Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32014R0354

Regolament ta' Implimentazzjoni tal-Kummissjoni (UE) Nru 354/2014 tat- 8 ta' April 2014 li jemenda u jikkoreġi r-Regolament (KE) Nru 889/2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta' prodotti organiċi fir-rigward tal-produzzjoni, it-tikkettar u l-kontroll organiku

OJ L 106, 9.4.2014, p. 7–14 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document No longer in force, Date of end of validity: 31/12/2021; Impliċitament imħassar minn 32021R1165

ELI: http://data.europa.eu/eli/reg_impl/2014/354/oj

9.4.2014   

MT

Il-Ġurnal Uffiċjali tal-Unjoni Ewropea

L 106/7

REGOLAMENT TA' IMPLIMENTAZZJONI TAL-KUMMISSJONI (UE) Nru 354/2014

tat-8 ta' April 2014

li jemenda u jikkoreġi r-Regolament (KE) Nru 889/2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta' prodotti organiċi fir-rigward tal-produzzjoni, it-tikkettar u l-kontroll organiku

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KE) Nru 834/2007 tat-28 ta' Ġunju 2007 dwar il-produzzjoni organika u t-tikkettar ta' prodotti organiċi u li jħassar ir-Regolament (KEE) Nru 2092/91 (1), u b'mod partikolari l-Artikoli 12(3), 14(2), 16(1) u 3(a) tiegħu,

Billi:

(1)

Il-Kapitolu 2 tat-Titolu III tar-Regolament (KE) Nru 834/2007 jistabbilixxi rekwiżiti bażiċi fir-rigward tal-produzzjoni tal-impriżi agrikoli. Ir-regoli ddettaljati għall-implimentazzjoni ta' dawk ir-rekwiżiti bażiċi ġew stabbiliti mir-Regolament tal-Kummissjoni (KE) Nru 889/2008 (2).

(2)

L-Artikolu 12 tar-Regolament (KE) Nru 834/2007 jippermetti l-użu ta' inputs agrikoli bħal fertilizzanti, kondizzjonaturi tal-ħamrija u prodotti għall-protezzjoni tal-pjanti taħt ċerti kundizzjonijiet, sakemm ikunu ġew awtorizzati għall-użu fil-produzzjoni organika. Skont il-proċedura prevista fl-Artikolu 16(3) ta' dak ir-Regolament, l-Istati Membri ppreżentaw dossiers lill-Istati Membri l-oħra u lill-Kummissjoni, bil-ħsieb li jiġu inklużi ċerti prodotti fl-Annessi I u II tar-Regolament (KE) Nru 889/2008. Dawk id-dossiers ġew eżaminati mill-grupp ta' esperti għall-pariri tekniċi dwar il-produzzjoni organika (minn hawn'il quddiem “EGTOP”).

(3)

Fuq il-bażi tar-rakkomandazzjonijiet tal-EGTOP (3), li kkonkluda fir-rigward tal-fertilizzanti u l-kondizzjonaturi tal-ħamrija li s-sustanzi diġestat tal-bijogass, proteini idrolizzati minn prodotti sekondarji li ġejjin mill-annimali, leonardit, kitin u sapropel jikkonformaw mal-objettivi u l-prinċipji organiċi, dawk is-sustanzi għandhom jiġu inklużi fl-Anness I tar-Regolament (KE) Nru 889/2008 għall-użu taħt ċerti kundizzjonijiet speċifiċi.

(4)

Ibbażat fuq ir-rakkomandazzjonijiet tal-EGTOP, il-limitu ta' “0” għal kromu (VI) relatat ma' ċerti sustanzi elenkati fl-Anness I tar-Regolament (KE) Nru 889/2008 għandu jiġi mibdul b'“mhux individwabbli”.

(5)

Għal prodotti għall-protezzjoni tal-pjanti, l-EGTOP ikkonkluda fir-rakkomandazzjonijiet tiegħu (4) li s-sustanzi xaħam tan-nagħaġ, laminarin u silikat tal-aluminju (kaolin) jikkonformaw mal-objettivi u l-prinċipji organiċi. Għaldaqstant, dawk is-sustanzi għandhom jiġu inklużi fl-Anness II tar-Regolament (KE) Nru 889/2008 għall-użu taħt ċerti kundizzjonijiet speċifiċi.

