2.12.2017   

MT

Il-Ġurnal Uffiċjali tal-Unjoni Ewropea

L 318/1

(1)

Ir-Regolament tal-Kummissjoni (KE) Nru 474/2006 (2) stabbilixxa l-lista ta' kumpaniji tal-ajru li huma soġġetti għal restrizzjonijiet operattivi fl-Unjoni, imsemmija fil-Kapitolu II tar-Regolament (KE) Nru 2111/2005.

(2)

F'konformità mal-Artikolu 4(3) tar-Regolament (KE) Nru 2111/2005, ċerti Stati Membri u l-Aġenzija Ewropea tas-Sikurezza tal-Avjazzjoni (“EASA”) għaddew l-informazzjoni rilevanti lill-Kummissjoni fil-kuntest tal-aġġornament ta' dik il-lista. L-informazzjoni rilevanti ġiet ikkomunikata wkoll minn pajjiżi terzi u organizzazzjonijiet internazzjonali. Jenħtieġ li l-lista tiġi aġġornata abbażi ta' dik l-informazzjoni.

(3)

Il-Kummissjoni infurmat lill-kumpaniji tal-ajru kollha kkonċernati direttament jew permezz tal-awtoritajiet responsabbli għas-sorveljanza regolatorja tagħhom, dwar il-fatti u l-kunsiderazzjonijiet essenzjali li jiffurmaw il-bażi għal deċiżjoni li timponilhom projbizzjoni fuq l-operat fl-Unjoni jew li temenda l-kundizzjonijiet ta' projbizzjoni fuq l-operat imposta fuq kumpanija tal-ajru li tkun inkluża fil-lista.

(4)

Il-Kummissjoni tat l-opportunità lill-kumpaniji tal-ajru kkonċernati biex jikkonsultaw id-dokumenti fornuti mill-Istati Membri, biex jissottomettu kummenti bil-miktub u biex jagħmlu preżentazzjoni orali lill-Kummissjoni u lill-Kumitat stabbilit permezz tar-Regolament tal-Kunsill (KEE) Nru 3922/91 (3) (il-“Kumitat għas-Sikurezza tal-Ajru”).

(5)

Il-Kumitat għas-Sikurezza tal-Ajru rċieva aġġornamenti mingħand il-Kummissjoni dwar il-konsultazzjonijiet konġunti li għaddejjin, fi ħdan il-qafas tar-Regolament (KE) Nru 2111/2005 u tar-Regolament tal-Kummissjoni (KE) Nru 473/2006 (4), mal-awtoritajiet kompetenti u mal-kumpaniji tal-ajru tal-Guinea Ekwatorjali, tan-Nepal,tan-Niġerja, ta' Saint Vincent u l-Grenadini, tat-Tajlandja, tal-Ukrajna u tal-Venezwela. Il-Kummissjoni pprovdiet ukoll informazzjoni lill-Kumitat għas-Sikurezza tal-Ajru dwar is-sitwazzjoni tas-sikurezza tal-avjazzjoni fl-Afganistan, fil-Bolivja, fl-Indja, fl-Indoneżja, fl-Iraq, fil-Każakistan, fil-Libja, fil-Moldova, fil-Mozambique u fiż-Żambja u dwar il-konsultazzjonijiet tekniċi mar-Russja.

(6)

L-EASA ppreżentat ir-riżultati tal-analiżi tar-rapporti tal-verifika li twettqu mill-Organizzazzjoni tal-Avjazzjoni Ċivili Internazzjonali (“ICAO”) fil-qafas tal-Programm ta' Spezzjoni Universali għas-Sorveljanza tas-Sikurezza tal-ICAO lill-Kummissjoni u lill-Kumitat għas-Sikurezza tal-Arju. F'dan il-kuntest, l-Istati Membri ġew mistiedna biex jagħtu prijorità lill-ispezzjonijiet fir-rampa ta' kumpaniji tal-ajru ċċertifikati minn pajjiżi terzi li għalihom l-ICAO identifikat Tħassib Sinifikanti dwar is-Sikurezza jew li fir-rigward tagħhom l-EASA kkonkludiet li hemm nuqqasijiet sinifikanti fis-sistema tas-sorveljanza tas-sikurezza. Minbarra l-konsultazzjonijiet li għamlet il-Kummissjoni skont ir-Regolament (KE) Nru 2111/2005, il-prijoritizzazzjoni tal-ispezzjonijiet fir-rampa se tippermetti l-akkwist ta' aktar informazzjoni fir-rigward tal-prestazzjoni tas-sikurezza tal-kumpaniji tal-ajru li ngħataw il-liċenzja f'dawk il-pajjiżi terzi.

(7)

L-EASA infurmat ukoll lill-Kummissjoni u lill-Kumitat għas-Sikurezza tal-Ajru dwar ir-riżultati tal-analiżi tal-ispezzjonijiet fir-rampa li twettqu skont il-programm tal-Valutazzjoni tas-Sikurezza tal-Inġenji tal-Ajru Barranin (“SAFA”) f'konformità mar-Regolament tal-Kummissjoni (UE) Nru 965/2012 (5).

(8)

Barra minn hekk, l-EASA infurmat lill-Kummissjoni u lill-Kumitat għas-Sikurezza tal-Ajru dwar il-proġetti ta' assistenza teknika li twettqu f'pajjiżi terzi milquta minn miżuri jew monitoraġġ skont ir-Regolament (KE) Nru 2111/2005. L-Aġenzija pprovdiet informazzjoni dwar il-pjanijiet u t-talbiet għal aktar assistenza teknika u kooperazzjoni biex titjieb il-kapaċità amministrattiva u teknika tal-awtoritajiet tal-avjazzjoni ċivili, bil-għan li jiġu solvuti n-nuqqasijiet ta' konformità mal-istandards applikabbli tal-avjazzjoni ċivili internazzjonali. L-Istati Membri ġew mistiedna jirrispondu għal talbiet bħal dawn fuq bażi bilaterali b'koordinazzjoni mal-Kummissjoni u mal-EASA. Dwar dan, il-Kummissjoni tenniet is-siwi tal-għoti ta' informazzjoni lill-komunità tal-avjazzjoni internazzjonali, b'mod partikolari permezz tal-bażi tad-dejta tas-“Safety Collaborative Assistance Network” (“SCAN”) tal-ICAO, dwar l-assistenza teknika li jagħtu l-Unjoni u l-Istati Membri tagħha biex titjieb is-sikurezza tal-avjazzjoni madwar id-dinja.

(9)

Il-Eurocontrol aġġorna lill-Kummissjoni u lill-Kumitat għas-Sikurezza tal-Ajru dwar il-qagħda tal-funzjoni ta' twissija tal-SAFA u pprovda l-istatistika attwali għall-messaġġi ta' twissija għal kumpaniji tal-ajru pprojbiti.

(10)

Wara l-analiżi mill-EASA tal-informazzjoni li ħarġet minn spezzjonijiet fir-rampa li twettqu fuq inġenji tal-ajru ta' kumpaniji tal-ajru tal-Unjoni u minn spezzjonijiet ta' standardizzazzjoni li twettqu mill-EASA, kif ukoll minn spezzjonijiet u verifiki speċifiċi li twettqu mill-awtoritajiet nazzjonali tal-avjazzjoni, diversi Stati Membri ħadu ċerti miżuri ta' infurzar u infurmaw lill-Kummissjoni u lill-Kumitat għas-Sikurezza tal-Ajru dwar dawk il-miżuri.

(11)

L-Istati Membri tennew li kienu lesti jaġixxu kif meħtieġ jekk xi informazzjoni rilevanti dwar is-sikurezza tindika li hemm riskji imminenti għas-sikurezza minħabba nuqqas ta' konformità min-naħa tal-kumpaniji tal-ajru tal-Unjoni mal-istandards xierqa tas-sikurezza.

(12)

Fis-7 ta' Ġunju 2017, ir-rappreżentanti tal-Kummissjoni u tal-EASA ltaqgħu ma' rappreżentanti tal-Autoridad Aeronautica de Guinea Ecuatorial (“AAGE”). L-iskop ta' dik il-laqgħa kien li jissoktaw il-konsultazzjonijiet mill-aħħar laqgħa fl-2013. L-AAGE infurmat lill-Kummissjoni u lill-EASA dwar l-azzjonijiet meħuda biex titjieb il-konformità mar-rekwiżiti tal-ICAO għal sistema tas-sorveljanza tas-sikurezza u enfasizzat ukoll l-isforzi politiċi biex jiġu implimentati r-riformi.

(13)

Waqt il-laqgħa tas-7 ta' Ġunju 2017, l-AAGE rrikonoxxiet li, fil-passat, il-kumpaniji tal-ajru mill-Guinea Ekwatorjali ma kinux ġew iċċertifikati skont ir-rekwiżiti tal-ICAO. Għal dik ir-raġuni, l-AAGE rrevokat iċ-ċertifikati ta' diversi kumpaniji tal-ajru ċċertifikati f'dan il-pajjiż u pproċediet bil-proċess il-ġdid ta' ħames fażijiet għaċ-ċertifikazzjoni tal-kumpaniji tal-ajru li għad baqa'. L-AAGE tat ukoll informazzjoni dwar l-ippjanar u r-reklutaġġ tal-persunal, ir-reġistru tal-inġenji tal-ajru, il-programm ta' riċertifikazzjoni tal-inġenji tal-ajru u l-programm ta' sorveljanza tas-sikurezza tagħha.

(14)

Kif ġie osservat fil-kuntest tal-verifika tal-ICAO fi Frar 2017, l-AAGE kisbet rata ta' implimentazzjoni effettiva tal-istandards internazzjonali tas-sikurezza ta' 62,5 % minn madwar 10 % fil-passat.

(15)

Mis-16 sal-20 ta' Ottubru 2017, fil-Guinea Ekwatorjali saret żjara ta' valutazzjoni fuq il-post tal-Unjoni. F'dik iż-żjara ħadu sehem esperti mill-Kummissjoni, mill-EASA u mill-Istati Membri. Waqt dik iż-żjara, ġie vvalutat ix-xogħol li tagħmel l-AAGE, li kien ivverifikat permezz ta' żewġ żjarat liż-żewġ kumpaniji tal-ajru attivi fil-Guinea Ekwatorjali. Instab li l-istruttura organizzattiva tal-AAGE, li hija awtorità tal-avjazzjoni ċivili awtonoma u indipendenti li ġiet stabbilita reċentement u li bdiet twettaq l-attivitajiet ta' sorveljanza tas-sikurezza tagħha fl-2012, hija xierqa għal-livell ta' attivitajiet tal-avjazzjoni fil-Guinea Ekwatorjali. Instab ukoll li l-oqsma kollha tal-avjazzjoni ċivili huma koperti mill-AAGE u li din għandha l-baġit u r-riżorsi tagħha stess. Madankollu, ġie osservat li l-AAGE teħtieġ spetturi kkwalifikati kif xieraq, speċjalment fil-qasam tal-operazzjonijiet tat-titjir u anke fir-rigward tat-trasport kummerċjali bl-ajru, sabiex twettaq is-sorveljanza tas-sikurezza tal-kumpaniji tal-ajru ċċertifikati fil-Guinea Ekwatorjali sewwa u b'mod effettiv.

(16)

Iż-żjara wriet li fil-Guinea Ekwatorjali ġiet stabbilita sistema regolatorja komprensiva. L-AAGE qed taħdem fuq aġġornament tar-regolamenti biex tibqa' f'konformità mal-aħħar żviluppi fl-istandards internazzjonali tas-sikurezza tal-avjazzjoni. Madankollu, l-AAGE sserraħ ħafna fuq iċ-ċertifikati, il-liċenzji u l-awtorizzazzjonijiet li jkunu ħarġu awtoritajiet u organizzazzjonijiet oħrajn, mingħajr ma tivverifika hi stess, filwaqt li l-verifika minnha stess hija parti essenjzali mill-kompiti tas-sorveljanza tas-sikurezza tal-AAGE. Għaldaqstant, dan il-proċess ta' verifika jenħtieġ li jiġi inkluż fil-proċeduri tal-AAGE u jiġi implimentat b'mod xieraq.

(17)

Waqt iż-żjara, l-AAGE wriet li bħalissa hemm biss żewġ kumpaniji tal-ajru ċċertifikati fil-Guinea Ekwatorjali, jiġifieri CEIBA Intercontinental u Cronos Airlines. Iċ-ċertifikati ta' operatur tal-ajru għall-kumpaniji tal-ajru Punto Azul u Tango Airways ġew revokati.

(18)

Matul iż-żjara lil CEIBA Intercontinental, bħala parti miż-żjara ta' valutazzjoni fuq il-post tal-Unjoni, ġie osservat li din għadha topera b'ċertifikat tal-operatur tal-ajru antik u waslet biss sat-tieni fażi tal-proċedura kontemporanja b'ħames fażijiet taċ-ċertifikazzjoni tal-operaturi tal-ajru. Bħalissa Ceiba Intercontinental qed isirulha ħafna tibdiliet li qed iwasslu għal nuqqas ta' aġġornamenti u approvazzjonijiet tal-manwali essenzjali tal-operazzjoni tat-titjir u tal-manutenzjoni u dokumentazzjoni oħra. Barra minn hekk, dawn il-manwali u din id-dokumentazzjoni għadhom mhumiex addattati għall-operazzjonijiet u għall-inġenji tal-ajru tal-kumpanija tal-ajru. Is-sistema tal-ġestjoni tas-sikurezza tagħha qed tiġi żviluppata u l-kumpanija tal-ajru għadha ma inkorporatx analiżi tar-riskju xierqa. Il-politiki tas-sikurezza tagħha huma mfassla u stabbiliti iżda mhumiex ikkomunikati b'mod ċar u wiesa' fl-organizzazzjoni tagħha. Is-sistema tal-kwalità tagħha teħtieġ ukoll aktar żviluppi.

(19)

Iż-żjara lill-kumpanija tal-ajru Cronos Airlines wriet li hija konxja mir-regolamenti applikabbli fil-Guinea Ekwatorjali u li qed tagħmel sforzi biex timplimenta dawk l-istandards tal-avjazzjoni. Hija għaddiet b'suċċess il-proċedura kontemporanja b'ħames fażijiet taċ-ċertifikazzjoni tal-operaturi tal-ajru. Iċ-ċertifikat tal-operatur tal-ajru tagħha ġie mġedded f'Jannar 2017. Madankollu, ġie osservat li bosta manwali ma kinux ġew addattati għall-operazzjonijiet attwali tagħha u li s-sistema tal-kwalità tagħha għad mhix żviluppata biżżejjed. Barra minn hekk, instab li s-sistema tal-ġestjoni tas-sikurezza ta' Cronos Airlines għadha qed tiġi żviluppata u bħalissa tinsab fit-tieni fażi mill-erba' fażijiet tal-implimentazzjoni ta' sistema tal-ġestjoni tas-sikurezza. Il-politiki tas-sikurezza ġew abbozzati u stabbiliti u huma wkoll ikkomunikati b'mod ċar u wiesa' fl-organizzazzjoni. Hija daħlet b'mod volontarju fi programm ta' monitoraġġ tad-dejta għall-inġenji tal-ajru tagħha.

(20)

L-AGEE, CEIBA Intercontinental u Cronos Airlines ngħataw l-opportunità ta' smigħ fl-14 ta' Novembru 2017 quddiem il-Kummissjoni u l-Kumitat għas-Sikurezza tal-Ajru f'konformità mal-Artikolu 7 tar-Regolament (KE) Nru 2111/2005. Waqt dik is-seduta ta' smigħ, ir-rappreżentant tal-gvern tal-Guinea Ekwatorjali esprima l-impenn qawwi mill-gvern biex ittejjeb aktar is-sikurezza tat-trasport tal-ajru fil-Guinea Ekwatorjali sabiex ikun hemm konnettività domestika u reġjonali tajba. Waqt is-seduta ta' smigħ, l-AAGE tat informazzjoni dwar l-azzjonijiet korrettivi li huma stabbiliti sabiex isolvu l-osservazzjonijiet li tqajmu waqt iż-żjara ta' valutazzjoni fuq il-post tal-Unjoni. L-iskeda ta' żmien għall-implimentazzjoni ta' dawk l-azzjonijiet korrettivi tal-AAGE hija stmata għal sena.

(21)

L-informazzjoni pprovduta minn CEIBA Intercontinental matul is-seduta ta' smigħ dwar il-pjan ta' azzjoni korrettiva għar-riżoluzzjoni tal-osservazzjonijiet li tqajmu waqt iż-żjara ta' valutazzjoni fuq il-post tal-Unjoni ma wrietx li l-kumpanija tal-ajru kienet wettqet analiżi tal-kawżi ewlenin u indikat li ġew implementati biss azzjonijiet korrettivi immedjati, mingħajr miżuri preventivi fit-tul.

(22)

Fir-rigward ta' Cronos Airlines, matul is-seduta ta' smigħ hija pprovdiet informazzjoni dwar l-azzjonijiet korrettivi sabiex jiġu indirizzati l-osservazzjonijiet li tqajmu waqt iż-żjara ta' valutazzjoni fuq il-post tal-Unjoni, u indikat li kienet wettqet analiżi tal-kawżi ewlenin u li ħadet azzjonijiet korrettivi immedjati kif ukoll azzjonijiet biex jipprevjenu r-rikorrenza tal-kwistjonijiet identifikati.

(23)

Fuq il-bażi tal-informazzjoni kollha disponibbli, inklużi r-riżultati taż-żjara ta' valutazzjoni fuq il-post tal-Unjoni u l-informazzjoni pprovduta matul is-seduta ta' smigħ fl-14 ta' Novembru 2017, tqies li, filwaqt li l-AAGE kienet għamlet titjib konsiderevoli fis-sistema tas-sorveljanza tas-sikurezza fil-Guinea Ekwatorjali, kien għad hemm nuqqasijiet importanti fis-sistema tas-sorveljanza tas-sikurezza fil-Guinea Ekwatorjali. Ġie vvalutat li l-AAGE għad ma għandhiex il-kapaċità li taqdi bis-sħiħ ir-responsabbiltajiet tagħha fir-rigward tas-sorveljanza tal-kumpaniji tal-ajru ċċertifikati fil-Guinea Ekwatorjali. Dan joħroġ mill-fatt li l-kumpaniji tal-ajru huma ċċertifikati u s-sorveljanza tas-sikurezza titwettaq mingħajr l-ispetturi li jkollhom il-kwalifiki xierqa meħtieġa u mill-fatt li għadd ta' osservazzjonijiet li tqajmu matul iż-żjara ta' valutazzjoni fuq il-post tal-Unjoni ma kinux ġew identifikati mill-AAGE stess matul l-attivitajiet ta' ċertifikazzjoni u sorveljanza tagħha. Għalhekk, ma hemmx biżżejjed evidenza bħalissa biex tappoġġa deċiżjoni dwar annullament jew emenda tal-projbizzjoni fuq l-operat tal-kumpaniji tal-ajru kollha ċċertifikati fil-Guinea Ekwatorjali. Madankollu, billi ċ-ċertifikati tal-operaturi tal-ajru tagħhom ġew irrevokati, jenħtieġ li Punto Azul u Tango Airways jitneħħew mil-lista ta' trasportaturi bl-ajru li huma suġġetti għal restrizzjonijiet operattivi.

(24)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, jitqies li jenħtieġ li l-lista tal-kumpaniji tal-ajru li huma soġġetti għal restrizzjonijiet operattivi fl-Unjoni tiġi emendata biex jitneħħew il-kumpaniji tal-ajru Punto Azul u Tango Airways mill-Anness A tar-Regolament (KE) Nru 474/2006.

(25)

Fil-5 ta' Marzu 2017, l-Awtorità tal-Avjazzjoni Ċivili tan-Nepal (“CAAN”) kitbet ittra lill-Kummissjoni fejn inkludiet l-informazzjoni dwar l-istatus attwali tas-sistema tas-sorveljanza tas-sikurezza fin-Nepal. Wara ċ-ċertifikazzjoni mill-ġdid fl-2015 tal-kumpaniji tal-ajru kollha fin-Nepal, is-CAAN rrepetiet dan l-eżerċizzju fl-2016 bl-għajnuna tal-ICAO, sabiex tivvalida mill-ġdid iċ-ċertifikati tal-operaturi tal-ajru għal darba'oħra.

(26)

Fit-13 ta' Marzu 2017, il-Ministeru għall-Affarijiet Barranin tan-Nepal bagħat lid-Delegazzjoni tal-Unjoni f'Kathmandu, in-Nepal, dokumentazzjoni addizjonali li ddeskriviet il-progress u inkludiet estratt mir-rapport tal-missjoni tat-Tim ta' Azzjoni Kombinata tal-ICAO lin-Nepal. Fl-oqsma tal-operazzjonijiet u tal-ajrunavigabbiltà, it-Tim ta' Azzjoni Kombinata tal-ICAO għamel għadd ta' osservazzjonijiet. Dawk l-osservazzjonijiet irrepetew osservazzjonijiet li saru waqt iż-żjarat preċedenti, inkluż iż-żjara ta' valutazzjoni fuq il-post tal-Unjoni fi Frar 2014 u missjoni ta' assistenza teknika tal-Unjoni f'Ottubru 2015. Fid-dawl ta' din l-informazzjoni, il-Kummissjoni fl-4 ta' Lulju 2017 talbet informazzjoni addizzjonali mingħand is-CAAN.

(27)

L-ICAO wettqet Missjoni ta' Validazzjoni Koordinata tal-ICAO fin-Nepal mill-4 sal-11 ta' Lulju 2017. Abbażi tar-riżultati ta' din il-missjoni, l-ICAO fis-27 ta' Lulju 2017 ħabbret li t-Tħassib Sinifikanti dwar is-Sikurezza rigward iċ-ċertifikazzjoni tal-kumpaniji tal-ajru ġie solvut mill-awtoritajiet kompetenti tan-Nepal.

(28)

Fit-3 ta' Awwissu 2017, is-CAAN ipprovdiet l-informazzjoni mitluba mill-Kummissjoni. Din ipprovdiet, fost l-oħrajn, informazzjoni dwar id-detenturi ta' ċertifikati ta' operatur tal-ajru, ir-riżultati tal-attivitajiet ta' sorveljanza tas-sikurezza, l-inġenji tal-ajru rreġistrati fin-Nepal, aċċidenti u inċidenti serji, l-azzjonijiet ta' infurzar, l-organizzazzjoni u r-regolamenti u l-attivitajiet ta' assistenza teknika fin-Nepal. Madankollu, is-CAAN ma tatx segwitu għar-rakkomandazzjonijiet fir-rapporti ppubblikati dwar l-investigazzjonijiet tal-aċċidenti.

(29)

Fis-7 ta' Novembru 2017, is-CAAN ipprovdiet ir-rapport finali tal-Missjoni ta' Validazzjoni Kkoordinata tal-ICAO mill-4 sal-11 ta' Lulju 2017, u indikat żieda fir-rata ta' implimentazzjoni effettiva tal-istandards internazzjonali tas-sikurezza tal-avjazzjoni għal 66 %. Madankollu, ir-rapport juri wkoll li hemm bżonn ta' titjib ulterjuri fir-rigward tal-persunal tekniku kkwalifikat u tar-riżoluzzjoni tat-tħassib dwar is-sikurezza. Il-qasam tal-liċenzjar tal-persunal ta' ekwipaġġ tat-titjira ma kienx rivedut mill-ICAO, filwaqt li dak il-qasam kien wieħed mit-tħassib wara ż-żjara ta' valutazzjoni fuq il-post tal-Unjoni fi Frar 2014.

(30)

Fuq il-bażi tal-informazzjoni disponibbli bħalissa, jidher li għalkemm is-CAAN għamlet ċertu grad ta' progress fir-rigward tal-implimentazzjoni tal-istandards internazzjonali tal-avjazzjoni, is-sistema tas-sorveljanza tas-sikurezza tan-Nepal għadha mhix biżżejjed. Dan jidher ukoll mill-fatt li hemm nuqqas ta' azzjoni effettiva bħala segwitu għal aċċidenti, inkluż aċċidenti fatali li seħħew fis-snin riċenti sabiex ma jerġgħux iseħħu.

(31)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, jitqies li f'dan l-istadju ma hemmx raġunijiet biex tiġi emendata l-lista tal-kumpaniji tal-ajru li huma soġġetti għall-għal restrizzjonijiet operattivi fl-Unjoni fir-rigward tal-kumpaniji tal-ajru min-Nepal.

(32)

Il-Kummissjoni, bl-appoġġ tal-EASA, qed tkompli tissorvelja mill-qrib il-prestazzjoni tas-sikurezza tal-kumpaniji tal-ajru li ġew iċċertifikati fin-Niġerja. Fl-ittri tagħha tal-15 ta' Mejju u tal-20 ta' Ġunju 2017, il-Kummissjoni enfassizat il-ħtieġa li l-Awtorità tal-Avjazzjoni Ċivili tan-Niġerja (“NCAA”) issegwi mill-qrib kwalunkwe applikazzjonijiet li jagħmlu l-kumpaniji tal-ajru ċċertifikati fin-Niġerja għal awtorizzazzjonijiet mill-EASA ta' Operatur ta' Pajjiż Terz (“TCO”).

(33)

B'ittra tat-30 ta' Mejju 2017, l-NCAA infurmat lill-Kummissjoni dwar l-intenzjoni tagħha li twettaq verifika estensiva tal-operazzjonijiet tal-kumpanija tal-ajru Med-View Airline, irreġistrata fin-Niġerja, kif ukoll l-azzjonijiet li l-NCAA adottat fir-rigward ta' kumpaniji oħra tal-ajru.

(34)

B'ittra tal-10 ta' Ottubru 2017, il-Kummissjoni enfasizzat li dawn l-attivitajiet mhumiex biżżejjed fid-dawl tar-rekwiżiti applikabbli u tat-tkabbir mistenni mill-attivitajiet tal-avjazzjoni fin-Niġerja. Hija informat l-NCAA li nfetħu konsultazzjonijiet, skont l-Artikolu 3(2) tar-Regolament (KE) Nru 473/2006.

(35)

Fit-30 ta' Ottubru 2017, ir-rappreżentanti tal-Kummissjoni u tal-EASA ltaqgħu ma' rappreżentanti għolja tal-NCAA għal laqgħa konsultattiva teknika. L-iskop ta' dik il-laqgħa kien biex l-NCAA tispjega l-miżuri korrettivi u preventivi li ttieħdu mill-NCAA fir-rigward tal-Med-View Airline, u l-kumpaniji tal-ajru l-oħra ċċertifikati fin-Niġerja. Il-preżentazzjoni tal-NCAA matul dik il-laqgħa ġiet appoġġata minn evidenza li turi ċertu titjib fis-superviżjoni tas-sikurezza tal-kumpaniji tal-ajru li huma responsabbli għalihom l-awtoritajiet Niġerjani skont ir-regolamenti internazzjonali applikabbli.

(36)

Matul il-laqgħa, l-NCAA infurmat lill-Kummissjoni u l-EASA dwar l-azzjonijiet meħuda biex titjieb il-konformità mar-rekwiżiti tal-ICAO għal sistema ta' sorveljanza tas-sikurezza. Tat ukoll informazzjoni dwar il-verifika mwettqa fuq Med-View Airline, u fuq kumpaniji oħra tal-ajru rreġistrati fin-Niġerja, jiġifieri Arik Air, Air Peace u Kabo Air, kif ukoll fuq l-għadd tal-persunal tal-NCAA, it-taħriġ u l-kwalifiki tal-ispetturi tagħha u l-programm ta' sorveljanza tas-sikurezza tagħha. L-NCAA stabbiliet u implimentat programm ta' sorveljanza tal-operazzjonijiet tat-titjir u tal-ajrunavigabbiltà biex tiġi żgurata l-konformità mar-regolamenti. In-Niġerja qiegħda fil-proċess li timplimenta Programm għas-Sikurezza tal-Istat tagħha u qed tippjana biex twettaq l-implimentazzjoni sħiħa tiegħu sa tmiem l-2018.

(37)

L-informazzjoni li hemm disponibbli attwalment, inkluż l-informazzjoni ppreżentata mill-NCAA, fil-laqgħa tat-30 ta' Ottubru 2017, tagħti indikazzjonijiet li t-titjib fis-sistema ta' sorveljanza tas-sikurezza fin-Niġerja jinsabu għaddejjin. Tabilħaqq, jidher ċar li dan it-titjib għadu ta' importanza ewlenija. Dan huwa b'mod partikolari l-każ f'dak li jirrigwarda l-għarfien tal-NCAA tal-attivitajiet ippjanati tal-kumpaniji tal-ajru taħt is-superviżjoni tagħha, kif ukoll l-implimentazzjoni effettiva tal-programm tas-sorveljanza tas-sikurezza tagħha, inkluż il-ġestjoni tas-sejbiet. Fl-1 ta' Novembru 2017, il-Kummissjoni talbet iktar informazzjoni f'dan ir-rigward. Barra minn hekk, il-Kummissjoni stiednet lill-NCAA biex jiskoraġġixxu lill-operaturi tal-ajru Niġerjani milli japplikaw għal awtorizzazzjoni TCO mill-EASA sakemm ikunu kompletament kunfidenti li dawn l-operaturi jikkonformaw mal-istandards internazzjonali tas-sikurezza tal-avjazzjoni applikabbli.

(38)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, jitqies li f'dan l-istadju ma hemmx raġunijiet biex tiġi emendata l-lista tal-kumpaniji tal-ajru li huma soġġetti għal restrizzjonijiet operattivi fl-Unjoni fir-rigward tal-kumpaniji tal-ajru min-Niġerja.

(39)

Jekk xi informazzjoni rilevanti tas-sikurezza tindika li hemm riskji imminenti għas-sikurezza minħabba n-nuqqas ta' konformità mal-standards internazzjonali tas-sikurezza tal-avjazzjoni, il-Kummissjoni tista' tkun obbligata tieħu azzjoni ulterjuri skont ir-Regolament (KE) Nru 2111/2005.

(40)

Il-Kummissjoni, l-EASA u l-awtoritajiet kompetenti tal-Istati Membri għadhom jissorveljaw mill-qrib il-prestazzjoni tas-sikurezza tal-kumpaniji tal-ajru li ġew iċċertifikati fir-Russja u li joperaw fl-Unjoni, inkluż permezz tal-prijoritizzazzjoni tal-ispezzjonijiet fir-rampa li jridu jitwettqu fuq ċerti kumpaniji tal-ajru Russi f'konformità mar-Regolament (UE) Nru 965/2012.

(41)

Fl-20 ta' Ottubru 2017, rappreżentanti tal-Kummissjoni u l-EASA ltaqgħu mar-rappreżentanti tal-Aġenzija Federali tat-Trasport tal-Ajru Russa (“FATA”). L-għan tal-laqgħa kien li jsir rieżami tal-prestazzjoni tas-sikurezza tal-kumpaniji tal-ajru ċċertifikati fir-Russja abbażi tar-rapporti tal-ispezzjonijiet fir-rampa għall-perjodu bejn is-6 ta' Ottubru 2016 u l-5 ta' Ottubru 2017 u li jiġu identifikati l-każijiet fejn l-attivitajiet ta' sorveljanza mill-FATA jistgħu jiġu msaħħa.

(42)

Waqt dik il-laqgħa, il-Kummissjoni eżaminat mill-ġdid ir-riżultati tal-ispezzjonijiet fir-rampa tas-SAFA ta' erba' kumpaniji tal-ajru ċċertifikati fir-Russja f'iktar dettall. Filwaqt li l-ebda tħassib dwar is-sikurezza ma ġie identifikat, il-FATA infurmat lill-Kummissjoni dwar l-attivitajiet tagħha ta' sorveljanza tas-sikurezza ta' dawk il-kumpaniji tal-ajru.

(43)

Fuq il-bażi tal-informazzjoni attwalment disponibbli, inkluża l-informazzjoni pprovduta mill-FATA fil-laqgħa ta' konsultazzjoni teknika tal-20 ta' Ottubru 2017, jitqies li m'hemm l-ebda nuqqas ta' kapaċità jew rieda min-naħa tal-FATA biex tindirizza n-nuqqasijiet tas-sikurezza. Fuq din il-bażi, il-Kummissjoni kkonkludiet li ma kinitx meħtieġa seduta ta' smigħ quddiem il-Kummissjoni u l-Kumitat għas-Sikurezza tal-Ajru tal-awtoritajiet tal-avjazzjoni Russi jew ta' kwalunkwe kumpanija tal-ajru ċċertifikata fir-Russja.

(44)

Għalhekk, skont il-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li f'dan l-istadju, m'hemmx raġunijiet biex temenda l-lista tal-kumpaniji tal-ajru li huma soġġetti għal projbizzjoni tal-operat fl-Unjoni biex tinkludi l-kumpaniji tal-ajru mir-Russja.

(45)

L-Istati Membri jridu jkomplu jivverifikaw il-konformità effettiva tal-kumpaniji tal-ajru tar-Russja mal-istandards internazzjonali tas-sikurezza tal-avjazzjoni, permezz tal-prijoritizzazzjoni tal-ispezzjonijiet fir-rampa f'konformità mar-Regolament (UE) Nru 965/2012.

(46)

Jekk dawk l-ispezzjonijiet jindikaw riskju imminenti għas-sikurezza minħabba nuqqas ta' konformità mal-istandards rilevanti tas-sikurezza, il-Kummissjoni tista' tkun obbligata tieħu azzjoni kontra l-kumpaniji tal-ajru mir-Russja, skont ir-Regolament (KE) Nru 2111/2005.

(47)

Fit-2 ta' Frar 2017, il-kumpanija tal-ajru Mustique Airways, iċċertifikata f'Saint Vincent u l-Grenadini, applikat mill-ġdid għal awtorizzazzjoni ta' TCO mal-EASA. Din l-applikazzjoni mill-ġdid segwiet applikazzjoni oħra qabel għal awtorizzazzjoni ta' TCO mill-EASA li kienet miċħuda għal raġunijiet ta' sikurezza. L-EASA vvalutat din l-applikazzjoni l-ġdida f'konformità mar-rekwiżiti tar-Regolament tal-Kummissjoni (UE) Nru 452/2014 (6).

(48)

Il-pjanijiet ta' azzjoni korrettivi li jindirizzaw is-sejbiet tal-EASA f'rabta mal-applikazzjoni tal-awtorizzazzjoni tat-TCO għall-Mustique Airways instabu aċċettabbli mill-EASA u ġie deċiż li titkompla l-valutazzjoni tal-applikazzjoni sakemm jingħalqu s-sejbiet kollha. Fil-11 ta' Settembru 2017, l-EASA infurmat lill-Kummissjoni dwar l-għeluq tal-aħħar waħda mis-sejbiet imsemmija u dwar il-fatt li, għaldaqstant, l-EASA se tkun f'pożizzjoni li toħroġ l-awtorizzazzjoni li kieku l-kumpanija tal-ajru titneħħa mil-Lista tas-Sikurezza tal-Ajru.

(49)

Fid-dawl ta' dik l-informazzjoni, il-Kummissjoni stiednet lill-Mustique Airways għal seduta ta' smigħ biex Mustique Airways tkun tista' tippreżenta l-azzjonijiet korrettivi implimentati u tipprovdi informazzjoni dwar il-miżuri li ħadet sabiex jiġi evitat li n-nuqqasijiet tas-sikurezza identifikati mill-EASA waqt il-valutazzjoni tal-awtorizzazzjoni tat-TCO tagħha jerġgħu jitfaċċaw. Fl-14 ta' Novembru 2017, Mustique Airways ippreżentat lill-Kummissjoni u lill-Kumitat għas-Sikurezza tal-Ajru b'dawn l-azzjonijiet korrettivi. Dawn jikkonsistu f'bidliet sinifikanti fl-organizzazzjoni u fl-implimentazzjoni ta' sistema tal-ġestjoni tas-sikurezza, appoġġata minn għodda ġdida bbażata fuq l-Internet u politika ġdida tas-sikurezza, sabiex Mustique Airways tindirizza l-kawżi ewlenin tan-nuqqasijiet u ma tħallix li jerġgħu jitfaċċaw.

(50)

Matul is-seduta ta' smigħ, Mustique Airways ipprovdiet ukoll informazzjoni dwar għadd ta' miżuri li ħadet biex timplimenta kultura tas-sikurezza tal-avjazzjoni fi ħdan l-organizzazzjoni tagħha. Dawk il-miżuri jinkludu laqgħat regolari tas-sikurezza fil-livell tal-amministrazzjoni u fil-livell tal-persunal sabiex Mustique Airways iżżid il-livell ta' sensibilizzazzjoni tal-persunal tagħha u ttejjeb il-livell ta' rappurtar tal-okkorrenzi tas-sikurezza.

(51)

Abbażi tal-informazzjoni kollha disponibbli bħalissa, inklużi fil-valutazzjoni mwettqa mill-EASA u tal-informazzjoni pprovduta waqt is-seduta ta' smigħ, jenħtieġ li jiġi konkluż li Mustique Airways indirizzat in-nuqqasijiet ta' sikurezza identifikati u li Mustique Airways hija kapaċi tindirizza n-nuqqasijiet ta' sikurezza li jistgħu jinqalgħu.

(52)

Għaldaqstant, f'konformità mal-kriterji komuni stabbiliti fl-Anness tar-Regolament (KE) Nru 2111/2005, hu vvalutat li jenħtieġ li tiġi emendata l-lista tal-kumpaniji tal-ajru li huma soġġetti għal projbizzjoni operattiva fl-Unjoni biex il-kumpanija tal-ajru Mustique Airways titneħħa mill-Anness A tar-Regolament (KE) Nru 474/2006.

(53)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza bil-prijoritizzazzjoni tal-ispezzjonijiet fir-rampa li jridu jsiru fuq il-kumpaniji tal-ajru ċċertfikati f'Saint Vincent u l-Grenadini skont ir-Regolament (UE) Nru 965/2012.

(54)

Jekk xi informazzjoni rilevanti tas-sikurezza tindika li jkun hemm riskji imminenti għas-sikurezza minħabba n-nuqqas ta' konformità mal-istandards internazzjonali tas-sikurezza tal-avjazzjoni, il-Kummissjoni tista' tkun obbligata tieħu azzjoni ulterjuri skont ir-Regolament (KE) Nru 2111/2005.

(55)

Mill-20 sas-27 ta' Settembru 2017, l-ICAO wettqet Missjoni ta' Validazzjoni Koordinata fit-Tajlandja sabiex jiġu riveduti l-kwistjonijiet tal-protokoll li kienu l-bażi ta' Tħassib Sinifikanti dwar is-Sikurezza fit-Tajlandja. L-azzjonijiet korrettivi meħuda mill-Awtorità tal-Avjazzjoni Ċivili tat-Tajlandja (“CAAT”) instabu li kienu biżżejjed biex isolvu l-każijiet ta' Tħassib Sinifikanti dwar is-Sikurezza u r-rata ta' implimentazzjoni effettiva tal-istandards internazzjonali tas-sikurezza tal-avjazzjoni żdiedet għal madwar 41 %. Madankollu, għadha għaddejja ħidma biex tkompli żżid ir-rata ta' implimentazzjoni effettiva u s-CAAT qed tistenna li fl-2018 titwettaq Missjoni ta' Validazzjoni Koordinata tal-ICAO, li tkopri l-oqsma kollha ta' sistema ta' sorveljanza tas-sikurezza tal-avjazzjoni ċivili.

(56)

Is-CAAT kienet mistiedna għal seduta ta' smigħ fit-13 ta' Novembru 2017 sabiex tipprovdi aġġornament lill-Kummissjoni u lill-Kumitat għas-Sikurezza tal-Ajru dwar l-azzjonijiet korrettivi li ttieħdu biex titjieb is-sitwazzjoni tas-sikurezza tal-avjazzjoni fit-Tajlandja.

(57)

Matul is-seduta ta' smigħ, is-CAAT ipprovdiet informazzjoni dwar id-daqs u l-attivitajiet tal-industrija tal-avjazzjoni ċivili fit-Tajlandja u dwar ir-riżultati tal-Missjoni ta' Validazzjoni Kkoordinata tal-ICAO, inkluż il-fatt li t-Tħassib Sinifikanti dwar is-Sikurezza kien ġie solvut. Is-CAAT rrappurtat ukoll dwar il-progress fl-implimentazzjoni tal-pjan tas-sostenibbiltà, li jinkludi ħidma dwar pjan strateġiku għall-futur qrib, l-aġġornament tal-leġiżlazzjoni u tar-regolamenti, l-organizzazzjoni u l-persunal tal-awtorità, il-finanzjament tal-attivitajiet tal-awtorità u s-sistemi tal-IT li s-CAAT se tapplika biex tappoġġa l-attivitajiet tagħha. Tat ukoll informazzjoni dwar l-attivitajiet ta' sorveljanza tagħha fir-rigward tal-kumpaniji tal-ajru fit-Tajlandja. Il-Kummissjoni ħeġġet lis-CAAT biex tkompli bl-implimentazzjoni tal-ħidma tagħha biex tiżgura s-sostenibbiltà tat-titjib fis-sikurezza tal-avjazzjoni fit-Tajlandja.

(58)

L-informazzjoni disponibbli wriet li s-sistema tas-sorveljanza tas-sikurezza fit-Tajlandja tjiebet. B'mod partikolari, is-CAAT ipprovdiet evidenza li sar progress f'din l-aħħar sena. L-informazzjoni disponibbli bħalissa dwar il-kumpaniji tal-ajru ċċertifikati fit-Tajlandja ma tappoġġax deċiżjoni li jiġu imposti projbizzjoni jew restrizzjonijiet operattivi fuq dawk il-kumpaniji tal-ajru.

(59)

Sabiex tiġi ssorveljata mill-qrib is-sitwazzjoni, se jibqgħu jsiru konsultazzjonijiet mal-awtoritajiet tat-Tajlandja b'konformità mal-Artikolu 3(2) tar-Regolament (KE) Nru 473/2006.

(60)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, jitqies li f'dan l-istadju ma hemmx raġunijiet biex tiġi emendata l-lista tal-kumpaniji tal-ajru li huma soġġetti għal restrizzjonijiet operattivi fl-Unjoni fir-rigward tal-kumpaniji tal-ajru mit-Tajlandja.

(61)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fit-Tajlandja, skont ir-Regolament (UE) Nru 965/2012.

(62)

Jekk xi informazzjoni rilevanti tas-sikurezza tindika li jkun hemm riskji imminenti għas-sikurezza minħabba n-nuqqas ta' konformità mal-standards internazzjonali tas-sikurezza tal-avjazzjoni, il-Kummissjoni tista' tkun obbligata tieħu azzjoni ulterjuri skont ir-Regolament (KE) Nru 2111/2005.

(63)

Fid-19 ta' April 2017, il-kumpanija tal-ajru International Joint-Stock Aviation Company “URGA”, iċċertifikata fl-Ukrajna, applikat mill-ġdid għal awtorizzazzjoni ta' TCO mal-EASA. Wara li l-ewwel applikazzjoni tagħha għal awtorizzazzjoni ta' TCO ġiet miċħuda mill-EASA minħabba raġunijiet ta' sikurezza, l-EASA vvalutat din l-applikazzjoni l-ġdida skont ir-rekwiżiti tar-Regolament (UE) Nru 452/2014.

(64)

F'dan il-kuntest, fit-28 u d-29 ta' Ġunju 2017, l-EASA wettqet verifika fuq il-post fil-kwartieri ġenerali tal-faċilitajiet ta' International Joint-Stock Aviation Company “URGA”. Filwaqt li l-verifika ppermettiet li jingħalqu s-sejbiet kollha identifikati matul il-valutazzjoni tal-ewwel applikazzjoni, ġew identifikati ħames sejbiet ġodda marbuta partikolarment mal-ajrunavigabbiltà. Sussegwentement, International Joint-Stock Aviation Company “URGA”, bagħtet pjan ta' azzjoni korrettiva b'rispons għal dawk is-sejbiet lill-EASA. Fuq il-bażi ta' dan il-pjan ta' azzjoni korrettiva, is-sejbiet kollha ngħalqu fl-4 ta' Ottubru 2017 bis-sodisfazzjoni sħiħ tal-EASA. L-EASA infurmat lill-Kummissjoni dwar dan u dwar il-fatt li, għaldaqstant, l-EASA se tkun f'pożizzjoni li toħroġ l-awtorizzazzjoni li kieku l-kumpanija tal-ajru titneħħa mil-Lista tas-Sikurezza tal-Ajru.

(65)

Fuq dik il-bażi, International Joint-Stock Aviation Company “URGA”, ġiet mistiedna għal seduta ta' smigħ quddiem il-Kummissjoni u l-Kumitat għas-Sikurezza tal-Ajru, li saret fit-13 ta' Novembru 2017. Matul dik is-seduta ta' smigħ, hija pprovdiet informazzjoni dettaljata dwar l-implimentazzjoni tal-pjan ta' azzjoni korrettiva żviluppat bħala reazzjoni għas-sejbiet tal-EASA waqt il-verifika fuq il-post ta' Ġunju 2017. Spjegat ukoll li ġie introdott tibdil ewlieni fl-organizzazzjoni u l-proċeduri tagħha sabiex tissaħħaħ il-kapaċità tagħha li tikkonforma mal-istandards internazzjonali tas-sikurezza tal-avjazzjoni. Bil-ħsieb li tiġi żgurata s-sostenibbiltà ta' dawn il-miżuri u biex ikun hemm kontroll effettiv tal-attivitajiet tagħha, International Joint-Stock Aviation Company “URGA”, irristrutturat ukoll is-sistema interna tal-kwalità tagħha.

(66)

Abbażi tal-informazzjoni kollha disponibbli bħalissa, inkluża l-valutazzjoni mwettqa mill-EASA u l-informazzjoni pprovduta waqt is-seduta ta' smigħ, jenħtieġ li jiġi konkluż li International Joint-Stock Aviation Company “URGA”, indirizzat in-nuqqasijiet ta' sikurezza identifikati u li International Joint-Stock Aviation Company “URGA”, hija kapaċi tindirizza n-nuqqasijiet ta' sikurezza li jistgħu jinqalgħu.

(67)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li jenħtieġ li l-lista tal-kumpaniji tal-ajru li huma soġġetti għal restrizzjonijiet operattivi fl-Unjoni tiġi emendata biex il-kumpanija tal-ajru International Joint-Stock Aviation Company “URGA” titneħħa mill-Anness A tar-Regolament (KE) Nru 474/2006.

(68)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fl-Ukrajna, skont ir-Regolament (UE) Nru 965/2012.

(69)

Jekk xi informazzjoni rilevanti tas-sikurezza tindika li jkun hemm riskji imminenti għas-sikurezza minħabba n-nuqqas ta' konformità mal-standards internazzjonali tas-sikurezza tal-avjazzjoni, il-Kummissjoni tista' tkun obbligata tieħu azzjoni ulterjuri skont ir-Regolament (KE) Nru 2111/2005.

(70)

Fis-6 ta' Marzu 2017, il-kumpanija tal-ajru Avior Airlines, iċċertifikata fil-Venezwela, applikat għand l-EASA għal awtorizzazzjoni ta' TCO. L-EASA vvalutat dik l-applikazzjoni f'konformità mar-rekwiżiti tar-Regolament (UE) Nru 452/2014.

(71)

Filwaqt li wettqet il-valutazzjoni tas-sikurezza tagħha għal TCO ta' Avior Airlines, l-EASA esprimiet tħassib dwar il-fatt li Avior Airlines naqset milli turi konformità mar-rekwiżiti applikabbli. Għaldaqstant, l-EASA kkonkludiet li aktar valutazzjonijiet mhux se jwasslu għall-ħruġ ta' awtorizzazzjoni tat-TCO lil Avior Airlines u li din il-kumpanija tal-ajru ma ssodisfatx ir-rekwiżiti applikabbli tar-Regolament (UE) Nru 452/2014. Għalhekk, fl-4 ta' Ottubru 2017, l-EASA rrifjutat l-applikazzjoni ta' TCO lil Avior Airlines minħabba raġunijiet ta' sikurezza.

(72)

Fl-10 ta' Ottubru 2017, il-Kummissjoni talbet informazzjoni mingħand l-Awtorità tal-Avjazzjoni Ċivili tal-Venezwela (“INAV”) dwar il-miżuri li ttieħdu wara ċ-ċaħda tal-applikazzjoni ta' TCO għal Avior Airlines mill-EASA. Dik l-ittra kienet tirrappreżenta l-ftuħ tal-konsultazzjonijiet mal-awtoritajiet li jieħdu ħsieb is-sorveljanza regolatorja tal-kumpaniji tal-ajru ċċertifikati fil-Venezwela, skont id-dispożizzjonijiet stabbiliti fl-Artikolu 3(2) tar-Regolament (KE) Nru 473/2006. Billi t-tħassib dwar is-sikurezza tal-Avior Airlines, ma ġiex solvut, mill-valutazzjoni ta' sikurezza ta' TCO mill-EASA, kemm l-INAC u kemm l-Avior Airlines ingħataw l-opportunità ta' smigħ quddiem il-Kummissjoni u l-Kumitat għas-Sikurezza tal-Ajru f'konformità mar-Regolament (KE) Nru 2111/2005.

(73)

Fit-13 ta' Novembru 2017, l-INAC ipprovdiet lill-Kummissjoni bl-informazzjoni dwar l-attivitajiet ta' sorveljanza mwettqa fir-rigward tal-kumpaniji tal-ajru ċċertifikati fil-Venezwela f'dawn l-aħħar snin kif ukoll deskrizzjoni tas-sorveljanza mwettqa fir-rigward tal-kumpanija tal-ajru AVIOR Airlines.

(74)

Matul is-seduta ta' smigħ tal-14 ta' Novembru 2017, l-INAC ipprovdiet lill-Kummissjoni u lill-Kumitat għas-Sikurezza tal-Ajru informazzjoni dwar l-istruttura, il-funzjonijiet, il-kompetenzi u r-riżorsi tagħha, l-għadd ta' aċċidenti u inċidenti tal-avjazzjoni, l-implimentazzjoni effettiva tal-istandards internazzjonali tas-sikurezza tal-avjazzjoni, l-istatus skont il-programm tal-Valutazzjoni Internazzjonali tal-Avjazzjoni tal-FAA u l-għadd u t-tip ta' organizzazzjonijiet li hija tissorvelja. Spjegat ukoll il-proċess tas-superviżjoni tagħha u tat ir-riżultati tal-attivitajiet ta' sorveljanza tas-sikurezza li wettqet fuq Avior Airlines f'dawn l-aħħar snin. L-INAC indikat li kienet żiedet l-għadd ta' spezzjonijiet fuq Avior Airlines, billi dik il-kumpanija tal-ajru kienet kabbret il-flotta tagħha. Dan irriżulta fl-identifikazzjoni ta' għadd konsiderevoli ta' nuqqasijiet fis-sikurezza min-naħa ta' Avior Airlines, partikolarment fl-oqsma tat-taħriġ tal-persunal, il-ġestjoni tal-bidliet u s-sistema tal-kontroll tad-dokumenti.

(75)

L-INAC indikat li mhijiex konxja mis-sejbiet li ġew mgħarrfa lilha fir-rigward tal-kumpaniji tal-ajru ċċertifikati fil-Venezwela waqt spezzjonijiet fir-rampa mill-Istati Membri u esprimiet l-intenzjoni tagħha li taħdem mal-EASA sabiex l-INAC tiżgura li jittieħdu passi ta' segwitu għal dawn is-sejbiet.

(76)

L-informazzjoni pprovduta tindika li jenħtieġ li l-INAC tiżviluppa iktar il-kapaċità ta' spezzjoni tagħha fir-rigward tal-kumpaniji tal-ajru li hija responsabbli għalihom.

(77)

Matul is-seduta ta' smigħ, Avior Airlines għarrfet lill-Kummissjoni u lill-Kumitat għas-Sikurezza tal-Ajru dwar il-miżuri korrettivi li ttieħdu sabiex jiġi indirizzat it-tħassib serju identifikat mill-EASA bħala parti mill-valutazzjoni tal-awtorizzazzjoni tat-TCO tagħha, bħall-kontroll tal-ajrunavigabbiltà u tal-manutenzjoni, l-implimentazzjoni u l-monitoraġġ tad-direttivi dwar l-ajrunavigabbiltà u s-sistema tal-ġestjoni tas-sikurezza u tal-kwalità. Madankollu, Avior Airlines wriet nuqqas ċar ta' għarfien u komprensjoni dwar is-serjetà tat-tħassib dwar is-sikurezza mqajjem mill-EASA u identifikat mill-Istati Membri permezz ta' spezzjoni fir-rampa. Barra minn hekk, il-miżuri meħuda minn Avior Airlines juru nuqqas ta' analiżi xierqa tal-kawżi ewlenin u nuqqas ta' pjanijiet ta' azzjoni korrettiva xierqa biex ma jerġax ikun hemm l-istess nuqqasijiet ta' konformità li wasslu għal dan it-tħassib jew oħrajn simili.

(78)

L-informazzjoni disponibbli fil-preżent, ibbażata fuq is-sejbiet tal-valutazzjoni tal-awtorizzazzjoni tat-TCO tal-EASA, fuq l-ispezzjonijiet fir-rampa mwettqa mill-Istati Membri u fuq l-informazzjoni ppreżentata mill-INAC u minn Avior Airlines, turi li hemm evidenza ċara ta' nuqqasijiet ta' sikurezza serji min-naħa ta' Avior Airlines. L-informazzjoni turi wkoll li Avior Airlines mhijiex kapaċi tindirizza dawk in-nuqqasijiet ta' sikurezza, kif muri, inter alia mill-pjan ta' azzjoni korrettiva mhux adatt u mhux suffiċjenti li ppreżentat bħala tweġiba għas-sejbiet tal-EASA u n-nuqqas ta' tweġiba adegwata għas-sejbiet tal-ispezzjonijiet fir-rampa mwettqa mill-Istati Membri.

(79)

Għalhekk, f'konformità mal-kriterji komuni stabbiliti fl-Anness tar-Regolament (KE) Nru 2111/2005, jitqies li jenħtieġ li l-lista tal-kumpaniji tal-ajru li huma soġġetti għal restrizzjonijiet operattivi fl-Unjoni tiġi emendata biex tinkludi l-kumpanija tal-ajru Avior Airlines fl-Anness A tar-Regolament (KE) Nru 474/2006.

(80)

L-Istati Membri jridu jkomplu jivverifikaw il-konformità effettiva mal-istandards rilevanti tas-sikurezza permezz tal-prijoritizzazzjoni tal-ispezzjonijiet fir-rampa li jridu jitwettqu fuq il-kumpaniji tal-ajru li ġew iċċertifikati fil-Venezwela, skont ir-Regolament (UE) Nru 965/2012.

(81)

Jekk xi informazzjoni rilevanti tas-sikurezza tindika li jkun hemm riskji imminenti għas-sikurezza minħabba n-nuqqas ta' konformità mal-standards internazzjonali tas-sikurezza tal-avjazzjoni, il-Kummissjoni tista' tkun obbligata tieħu azzjoni ulterjuri skont ir-Regolament (KE) Nru 2111/2005.

(82)

Għalhekk, ir-Regolament (KE) Nru 474/2006 jenħtieġ li jiġi emendat skont dan.

(83)

Il-miżuri previsti f'dan ir-Regolament huma skont l-opinjoni tal-Kumitat għas-Sikurezza tal-Ajru,

(1)

L-Anness A jinbidel bit-test stabbilit fl-Anness I ta' dan ir-Regolament;

(2)

L-Anness B jinbidel bit-test stabbilit fl-Anness II ta' dan ir-Regolament.