u l-kwoti tariffarji awtonomi 1 . Dan ir-Regolament ma jmurx lil hinn minn dak li hu meħtieġ sabiex jinkisbu l-objettivi li jridu jinkisbu skont l-Artikolu 5(4) tat-Trattat dwar l-Unjoni Ewropea (TUE).

•Għażla tal-istrument

Skont l-Artikolu 31 tat-TFUE, “Id-dazji tat-Tariffa Doganali Komuni għandhom jiġu stabbiliti mill-Kunsill li jaġixxi fuq proposta mill-Kummissjoni”. Għalhekk, l-istrument ix-xieraq huwa Regolament.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

•Evalwazzjonijiet ex post/kontrolli tal-idoneità tal-leġiżlazzjoni eżistenti

L-iskema tal-kwoti tariffarji awtonomi kienet parti minn studju ta’ evalwazzjoni tal-2013 dwar is-sospensjonijiet tariffarji awtonomi. Dan għaliex iż-żewġ miżuri huma simili, għajr li l-kwoti jillimitaw il-volumi tal-importazzjonijiet. L-evalwazzjoni kkonkludiet li r-raġuni fundamentali għall-iskema għadha valida. L-iffrankar tal-kostijiet għan-negozji tal-UE li jimpurtaw oġġetti skont l-iskema jista’ jkun sinifikanti. Barra minn hekk, skont il-prodott, il-kumpanija u s-settur ikkonċernati, dan l-iffrankar jista’ jwassal għal benefiċċji usa’, pereżempju t-titjib fil-kompetittività, it-titjib fl-effiċjenza tal-metodi ta’ produzzjoni u l-ħolqien jew iż-żamma tal-impjiegi fl-UE. Id-dettalji tal-iffrankar ta’ dan ir-Regolament jistgħu jinstabu fid-dikjarazzjoni finanzjarja leġiżlattiva mehmuża.

•Konsultazzjonijiet mal-partijiet ikkonċernati

L-ETQG, li jikkonsisti minn delegazzjonijiet mill-Istati Membri kollha u mit-Turkija, assista lill-Kummissjoni biex tivvaluta l-proposta. Il-grupp iltaqa’ tliet darbiet qabel ma ntlaħaq qbil dwar it-tibdil f’din il-proposta.

Kull talba (ġdida, jew għal emenda) ġiet ivvalutata bir-reqqa. B’mod partikolari eżamina kull każ sabiex jiżgura li ma kinitx qed tikkawża xi ħsara lill-produtturi tal-UE u li kienet qed isaħħaħ u tikkonsolida l-kompetittività tal-produzzjoni tal-UE. Il-membri tal-ETQG wettqu l-valutazzjoni permezz ta’ diskussjonijiet, u l-Istati Membri kkonsultaw l-industriji, l-assoċjazzjonijiet, il-kmamar tal-kummerċ ikkonċernati u partijiet ikkonċernati oħra involuti.

Il-kwoti kollha elenkati kienu s-suġġett ta’ ftehimiet jew ta’ kompromessi milħuqa fid-diskussjonijiet tal-ETQG. Ma ssemma l-ebda riskju potenzjalment serju b’konsegwenzi irreversibbli.

•Valutazzjoni tal-impatt

L-emenda proposta hija teknika u tikkonċerna biss il-kopertura tal-kwoti elenkati fl-Anness. Ir-Regolament jibqa’ l-istess bħar-Regolament eżistenti tal-Kunsill f’kull rigward. Għaldaqstant ma twettqet l-ebda valutazzjoni tal-impatt għal din il-proposta.

•Drittijiet fundamentali

Il-proposta ma għandha l-ebda konsegwenza fuq id-drittijiet fundamentali.

4.IMPLIKAZZJONIJIET GĦALL-BAĠIT

Din il-proposta ma għandha l-ebda impatt finanzjarju fuq in-nefqa iżda għandha impatt finanzjarju fuq id-dħul li jwassal għal ammont totali ta’ dazji doganali mhux miġbura ta’ madwar EUR 0,2 miljun kull sena. L-effett negattiv fuq ir-riżorsi proprji tradizzjonali tal-baġit huwa ta’ EUR 0,16 miljun kull sena (80 % ta’ EUR 0,2 miljun kull sena).

It-telf ta’ dħul f’riżorsi proprji tradizzjonali għandu jiġi kkumpensat bl-Introjtu Nazzjonali Gross (ING) tal-Istati Membri abbażi tal-kontribuzzjonijiet għar-riżorsi.