(6)

Fir-rigward tal-leġiżlazzjoni orizzontali għal prodotti għall-protezzjoni tal-pjanti, ir-Regolament ta' Implimentazzjoni tal-Kummissjoni (UE) Nru 540/2011 (5) stabbilixxa lista tal-Unjoni ta' sustanzi attivi li qabel kienu inklużi fl-Anness I tad-Direttiva tal-Kunsill 91/414/KEE (6) u ta' sustanzi attivi approvati skont ir-Regolament (KE) Nru 1107/2009 tal-Parlament Ewropew u tal-Kunsill. (7) Huwa xieraq li l-partijiet relevanti tal-Anness II tar-Regolament (KE) Nru 889/2008 jiġu adattati għal dik il-lista. B'mod partikolari, il-ġelatina, ir-rotenone estratt minn Derris spp. u Lonchocarpus spp. u Terphrosia spp., il-fosfat tad-diammonju, l-oktanoat tar-ram, l-aluminju tal-potassju (sulfat tal-aluminju, kalinite), iż-żjut minerali u l-permanganat tal-potassju għandhom jitħassru minn dak l-Anness.

(7)

Fir-rigward tas-sustanzi attivi leċitina, kwassja estratta minn Quassia amara u idrossidu tal-kalċju li għalihom diġà ġew ippreżentati applikazzjonijiet għall-approvazzjoni lill-Kummissjoni skont ir-Regolament (KE) Nru 1107/2009, huwa xieraq li f'dan l-istadju jinżammu b'mod eċċezzjonali fil-lista fl-Anness II tar-Regolament (KE) Nru 889/2008 sakemm il-valutazzjoni tagħhom tiġi ffinalizzata. Fid-dawl tal-konklużjonijiet tal-valutazzjoni, il-Kummissjoni se tieħu azzjoni xierqa fir-rigward tal-preżenza tat-tliet sustanzi kkonċernati fil-lista fl-Anness II tar-Regolament (KE) Nru 889/2008.

(8)

Fid-dawl ta' dik il-leġiżlazzjoni orizzontali, huwa wkoll xieraq li jiġu adattati l-isem, id-deskrizzjoni, ir-rekwiżiti kompożizzjonali u l-kundizzjonijiet għall-użu ta' ċerti sustanzi u mikroorganiżmi elenkati fl-Anness II tar-Regolament (KE) Nru 889/2008, b'mod partikolari għal żjut tal-pjanti, mikroorganiżmi użati fil-ġlieda bijoloġika kontra l-parassiti u l-mard, feromoni, ram, etilene, pitrolju u bikarbonat tal-potassju.

(9)

L-Artikolu 24(2) tar-Regolament (KE) Nru 889/2008 ġie emendat mir-Regolament ta' Implimentazzjoni tal-Kummissjoni (UE) Nru 505/2012 (8) sabiex jiġu aġġornati r-referenzi għall-Annessi V u VI tar-Regolament (KE) Nru 889/2008, li kien ġie sostitwit bir-Regolament ta' Implimentazzjoni (UE) Nru 505/2012. Fit-test emendat tal-Artikolu 24(2) tar-Regolament (KE) Nru 889/2008, “prodotti omeopatiċi” tħalliet barra bi żball. Billi dawk il-prodotti dehru f'dik id-dispożizzjoni qabel l-emenda mir-Regolament ta' Implimentazzjoni (UE) Nru 505/2012, jeħtieġ li jiddaħħlu mill-ġdid.

