ANNESS

Manwal b'rakkomandazzjonijiet għall-kooperazzjoni internazzjonali bejn il-pulizija u miżuri għall-prevenzjoni u l-kontroll ta' vjolenza u inkwiet marbuta ma' partiti tal-futbol b'dimensjoni internazzjonali, fejn ikun involut tal-anqas Stat Membru wieħed (“Manwal tal-UE dwar il-Futbol”)

Kontenut tal-Manwal

Kapitolu

Suġġett

Għan, Kamp ta' Applikazzjoni u Użu tal-Manwal

4

1

Ġestjoni u Skambju ta' Informazzjoni mill-Pulizija

5

1.1

Introduzzjoni

5

1.2

Kompiti b'Dimensjoni Internazzjonali

5

1.3

Skambju ta' Informazzjoni tal-Pulizija

6

1.3a

Definizzjonijiet

6

1.3b

Tipi ta' Informazzjoni

6

1.3c

Sekwenza Kronoloġika għall-Iskambju ta' Informazzjoni

6

1.3d

Skambju ta' Informazzjoni ma' Pajjiżi li Mhumiex fl-UE

7

1.4

Ġlieda Kontra t-Terroriżmu u Kriminalità Serja u Organizzata

7

2

Gwida Ġenerali dwar ir-Rwol Nazzjonali u l-Kompiti tal-NFIPs

8

3

Kooperazzjoni bejn il-Pulizija Ospitanti u d-Delegazzjonijiet tal-Pulizija Viżitaturi

8

3.1

Prinċipji Ewlenin

8

3.2

Appoġġ għal Operazzjonijiet tal-Pulizija Ospitanti

8

3.3

Arranġamenti ta' Kooperazzjoni

9

3.4

Protokolli Mudell għal Partiti Uniċi

9

3.5

Spejjeż u Arranġamenti Finanzjarji

10

3.6

Żjarat minn Qabel

10

3.7

Akkumpanjament għal Delegazzjonijiet ta' Pulizija tal-Pajjiż Viżitatur (Ċiċeruni)

11

3.8

Kompożizzjoni tad-Delegazzjonijiet tal-Pulizija Viżitaturi

11

3.9

Kompiti Ewlenin tad-Delegazzjoni tal-Pulizija Viżitatura

12

3.10

Lingwa

13

3.11

Kooperazzjoni bejn Pulizija Ospitanti u Viżitaturi matul l-Avveniment

13

3.12

Użu ta' Flokkijiet ta' Identifikazzjoni

13

3.13

Akkreditazzjoni

13

3.14

Tornej tal-Futbol f'Pajjiżi mingħajr NFIP

13

3.14a

Ftehimiet Bilaterali

13

3.14b

Kooperazzjoni bejn NFIPs

14

3.15

Rwol tal-Interpol u l-Europol

14

4

Kooperazzjoni bejn il-Pulizija u l-Organizzatur

14

5

Kooperazzjoni bejn Pulizija u Aġenziji tal-Ġustizzja u tal-Prosekuzzjoni

15

6

Kooperazzjoni bejn Pulizija u Partitarji

16

7

Strateġija ta' Komunikazzjoni u tal-Media

16

7.1

Strateġija tal-Komunikazzjoni

16

7.2

Strateġija tal-Media

17

8

Laqgħat ta' Esperti tal-UE dwar is-Sikurezza u s-Sigurtà fil-Futbol

17

9

Lista ta' Dokumenti Rilevanti dwar is-Sikurezza u s-Sigurtà fl-Avvenimenti tal-Futbol

18

9.1

Dokumenti prinċipali adottati diġà mill-Kunsill tal-Unjoni Ewropea

18

9.2

Dokumenti prinċipali adottati diġà mill-Kunsill tal-Ewropa

18

Appendix 1

Protocol for Deployment of Visiting Police Delegations (Prüm)

19

Appendix 2

Protocol for Deployment of Visiting Police Delegations (Non-Prüm)

25

Appendiċi 3

Speċifikazzjonijiet għal Flokkijiet ta' Identifikazzjoni tal-Pulizija

30

Appendiċi 4

Valutazzjoni Dinamika tar-Riskji u Ġestjoni tal-Folol

32

Appendiċi 5

Kategorizzazzjoni tal-Partitarji tal-Futbol

35

Għan, Kamp ta' Applikazzjoni u Użu tal-Manwal

L-għan ta' dan id-dokument huwa li jissaħħu s-sigurtà u s-sikurezza fil-partiti tal-futbol b'dimensjoni internazzjonali, u b'mod partikolari biex tiġi massimizzata l-effikaċja tal-kooperazzjoni internazzjonali bejn il-pulizija.

Il-kontenut, li hu konsistenti mal-prattika tajba stabbilita tal-adozzjoni ta' approċċ integrat bejn diversi aġenziji għas-sikurezza, is-sigurtà u s-servizz fil-futbol, jista' jiġi applikat, fejn ikun adatt, għal avvenimenti sportivi oħra b'dimensjoni internazzjonali jekk Stat Membru jiddeċiedi hekk.

Il-kontenut huwa mingħajr preġudizzju għad-dispożizzjonijiet nazzjonali eżistenti, b'mod partikolari l-kompetenzi u r-responsabbiltajiet tal-aġenziji differenti f'kull Stat Membru.

Għalkemm dan id-dokument jiffoka prinċipalment fuq il-kooperazzjoni internazzjonali bejn il-pulizija, in-natura tal-ġestjoni tal-futbol (u avvenimenti sportivi oħra) li tinvolvi diversi aġenziji, hija riflessa fir-referenzi għall-interazzjoni tal-pulizija ma' sħab prinċipali oħra, bħall-organizzatur tal-avveniment, u l-partijiet konċernati, b'mod partikolari l-partitarji.

Il-kooperazzjoni internazzjonali bejn il-pulizija u l-operazzjonijiet taż-żamma tal-ordni mill-pulizija fil-futbol għandhom ikunu ggwidati mill-prinċipji tal-legalità, il-proporzjonalità u l-adegwatezza. Fl-Appendiċi 4 hemm eżempji dettaljati tal-prattika tajba b'rabta mal-valutazzjoni dinamika tar-riskju u l-ġestjoni tal-folol.

Filwaqt li l-awtorità kompetenti fl-Istat Membru organizzatur hija responsabbli biex tipprovdi avveniment bla periklu u sigur, l-awtoritajiet fi stati parteċipanti, ġirien u ta' transitu għandhom responsabbiltà li jassistu fejn jeħtieġ il-każ.

Dan id-dokument għandu jitqassam b'mod wiesa' u jiġi applikat f'kull Stat Membru u pajjiżi Ewropej oħrajn u lil hinn sabiex jiġu mminimizzati r-riskji ta' sigurtà u sikurezza u tiġi żgurata kooperazzjoni internazzjonali effettiva bejn il-pulizija.

KAPITOLU 1

1.   Ġestjoni u Skambju ta' Informazzjoni mill-Pulizija

1.1.   Introduzzjoni

L-iskambju f'waqtu ta' informazzjoni preċiża huwa tal-aktar importanza fit-tisħiħ tas-sigurtà u s-sikurezza u l-prevenzjoni ta' vjolenza u diżordni relatati mal-futbol.

Skont id-Deċiżjoni tal-Kunsill 2002/348/ĠAI, kif emendata bid-Deċiżjoni tal-Kunsill 2007/412/ĠAI tat-12 ta' Ġunju 2007, kull Stat Membru għandu jistabbilixxi Punt Nazzjonali ta' Informazzjoni dwar il-Futbol (NFIP) biex jaġixxi bħala l-punt ta' kuntatt ċentrali nazzjonali għall-iskambju ta' informazzjoni rilevanti għall-partiti tal-futbol b'dimensjoni internazzjonali, u għall-faċilitazzjoni tal-kooperazzjoni internazzjonali bejn il-pulizija dwar il-partiti tal-futbol.

Fejn hemm kuntatt dirett bejn pulizija organizzaturi u viżitaturi, kwalunkwe informazzjoni skambjata għandha tiġi kondiviża simultanjament mal-NFIPs rilevanti. Tali kuntatt m'għandux jipperikola r-rwol prinċipali tal-NFIP fl-iżgurar tal-kwalità tal-informazzjoni u disseminazzjoni usa' lil sħab u awtoritajiet rilevanti oħra.

Ir-relazzjoni bejn l-NFIP u l-awtoritajiet nazzjonali kompetenti għandha tkun soġġetta għal-liġijiet nazzjonali applikabbli.

Skont l-Artikolu 1(4) tad-Deċiżjoni tal-Kunsill 2002/348/ĠAI, kull Stat Membru għandu jassigura li l-punt nazzjonali tiegħu ta' informazzjoni dwar il-futbol ikun kapaċi jwettaq b'mod effiċjenti u malajr il-kompiti assenjati lilu.

—	Biex ikun effettiv, il-persunal tal-NFIP għandu jkun imħarreġ u attrezzat biex jipprovdi sors nazzjonali ta' kompetenza esperta rigward iż-żamma tal-ordni mill-pulizija fil-futbol u kwistjonijiet assoċjati ta' sigurtà u sikurezza.

1.2.   Kompiti b'Dimensjoni Internazzjonali

L-NFIP jappoġġa l-awtoritajiet nazzjonali kompetenti. Abbażi tal-informazzjoni li ġiet analizzata u vvalutata, il-proposti jew ir-rakkomandazzjonijiet meħtieġa jintbagħtu lill-awtoritajiet nazzjonali kompetenti biex jgħinu fl-iżvilupp ta' politika dwar kwistjonijiet relatati mal-futbol li tinvolvi diversi aġenziji.

L-NFIP jaħdem mill-qrib mal-pulizija lokali fir-rigward ta' partiti tal-futbol nazzjonali jew internazzjonali. Biex dan l-appoġġ jingħata b'mod għalkollox effettiv, l-informazzjoni dwar ir-rwol importanti tal-NFIP għandha titqassam b'mod ġenerali u tinftiehem mill-aġenziji kollha tal-pulizija f'kull Stat Membru.

Kull Stat Membru għandu wkoll jagħmel arranġamenti biex jistabbilixxi netwerk nazzjonali ta' persunal maħtur tal-pulizija lokali inkarigat biex jiġbor u jipprovdi lill-NFIP l-informazzjoni u l-intelligence kollha dwar l-avvenimenti tal-futbol fil-lokalità tiegħu.

Għall-benefiċċju tal-NFIPs ta' pajjiżi oħra, jeħtieġ li kull NFIP jżomm analiżi aġġornata tar-riskji (1) dwar il-klabbs u t-tim nazzjonali tagħhom stess. L-analiżi tar-riskji hija ġeneralment kondiviża mal-NFIPs oħra bl-użu tal-formoli disponibbli fuq il-websajt tal-NFIPs (www.nfip.eu). (2) Hu enfasizzat, madankollu, li r-riskju jvarja u jiddependi minn għadd ta' fatturi. Għaldaqstant, matul avveniment ikun jeħtieġ issir valutazzjoni dinamika tar-riskju.

Kull NFIP għandu jkollu aċċess għall-bażi ta' data rilevanti nazzjonali tal-pulizija. L-iskambju ta' informazzjoni personali hu soġġett għal-liġi nazzjonali u internazzjonali applikabbli, speċjalment id-Deċiżjoni ta' Prüm (3) jew ftehimiet binazzjonali jew multilaterali.

L-NFIP jeħtieġ jieħu ħsieb li kull informazzjoni tkun soġġetta għal kontroll tal-kwalità fir-rigward tal-kontenut.

L-informazzjoni kollha għandha tiġi skambjata bl-użu ta' formoli adatti pprovduti fuq il-websajt tal-NFIP.

1.3.   Skambju ta' Informazzjoni tal-Pulizija

1.3a    Definizzjonijiet

It-terminu “avveniment” f'dan il-manwal jintuża biex ifisser partita speċifika jew tornew tal-futbol speċifiku fl-aspetti kollha tagħhom. It-terminu “pulizija ospitanti” jintuża biex ifisser il-pulizija tal-pajjiż fejn qed issir il-partita jew it-tornew. It-terminu “pulizija viżitaturi” jintuża biex jiddeskrivi l-pulizija ta', jew minn, pajjiż fejn ikun jinsab it-tim jew it-timijiet parteċipanti.

1.3b    Tipi ta' Informazzjoni

Tista' ssir distinzjoni bejn informazzjoni ġenerali u informazzjoni personali.

(a)   Informazzjoni ġenerali

Informazzjoni ġenerali tinkludi informazzjoni strateġika u tattika mfassla biex tinforma t-tħejjijiet u l-operazzjonijiet ta' avveniment b'rabta mal-identifikazzjoni u l-prevenzjoni jew it-tnaqqis ta' riskji għas-sikurezza u s-sigurtà, it-twettiq ta' analiżi dinamika tar-riskju qabel l-avveniment u kontinwament, u r-rispons xieraq u proporzjonat għar-riskji għas-sikurezza u s-sigurtà hekk kif ifeġġu matul l-avveniment.

(b)   Informazzjoni personali

F'dan il-kuntest, informazzjoni personali tirreferi għal informazzjoni dwar individwi li l-pulizija jqisu bħala li jippreżentaw riskju potenzjali għas-sigurtà pubblika b'rabta mal-avveniment. Din tista' tinkludi individwi li b'mod evidenti kkawżaw jew ikkontribwew għal vjolenza u diżordni b'rabta ma' partiti tal-futbol preċedenti.

1.3c    Sekwenza Kronoloġika għall-Iskambju ta' Informazzjoni

Tista' ssir distinzjoni bejn tliet fażijiet: qabel, matul u wara l-avveniment. Dawn it-tliet fażijiet mhux bilfors ikunu dejjem strettament separati.

Qabel l-avveniment:

L-NFIP ospitanti jgħaddi r-rekwiżiti ta' informazzjoni lill-NFIP tal-pajjiż/pajjiżi viżitaturi. Dawn ir-rekwiżiti jinkludu:

—	analiżi tar-riskju tal-partitarji tat-tim viżitatur;

—	informazzjoni rilevanti oħra rigward is-sikurezza u s-sigurtà u tal-avveniment, eż. dettalji tal-vjaġġi tal-partitarji u theddid ieħor għall-ordni pubbliku.

L-NFIP tal-pajjiż viżitatur/pajjiżi viżitaturi jwieġeb għar-rekwiżiti ta' informazzjoni tal-NFIP tal-pajjiż ospitanti u, fuq l-inizjattiva tiegħu stess, jipprovdi kull informazzjoni rilevanti lil kwalunkwe NFIP ieħor konċernat.

L-NFIP tal-pajjiż ospitanti jipprovdi informazzjoni dwar il-leġislazzjoni applikabbli u l-politika tal-awtoritajiet (eż. il-politika dwar l-alkoħol), l-organizzazzjoni tal-avveniment u dwar il-persunal prinċipali tas-sikurezza u s-sigurtà.

L-informazzjoni rilevanti kollha titqiegħed għad-dispożizzjoni tal-NFIPs l-oħrajn konċernati u tiddaħħal fil-websajt tal-NFIP permezz tal-formoli adatti.

L-NFIP tal-pajjiż viżitatur/pajjiżi viżitaturi jintalab jipprovdi informazzjoni f'waqtha u preċiża rigward il-movimenti ta' partitarji riskjużi u dawk mhux riskjużi, it-tim parteċipanti (fejn hemm theddida) u l-bejgħ ta' biljetti, flimkien ma' kwalunkwe informazzjoni rilevanti oħra.

L-NFIP tal-pajjiż ospitanti jipprovdi informazzjoni lill-NFIP tal-pajjiż viżitatur/pajjiżi viżitaturi, b'mod partikolari dwar l-integrazzjoni tad-delegazzjoni tal-pulizija viżitatura fl-operazzjoni taż-żamma tal-ordni tal-pajjiż ospitanti, kif ukoll informazzjoni għall-partitarji viżitaturi, eċċ.

Matul l-avveniment

L-NFIP tal-pajjiż ospitanti jista' jitlob konferma tal-informazzjoni pprovduta qabel u jitlob analiżi aġġornata tar-riskji. It-talba titressaq u titwieġeb permezz ta' sistema ta' uffiċjali ta' kollegament, jekk tali sistema tkun ġiet stabbilita.

L-NFIP tal-pajjiż ospitanti għandu jgħarraf lill-NFIP tal-pajjiż viżitatur meta jseħħu inċidenti rilevanti matul l-avveniment.

L-NFIP tal-pajjiż/pajjiżi viżitatur jissorvelja u, fejn meħtieġ, jipprovdi lill-NFIP ospitanti informazzjoni aġġornata dwar il-movimenti u dwar fejn jinsabu l-partitarji viżitaturi. Tiġi pprovduta wkoll lill-pajjiż ospitanti u kwalunkwe NFIP rilevanti ieħor informazzjoni utli dwar inċidenti relatati mal-avveniment fil-pajjiż ta' oriġini matul il-partiti jew it-tornej.

Tiġi pprovduta wkoll lill-NFIPs tal-pajjiż ta' oriġini u l-pajjiżi rilevanti ta' transitu informazzjoni ġenerali rigward ir-ritorn tal-partitarji, inkluż dawk li jkunu tkeċċew u/jew inċaħdilhom id-dħul.

Wara l-avveniment

Fi żmien ħamest ijiem mill-avveniment, l-NFIP tal-pajjiż ospitanti jipprovdi lil-NFIP tal-pajjiż viżitatur (permezz tal-formoli adatti mill-websajt tal-NFIP) b'informazzjoni:

—	rigward l-imġiba tal-partitarji sabiex l-analiżi tar-riskji tista' tiġi aġġornata mill-NFIPs tal-pajjiż/klabb li huma jappoġġaw u/jew il-post tar-residenza tagħhom;

—	dwar l-utilità operattiva tal-informazzjoni li huma pprovdew u tal-appoġġ ipprovdut mid-delegazzjoni(jiet) tal-pulizija viżitaturi;

—

id-deskrizzjoni ta' kwalunkwe inċident: isir skambju ta' informazzjoni dwar arresti jew sanzjonijiet skont il-liġi nazzjonali u internazzjonali. Meta jkun possibbli din l-informazzjoni għandha tinkludi: — dettalji personali tal-persuni arrestati/kundannati li wettqu reati; — isem l-awtorità responsabbli tal-infurzar tal-liġi; — reġistru tal-avvenimenti (jekk ikun disponibbli); — id-deċiżjoni tal-qorti (jekk tkun disponibbli); — il-provi disponibbli (b'mod partikolari ritratti/filmati ta' viżitaturi li wettqu reat li għadhom mhumiex identifikati).

Imbagħad, abbażi tal-informazzjoni pprovduta mill-NFIP tal-pajjiż ospitanti u d-delegazzjoni tal-pulizija viżitatura, l-NFIP viżitatur jaġġorna l-analiżi ġenerika tiegħu tar-riskji.

L-NFIPs ospitanti u viżitaturi jikkooperaw biex jivvalutaw l-effikaċja tal-arranġamenti għall-iskambju ta' informazzjoni u l-ħidma tad-delegazzjoni tal-pulizija viżitatura.

1.3d    Skambju ta' Informazzjoni ma' Pajjiżi li Mhumiex fl-UE

L-NFIPs huma l-mezz xieraq għall-iskambju ta' informazzjoni ma' NFIPs ta' pajjiżi li mhumiex fl-UE. Jekk pajjiż ma jkollux NFIP, id-dipartiment governattiv responsabbli għal kwistjonijiet ta' żamma tal-ordni pubbliku għandu jintalab jaħtar punt ta' kuntatt ċentrali tal-pulizija. Id-dettalji tal-kuntatt għandhom jintbagħtu lil NFIPs oħra u jiddaħħlu fil-websajt tal-NFIP.

1.4.   Ġlieda Kontra t-Terroriżmu u Kriminalità Serja u Organizzata

Għall-iskambju ta' informazzjoni dwar kwistjonijiet bħall-ġlieda kontra t-terroriżmu u l-kriminalità serja u organizzata, l-aġenzija kompetenti tal-pulizija fil-pajjiż ospitanti tista' tikkomunika permezz ta' kwalunkwe netwerk eżistenti jew uffiċjali ta' kollegament speċjalizzati maħtura għal dak l-għan.

KAPITOLU 2

2.   Gwida Ġenerali dwar ir-Rwol Nazzjonali u l-Kompiti tal-NFIPs

F'livell nazzjonali, l-NFIP għandu jservi bħala sors nazzjonali ta' kompetenza esperta fuq iż-żamma tal-ordni waqt il-futbol. Biex jaqdi dan ir-rwol, l-NFIP għandu jwettaq sensiela ta' kompiti essenzjali relatati mal-futbol, inkluż:

—	koordinament tal-iskambju ta' informazzjoni dwar partiti tal-futbol milgħuba f'kompetizzjonijiet domestiċi;

—	ġbir u analiżi ta' data dwar inċidenti marbuta mal-futbol (ġewwa u barra l-istadiums) kif ukoll arresti u detenzjonijiet assoċjati u l-eżitu ta' kwalunkwe proċedura ġudizzjarja jew amministrattiva konsegwenti;

—	ġbir u analiżi ta' informazzjoni dwar l-impożizzjoni ta' miżuri ta' esklużjoni u, fejn adatt, ġestjoni tal-konformità ma' dawk il-miżuri ta' esklużjoni;

—	fejn adatt, koordinament u organizzazzjoni tat-taħriġ u l-ħidma ta' uffiċjali tal-intelligence u/jew ta' spotters.

NFIP jista' jidħol fi ftehim bilaterali formali ma' pajjiż terz rigward l-iskambju ta' ċerta informazzjoni skont il-leġislazzjoni nazzjonali tagħhom. Din l-informazzjoni ma tistax titqassam lil ħaddieħor mingħajr il-qbil tal-oriġinatur.

L-NFIPs jistgħu jaqdu rwol essenzjali billi jgħinu lill-kmandanti tal-pulizija tal-partita jwettqu l-prijoritajiet strateġiċi u operattivi tagħhom fil-partiti kollha ta' dimensjoni internazzjonali. Il-prijoritajiet prinċipali għall-operazzjonijiet taż-żamma tal-ordni pubbliku ospitanti għandhom jinkludu:

—	ħolqien ta' ambjent bla periklu, sigur u akkoljenti għall-partitarji u l-komunitajiet lokali;

—	ġestjoni tal-aspetti kollha tal-avveniment relatati maż-żamma tal-ordni pubbliku;

—	stabbiliment tat-tħejjijiet għaż-żamma tal-ordni pubbliku u l-istrateġiji operattivi informati mill-valutazzjonijiet tal-pulizija dwar ir-riskju;

—	monitoraġġ ta' xenarji ta' riskju emerġenti u rispons proporzjonat, permezz ta' intervent immirat bikri, biex jiġi evitat li r-riskju jiskala;

—	l-ikbar użu possibbli ta' informazzjoni u pariri dwar id-dinamika tal-partitarji viżitaturi pprovduti mid-delegazzjonijiet tal-pulizija viżitaturi; u

—	faċilitazzjoni ta' fehim dwar kif l-aħjar jiġu integrati kulturi, stili u tattiki potenzjalment differenti ta' żamma tal-ordni pubbliku fl-operazzjoni ospitanti taż-żamma tal-ordni.

KAPITOLU 3

3.   Kooperazzjoni bejn il-Pulizija Ospitanti u d-Delegazzjonijiet tal-Pulizija Viżitaturi

3.1.   Prinċipji Ewlenin

Il-pajjiżi li għandhom il-possibbiltà legali li ma jħallux li partitarji riskjużi jivvjaġġaw barra mill-pajjiż għandhom jieħdu l-miżuri kollha meħtieġa biex jiksbu dan l-objettiv b'mod effettiv u għandhom jinfurmaw lill-pajjiż organizzatur skont il-każ. Kull pajjiż għandu jieħu l-miżuri kollha possibbli biex ma jħallix li ċ-ċittadini tiegħu jipparteċipaw fi u/jew jorganizzaw disturbi fl-ordni pubbliku f'pajjiż ieħor.

L-esperjenza ġenerali fl-Ewropa tul l-għaxar snin li għaddew hi xhieda tar-rwol kruċjali tad-delegazzjonijiet tal-pulizija viżitaturi fl-appoġġ għall-operazzjonijiet tal-pulizija tal-pajjiżi ospitanti.

3.2.   Appoġġ għal Operazzjonijiet tal-Pulizija Ospitanti

Minbarra l-iskambju komprensiv ta' informazzjoni, u skont il-prinċipji fil-kapitolu 1 ta' dan il-manwal, l-NFIP organizzatur, wara konsultazzjoni mill-qrib mal-aġenzija operattiva kompetenti taż-żamma tal-ordni pubbliku, għandu jistieden delegazzjoni tal-pulizija viżitatura mill-pajjiż jew pajjiżi viżitaturi kull meta jkun hemm tornew ewlieni.

Biex jagħtu valur miżjud lill-operazzjonijiet ta' żamma tal-ordni tal-pajjiż organizzatur, huwa essenzjali li d-delegazzjonijiet tal-pulizija viżitaturi jinkludu persunal b'għarfien u esperjenza tad-dinamika u l-imġiba tal-partitarji viżitaturi.

Waqt avveniment, id-delegazzjoni tal-pulizija viżitatura għandha titqies bħala sors ewlieni ta' informazzjoni dwar il-partitarji viżitaturi, l-imġiba tagħhom u kwalunkwe riskju potenzjali. Dan il-valur miżjud għall-kmandant tal-pulizija ospitanti jista' jinkludi:

—	ġestjoni adatta tal-folla tal-partitarji regolari;

—	kisba u tqassim ta' informazzjoni qabel u dakinhar tal-partita;

—	monitoraġġ mill-qrib tal-avvenimenti sabiex il-pulizija tal-pajjiż organizzatur jingħataw informazzjoni preċiża u f'waqtha;

—	monitoraġġ u interpretazzjoni tal-imġiba tal-partitarji viżitaturi u identifikazzjoni u monitoraġġ ta' partitarji riskjużi u xenarji potenzjali ta' riskju biex jinfurmaw valutazzjoni dinamika kontinwa tar-riskju (ara l-Appendiċi 5);

—	fejn ikun hemm qbil mal-kap tad-delegazzjoni viżitatura, u wara valutazzjoni tar-riskju mill-pulizija, intervent proattiv sabiex kwalunkwe mġiba ħażina tal-partitarji viżitaturi ma tiskalax;

—	komunikazzjoni mal-partitarji viżitaturi u servizz ta' kollegament bejn il-partitarji u l-pulizija ospitanti li jgħin biex jindirizza kwalunkwe problema potenzjali jew emerġenti;

—	ġbir ta' provi ta' kwalunkwe kriminalità, imġiba ħażina u reati kriminali u identifikazzjoni ta' viżitaturi li jwettqu reat.

3.3.   Arranġamenti ta' Kooperazzjoni

F'konformità mad-Deċiżjoni tal-Kunsill 2002/348/ĠAI, għal partiti tal-futbol uniċi b'dimensjoni internazzjonali, l-istedina formali lil delegazzjoni tal-pulizija viżitatura għandha tgħaddi mingħand l-NFIP fil-pajjiż ospitanti. Waqt li tqis l-għanijiet speċifiċi tal-kooperazzjoni, l-istedina għandha tindika l-kompożizzjoni tad-delegazzjoni u tiċċara r-rwoli u r-responsabbiltajiet tagħhom. Għandha wkoll tispeċifika t-tul ta' żmien intenzjonat li d-delegazzjoni tal-pulizija viżitatura ser iddum fil-pajjiż ospitanti.

Għal tornej internazzjonali u partiti uniċi (jekk jintalab hekk minn kwalunkwe NFIP) l-istedina formali lil delegazzjoni tal-pulizija viżitatura għandha tintbagħat mill-awtorità kompetenti fil-pajjiż ospitanti, fuq parir mill-NFIP tal-pajjiż ospitanti, u tista' tkun soġġetta għal qbil intergovernattiv.

Jekk ma tiġix mistiedna delegazzjoni ta' pulizija viżitatura mill-NFIP ospitanti, l-NFIP tal-pajjiż viżitatur jista', jekk iqis li jkun xieraq, iressaq proposta proattiva lill-NFIP ospitanti biex tintbagħat delegazzjoni. Jekk l-NFIP ospitanti ma jaċċettax il-proposta, kwalunkwe delegazzjoni tal-pulizija li tivvjaġġa tkun qed taġixxi f'kapaċità mhux uffiċjali barra mill-ambitu ta' dan il-manwal.

L-istedina dettaljata biex jiġi pprovdut appoġġ għandha tkun miftiehma bejn l-NFIPs konċernati minn qabel sew ta' tornew u/jew partita unika sabiex id-delegazzjoni tal-pulizija viżitatura jkollha biżżejjed żmien biex tipprepara. Għal din ir-raġuni, stedina biex jiġi pprovdut appoġġ għandha tiġi ppreżentata malajr kemm jista' jkun wara li titħabbar id-data tal-partita.

Għal partiti uniċi b'dimensjoni internazzjonali d-delegazzjoni tal-pulizija viżitatura tkun teħtieġ tal-anqas tliet ġimgħat biex tipprepara. Jekk ikun hemm preavviż ta' inqas minn tliet ġimgħat għal partita (pereżempju fl-aħħar stadji ta' kompetizzjoni Ewropea għall-klabbs jew minħabba żieda fil-livell tar-riskju) l-istedina għandha tintbagħat minnufih. Għal tornej internazzjonali, id-delegazzjoni tal-pulizija viżitatura tkun teħtieġ tal-anqas 16-il ġimgħa żmien biex tipprepara.

Id-dettalji tal-arranġamenti (eż. setgħat tal-pulizija, tagħmir, uniformijiet eċċ.) għad-delegazzjoni tal-pulizija viżitatura jiġu nnegozjati bejn l-NFIPs, wara konsultazzjoni mal-pulizija lokali għall-partita unika.

3.4.   Protokolli Mudell għal Partiti Uniċi

It-Taqsima 3.14 tipprovdi mudell għan-negozjar ta' ftehimiet bilaterali dwar arranġamenti internazzjonali ta' kooperazzjoni bejn il-pulizija li jkunu japplikaw fir-rigward ta' tornej prinċipali tal-futbol.

Madanakollu, hu rakkomandat bis-sħiħ li l-arranġamenti għall-iskjerament ta' delegazzjoni ta' pulizija viżitatura għal partiti uniċi b'dimensjoni internazzjonali għandhom ikunu miftiehma minn qabel mill-pajjiż ospitanti u dak tal-viżitaturi u jiġu stabbiliti fi protokoll. Protokolli mudell jinsabu fl-Appendiċi 1, għal użu f'każ li ż-żewġ pajjiżi jkunu parti mit-Trattat ta' Prüm, u fl-Appendiċi 2, għal użu f'każ li pajjiż minnhom jew it-tnejn ma jkunux soġġetti għat-Trattat ta' Prüm.

Jekk ma jkunx hemm fis-seħħ ftehim governattiv binazzjonali, dawn l-arranġamenti għandhom jikkonformaw mal-Artikolu 17 tad-Deċiżjoni tal-Kunsill 2008/616/ĠAI (4) u l-liġijiet nazzjonali applikabbli.

Id-delegazzjoni viżitatura ma għandhiex tkun ikbar minn kif miftiehem mal-NFIP ospitanti u għandha tirrispetta l-arranġamenti għall-kmand u l-kontroll tal-pulizija ospitanti. Jekk taġixxi b'mod li mhux fit-termini tal-ftehim tkun qed taġixxi barra mill-ambitu ta' dan il-manwal u t-Trattati u d-Deċiżjonijiet tal-Kunsill applikabbli tal-UE.

3.5.   Spejjeż u Arranġamenti Finanzjarji

L-ispejjeż involuti għall-ospitar u l-iskjerament ta' delegazzjoni tal-pulizija viżitatura jvarjaw skont għadd ta' fatturi, inkluż id-daqs tal-delegazzjoni, id-distanza u l-mezz tal-ivvjaġġar, eċċ., iżda bħala medja l-ispejjeż mhumiex għolja u jirrappreżentaw investiment sod fit-tnaqqis tal-periklu u r-riskji għas-sigurtà. (5) Hu rakkomandat bis-sħiħ li kull Stat Membru jalloka baġit biex jospita u jibgħat delegazzjonijiet ta' pulizija viżitaturi għall-partiti kollha b'dimensjoni internazzjonali.

F'kull okkażjoni l-pajjiż ospitanti għandu jħallas għall-akkomodazzjoni, ikliet (jew sussistenza) u l-ivvjaġġar domestiku meħtieġ fil-pajjiż ospitanti, waqt li l-pajjiż viżitatur għandu jħallas għall-ivvjaġġar internazzjonali u s-salarji tal-membri tad-delegazzjoni involuti (ħlief jekk l-NFIPs rispettivi jaqblu b'mod eċċezzjonali dwar arranġamenti alternattivi). Dawn l-arranġamenti jeħtieġ jiġu ċċarati fil-protokoll imsemmi qabel għall-iskjerament ta' delegazzjonijiet ta' pulizija viżitaturi, kif disponibbli fuq il-websajt tal-NFIPs.

3.6.   Żjarat minn Qabel

Il-pulizija fil-pajjiż ospitanti għandha tipprovdi lill-membri prinċipali tad-delegazzjoni tal-pulizija viżitatura opportunità li jiffamiljarizzaw ruħhom mal-organizzazzjoni tal-operazzjonijiet tal-pulizija fil-pajjiż ospitanti u/jew il-belt/il-bliet tal-avveniment u mal-post fejn hemm l-istadium, u biex isiru jafu l-kmandant(i) operattiv(i) fil-belt jew fil-bliet tal-avveniment dakinhar tal-partiti:

—	għal tornej internazzjonali, dan għandu jsir tal-anqas sitt ġimgħat qabel it-tornew (eż. billi jiġu ospitati sessjonijiet ta' ħidma jew seminars għal membri prinċipali tad-delegazzjonijiet tal-pulizija viżitaturi).

—	għal partiti uniċi b'dimensjoni internazzjonali, dan għandu jsir f'waħda mill-ġranet qabel il-partita.

Żjarat minn qabel bħal dawn jipprovdu opportunità ideali lir-rappreżentanti tal-pulizija ospitanti u viżitaturi biex jimmassimizzaw il-kooperazzjoni internazzjonali billi:

—	jaqsmu bejniethom informazzjoni loġistika dwar l-arranġamenti tal-partitarji fil-belt ospitanti;

—	iżuru l-postijiet fejn il-partitarji viżitaturi mistennija jinġemgħu qabel u wara l-partita;

—	jiddiskutu u jiftiehmu dwar ir-rwol tad-delegazzjoni viżitatura;

—	iżidu l-għarfien dwar it-tħejjijiet u l-operazzjonijiet għaż-żamma tal-ordni pubbliku fil-pajjiż ospitanti;

—	jippjanaw għall-integrazzjoni tad-delegazzjoni viżitatura fl-operazzjoni;

—	jidentifikaw id-dispożizzjonijiet leġislattivi rilevanti u l-livelli ta' tolleranza tal-pulizija;

—	jiżviluppaw il-fiduċja u linji ta' kollegament effettivi bejn iż-żewġ aġenziji tal-pulizija; u

—	fejn ikun meħtieġ, jidentifikaw miżuri biex jisseparaw il-gruppi ta' partitarji fil-belt ospitanti.

3.7.   Akkumpanjament għal Delegazzjonijiet ta' Pulizija tal-Pajjiż Viżitatur

Huwa assolutament importanti li tiġi żgurata s-sikurezza tal-membri kollha tad-delegazzjoni tal-pulizija viżitatura u dan għandu jkun rifless fil-valutazzjonijiet kollha tar-riskji mill-pulizija ospitanti u dik viżitatura fir-rigward tal-iskjerament tal-pulizija.

Il-membri viżitaturi ta' delegazzjoni tal-pulizija, b'mod partikolari l-uffiċjal ta' kollegament, il-koordinatur tal-operazzjonijiet u l-uffiċjali tal-pulizija operattivi (ara hawn taħt) għandhom jaħdmu flimkien ma' uffiċjali tal-pulizija lokali (komunement magħrufa bħala ċiċeruni) li huma nfushom għandhom ikunu uffiċjali tal-pulizija fis-servizz b'esperjenza fiż-żamma tal-ordni waqt il-futbol fil-belt jew pajjiż tagħhom stess, inkluż familjarità maż-żona tal-avveniment u ż-żoni b'riskji potenzjali.

Iċ-ċiċeruni:

—	għandhom ikunu integrati fl-operazzjoni nazzjonali/lokali taż-żamma tal-ordni u jkunu kapaċi jgħaddu informazzjoni li tippermetti lill-kmandanti operattivi tal-pulizija jieħdu deċiżjonijiet importanti;

—	għandu jkollhom għarfien tal-organizzazzjoni, il-proċessi u l-istruttura tal-kmand tal-pulizija;

—	ma għandhomx ikunu inkarigati mill-monitoraġġ tal-partitarji riskjużi ta' pajjiżhom meta jkunu skjerati biex jakkumpanjaw membri ta' delegazzjoni tal-pulizija viżitatura;

—	għandhom ikunu informati bir-reqqa dwar l-operazzjoni taż-żamma tal-ordni tal-pajjiż ospitanti, ir-responsabbiltajiet tagħhom, u dwar il-kompiti li mistennija jwettqu l-membri tad-delegazzjoni tal-pulizija viżitatura;

—	għandhom ikunu responsabbli għas-sikurezza tad-delegazzjoni tal-pulizija viżitatura u jipprovdu linja ta' komunikazzjoni mal-pulizija ospitanti;

—	għandhom ikunu skjerati mad-delegazzjoni tal-pulizija viżitatura sakemm iddum l-operazzjoni; dan ikun ta' għajnuna biex tiġi żviluppata relazzjoni ta' ħidma effettiva;

—	għandhom jaħdmu mad-delegazzjoni tal-pulizija viżitatura b'lingwa komuni miftiehma minn qabel.

3.8.   Kompożizzjoni tad-Delegazzjonijiet tal-Pulizija Viżitaturi

Id-delegazzjoni tal-pulizija viżitatura għandha tkun magħmula b'mod li tkun kapaċi tappoġġa l-operazzjoni taż-żamma tal-ordni tal-pajjiż ospitanti.

Skont in-natura preċiża tal-appoġġ li għandu jingħata, il-kompożizzjoni tad-delegazzjoni tista' tkun kif ġej:

1.	kap tad-delegazzjoni inkarigat fil-funzjoni u l-ġerarkija mid-delegazzjoni tal-pulizija viżitatura;

2.	uffiċjal ta' kollegament (jew aktar jekk miftiehem mill-NFIPs rispettivi) responsabbli b'mod partikolari għall-iskambju ta' informazzjoni bejn pajjiżu u l-pajjiż organizzatur;

3.	koordinatur tal-operazzjonijiet responsabbli għall-koordinament tal-ħidma tal-uffiċjali tal-pulizija operattivi viżitaturi;

4.	spotters tal-pulizija bi dmirijiet ta' spotting, kollegament mal-partitarji, skorta u dmirijiet oħra;

5.	kelliemi/uffiċjal tal-istampa għall-kollegament mal-media.

Matul tornej internazzjonali l-uffiċjal ta' kollegament x'aktarx ikun ibbażat f'Ċentru għall-Koordinazzjoni tal-Informazzjoni tal-Pulizija (PICC) uniku jew binazzjonali, filwaqt li l-koordinatur tal-operazzjonijiet jista' jkun ibbażat f'ċentru lokali tal-informazzjoni fil-belt fejn isir l-avveniment. Għal partiti uniċi jistgħu jkunu bbażati fl-NFIP tal-pajjiż organizzatur jew xi ambjent adatt ieħor.

Għal partita unika l-uffiċjal ta' kollegament/koordinatur tal-operazzjonijiet għandu jaħdem mill-qrib mal-pulizija ospitanti fil-belt fejn issir il-partita.

Il-pulizija ospitanti għandhom jipprovdu lill-uffiċjali ta' kollegament/koordinaturi tal-operazzjonijiet aċċess għat-tagħmir tekniku rilevanti biex ikunu jistgħu jwettqu l-funzjonijiet tagħhom b'mod effettiv.

Id-delegazzjoni tal-pulizija viżitatura tista' tkun skjerata bi lbies pajżan jew bl-uniformi.

3.9.   Kompiti Ewlenin tad-Delegazzjoni tal-Pulizija Viżitatura

Biex jagħtu valur miżjud lill-operazzjonijiet tal-pulizija tal-pajjiż organizzatur, huwa essenzjali li d-delegazzjonijiet tal-pulizija viżitaturi jinkludu persunal b'għarfien u esperjenza tad-dinamika u l-imġiba tal-partitarji viżitaturi.

Id-delegazzjoni tal-pulizija viżitatura għandu jkollha l-kompetenzi li ġejjin:

—	għarfien prattiku tajjeb ta' dan il-manwal;

—	fehim tal-proċessi meħtieġa biex jiġi ffaċilitat l-iskambju internazzjonali ta' informazzjoni;

—	il-kapaċità li jirrappreżentaw lil pajjiżhom u r-rwol tagħhom b'mod effettiv fil-kollegamenti mas-servizzi tal-pulizija tal-pajjiż organizzatur (jiġifieri li jkunu diplomatiċi, kunfidenti fihom infushom, indipendenti u li kapaċi jikkomunikaw b'lingwa komuni maqbula minn qabel);

—	għarfien ġenerali tas-sitwazzjoni fejn jikkonċerna vjolenza/diżordni b'rabta mal-futbol f'pajjiżhom.

Il-kompiti prinċipali tad-delegazzjoni jistgħu jinġabru fil-qosor kif ġej:

—	jiġbru u jittrasferixxu informazzjoni/intelligence fi ħdan id-delegazzjoni tagħhom u lill-pulizija ospitanti;

—	jiżguraw skjerament effettiv tal-uffiċjali tal-pulizija operattivi tagħhom (bl-uniformi u/jew pajżana) sabiex jaqdu rwol integrali fl-operazzjoni tal-pulizija ospitanti għall-avveniment;

—	jipprovdu pariri fil-ħin u preċiżi lill-kmandant tal-pulizija ospitanti.

Ir-rwol ewlieni tal-kap tad-delegazzjoni hu li jaġixxi bħala konsulent strateġiku u tattiku għall-awtoritajiet ospitanti.

Ir-rwol ewlieni ta' uffiċjal ta' kollegament u/jew koordinatur tal-operazzjonijiet (li tista' tkun u tista' ma tkunx l-istess persuna skont il-ftehim bilaterali dwar l-iskjerament tal-pulizija) hu li jiffaċilita skambju effettiv ta' informazzjoni bejn l-awtoritajiet tal-pajjiż viżitatur u dak ospitanti b'rabta ma' partita unika tal-futbol jew tornew. Jekk ma jkun maħtur la uffiċjal ta' kollegament u lanqas koordinatur tal-operazzjonijiet, il-funzjonijiet tagħhom għandhom jitwettqu mill-kap tad-delegazzjoni.

Uffiċjali operattivi tal-pulizija skjerati f'delegazzjoni huma magħrufa bħala spotters tal-pulizija.

Spotters tal-pulizija, kemm jekk bl-uniformi kif ukoll pajżana, jistgħu:

—	jintużaw mill-pulizija ospitanti bħala mezz ta' interazzjoni mal-partitarji viżitaturi biex jgħin fil-ġestjoni tal-folol;

—	jgħin fit-tnaqqis tal-anonimità ta' partitarji riskjużi fil-folla, u l-kapaċità tagħhom li jinstigaw u/jew jipparteċipaw f'atti ta' vjolenza jew diżordni mingħajr konsegwenzi ulterjuri.

L-ispotters għandu jkollhom esperjenza fiż-żamma tal-ordni waqt partiti tal-futbol f'pajjiżhom.

Huma għandhom:

—	ikollhom il-ħiliet u l-esperjenza li jikkomunikaw b'mod effettiv (fejn ikun adatt) biex jinfluwenzaw l-imġiba tal-partitarji; u/jew

—	ikunu speċjalisti fl-imġiba tal-partitarji tagħhom u r-riskji potenzjali li jippreżentaw; u

—	ikunu kapaċi jikkomunikaw b'mod effettiv mal-pulizija ospitanti matul l-avveniment dwar it-tip ta' riskju li l-partitarji viżitaturi jistgħu jkunu jew ma jkunux jippreżentaw waqt ħin u f'post speċifiku.

L-ispotters għandhom ikunu jistgħu jikkomunikaw informazzjoni pożittiva, kif ukoll negattiva, dwar il-partitarji viżitaturi tagħhom. Dan jippermetti lill-kmandanti tal-pulizija tal-pajjiż ospitanti li jieħdu deċiżjonijiet bilanċjati dwar il-ħtieġa li jintervjenu jew li jiffaċilitaw l-imġiba leġittima tal-partitarji.

Soġġett għall-qbil mill-pajjiż ospitanti, l-ispotters viżitaturi jistgħu wkoll jiġu skjerati għall-ġbir ta' intelligence/provi, bl-użu tat-tagħmir miftiehem, biex jintużaw mill-pulizija tal-pajjiż organizzatur jew għal finijiet ta' prosekuzzjoni f'pajjiżhom.

3.10.   Lingwa

Il-pajjiżi konċernati għandhom jagħmlu arranġamenti minn qabel dwar il-lingwa.

Fejn ikun possibbli, id-delegazzjonijiet tal-pulizija viżitaturi għandhom jinkludu persunal kompetenti fil-lingwa tal-pajjiż ospitanti biex jiffaċilita l-komunikazzjoni bejn il-persunal tal-pulizija ospitanti u viżitatur.

3.11.   Kooperazzjoni bejn Pulizija Ospitanti u Viżitaturi matul l-Avveniment

Id-delegazzjoni tal-pulizija viżitatura għandha tinżamm informata bil-pjan operattiv tal-pulizija ospitanti (inkluż il-filosofija tagħhom dwar il-ġestjoni tal-folol u l-livelli ta' tolleranza għall-imġiba). Għandha tkun integrata għalkollox fl-operazzjoni tal-pulizija ospitanti (u tingħata l-possibbiltà li tattendi u tipparteċipa f'laqgħat ta' informazzjoni qabel il-partita u ta' stħarriġ informattiv wara l-partita).

Il-pulizija ospitanti u d-delegazzjoni tal-pulizija viżitatura għandhom iżommu lill-NFIPs rispettivi tagħhom informati bl-iżviluppi tul l-operazzjoni u fi żmien ħamest ijiem ta' xogħol jippreżentaw lill-NFIP tagħhom rapport ta' wara l-partita.

Id-delegazzjoni tal-pulizija viżitatura għandha dejjem tiżgura li l-azzjonijiet tagħha ma jipperikolawx bla bżonn is-sikurezza ta' persuni oħra (6).

3.12.   Użu ta' Flokkijiet ta' Identifikazzjoni

Meta jkun hemm qbil konġunt għal raġunijiet tattiċi, uffiċjal(i) tal-pulizija viżitaturi li ma jkunux skjerati bl-uniformi jistgħu jużaw il-flokkijiet ta' identifikazzjoni standard luminużi u distintivi tal-pulizija viżitaturi deskritti fl-Appendiċi 4. Kull uffiċjal tal-pulizija viżitatur għandu jieħu dan il-flokk miegħu meta jivvjaġġa barra minn pajjiżu.

3.13.   Akkreditazzjoni

Il-forza tal-pulizija tal-pajjiż organizzatur, f'konsultazzjoni mal-organizzaturi tal-futbol, għandha tiżgura li, fejn ikun adatt, id-delegazzjoni tal-pulizija viżitatura jkollha aċċess u akkreditazzjoni għall-istadium (siġġijiet mhux meħtieġa), biex id-delegazzjoni tkun tista' twettaq il-kompiti tagħha b'mod effettiv. L-istewards u persunal ieħor għas-sikurezza u s-sigurtà għandhom jiġu mgħarrfa b'dan fl-informazzjoni mogħtija qabel il-logħba.

3.14.   Tornej tal-Futbol f'Pajjiżi mingħajr NFIP

Kif inhu enfasizzat f'dan il-manwal kollu, u b'mod partikolari fil-Kapitolu 1 hawn fuq, meta partita jew tornew tal-futbol jintlagħbu fi Stat mingħajr NFIP, kull skambju ta' informazzjoni għandu jsir bejn il-punt ta' kuntatt maħtur tal-pulizija fil-pajjiż ospitanti u l-NFIP tal-pajjiż viżitatur.

Matul l-avveniment, il-punt ta' kuntatt maħtur tal-pulizija tal-pajjiż ospitanti għandu jikkomunika mal-NFIP tal-pajjiż(i) viżitatur(i) permezz tal-uffiċjal ta' kollegament maħtur tad-delegazzjoni tal-pulizija viżitatura, jekk ikun inħatar wieħed.

3.14a    Ftehimiet Bilaterali

Hu rakkomandat bil-qawwa li, fi stadju bikri tat-tħejjijiet, il-pajjiżi parteċipanti fl-avveniment għandhom jadottaw ftehim bilaterali mal-awtoritajiet ospitanti li jistabbilixxi l-arranġamenti għall-iskambju ta' informazzjoni, l-iskjerament tad-delegazzjonijiet tal-pulizija viżitaturi u kwistjonijiet oħra ta' kooperazzjoni bejn il-pulizija b'rabta mal-avveniment. Ftehimiet bilaterali bħal dan jistgħu jinkludu wkoll oqsma ta' kooperazzjoni governattiva u ġudizzjarja. Id-dokument 12261/16 juri mudell għal ftehim bilaterali. Dan jinkludi l-lista ta' kwistjonijiet li għandhom jitqiesu u jiġu miftiehma bejn iż-żewġ partijiet. Ma hux ftehim mudell iżda pjuttost għajnuna għan-negozjati bilaterali.

3.14b    Kooperazzjoni bejn NFIPs

Fit-tħejjija sabiex jassistu f'tornej ewlenin, hu rakkomandat li l-NFIPs għandhom:

—	jaqsmu mal-awtoritajiet ospitanti informazzjoni dwar diskussjonijiet/negozjati bilaterali;

—	jibdew fi stadju bikri u jibqgħu jżommu djalogu mal-awtoritajiet ospitanti, bl-użu ta' aġenziji internazzjonali, b'mod partikolari l-Interpol, biex jenfasizzaw ir-rwol importanti tan-netwerk Ewropew tal-NFIPs; u

—	jagħmlu żjarat koordinati fl-ibliet u l-istadiums rilevanti fejn ser isir l-avveniment fil-pajjiż ospitanti biex jiċċaraw l-arranġamenti lokali u jrawmu djalogu effettiv f'livell nazzjonali u lokali.

3.15.   Rwol tal-Interpol u l-Europol

In-netwerk tal-NFIPs jipprovdi mezz adatt u fil-ħin għall-iskambju ta' informazzjoni dwar ġestjoni tal-folol, sikurezza pubblika u ordni pubbliku, u riskji assoċjati. Skont il-liġi Ewropea, hu obbligatorju li jsir dan l-iskambju ta' informazzjoni bejn l-aġenziji taż-żamma tal-ordni ospitanti u viżitaturi permezz tal-NFIPs rispettivi jew il-punt ta' kuntatt maħtur tal-pulizija ospitanti u l-uffiċjali ta' kollegament tal-pulizija viżitaturi skjerati fil-pajjiż ospitanti matul avveniment.

Madanakollu, l-NFIPs jistgħu jikkomunikaw mal-Interpol jew il-Europol dwar rabtiet bejn l-attivitajiet ta' gruppi ta' partitarji riskjużi u rabtiet ma' kriminalità serja u organizzata jew kriminalità oħra mhux relatata mal-futbol.

Barra minn hekk, il-Europol, l-Interpol u/jew aġenziji oħra fil-qasam tal-Ġustizzja u l-Affarijiet Interni, bħall-Frontex, jista' jkollhom rwol importanti, skont il-mandati legali tagħhom, fl-appoġġ lill-awtoritajiet kompetenti tal-pajjiżi li jospitaw it-tornej internazzjonali prinċipali tal-futbol. Dan jista' jinkludi l-għoti ta' servizzi varji ta' appoġġ, informazzjoni u analiżi rilevanti, u valutazzjonijiet tat-theddida fir-rigward ta' kriminalità serja u organizzata u/jew terroriżmu.

Pereżempju, matul it-tornej prinċipali:

—	jista' jiġi skjerat tim ta' appoġġ tal-Interpol għal avvenimenti kbar biex jappoġġa l-attività tal-infurzar tal-liġi ospitanti matul tornew prinċipali;

—	il-Europol jista' jiskjera l-persunal tiegħu fiċ-ċentru ta' koordinazzjoni tal-pulizija ospitanti biex jiffaċilita l-iskambju ta' informazzjoni, biex jipprovdi intelligence u appoġġ analitiku fir-rigward ta' kriminalità organizzata, terroriżmu u forom oħra ta' kriminalità serja;

—	persunal ospitanti u tal-Frontex jista' jkollhom fis-seħħ arranġamenti bilaterali għal operazzjonijiet transfruntiera.

F'dawk iċ-ċirkostanzi, l-NFIPs tal-pajjiżi viżitaturi, jew il-kapijiet tad-delegazzjonijiet tal-pulizija viżitaturi, għandhom jieħdu ħsieb li jiksbu tagħrif fi stadju bikri dwar il-funzjonijiet preċiżi ta' dawn l-aġenziji u jikkomunikaw kif meħtieġ dwar kwistjonijiet ta' interess komuni.

KAPITOLU 4

4.   Kooperazzjoni bejn il-Pulizija u l-Organizzatur

Il-kooperazzjoni mill-qrib bejn il-pulizija u l-awtoritajiet tal-istadium/l-organizzatur tal-partita (u partijiet oħra involuti, inkluż kwalunkwe kumpanija tas-sigurtà privata u stewards li joperaw fl-istadiums) hija essenzjali għat-twettiq tal-arranġamenti tas-sikurezza u s-sigurtà fl-istadiums.

Is-sħubija prinċipali f'livell lokali hija bejn il-kmandant tal-pulizija għall-partita u l-individwu maħtur mill-organizzatur tal-partita b'responsabbiltà għas-sikurezza u l-ġestjoni tal-folla fl-istadium (ġeneralment imsejjaħ l-uffiċjal tas-sikurezza fl-istadium, għalkemm f'xi pajjiżi jintuża t-terminu uffiċjal tas-sigurtà).

Il-kmandant tal-pulizija u l-uffiċjal tas-sikurezza fl-istadium għandhom jaħdmu flimkien fuq bażi komplementari, mingħajr preġudizzju għar-responsabbiltajiet, kompetenzi u dmirijiet rispettivi tagħhom. Dawn jistgħu jkunu stipulati fil-leġislazzjoni nazzjonali jew fir-regolamenti tal-istadium jew speċifikati fi ftehim bil-miktub bejn l-organizzatur u l-pulizija (spiss deskritt bħala dikjarazzjoni tal-intenzjoni) li jispeċifika r-rwol tal-pulizija (jekk ikun hemm) f'funzjonijiet kruċjali ta' ġestjoni tal-folla. Dawn il-funzjonijiet jinkludu: appoġġ lill-persunal tas-sikurezza (stewards) fil-prevenzjoni u l-indirizzar ta' kwalunkwe diżordni pubbliku jew kriminalità oħra; attivazzjoni tal-proċeduri ta' emerġenza tal-organizzatur; u d-determinazzjoni taċ-ċirkostanzi meta l-pulizija għandhom jieħdu kontroll tal-istadium kollu jew parti minnu f'xenarji ta' emerġenza jew inċident gravi, kif ukoll il-proċedura kif dan għandu jsir u għar-ritorn eventwali tal-kontroll lill-organizzatur.

Kooperazzjoni mill-qrib għandha tiżgura wkoll li l-organizzatur iqis il-fehmiet tal-pulizija dwar għadd ta' konsiderazzjonijiet importanti għas-sikurezza ġewwa l-istadiums. Dan il-metodu jkopri għadd ta' aspetti importanti, inkluż l-użu tas-CCTV għall-finijiet ta' ġestjoni tal-folla u ġbir ta' provi; arranġamenti komuni jew allokati għall-komunikazzjoni fl-istadiums; l-użu possibbli ta' stewards viżitaturi f'kapaċità ta' kollegament kemm fl-istadiums kif ukoll fil-vjaġġ lejn u minn stadium; arranġamenti għal kamra tal-kontroll għal diversi aġenziji, li tinkludi post tal-kmand tal-pulizija fejn ikun adatt.

Ir-Rakkomandazzjoni Konsolidata 1/2015 dwar approċċ integrat għas-sikurezza, is-sigurtà u s-servizz, tal-Kumitat Permanenti tal-Kunsill tal-Ewropa, tagħti gwida dettaljata dwar dan.

KAPITOLU 5

5.   Kooperazzjoni bejn Pulizija u Aġenziji tal-Ġustizzja u tal-Prosekuzzjoni

Il-kontenut ta' dan il-kapitolu għandu jitqies fil-kuntest ta' varjazzjonijiet kbar fl-istruttura u l-kompetenzi tal-aġenziji tal-ġustizzja u l-prosekuzzjoni fl-Istati Membri.

Jista' jkun hemm benefiċċji sinifikanti mill-kooperazzjoni fil-qrib bejn il-pulizija u l-aġenziji tal-ġustizzja u tal-prosekuzzjoni fir-rigward ta' partiti uniċi kif ukoll ta' tornej.

Filwaqt li l-pajjiż ospitanti għandu s-sovranità u l-ġurisdizzjoni li jittratta kull reat allegat marbut mal-avveniment li jitwettaq f'dak il-pajjiż, il-pulizija u awtoritajiet oħra fl-Istati Membri u l-korpi kompetenti tal-UE (eż. l-Eurojust) għandhom jappoġġaw lill-awtoritajiet ġudizzjarji u tal-infurzar tal-liġi tal-pajjiż ospitanti meta jkun possibbli u permissibbli.

L-Istati Membri kollha għandhom jiżguraw li jkun possibbli li jittrattaw malajr u b'mod xieraq ir-reati marbuta mal-avveniment.

Il-pulizija u awtoritajiet oħrajn ospitanti għandhom jinformaw lill-pulizija u lill-partitarji tal-pajjiż viżitatur bil-leġislazzjoni domestika rilevanti u/jew bil-proċeduri kriminali, ċivili jew amministrattivi flimkien mal-pieni massimi għall-aktar reati komuni relatati mal-futbol.

Il-ftehimiet multilaterali eżistenti dwar assistenza legali reċiproka għandhom jintużaw bis-sħiħ, fejn ikun xieraq, għall-partiti kollha tal-futbol b'dimensjoni internazzjonali. Barra minn hekk, pajjiż ospitanti jista' jiftiehem dwar arranġamenti bilaterali ma' kwalunkwe pajjiż għal assistenza legali reċiproka msaħħa qabel, matul u wara l-avveniment.

L-NFIPs tal-pajjiż/pajjiżi sostenituri għandhom jgħarrfu lill-NFIP tal-pajjiż organizzatur:

—	bi kwalunkwe possibbiltà legali (eż. mandati ta' projbizzjoni tal-futbol/projbizzjonijiet ta' ħruġ) li jkollhom biex ma jħallux partitarji riskjużi jattendu l-avveniment;

—	x'miżuri jistgħu jittieħdu mid-delegazzjoni tal-pulizija viżitatura u/jew kwalunkwe aġenzija kompetenti oħra (eż. prosekuturi ta' kollegament viżitaturi) biex jiġbru provi ta' reati b'rabta mal-futbol imwettqa minn partitarji viżitaturi;

—	liema reati mwettqa fil-pajjiż ospitanti tista' ssir prosekuzzjoni kontrihom fil-pajjiż sostenitur (mar-ritorn tal-awtur tar-reat).

Il-pajjiż ospitanti jista' jistieden lil kwalunkwe pajjiż ieħor biex jibgħat prosekutur/imħallef ta' kollegament biex ikun preżenti matul l-avveniment.

Hu rakkomandat li, f'konformità mal-liġi nazzjonali dwar il-protezzjoni tad-data, l-awtorità ospitanti tipprovdi lid-delegazzjoni tal-pulizija u/jew l-aġenzija kompetenti viżitatura (eż. prosekuturi ta' kollegament viżitaturi) informazzjoni mir-rekords ġudizzjarji jew tal-qorti u rapporti tal-pulizija jew investigattivi, inkluż rekords ta' arrest, ta' ċittadini tagħhom.

Jew inkella, pajjiż sostenitur jista' jaqbel li jkollu disponibbli prosekutur/imħallef ta' kollegament lest biex jivvjaġġa lejn il-pajjiż ospitanti fuq talba, jew jaħtar prosekutur/imħallef ta' kollegament għal kollegament mal-awtorità ospitanti maħtura.

Fil-kamp ta' applikazzjoni tal-leġislazzjoni nazzjonali, l-NFIP(s) ta' sostenn jippruvaw iwieġbu minnufih kwalunkwe talba għal aktar informazzjoni dwar individwi arrestati, bħal pereżempju dettalji ta' kundanni preċedenti, inkluż reati b'rabta mal-futbol.

L-ispejjeż kollha biex prosekuturi/imħallfin ta' kollegament jintbagħtu lejn il-pajjiż ospitanti għandhom ikunu soġġetti għal ftehim bilaterali.

Il-pajjiż organizzatur għandu jipprovdi l-mezzi ta' komunikazzjoni meħtieġa u faċilitajiet oħra għall-prosekuturi/imħallfin ta' kollegament viżitaturi.

KAPITOLU 6

6.   Kooperazzjoni bejn Pulizija u Partitarji

Il-kollegament tal-pulizija ma' gruppi ta' partitarji fil-livell nazzjonali u lokali jista' jkollu impatt kbir fuq it-tnaqqis tar-riskji għas-sikurezza u s-sigurtà f'partiti tal-futbol b'dimensjoni internazzjonali. Din il-kooperazzjoni tista' madankollu tiġi mminata jekk ikun hemm xi perċezzjoni li r-rappreżentanti tal-partitarji qed jaħdmu f'isem il-pulizija u, pereżempju, jipprovdu data personali.

Id-delegazzjonijiet tal-pulizija u r-rappreżentanti tal-partitarji viżitaturi jistgħu jieħdu ħsieb jiżguraw li l-pulizija ospitanti jkunu konxji mill-karattru u l-kultura tal-partitarji viżitaturi. Il-pulizija ospitanti għandhom iqisu dan fil-valutazzjoni dinamika tagħhom tar-riskji.

Il-partitarji ospitanti, il-komunitajiet lokali u l-partitarji viżitaturi għandhom jingħataw informazzjoni potenzjalment importanti u serħan il-moħħ dwar avveniment. Uħud mill-mezzi ewlenin kif dan jinkiseb huma: strateġija effettiva għar-relazzjonijiet mal-media; użu tal-media soċjali/siti tal-Internet; fuljetti; u ħidma mill-qrib ma' Uffiċjali ta' Kollegament tal-Partitarji (SLOs) maħtura, rappreżentanti tal-partitarji u inizjattivi ffokati fuq il-partitarji (bħall-ambaxxati tal-partitarji).

Kooperazzjoni u komunikazzjoni kontinwi bejn il-pulizija u l-gruppi tal-partitarji jistgħu jservu biex jipprovdu bażi għal atmosfera bla periklu, sigura u akkoljenti għall-partitarji kollha, u jistgħu jipprovdu mezz biex tingħata informazzjoni importanti bħal pariri dwar l-ivvjaġġar, ir-rotot tal-aċċess għall-istadium, il-leġislazzjoni applikabbli u l-livelli ta' tolleranza għall-imġiba.

Il-pulizija ospitanti u dawk viżitaturi għandhom għalhekk ikollhom fis-seħħ strateġija biex jikkomunikaw mal-partitarji (imsejħa “djalogu”). Id-djalogu jista' jkun l-inkarigu ta' uffiċjali speċjalisti (u mħarrġa) tal-komunikazzjoni u/jew unitajiet operattivi fuq quddiem nett (kontroll tal-folol/ordni pubbliku) imħarrġa fit-teknika tal-komunikazzjoni u tar-riżoluzzjoni tal-konflitti.

Dan l-approċċ intwera li jgħin fil-promozzjoni tal-awtodixxiplina fost il-partitarji u jiffaċilita l-intervent bikri u adatt meta jfeġġu problemi jew riskji ta' sigurtà.

Gwida dettaljata dwar dan tinsab fir-Riżoluzzjoni tal-Kunsill dwar manwal b'rakkomandazzjonijiet għall-prevenzjoni u l-ġestjoni ta' vjolenza u diżordnijiet b'rabta ma' logħbiet tal-futbol b'dimensjoni internazzjonali, fejn ikun involut tal-inqas Stat Membru wieħed, permezz tal-adozzjoni ta' prattiki tajba fir-rigward tal-kollegament tal-pulizija mal-partitarji (7).

KAPITOLU 7

7.   Strateġija ta' Komunikazzjoni u tal-Media

7.1.   Strateġija tal-Komunikazzjoni

Strateġija ta' komunikazzjoni effettiva u trasparenti hija integrali għal kunċett ta' sikurezza u sigurtà ta' suċċess għall-partiti tal-futbol, tornej u avvenimenti sportivi oħrajn b'dimensjoni internazzjonali.

L-aġenziji għaż-żamma tal-ordni tal-pajjiż ospitanti għandhom għalhekk jaħdmu mill-qrib mal-aġenziji governattivi u lokali, l-awtoritajiet/organizzaturi tal-futbol, il-media u l-gruppi tal-partitarji fit-tħejjija u t-twettiq ta' strateġija komprensiva ta' komunikazzjoni li tinvolvi diversi aġenziji.

Strateġija effettiva tal-media li tinvolvi diversi aġenziji hija aspett kruċjali ta' kwalunkwe strateġija ta' komunikazzjoni fejn jirrigwarda l-għoti lill-partijiet kollha, b'mod partikolari partitarji viżitaturi, ta' tagħrif importanti bħal pariri dwar l-ivvjaġġar, rotot ta' aċċess għall-istadium, leġislazzjoni applikabbli u livelli ta' tolleranza tal-imġiba.

L-għan ċentrali għandu jkun li tiġi proġettata stampa pożittiva tal-avveniment fost il-partitarji lokali u dawk viżitaturi, il-komunitajiet lokali, il-pubbliku ġenerali u l-individwi li jipparteċipaw fl-operazzjonijiet ta' sikurezza u sigurtà. Dan jista' jgħin biex jiġi ġġenerat ambjent akkoljenti għal dawk kollha involuti u jagħti kontribut kbir għat-tnaqqis tar-riskji għas-sikurezza u s-sigurtà.

7.2.   Strateġija tal-Media

L-istrateġija tal-media tal-pulizija (u dik usa' b'intervent minn diversi aġenziji) għandha tal-inqas ikollha l-għan li:

—	tipprovdi informazzjoni b'mod proattiv, miftuħ u trasparenti;

—	tipprovdi informazzjoni dwar it-tħejjijiet għas-sikurezza u s-sigurtà b'mod pożittiv u ta' serħan tal-moħħ;

—	tikkomunika l-intenzjoni tal-pulizija li tiffaċilita l-intenzjonijiet leġittimi tal-partitarji;

—	tiċċara liema tipi ta' mġiba mhumiex tollerati mill-pulizija;

—	tipprovdi informazzjoni awtorevoli dwar kwalunkwe inċident malajr kemm jista' jkun.

Il-pulizija għandhom jaħdmu mill-qrib mal-aġenziji governattivi u lokali, l-awtoritajiet/organizzaturi tal-futbol u, fejn adatt, il-gruppi tal-partitarji fl-istabbiliment u t-twettiq ta' strateġija tal-media li tinvolvi diversi aġenziji li:

—	tippromwovi b'mod proattiv stampa pożittiva tal-avveniment;

—	tiżgura li r-responsabbiltajiet jitqassmu b'mod ċar fost il-pulizija u l-aġenziji sħab f'termini ta' min imexxi l-komunikazzjoni mal-media dwar id-diversi aspetti ta' sikurezza u sigurtà (u lil hinn minn hekk);

—	tipprovdi sfond komuni u tagħti informazzjoni għall-kelliema kollha tal-pulizija u l-aġenziji sħab (il-materjal ta' informazzjoni għandu jiġi aġġornat regolarment biex jitqiesu t-temi jew il-mistoqsijiet rikorrenti u r-riskji jew l-avvenimenti emerġenti);

—	tiżgura li tiġi rilaxxata informazzjoni fattwali lill-media u/jew fuq l-Internet fuq bażi regolari fil-ġranet ta' qabel l-avveniment, matulu u warajh;

—	tipprovdi opportunitajiet regolari għal aġġornamenti informattivi lill-istampa/il-media;

—	tqis il-ħtiġijiet/interessi tal-kategoriji differenti ta' ġurnalisti/il-media.

KAPITOLU 8

8.   Laqgħat tal-Esperti tal-UE dwar is-Sikurezza u s-Sigurtà fil-Futbol

Hu rakkomandat ferm li, matul kull Presidenza tal-Kunsill tal-UE, il-Presidenza torganizza laqgħa tal-grupp ta' esperti għal avvenimenti sportivi prinċipali u li l-Presidenza tirrapporta lill-Grupp ta' Ħidma dwar l-Infurzar tal-Liġi dwar ir-riżultat ta' dik il-laqgħa u dwar il-ħidma attwali tal-grupp ta' esperti.

Hu rakkomandat ukoll li kull Presidenza tospita laqgħa tal-Grupp ta' Riflessjoni Ewropew ta' esperti tas-sikurezza u s-sigurtà fil-futbol sabiex:

—	iħejji dokumentazzjoni rilevanti biex titqies mill-grupp ta' esperti għal avvenimenti sportivi prinċipali;

—	iħejji u jimmonitora l-implimentazzjoni tal-programmi ta' ħidma tal-grupp ta' esperti għall-isports prinċipali;

—	jimmonitora xejriet/żviluppi ġodda fl-imġiba tal-partitarji u r-riskji assoċjati;

—	jimmonitora u jiffaċilita l-ħidma tan-netwerk Ewropew tal-NFIPs;

—	jikkondividi l-prattika tajba dwar il-kooperazzjoni internazzjonali bejn il-pulizija u l-istrateġiji u t-tattiki għaż-żamma tal-ordni fl-avvenimenti tal-futbol;

—	jaħdem ma' istituzzjonijiet sħab fil-promozzjoni tal-iżvilupp ta' approċċ integrat li jinvolvi diversi aġenziji għas-sikurezza, is-sigurtà u s-servizz fil-futbol; u

—	kwalunkwe kwistjoni oħra ta' interess u rilevanti.

KAPITOLU 9

9.   Lista ta' Dokumenti Rilevanti dwar is-Sikurezza u s-Sigurtà fl-Avvenimenti tal-Futbol

9.1.   Dokumenti adottati diġà mill-Kunsill tal-Unjoni Ewropea

1.

Ir-Rakkomandazzjoni tal-Kunsill tat-30 ta' Novembru 1993 dwar ir-responsabbiltà tal-organizzaturi ta' avvenimenti sportivi (10550/93).

2.

Ir-Rakkomandazzjoni tal-Kunsill tat-22 ta' April 1996 dwar linji gwida għall-prevenzjoni u t-trażżin ta' diżordni marbuta ma' partiti tal-futbol, b'format standard anness għall-iskambju ta' intelligence tal-pulizija dwar persuni li jikkommettu vjolenza marbuta mal-futbol (ĠU C 131, 3.5.1996, p. 1).

3.

Azzjoni Konġunta tas-26 ta' Mejju 1997 dwar kooperazzjoni fuq iż-żamma tal-ordni u s-sigurtà (ĠU L 147, 5.6.1997, p. 1).

4.

Ir-Riżoluzzjoni tal-Kunsill tad-9 ta' Ġunju 1997 dwar il-prevenzjoni u t-trażżin ta' vjolenza konnessa mal-futbol permezz tal-iskambju ta' esperjenza, l-esklużjoni mill-istadiums u l-politika dwar il-media (ĠU C 193, 24.6.1997, p. 1).

5.

Ir-Riżoluzzjoni tal-Kunsill tal-21 ta' Ġunju 1999 dwar manwal għall-kooperazzjoni tal-pulizija fuq livell internazzjonali u miżuri għall-prevenzjoni u l-kontroll ta' vjolenza u diżordni konnessi ma' partiti internazzjonali tal-futbol (ĠU C 196, 13.7.1999, p. 1).

6.

Ir-Riżoluzzjoni tal-Kunsill tas-6 ta' Diċembru 2001 dwar manwal b'rakkomandazzjonijiet għall-kooperazzjoni internazzjonali bejn il-pulizija u miżuri għall-prevenzjoni u l-kontroll tal-vjolenza u d-diżordni marbuta ma' partiti tal-futbol b'dimensjoni internazzjonali, fejn ikun involut tal-anqas Stat Membru wieħed (ĠU C 22, 24.1.2002, p. 1).

7.

Id-Deċiżjoni tal-Kunsill tal-25 ta' April 2002 dwar sigurtà b'konnessjoni ma' logħbiet tal-futbol b'dimensjoni internazzjonali (ĠU L 121, 8.5.2002, p. 1).

8.

Ir-Riżoluzzjoni tal-Kunsill tas-17 ta' Novembru 2003 dwar l-użu mill-Istati Membri ta' projbizzjonijiet għall-aċċess għal postijiet tal-partiti tal-futbol b'dimensjoni internazzjonali (ĠU C 281, 22.11.2003, p. 1).

9.

Ir-Riżoluzzjoni tal-Kunsill tas-4 ta' Diċembru 2006 dwar manwal b'rakkomandazzjonijiet għall-kooperazzjoni internazzjonali bejn il-pulizija u miżuri għall-prevenzjoni u l-kontroll tal-vjolenza u d-diżordni marbuta ma' partiti tal-futbol b'dimensjoni internazzjonali, fejn ikun involut tal-anqas Stat Membru wieħed (ĠU C 322, 29.12.2006, p. 1).

10.

Id-Deċiżjoni tal-Kunsill 2007/412/ĠAI tat-12 ta' Ġunju 2007 li temenda d-Deċiżjoni 2002/348/ĠAI dwar sigurtà b'konnessjoni ma' logħbiet tal-futbol b'dimensjoni internazzjonali (ĠU L 155, 15.6.2007, p. 76).

11.

Ir-Riżoluzzjoni tal-Kunsill tas-3 ta' Ġunju 2010 li temenda manwal b'rakkomandazzjonijiet għall-kooperazzjoni internazzjonali bejn il-pulizija u miżuri għall-prevenzjoni u l-kontroll tal-vjolenza u d-diżordni marbuta ma' partiti tal-futbol b'dimensjoni internazzjonali, fejn ikun involut tal-anqas Stat Membru wieħed (ĠU C 165, 24.6.2010, p. 1).

9.2.   Dokumenti adottati mill-Kunsill tal-Ewropa

1.

Konvenzjoni tal-Kunsill tal-Ewropa dwar approċċ integrat għal sikurezza, sigurtà u servizz f'partiti tal-futbol u avvenimenti sportivi oħra 2016

2.

Rakkomandazzjoni (2015) 1 tal-Kumitat Permanenti dwar Sikurezza, Sigurtà u Servizz f'Partiti tal-Futbol u Avvenimenti Sportivi oħra (Rakkomandazzjoni Konsolidata).

---

(1)  Analiżi tar-riskji tfisser l-iżvilupp ta' profil dwar partitarji nazzjonali u tal-klabbs, inkluż gruppi riskjużi u r-relazzjoni tagħhom ma' partitarji oħrajn f'pajjiżhom u barra minnu inkluż gruppi ta' popolazzjoni lokali u ċ-ċirkostanzi li jistgħu jkabbru l-potenzjal ta' riskju (inkluż interazzjoni ma' pulizija u stewards).

(2)  Il-websajt tal-NFIPs hija websajt sigura ħafna disponibbli għall-użu esklużiv tal-NFIPs li fiha informazzjoni relatata ma' partiti tal-futbol b'dimensjoni internazzjonali (eż. informazzjoni ġenerali dwar il-klabbs, rapporti ta' qabel u wara l-partiti).

(3)  Deċiżjoni tal-Kunsill 2008/615/ĠAI tat-23 ta' Ġunju 2008 dwar it-titjib tal-kooperazzjoni transkonfinali, b'mod partikolari fil-ġlieda kontra t-terroriżmu u l-kriminalità transkonfinali (ĠU L 210, 6.8.2008, p. 1).

(4)  Deċiżjoni tal-Kunsill 2008/616/ĠAI tat-23 ta' Ġunju 2008 dwar l-implimentazzjoni tad-Deċiżjoni 2008/615/ĠAI dwar it-titjib tal-kooperazzjoni transkonfinali, b'mod partikolari fil-ġlieda kontra t-terroriżmu u l-kriminalità transkonfinali (ĠU L 210, 6.8.2008, p. 12).

(5)  Studju li sar fl-2014 ikkonferma li l-ispejjeż medji kienu baxxi u jirrappreżentaw investiment tajjeb għar-riżorsi baġitarji tal-pulizija:

—	l-ispiża medja mġarrba biex tiġi ospitata delegazzjoni viżitatura kienet irrappurtata bħala EUR 282 għal kull delegazzjoni, li tkopri l-akkomodazzjoni u l-ispejjeż tal-ivvjaġġar intern;

—	l-ispiża medja mġarrba biex tiġi skjerata delegazzjoni tal-pulizija kienet irrappurtata bħala EUR 850 għal kull delegazzjoni, li tkopri l-ispejjeż tal-ivvjaġġar internazzjonali u l-ispejjeż tal-uffiċjali.

(Ara wkoll ir-Riżoluzzjoni tal-Kunsill dwar l-ispejjeż biex jiġu ospitati u skjerati delegazzjonijiet ta' pulizija tal-pajjiż viżitatur b'rabta mal-partiti tal-futbol (u avvenimenti sportivi oħra) b'dimensjoni internazzjonali, li fihom ikun involut tal-anqas Stat Membru wieħed, imniżżla f'11908/16).

(6)  Ara l-Artikoli 21 u 22 tad-Deċiżjoni ta' Prüm dwar ir-responsabbiltà ċivili u dik kriminali.

(7)  11907/16