EUR-Lex Access to European Union law
This document is an excerpt from the EUR-Lex website
Document 52014DC0010
REPORT FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Ex Post evaluation of the 2012 European Capitals of Culture (Guimarães and Maribor)
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Evalwazzjoni ex-post tal-Kapitali Ewropej tal-Kultura għall-2012 (Guimarães u Maribor)
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Evalwazzjoni ex-post tal-Kapitali Ewropej tal-Kultura għall-2012 (Guimarães u Maribor)
/* COM/2014/010 final */
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Evalwazzjoni ex-post tal-Kapitali Ewropej tal-Kultura għall-2012 (Guimarães u Maribor) /* COM/2014/010 final */
RAPPORT TAL-KUMMISSJONI LILL-PARLAMENT
EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U
LILL-KUMITAT TAR-REĠJUNI Evalwazzjoni ex-post tal-Kapitali Ewropej
tal-Kultura għall-2012 (Guimarães u Maribor) 1. Introduzzjoni Dan ir-rapport huwa ppreżentat skont
l-Artikolu 12 tad-Deċiżjoni Nru 1622/2006/KE[1], li jeħtieġ
li l-Kummissjoni tiżgura kull sena l-evalwazzjoni esterna u indipendenti
tar-riżultati tal-avveniment tal-Kapitali Ewropea tal-Kultura tas-sena ta’
qabel, u tħejji rapport dwar dik l-evalwazzjoni lill-istituzzjonijiet
l-oħra tal-UE sa tmiem is-sena ta’ wara. Dan ir-rapport
jippreżenta l-pożizzjoni tal-Kummissjoni dwar
il-konklużjoniijiet u r-rakkomandazzjonijiet ewlenin tal-evalwazzjoni
esterna tal-Kapitali Ewropej tal-Kultura għall-2012[2].
It-test sħiħ tal-evalwazzjoni, li joffri evidenza kwantitattiva u
kwalitattiva dwar id-diversi punti ta’ dan ir-rapport, jista’ jinkiseb minn: http://ec.europa.eu/culture/our-programmes-and-actions/capitals/evaluation-commissioned-by-the-eu_en.htm L-evalwazzjoni
esterna l-ewwel evalwat individwalment iż-żewġ Kapitali Ewropej
tal-Kultura għall-2012 (minn hawn ’il quddiem “ECOC”): Guimarães u Maribor. Wara din l-evalwazzjoni individwali, qabblet
is-sejbiet u tat konklużjonijiet validi kemm għall-ibliet kif ukoll
għall-Azzjoni tal-ECOC. 2. Sfond
għall-azzjoni 2.1. L-azzjoni
tal-UE għall-avveniment tal-Kapitali Ewropej tal-Kultura L-iskema inizjali
tal-“Belt Ewropea tal-Kultura” tnediet fil-livell intergovernattiv fl-1985[3]. Abbażi
ta’ din l-esperjenza, id-Deċiżjoni 1419/1999/KE stabbilixxiet
Azzjoni Komunitarja għall-avveniment ECOC għas-snin 2005 sal-2019[4]. L-Istati
Membri ġew ikklassifikati f’ordni kronoloġiku għad-dritt li
jospitaw l-avveniment kull sena. Il-pajjiżi li ngħataw permess
jospitaw l-avveniment għal sena partikolari kienu mistennija
jippreżentaw l-ibliet u jissottomettu l-applikazzjonijiet tagħhom,
inklużi l-programmi kulturali tagħhom għal dik is-sena lil Bord
Ewropew tal-Għażla li rrakkomanda l-ħatra tagħhom
lill-Kummissjoni. Il-Kunsill tal-Ministri ħatar b’mod formali lill-ECOC. Fl-1 ta’ Jannar 2007,
id-Deċiżjoni 1419/1999/KE ġiet sostitwita
bid-Deċiżjoni 1622/2006/KE li rfinat l-objettivi,
introduċiet kompetizzjoni nazzjonali bbażata fuq żewġ
stadji, u proċess ta’ monitoraġġ għat-titli tal-2013 ’il
quddiem. Id-Deċiżjoni l-ġdida introduċiet laqgħat ta’
monitoraġġ wara l-ħatra, li tispiċċa bil-Bord
jagħmel rakkomandazzjoni dwar l-għoti ta’ premju f’ġieħ
Melina Mercouri lill-Kapitali, sakemm l-ibliet magħżula jkunu
ssodisfaw il-kriterji stipulati fid-Deċiżjoni 1622/2006/KE u
jkunu implimentaw ir-rakkomandazzjonijiet magħmula mill-Bordijiet
konsultattivi u tal-Għażla u l-Monitoraġġ. L-appoġġ finanzjarju tal-UE jingħata
mill-Programm Kulturali tal-UE. Għall-2007-13, iqiegħed
għad-dispożizzjoni massimu ta’ EUR 1.5 miljun kull sena
għall-ECOC. L-ibliet kollha magħżula sat-titlu tal-2010 ġew
sottomessi għall-fażi ta’ monitoraġġ kif iddefinit
