EUR-Lex Access to European Union law
This document is an excerpt from the EUR-Lex website
Document 52013DC0918
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS A Clean Air Programme for Europe
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Programm għall-Arja Nadifa għall-Ewropa
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Programm għall-Arja Nadifa għall-Ewropa
/* COM/2013/0918 final */
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Programm għall-Arja Nadifa għall-Ewropa /* COM/2013/0918 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI Programm għall-Arja Nadifa
għall-Ewropa (Test b'rilevanza
għaż-ŻEE) 1. Introduzzjoni Il-kwalità tal-arja fl-Ewropa tjiebet b’mod
sinifikanti f’dawn l-aħħar għexieren ta’ snin, iżda
t-tniġġis tal-arja għadu l-fattur ambjentali prinċipali
marbut mal-mard prevenibbli u mal-imwiet prematuri fl-UE u għad
għandu effetti negattivi sinifikanti fuq l-ambjent naturali tal-Ewropa.
Skont l-OECD, “It-tniġġis tal-arja urbana aktarx li se jkun
il-kawża ambjentali ewlenija tal-imwiet madwar id-dinja sal-2050, qabel
l-ilma maħmuġ u n-nuqqas ta’ sanità”.[1] Filwaqt li l-istandards tal-kwalità tal-arja
tal-UE għadhom mhumiex fl-istess livell bħal dawk ta' pajjiżi
żviluppati oħra, il-konformità ma’ xi wħud minn dawn
l-istandards kienet sfida għal għadd ta’ raġunijiet. Din
l-Istrateġija ġdida tindirizza r-raġunijiet għan-nuqqas
mifrux ta' konformità. L-Istrateġija tipproponi wkoll
leġiżlazzjoni għat-tnaqqis, fuq medda twila ta' żmien,
tal-emissjonijiet ta' ħsara li jikkontribwixxu għall-kwalità
ħażina tal-arja u li huma ta' dannu għall-ambjent naturali.
Barra minn hekk, se tippromwovi miżuri li jtaffu wkoll it-tisħin
atmosferiku u t-tibdil fil-klima. L-iskedi taż-żmien
għat-tnaqqis tal-emissjonijiet huma konsistenti b'mod sħiħ
mal-qafas ġdid għall-2030 għall-politika dwar il-klima u
l-enerġija li se jippermetti lill-investituri li jimmassimizzaw
is-sinerġiji tal-investimenti tagħhom. Kwalità aħjar tal-arja toffri wkoll
opportunitajiet ekonomiċi fosthom għall-oqsma tat-teknoloġija
nadifa tal-UE. Kumpaniji
ewlenin tal-inġinerija fl-UE diġà jaqilgħu sa 40 %
tad-dħul mill-portafolji ambjentali tagħhom, u dan huwa mistenni li
jiżdied. Jeżistu
sinjali ċari li ekonomiji emerġenti qegħdin jiffukaw bis-serjetà
fuq it-tniġġis tal-arja u politika Ewropea intelliġenti se
tkompli tagħti vantaġġ lill-industrija tagħna f’dawn
is-swieq ewlenin li qed jiżviluppaw. Il-miżuri f'din l-istrateġija
l-ġdida jibnu fuq dawk ippreżentati fl-Istrateġija Tematika dwar
it-Tniġġis tal-Arja tal-2005[2]
u se jwasslu għal iktar progress lejn l-għanijiet fuq terminu twil
tas-6 u s-7 Programmi ta' Azzjoni Ambjentali[3].
L-istrateġija hija akkumpanjata minn proposta leġiżlattiva
għal Direttiva dwar il-Livelli Nazzjonali Massimi tal-Emissjonijiet
riveduta[4],
u proposta għal Direttiva li, għall-ewwel darba, se tikkontrolla
l-emissjonijiet minn Impjanti tal-Kombustjoni ta’ daqs Medju u tikkontribwixxi
b’mod sinifikanti għall-ksib tat-tnaqqis meħtieġ
tal-emissjonijiet. L-istrateġija tinkludi wkoll miżuri mhux
regolatorji ta' appoġġ biex jissaħħu l-kapaċità u
l-kooperazzjoni fil-livelli politiċi kollha, b’oqsma prijoritarji li
jinkludu t-tniġġis tal-arja urbana, ir-riċerka u l-innovazzjoni,
u d-dimensjoni internazzjonali tal-politika tal-arja. 2. L-indirizzar
tal-kwalità tal-arja ambjentali ħażina fuq medda qasira ta’
żmien 2.1. Il-kwalità attwali tal-arja Bħalissa aktar minn terz
taż-Żoni ta' Ġestjoni tal-Kwalità tal-Arja jaqbżu l-valuri
ta’ limitu għall-materja partikolata (PM10) u kwart
jaqbżuhom għad-dijossidu tan-nitroġenu (NO2). 17-il
Stat Membru bħalissa huma soġġetti għal proċeduri ta’
ksur għal nuqqas ta’ konformità fir-rigward tal-PM10. 2.2. Miżuri għat-twassil
ta' konformità fir-rigward tal-kwalità tal-arja Il-ksur sostanzjali li għadu għaddej
tal-istandards tal-kwalità tal-arja jista’ jiġi solvut fuq medda ta’
żmien qasira sa medja, permezz tal-implimentazzjoni effettiva
tal-leġiżlazzjoni eżistenti tal-UE, notevolment dwar l-emissjonijiet
minn vetturi ħfief li jaħdmu bid-diżil,[5] u
miżuri kumplimentari fil-livell nazzjonali. Teżisti wkoll
il-ħtieġa li jkun hemm it-traspożizzjoni tal-Protokoll emendat
ta' Gothenburg, li kien hemm qbil dwaru fl-2012, biex b'hekk il-qafas
regolatorju tal-UE jiġi allineat mal-impenji internazzjonali tal-UE.
L-għan ta’ dawn il-miżuri huwa li tinkiseb konformità sħiħa
mal-istandards eżistenti tal-kwalità tal-arja sa mhux aktar tard mill-2020. 2.2.1. It-tlestija ta' xogħol
mhux mitmum: soluzzjoni għall-problema tal-emissjonijiet minn karozzi
ħfief li jaħdmu bid-diżil Ġenerazzjonijiet suċċessivi ta’
standards Euro u standards tal-kwalità tal-karburant ġew miftiehma biex
ikun hemm kontroll tal-emissjonijiet mill-vetturi fl-UE. It-tnaqqis
meħtieġ ġie milħuq, ħlief għal
eċċezzjoni waħda: l-emissjonijiet tal-NOx minn vetturi
ħfief b'magni diżil. L-emissjonijiet tal-NOx fid-dinja reali minn
karozzi Euro 5 bit-tip approvat mill-2009 'l hawn issa jaqbżu dawk
tal-karozzi Euro 1 bit-tip approvat fl-1992, u huma madwar ħames
darbiet il-valur ta’ limitu. Dan għandu impatt ewlieni fuq
il-konċentrazzjonijiet tad-NO2, l-ożonu u l-partikoli sekondarji
madwar l-Ewropa. Dan iwassal għall-ħolqien ta' pubbliċità
negattiva u ħsara fir-reputazzjoni tal-manifatturi tal-vetturi. Fil-Komunikazzjoni CARS 2020 tagħha,
il-Kummissjoni nnutat in-nuqqas tal-proċeduri attwali u impenjat
ruħha li ddaħħal proċedura ġdida ta’ ttestjar
fil-qafas tal-approvazzjoni tat-tip biex jiġu vvalutati l-emissjonijiet
tal-NOx minn vetturi ħfief f’kundizzjonijiet ta’ sewqan veri.[6] L-emissjonijiet tas-sewqan veri (RDE - real driving emissions) tal-NOx
se jiġu rreġistrati u kkomunikati mid-dati obbligatorji
tal-Euro 6 (fl-2014) u, mhux aktar tard minn tliet snin wara, se tiġi
applikata l-proċedura RDE għall-approvazzjoni tat-tip, flimkien ma’
limiti ta' emissjonijiet b'saħħithom li ma għandhomx
jinqabżu (NTE - not-to-exceed). Dan se jiżgura t-tnaqqis sostanzjali
tal-emissjonijiet tal-NOx veri meħtieġa għall-ksib tal-limiti ta’
emissjonijiet tal-NOx għall-Euro 6 f’kundizzjonijiet normali
tas-sewqan.[7] Bħalissa mhux meħtieġ li
l-istandards tal-UE dwar l-emissjonijiet mill-vetturi jsiru iktar stretti
mill-Euro 6 biex jinkisbu l-miri l-ġodda tal-politika dwar l-arja
għall-2025 u l-2030. Minflok, miżuri li jappoġġjaw il-mobbiltà
urbana sostenibbli se jgħinu biex ikunu mmirati l-problemi lokalizzati
tat-trasport (ara t-taqsima 2.2.3). 2.2.2. It-trawwim
tal-kapaċitajiet tekniċi u ta’ ġestjoni msaħħa Biex ikunu appoġġjati l-awtoritajiet kompetenti tal-Istati
Membri permezz tat-tisħiħ tal-iżvilupp u l-implimentazzjoni ta’
programmi ta’ kontroll tat-tniġġis tal-arja u l-miżuri li
jinsabu fihom, se jkunu jistgħu jirrikorru għall-finanzjament
mill-Fondi Ewropej Strutturali u ta' Investiment1 tal-2014-2020 (ESIF -
European Structural and Investments Funds) u l-istrument il-ġdid
għas-snin 2014-2020, LIFE. Il-proposta tal-Kummissjoni għall-ESIF
tinkludi komponent dwar il-kwalità tal-arja, b’mod partikolari
għaż-żoni urbani. L-Istati Membri, ir-reġjuni u l-ibliet bi
problemi notevoli fil-kwalità tal-arja huma mħeġġa biex, fejn
ikun relevanti, jikkunsidraw l-użu ta’ dawn il-fondi biex jimplimentaw
azzjonijiet li jnaqqsu t-tniġġis tal-arja, partikolarment permezz
tal-promozzjoni ta’ teknoloġiji innovattivi. LIFE se jappoġġja
sforzi addizzjonali temporanji li jistgħu jkunu meħtieġa biex
itejbu l-governanza ġenerali tal-kwalità tal-arja u jgħinu biex
jinkisbu iktar finanzjament addizzjonali sostanzjali minn sorsi oħra ta'
finanzjament. Il-proġetti LIFE se jkunu strutturati b'tali mod li jibnu
fuq l-esperjenza pożittiva reċenti tal-proġett pilota
konġunt ta' implimentazzjoni dwar l-arja bejn il-Kummissjoni u l-EEA
(it-taqsima 3.2.6). 2.2.3. It-twessigħ
tas-sett ta' għodod għall-ġestjoni tal-kwalità tal-arja lokali u
reġjonali Ir-responsabbiltà ewlenija sabiex jiġu
riżolti problemi lokalizzati ta’ konformità taqa’ fuq l-Istati Membri,
fejn jeżisti ambitu sostanzjali għal aktar azzjoni nazzjonali u
lokali. L-għażliet disponibbli attwali ta’ valutazzjoni u ġestjoni
se jiġu ssupplimentati bil-miżuri dwar il-mobbiltà sostenibbli
fil-Komunikazzjoni "Flimkien lejn il-mobbiltà urbana kompetittiva u
effiċjenti fl-użu tar-riżorsi", b’mod partikolari dawk dwar
Pjanijiet għall-Mobbiltà Urbana Sostenibbli u dwar Regolamenti dwar
l-Aċċess Urban għall-Vetturi. Se jiġu żviluppati linji
gwida għall-programmi ta' retrofit u għall-promozzjoni tal-adozzjoni
ta’ għażliet ta' teknoloġija avvanzata. Dawn jibnu fuq
il-kunċett ta' "Vettura b'Emmissjonijiet Super Ultra Baxxi"
żviluppat fl-Istati Uniti. Dan il-kunċett se jiġi estiż
ukoll għal oqsma oħra biex jappoġġja l-Istati Membri bi
problemi ta' konformità. Biex jittejjeb it-tagħrif pubbliku dwar
il-prestazzjoni tal-prodotti u s-suċċess ta’ azzjoni nazzjonali jew
lokali dwar il-kwalità tal-arja, se jiġu żviluppati indikaturi
ġodda orjentati lejn il-pubbliku sabiex jiġi traċċat
il-progress fit-tnaqqis tat-tniġġis tal-arja nazzjonalment u
lokalment. Biex titħaffef l-għażla tal-konsumatur,
iċ-ċittadini se jiġu wkoll mgħarrfa dwar l-emissjonijiet
veri tal-vetturi mkejla skont iċ-ċiklu ġdid ta' ttestjar
(mid-data ta' skadenza tal-Euro 6 'il quddiem). 2.2.4. Id-Direttiva dwar il-Kwalità
tal-Arja Ambjentali Ir-rieżami tal-politika tal-arja indika
li mhuwiex xieraq li issa tiġi riveduta d-Direttiva dwar il-Kwalità
tal-Arja Ambjentali. Il-politika minflok għandha tiffoka aktar fuq
il-kisba tal-konformità ma' standards eżistenti tal-kwalità tal-arja sa
