EUR-Lex Access to European Union law
This document is an excerpt from the EUR-Lex website
Document 52012SC0210
COMMISSION STAFF WORKING DOCUMENT EXECUTIVE SUMMARY OF THE IMPACT ASSESSMENT REPORT ON EU-JAPAN TRADE RELATIONS Accompanying the document Recommendation for a Council Decision authorising the opening of negotiations on a Free Trade Agreement between the European Union and Japan
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAR-RAPPORT TAL-VALUTAZZJONI TAL-IMPATT DWAR IR-RELAZZJONIJIET KUMMERĊJALI BEJN L-UE U L-ĠAPPUN Li jakkumpanja d-dokument Rakkomandazzjoni għal Deċiżjoni tal-Kunsill li tawtorizza l-ftuħ tan-negozjati dwar Ftehim ta' Kummerċ Ħieles bejn l-Unjoni Ewropea u l-Ġappun
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAR-RAPPORT TAL-VALUTAZZJONI TAL-IMPATT DWAR IR-RELAZZJONIJIET KUMMERĊJALI BEJN L-UE U L-ĠAPPUN Li jakkumpanja d-dokument Rakkomandazzjoni għal Deċiżjoni tal-Kunsill li tawtorizza l-ftuħ tan-negozjati dwar Ftehim ta' Kummerċ Ħieles bejn l-Unjoni Ewropea u l-Ġappun
/* SWD/2012/0210 final */
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAR-RAPPORT TAL-VALUTAZZJONI TAL-IMPATT DWAR IR-RELAZZJONIJIET KUMMERĊJALI BEJN L-UE U L-ĠAPPUN Li jakkumpanja d-dokument Rakkomandazzjoni għal Deċiżjoni tal-Kunsill li tawtorizza l-ftuħ tan-negozjati dwar Ftehim ta' Kummerċ Ħieles bejn l-Unjoni Ewropea u l-Ġappun /* SWD/2012/0210 final */
DOKUMENT TA’ ĦIDMA TAL-PERSUNAL
TAL-KUMMISSJONI SOMMARJU EŻEKUTTIV TAR-RAPPORT
TAL-VALUTAZZJONI TAL-IMPATT DWAR IR-RELAZZJONIJIET KUMMERĊJALI BEJN L-UE U
L-ĠAPPUN Li jakkumpanja d-dokument Rakkomandazzjoni għal
Deċiżjoni tal-Kunsill li tawtorizza l-ftuħ tan-negozjati dwar
Ftehim ta' Kummerċ Ħieles bejn l-Unjoni Ewropea u l-Ġappun Dan
id-dokument huwa dokument ta' ħidma tal-persunal tal-Kummissjoni Ewropea
għall-finijiet tal-informazzjoni. Dan ma jirrappreżentax
il-pożizzjoni uffiċjali tal-Kummissjoni dwar din il-kwistjoni, u
lanqas ma jantiċipa tali pożizzjoni
1.
Definizzjoni tal-Problema
X'inhi eżattament il-problema? Il-kummerċ bejn l-UE u l-Ġappun,
l-atturi ekonomiċi globali ewlenin, ilu sejjer lura għal bosta snin.
Matul il-perjodu bejn l-2006 u l-2010, l-esportazzjonijiet tal-UE lejn
il-Ġappun naqsu b'0,6 % kull sena, meta mqabbla maż-żieda
ta' 3,8 % fl-esportazzjonijiet globali tal-UE. Matul l-istess perjodu,
l-esportazzjonijiet tal-Ġappun lejn l-UE naqsu bi 3,2 % kull sena,
filwaqt li l-esportazzjonijiet globali mill-Ġappun żdiedu bi
3,1 %. Din il-prestazzjoni baxxa fir-relazzjonijiet
bilaterali tal-kummerċ u l-investiment bejn dawn iż-żewġ
ekonomiji żviluppati kbar, twassal għal telf fil-kompetittività,
il-produttività u l-benessri, kemm fuq livell bilaterali kif ukoll fil-kuntest
ekonomiku globali; inqas għażla u prezzijiet ogħla
għall-konsumaturi; appoġġ fqir għall-impjiegi u pagi baxxi. L-istudji ekonomiċi u l-konsultazzjoni
pubblika jindikaw li r-relazzjoni bilaterali tal-kummerċ u l-investiment bejn
l-UE u l-Ġappun mhijiex qed tissodisfa l-potenzjal tagħha.