fid-Deċiżjoni 1622/2006/KE. 2.2. Bliet
Ewropej tal-Kultura għall-2012 Il-Portugall u s-Slovenja ngħataw
id-dritt li jospitaw l-ECOC fl-2012 abbażi tad-Deċiżjoni
tal-2006, b’dispożizzjonijiet transitorji stabbiliti fl-Artikolu 14
ta’ din id-Deċiżjoni f’dak li għandu x’jaqsam
mal-għażla u l-ħatra. Barra minn hekk,
id-Deċiżjoni tal-2006 tiddikjara b’mod speċifiku li
għat-titli tal-2010, l-2011 u l-2012, id-Deċiżjoni tal-1999
tapplika biss fir-rigward tal-kriterji relatati mal-programmi kulturali, sakemm
l-ibliet ma jagħżlux li jibbażaw il-programmi tagħhom fuq
il-kriterji tad-Deċiżjoni tal-2006. Fir-rigward tal-kofinanzjament u
l-monitoraġġ, il-proċessi l-ġodda stabbiliti
fid-Deċiżjoni tal-2006 japplikaw mit-titli tal-ECOC tal-2010. Id-Deċiżjoni
tal-2006 introduċiet b’mod partikolari mekkaniżmu ta’ finanzjament
tal-UE ġdid għall-ECOC li jieħu l-forma tal-“Premju Melina
Mercouri”, li għandu jingħata lill-ibliet magħżula qabel
il-bidu tas-sena, abbażi tar-rapporti pprovduti mill-Bord konsulattiv u
tal-Monitoraġġ, li r-rwol tiegħu huwa li jipprovdi lill-ibliet
bl-appoġġ u l-gwida mill-jum tal-ħatra tagħhom sakemm tasal
is-sena tat-titlu, sabiex jingħata kas ta u jiġu vvalutati
l-preparazzjonijiet tagħhom u biex jiġi vverifikat li l-impenji
tagħhom huma sodisfatti. Dan il-Premju ngħata għall-ewwel darba
għat-titli tal-2010 u reġa’ ngħata għat-titli tal-2011 u
tal-2012. F’konformità mad-dispożizzjonijiet
transitorji tad-Deċiżjoni 1622/2006/KE, il-Gvern tal-Portugall
fl-2007 iddeċieda li jirrakkomanda lil Guimarães biex tospita t-titlu
tal-ECOC fl-2012 mingħajr ma jorganizza kompetizzjoni nazzjonali. Il-Gvern tas-Slovenja ddeċieda li jorganizza
kompetizzjoni nazzjonali biex jagħżel il-belt ospitanti abbażi
ta’ sejħa miftuħa għall-applikazzjonijiet li saret fl-2006 fejn
ħadu sehem 4 ibliet u abbażi ta’ dan irrakkomanda l-belt ta’
Maribor flimkien ma’ ħamest ibliet imsieħba oħra. Madankollu,
skont l-evalwazzjoni esterna, hemm nuqqas ta’ qbil fost il-partijiet
interessati kkonsultati dwar jekk il-proċess ta’ għażla twettaqx
bl-aktar mod xieraq jew trasparenti. Fir-rapport
tiegħu ta’ Novembru 2008, il-Bord tal-Għażla
rrakkomanda li dawn iż-żewġt ibliet jospitaw l-ECOC fl-2012
filwaqt li jagħmel ir-rakkomandazzjonijiet tiegħu biex jgħin
lill-ibliet jilħqu l-objettivi tagħhom. F’Mejju 2009,
il-Kunsill tal-UE formalment ta titlu tal-ECOC tal-2012 lil Guimarães u
Maribor. Fir-rapport tiegħu ta’ Mejju 2011, il-Bord
konsulattiv u tal-Monitoraġġ irrakkomanda li l-Premju Melina Mercouri
jingħata lil Guimarães u Maribor[5].
3. L-evalwazzjoni esterna 3.1. It-termini tal-evalwazzjoni L-evalwazzjoni kellha l-għan li tivvaluta
r-rilevanza, l-effiċjenza, l-effikaċja u s-sostenibbiltà probabbli u
l-patrimonju ta’ dawn l-ECOC meta mqabbla mal-objettivi tal-Azzjoni u meta mqabbla
ma’ dawk l-objettivi stabbiliti mill-ECOC stess fl-applikazzjonijiet
tagħhom u matul il-fażi ta’ implimentazzjoni. L-evalwazzjoni
tikkunsidra wkoll ir-rilevanza, l-effiċjenza, l-effikaċja u
s-sostenibbiltà tal-azzjoni tal-ECOC kollha kemm hi. 3.2. Metodoloġija L-evalwazzjoni kienet titlob li jintuża l-istess
mudell bħal fl-evalwazzjonijiet tal-2007-11 biex matul iż-żmien
tiġi pprovduta dejta komparabbli. Għadd ta’
kriterji u indikaturi ewlenin, marbuta mal-ġerarkija ta’ objettivi globali
ta’ livell għoli tal-azzjoni u l-objettivi speċifiċi u
operattivi tagħha, kienu osservati u mkejla kull meta kien possibbli. Iż-żewġt ibliet l-ewwel
ġew evalwati individwalment, abbażi tad-dejta primarja miġbura
matul il-fieldwork jew ipprovduta minn kull ECOC, kif ukoll l-analiżi ta’
firxa ta’ sorsi ta’ dejta sekondarji. Is-sorsi ta’ dejta primarja jinkludu