mhux aktar tard mill-2020, u dwar l-użu tad-Direttiva riveduta dwar in-NEC
biex jitnaqqsu l-emissjonijiet tat-tniġġis fil-perjodu sal-2030. Tali
tnaqqis tal-emissjonijiet, imbagħad, se jnaqqas
il-konċentrazzjonijiet tal-isfond madwar l-Ewropa. Dan għandu jwassal
għal benefiċċji ewlenin għas-saħħa pubblika u
l-ekosistemi. Id-Direttiva dwar il-Kwalità tal-Arja
Ambjentali tibqa’ politika ewlenija jekk irridu niżguraw
konċentrazzjonijiet futuri taħt il-valuri ta' linja gwida
tal-Organizzazzjoni Dinjija tas-Saħħa kullimkien. Id-Direttiva se
tinżamm taħt rieżami, bl-għan li jkun hemm reviżjoni
ladarba l-NECD tkun stabbilixxiet il-konċentrazzjonijiet tal-isfond fuq
il-mogħdija t-tajba tat-tnaqqis. 3. It-tnaqqis tal-impatti
tat-tniġġis tal-arja fuq medda twila ta’ żmien Rieżami fil-fond tal-politika tal-UE dwar
l-arja sal-lum wera li l-kombinazzjoni ta’ miri u leġiżlazzjoni
wasslet għal benefiċċji veri għas-saħħa
tal-bniedem u l-ambjent. L-impatti fuq is-saħħa minn materja
partikolata — il-kawża ewlenija ta' mwiet mit-tniġġis tal-arja —
naqsu b’madwar 20 % bejn is-snin 2000 u 2010. Il-problema tax-xita
aċiduża (“l-aċidifikazzjoni”) issolviet b’mod ġenerali
fl-UE, bis-saħħa tat-tnaqqis sostanzjali fl-emissjonijiet
tas-sustanzi li jniġġsu ewlenin involuti.[8] Il-politika tal-UE dwar
l-arja ħeġġet l-innovazzjoni fit-trażżin
tat-tniġġis u tejbet radikalment il-prestazzjoni ambjentali ta’
setturi ekonomiċi ewlenin. Dan ħares it-tkabbir u l-impjiegi u
fetaħ opportunitajiet ta’ teknoloġija ekoloġika fl-UE u lil hinn
minnha. Minkejja dawn is-suċċessi, għad
baqa' xi impatti sostanzjali (it-Tabella 1), u dawn huma sors kontinwu ta’
tħassib sinifikanti għal
proporzjon kbir taċ-ċittadini tal-UE.[9]
It-tniġġis tal-arja huwa l-kawża ewlenija ta’ mwiet qabel
il-waqt fl-UE, għaxar darbiet aktar mill-imwiet kawża ta'
inċidenti stradali. Fl-2010 it-tniġġis ikkawża aktar minn 400 000
mewta prematura kif ukoll mard u tbatija evitabbli sostanzjali inklużi
kundizzjonijiet respiratorji (bħall-ażma) u problemi kardjovaskulari
aggravati. L-ispejjeż esterni ġenerali ta’ dawn l-impatti jvarjaw
bejn €330-940 biljun, inkluż it-telf fil-produttività tax-xogħol u
ħsarat ekonomiċi diretti oħra bil-valur ta’ €23 biljun fis-sena
fl-2010. L-ekosistemi qegħdin ibatu wkoll, bil-proliferazzjoni tal-algi ,
il-mewt ta' mases ta' ħut u tfixkil iħeor tal-ekosistema kkawżat
minn tniġġis bin-nitroġenu li jintuża bħala nutrijent
("ewtrofikazzjoni"). Din il-problema hija partikolarment akuta
fl-iktar żoni naturali għonja u diversi tal-Ewropa,[10] li aktar minn tliet
kwarti minnhom huma mhedda. Tabella 1:
L-impatti prinċipali fuq is-saħħa u l-ekosistemi
tat-tniġġis tal-arja fl-2010 Impatti || Impatti fuq is-saħħa[11] (imwiet prematuri minħabba l-materja partikolata u l-ożonu) || L-erja tal-ekosistemi li qed tisboq il-limiti tal-ewtrofikazzjoni[12] 2010 || 406,000 || 62% Anki jekk il-leġiżlazzjoni
eżistenti tiġi implimentata b’mod sħiħ, l-UE se ssofri
impatti sinifikanti negattivi ħafna fuq is-saħħa pubblika u
l-ambjent (it-Tabella 2). L-impatti fuq is-saħħa tal-bniedem
(f’termini ta’ mwiet prematuri b'rabta mat-tniġġis) se jonqsu biss bi
ftit aktar minn terz sal-2025, bil-biċċa l-kbira tat-tnaqqis qabel l-2020.
Huwa mistenni titjib minuri biss għall-ewtrofikazzjoni, b’aktar minn nofs
iż-żona ta' ekosistemi tal-UE xorta mistennija li taqbeż
il-limitu limitu ta’ ħsara fl-ekosistema. L-ispejjeż esterni
tas-saħħa u l-ambjent[13]
assoċjati mat-tniġġis tal-arja se jibqgħu mdaqqsa, u se
jonqsu b’madwar 30 % fl-2025, u 35 % fl-2030 għal firxa stmata
ta’ €212-740bn. Tabella 2 L-evoluzzjoni mistennija tal-impatti ewlenin
tat-tniġġis tal-arja sal-2030 jekk ikun hemm l-implimentazzjoni
sħiħa tal-leġiżlazzjoni attwali (tnaqqis fl-impatti meta
mqabbel mal-2005) Impatti || Impatti fuq is-saħħa (imwiet prematuri minħabba l-materja partikolata u l-ożonu) || L-erja tal-ekosistemi li qed tisboq il-limiti tal-ewtrofikazzjoni 2025 || -37 % || -21 % 2030 || -40 % || -22 % 3.1. L-għanijiet tal-politika ġdida strateġika
dwar l-arja sal-2030 L-għan tal-UE fuq terminu twil
għat-tniġġis tal-arja ma jimplika l-ebda qbiż tal-livelli
ta' linja gwida tal-Organizzazzjoni Dinjija tas-Saħħa
għas-saħħa tal-bniedem[14]
(li jistgħu wkoll jiżviluppaw tul iż-żmien) u l-ebda
qbiż tat-tagħbijiet u l-livelli kritiċi li jimmarkaw il-limiti
ta’ tolleranza tal-ekosistema.[15]
L-istrateġija l-ġdida trid tilħaq żewġ prijoritajiet
fl-istess waqt: il-ksib ta' konformità sħiħa
mal-leġiżlazzjoni eżistenti sa mhux iktar tard mill-2020, u li
twitti t-triq għall-UE biex din tilħaq l-għanijiet fuq terminu
twil. L-għanijiet tal-politika tal-ajru
l-ġdida għall-2030 huma stabbiliti fit-Tabella 3 ta' hawn
taħt f’konformità ma’ dawk l-għanijiet. Dawn se jwasslu għal
terz addizzjonali tat-titjib fis-saħħa u nofs addizzjonali
tat-tnaqqis tal-ewtrofikazzjoni meta mqabbel mal-leġiżlazzjoni
eżistenti. Tabella 3: L-għanijiet tal-politika tal-ajru ġdida
għall-2030 mqabbla mal-2005 Impatti || Impatti fuq is-saħħa (imwiet prematuri minħabba l-materja partikolata u l-ożonu) || L-erja tal-ekosistemi li qed tisboq il-limiti tal-ewtrofikazzjoni || || 2030 || -52 % || -35 % Il-benefiċċji assoċjati
mat-tnaqqis tal-2030 jaqbżu bil-kbir l-ispejjeż tal-konformità.