5.ELEMENTI OĦRA

•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rappurtar

Il-miżuri proposti huma ġestiti fil-qafas tat-TARIC (it-Tariffa Integrata tal-Unjoni Ewropea) u jiġu applikati mill-amministrazzjonijiet doganali tal-Istati Membri.

Barra minn hekk, l-iskema kollha ta’ sospensjonijiet u ta’ kwoti tariffarji awtonomi ġiet soġġetta għal studju ta’ evalwazzjoni li tlesta fil-bidu ta’ Diċembru 2013 ( http://ec.europa.eu/taxation_customs/common/publications/studies/index_en.htm ). L-evalwazzjoni kkonkludiet li r-raġuni fundamentali għall-iskema għadha valida u li jenħtieġ li l-iskema titkompla.

2017/0325 (NLE)

Proposta għal

REGOLAMENT TAL-KUNSILL

li jemenda r-Regolament (UE) Nru 1388/2013 li jiftaħ u jipprovdi għall-ġestjoni ta’ kwoti tariffarji awtonomi tal-Unjoni għal ċerti prodotti agrikoli u industrijali

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 31 tiegħu,

Wara li kkunsidra l-proposta tal-Kummissjoni Ewropea,

Billi:

(1)Sabiex tiġi żgurata il-provvista suffiċjenti u mingħajr interruzzjoni ta’ ċerti prodotti li ma jiġux immanifatturati biżżejjed fl-Unjoni u sabiex jiġi evitat kull tfixkil fis-suq ta’ ċerti prodotti agrikoli u industrijali, infetħu kwoti tariffarji awtonomi permezz tar-Regolament tal-Kunsill (UE) Nru 1388/2013 2 . Il-prodotti li ma jaqbżux dawk il-kwoti tariffarji jistgħu jiġu importati fl-Unjoni b’rati ta’ dazju mnaqqsa jew żero.

(2)Minħabba r-raġunijiet indikati, jeħtieġ li b’effett mill-1 ta’ Jannar 2018, jinfetħu kwoti tariffarji b’rati ta’ dazju żero għal volum xieraq fir-rigward ta’ tnax-il prodott ġdid. Fil-każ ta’ ħames prodotti addizzjonali, jenħtieġ li jiżdiedu l-volumi tal-kwota, billi din żieda hija fl-interess tal-operaturi ekonomiċi tal-Unjoni.

(3)Fil-każ ta’ prodott wieħed addizzjonali, jenħtieġ li l-volum tal-kwota jonqos peress li l-kapaċità tal-produzzjoni tal-produtturi tal-UE żdiedet.

(4)Fil-każ ta’ ħames prodotti, jenħtieġ li l-perjodu tal-kwota u l-volum tal-kwota jiġu adattati peress li nfetħu għal perjodu ta’ sitt xhur biss.

(5)Fil-każ ta’ prodott ieħor, jenħtieġ li d-deskrizzjoni tiegħu tiġi emendata.

(6)Fil-każ ta’ tnax-il prodott ieħor, jenħtieġ li l-kwota tariffarja awtonoma tal-Unjoni tingħalaq b’effett mill-1 ta’ Jannar 2018 peress li mhux iktar fl-interess tal-Unjoni li din tkompli tingħata minn dik id-data ’l quddiem.

(7)Għaldaqstant, jenħtieġ li r-Regolament (UE) Nru 1388/2013 jiġi emendat skont dan.

(8)Sabiex tiġi evitata kwalunkwe interruzzjoni fl-applikazzjoni tal-iskema tal-kwoti u biex jiġu ssodisfati l-linji gwida stabbiliti fil-Komunikazzjoni tal-Kummissjoni rigward is-sospensjonijiet u l-kwoti tariffarji awtonomi (2011/C 363/2011) 3 , jenħtieġ li l-bidliet fir-rigward tal-kwoti għall-prodotti kkonċernati previsti f’dan ir-Regolament jidħlu fis-seħħ b’urġenza u japplikaw mill-1 ta’ Jannar 2018,

ADOTTA DAN IR-REGOLAMENT:

Artikolu 1

L-Anness tar-Regolament (UE) Nru 1388/2013 huwa emendat kif ġej:

(1)ir-ringieli għall-kwoti tariffarji bin-numri tal-ordni 09.2872, 09.2874, 09.2878, 09.2880, 09.2886, 09.2876, 09.2888, 09.2866, 09.2906, 09.2909, 09.2910 u 09.2932 stabbiliti fl-Anness I ta’ dan ir-Regolament jiddaħħlu skont l-ordni tal-kodiċijiet tan-Nomenklatura Magħquda (NM) indikati fit-tieni kolonna tat-tabella fl-Anness tar-Regolament (UE) Nru 1388/2013;

(2) ir-ringieli għall-kwoti tariffarji bin-numri tal-ordni 09.2929, 09.2704, 09.2842, 09.2844, 09.2671, 09.2846, 09.2723, 09.2848, 09.2870, 09.2662, 09.2850 u 09.2868 jinbidlu bir-ringieli stabbiliti fl-Anness II ta’ dan ir-Regolament;

(3) ir-ringieli għall-kwoti tariffarji bin-numri tal-ordni 09.2703, 09.2691, 09.2692, 09.2680, 09.2977, 09.2693, 09.2712, 09.2714, 09.2666, 09.2687, 09.2689 u 09.2669 għandhom jitħassru;

(4) fin-noti, titħassar il-frażi “* Miżura ġdida li għadha kif iddaħħlet jew miżura bil-kundizzjonijiet mibdulin.”

Artikolu 2

Dan ir-Regolament għandu jidħol fis-seħħ l-għada tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Jannar 2018.

Dan ir-Regolament għandu jorbot fl-intier tiegħu u għandu japplika direttament fl-Istati Membri kollha.

Magħmul fi Brussell,

Għall-Kunsill

Il-President

DIKJARAZZJONI FINANZJARJA LEĠIŻLATTIVA

1. ISEM IL-PROPOSTA:

Ir-Regolament tal-Kunsill li jemenda r-Regolament (UE) Nru 1388/2013 li jiftaħ u jipprovdi għall-ġestjoni ta’ kwoti tariffarji awtonomi tal-Unjoni għal ċerti prodotti agrikoli u industrijali

2. LINJI BAĠITARJI

Il-Kapitolu u l-Artikolu: Il-Kapitolu 12 u l-Artikolu 120 – Dazji doganali u dazji oħra msemmija fil-punt (a) tal-Artikolu 2(1) tad-Deċiżjoni 2014/335/UE, Euratom.

Ammont ibbaġitjat għall-2018: EUR 22 844 000 000 (B 2018)

3. IMPATT FINANZJARJU

◻ Il-proposta ma għandha l-ebda implikazzjoni finanzjarja

X Il-proposta ma għandha l-ebda impatt finanzjarju fuq in-nefqa iżda għandha impatt finanzjarju fuq id-dħul. L-effett huwa kif ġej:

(miljuni ta’ EUR aġġustati ’l fuq għal pożizzjoni deċimali waħda)

Linja baġitarja	Dħul 4	Perjodu ta’ sitt xhur li jibda minn jj/xx/ssss	[Sena: it-tieni nofs tal-2017]
Artikolu 120	Impatt fuq ir-riżorsi proprji	01/01/2018	- 0,2

L-Anness I fih 12-il prodott ġdid. Id-dazji mhux miġbura li jikkorrispondu għal dawn il-kwoti, ikkalkulati abbażi tat-tbassir tal-Istat Membru li għamel it-talba għall-perjodu ta’ bejn l-2018 u l-2021, jammontaw għal EUR 7,9 miljun kull sena.

It-tneħħija ta’ 12-il prodott mill-Anness ta’ dan ir-Regolament tirrifletti l-introduzzjoni mill-ġdid tad-dazji doganali. Dan jirrappreżenta żieda ta’ EUR 7,7 miljun kull sena fil-ġbir tad-dazji.

Abbażi ta’ dan ta’ hawn fuq, l-impatt fuq it-telf ta’ dħul għall-baġit tal-UE li jirriżulta minn dan ir-Regolament huwa stmat li se jkun ta’ EUR 7,9 – 7,7 = EUR 0,2 miljun (ammont gross, inklużi l-kostijiet tal-ġbir) x 0,8 = EUR 0,16 miljun kull sena (ammont nett).

4. MIŻURI KONTRA L-FRODI

Se jsiru kontrolli fuq l-użu aħħari ta’ wħud mill-prodotti koperti b’dan ir-Regolament tal-Kunsill skont l-Artikolu 254 tar-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni.

(1) ĠU C 363, 13.12.2011, p. 6.

(2) Ir-Regolament tal-Kunsill (UE) Nru 1388/2013 tas-17 ta’ Diċembru 2013 li jiftaħ u jipprovdi għall-ġestjoni ta' kwoti tariffarji awtonomi tal-Unjoni għal ċerti prodotti agrikoli u industrijali u li jħassar ir-Regolament (KE) Nru 7/2010 (ĠU L 354, 28.12.2013, p. 319).

(3) ĠU C 363, 13.12.2011, p. 6.

(4) Fir-rigward tar-riżorsi proprji tradizzjonali (id-dazji agrikoli, l-imposti fuq iz-zokkor, id-dazji doganali), l-ammonti indikati jridu jkunu ammonti netti, jiġifieri ammonti grossi wara li minnhom jitnaqqsu 20 % tal-kostijiet tal-ġbir.

Top

IL-KUMMISSJONI EWROPEA

Brussell,4.12.2017

COM(2017) 733 final

ANNESSI

tal-

Proposta għal Regolament tal-Kunsill

li jemenda r-Regolament (UE) Nru 1388/2013 li jiftaħ u jipprovdi għall-ġestjoni ta’ kwoti tariffarji awtonomi tal-Unjoni għal ċerti prodotti agrikoli u industrijali

ANNESS I

Fit-tabella tal-Anness tar-Regolament (UE) Nru 1388/2013, ir-ringieli li ġejjin jiddaħħlu skont l-ordni tal-kodiċijiet NM indikati fit-tieni kolonna ta’ dik it-tabella:

Nru tal-Ordni	Il-kodiċi tan-NM	TARIC	Deskrizzjoni	Il-perjodu tal-kwota	L-ammont tal-kwota	Il-kwota tad-dazji (%)
‘09.2872	ex 2833 29 80	40	Sulfat taċ-ċesju (CAS RN 10294-54-9) f’forma solida jew bħala soluzzjoni milwiema li fiha piż skont il-piż ta’ iżjed minn 48 % ta’ sulfat taċ-ċesju iżda mhux iżjed minn 52 %	1.1-31.12	160 tunnellata	0 %
09.2874	ex 2924 29 70	87	Paracetamol (INN) (CAS RN 103-90-2)	1.1-31.12	20 000 tunnellata	0 %
09.2878	ex 2933 29 90	85	Enżalutammid INN (CAS RN 915087-33-1)	1.1-31.12	1 000 kg	0 %
09.2880	ex 2933 59 95	39	Ibrutinib (INN) (CAS RN 936563-96-1)	1.1-31.12	5 tunnellata	0 %
09.2886	ex 2934 99 90	51	Kanagliflożin (INN) (CAS RN 928672-86-0)	1.1-31.12	10 tunnellata	0 %
09.2876	ex 3811 29 00	55	Additivi li jikkonsistu fi prodotti tar-reazzjoni ta' difenilammina unoneni ramifikati bi: użati għall-manifattura taż-żjut lubrifikanti (2)	1.1-31.12	900 tunnellata	0 %
09.2888	ex 3824 99 92	89	Taħlita ta’ ammini terzjarji tal-alkildimetil li fiha, skont il-piż:	1.1-31.12	16 000 tunnellata	0 %
09.2866	ex 7019 12 00 ex 7019 12 00	06 26	Stratifils (rovings/fibri) tal-ħġieġ-S: għall-użu fil-manifattura tal-ajrunawtiċi (2)	1.1-31.12	1 000 tunnellata	0 %
09.2906	ex 7609 00 00	20	Fittings tal-aluminju f’għamla ta’ tubu jew pajp maħsuba biex jiġu mwaħħla mar-radjaturi tal-muturi (2)	1.1-31.12	3 000 000 biċċa	0 %
09.2909	ex 8481 80 85	40	Valv tal-egżost maħsub biex jintuża fil-manifattura ta’ sistemi tal-gass tal-egżost tal-muturi (2)	1.1-31.12	1 000 000 biċċa	0 %
09.2910	ex 8708 99 97	75	Brekit ta’ appoġġ tal-ħadid jew tal-azzar, b’toqob tal-immuntar, bi skorfini ta’ twaħħil jew mingħajrhom, maħsuba biex twaħħal il-gerboks mal-karozzerija għall-użu fil-manifattura ta’ oġġetti tal-Kapitolu 87 (2)	1.1-31.12	200 000 biċċa	0 %
09.2932	ex 9027 10 90	20	Sensuri lambda maħsuba biex jiġu inkorporati b’mod permanenti f’sistemi tal-egżost tal-muturi (2)	1.1-31.12	1 000 000 biċċa	0 %’.

(2)	Is-sospensjoni tad-dazji hija soġġetta għal superviżjoni doganali tal-użu finali f’konformità mal-Artikolu 254 tar-Regolament (UE) Nru 952/2013 tal-Parlament Ewropew u tal-Kunsill tad- 9 ta’ Ottubru 2013 li jistabbilixxi l-Kodiċi Doganali tal-Unjoni (ĠU L 269, 10.10.2013, p. 1).

ANNESS II

Fit-tabella tal-Anness tar-Regolament (UE) Nru 1388/2013, ir-ringieli għall-kwoti tariffarji bin-numri tal-ordni 09.2828, 09.2929, 09.2704, 09.2842, 09.2844, 09.2671, 09.2846, 09.2723, 09.2848, 09.2870, 09.2662, 09.2850 u 09.2868 jinbidlu b’dan li ġej:

Nru tal-Ordni	Il-kodiċi tan-NM	TARIC	Deskrizzjoni	Il-perjodu tal-kwota	L-ammont tal-kwota	Il-kwota tad-dazji (%)
‘09.2828	2712 20 90		Xema' bajda (tal-parafina) li fiha anqas minn 0,75 % żejt bil-piż	1.1-31.12	120 000 tunnellata	0 %
09.2929	2903 22 00		Trikloroetilen (CAS RN 79-01-6)	1.1-31.12	15 000 tunnellata	0 %
09.2704	ex 2909 49 80	20	2,2,2',2'- tetrakis(idrossimetil)-3,3'- ossidipropan-1-ol (CAS RN 126-58-9)	1.1-31.12	500 tunnellata	0 %
09.2842	2932 12 00		2-Furaldeide (furfuraldeide)	1.1-31.12	10 000 tunnellata	0 %
09.2844	ex 3824 99 92	71	Taħlitiet li fihom f’piż:	1.1-31.12	6 000 tunnellata	0 %
09.2671	ex 3905 99 90	81	Poli(butiral tal-vinil) (CAS RN 63148-65-2):	1.1-31.12	12 500 tunnellata	0 %
09.2846	ex 3907 40 00	25	Taħlita ta' polimeri ta' polikarbonat u poli(metilmetakrilat) b'kontenut ta' polikarbonat ta' 98,5 % skont il-piż, f'forma ta' gerbub jew bċejjeċ żgħar, bi trażmittanza luminuża ta' mhux anqas minn 88,5 %, imkejla bl-użu ta' kampjun għall-ittestjar ta' ħxuna ta' 4 mm b'tul tal-mewġa ta' λ = 400 nm (skont ISO 13468-2)	1.1-31.12	2 000 tunnellata	0 %
09.2723	ex 3911 90 19	10	Poly(oxy-1,4-phenylenesulfonyl-1,4-phenyleneoxy-4,4’-biphenylene)	1.1-31.12	3 500 tunnellata	0 %
09.2848	ex 5505 10 10	10	Fdal ta’ fibri sintetiċi (li jinkludi fibri li jibqgħu fil-moxt, fdal tal-ħjut u materjal "garnetted") ta’ najlon jew ta’ poliammidi oħra (PA6 u PA66)	1.1-31.12	10 000 tunnellata	0 %
09.2870	ex 7019 40 00 ex 7019 52 00	70 30	Drapp tal-fibra tal-ħġieġ E: għall-użu esklussiv fil-manifattura ta’ prepregs u laminati miksija bir-ram (2)	1.1-31.12.2018	6 000 000 m	0 %
09.2662	ex 7410 21 00	55	Pjanċi:	1.1-31.12	80 000 m²	0 %
09.2850	ex 8414 90 00	70	Rota tal-kompressur ta’ liga tal-aluminju: għall-użu fil-manifattura ta’ magni bil-kombustjoni (2)	1.1-31.12	5 900 000 biċċa	0 %
09.2868	ex 8714 10 90	60	Pistuni għal sistemi ta’ sospensjoni, b’dijametru ta’ mhux aktar minn 55 mm, tal-azzar sinterizzat	1.1-31.12	2 000 000 biċċa	0 %’.

(2)	Is-sospensjoni tad-dazji hija soġġetta għal superviżjoni doganali tal-użu finali f’konformità mal-Artikolu 254 tar-Regolament (UE) Nru 952/2013 tal-Parlament Ewropew u tal-Kunsill tad- 9 ta’ Ottubru 2013 li jistabbilixxi l-Kodiċi Doganali tal-Unjoni (ĠU L 269, 10.10.2013, p. 1).

Top