29.4.2011   

MT

Il-Ġurnal Uffiċjali tal-Unjoni Ewropea

C 127/1

1.

L-Artikolu 67(1) tat-Trattat dwar il-Funzjonament tal-Unjoni Ewropea (TFUE) jipprovdi għat-twaqqif ta' spazju ta' libertà, sigurtà u ġustizzja b'rispett għad-drittijiet fundamentali u s-sistemi u t-tradizzjonijiet legali differenti tal-Istati Membri.

2.

Il-pjan ta' azzjoni pluriennali Ewropew dwar il-Ġustizzja Elettronika 2009-2013 tal-Kunsill tal-Unjoni Ewropea jisħaq dwar l-importanza tal-aċċess għall-każistika nazzjonali, il-ħtieġa ta' standardizzazzjoni u arkitettura teknika deċentralizzata (1).

3.

Ir-Riżoluzzjoni tal-Parlament Ewropew tad-9 ta' Lulju 2008 dwar ir-rwol tal-imħallef nazzjonali fis-sistema ġudizzjarja Ewropea (2) tisħaq dwar il-ħtieġa ta' aċċess transkonfinali għall-każistika nazzjonali li tippermetti lill-imħallef nazzjonali jaqdi r-rwol tiegħu fl-ordni ġuridiku Ewropew.

4.

Spazju Ewropew ta' Libertà, Sigurtà u Ġustizzja fejn jista' jkun hemm kooperazzjoni ġudizzjarja jeħtieġ mhux biss l-għarfien tal-liġi Ewropea, iżda b'mod partikolari l-għarfien reċiproku tas-sistemi legali tal-Istati Membri l-oħra.

5.

Il-portal Ewropew tal-Ġustizzja Elettronika għandu jilħaq l-objettiv tat-tixrid tal-informazzjoni dwar l-UE u s-sistemi legali tal-Istati Membri u għandu jservi bħala strument utli għaċ-ċittadini, il-professjonisti legali kif ukoll l-awtoritajiet tal-Istati Membri.

6.

L-għarfien dwar is-sustanza u l-applikazzjoni tal-liġi tal-Unjoni Ewropea ma tistax tinkiseb biss minn sorsi legali tal-UE, iżda għandu jittieħed kont ukoll tal-każistika tal-qrati nazzjonali, kemm ta' deċiżjonijiet li jitolbu deċiżjoni preliminari, kif ukoll deċiżjonijiet wara deċiżjoni preliminari u dawk li japplikaw il-liġi tal-UE waħedha.

7.

Permezz ta' appoġġ finanzjarju jew l-involviment dirett mill-Unjoni Ewropea s-snin reċenti raw inizjattivi li jappoġġaw il-miri msemmija hawn fuq, bħalma hija l-meta search engine tan-Netwerk tal-Presidenti tal-Qrati Supremi Ġudizzjarji tal-Unjoni Ewropea (3), id-databases Dec.Nat. u Jurifast tal-Assoċjazzjoni tal-Kunsilli tal-Istat u tal-Ġurisdizzjonijiet Amministrattivi Supremi tal-Unjoni Ewropea (4), id-database JURE (Infurzar tal-għarfien ġuridiku) tal-Kummissjoni Ewropea (5), l-EUR-Lex, u d-database tal-każistika tal-Aġenzija tal-Unjoni Ewropea għad-Drittijiet Fundamentali (6).

8.

L-użu u l-appoġġ ta' dawn l-inizjattivi ssottolinjaw il-ħtieġa ta' tali databases iżda l-esperjenza uriet li t-tiftix f'dawn id-databases ħafna drabi huwa kumpless ħafna u mhux faċli għall-utent.

9.

Studju (7) li sar minn task group tal-Grupp ta' Ħidma dwar il-Liġi Elettronika għamilha ċara li apparti l-problemi minħabba l-multilingwiżmu, dawn il-problemi huma l-aktar minħabba n-nuqqas ta' identifikaturi uniformi għall-każistika. Fil-livell nazzjonali jeżistu diversi sistemi ta' identifikaturi, xi wħud minnhom magħżula mill-qorti, oħrajn speċifiċi għall-bejjiegħ. Databases magħmula biex jistaqsu dwar każistika minn Stati Membri diversi – li minnhom dawn ta' hawn fuq huma biss ftit eżempji – xi kultant jivvintaw is-sistema ta' identifikazzjoni proprja, u xi kultant jagħmlu użu mill-ġdid ta' waħda jew aktar mis-sistemi ta' enumerar nazzjonali. Għaldaqstant it-tiftix u l-kwotazzjoni tal-każistika fil-kuntest transkonfinali huwa ferm diffiċli: identifikaturi li jinħarġu minn sistema waħda jaf ma jkunux kompatibbli ma' sistemi oħra.

10.

L-istudju msemmi hawn fuq għamilha ċara li jeżistu problemi komparabbli ma' metadata użata biex tiddeskrivi l-każistika. Il-fatt li kważi d-databases kollha nazzjonali u Ewropej jużaw regoli ta' tismija u ddisinjar għall-metadata jipperikola l-possibilitajiet għal tiftix ta' każistika transkonfinali effettiv u faċli għall-utent għall-imħallfin, il-professjonisti legali u ċ-ċittadini.