intervisti kwalitattivi mwettqa matul iż-żewġ żjarat f’kull
belt kif ukoll bit-telefown. Dawn l-intervisti fittxew li jiksbu varjetà ta’ perspettivi
dwar kull ECOC, inkluż dawk dwar it-timijiet ta’ ġestjoni, dawk li
jieħdu d-deċiżjonijiet fil-livell lokali u livell nazzjonali,
flimkien ma’ operaturi kulturali ewlenin u firxa ta’ msieħba involuti
fit-twassil tal-ECOC. Barra minn hekk, dawk responsabbli
għall-proġetti tal-ECOC kienu mistiedna jikkontribwixxu
għall-evalwazzjoni permezz ta’ stħarriġ online. Is-sorsi ta’
dejta sekondarji jinkludu informazzjoni fl-applikazzjonijiet oriġinali
tal-ECOC; studji u rapporti kkummissjonati mill-ECOC; programmi ta’
avvenimenti, materjali promozzjonali u websajts; dejta statistika dwar
il-kultura u t-turiżmu; u dejta kwantitattiva fornuta mill-ECOC dwar
il-finanzjament, l-attivitajiet, l-eżiti u r-riżultati. Sussegwentement reviżjoni
komparattiva kkunsidrat il-konkużjonijiet li ħarġu minn
Guimarães u Maribor, fejn tqabblu l-approċċi kontrastanti, kif ukoll
ġew identifikati t-temi u s-sejbiet ewlenin għall-azzjoni tal-ECOC
kollha kemm hi. 4. Is-sejbiet tal-evalwatur 4.1. Ir-rilevanza
tal-azzjoni tal-ECOC L-evalwazzjoni tikkunsidra li l-azzjoni tal-ECOC tibqa’ ta’
importanza kbira u ta’ rilevanza sinifikanti għat-Trattat dwar
il-funzjonament tal-Unjoni Ewropea, b’mod partikolari l-Artikolu 167,
billi tikkontribwixxi għall-affjorixxament tal-kulturi tal-Istati Membri, tenfasizza
l-wirt kulturali komuni kif ukoll id-diversità kulturali u żżid
il-kooperazzjoni kulturali bejn l-Istati Membri u fil-livell internazzjonali. L-azzjoni tal-ECOC tibqa’ kumplimentari
għall-inizjattivi kulturali l-oħrajn tal-UE, speċjalment
il-Programm Kulturali għall-2007-2013 u l-Programm MEDIA (u
s-suċċessur tagħhom taħt il-Programm propost Ewropa
Kreattiva). Fuq kollox, tikkontribwixxi wkoll għall-ilħuq
tal-objettivi stabbiliti fl-Aġenda Ewropea għall-Kultura permezz
tal-promozzjoni tad-diversità kulturali, l-iżvilupp ta’ rabtiet kulturali
internazzjonali u li jingħata aktar importanza lir-rwol tal-kultura
fl-iżvilupp għal żmien twil tal-ibliet Ewropej. Barra minn hekk,
l-azzjoni tal-ECOC tikkumplimenta programmi Ewropej oħrajn speċjalment
f’oqsma bħaż-żgħażagħ, iċ-ċittadinanza,
l-edukazzjoni u t-taħriġ u l-iżvilupp reġjonali. 4.2. Ir-rilevanza
tal-ECOC tal-2012 L-evalwazzjoni tikkunsidra l-motivazzjoni tal-ibliet meta
jipproponu li jsiru ECOC u r-rilevanza tal-objettivi tagħhom fir-rigward
tal-objettivi tal-azzjoni u tal-Artikolu 167. Studjat
ukoll il-proċess li permezz tiegħu, il-motivazzjoni tal-ECOC tal-2012
ġiet ikkonvertita f’sett ta’ objettivi u l-bidliet f’dawk l-objettivi
matul il-fażi ta’ żvilupp. L-evalwazzjoni tqis li
ż-żewġ ECOC tal-2012 iħaddnu l-objettivi tal-azzjoni u
adattawhom skont il-kuntesti u l-prijoritajiet partikolari tagħhom stess.
L-objettivi u l-attivitajiet implimentati miż-żewġ ECOC kienu
rilevanti għall-objettivi ewlenin fil-livell tal-UE. Iż-żewġ
ECOC ippjanaw programmi kulturali u attivitajiet assoċjati differenti
(eż. komunikazzjoni, volontarjat, eċċ) rilevanti
għall-objettivi fil-livell tal-UE bħat-trawwim tal-kooperazzjoni bejn l-operaturi kulturali, il-promozzjoni tad-diversità
tal-kulturi Ewropej u l-enfasizzar tal-karatteristiċi komuni li
jikkondividu, it-trawwim tal-kontribuzzjoni tal-kultura
għall-iżvilupp għal żmien twil tal-ibliet,
l-appoġġ tal-iżvilupp soċjali u ekonomiku tal-ibliet,
it-trawwim tal-parteċipazzjoni taċ-ċittadini,
it-tisħiħ tal-firxa, id-diversità u d-dimensjoni Ewropea tal-offerta
kulturali fl-ibliet, it-twessigħ tal-aċċess għall-kultura u
l-parteċipazzjoni fiha, it-tisħiħ tal-kapaċità tas-settur
kulturali u t-titjib tal-profil internazzjonali tal-ibliet. 4.3. Effiċjenza