Ir-raġunijiet ewlenin huma taħlita ta' tariffi u ta' miżuri mhux
tariffarji [NTMs], fejn dawn tal-aħħar huma t-tħassib ewlieni
għall-esportaturi tal-UE u għall-investituri fil-Ġappun. Min hu l-aktar milqut? L-ekonomiji tal-UE u tal-Ġappun huma
milquta b'mod negattiv, bħalma huma n-negozju, l-impjegaturi u
l-konsumaturi tal-UE u tal-Ġappun, u l-aktar setturi tal-UE milquta
ħażin huma dawk li x'aktarx jibbenefikaw mit-tneħħija
tal-NTMs: eż. is-settur agroalimentari, awtomobilistiku, farmaċewtiku
u tal-apparat mediku. Għaliex hemm il-ħtieġa
tal-intervent pubbliku? Mingħajr reazzjonijiet negozjati
għall-problemi li jnaqqsu l-kummerċ u l-investiment, is-sitwazzjoni
x'aktarx li se tmur lura. B'rikonoxximent ta' din is-sitwazzjoni, waqt
is-summit tal-UE u l-Ġappun tat-28 ta' Mejju 2011,
il-mexxejja tas-summit qablu li jibdew il-proċess għal negozjati
paralleli għal: ·
Ftehim ta' Kummerċ Ħieles
(FKĦ)/Ftehim ta' Sħubija Ekonomika (FSE) dettaljat u komprensiv, li
jindirizzaw il-kwistjonijiet kollha ta' interess komuni
għaż-żewġ naħat, li jinkludu t-tariffi, il-miżuri
mhux tariffarji, is-servizzi, l-investiment, id-Drittijiet ta' Proprjetà
Intelletwali, il-kompetizzjoni u l-akkwist pubbliku; kif ukoll ·
ftehim vinkolanti, li jkopri l-kooperazzjoni
politika u globali u kooperazzjoni settorjali oħra b'mod komprensiv, u
mirfud mill-impenn komuni tagħhom għall-valuri u l-prinċipji
fundamentali." Il-mexxejja
tas-summit iddeċidew ukoll li jibdew eżerċizzju ta' valutazzjoni
kemm jista' jkun malajr biex jiddefinixxu l-kamp ta' applikazzjoni u l-livell
ta' ambizzjoni taż-żewġ negozjati. Il-kaġunijiet ewlenin tal-problema Hemm għadd ta' fatturi li jnaqqsu jew
jillimitaw il-potenzjal ta' kummerċ u investiment bejn l-UE u l-Ġappun,
li xi wħud minnhom jistgħu jiġu indirizzati permezz ta' riformi
domestiċi jew fil-politika kummerċjali, inklużi negozjati
kummerċjali, filwaqt li oħrajn (bħad-distanza ġeografika,
il-problemi ta' komunikazzjoni u l-preferenzi tal-konsumatur) għandhom
inqas probabbiltà li jittejbu permezz ta' miżuri bħal dawn. In-negozjati għandhom il-potenzjal li
jbiddlu t-tariffi, il-miżuri mhux tariffarji u anki l-fatturi
diskriminatorji jew ta' piż tal-ambjent regolatorju, li jaffettwaw
il-kummerċ tal-prodotti u s-servizzi, l-investiment u l-akkwist pubbliku. Kemm l-UE kif
ukoll il-Ġappun għandhom tariffi baxxi fuq il-prodotti. Madankollu,
it-tariffi tal-Ġappun għadhom għoljin fis-settur agrikolu u
f'dak tal-ikel ipproċessat u għax-xorb, u f'dawn is-setturi kollha
l-UE hi esportatur globali ewlieni. It-tariffi Ġappuniżi medji
applikati għal esportazzjonijiet importanti oħra tal-UE huma
ġeneralment baxxi. It-tariffi tal-UE fuq l-esportaturi
Ġappuniżi ewlenin huma ogħla. L-esportazzjonijiet
Ġappuniżi lejn l-UE fil-biċċa l-kbira jaqgħu taħt
għadd żgħir ta' setturi tal-manifattura, eż. il-vetturi
