EUR-Lex Access to European Union law
This document is an excerpt from the EUR-Lex website
Document 32016R1952
Regulation (EU) 2016/1952 of the European Parliament and of the Council of 26 October 2016 on European statistics on natural gas and electricity prices and repealing Directive 2008/92/EC (Text with EEA relevance)
Regolament (UE) 2016/1952 tal-Parlament Ewropew u tal-Kunsill tas-26 ta’ Ottubru 2016 dwar l-istatistika Ewropea tal-prezzijiet tal-gass naturali u tal-elettriku u li jħassar id-Direttiva 2008/92/KE (Test b’relevanza għaż-ŻEE)
Regolament (UE) 2016/1952 tal-Parlament Ewropew u tal-Kunsill tas-26 ta’ Ottubru 2016 dwar l-istatistika Ewropea tal-prezzijiet tal-gass naturali u tal-elettriku u li jħassar id-Direttiva 2008/92/KE (Test b’relevanza għaż-ŻEE)
OJ L 311, 17.11.2016, p. 1–12
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
17.11.2016 |
MT |
Il-Ġurnal Uffiċjali tal-Unjoni Ewropea |
L 311/1 |
REGOLAMENT (UE) 2016/1952 TAL-PARLAMENT EWROPEW U TAL-KUNSILL
tas-26 ta’ Ottubru 2016
dwar l-istatistika Ewropea tal-prezzijiet tal-gass naturali u tal-elettriku u li jħassar id-Direttiva 2008/92/KE
(Test b’relevanza għaż-ŻEE)
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 338(1) tiegħu,
Wara li kkunsidraw il-proposta mill-Kummissjoni Ewropea,
Wara li l-abbozz tal-att leġiżlattiv intbagħat lill-Parlamenti nazzjonali,
Filwaqt li jaġixxu skont il-proċedura leġiżlattiva ordinarja (1),
Billi:
(1) |
Il-kompetittività, is-sostenibbiltà u s-sigurtà tal-enerġija huma l-miri globali ta’ unjoni tal-enerġija reżiljenti b’politika progressiva dwar it-tibdil fil-klima. |
(2) |
Hija meħtieġa data ta’ kwalità għolja, komparabbli, aġġornata, affidabbli u armonizzata dwar il-prezzijiet tal-gass naturali u tal-elettriku mposti fuq il-konsumaturi finali sabiex tiġi abbozzata politika tal-unjoni tal-enerġija u jsir monitoraġġ tas-swieq tal-enerġija tal-Istati Membri. |
(3) |
Dan ir-Regolament jimmira li jipprovdi qafas komuni għall-istatistika Ewropea biex jirfdu l-politiki tal-enerġija b’mod partikolari lejn il-ħolqien ta’ suq intern tal-enerġija kompletament integrat għall-konsumaturi. Għandha ssir disponibbli iktar trasparenza dwar il-kostijiet u l-prezzijiet tal-enerġija, kif ukoll fil-livell tal-appoġġ pubbliku, biex titjieb l-integrazzjoni tas-suq. Dan ir-Regolament ma jinvolvi l-ebda armonizzazzjoni tal-istruttura tal-prezzijiet jew tal-imposti fost l-Istati Membri. |
(4) |
Sal-lum, id-Direttiva 2008/92/KE tal-Parlament Ewropew u tal-Kunsill (2) ipprovdiet qafas komuni għall-produzzjoni, it-trażmissjoni u d-disseminazzjoni ta’ statistika komparabbli dwar il-prezzijiet tal-gass naturali u tal-elettriku imposti fuq il-konsumaturi industrijali fl-Unjoni. |
(5) |
Il-ġbir tad-data dwar il-prezzijiet tal-gass naturali u tal-elettriku imposti fuq il-konsumaturi finali fis-settur domestiku s’issa twettaq fuq bażi ta’ qbil volontarju. |
(6) |
Il-kumplessità dejjem tikber tas-suq intern tal-enerġija tagħmilha dejjem iktar diffiċli biex tinkiseb data tal-prezzijiet li hija affidabbli u aġġornata dwar gass naturali u l-elettriku fin-nuqqas ta’ obbligi legali vinkolanti biex tiġi pprovduta tali data, b’mod partikolari għas-settur domestiku. |
(7) |
Sabiex ikun garantit ir-rapportar tad-data tal-prezzijiet ta’ kwalità għolja għas-settur domestiku u għas-settur mhux domestiku, il-ġbir taż-żewġ tipi ta’ data għandu jkun kopert minn att leġiżlattiv. |
(8) |
Fil-biċċa l-kbira ta’ Stati Membri, id-data dwar is-sistemi ta’ trażmissjoni tinstab għand ir-regolaturi tal-enerġija. Madankollu, għadd ħafna ikbar ta’ kompilaturi tad-data huma involuti fil-kostijiet tad-distribuzzjoni u r-rapportar tad-data huwa kkunsidrat aktar diffiċli f’xi Stati Membri. Minħabba s-sinifikat tal-kostijiet tad-distribuzzjoni u l-ħtieġa għat-trasparenza f’din il-kwistjoni, il-ġbir tad-data dwar il-prezzijiet tal-gass naturali u l-elettriku għandu jsegwi l-prattiċi stabbiliti fis-Sistema Ewropea tal-Istatistika. |
(9) |
Is-sistema tal-livelli tal-konsum użata mill-Kummissjoni (Eurostat) fil-pubblikazzjoni tal-prezzijiet tagħha għandha tiżgura trasparenza tas-suq u disseminazzjoni mifruxa tad-data tal-prezzijiet mhux kunfidenzjali, u għandha tippermetti l-kalkolu tal-aggregati Ewropej. |
(10) |
Ir-Regolament (KE) Nru 223/2009 tal-Parlament Ewropew u tal-Kunsill (3) huwa l-qafas ta’ referenza għall-istatistika Ewropea. Dak ir-Regolament jipprovdi għall-ġbir ta’ statistika f’konformità mal-prinċipji ta’ imparzjalità, trasparenza, affidabbiltà, oġġettività, indipendenza professjonali u kosteffettività, filwaqt li tiġi protetta l-kunfidenzjalità statistika. |
(11) |
L-Istati Membri għandhom jiġbru d-data dwar il-prezzijiet tal-gass naturali u l-elettriku billi jużaw l-aktar sorsi u metodi xierqa li jipprovdu l-informazzjoni meħtieġa. |
(12) |
Id-data dwar il-prezzijiet imposti fuq il-konsumaturi finali tal-gass naturali u tal-elettriku għandha tippermetti t-tqabbil mal-prezzijiet ta’ komoditajiet oħrajn tal-enerġija. |
(13) |
L-informazzjoni tal-ġbir tad-data dwar il-prezzijiet u l-kwalità tad-data għandha tiġi pprovduta bħala parti mill-proċedura standard ta’ rapportar. |
(14) |
Data dettaljata dwar it-tqassim tal-livelli tal-konsum u l-ishma tas-suq rispettivi tagħhom huma parti essenzjali mill-istatistika tal-prezzijiet tal-gass naturali u tal-elettriku. |
(15) |
L-analiżi tal-prezzijiet tista’ titwettaq biss jekk tkun disponibbli statistika uffiċjali ta’ kwalità għolja mill-Istati Membri fir-rigward tal-komponenti u s-subkomponenti differenti tal-prezzijiet tal-gass naturali u tal-elettriku. Metodoloġija riveduta għall-ġenerazzjoni ta’ tqassim dettaljat tal-komponenti u s-subkomponenti varji tal-prezzijiet tal-gass naturali u tal-elettriku imposti fuq il-konsumaturi finali se tippermetti li jiġi analizzat l-impatt ta’ aspetti differenti fuq il-prezzijiet finali. |
(16) |
Id-data pprovduta lill-Kummissjoni (Eurostat) dwar il-prezzijiet u l-kundizzjonijiet tal-bejgħ lill-konsumaturi finali, u t-tqassim tal-għadd ta’ konsumaturi finali skont il-konsum f’kull livell tal-konsum, għandu jkun fiha l-informazzjoni neċessarja biex il-Kummissjoni tkun tista’ tiddeċiedi dwar miżuri jew proposti xierqa f’rabta mal-politika tal-enerġija. |
(17) |
Fehim tajjeb tat-taxxi, t-tariffi, il-levies u l-imposti f’kull Stat Membru huwa essenzjali għall-iżgurar tat-trasparenza tal-prezzijiet. Ġiet identifikata l-importanza tat-tqassim tad-data dwar il-kostijiet tan-netwerk, it-taxxi, t-tariffi, il-levies u l-imposti. |
(18) |
L-Istati Membri li fihom hemm konsum baxx tal-gass naturali bħala proporzjon tal-konsum finali tal-enerġija tad-djar għandhom jiġu eżentati mill-obbligu li jfornu data dwar il-prezzijiet tal-gass natural għall-konsumaturi domestiċi finali. |
(19) |
Il-Kummissjoni (Eurostat) flimkien mal-Istati Membri, sabiex ittejjeb l-affidabbiltà tad-data, għandha tivvaluta u, jekk ikun hemm bżonn, ittejjeb, il-metodoloġija għall-ġbir u l-ipproċessar tad-data f’mod preċiż, f’konformità mal-qafas tal-governanza għall-istatistika. Għalhekk, ir-rapporti tal-kwalità għandhom jitħejjew regolarment u l-valutazzjonijiet tal-kwalità tad-data tal-prezzijiet għandhom jitwettqu regolarment. |
(20) |
Abbażi ta’ talba motivata minn Stat Membru, il-Kummissjoni għandha tkun intitolata tagħti derogi lil dak l-Istat Membru b’rabta mal-obbligi speċifiċi li għalihom l-applikazzjoni ta’ dan ir-Regolament għas-sistema nazzjonali tal-istatistika ta’ dak l-Istat Membru tirrikjedi adattamenti maġġuri jew aktarx twassal għal piż addizzjonali sinifikanti fuq dawk li jwieġbu. |
(21) |
Sabiex ikunu żgurati kundizzjonijiet uniformi għall-implimentazzjoni ta’ dan ir-Regolament, is-setgħat ta’ implimentazzjoni għandhom jingħataw lill-Kummissjoni fir-rigward tal-format u l-arranġamenti għat-trażmissjoni ta’ data, rekwiżiti tekniċi għall-iżgurar fir-rigward tal-kontenut għar-rapporti standard tal-kwalità, u l-għoti ta’ derogi. Dawk is-setgħat għandhom jiġu eżerċitati skont ir-Regolament (UE) Nru 182/2011 tal-Parlament Ewropew u tal-Kunsill (4). |
(22) |
Minħabba li l-għan ta’ dan ir-Regolament, jiġifieri l-istabbiliment ta’ qafas legali komuni għall-produzzjoni sistematika ta’ statistika Ewropea dwar il-prezzijiet tal-gass naturali u tal-elettriku, ma jistax jinkiseb b’mod suffiċjenti mill-Istati Membri iżda jista’, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri skont il-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. B’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ biex jinkiseb dak l-għan. |
(23) |
Id-Direttiva 2008/92/KE għandha għalhekk titħassar. |
(24) |
Il-Kumitat tas-Sistema Ewropea tal-Istatistika ġie kkonsultat, |
ADOTTAW DAN IR-REGOLAMENT:
Artikolu 1
Suġġett
Dan ir-Regolament jistabbilixxi qafas komuni għall-iżvilupp, il-produzzjoni u d-disseminazzjoni ta’ statistika Ewropea komparabbli dwar il-prezzijiet tal-gass naturali u tal-elettriku għad-djar u l-konsumaturi finali mhux domestiċi fl-Unjoni.
Artikolu 2
Definizzjonijiet
Għall-finijiet ta’ dan ir-Regolament, japplikaw id-definizzjonijiet li ġejjin:
(1) |
“awtoprodutturi”, “konsum finali tal-enerġija” u “unità domestika” għandhom l-istess tifsira bħal dik attribwita lil dawk it-termini fl-Anness A tar-Regolament (KE) Nru 1099/2008 tal-Parlament Ewropew u tal-Kunsill (5); |
(2) |
“trażmissjoni”, “distribuzzjoni”, “konsumatur”, “konsumatur finali”, “konsumatur domestiku”, “konsumatur mhux domestiku” u “provvista” għandhom l-istess tifsira bħal dik attribwita lil dawk it-termini fl-Artikolu 2 tad-Direttiva 2009/72/KE tal-Parlament Ewropew u tal-Kunsill (6), meta użati f’rabta mal-elettriku; |
(3) |
“trażmissjoni”, “distribuzzjoni”, “forniment”, “konsumatur”, “konsumatur domestiku”, “konsumatur mhux domestiku” u “konsumatur finali” għandhom l-istess tifsira bħal dik attribwita lil dawk it-termini fl-Artikolu 2 tad-Direttiva 2009/73/KE tal-Parlament Ewropew u tal-Kunsill (7), meta użati f’rabta mal-gass naturali; |
(4) |
“komponent tan-netwerk” tfisser il-kombinament tal-kostijiet tan-netwerk tat-trażmissjoni u tad-distribuzzjoni kif stipulat fil-punt 6 tal-Anness I u fil-punt 5 tal-Anness II. |
Artikolu 3
Sorsi tad-data
L-Istati Membri għandhom jiġbru data dwar il-prezzijiet tal-gass naturali u tal-elettriku, u l-komponenti u s-subkomponenti tagħhom li jikkonċernaw il-kostijiet, it-taxxi, it-tariffi, il-levies u l-imposti tan-netwerk, u dwar il-volumi tal-konsum, b’konformità mal-Annessi I u II. Għandhom jintużaw wieħed jew aktar minn dawn is-sorsi li ġejjin, wara li jittieħed kont tal-prinċipji tat-tnaqqis tal-piż fuq dawk li jwieġbu u tas-simplifikazzjoni amministrattiva:
(a) |
stħarriġiet tal-istatistika; |
(b) |
sorsi amministrattivi; |
(c) |
sorsi oħra li japplikaw metodi ta’ stima statistika. |
Artikolu 4
Kopertura
1. L-Istati Membri għandhom jiżguraw li l-ġbir u l-kompilazzjoni tad-data, f’konformità mal-Annessi I u II jipprovdu data ta’ kwalità għolja komprensibbli u komparabbli li tkun rappreżentattiva tal-prezzijiet u tal-konsum tal-gass naturali u tal-elettriku rispettivi tagħhom.
2. L-Istati Membri ma għandhomx ikunu obbligati jittrażmettu data dwar il-prezzijiet tal-gass naturali għall-konsumaturi domestiċi jekk il-konsum tal-gass naturali fis-settur domestiku jkun responsabbli għal inqas minn 1,5 % tal-konsum nazzjonali finali tal-enerġija fis-settur domestiku.
3. Ta’ mill-inqas kull tliet snin, il-Kummissjoni (Eurostat) għandha tirrevedi liema Stati Membri mhumiex obbligati jittrażmettu data skont il-paragrafu 2.
Artikolu 5
Trażmissjoni tad-data
1. L-Istati Membri għandhom jipprovdu d-data lill-Kummissjoni (Eurostat) kif stipulat fl-Annessi I u II.
2. Il-Kummissjoni għandha tadotta atti ta’ implimentazzjoni li jistabbilixxu l-format u l-arranġamenti għat-trażmissjoni tad-data kif stipulat fl-Annessi I u II. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 10(2).
3. L-Istati Membri għandhom jipprovdu statistika lill-Kummissjoni (Eurostat) fi żmien tliet xhur mit-tmiem tal-perjodu ta’ referenza rilevanti.
Artikolu 6
Perjodi ta’ referenza u frekwenza tat-trażmissjoni
1. Il-perjodi ta’ referenza għad-data speċifikata fl-Annessi I u II għandhom ikunu annwali (Jannar sa Diċembru) jew biannwali (Jannar sa Ġunju u Lulju sa Diċembru). L-ewwel perjodi ta’ referenza għandhom jibdew fl-2017.
2. Il-frekwenza tat-trażmissjoni għandha tkun:
(a) |
annwali (għall-perjodu minn Jannar sa Diċembru) għad-data msemmija fil-punti 6(a) u 7 tal-Anness I u l-punti 5(a) u 6 tal-Anness II; |
(b) |
biannwali (għall-perjodi minn Jannar sa Ġunju u minn Lulju sa Diċembru) għad-data msemmija fil-punt 6(b) tal-Anness I u l-punt 5(b) tal-Anness II. |
Artikolu 7
Żgurar tal-kwalità
1. L-Istati Membri għandhom jiżguraw il-kwalità tad-data pprovduta f’konformità ma’ dan ir-Regolament. Għal dak il-għan, japplikaw il-kriterji standard tal-kwalità stabbiliti fl-Artikolu 12(1) tar-Regolament (KE) Nru 223/2009.
2. L-Istati Membri għandhom jinformaw lill-Kummissjoni (Eurostat), mingħajr dewmien, dwar kwalunkwe bidla metodoloġika jew bidla oħra li jista’ jkollha impatt sinifikanti fuq l-istatistika tal-prezzijiet tal-gass naturali u tal-elettriku, u fi kwalunkwe każ mhux iktar tard minn xahar wara li tokkorri dik il-bidla.
3. Kull tliet snin, l-Istati Membri għandhom jipprovdu lill-Kummissjoni (Eurostat) rapport standard tal-kwalità dwar id-data f’konformità mal-kriterji tal-kwalità stabbiliti fl-Artikolu 12(1) tar-Regolament (KE) Nru 223/2009. Dawk ir-rapporti għandhom jinkludu informazzjoni dwar l-ambitu u l-ġbir tad-data, il-kriterji tal-kalkolu, il-metodoloġija u s-sorsi tad-data użati, u kwalunkwe bidla fihom.
4. Il-Kummissjoni (Eurostat) għandha tivvaluta l-kwalità tad-data pprovduta, u għandha tuża dik il-valutazzjoni u analiżi tar-rapporti dwar il-kwalità msemmijin fil-paragrafu 3 sabiex tħejji u tippubblika rapport dwar il-kwalità tal-istatistika Ewropea koperta b’dan ir-Regolament.
5. Il-Kummissjoni għandha tadotta atti ta’ implimentazzjoni li jistabbilixxu r-rekwiżiti tekniċi għall-iżgurar tal-kwalità fir-rigward tal-kontenut tar-rapporti tal-kwalità imsemmija fil-paragrafu 3 ta’ dan l-Artikolu. Dawk l-atti ta’ implimentazzjoni għandhom jiġu adottati b’konformità mal-proċedura ta’ eżami msemmija fl-Artikolu 10(2).
Artikolu 8
Disseminazzjoni
Il-Kummissjoni (Eurostat) għandha tiddissemina l-istatistika tal-prezzijiet tal-gass naturali u tal-elettriku mhux aktar tard minn ħames xhur wara t-tmiem ta’ kull perjodu ta’ referenza.
Artikolu 9
Derogi
1. Id-derogi jistgħu jingħataw mill-Kummissjoni permezz ta’ atti ta’ implimentazzjoni f’rabta mal-obbligi speċifiċi li għalihom l-applikazzjoni ta’ dan ir-Regolament għas-sistema nazzjonali tal-istatistika ta’ Stat Membru tirrikjedi adattamenti maġġuri jew aktarx twassal għal piż addizzjonali sinifikanti fuq dawk li jwieġbu. Dawk l-atti ta’ implimentazzjoni għandhom jiġu adottati b’konformitá mal-proċedura ta’ eżami msemmija fl-Artikolu 10(2).
2. Għall-finijiet tal-paragrafu 1, l-Istat Membru kkonċernat għandu jissottometti talba debitament motivata lill-Kummissjoni sat-8 ta’ Awwissu 2017.
3. Derogi mogħtija skont il-paragrafu 1 għandhom jibqgħu fis-seħħ għall-iqsar perjodu ta’ żmien possibbli u fi kwalunkwe każ għal mhux aktar minn tliet snin.
4. Stat Membru li ngħata deroga skont il-paragrafu 1 għandu japplika d-dispożizzjonijiet rilevanti tad-Direttiva 2008/92/KE għat-tul taż-żmien tad-deroga.
Artikolu 10
Proċedura ta’ kumitat
1. Il-Kummissjoni għandha tiġi megħjuna mill-Kumitat tas-Sistema Ewropea tal-Istatistika stabbilit permezz tar-Regolament (KE) Nru 223/2009. Dak il-kumitat għandu jkun kumitat skont it-tifsira tar-Regolament (UE) Nru 182/2011.
2. Meta ssir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.
Artikolu 11
Tħassir tad-Direttiva 2008/92/KE
1. Id-Direttiva 2008/92/KE titħassar b’effett mill-1 ta’ Marzu 2017.
2. Minkejja l-paragrafu 1 ta’ dan l-Artikolu, id-Direttiva 2008/92/KE għandha tkompli tapplika skont il-kundizzjonijiet previsti fl-Artikolu 9 ta’ dan ir-Regolament.
3. Ir-referenzi għad-Direttiva mħassra huma referenzi għal dan ir-Regolament.
Artikolu 12
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Strasburgu, is-26 ta’ Ottubru 2016.
Għall-Parlament Ewropew
Il-President
M. SCHULZ
Għall-Kunsill
Il-President
I. LESAY
(1) Il-Pożizzjoni tal-Parlament Ewropew tat-13 ta’ Settembru 2016 (għadha mhux ippubblikata fil-Ġurnal Uffiċjali) u d-Deċiżjoni tal-Kunsill tat-13 ta’ Ottubru 2016.
(2) Id-Direttiva 2008/92/KE tal-Parlament Ewropew u tal-Kunsill tat-22 ta’ Ottubru 2008 li tikkonċerna l-proċedura Komunitarja sabiex tittejjeb it-trasparenza ta’ prezzijiet tal-gass u tal-elettriku imposti fuq konsumaturi industrijali (ĠU L 298, 7.11.2008, p. 9).
(3) Ir-Regolament (KE) Nru 223/2009 tal-Parlament Ewropew u tal-Kunsill tal-11 ta’ Marzu 2009 dwar l-Istatistika Ewropea u li jħassar ir-Regolament (KE, Euratom) Nru 1101/2008 tal-Parlament Ewropew u tal-Kunsill dwar it-trażmissjoni ta’ data suġġetta għall-kunfidenzjalità statistika lill-Uffiċċju tal-Istatistika tal-Komunitajiet Ewropej, ir-Regolament tal-Kunsill (KE) Nru 322/97 u d-Deċiżjoni tal-Kunsill 89/382/KEE, Euratom li tistabbilixxi Kumitat dwar il-Programmi tal-Istatistika tal-Komunitajiet Ewropej (ĠU L 87, 31.3.2009, p. 164).
(4) Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).
(5) Ir-Regolament (KE) Nru 1099/2008 tal-Parlament Ewropew u tal-Kunsill tat-22 ta’ Ottubru 2008 dwar l-istatistika dwar l-enerġija (ĠU L 304, 14.11.2008, p. 1).
(6) Id-Direttiva 2009/72/KE tal-Parlament Ewropew u tal-Kunsill tat-13 ta’ Lulju 2009 dwar ir-regoli komuni għas-suq intern fil-qasam tal-elettriku u li temenda d-Direttiva 2003/54/KE (ĠU L 211, 14.8.2009, p. 55).
(7) Id-Direttiva 2009/73/KE tal-Parlament Ewropew u tal-Kunsill tat-13 ta’ Lulju 2009 dwar ir-regoli komuni għas-suq intern tal-gass naturali u li tħassar id-Direttiva 2003/55/KE (ĠU L 211, 14.8.2009, p. 94).
ANNESS I
PREZZIJIET TAL-GASS NATURALI
Dan l-Anness jistabbilixxi l-metodoloġija għall-ġbir u l-kompilazzjoni tad-data statistika dwar il-prezzijiet tal-gass naturali għall-unitajiet domestiċi u l-konsumaturi finali mhux domestiċi.
1. Prezzijiet
Il-prezzijiet għandhom ikunu dawk imposti fuq konsumaturi domestiċi u konsumaturi finali mhux domestiċi li jixtru l-gass naturali għall-użu tagħhom stess li jiġi distribwit mis-sistema prinċipali.
2. Gass naturali
Il-gass naturali għandu jinkludi gass naturali u fjuwils gassużi oħrajn imħallta bil-gass naturali fin-netwerk tat-trażmissjoni u d-distribuzzjoni, bħall-bijogass. Fjuwils gassużi oħrajn li huma distribwiti min-netwerks dedikati mingħajr ma jitħalltu bil-gass naturali (eż. gass għall-produzzjoni tal-gass, gass għall-produzzjoni tal-kokk, gass għall-forn tal-blast u bijogass) għandhom jiġu esklużi.
3. Unitajiet tar-rapportar
Id-data għandha tinkludi l-konsumaturi kollha domestiċi u l-konsumaturi finali mhux domestiċi tal-gass naturali, iżda għandha teskludi lil dawk il-konsumaturi li jużaw il-gass naturali biss għal:
— |
il-ġenerazzjoni tal-elettriku fl-impjanti tal-enerġija jew f’impjanti ta’ sħana u enerġija kombinati (CHP); jew |
— |
skopijiet mhux tal-enerġija (eż. għall-użu fl-industrija tas-sustanzi kimiċi). |
4. Unitajiet tal-kejl
Il-prezzijiet għandhom ikunu l-prezzijiet nazzjonali medji imposti fuq il-konsumaturi domestiċi u l-konsumaturi finali mhux domestiċi.
Il-prezzijiet għandhom ikunu espressi fil-munita nazzjonali għal kull gigajoule (GJ). L-unità tal-enerġija użata għandha titkejjel abbażi tal-valur kalorifiku gross (GCV).
Il-prezzijiet għandhom jiġu ponderati skont is-sehem mis-suq tal-impriżi tal-provvista tal-gass naturali f’kull livell tal-konsum. Jekk ma jkunx possibbli li jiġu kkalkulati l-prezzijiet medji ponderati, jistgħu jiġu fornuti l-prezzijiet medji aritmetiċi. Fi kwalunkwe każ, id-data għandha tkopri sehem rappreżentattiv tas-suq nazzjonali.
5. Livelli tal-konsum
Il-prezzijiet għandhom ikunu bbażati fuq sistema ta’ livelli tal-konsum annwali standard tal-gass naturali.
(a) |
Għall-konsumaturi domestiċi, għandhom japplikaw il-livelli li ġejjin:
|
(b) |
Għall-konsumaturi finali mhux domestiċi, għandhom japplikaw il-livelli li ġejjin:
|
6. Livell ta’ dettall
Il-prezzijiet għandhom jinkludu l-imposti kollha li jridu jitħallsu: imposti tan-netwerk flimkien mal-enerġija kkunsmata nieqes kwalunkwe tnaqqis jew primjum, flimkien ma’ kwalunkwe imposta oħra (eż. kiri tal-miter, imposti permanenti). L-imposti tal-konnessjoni inizjali għandhom jiġu esklużi.
Id-data dettaljata għandha tiġi trażmessa kif speċifikat hawn taħt.
(a) Livell ta’ dettall meħtieġ għall-komponenti u s-subkomponenti
Il-prezzijiet għandhom jitqassmu fi tliet komponenti ewlenin u f’subkomponenti separati.
Il-prezz finali tal-konsumatur għall-gass naturali skont il-livell tal-konsum huwa s-somma tat-tliet komponenti ewlenin: il-komponent tal-enerġija u l-provvista, il-komponent tan-netwerk (trażmissjoni u distribuzzjoni) u l-komponent li jinkludi t-taxxi, t-tariffi, il-levies u l-imposti.
Komponent u Subkomponent |
Deskrizzjoni |
||
Enerġija u provvista |
Dan il-komponent għandu jinkludi l-prezz tal-komodità għall-gass naturali li jitħallas mill-fornitur jew il-prezz tal-gass naturali fil-punt tad-dħul fis-sistema ta’ trażmissjoni, inkluż, jekk applikabbli, il-kostijiet tal-utent finali li ġejjin: il-kostijiet tal-ħżin flimkien ma’ kostijiet marbuta mal-bejgħ tal-gass naturali lill-konsumaturi finali. |
||
Netwerk |
Il-prezz tan-netwerk għandu jinkludi l-kostijiet tal-utent finali li ġejjin: tariffi tat-trażmissjoni u d-distribuzzjoni, telf tat-trażmissjoni u tad-distribuzzjoni, kostijiet tan-netwerk, kostijiet tas-servizz ta’ wara l-bejgħ, kostijiet tas-servizz tas-sistema u l-kiri tal-miter u l-kostijiet tal-użu tal-miter. |
||
Subkomponent |
Il-komponent tan-netwerk għandu jitqassam f’kostijiet tan-netwerk tat-trażmissjoni u tad-distribuzzjoni tal-utent finali, kif ġej: |
||
|
|||
|
|||
Taxxi, tariffi, levies u imposti |
Dan il-komponent huwa s-somma tas-subkomponenti kollha (taxxi, tariffi, levies u imposti) elenkati hawn taħt. |
||
Subkomponent |
Is-subkomponenti li ġejjin għandhom jiġu trażmessi bħala entrati individwali għal kull livell tal-konsum definit fil-punt 5. |
||
|
|||
|
|||
|
|
||
|
|||
|
(b) Livell ta’ dettall abbażi tat-tassazzjoni
Il-prezzijiet għandhom jitqassmu f’dawn it-tliet livelli li ġejjin:
Livell |
Deskrizzjoni |
Prezzijiet esklużi t-taxxi, it-tariffi, il-levies u l-imposti kollha |
Dan il-livell tal-prezz għandu jinkludi biss il-komponent tal-enerġija u l-provvista u l-komponent tan-netwerk. |
Prezzijiet esklużi t-taxxa fuq il-valur miżjud (VAT) u taxxi rikoverabbli oħrajn |
Dan il-livell tal-prezz għandu jinkludi l-komponent tal-enerġija u l-provvista, il-komponent tan-netwerk u t-taxxi, it-tariffi, il-levies u l-imposti kkunsidrati bħala mhux rikoverabbli għall-konsumaturi finali mhux domestiċi. Għall-konsumaturi domestiċi dan il-livell tal-prezz għandu jinkludi l-komponenti tal-enerġija u n-netwerk u t-taxxi, it-tariffi, il-levies u l-imposti iżda jeskludi l-VAT. |
Prezzijiet inklużi t-taxxi kollha |
Dan il-livell tal-prezz għandu jinkludi l-komponent tal-enerġija u l-provvista, il-komponent tan-netwerk, u t-taxxi, it-tariffi, il-levies u l-imposti rikoverabbli u mhux rikoverabbli kollha, inkluża l-VAT. |
7. Volumi tal-konsum
L-Istati Membri għandhom jittrażmettu l-informazzjoni dwar is-sehem relattiv tal-gass naturali f’kull livell tal-konsum abbażi tal-volum totali li għalih jirreferu l-prezzijiet.
Il-volumi tal-konsum annwali għal kull livell tal-konsum għandhom jiġu trażmessi darba fis-sena, flimkien mad-data tal-prezzijiet għat-tieni simestru.
Id-data ma għandhiex tkun iktar qadima minn sentejn.
(1) Id-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni tat-taxxa fuq il-valur miżjud (ĠU L 347, 11.12.2006, p. 1).
ANNESS II
PREZZIJIET TAL-ELETTRIKU
Dan l-Anness jistabbilixxi l-metodoloġija għall-ġbir u l-kompilazzjoni tad-data statistika dwar il-prezzijiet tal-elettriku għall-unitajiet domestiċi u l-konsumaturi finali mhux domestiċi.
1. Prezzijiet
Il-prezzijiet għandhom ikunu dawk mitluba minn konsumaturi domestiċi u konsumaturi finali mhux domestiċi li jixtru l-elettriku għall-użu tagħhom stess.
2. Unitajiet tar-rapportar
Id-data għandha tinkludi l-konsumaturi kollha domestiċi u l-konsumaturi finali mhux domestiċi tal-elettriku, iżda l-elettriku ġġenerat u sussegwentement ikkunsmat mill-awtoprodutturi għandu jiġi eskluż mill-obbligu ta’ rapportar.
3. Unitajiet ta’ kejl
Il-prezzijiet għandhom ikunu l-prezzijiet nazzjonali medji imposti fuq il-konsumaturi domestiċi u l-konsumaturi finali mhux domestiċi.
Il-prezzijiet għandhom ikunu espressi fil-munita nazzjonali għal kull kilowatt-siegħa (kWh).
Il-prezzijiet għandhom jiġu ponderati skont is-sehem tas-suq tal-impriżi tal-provvista tal-elettriku f’kull livell tal-konsum Jekk ma jkunx possibbli li jiġu kkalkulati l-prezzijiet medji ponderati, jistgħu jiġu fornuti l-prezzijiet medji aritmetiċi Fi kwalunkwe każ, id-data għandha tkopri sehem rappreżentattiv tas-suq nazzjonali.
4. Livelli tal-konsum
Il-prezzijiet għandhom ikunu bbażati fuq sistema ta’ livelli tal-konsum annwali standard tal-elettriku.
(a) |
Għall-konsumaturi domestiċi, għandhom japplikaw il-livelli li ġejjin:
|
(b) |
Għall-konsumaturi finali mhux domestiċi, għandhom japplikaw il-livelli li ġejjin:
|
5. Livell ta’ detall
Il-prezzijiet għandhom jinkludu l-imposti kollha li jridu jitħallsu: imposti tan-netwerk flimkien mal-enerġija kkunsmata, nieqes kwalunkwe tnaqqis jew primjum, flimkien ma’ kwalunkwe imposta oħra (eż. kiri tal-miter, imposti permanenti). L-imposti tal-konnessjoni inizjali għandhom jiġu esklużi.
Id-data dettaljata għandha tintbagħat kif speċifikat hawn taħt.
(a) Livell ta’ dettall meħtieġ għall-komponenti u s-subkomponenti
Il-prezzijiet għandhom jiġu suddiviżi fi tliet komponenti ewlenin u f’ subkomponenti separati.
Il-prezz finali tal-konsumatur għall-elettriku skont il-livell tal-konsum huwa s-somma tat-tliet komponenti ewlenin: il-komponent tal-enerġija u tal-provvista, il-komponent tan-netwerk (trażmissjoni u distribuzzjoni) u l-komponent li jinkludi t-taxxi, t-tariffi, il-levies, u l-imposti.
Komponent u Subkomponent |
Deskrizzjoni |
||
Enerġija u provvista |
Dan il-komponent għandu jinkludi l-kostijiet tal-utent finali li ġejjin: ġenerazzjoni, aggregazzjoni, enerġija tal-bilanċ, kostijiet tal-enerġija fornuta, servizzi tal-konsumatur, ġestjoni ta’ wara l-bejgħ u kostijiet oħra tal-provvista. |
||
Netwerk |
Il-prezz tan-netwerk għandu jinkludi l-kostijiet tal-utent finali li ġejjin: tariffi tat-trażmissjoni u d-distribuzzjoni, telf tat-trażmissjoni u d-distribuzzjoni, kostijiet tan-netwerk, kostijiet tas-servizz ta’ wara l-bejgħ, kostijiet tas-servizz tas-sistema, u l-kiri tal-miter u l-kostijiet tal-użu tal-miter. |
||
Subkomponent |
Il-komponent tan-netwerk għandu jitqassam f’kostijiet tan-netwerk tat-trażmissjoni u tad-distribuzzjoni tal-utent finali, kif ġej: |
||
|
|
||
|
|||
Taxxi, tariffi, levies u imposti |
Dan il-komponent huwa s-somma tas-subkomponenti kollha (taxxi, tariffi, levies u imposti) elenkati hawn taħt. |
||
Subkomponent |
Is-subkomponenti li ġejjin għandhom jintbagħtu bħala entrati individwali għal kull livell tal-konsum definit fil-punt 4. |
||
|
|
||
|
|||
|
|||
|
|||
|
|||
|
(b) Livell ta’ dettall abbażi tat-tassazzjoni
Il-prezzijiet għandhom jinqassmu f’dawn it-tliet livelli li ġejjin:
Livell |
Deskrizzjoni |
Prezzijiet esklużi t-taxxi, it-tariffi, il-levies u l-imposti kollha |
Dan il-livell tal-prezzijiet għandu jinkludi biss il-komponent tal-enerġija u l-provvista u l-komponent tan-netwerk. |
Prezzijiet esklużi t-taxxa fuq il-valur miżjud (VAT) u taxxi rikoverabbli oħrajn |
Dan il-livell tal-prezzijiet għandu jinkludi l-komponent tal-enerġija u l-provvista, il-komponent tan-netwerk u t-taxxi, it-tariffi, il-levies u l-imposti kkunsidrati bħala mhux rikoverabbli għall-konsumaturi finali mhux domestiċi. Għall-konsumaturi domestiċi dan il-livell tal-prezzijiet jinkludi l-komponenti tal-enerġija u n-netwerk u t-taxxi, it-tariffi, il-levies u l-imposti iżda jeskludi l-VAT. |
Prezzijiet inklużi t-taxxi kollha |
Dan il-livell tal-prezzijiet għandu jinkludi l-komponent tal-enerġija u l-provvista, il-komponent tan-netwerk, u t-taxxi, it-tariffi, il-levies u l-imposti rikoverabbli u mhux rikoverabbli kollha, inkluża l-VAT. |
6. Volumi tal-konsum
L-Istati Membri għandhom jittrażmettu l-informazzjoni dwar is-sehem relattiv tal-elettriku f’kull livell tal-konsum abbażi tal-volum totali li għalih jirreferu l-prezzijiet.
Il-volumi tal-konsum annwali għal kull livell tal-konsum għandhom jiġu trażmessi darba fis-sena, flimkien mad-data tal-prezzijiet għat-tieni semestru.
Id-data ma għandhiex tkun iktar qadima minn sentejn.