(10)

Fl-Anness V tar-Regolament (KE) Nru 889/2008 kif emendat mir-Regolament ta' Implimentazzjoni (UE) Nru 505/2012, l-entrati preċedenti fosfat monokalċiku mingħajr floru u fosfat dibażiku tal-kalċju mingħajr floru ġew bi żball sostitwiti b'deskrizzjoni ġenerika, jiġifieri fosfat mingħajr floru. Madankollu, il-fosfat mingħajr floru mhuwiex ekwivalenti għall-prodotti fosfat monokalċiku mingħajr floru u fosfat dibażiku tal-kalċju mingħajr floru. Għaldaqstant, dawk iż-żewġ prodotti għandhom jiddaħħlu mill-ġdid fl-Anness V tar-Regolament (KE) Nru 889/2008 u l-fosfat mingħajr floru għandu jitħassar.

(11)

Ir-Regolament ta' Implimentazzjoni tal-Kummissjoni (UE) Nru 651/2013 (9) ħassar l-awtorizzazzjoni preċedenti għal klinoptilolite mir-Regolament tal-Kummissjoni (KE) Nru 1810/2005 (10), espanda l-użu tagħha bħala addittiv fin-nutriment tal-annimali għall-ispeċijiet kollha tal-annimali u biddel il-kodiċi tagħha għal 1g568. Għaldaqstant, sabiex ikun hemm użu kontinwu ta' klinoptilolite fil-produzzjoni organika, l-Anness VI tar-Regolament (KE) Nru 889/2008 irid jiġi adattat skont ir-Regolament ta' Implimentazzjoni (UE) Nru 651/2013.

(12)

Ir-Regolament (KE) Nru 889/2008 għandu għalhekk jiġi emendat u kkoreġut skont dan.

(13)

Għal raġunijiet ta' ċertezza legali, il-korrezzjoni tal-Artikolu 24(2) u tal-Anness V tar-Regolament (KE) Nru 889/2008 għandha tapplika mid-data tad-dħul fis-seħħ tar-Regolament ta' Implimentazzjoni (UE) Nru 505/2012.

(14)

Il-miżuri previsti f'dan ir-Regolament huma skont l-opinjoni tal-Kumitat regolatorju għall-produzzjoni organika,

ADOTTAT DAN IR-REGOLAMENT:

Artikolu 1

Emenda tar-Regolament (KE) Nru 889/2008

L-Annessi I, II u VI tar-Regolament (KE) Nru 889/2008 huma emendati skont il-punti 1, 2 u 4 tal-Anness ta' dan ir-Regolament.

Artikolu 2

Korrezzjoni tar-Regolament (KE) Nru 889/2008

Ir-Regolament (KE) Nru 889/2008 huwa kkorreġut kif ġej:

(1)

Fl-Artikolu 24, il-paragrafu 2 huwa sostitwit b'dan li ġej:

“2.   Il-prodotti fitoterapewtiċi u omeopatiċi, il-mikronutrijenti u l-prodotti elenkati fit-Taqsima 1 tal-Anness V u fit-Taqsima 3 tal-Anness VI għandhom jintużaw bi preferenza għal trattament veterinarju allopatiku kimikament issintesizzat jew għall-antibijotiċi, sakemm l-effett terapewtiku tagħhom ikun effettiv għall-ispeċi tal-annimal u għall-kundizzjoni li għaliha hu maħsub it-trattament.”

(2)

L-Anness V huwa emendat skont il-punt 3 tal-Anness ta' dan ir-Regolament.

Artikolu 3

Dħul fis-seħħ u applikazzjoni

Dan ir-Regolament għandu jidħol fis-seħħ fis-seba' jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Madankollu, l-Artikolu 2 għandu japplika mis-16 ta' Ġunju 2012.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-8 ta' April 2014.

Għall-Kummissjoni

Il-President

José Manuel BARROSO

(1)  ĠU L 189, 20.7.2007, p. 1.

(2)  Ir-Regolament tal-Kummissjoni (KE) Nru 889/2008 tal-5 ta' Settembru 2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta' prodotti organiċi fir-rigward tal-produzzjoni, it-tikkettar u l-kontroll organiku (ĠU L 250, 18.9.2008, p. 1).

(3)  Rapport finali:

http://ec.europa.eu/agriculture/organic/files/eu-policy/expert-recommendations/expert_group/final_report_on_fertilizers_to_be_published_en.pdf

(4)  Rapport finali:

http://ec.europa.eu/agriculture/organic/files/eu-policy/expert-recommendations/expert_group/final_report_on_plant_protection_products.pdf

(5)  Ir-Regolament ta' Implimentazzjoni tal-Kummissjoni (UE) Nru 540/2011 tal-25 ta' Mejju 2011 li jimplimenta r-Regolament (KE) Nru 1107/2009 tal-Parlament Ewropew u tal-Kunsill f'dak li għandu x'jaqsam mal-lista ta' sustanzi attivi approvati (ĠU L 153, 11.6.2011, p. 1).

(6)  Id-Direttiva tal-Kunsill 91/414/KEE tal-15 ta' Lulju 1991 li tikkonċerna t-tqegħid fis-suq ta' prodotti għall-protezzjoni tal-pjanti (ĠU L 230, 19.8.1991, p. 1).

(7)  Ir-Regolament (KE) Nru 1107/2009 tal-Parlament Ewropew u tal-Kunsill tal-21 ta' Ottubru 2009 dwar it-tqegħid fis-suq ta' prodotti għall-protezzjoni tal-pjanti (ĠU L 309, 24.11.2009, p. 1).

(8)  Ir-Regolament ta' Implimentazzjoni tal-Kummissjoni (UE) Nru 505/2012 tal-14 ta' Ġunju 2012 li jemenda u jikkoreġi r-Regolament (KE) Nru 889/2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta' prodotti organiċi fir-rigward tal-produzzjoni, it-tikkettar u l-kontroll organiku (ĠU L 154, 15.6.2012, p. 12).

(9)  Ir-Regolament ta' Implimentazzjoni tal-Kummissjoni (UE) Nru 651/2013 tad-9 ta' Lulju 2013 li jikkonċerna l-awtorizzazzjoni tal-klinoptilolit ta' oriġini sedimentarja bħala addittiv fl-għalf għall-ispeċi kollha tal-annimali u li jemenda r-Regolament (KE) Nru 1810/2005 (ĠU L 189, 10.7.2013, p. 1).

(10)  Ir-Regolament tal-Kummissjoni (KE) Nru 1810/2005 tal-4 ta' Novembru 2005 dwar awtorizzazzjoni ġdida għal għaxar snin ta' addittiv fl-għalf, l-awtorizzazzjoni permanenti ta' ċerti addittivi fl-għalf u l-awtorizzazzjoni provviżorja għal użi ġodda ta' ċerti addittivi li diġà huma awtorizzati fl-għalf (ĠU L 291, 5.11.2005, p. 5).

ANNESS

L-Annessi I, II, V u VI tar-Regolament (KE) Nru 889/2008 huma emendati kif ġej:

(1)

L-Anness I huwa emendat kif ġej:

(a)

ir-ringiela li tikkonċerna “Skart domestiku kompost jew iffermentat” tinbidel b'dan li ġej:

“B

Taħlita bil-kompost jew iffermentata ta' skart domestiku

Prodott miksub minn skart domestiku isseparat mill-bidu, li jkun għadda mill-proċess biex isir kompost jew għal fermentazzjoni anaerobika għall-produzzjoni tal-bijogass

Skart domestiku veġetali u tal-annimali biss

Meta jkun prodott biss f'sistema ta' ġbir magħluqa u b'monitoraġġ, aċċettata mill-Istat Membru.

Konċentrazzjonijiet massimi f'mg/kg ta' materja niexfa:

kadmju: 0,7; ram: 70; nikil: 25; ċomb: 45; żingu: 200; merkurju: 0,4; kromu (total): 70; kromu (VI): mhux individwabbli”

(b)

wara r-ringiela li tikkonċerna “Taħlita bil-kompost jew iffermentata ta' materja veġetali”, tiddaħħal ir-ringiela li ġejja:

“B

Id-diġestat tal-bijogass li jkun fih prodotti sekondarji tal-annimali kodiġeriti b'materjal ta' oriġini mill-pjanti jew mill-annimali kif elenkati f'dan l-Anness

Il-prodotti sekondarji tal-annimali (inklużi l-prodotti sekondarji tal-annimali selvaġġi) tal-kategorija 3 u l-kontenut tas-sistema diġestiva tal-kategorija 2 (il-kategoriji 2 u 3 kif definiti fir-Regolament (KE) Nru 1069/2009 tal-Parlament Ewropew u tal-Kunsill) (*) ma jridux joriġinaw minn biedja industrijalizzata.