tal-governanza u l-ġestjoni tal-kapaċità ta’ twassil L-evalwazzjoni kkunsidrat il-kapaċità ta’
twassil u l-effiċjenza tal-governanza u l-ġestjoni tal-ECOC,
inkluż il-mudelli organizzattivi tagħhom, il-proċessi
għall-għażla u l-implimentazzjoni tal-attivitajiet u
l-avvenimenti kulturali, il-komunikazzjoni u l-promozzjonijiet, u
l-proċessi biex jinkiseb finanzjament. B’mod simili
għall-evalwazzjoni tal-ECOC tal-2007 sal-2011, l-evalwazzjoni tal-ECOC
tal-2012 tenfasizza li huwa essenzjali iżda li jista’ jkun ta’ sfida li
tiġi stabbilita struttura organizzattiva xierqa u jinbena tim
bil-ħiliet xierqa biex jiġi implimentat il-programm kulturali. Din
teħtieġ sett usa’ ta’ ħiliet u b’hekk struttura differenti
mit-tim li jkun ipprepara l-applikazzjoni oriġinali. Hemm ukoll
ħtieġa li jiġu bbilanċjati l-interessi artistiċi u
politiċi u li jiġi żgurat li kwalunkwe mekkaniżmu ta’
twassil jiġi milqugħ mill-partijiet interessati eżistenti
bħala msieħeb kooperattiv. Ġeneralment hija rrakkomandata struttura
ġdida u indipendenti, waħda li hija adattata għall-kuntest
politiku u kulturali tal-belt. Il-Fondazzjoni Guimarães
City kienet stabbilita minn organizzazzjoni ġdida mill-Ministru
tal-Kultura u l-Kunsill Muniċipali ta’ Guimarães fl-2009. Il-governanza u
l-ġestjoni tal-ECOC kienet ikkondiviża; il-Fondazzjoni kienet
responsabbli għall-iżvilupp tal-viżjoni, il-komunikazzjoni u
l-ġestjoni ġenerali, filwaqt li organizzazzjoni diġà
eżistenti, A Oficina kienet responsabbli għall-implimentazzjoni
tal-programm kulturali nnifsu. Barra minn hekk, parti minnhom mill-programm,
Intersecting Times, kienet ġestita u prodotta b’mod indipendenti minn
konsorzju ta’ assoċjazzjonijiet lokali. L-evalwaturi jinnotaw li minkejja
li kien hemm xi diffikultajiet matul il-fażi ta’ żvilupp,
l-istrutturi ta’ ġestjoni u governanza ħadmu relatattivament tajjeb
matul is-sena tat-titlu. Jidher li l-viżjoni ġenerali, l-objettivi u
l-prinċipji ta’ programmazzjoni għal Guimarães 2012 ma nbidlux b’mod
sinifikanti bejn il-fażi ta’ applikazzjoni u l-implimentazzjoni tas-sena
tat-titlu. L-appoġġ politiku b’saħħtu li rċeviet
Guimarães 2012 mill-amministrazzjoni tal-belt ikkontribwixxa wkoll b’mod
sinifikanti għas-suċċess tagħha. Dan kien rifless fl-impenn
għall-proġetti tal-infrastruttura kulturali, l-appoġġ u
l-kooperazzjoni mill-qrib għat-tim ta’ ġestjoni u l-appoġġ
sinifikanti għat-twassil tal-proġetti kulturali. L-ECOC kien
ikkunsidrat bħala proġett strateġiku mill-amministrazzjoni
tal-belt u sar sforz sinifikanti għall-implimentazzjoni
b’suċċess tiegħu. F’Maribor, in-nuqqas ta’
sħubija formali jew governanza lokali b’saħħitha (fil-kuntest
ta’ diversi bidliet fil-Gvern) ħoloq sitwazzjoni problematika matul
il-fażijiet kollha ta’ żvilupp u implimentazzjoni. Il-fażi ta’
żvilupp kienet ġestita minn segretarjat provviżorju mwaqqaf
mill-muniċipalità. Ladarba l-infrastruttura tat-twassil finali kienet
fis-seħħ, fi żmien pjuttost qasir ġie rreklutat tim li,
skont l-evalwaturi, kellu jaħdem mill-bidu nett. L-evalwazzjoni tenfasizza
għadd ta’ fatturi ta’ suċċess fl-approċċ
tal-aġenzija tat-twassil għall-implimentazzjoni, inkluż
l-iżvilupp ta’ kunċett ġdid u koerenti għall-programm,
il-konsultazzjoni estensiva mal-imsieħba, l-operaturi u l-artisti,
iżda anki l-mod li bih il-Bord u l-maniġment ġenerali appoġġjaw
il-persunal u setgħu jipproteġu l-awtonomija tagħhom
mill-interferenza esterna. L-ECOC jibnu gradwalment l-appoġġ
miċ-ċittadini, l-imsieħba fil-midja u partijiet oħra
interessati. Madankollu, ħafna mit-titjib ippjanat fl-infrastruttura ma
seħħx, u dan illimita b’mod qawwi l-firxa ta’ postijiet u xi drabi kien
ifisser li l-attivitajiet ippjanati ma setgħux jiġu implimentanti.
F’ċerti punti kien hemm periklu reali li l-proġett sħiħ
ikun mhedded mill-kunflitti fuq l-istrutturi istituzzjonali, l-impenji ta’
finanzjament u l-problemi fl-infrastruttura. L-esperjenza tal-2012,
bħall-evalwazzjonijiet preċedenti, tenfasizza l-isfidi sinifikanti li
jinħolqu mill-governanza u l-ġestjoni tal-ECOC u r-rwol
tal-influwenzi politiċi, l-inċertezza organizzata u l-fatturat
tal-persunal. Dan probabbilment huwa inevitabbli minħabba
n-natura u l-iskeda ta’ żmien tal-ECOC, iżda l-2012 enfasizzat ukoll
l-importanza tal-belt u awtoritajiet oħra li jipprovdu appoġġ
konsistenti u li juru sostenn u impenn b’saħħtu biex b’hekk kwalunkwe
diffikultà tkun tista’ tiġi identifikata malajr u indirizzata. Fil-livell Ewropew, l-azzjoni tal-ECOC baqgħet
kosteffiċjenti ħafna meta mqabbla ma’ strumenti u mekkaniżmi
politiċi oħra tal-UE, fid-dawl tal-finanzjament baxx ħafna
tal-UE li huwa disponibbli mill-Premju Melina Mercouri. Minkejja li l-Premju jirrappreżenta proporzjon relattivament baxx
mill-baġits globali tal-ECOC għaż-żewġt ibliet,
l-isfidi finanzjarji li jiltaqgħu magħhom kull waħda minnhom
kien ifisser li kien apprezzat ħafna f’kull każ. Barra minn hekk,
il-Premju għandu valur simboliku b’saħħtu u jirrikonoxxi
l-progress li sar mill-ibliet matul il-fażi ta’ żvilupp. 4.4. L-effikaċja
fl-iżvilupp tal-attivitajiet kulturali u l-kontenut kulturali u artistiku L-evalwazzjoni tikkunsidra li l-ECOC tal-2012 kienu ta’
suċċess kemm fl-implimentazzjoni tal-programmi kulturali li kienu
aktar estensivi, innovattivi u internazzjonali (eż. f’termini ta’ temi,
artisti u udjenzi) milli l-offerta kulturali tas-soltu f’kull belt. Esploraw temi ġodda, enfasizzaw r-rikkezza u
d-diversità ta’ kull offerta kulturali li għamlu, postijiet ġodda jew
mhux tas-soltu użati u laħqu ċ-ċittadini. Maribor 2012 implimentat programm kulturali estensiv u
innovattiv, inkluż attivitajiet kompletament ġodda b’enfażi
b’saħħitha fuq il-forom ta’ espressjoni kreattiva u ħidma
interdixxplinarja kif ukoll approċċ kollaborattiv,
parteċipatorju ħafna li jlaqqa’ flimkien l-operaturi internazzjonali
mal-organizzazzjonijiet, l-artisti u ċ-ċittadini lokali. Ħafna mill-attivitajiet inbnew
madwar koproduzzjonijiet u kollaborazzjonijiet. L-użu b’suċċess
ta’ Maribor 2012 tal-koproduzzjonijiet kien inparti konsegwenza tan-nuqqas ta’
riżorsi u ħin disponibbli biex jiġi żviluppat programm
kulturali komprensiv internament. Madankollu, irnexxielhom jiżnu
r-riżorsi u l-għarfien espert tal-imsieħba esterni
(pereżempju l-Ambaxxati Kulturali li jinvolvu 80 organizzazzjoni minn
31 pajjiż), filwaqt li jiżguraw li l-attivitajiet implimentanti
kienu konsisteni mal-objettivi tagħhom u tal-livell tal-UE
għall-ECOC. Il-programm finali kienet
riorganizzazzjoni aktar koerenti u strutturata tal-kunċett oriġinali.
Jinkludi, fil-qosor, mijiet ta’ proġetti u udjenza totali stmata ta’
3.1 miljun fl-2012 (u 4.5 miljun b’mod globali). Dan jirrappreżenta
żieda sinifikanti kemm fl-iskala u t-tip ta’ attivitajiet li huma
ġeneralment disponibbli għaċ-ċittadini ta’ Maribor. Skont
l-evalwazzjoni, ħafna mill-partijiet interessati kkummentaw li l-programm
jinkludi bilanċ sodisfaċenti bejn il-kultura ta’ livell għoli u
dik popolari, inkluż numru suffiċjenti ta’ avvenimenti
“prestiġġjużi”, iżda anki fokus b’saħħtu fuq
approċċi parteċipatorji u kontenut innovattiv, inkluż
attivitajiet li kienu jikkombinaw dixxiplini artistiċi u
approċċi sperimintali, inkluż l-użu ta’ midja ġdida. Guimarães offriet programm kulturali li jinkorpora diversi
attivitajiet kulturali ġodda jew innovattivi. L-evalwazzjoni
tikkunsidra li kienet ta’ suċċess fl-involviment tar-residenti
tal-ibliet, hekk kif ġibdet viżitaturi nazzjonali u internazzjonali
kif ukoll żiedet l-offerta ta esperjenzi kulturali fil-belt. Il-fokus
tal-programm kulturali kien fuq il-kreattività artistika f’Guimarães. Sa
mill-bidu nett, il-partijiet ewlenin interessati involuti ma ridux
sempliċement joħolqu programm ta’ festivals fejn jistiednu l-aqwa
proġetti maħluqa x’imkien ieħor, iżda ddeċidew li
jiffukaw fuq it-tisħiħ tal-kreattività artistika f’Guimarães innifsu
u jikkontribwixxu għall-iżvilupp tal-kapaċità u l-potenzjal
artistiku u kreattiv fil-belt. Il-programm ta’ Guimarães kien jinkludi fil-qosor, mijiet
ta’ avvenimenti li jinvolvu 25 000 artista u professjonista. 15 000 ċittadin u 300 organizzazzjoni
kkontribwixxew għall-avvenimenti kulturali. Il-programm kien jgħodd
1 000 kreazzjoni ġdida u kien jinkludi 700 residenza ta’
artisti. Ġew prodotti 40 film u kien hemm 60 pubblikazzjoni
ġdida u 100 wirja għall-ewwel darba. Il-programm kellu l-għan li
jesplora l-belt permezz tal-interpretazzjonijiet artistiċi tal-aspetti
differenti tal-passat u l-present tagħha. Pereżempju, il-programm
ċinematiku kien iddisinjat biex jerġa’ jiskopri l-wirt
awdjoviżiv tal-belt u l-programm tal-Arti u l-Arkitettura indirizza
l-identità u l-istorja lokali, speċjalment b’rabta mal-wirt industrijali
b’dimensjonijiet soċjali, ekonomiċi u kulturali.
4.5. Effikaċja
fil-promozzjoni tad-dimensjoni Ewropea Skont l-evalwazzjoni, id-dimensjoni Ewropea
tal-programm kulturali fiż-żewġ ECOC tal-2012 kienet l-aktar
relatata mal-isforzi biex tiġi appoġġjata l-kooperazzjoni
kulturali transnazzjonali u biex jiġi appoġġjat xi parti
mill-internazzjonaliżmu tas-setturi kulturali tal-ibliet. Filwaqt li t-temi Ewropej kienu preżenti
fiż-żewġt ibliet, dawn kellhom it-tendenza li jkunu relatati
mal-linji speċifiċi jew proġetti individwali aktar milli
jagħmlu parti mill-programm kulturali kollu. Filwaqt li kien ikun
evidentement mhux realistiku li wieħed jistenna li t-titlu tal-ECOC
jindika Guimarães u Maribor bħala destinazzjonijiet kulturali Ewropej
ewlenin (tal-anqas mhux wara s-sena tat-titlu), in-nuqqas ta’ promozzjoni
internazzjonali intensiva tirrappreżenta opportunità mhux sfruttata
fiż-żewġt ibliet jekk is-sena ECOC kellha impatt pożittiv
fuq il-perċezzjoni wiesa’ taż-żewġt ibliet u l-promozzjoni
tat-turiżmu. Jidher li 39 % taż-żjarat lejn Maribor u
l-ibliet imsieħba fl-2012 kienu unikament dovuti għall-ECOC. Kien
hemm żieda ta’ 120 % fil-viżitaturi lejn l-uffiċċji
ta’ informazzjoni għat-turisti u aktar minn 25 % tal-viżitaturi
allegatament indikaw li l-ECOC kienet waħda mir-raġunijiet
għaliex żaru l-belt. Finalment, kien hemm kooperazzjoni anqas
estensiva bejn iż-żewġ ECOC milli wieħed kien jittama,
minkejja li hemm potenzjal limitat biex jiġu estiżi r-rabtiet
f’każijiet bħal dan fejn id-distanzi huma kbar jew ma hemm l-ebda
rabta storika jew kulturali. 4.6. Effikaċja fl-involviment
taċ-ċittadini u fil-komunikazzjoni L-evalwazzjoni tinnota li wieħed mill-fatturi ta’
suċċess ewlenin għaż-żewġt ibliet kien
l-involviment taċ-ċittadini. Guimarães 2012 irċieva
appoġġ, enerġija u involviment attiv sinifikanti mir-residenti
tal-belt, li raw is-sena tat-titlu bħala waħda mill-miri ewlenin biex
jagħtu ħajja ġdida lill-belt tagħhom, isaħħu
r-rwol tagħhom fuq il-livell nazzjonali kif ukoll iżidu l-viżibbiltà
internazzjonali tagħhom. F’dan il-każ,
l-istil ta’ komunikazzjoni u l-logo kienu fatturi ta suċċess ewlenin.
Anki Maribor eventwalment laħqet livelli għoljin ta’ għarfien,
parteċipazzjoni u involviment u gradwalment bniet l-appoġġ
miċ-ċittadini, l-imsieħba fil-midja u partijiet interessati
oħrajn, biex tegħleb il-pubbliċità negattiva bikrija u
x-xettiċiżmu mifrux. Barra minn hekk, il-programm tagħha inkluda
firxa ta’ attivitajiet li jesploraw ir-rabtiet bejn il-kultura, il-kreattività
u oqsma oħra, pereżempju fil-ħidma tal-Università ta’ Maribor li
rabtet ir-riċerka f’fakultajiet differenti tal-universitajiet mal-arti u
l-kultura. 4.7. L-effikaċja fil-kisba
ta’ impatti relatati mal-għanijiet ekonomiċi, turistiċi u ta’
żvilupp urban Kien ta’ importanza kbira għal Guimarães li tinvesti
fil-kapaċità tal-belt biex tikkontribwixxi għall-iżvilupp
ekonomiku u soċjali. L-ewwel nett, l-investiment
fl-infrastruttura kellu l-għan li jżid il-kapaċità tal-belt.
It-tieni nett, il-programm iffoka iż-żieda tal-kapaċità
tas-settur kulturali lokali. It-tielet nett, parti sinifikanti mill-programm
kulturali kien iddedikat għall-iżvilupp tal-udjenza, l-involviment
tal-komunità, u t-twassil ta' esperjenzi kulturali differenti
għaċ-ċittadini. L-evidenza mill-evalwazzjoni tindika li l-ECOC
kellha effett fuq l-iżvilupp tan-negozju fil-belt, speċjalment
b’rabta mas-settur tas-servizzi fiċ-ċentru tal-belt.
L-appoġġ politiku b’saħħtu li rċeviet Guimarães 2012
mill-amministrazzjoni tal-belt, li ra l-ECOC bħala proġett
strateġiku, kien evidentement riżorsa f’dan ir-rigward. B’mod partikolari,
l-esperjenza ta’ Guimarães fl-2012 turi l-potenzjal li l-ECOC
jissaħħaħ permezz tal-investimenti li jsiru mill-FEŻR, u li
jżid il-valuri ta' dawn l-istess investimenti. Diversi ECOC
preċedenti użaw il-finanzjament tal-FEŻR
għall-iżviluppi fl-infrastruttura, iżda fil-każ ta’
Guimarães 2012 madwar 70% mill-finanzjament totali ġie mill-FEŻR. F’Maribor, l-applikazzjoni
oriġinali tat enfażi kbira lill-użu tal-ECOC biex jiġi
appoġġjat l-iżvilupp urban, soċjali u ekonomiku u biex
tintuża l-kultura biex tingħata spinta ġdida lill-belt, tinbena
fiduċja ġdida fost ir-residenti u jinħolqu kundizzjonijiet
ġodda biex jiġi xprunat żvilupp soċjali u ekonomiku usa’.
Minkejja li l-biċċa l-kbira tal-proġetti tal-infrastruttura ma
tkomplewx, il-belt żammet l-aspirazzjoni li s-sena tal-ECOC tintuża
bħala mezz biex jiġi appoġġjat l-iżvilupp urban u
reġjonali. Dan irriżulta fl-iżvilupp ta’ firxa ta’ attivitajiet
differenti li għandhom l-għan li jagħtu ħajja ġdida
liċ-ċentri permezz tal-kultura. Bosta mill-ibliet imsieħba kienu
tassew pożittivi fl-involviment tagħhom fis-sena tal-ECOC. Huwa
evidenti li din ħalliet impatt pożittiv ewlieni għall-ibliet
ż-żgħar, li xi wħud minnhom ġibdu numru kbir ta’
viżitaturi u żviluppaw fiduċja fl-assi kulturali tagħhom u
ideat għal tipi ġodda ta’ żvilupp kulturali u turistiku. L-evalwazzjoni tinnota li
ż-żewġt ibliet setgħu jinnotaw żidiet fin-numru ta’
viżitaturi, u dan ikkontribwixxa b’mod sinifikanti għall-attività
ekonomika lokali. 4.8. Is-sostenibbiltà L-ECOC hija f’konformità mad-Deċiżjoni
tal-2006 maħsuba li tkun “sostenibbli u ... parti integrali
mill-iżvilupp kulturali u soċjali tal-belt fuq medda twila ta’
żmien”. L-evalwazzjoni tikkunsidra li
fiż-żewġ ECOC tal-2012, hemm evidenza ta’ attivitajiet kulturali
ġodda li ser ikomplu lil hinn mis-sena tat-titlu u faċilitajiet
kulturali ġodda mġedda. F’termini ta’ kapaċità sostnuta
għall-kultura, hemm esperjenza u għarfien espert kbir bħala
riżultat tal-ECOC, kif ukoll netwerking u kooperazzjoni aħjar fi
ħdan is-setturi kulturali. Fiż-żewġt
ibliet, l-operaturi kulturali kisbu ħiliet u esperjenza siewja u x’aktarx
li jkun hemm effetti moderati f’termini ta’ tisħiħ tal-offerta
kulturali tal-ibliet. Madankollu mhuwiex probabbli li jkun hemm impatti
kontinwi fuq il-governanza kulturali, u dan isaħħaħ
il-ħtieġa għal strateġija għal żmien twil li
għandha tiġi inkorporata fil-proċessi ta’ għażla u
monitoraġġ. Fiż-żewġ
każijiet is-sostenibbiltà ma tantx tidher li ser tkun assigurata,
speċjalment fid-dawl tal-inċertezza tas-sitwazzjoni ekonomika. F’Maribor,
is-sitwazzjoni politika tibqa’ waħda instabbli, il-perspettiva ekonomika
ser tibqa’ negattiva, u n-nuqqas ta’ ppjanar fit-tul jew in-nuqqas ta’ korp
patrimonjali (wara Ġunju 2013), flimkien ma’ baġits kulturali
mnaqqsa, ifissru li ser ikun diffiċli li tinżamm iż-żieda
reċenti fl-attivitajiet kulturali jew fil-livelli miżjuda ta’
involviment tal-pubbliku fil-kultura. Guimarães ma għandha
fis-seħħ l-ebda strateġija għall-kultura fit-tul, u
l-Fondazzjoni tal-Belt li mmaniġġjat l-ECOC ser titneħħa fi
tmiem l-2013. Madankollu, qegħdin isiru negozjati bejn l-awtorità lokali,
il-Gvern nazzjonali u l-università dwar it-twaqqif ta’ qafas kooperattiv biex
tiġi żgurata s-sostenibbiltà tal-istrutturi ta’ governanza. Huwa
probabbli wkoll li l-awtorità lokali ser tkun tista’ tiżgura
l-kontinwazzjoni ta’ ċerti attivitajiet ewlenin. 5. Rakkomandazzjonijiet
ewlenin tal-evalwazzjoni esterna u konklużjonijiet mill-Kummissjoni Ir-rakkomandazzjonijiet huma bbażati fuq il-kunsiderazzjonijiet
tal-evalwaturi tal-ECOC tal-2012 iżda għandhom x’jaqsmu
mal-implimentazzjoni tal-azzjoni tal-ECOC kollha kemm hi. L-evalwaturi jinnotaw ukoll li numru ta’
rakkomandazzjonijiet mill-evalwazzjonijiet ta’ ECOC preċedenti
għadhom validi u rilevanti. Ir-rakkomandazzjonijiet jinkludu l-kontinwazzjoni
tal-azzjoni tal-ECOC bħala inizjattiva simbolika u ta’ profil għoli
tal-UE, il-ħtieġa ta’ proċeduri ta’ għażla trasparenti
fil-livelli nazzjonali, it-tisħiħ tal-miżuri ta’
monitoraġġ li għandhom l-għan li jipprovdu appoġġ
u gwida għall-ibliet minn stadju bikri bħala mod biex jiġi
żgurat aħjar il-progress regolari fil-fażi ta’ żvilupp,
rekwiżit imsaħħaħ għal kull ECOC biex jiżdiedu
r-rabtiet mal-ECOC l-oħrajn tal-istess sena, l-enfażi miżjuda
dwar il-ħtieġa għall-ECOC li jistabbilixxi l-arranġamenti
istituzzjonali fi żmien xieraq u li jiżviluppa strutturi patrimonjali
aktar konkreti u l-introduzzjoni ta’ proċeduri ta’ evalwazzjoni aktar
konsistenti mill-ibliet stess. Il-konklużjonijiet tal-evalwazzjoni
jikkonfermaw li t-titlu tal-ECOC jibqa’ wieħed b’valur għoli,
jiġġenera programmi kulturali estensivi u impatti sinifikanti.
It-titlu tal-UE u l-kontribut finanzjarju għandhom effett ta’
ingranaġġ sinifikanti, u b’hekk jagħmluh inizjattiva
kosteffikaċi u effiċjenti. Il-Kummissjoni tikkondividi l-valutazzjonijiet u l-konklużjonijiet
globali tal-evalwazzjoni u taċċetta r-rakkomandazzjonijiet
tagħha. Ir-rakkomandazzjonijiet ta’ din l-evalwazzjoni
fil-biċċa l-kbira tagħhom huma f’konformità mal-Proposta
tal-Kummissjoni għal Deċiżjoni tal-Parlament Ewropew u
tal-Kunsill li tistabbilixxi azzjoni tal-Unjoni għall-Kapitali Ewropej
tal-Kultura għas-snin 2020 sal-2033[6]. Filwaqt
li tibni fuq il-punti pożittivi tal-iskema attwali li b’mod globali
qiegħda taħdem tajjeb, il-proposta żżomm
il-karatteristiċi ewlenin u l-istruttura ġenerali. Minkejja dan, huwa propost titjib sostanzjali filwaqt li
jitqiesu r-rakkomandazzjonijiet
mill-evalwazzjonijiet esterni tal-2012 u l-ECOC preċedenti, u
kunsiderazzjonijiet oħra: –
It-tisħiħ tal-kundizzjonalità
għall-pagament tal-Premju Melina Mercouri, irrakkomandat ukoll
fl-evalwazzjoni tal-ECOC tal-2011, li għandu x’jaqsam mal-Premju
għall-progress tal-ibliet fit-twettiq tal-impenji li saru fil-fażi
ta’ applikazzjoni - bi kriterji aktar ċari u aktar b’saħħithom
li jiffurmaw ir-raġunijiet li abbażi tagħhom il-Kummissjoni
tista’ tirrifjuta l-pagament - u tipposponi l-pagament sas-sena tat-titlu biex
b’hekk il-Kummissjoni tkun tista’ tieħu d-deċiżjoni tagħha
fuq bażi aktar solida u infurmata; –
L-introduzzjoni ta’ sett ta’ kriterji ta’ għażla
aktar espliċiti u komprensivi bil-għan li tiżdied it-trasparenza
u l-ġustizzja tal-proċedura, inkluż b’rabta mal-kontribuzzjoni
tal-ECOC għall-istrateġija għal żmien twil tal-belt,
il-ħtieġa ta’ appoġġ politiku wiesa’, il-governanza jew
il-fattibbiltà tal-istrateġija ta’ finanzjament; –
L-inkoraġġiment
għaż-żewġ ECOC tal-istess sena biex ifittxu li
jiżviluppaw rabtiet u proġetti komuni bħala parti mill-programmi
kulturali tagħhom peress li ż-żieda ta’ relazzjonijiet ta’
ħidma ġodda ma’ dawk diġà eżistenti tista’ tkun ta’
benefiċċju għalihom ukoll - kif intqal b’mod tajjeb fir-rapport
- dan xi drabi jista’ jkun ta’ sfida meta ż-żewġt ibliet ikunu
ġeografikament imbiegħda jew ikollhom biss ftit rabtiet kulturali u storiċi; –
L-inkoraġġiment għall-ECOC
biex jagħmlu riċerka u studji dwar ir-riżultati u l-impatti
tas-sena tat-titlu, li jfisser li l-ibliet huma obbligati jwettqu evalwazzjoni
biex ikejlu aħjar l-ilħuq tal-objettivi tagħhom. Barra minn hekk, il-proposta tal-Kummissjoni
għandha l-intenzjoni li ttejjeb l-iskema billi tintroduċi objettiv
ġenerali relatat mal-kontribuzzjoni tal-kultura għall-iżvilupp
għal żmien twil tal-ibliet, billi żżid it-tielet
laqgħa ta’ monitoraġġ formali qabel is-sena tat-titlu u
tenfasizza l-ħtieġa għall-ibliet kandidati li jkollhom
strateġija kulturali fis-seħħ meta ssir l-applikazzjoni. [1] ĠU L
304, 3.11. 2006. [2] Evalwazzjoni
ex-post tal-Kapitali Ewropej tal-Kultura għall-2012, ir-Rapport Finali
għall-Kummissjoni Ewropea, fdat fl-2012 mill-Kummissjoni lil ECORYS UK Ltd taħt
il-kuntratt qafas ta’ servizzi Nru EAC/50/2009 dwar l-evalwazzjoni,
is-servizzi relatati mal-evalwazzjoni u l-appoġġ
għall-valutazzjoni tal-impatt. [3] Ir-Riżoluzzjoni
tal-Ministri responsabbli għall-Affarijiet Kulturali dwar
l-organizzazzjoni annwali tal-”Belt Ewropea tal-Kultura” tat-13.6.1985; http://eur-lex.europa.eu/LexUriServ/LexUriServ.do?uri=OJ:C:1985:153:0002:0003:EN:PDF [4] ĠU L 166, 1.7.1999. Deċiżjoni emendata
bid-Deċiżjoni 649/2005/KE (ĠU L 117, 4.5.2005). [5] Ara
r-rapporti tal-Bordijiet konsultattivi u tal-Għażla u
l-Monitoraġġ minn
http://ec.europa.eu/culture/our-programmes-and-actions/capitals/past-capitals_en.htm [6] COM(2012) 407 finali.