bil-mutur, l-elettronika u l-makkinarju. Għaldaqstant, l-interessi
offensivi tal-Ġappun jiffokaw fuq it-tneħħija tat-tariffi,
partikolarment minn mindu daħal fis-seħħ il-FKĦ bejn l-UE u
l-Korea, minħabba l-kompetizzjoni bejn il-Ġappun u l-Korea f'setturi
ta' esportazzjoni simili. Il-konsultazzjoni pubblika u l-istudji
jenfasizzaw li l-miżuri mhux tariffarji huma l-ostakli ewlenin
għall-esportazzjonijiet tal-UE lejn il-Ġappun. Partijiet mis-suq
Ġappuniż, eż. xi prodotti agrikoli u xi tagħmir
tat-trasport u prodotti ajrunawtiċi, huma magħluqa kważi
għal kollox għall-esportazzjonijiet tal-UE. Seba' setturi tan-negozju
li jkopru l-biċċa l-kbira tal-esportazzjonijiet tal-UE lejn il-Ġappun
huma dawk l-aktar milquta mill-NTMs eżistenti: is-sustanzi kimiċi
(inklużi l-farmaċewtiċi), is-settur awtomobilistiku, l-apparat
mediku, l-ikel ipproċessat, it-tagħmir tat-trasport,
it-telekomunikazzjoni u s-servizzi finanzjarji. In-nuqqas ta' trasparenza
fl-akkwist pubbliku, u l-problemi marbuta mal-IPR, ġew ukoll identifikati
bħala ostakli mhux tariffarji importanti li jagħmlu s-suq
Ġappuniż effettivament inaċċessibbli għall-kumpaniji
tal-UE.
2.
Analiżi tas-sussidjarjetà
Il-politika kummerċjali u l-innegozjar
tal-ftehimiet kummerċjali internazzjonali huma oqsma ta' kompetenza
esklużiva tal-UE: L-Artikolu 207 tat-Trattat dwar il-Funzjonament
tal-Unjoni Ewropea (TFUE). Il-prinċipju tas-sussidjarjetà ma japplikax
f'dan il-każ. Il-proposta tissodisfa wkoll it-test tal-proporzjonalità:
anki l-alternattivi li jħarsu l-aktar 'il bogħod ma jmorrux lil hinn
mill-ilħiq tal-miri tal-politika msemmija.
3.
Il-Miri
Il-mira globali tal-politika tal-UE
fir-rigward tar-relazzjonijiet ekonomiċi u kummerċjali hija li: ·
issaħħaħ u tiżviluppa aktar
il-kummerċ bilaterali, ·
tabolixxi r-restrizzjonijiet eżistenti fuq
il-kummerċ u l-investiment barrani, kif ukoll ·
tbaxxi t-tariffi doganali u ostakli oħra. . Għaldaqstant,
il-miri ġenerali tal-politika kummerċjali Ewropea jinkludu: ·
tkabbir intelliġenti, sostenibbli u
inklużiv permezz tal-espansjoni tal-kummerċ; ·
il-ħolqien ta' opportunitajiet ta' impjieg u
xogħol u benefiċċji soċjali; ·
prezzijiet aktar baxxi għall-konsumatur u
benefiċċji oħra għall-konsumatur; ·
kompetittività mtejba fis-swieq globali. Fir-rigward
tar-relazzjonijiet ekonomiċi u kummerċjali futuri bejn l-UE u
l-Ġappun, il-miri tal-politika speċifiċi tal-UE huma: ·
iż-żieda fil-volum ta' kummerċ
bilaterali tal-prodotti u s-servizzi billi jitnaqqsu l-ostakli; ·
iż-żieda fil-flussi ta' investiment bejn
l-UE u l-Ġappun billi jitnaqqsu l-ostakli; ·
il-kisba ta' aċċess bilanċjat
għas-swieq tal-akkwist pubbliku taż-żewġ partijiet. Il-miri speċifiċi taħt kull
wieħed minn dawn l-erba' suġġetti jwasslu ulterjorment għal
aktar miri operattivi dettaljati fir-rapport ewlieni.