11.

F'konformità mal-prinċipju tal-proporzjonalità, il-prinċipju tad-deċentralizzazzjoni endorsjat mill-pjan ta' azzjoni Ewropew dwar il-Ġustizzja Elettronika u l-prinċipji tal-Qafas Ewropew tal-Interoperabbiltà m'għandux ikun hemm database Ewropew ċentralizzat ta' każistika nazzjonali. Barra minn hekk, il-ħtiġijiet speċifiċi tal-utenti għal oqsma speċifiċi tal-liġi li jirriżultaw jirrikjedu databases differenti b'funzjonalitajiet differenti, kemm jekk huma ta' natura pubblika jew kummerċjali.

12.

Kemm biex ikun faċilitat aktar żvilupp tad-databases dwar il-każistika Ewropea u biex jinqdew il-professjonisti legali u ċ-ċittadini fl-użu tagħhom ta' dawn id-databases, sistema komuni għall-identifikazzjoni, il-kwotazzjoni u l-metadata tal-każistika hija meqjusa bħala indispensabbli. Tali standard komuni jkun kompatibbli mal-prinċipji li ssemmew fil-paragrafu preċedenti.

13.

Għall-identifikazzjoni tad-deċiżjonijiet ġuridiċi għandu jintuża identifikatur standard li jkun jintgħaraf, jinqara u jinftiehem kemm mill-bniedem kif ukoll mill-kompjuters, u li jkun kompatibbli mal-istandards teknoloġiċi. Fl-istess ħin huwa mixtieq li s-sistemi ta' identifikazzjoni tal-każistika nazzjonali jistgħu joperaw b'mod parallel ma' tali standard Ewropew, iżda wkoll li standard Ewropew jista' jservi bħala l-uniku standard nazzjonali għall-dawk il-pajjiżi li jixtiequ hekk.

14.

Minħabba li l-organizzazzjoni tal-qrati u l-applikazzjonijiet tal-IT użati mill-qrati jvarjaw mhux biss bejn l-Istati Membri, iżda wkoll fl-istess Stat Membru, għandu jkun possibbli li tkun implimentata sistema ta' identifikar u metadata qorti b'qorti.

15.

F'konformità mal-prinċipji ddikjarati dwar il-proporzjonalità u d-deċentralizzazzjoni, id-deċiżjonijiet dwar il-parteċipazzjoni tal-qrati u t-tribunali f'din is-sistema ta' identifikazzjoni tal-każistika u metadata jridu jittieħdu fil-livell nazzjonali.

16.

Minħabba li l-aċċettazzjoni tal-qrati u l-gvernijiet tal-Istati Membri hija ta' importanza kbira għall-implimentazzjoni u l-użu ta' sistema ta' identifikazzjoni u metadata għall-każistika, saru konsultazzjonijiet dwar din ir-rakkomandazzjoni man-Netwerk tal-Presidenti tal-Qrati Ġudizzjarji Supremi tal-Unjoni Ewropea, l-Assoċjazzjoni tal-Kunsilli tal-Istat u tal-Ġurisdizzjonijiet Amministrattivi Supremi tal-Unjoni Ewropea, in-Netwerk Ewropew tal-Kunsilli għall-Ġudikatura, l-inizjattiva LEX, il-workshop CEN/Metalex, Semic.EU, il-Kummissjoni Ewropea, il-Qorti tal-Ġustizzja tal-Unjoni Ewropea u l-Uffiċċju tal-Pubblikazzjonijiet tal-Unjoni Ewropea.

17.

Is-sistema ta' identifikazzjoni u metadata għandha tkun magħrufa sew maċ-ċittadini u l-professjonisti legali. Aktar minn hekk, biex jitjiebu l-possibbiltajiet li tinstab każistika li hi fornuta b'identifikatur u metadata kif deskritt fl-Anness, dawn id-deċiżjonijiet ġuridiċi jridu jkunu jistgħu jitfittxu – bl-identifikatur u sett minimu ta' metadata – permezz ta' interface komuni. L-arkitettura ta' dan l-interface tat-tiftix komuni għandha tkun deċentralizzata u integrata fil-portal Ewropew tal-Ġustizzja Elettronika. Minkejja li l-interface tat-tiftix komuni jirrinforza l-użu ta' sistema ta' identifikazzjoni u metadata, m'għandux ikunu prerekwiżit għall-introduzzjoni tal-identifikazzjoni u l-metadata fil-livell nazzjonali.

18.

L-interface tat-tiftix komuni m'għandux ikollu biss il-possibbiltà li jikkonnettja mal-websajts pubbliċi iżda wkoll ma' websajts oħrajn li jiddisseminaw il-każistika, pereżempju f'verżjonijiet sommarji jew tradotti.

19.

L-Istati Membri huma mistiedna jintroduċu, fuq bażi volontarja fil-livell nazzjonali, il-European Case Law Identifier (minn hawn 'l quddiem imsejjaħ ECLI) u sett minimu ta' metadata uniformi għall-każistika.

20.

Ir-rakkomandazzjonijiet li ġejjin ikunu japplikaw għall-Istati Membri li jiddeċiedu li jintroduċu l-ECLI u sett minimu ta' metadata uniformi għall-każistika: