29.7.2017   

MT

Il-Ġurnal Uffiċjali tal-Unjoni Ewropea

L 199/2

(1)

Ir-Regolament tal-Kunsill (UE) 2017/127 (1) jistabbilixxi għall-2017 l-opportunitajiet tas-sajd għal ċerti stokkijiet tal-ħut u ċerti gruppi ta' stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f'ċerti ilmijiet mhux tal-Unjoni.

(2)

Id-deroga li tippermetti l-qabdiet ta' spnott b'ċerti kategoriji ta' rkaptu hija marbuta mar-reġistrazzjoni tal-qabdiet storiċi b'dawk l-irkapti. Jenħtieġ li jiġi ċċarat li d-deroga tinżamm meta l-bastimenti tas-sajd jiġu sostitwiti, filwaqt li jkun żgurat li l-għadd ta' bastimenti koperti bid-deroga u l-kapaċità tas-sajd globali tagħhom ma jiżdidux.

(3)

Fl-2017, il-Kunsill Internazzjonali għall-Esplorazzjoni tal-Baħar (ICES), fil-parir tiegħu u billi segwa r-riferiment għall-2016, kien emenda ż-żoni ta' ġestjoni taċ-ċiċċirell. Iż-żona ta' ġestjoni taċ-ċiċċirell 3r tinsab prinċipalment f'ilmijiet Norveġiżi, madankollu parti minnha tinsab ukoll fl-ilmijiet tal-Unjoni, b'xi banek tas-sajd importanti transżonali bejn iż-żoni ta' ġestjoni 2r u 3r. Huwa xieraq li jiġi żgurat li l-bastimenti tas-sajd tal-Unjoni jistgħu jaċċessaw il-banek għaċ-ċiċċirell li jinsabu fl-ilmijiet tal-Unjoni fiż-żona ta' ġestjoni 3r. Għalhekk, jenħtieġ li l-opportunitajiet tas-sajd stabbiliti għaż-żona ta' ġestjoni 2r jinkludu wkoll l-ilmijiet tal-Unjoni fiż-żona ta' ġestjoni 3r.

(4)

Fis-27 ta' Marzu 2017, l-ICES ħareġ parir dwar qabdiet tal-gamblu tat-Tramuntana (Pandalus borealis) fid-diviżjoni IVa tal-ICES fil-Lvant u fis-suddiviżjoni 20 tal-ICES (il-Baħar tat-Tramuntana, fin-Norwegian Deep u fi Skagerrak). Fuq il-bażi ta' dak il-parir u wara konsultazzjonijiet man-Norveġja, jixraq li s-sehem tal-Unjoni tal-gamblu tat-Tramuntana fi Skagerrak jiġi ffissat għal 3 856 tunnellata u li tiġi emendata l-kwota tal-Unjoni fin-Norwegian Deep.

(5)

Fis-snin preċedenti, il-qabdiet totali permissibbli (TAC) għal-laċċa kaħla (Sprattus sprattus) fil-Baħar tat-Tramuntana ġew stabbiliti għal sena kalendarja, filwaqt li l-ICES joħroġ il-parir tiegħu għall-perijodu mill-1 ta' Lulju ta' dik is-sena sat-30 ta' Ġunju tas-sena ta' wara. Dawk il-perijodi jenħtieġ li jiġu allinjati sabiex il-perijodu tat-TAC jiġi jaqbel ma' dak tal-parir tal-ICES. Eċċezzjonalment u minħabba t-transizzjoni biss, it-TAC għal-laċċa kaħla għandha tiġi emendata biex tkopri l-perijodu ta' 18-il xahar, li jintemm fit-30 ta' Ġunju 2018. Kwalunkwe opportunità tas-sajd sussegwenti għandha tiġi stabbilita f'konformità mal-perijodu li għalih l-ICES joħroġ il-parir tiegħu.

(6)

Fir-Regolament (UE) 2017/127, it-TAC għal-laċċa kaħla ġiet stabbilita għal 33 830 tunnellata biex tkopri l-qabdiet tat-TAC fl-ewwel nofs tal-2017. L-ICES ta l-parir li l-qabdiet bejn l-1 ta' Lulju 2017 u t-30 ta' Ġunju 2018 ma għandhomx ikunu ta' aktar minn 170 387 tunnellata. Għaldaqstant, it-TAC għal-laċċa kaħla għal 18-il xahar tenħtieġ li tiġi stabbilita biex tkopri qabdiet attwali li saru matul l-ewwel nofs tal-2017 skont il-limiti tat-TAC stabbiliti fir-Regolament (UE) 2017/127 u l-livell tal-qabdiet fil-parir tal-ICES għat-12-il xahar li fadal, jiġifieri mill-1 ta' Lulju 2017 sat-30 ta' Ġunju 2018.

(7)

Ir-Regolament tal-Kunsill (UE) 2017/595 (2) ħassar it-tabella tal-opportunitajiet tas-sajd għal-limanda (Limanda limanda) u għall-barbun (Platichthys flesus) fl-ilmijiet tal-Unjoni tad-diviżjoni IIa u fis-subżona IV tal-ICES stabbiliti fl-Anness IA għar-Regolament (UE) 2017/127. Għalhekk, huwa xieraq li titneħħa l-limanda min-noti f'qiegħ il-paġna fl-Anness IA għar-Regolament (UE) 2017/127, fejn jirreferu għal limanda bħala speċi aċċessorja assoċjata.

(8)

Fir-rakkomandazzjoni 1:2014 tal-Kummissjoni tas-Sajd tal-Atlantiku tal-Grigal (NEAFC), ġie pprojbit li jsir sajd għar-redfish (Sebastes mentella) fl-ilmijiet internazzjonali ta' subżoni I u II tal-ICES mill-1 ta' Jannar sat-30 ta' Ġunju 2014. Il-projbizzjoni taħt dik ir-rakkomandazzjoni ma ġiet applikata qatt aktar wara t-tmiem ta' dak il-perijodu. Għalhekk jenħtieġ li l-opportunitajiet tas-sajd jiġu emendati sabiex jippermettu s-sajd għar-redfish matul l-2017.

(9)

Fil-Laqgħa Annwali tagħha tal-2016, il-Kummissjoni Internazzjonali għall-Konservazzjoni tat-Tonn tal-Atlantiku (ICCAT) adottat ir-Rakkomandazzjoni 16-05 (ir-“Rakkomandazzjoni 16-05”) li tistabbilixxi t-TAC għall-pixxispad tal-Mediterran (Xiphias gladius) għal 10 500 tunnellata, u li tistabbilixxi Grupp ta' Ħidma sabiex tiġi stabbilita allokazzjoni ġusta u ekwa tal-iskema tat-TAC għall-pixxispad tal-Mediterran, u biex jiġu stabbiliti l-kwoti allokati għall-2017 lill-Partijiet Kontraenti u lill-Partijiet, lill-Entitajiet jew lill-Entitajiet tas-Sajd mhux Kontraenti li jikkooperaw u biex jiġi definit il-mekkaniżmu għall-ġestjoni tat-TAC.

(10)

Permezz ta' ittra indirizzata lis-Segretarjat fit-23 ta' Diċembru 2016, l-Unjoni kkonfermat li ser timplimenta r-Rakkomandazzjoni 16-05 mill-1 ta' Jannar 2017. B'mod partikolari, l-Unjoni kkonfermat li ser timplimenta l-perijodu tal-għeluq għall-pixxispad tal-Mediterran imsemmi fil-paragrafu 11 tar-Rakkomandazzjoni 16-05 matul il-perijodu bejn l-1 ta' Jannar u l-31 ta' Marzu, li jibda fl-2017. Għalhekk, huwa xieraq li jiġi introdott it-tali għeluq bħala kundizzjoni funzjonalment marbuta mal-iffissar u l-allokazzjoni tal-opportunitajiet tas-sajd għall-pixxispad tal-Mediterran.

(11)

Il-Grupp ta' Ħidma stabbilit bir-Rakkomandazzjoni 16-05 iltaqa' bejn l-20 u t-22 ta' Frar 2017 u ppropona kriterju ta' allokazzjoni, kif ukoll kompromess għall-ġestjoni tal-utilizzazzjoni tal-kwoti għall-2017. Bħala parti minn dak il-kompromess, is-sehem tal-Unjoni kien stabbilit għal 70,756 % tat-TAC tal-ICCAT, li jammonta għal 7 410,48 tunnellata fl-2017. Għalhekk, huwa xieraq li s-sehem tal-Unjoni jiġi implimentat fil-liġi tal-Unjoni u li jiġu definiti l-kwoti għall-Istati Membri. L-allokazzjoni jenħtieġ li tkun ibbażata fuq il-qabdiet storiċi waqt il-perijodu ta' referenza bejn l-2012 u l-2015.

(12)

Il-limiti tal-qbid previsti fir-Regolament (UE) 2017/127 japplikaw mill-1 ta' Jannar 2017. Għalhekk, jeħtieġ li d-dispożizzjonijiet introdotti minn dan ir-Regolament emendatorju dwar il-limiti tal-qbid japplikaw ukoll minn dik id-data. Tali applikazzjoni retroattiva hija mingħajr preġudizzju għall-prinċipji taċ-ċertezza legali u għall-protezzjoni ta' aspettattivi leġittimi billi l-opportunitajiet tas-sajd ikkonċernati għadhom ma ġewx eżawriti.

(13)

Għalhekk jenħtieġ li r-Regolament (UE) 2017/127 jiġi emendat skont dan,

(1)

Fl-Artikolu 9(2), it-tielet subparagrafu huwa sostitwit b'dan li ġej:

“Id-derogi ta' hawn fuq għandhom japplikaw għall-bastimenti tas-sajd tal-Unjoni li rreġistraw qabdiet ta' spnott matul il-perijodu mill-1 ta' Lulju 2015 sat-30 ta' Settembru 2016: fil-punt (b) b'qabdiet irreġistrati permezz ta' snanar u lenez, u fil-punt (c) b'qabdiet irreġistrati permezz ta' għeżula armati fuq il-lasti. F'każ ta' sostituzzjoni ta' bastiment tas-sajd tal-Unjoni, l-Istati Membri jistgħu jippermettu li d-deroga tapplika għal bastiment tas-sajd ieħor dment li l-għadd ta' bastimenti tas-sajd tal-Unjoni soġġetti għad-deroga u l-kapaċità tas-sajd globali tagħhom ma jiżdidux.”;

(2)

L-Annessi IA u ID tar-Regolament (UE) 2017/127 huma emendati kif jidher fl-Anness għal dan ir-Regolament.