4.
L-Alternattivi ta’ Politika
Bl-għan li jinkisbu dawn il-miri,
ġew eżaminati diversi xenarji ta' politika differenti. Dawn jinkludu (a) l-issoktar tal-qafas attwali fil-Pjan ta'
Azzjoni tal-2001, bi djalogi ekonomiċi bilaterali u programmi ta'
kooperazzjoni tan-negozji, bħad-Djalogu dwar ir-Riforma Regolatorja, u
d-Djalogu ta' Livell Għoli dwar il-Kummerċ u djalogi bilaterali
settorjali oħra (eż.: id-Djalogu dwar il-Politika Industrijali,
id-Djalogu dwar is-Servizzi Finanzjarji, id-Djalogu Bilaterali tal-IP),
bil-possibbiltà ta' titjib fil-funzjonament u fl-effettività tagħhom. (b) ftehim ta' kummerċ ħieles
(FKĦ) komprensiv bjen l-UE u l-Ġappun bit-tneħħija
tat-tariffi, bil-liberalizzazzjoni tal-kummerċ fis-servizzi, u bil-liberalizzazzjoni
u l-iffaċilitar tal-flussi tal-investiment fiż-żewġ
servizzi u fis-setturi mhux tas-servizzi, flimkien mat-tnaqqis
tal-ispejjeż tal-NTMs. Skont din l-alternattiva, l-analiżi
tħares lejn l-erba' xenarji differenti possibbli li jipproponu gradi
differenti tal-liberalizzazzjoni tal-kummerċ: żewġ xenarji
konservattivi u tnejn ambizzjużi, b'xenarju simmetriku u wieħed
asimmetriku f'kull każ. Ix-xenarji konservattivi u ambizzjużi
dwar it-tnaqqis fl-ispejjeż marbuta mal-NTMs huma maħsuba biex jipprovdu
firxa ta' riżultati possibbli. It-tnaqqis ta' 20 % jipprovdi minimu
sostanzjalment aktar baxx mir-riżultati fil-fatt miksuba fin-negozjar
tal-FKĦ bejn l-UE u l-Korea, filwaqt li t-tnaqqis fl-ispejjeż ta'
50 % jeżamina l-potenzjal ta' eżitu ambizzjuż ferm rigward
l-NTMs[1]. Ir-riżultati f'din
il-firxa huma konsistentement pożittivi, u jvarjaw biss fil-grad ta'
progress ġenerali. Ix-xenarji simmetriċi u asimmetriċi
jipprovdu stampa aktar sħiħa tal-ambizzjonijiet u l-miri
taż-żewġ partijiet. Ix-xenarji simmetriċi jipprovdu stampa
ta' parità totali. Ix-xenarji asimmetriċi jirrikonoxxu li filwaqt li
t-tnaqqis tal-piż ikkawżat mill-NTMs huwa wieħed
mill-prijoritajiet ewlenin tal-UE, il-prijorità ewlenija tal-Ġappun hija
t-tariffi tal-UE f'setturi ewlenin għall-Ġappun. Jista' jkun
meħtieġ grad ta' asimmetrija biex jinkiseb bilanċ
aċċettabbli tal-eżitu nnegozjat eventwalment. Fix-xenarji
asimmetriċi eżaminati, terz tal-ammont tat-tnaqqis fl-ispiża
tal-NTMs fuq il-prodotti li jseħħ min-naħa tal-Ġappun hu
preżunt li jseħħ min-naħa tal-UE. Ix-xenarji ambizzjużi jipprevedu ftehim
konformi mal-ġenerazzjoni ġdida ta' ftehimiet kummerċjali li
l-UE qiegħda tinnegozja bħalissa mal-imsieħba kummerċjali
bħall-Kanada. Il-ftehimiet
kummerċjali riċenti tal-UE għandhom tendenza jmorru lill hinn
mill-FKĦ Ġappuniżi kemm fil-kamp ta' applikazzjoni kif ukoll
fil-livell tal-ambizzjoni. FKĦ komprensiv
bejn l-UE u l-Ġappun ikun jeħtieġ ikopri għadd kbir ta'
kwistjonijiet ta' aċċess għas-suq li huma ta' interess
għaż-żewġ partijiet, inklużi t-tariffi, il-miżuri
mhux tariffarji li jaffettwaw il-kummerċ tal-prodotti (inklużi
l-aspetti tat-TBT u tal-SPS) u l-kummerċ tas-servizzi, aktar
aċċess għas-suq għas-servizzi, l-investiment u l-akkwist pubbliku
u jkopru l-ħarsien tal-investiment, il-kompetizzjoni u d-drittijiet ta'
proprjetà intellettwali. FKĦ komprensiv bejn l-UE u l-Ġappun
ġie indikat bħala l-alternattiva tal-għażla tal-UE u
tal-Ġappun permezz tad-deċiżjoni tagħhom fis-summit
tat-28 ta' Mejju 2011 biex jibda l-proċess lejn il-negozjati
ta' FKĦ, sakemm jistgħu jinħolqu l-kundizzjonijiet għal
dan. Kemm l-UE kif ukoll il-Ġappun x'aktarx
jikkonkludu għadd ta' FKĦ ma' pajjiżi terzi fis-snin li
ġejjin. Il-ftehimiet li l-UE qed tinnegozja bħalissa
mal-imsieħba kummerċjali l-oħra (il-Kanada, l-Indja,
il-pajjiżi tal-Mercosur u tal-ASEAN) jew li ffinalizzat riċentement
(eż. il-FKĦ bejn l-UE u l-Korea) ġew ikkunsidrati. Ix-xenarji differenti huma analizzati billi
wieħed jassumi li l-Aġenda ta' Doha għall-Iżvilupp
fl-Organizzazzjoni Dinjija tal-Kummerċ se tkun konkluża
b'suċċess. Madankollu, għal finijiet ta' tqabbil, ġiet
ukoll inkluża u kkunsidrata d-dejta disponibbli dwar il-liberalizzazzjoni
tal-kummerċ bilaterali mingħajr l-impatt ta' ftehim dwar id-DDA
fil-ġejjieni.
5.
Valutazzjoni tal-Impatti
L-Alternattiva (a), l-issoktar ta' arranġamenti simili għal dawk li huma
fis-seħħ bħalissa, meta jitqiesu r-riżultati estremament
limitati miksuba sal-lum matul bosta snin, x'aktarx li ma tipproduċi
l-ebda tkabbir sostanzjali tal-kummerċ bilaterali u l-volumi ta'
investiment. Għaldaqstant, mhi mistennija l-ebda żieda fil-PDG la
fl-UE u lanqas fil-Ġappun. L-Alternattiva (b), FKĦ komprensiv, turi żidiet sostanzjali fil-PDG
għall-UE sal-2020: 0,75 % fil-każ tax-xenarju konservattiv u
simmetriku, jew 0,34 % għax-xenarju konservattiv u asimmetriku; u
1,9 % fix-xenarju ambizzjuż u simmetriku, jew 0,8 %
għax-xenarju ambizzjuż u asimmetriku[2].
Għall-Ġappun iż-żieda fil-PDG hi stmata għal
0,27 % għaż-żewġ xenarji konservattivi u għal
0,7 % għaż-żewġ xenarji ambizzjużi. Fiż-żewġ xenarji konservattivi
u ambizzjużi, l-esportazzjonijiet globali tal-UE huma previsti li
jiżdiedu fl-istess setturi b'żidiet kbar fis-setturi tal-ikel
ipproċessat, tal-makkinarju tal-elettriku u tas-servizzi tan-negozju.
Fix-xenarji ambizzjużi, l-importazzjonijiet globali tal-UE jiżdiedu
b'mod sostanzjali fis-setturi tal-ikel ipproċessat, tat-trasport bl-ajru u
tas-servizzi tal-finanzi u tan-negozju u jaqgħu taħt is-settur
tal-makkinarju tal-elettriku. L-industrija tal-vetturi bil-mutur tara żieda
kemm fl-esportazzjonijiet [6,73 %/asimmetriku] kif ukoll
fl-importazzjonijiet [2,6 %/asimmetriku] globali tal-UE. Għall-Ġappun, l-esportazzjonijiet
globali jiżdiedu notevolment għas-setturi tal-makkinarju
tal-elettriku, tal-vetturi bil-mutur kif ukoll ta' makkinarju ieħor, ta'
tagħmir tat-trasport ieħor u ta' manifatturi oħra.
Il-Ġappun jesperjenza żieda sostanzjali fl-importazzjonijiet globali
fis-setturi tal-ikel ipproċessat, tas-sustanzi kimiċi, tat-tagħmir
tat-trasport, tal-vetturi bil-mutur, u tas-servizzi tan-negozju. Fl-UE l-SMEs jistgħu jkunu mistennija
jibbenefikaw minn FKĦ bejn l-UE u l-Ġappun, billi l-ispejjeż
regolatorji ta' konformità huma ta' piż akbar għalihom u għaliex
l-SMEs huma prominenti fis-setturi li x'aktarx se jibbenefikaw, bħas-settur
tal-ikel ipproċessat. Għall-ambjent, l-impatti negattivi fuq
l-iskart, il-bijodiversità u r-riżorsi naturali, x'aktarx li jittaffew sa
ċertu punt permezz taż-żieda fil-kummerċ ta' prodotti u
servizzi sostenibbli mil-lat ambjentali. Fir-rigward tal-emissjonijiet globali,
kull żieda wara FKĦ hi mistennija li tkun qrib iż-żero [1,5
miljun tunnellata ta' CO2]. Iż-żieda fil-kummerċ bejn l-UE
u l-Ġappun twassal għal żieda fid-domanda għax-xogħol,
u żżid il-benessri taż-żewġ partijiet: aktar ma tkun
kbira l-liberalizzazzjoni, aktar ikunu kbar il-benefiċċji
soċjali. L-impjiegi fl-UE huma previsti li jiżdiedu konsiderevolment
eż. fis-settur tal-makkinarju tal-elettriku, b'telf limitat fis-settur
tal-vetturi bil-mutur [bejn -0,40 % għal FKĦ konservattiv u asimmetriku
u -0,10 % għal FKĦ ambizzjuż u asimmetriku] Bħala żewġ demokraziji
żviluppati ħafna, il-FKĦ bejn l-UE u l-Ġappun mhuwiex
mistenni li jkollu impatt dirett fuq id-drittijiet tal-bniedem. L-UE u l-Ġappun u l-pajjiżi terzi se
jibbenefikaw mill-effetti ta' semplifikazzjoni li jirriżultaw mit-tnaqqis
tal-NTMs fiż-żewġ pajjiżi, filwaqt li jitnaqqsu
l-ispejjeż amministrattivi meta jsir kummerċ mal-UE jew
mal-Ġappun.