L-ewwel nett, il-miżuri proposti se jsarfu f’ħajja itwal u aktar
b’saħħitha għall-persuni fl-UE b'riżultat tat-tnaqqis
tal-imwiet minn mard ikkawżat mit-tniġġis tal-arja.[16] It-tieni nett, meta
jiġu riflessi l-impatti mnaqqsa ta’ mard, il-benefiċċji netti
tal-politika huma madwar €40 biljun fis-sena, skont l-aktar stima
konservattiva. Dan mingħajr ma jitqiesu l-benefiċċji ambjentali
sostanzjali ħafna ta' ħsara mnaqqsa lill-ekosistema, li huma
diffiċli li jingħataw valur fi flus. Ladarba jitqiesu l-kisbiet
tal-produttività mill-implimentazzjoni,[17]
l-impatt nett tal-politika fuq il-PDG jittaffa kompletament, u
benefiċċji diretti oħra jirriżultaw minn spejjeż
tal-kura tas-saħħa mnaqqsa marbutin mat-tnaqqis f'mard b'rabta
mat-tniġġis,[18]
u minn telf fl-għelejjel u ħsara infrastrutturali. Il-Valutazzjoni
tal-Impatt qieset l-impatti ddifferenzjati madwar l-Istati Membri, u
kkonkludiet li dawn huma proporzjonati fil-politika proposta. 3.2. Il-kisba tal-miri Il-kisba tal-miri msemmija hawn fuq se titlob
taħlita ta’ miżuri regolatorji u mhux regolatorji. L-UE u l-Istati
Membri jeħtieġ li jaħdmu flimkien, u l-Istati Membri
għandhom jaħdmu mar-reġjuni u l-ibliet tagħhom. Hija
possibbli li tintlaħaq konformità sħiħa
mal-leġiżlazzjoni eżistenti sal-2020 permezz ta’ kombinament ta'
sforzi nazzjonali u tal-UE, b’dawk tal-aħħar iffukati fuq it-twassil
sħiħ ta’ kontrolli eżistenti tas-sors. Il-miri għall-2030
se jirrikjedu azzjoni addizzjonali mill-UE biex jitnaqqsu l-emissjonijiet
fis-sors. It-tnaqqis li jirriżulta fil-konċentrazzjonijiet tal-isfond
maż-żmien se jippermettielna li nirrevedu l-istandards
tal-konċentrazzjonijiet ambjentali lejn il-linji gwida tal-WHO.[19] Il-miżuri
mniżżla hawn taħt se jiffukaw ukoll fuq it-twassil ta'
benefiċċji għall-mitigazzjoni tat-tibdil fil-klima billi
jiġu mmirati dawk is-sustanzi li jniġġsu li jikkontribwixxu
b’mod sinifikanti għall-impatti klimatiċi kif ukoll
għat-tniġġis tal-arja (bħall-komponent ta' "karbonju
iswed" tal-materja partikolata) jew il-promozzjoni ta’ miżuri li
jindirizzaw sustanzi li jniġġsu l-arja u gassijiet tal-klima fl-istess
waqt (bħall-ammonja u l-ossidu nitruż). 3.2.1. Ir-reviżjoni
tad-Direttiva dwar il-Livelli Nazzjonali Massimi tal-Emissjonijiet Biex jintlaħqu l-miri tal-politika
tal-ajru ġdida għall-2030, l-emissjonijiet ta’ tniġġis minn
kull Stat Membru jeħtieġ li jkunu sostanzjalment imnaqqsa.
L-istrument prinċipali għat-twassil ta’ tnaqqis kosteffettiv huwa
d-Direttiva dwar il-Livelli Nazzjonali Massimi tal-Emissjonijiet (NEC -
National Emission Ceilings). Il-proposta ta' akkumpanjament għal
Direttiva dwar l-NEC riveduta testendi l-orizzont tal-politika sal-2030,
b'żewġ tragwardi interim importanti: għall-2020,
it-traspożizzjoni tal-obbligi internazzjonali ġodda maqbula
bħala parti mill-Protokoll emendat ta' Gothenburg; u għall-2025,
l-obbigi tat-tnaqqis intermedji biex tinżamm it-trajjettorja lejn l-2030.
Il-proposta ssaħħaħ ukoll il-koerenza mal-valutazzjoni u
l-ġestjoni tal-istandards tal-kwalità tal-arja misjuba fid-Direttiva dwar
il-Kwalità tal-Arja u mal-mitigazzjoni tal-bidla fil-klima, u se
tikkontribwixxi biex tillimita l-bidla fil-klima.[20] Fiha wkoll
dispożizzjonijiet imtejba dwar inventarji, projezzjonijiet u
monitoraġġ tal-ekosistema, biex tkejjel l-implimentazzjoni b’mod
aktar effettiv. L-iskeda ta’ rappurtar ġiet allinjata ma’ dik
għall-gassijiet b’effett ta’ serra. Aktar opportunitajiet għal
sinerġiji bejn il-flussi tad-dejta se jiġu eżaminati
fl-evalwazzjoni li jmiss tar-Reġistru Ewropew dwar ir-Rilaxx u
t-Trasferiment ta’ Sustanzi Niġġiesa. Għall-2030 il-proposta tinkludi[21] obbligi nazzjonali
kosteffettivi għat-tnaqqis tal-emissjonijiet għall-erba' sustanzi
oriġinali li jniġġsu l-arja (SO2, NOx, VOCs li
mhumiex metan, u NH3) u għal tnejn ġodda: PM2.5
primarju (materja partikolata fina, li għandha impatt maġġuri
fuq is-saħħa) u CH4 (metan, sustanza ewlenija li
tniġġes il-klima li għandha ħajja qasira).
Fl-implimentazzjoni tat-tnaqqis PM2.5, se jkun hemm enfasi
partikolari fuq it-tnaqqis tal-karbonju iswed (KI), is-sustanza l-oħra li
tniġġes il-klima u li għandha ħajja qasira. Il-miżuri
tas-CH4 u l-KI se jipprovdu kobenefiċċji klimatiċi
diretti filwaqt li jwittu t-triq għal azzjoni internazzjonali. Huma
proposti arranġamenti ta’ flessibbiltà, biex jitħalla spazju
għall-inċertezzi rigward metodi tal-inventarju tal-emissjonjiet u
t-taħlita tal-enerġiji tal-ġejjieni mingħajr ma
titqiegħed f'periklu l-integrità tal-istrument. 3.2.2. Nisfruttaw il-potenzjal kollu
tal-kontrolli eżistenti fis-sors: L-emissjonijiet industrijali,
l-Ekodisinn, u Makkinarju Mobbli Mhux tat-Triq Filwaqt li d-Direttiva dwar n-NEC tagħti
lill-Istati Membri l-akbar flessibilità possibbli biex jidentifikaw
il-miżuri adatti, bosta partijiet interessati talbu
għall-appoġġ permezz ta’ kontrolli mmirati tas-sors tal-UE.
Il-kontribuzzjonijiet settorjali possibbli huma preżentati fid-dettall fil-Valutazzjoni
tal-Impatt li takkumpanja din il-Komunikazzjoni. Il-miżuri eżistenti
u ppjanati tas-sors tal-UE se jkomplu jagħtu kontribuzzjoni sostanzjali
biex jinkiseb it-tnaqqis meħtieġ, li jvarja minn 57 %
tar-riduzzjoni rikjesta għall-VOCs għal 72 % għall-NOx.
L-istrumenti ewlenin involuti huma: ·
Id-Direttiva dwar l-Ekodisinn, li tindirizza
l-emissjonijiet minn sorsi domestiċi tal-kombustjoni; ·
Id-Direttiva dwar l-Emissjonijiet Industrijali (IED
- Industrial Emissions Directive) u l-programm li għaddej tagħha
għall-iżvilupp tal-konklużjonijiet tal-BAT, li jkopri s-sorsi
industrijali ewlenin, inkluż b’mod partikolari l-impjanti tal-kombustjoni
ta’ aktar minn 50 MW;[22]
·
Ir-reviżjoni tad-Direttiva dwar il-Makkinarju
Mobbli Mhux tat-Triq, li se tiġġenera benefiċċji
sostanzjali billi testendi l-firxa tal-kapaċità u t-tipi ta' makkinarju
koperti, u billi tallinja l-kontrolli mal-limiti heavy-duty tal-Euro VI. B'kuntrast, għall-ammonja,
il-leġiżlazzjoni tal-UE dwar is-sors se twassal biss madwar 25 %
tat-tnaqqis meħtieġ. B'hekk, il-każ għal miżuri
tas-sors għall-agrikoltura huwa urġenti, u l-kwistjoni hija
inkluża fit-taqsima 3.2.4 ta' hawn taħt. 3.2.3. Proposta
għal Direttiva dwar Impjanti Medji tal-Kombustjoni[23] Id-distakk ewlieni fil-leġiżlazzjoni
tas-sors tal-UE (minbarra l-agrikoltura) jikkonċerna l-emissjonijiet minn
installazzjonijiet tal-kombustjoni b’kapaċità termali ta’ bejn il-1 u l-50 MW,
li huma importanti wkoll biex jiġu evitati l-kompromessi bejn il-politika
tal-kwalità tal-arja u dik tal-enerġija rinnovabbli (notevolment b'rabta
mal-użu miżjud tal-bijomassa). Id-Direttiva proposta dwar
il-limitazzjoni tal-emissjonijiet ta’ ċerti sustanzi li jniġġsu
fl-arja minn impjanti medji tal-kombustjoni (MCP - medium combustion plants) se
tipprovdi strument effettiv biex ikompli jitnaqqas it-tniġġis ta’
NOx, SO2 u PM permezz ta’ valuri ta’ limitu xierqa
għall-installazzjonijiet ġodda u dawk eżistenti, flimkien ma’
skema ta’ reġistrazzjoni sempliċi. Dan iwassal l-akbar proporzjon
bejn il-benefiċċji u l-ispejjeż bi ftit spejjeż
amministrattivi. Id-Direttiva se tgħin biex titwassal parti sinifikanti
tal-obbligi tat-tnaqqis tal-emissjonijiet tal-Istati Membri. 3.2.4. Miżuri
biex irażżnu l-emissjonijiet tal-ammonja
mill-agrikoltura Biex jintlaħqu l-miri tal-politika
tal-ajru l-ġdida għall-2030, id-Direttiva proposta dwar l-NEC
teħtieġ tnaqqis tal-ammonja ta’ 27 %. Id-Direttiva tistipula
sett ta’ miżuri tas-sors li għandhom jitqiesu mill-Istati Membri meta
jkunu qed jiżviluppaw il-programmi nazzjonali. Bosta minn dawn huma
kosteffettivi anki f'irziezet pjuttost żgħar. L-Istati Membri
jistgħu wkoll jagħtu appoġġ billi jallokaw riżorsi
xierqa li jagħmlu parti mill-Fondi għall-Iżvilupp Rurali. Se
jiġu eżaminati għażliet għal aktar kontrolli tas-sors
fil-livell tal-UE, inkluż rekwiżit ġenerali għal
bilanċ tan-nutrijenti fl-applikazzjoni tal-fertilizzant, kontrolli
speċifiċi dwar il-ġestjoni tad-demel, u l-ittikkettjar u dispożizzjonijiet
oħra għall-fertilizzanti inorganiċi (fil-kuntest
tar-rieżami li għaddej bħalissa tar-Regolament dwar
il-Fertilizzanti). Bosta minn dawn il-miżuri se
jgħinu wkoll biex inaqqsu l-emissjonijiet tal-ossidu nitruż, gass
serra b'saħħtu rregolat mill-Protokoll ta’ Kjoto.[24] 3.2.5. Il-kontroll tal-emissjonijiet
mit-trasport marittimu Ir-reviżjoni tal-2012 tad-Direttiva dwar
il-Kontenut ta' Kubrit tal-Karburanti Likwidi[25]
tiżgura li l-aktar miżuri kosteffettivi biex jitnaqqsu
l-emissjonijiet tal-kubrit mit-trasport marittimu fl-UE diġà qegħdin
jitħejjew, bl-istandard SECA ta' kontenut tal-kubrit ta’ 0.1 %
fil-Baltiku u fil-Baħar tat-Tramuntana mill-2015, u l-istandard globali
ta’ massimu ta’ 0.5 % kubrit fl-ilmijiet kollha tal-UE mis-sena 2020. Madanakollu, analiżi preċedenti turi
li l-emissjonijiet mit-trasport marittimu se jibqgħu jimpattaw il-kwalità
tal-arja fuq l-art,[26]
u li t-tnaqqis mill-qasam jista' jkun kosteffettiv. Jekk
wieħed iqis il-karattru internazzjonali tat-trasport marittimu u d-dipendenza
tal-Ewropa fuqu, għandha dejjem tingħata preferenza
lill-iżvilupp politiku fil-livell internazzjonali (IMO),
bħad-deżinjazzjoni taż-Żoni ta' Kontroll tal-Emissjonijiet
tal-NOx u l-infurzar tal-istandards tal-emissjonijiet tal-NOx li diġà
nqabblu mill-IMO. Il-proposta għal Direttiva riveduta dwar in-NEC
għandha l-għan li tinċentiva tali tnaqqis mit-trasport marittimu
billi tippermetti li dawn jagħmlu tajjeb għalihom l-obbligi
tat-tnaqqis għal sorsi bbażati fuq l-art għall-2025 u l-2030.[27] 3.2.6. Miżuri mhux regolatorji Bħala parti mir-reviżjoni,
il-Kummissjoni u l-Aġenzija Ewropea għall-Ambjent mexxew flimkien
proġett pilota ta' implimentazzjoni dwar l-arja[28] biex jevalwa
l-esperjenza prattika ta’ tnax-il belt Ewropea fi ħdan il-qafas attwali
ta' politika. L-adegwatezza globali tal-politika ġiet ikkonfermata,
iżda ġew identifikati għadd ta’ oqsma fejn jista' jsir titjib,
inkluża l-ħtieġa għal koordinazzjoni aħjar u l-bini
tal-kapaċità għall-valutazzjoni u l-ġestjoni. Firxa ta’
miżuri mhux regolatorji huma ppreżentati bħala appoġġ
għall-implimentazzjoni tal-politika, b’mira partikolari lejn
id-dimensjonijiet urbani, agrikoli u internazzjonali filwaqt li jiġu
promossi rabtiet eqreb bejn dawk li jfasslu l-politika u l-komunità tar-riċerka
u l-innovazzjoni. Id-dimensjoni urbana kienet ikkunsidrata fit-taqsima 2.2.3
ta' hawn fuq; l-oħrajn huma indirizzati hawn taħt. 3.2.6.1. Impenn
attiv mas-settur tal-biedja Il-kontribut li tista' tagħti
l-agrikoltura għal kwalità tal-arja mtejba huwa ċar, u għadd ta'
fergħat ta' attività qegħdin jingħaqdu: il-livelli massimi
riveduti dwar l-ammonja bħala parti mill-NECD, id-Dokument ta' Gwida dwar
l-Ammonja tal-UNECE,[29] il-fokus li qiegħed jiżdied fil-Politika Agrikola Komuni
dwar il-ħarsien ambjentali, u l-kobenefiċċji tal-kontroll
tat-tniġġis tal-arja għall-klima, l-ilma u l-ħamrija. Biex
tgħaqqad dawn il-fergħat f'massa kritika u tippromwovi l-impenn attiv
mal-komunità tal-biedja, is-servizzi dwar l-ambjent u l-agrikoltura
tal-Kummissjoni se jistabbilixxu flimkien pjattaforma tal-agrikoltura
bħala parti mill-Forum Ewropew dwar l-Arja Nadifa (ara t-taqsima 5.1 ta'
hawn taħt). 3.2.6.2. Il-mobilizzazzjoni
ta' azzjoni internazzjonali Ir-ratifika mill-UE tal-emenda tal-2012
tal-Protokoll ta’ Gothenburg hija importanti biex tistimula r-ratifikazzjoni
usa’ minn partijiet li mhumiex fl-UE, sabiex tippromwovi l-ekonomija
ekoloġika f’pajjiżi terzi u, fl-aħħar mill-aħħar,
biex tnaqqas l-impatt tagħhom fuq il-kwalità tal-arja tal-UE.
Għaldaqstant, proposta għal ratifika takkumpanja din l-Istrateġija.
Il-Kummissjoni se tkompli wkoll l-impenn tagħha mal-Istati tal-Ewropa
tal-Lvant, il-Kawkażu u l-Ażja Ċentrali (EECCA) biex
jimplimentaw il-Protokoll ta’ Gothenburg, fost l-oħrajn billi tipprovdi
assistenza finanzjarja fejn xieraq permezz ta’ assistenza tal-UE
għall-kooperazzjoni dwar l-iżvilupp. Il-miri l-ġodda għall-2030
se jistabbilixxu wkoll l-aġenda għal reviżjoni fil-ġejjieni
tal-Protokoll ta’ Gothenburg, li għandha timmira lejn approċċi
koerenti ta’ politika li jkomplu jnaqqsu t-tniġġis tal-arja
fir-reġjun UNECE, iżda wkoll lejn impenn ma’ partijiet kbar minn
barra li jniġġsu, partikolarment fl-Ażja. 3.2.6.3. Il-promozzjoni
tar-riċerka u l-innovazzjoni Ir-reviżjoni wasslet ukoll aġenda
ċara għar-riċerka nazzjonali u tal-UE li tappoġġa
l-ġestjoni aħjar tal-kwalità tal-arja fl-UE. Il-programm tal-UE
għar-riċerka u l-innovazzjoni għall-2014 sal-2020, Orizzont 2020,
għandu l-għan li jħaffef it-trasformazzjoni tas-soċjetà
lejn ekonomija ekoloġika, u b’hekk inaqqas l-effetti negattivi fuq
is-saħħa u l-ambjent minħabba t-tniġġis tal-arja
fl-Ewropa. Dan se jrawwem approċċi integrati biex jindirizzaw
it-tniġġis tal-arja u t-tibdil fil-klima sabiex isibu soluzzjonijiet
sostenibbli u fuq terminu twil fl-UE. Se jiġu żviluppati għodod
u strateġiji avvanzati u innovattivi biex itejbu l-kwalità tal-arja,
filwaqt li jitqiesu ċ-ċirkostanzi speċifiċi lokali.
L-iżviluppi teknoloġiċi fil-qasam tat-trasport se jinkludu magni
ġodda b'emissjonijiet baxxi waqt is-sewqan veru, u t-tnaqqis ta’
emissjonijiet mhux mid-duħħan. Barra minn hekk hemm ħtieġa
kontinwa li tittejjeb l-integrazzjoni tal-għarfien
għall-applikazzjoni tal-politika fuq livelli varji ta’ politika.
Ir-riċerka FP7 attwalment tappoġġja l-implimentazzjoni
tal-politika tal-UE dwar l-arja f’oqsma bħalma huma għodod ta’
valutazzjoni integrata, forzi klimatiċi b'ħajja qasira, l-aspetti
soċjoekonomiċi u l-effetti fuq l-ekosistemi. Minbarra li tfittex dawn
il-miżuri, il-Kummissjoni se tippubblika u taġġorna ta' spiss
il-prijoritajiet għar-R&I għat-titjib tal-kwalità tal-arja. 4. Tkabbir
u Kompetittività Il-politika tal-ajru l-ġdida se
tagħti stimulu lill-ekonomija permezz ta’ titjib fil-produttività
tax-xogħol u s-swieq tat-teknoloġija u s-servizzi ambjentali li huwa
daqs l-ispejjeż tal-kontroll tat-tniġġis. Kumpaniji żgħar
kif ukoll kbar tal-inġinerija li jagħmlu suċċess fil-qasam
tat-teknoloġija nadifa huma fost il-kumpaniji l-iktar avvanzati u
innovattivi tal-Ewropa. L-istimolu
addizzjonali flimkien mal-enfasi msaħħa ta' Orizzont 2020 se
jiżguraw li l-mixja lejn l-innovazzjoni tibqa' għaddeja. Il-politika se
żżid il-produttività b'madwar 100 000 ekwivalent ta' impjiegi
full time, li minnhom madwar 40 000 se jkunu impjiegi ġodda
maħluqa. Is-suq għal din it-teknoloġija kull
ma jmur qed isir aktar internazzjonali. L-imsieħba
kummerċjali ewlenin tagħna fl-ekonomiji avvanzati tad-dinja diġà
għandhom standards iktar stretti mill-UE. Biex inbiegħu f’dawk
is-swieq għandna bżonn mexxejja domestiċi fit-teknoloġija. Ir-rapport tal-OECD
'Environment Outlook 2050' juri wkoll fokus miżjud fuq
it-tniġġis tal-arja fl-ekonomiji emerġenti. Dan se
jiġġenera iktar domanda għal soluzzjonijiet tal-arja nadifa
globalment b'opportunitajiet miżjuda fis-suq għall-kumpaniji Ewropej.
Iċ-Ċina dan l-aħħar ħabbret investiment ta’ 0,4 %
tal-PGD fis-sena tul il-ħames snin li ġejjin fil-kontroll
tat-tniġġis tal-arja f’Bejġing biss[30] —
dan huwa ikbar mill-ispejjeż ta' implimentazzjoni ta' dan il-pakkett
għall-UE kollha. In-negozji Ewropej se jkunu f’pożizzjoni tajba biex
jibbenefikaw minn dan l-investiment. 5. Il-monitoraġġ,
l-evalwazzjoni u r-reviżjoni 5.1. Il-Forum
Ewropew dwar l-Arja Nadifa Il-Kummissjoni se twaqqaf Forum dwar l-Arja
Nadifa biex tħaffef l-implimentazzjoni kkoordinata ta’ din
l-Istrateġija u tlaqqa’ flimkien il-partijiet interessati rilevanti kollha
kull sentejn. Il-Kumitat Regolatorju dwar il-kwalità tal-arja u l-gruppi ta’
esperti assoċjati se jibqgħu jintużaw għal titjib tekniku
fid-Direttivi, u biex iqarrbu lejn xulxin lill-komunitajiet tal-kwalità tal-arja
u tal-emissjonijiet. 5.2. L-għażla
taż-żmien u l-proċess Il-progress fil-kisba tal-għanijiet u
l-implimentazzjoni tal-istrumenti se jiġi rivedut kull ħames snin,
bl-ewwel reviżjoni sal-2020. Il-progress lejn il-miri l-ġodda
tal-politika tal-ajru għall-2030 se jiġi evalwat billi jintużaw
l-indikaturi li huma espressi fihom. It-tnaqqis fl-emissjonijiet veri minn
vetturi ħfief tad-diżil u l-progress fil-konformità mal-Istandards
tal-Kwalità tal-Arja Ambjentali se jiġu segwiti mill-qrib permezz
tal-mekkaniżmi eżistenti tar-rappurtar. L-analiżi li tirfed
il-valutazzjoni tal-impatt se tkun aġġornata kull sentejn, u
r-reviżjonijiet tal-progress se jiġu mressqa lill-Forum dwar l-Arja
Nadifa. L-ewwel reviżjoni se tivvaluta jekk hemmx
lok għal aktar azzjoni dwar l-istandards tal-kwalità tal-arja ambjentali,
meta wieħed iqis ukoll il-bilanċ xieraq bejn il-valuri ta’ limitu
tal-kwalità tal-arja li japplikaw kullimkien, u l-kunċetti alternattivi li
jiffukaw fuq żoni b'esponiment partikolarment għoli tal-popolazzjoni. 6. Konklużjoni Il-mira ambizzjuża tal-Ewropa fuq terminu
twil għall-kwalità tal-arja tista' tinkiseb biss fi stadji. It-tnaqqis
tal-Istrateġija preċedenti (2005) se jiġi implimentat b'mod
wiesgħa sal-2020, permezz ta’ kombinament ta’ azzjonijiet tal-Istati
Membri u tal-UE. Dawn se jwasslu għal tnaqqis kbir fl-impatti negattivi
tat-tniġġis fuq is-saħħa tal-bnedmin u fuq l-ambjent,
iżda se jibqa' xi problemi sostanzjali. L-istrateġija l-ġdida
turi li passi oħra lejn l-għan fuq terminu twil tal-UE huma
possibbli, bit-twassil ta’ benefiċċji għas-saħħa ta’ €45
biljun u benefiċċji ambjentali kbar. Dan se jwitti t-triq biex
l-istandards ta’ kwalità tal-arja ambjentali tal-UE jagħmlu progress lejn
il-konċentrazzjonijiet tal-linji gwida tad-WHO. Politika tal-arja b'saħħitha se
twieġeb għall-aspirazzjonijiet taċ-ċittadini għal
saħħithom u għall-benesseri tagħhom, iżda għandha
wkoll benefiċċji ekonomiċi diretti. It-titjib fil-produttività u
l-ispejjeż imnaqqsa għall-kura tas-saħħa jikkumpensaw
bis-sħiħ l-ispejjeż tal-konformità, u l-politika hija mistennija
li twassal għal żieda netta fl-impjiegi. Se jinfetħu
opportunitajiet fis-swieq globali li qed jespandu b'mod mgħaġġel
għal servizzi u teknoloġiji għat-trażżin. L-UE tista’
tikseb vantaġġ kompetittiv u tisfrutta l-opportunijiet billi tiffoka
r-riċerka u l-iżvilupp fuq teknoloġiji effiċjenti
fl-użu tar-riżorsi u li jniġġsu anqas u li pajjiżi
oħra fl-aħħar mill-aħħar se jkollhom jadottaw. [1] L-OECD Environment Outlook 2050 disponibbli fuq http://www.oecd.org/document/11/0,3746,en_2649_37465_49036555_1_1_1_37465,00.html.
Dan il-prospett jistma li l-għadd ta’ mwiet prematuri minn esponiment
għal sustanzi partikolati li jniġġsu l-arja li jwasslu għal
insuffiċjenza respiratorja jista’ jirdoppja mil-livelli attwali għal 3.6
miljun fis-sena globalment, bil-biċċa l-kbira minnhom
fiċ-Ċina u fl-Indja. Minħabba l-popolazzjonijiet urbanizzati u
li qegħdin jixjieħu tagħhom, il-pajjiżi tal-OECD x’aktarx
li jkollhom waħda mill-ogħla rati ta’ mwiet prematuri mill-ożonu
troposferiku fl-2050, u l-Indja biss ikollha rata ogħla. [2] COM(2005)446 finali. [3] Id-Deċiżjoni 1600/2002/KE, " li
jintlaħqu livelli ta’ kwalità li ma jħallux impatti negattivi
sinifikanti fuq u riskji għas-saħħa tal-bniedem u fuq
l-ambjent". [4] Id-Direttiva 2001/81/KE [5] Jiġifieri, l-implimentazzjoni tal-verifiki
tal-vetturi Euro 6 skont ir-Regolament (KE) 715/2007 sabiex ikun
żgurat li l-emissjonijiet fid-dinja reali tal-ossidi tan-nitroġenu
(NOx) minn vetturi ħfief li jaħdmu bid-diżil huma qrib il-valuri
ta' limitu fil-leġiżlazzjoni. [6] COM(2012) 636 finali, Brussell, 8.11.2012 [7] Għandhom jiġu infurzati wkoll
l-investigazzjoni u t-trażżin ta’ xi wħud mill-kawżi
possibbli ta’ dawn id-devjazzjonijiet (manutenzjoni ħażina,
il-prattika tul il-proċess ta' ċertifikazzjoni li biha tittejjeb
il-prestazzjoni fir-rigward tal-emissjonijiet waqt iċ-ċiklu ta'
ttestjar, apparat ta' wara l-bejgħ li jnaqqas l-effettività tas-sistemi
ta' kontroll tal-emissjonijiet li jelimina jew jinjora t-tagħmir li
jnaqqas it-tniġġis), peress li b'hekk ikunu jistgħu jitnaqqsu
l-emissjonijiet minn vetturi b'rata għolja ta' emissjonijiet mingħajr
ma jkun hemm bżonn ta' stennija għal ġenerazzjoni ġdida ta'
vetturi. [8] It-tnaqqis tal-emissjonijiet huwa dovut
għal-leġiżlazzjoni tal-UE dwar l-emissjonijiet tal-kubrit minn
impjanti tal-kombustjoni kbar (LCPs - large combustion plants), u
għar-rekwiżiti ta' karburant baxx fil-kubrit għat-trasport
bit-triq li ppermettew ukoll l-użu ta' apparat imtejjeb ta' posttrattament
mill-Euro 4 'il quddiem. [9] Ara r-rapport tal-Ewrobarometru 'Attitudes of Europeans
to air Quality', http://ec.europa.eu/public_opinion/flash/fl_360_en.pdf,
ibbażat fuq intervisti ma' 'l fuq minn 25 000 ċittadin tal-UE. [10] Notevolment fin-netwerk ta' siti protetti "Natura 2000". [11] Ara r-rapport TSAP Baseline: Health and Environmental
Impacts http://ec.europa.eu/environment/air/pdf/tsap_impacts.pdf għal metodoloġija tal-kalkolu. [12] Perċentwal taż-żona ta' ekosistemi fl-UE li
jaqbeż it-tagħbijiet kritiċi ta' ewtrofikazzjoni. [13] Din hija stima tal-ispejjeż kollha minħabba
t-tniġġis tal-arja, jiġifieri mhux biss l-ispejjeż diretti
għall-ekonomija (ta’ telf fil-produttività, il-kura tas-saħħa,
ħsad iżgħar, eċċ) iżda wkoll valwazzjoni fi flus
ta’ nuqqas ta’ saħħa fuq l-individwu. L-istima hija
prinċipalment ibbażata fuq is-saħħa minħabba li hemm nuqqasijiet
metodoloġiċi biex ikun hemm valwazzjoni ta’ impatti ekosistemiċi
f’termini monetarji. [14] Strettament, ma hemm l-ebda livell sikur magħruf
għall-esponiment għal ċerti sustanzi li jniġġsu
bħall-materja partikolata, iżda l-linji gwida tal-WHO huma stabbiliti
f’livelli ta’ riskju baxx u jiġu riveduti ta' spiss. [15] It-tagħbijiet u l-livelli kritiċi,
jiġifieri l-livelli massimi li l-ekosistema tista' tittollera
mingħajr ma tiddegrada. [16] Il-miżuri proposti huma stmati li jwasslu għal
żieda ta’ 500,000 sena ta’ ħajja miksuba kull sena. [17] Żieda addizzjonali ta’ 15-il miljun ġurnata
tax-xogħol kull sena permezz tat-tnaqqis fil-mard minħabba
t-tniġġis tal-arja. [18] Il-miżuri proposti huma stmati li jwasslu għal
EUR 650m fi spejjeż tal-kura tas-saħħa mnaqqsa fis-sena. [19] Id-Direttivi dwar il-Kwalità tal-Arja Ambjentali kienu
l-fokus leġiżlattiv tat-TSAP tal-2005, imma l-prijorità għalihom
issa hija l-kisba tal-konformità sħiħa mill-aktar fis possibbli. [20] Il-proposta żżomm ir-rekwiżit għal
programmi ta’ kontroll tat-tniġġis nazzjonali iżda adattathom
biex jiġu massimizzati s-sinerġiji mad-Direttivi dwar il-kwalità
tal-arja ambjentali u l-politiki dwar il-klima. [21] Ġiet speċifikament eżaminata azzjoni dwar
Sustanzi li Jniġġsu l-Klima li għandhom Ħajja Qasira (SLCPs
- short lived climate pollutants). Filwaqt li bħalissa mhux xieraq li jkun
hemm livell massimu separat għall-karbonju iswed (KI), l-UE u l-Istati
Membri għandhom jagħtu prijorità lil miżuri b'impatt fuq KI meta
jiġu biex jilħqu l-obbligi PM2.5 ta’ tnaqqis tagħhom.
Il-livell massimu l-ġdid għall-metan se jisfrutta l-potenzjal
sostanzjali ta’ tnaqqis mingħajr kost jew b'kost baxx, u b’hekk
jikkumplimenta t-tnaqqis tal-VOC u tal-NOx meħtieġ biex jitnaqqsu
l-konċentrazzjonijiet tal-ożonu kemm fl-UE kif ukoll internazzjonalment.
Dawn l-azzjonijiet huma mmirati wkoll lejn il-promozzjoni ta’ azzjoni
internazzjonali dwar s-SLCF biex jitnaqqas it-tniġġis emisferiku
tal-arja. [22] Teżisti skeda fis-seħħ biex jiġu
adottati l-konklużjonijiet kollha tal-BAT sal-2020, iżda l-Istati
Membri se jkollhom rwol ewlieni fid-determinazzjoni tal-livell tal-BAT, u
għaldaqstant it-tnaqqis imwassal mill-IED. [23] Il-benefiċċji tal-kwalità tal-arja tad-Direttiva
dwar is-Sorsi Rinnovabbli u d-Direttiva dwar l-Effiċjenza Enerġetika
huma integrati fil-linja ta’ bażi. [24] L-UNEP stmat li, sal-2020, globalment, jistgħu
jiġu evitati kull sena emissjonijiet tal-N2O ekwivalenti
għal 0.8 gigatunnellati ta’ CO2. Dan ikun jammonta għal 8 %
tad-“distakk tal-emissjonijiet” bejn
l-impenji ta’ tnaqqis magħmula mill-pajjiżi u l-azzjoni
meħtieġa biex iż-żieda fit-temperatura globali tinżamm
taħt iż-2 °C. [25] Direttiva 2012/33/UE [26] Fl-UE, fl-2005 l-emissjonijiet tal-NOx u l-SO2
mit-trasport marittimu internazzjonali kienu ekwivalenti għal madwar 25 %
u 21 % tal-emissjonijiet fuq l-art. Filwaqt li l-emissjonijiet ta’ NOx
minn sorsi fuq l-art huma mistennija li sal-2030 ikunu 65 % inqas,
fit-trasport marittumu tas-soltu l-emissjonijiet mit-trasport marittimu jonqsu
b'2 % biss. [27] Din il-Komunikazzjoni u l-Valutazzjoni tal-Impatt li
takkumpanjaha jissodisfaw, fis-sustanza, it-talba tal-Artikolu 7(2)
tad-Direttiva 1999/32/KE. [28] http://www.eea.europa.eu/publications/air-implementation-pilot-2013 [29] Id-Deċiżjoni 2012/11, ECE/EB/AIR/113/Add. 1,
adottata mill-Partijiet għall-Konvenzjoni tal-LRTAP fil-31 sessjoni
tal-Korp Eżekuttiv tal-Konvenzjoni dwar it-Tniġġis Transkonfini
tal-Arja fuq Distanza Twila (11-13 ta’ Diċembru 2012). [30] http://news.xinhuanet.com/english/china/2013-09/24/c_132746706.htm.