6.
Tqabbil tal-Alternattivi
L-Alternattiva (a), li tissokta
bl-istatus quo, ma tiksibx il-miri operattivi stabbiliti hawn fuq. L-issoktar
tal-programmi ta' kooperazzjoni ekonomika bilaterali bħad-Djalogu dwar
ir-Riforma Regolatorja, b'kooperazzjoni ulterjuri f'oqsma fejn diġà
ġew iffirmati l-ftehimiet, mhux mistenni jipproduċi wisq f'termini
ta' riżultati. L-effettività tagħha fil-kisba tal-miri operattivi
tista' titqies bħala ineżistenti jew saħansitra potenzjalment
negattiva. L-Alternattiva (b), bix-xenarji varji
tagħha, titlob għal negozjati tal-FKĦ fuq skala sħiħa,
bi gradi differenti ta' liberalizzazzjoni tal-kummerċ, u tnaqqis
fl-ispejjeż tal-kummerċ, li kollha jirriżultaw
f'benefiċċji konsiderevoli kemm fl-UE kif ukoll fil-Ġappun.
Il-benefiċċji jinkludu żidiet fil-PDG, żidiet fl-esportazzjonijiet,
żidiet ġenerali fl-impjiegi, żidiet fil-pagi għall-impjegati
tas-sengħa u dawk b'ħiliet limitati, flimkien ma' żidiet
fil-kompetittività u titjib fil-pożizzjoni kemm tal-UE kif ukoll
tal-Ġappun meta mqabbla ma' kompetituri globali oħra. It-tqabbil tar-riżultati ewlenin
għall-alternattivi varji ta' FKĦ hu stabbilit fil-forma ta' tabella
fl-Anness 1.
7.
Monitoraġġ u Valutazzjoni
Fl-Anness 2 hemm stabbilita tabella li
tiġbor fil-qosor l-indikaturi ewlenin proposti
għall-monitoraġġ tal-progress lejn il-kisba tal-miri
ġenerali, speċifiċi u operattivi ddikjarati. ANNESS 1 Kriterju || L-Alternattivi ta’ Politika A || B1 || B2 || B3 || B4 Tkabbir ekonomiku aktar sostenibbli u aktar mgħaġġel || 0 || + || + || + || + Jitjiebu l-opportunitajiet ta' xogħol u l-benefiċċji soċjali u tal-konsumatur || 0 || + || + || ++ || ++ Titjieb il-kompetittività tal-Ewropa fis-swieq globali || 0 || + || + || ++ || +++ Jiżdied il-volum ta' kummerċ bilaterali tal-prodotti billi jitnaqqsu l-ostakli || 0 || + || + || ++ || +++ Jiżdied il-volum ta' kummerċ bilaterali tas-servizzi billi jitnaqqsu l-ostakli || 0 || + || + || ++ || +++ Jiżdiedu l-flussi ta' investiment bejn l-UE u l-Ġappun billi jitnaqqsu l-ostakli || 0 || + || + || ++ || ++ Jinkiseb aċċess għas-suq tal-akkwisti tal-gvern Ġappuniż li jista' jitqabbel ma' dak offrut mill-UE || 0 || + || + || ++ || ++ Effettività (Ġenerali) || 0/- || + || + || ++ || +++ Effiċjenza (Ħin u riżorsi użati b'rabta mal-effettività stmata) || 0/- || + || + || ++ || ++ Koerenza mal-miri ta' politika ġenerali tal-UE (pereżempju, kif deskritt fl-istrateġija tal-UE 2020) || 0 || + || + || ++ || ++ L-abbiltà li jinkiseb vantaġġ mill-effetti ta' sinerġija (pereżempju, l-iskambju tal-ispeċjalizzazzjoni) || 0 || + || + || ++ || ++ Jinkiseb vantaġġ mill-effetti ta' semplifikazzjoni (pereżempju permezz ta' tnaqqis tal-NTMs) || 0 || + || + || ++ || ++ ANNESS 2 Miri ġenerali || Indikaturi Tkabbir ekonomiku || - perċentwali ta' bidla fil-PDG - perċentwali ta' bidla fil-PDG Il-ħolqien ta' opportunitajiet ta' impjieg u benefiċċji soċjali || - perċentwali ta' bidla f'aktar u f'inqas impjiegi speċjalizzati - perċentwali ta' bidla f'aktar u f'inqas pagi speċjalizzati Titjieb il-kompetittività relattiva tal-UE || il-lokalizzazzjoni tal-Istati Membri tal-UE fil-klassifikazzjonijiet li jkejlu l-kompetittività globali, bħar-"Rapport dwar il-Kompetittività Globali" tal-Forum Ekonomiku Dinji Miri speċifiċi || Żieda fil-kummerċ bilaterali tal-prodotti || - perċentwali ta' bidla relattiva u assoluta fil-valur tal-esportazzjonijiet u l-importazzjonijiet bilaterali tal-prodotti skont is-settur Żieda fil-kummerċ bilaterali tas-servizzi || - perċentwali ta' bidla relattiva u assoluta fil-valur tal-esportazzjonijiet u l-importazzjonijiet bilaterali tas-servizzi skont is-settur Żieda fl-investiment bilaterali || - perċentwali ta' bidla relattiva u assoluta tal-flussi ta' investiment bilaterali Żieda fl-aċċess għas-suq, speċjalment għall-UE, fis-settur tal-akkwisti tal-gvern || Żieda fl-għadd ta' offerti assigurati mill-kumpaniji tal-UE Miri operattivi || Tneħħija tat-tariffi fuq il-prodotti industrijali u l-prodotti agrikoli || Skedi tat-tariffi Ġappuniżi Jitnaqqsu l-NTMs rigward il-kummerċ tal-prodotti || - konverġenza tar-regolamenti standard/tekniċi - annessi speċifiċi - bidla fir-regolamenti/fil-liġijiet - żieda fit-trasparenza/fid-disponibbiltà tal-informazzjoni - stħarriġ tan-negozji Jitnaqqsu l-NTMs u jiżdied l-aċċess għas-suq fil-kummerċ tas-servizzi || - konverġenza tar-regolamenti standard/tekniċi - bidla fir-regolamenti/fil-liġijiet - lista tal-impenji u annessi speċifiċi - żieda fit-trasparenza/fid-disponibbiltà tal-informazzjoni - stħarriġ tan-negozji Jitnaqqsu l-NTMs rigward l-investiment dirett barrani || - konverġenza tar-regolamenti standard/tekniċi - lista tal-impenji u annessi speċifiċi - bidla fir-regolamenti/fil-liġijiet - żieda fit-trasparenza/fid-disponibbiltà tal-informazzjoni - stħarriġ tan-negozji Jitnaqqsu l-NTMs u jiżdied l-aċċess għas-suq tal-akkwisti tal-gvern Ġappuniż || - konverġenza tar-regolamenti standard/tekniċi - bidla fir-regolamenti/fil-liġijiet - żieda fit-trasparenza/fid-disponibbiltà tal-informazzjoni - lista tal-impenji u anness speċifiku stħarriġ tan-negozji [1] Billi hemm għadd ta' raġunijiet leġittimi
għar-regolamenti nazzjonali, mhuwiex realistiku li wieħed jassumi li
l-NTMs kollha jistgħu jitneħħew, jew anki li kwalunkwe
diverġenza regolatorja tista' tiġi allinjata. Għaldaqstant,
tnaqqis fl-ispejjeż ta' 50 % jista' jitqies bħala ambizzjuż. [2] NB. Fix-xenarju asimmetriku, l-ammont tat-tnaqqis
fl-ispiża tal-NTMs fuq il-prodotti min-naħa tal-UE hu previst
bħala terz tat-tnaqqis min-naħa tal-Ġappun.