Il-Proċessi jridu jkunu skont ir-Regolament tal-Kummissjoni (UE) Nru 142/2011 (**).

Ma għandux jiġi applikat għal partijiet li jittieklu tal-għalla

(c)

ir-ringiela li tikkonċerna “Prodotti jew prodotti sekondarji ta' oriġini mill-annimali bħal ta' hawn taħt” tinbidel b'dan li ġej:

“B

Prodotti jew prodotti sekondarji ta' oriġini mill-annimali bħal ta' hawn taħt:

 

Smid tad-demm

 

Smid tal-qawqab

 

Smid tal-qrun

 

Għadam mitħun jew għadam mitħun mingħajr ġelatina

 

Ħut mitħun

 

Dqiq mil-laħam

 

Smid tar-rix, tax-xagħar u taċ-”chiquette“

 

Suf

 

Pil(1)

 

Xagħar

 

Prodotti tal-ħalib

 

Proteini idrolizzati(2)

(1)

Konċentrazzjoni massima f'mg/kg ta' materja niexfa ta' kromju (VI): mhux individwabbli

(2)

Ma għandux jiġi applikat għal partijiet li jittieklu tal-għalla”

(d)

jiżdiedu r-ringieli li ġejjin:

“B

Leonardit (Saff organiku mhux ipproċessat bi kwantità kbira ta' aċidi umiċi)

Jekk jinkiseb bħala prodott sekondarju ta' attivitajiet ta' estrazzjoni minerarja biss

B

Kitin (Polisakkarid miksuba mill-qoxra tal-krustaċji)

Jekk tinkiseb biss minn sajd sostenibbli, kif definit fl-Artikolu 3(e) tar-Regolament tal-Kunsill (KE) Nru 2371/2002 (***) jew akkwakultura organika

B

Saff organikament rikk li ġej minn korpi tal-ilma ħelu fformati bl-esklużjoni tal-ossiġenu (eż. is-sapropel)

Safef organiċi li huma prodotti sekondarji tal-ġestjoni tal-korpi tal-ilma ħelu jew estratti minn żoni li qabel kienu tal-ilma ħelu biss

Fejn applikabbli, l-estrazzjoni għandha ssir b'mod li tikkawża impatt minimu fuq is-sistema akkwatika

Safef li ġejjin minn sorsi ħielsa minn kontaminazzjonijiet ta' pestiċidi, sustanzi organiċi persistenti li jniġġsu u sustanzi simili tal-petrol biss

Konċentrazzjonijiet massimi f'mg/kg ta' materja niexfa:

kadmju: 0,7; ram: 70; nikil: 25; ċomb: 45; żingu: 200; merkurju: 0,4; kromu (total): 70; kromu (VI): mhux individwabbli

(2)

L-Anness II huwa emendat kif ġej:

(a)

It-Taqsimiet 1 u 2 huma sostitwiti b'dan li ġej:

“1.   Sustanzi ta' oriġini mill-għelejjel jew mill-annimali

Awtorizzazzjoni

Isem

Deskrizzjoni, rekwiżiti kompożizzjonali, kundizzjonijiet għall-użu

A

Ażadiraktina estratta minn Azadirachta indica (Is-siġra tan-neem)

Insettiċida

A

Xama' tan-naħal

Għajnuna għaż-żbir

B

Proteini idrolizzati minbarra l-ġelatina

Sustanzi li jattiraw, f'applikazzjonijiet awtorizzati biss flimkien ma' prodotti xierqa oħra ta' din il-lista

A

Leċitina

Fungiċida

B

Żjut tal-pjanti

Insettiċida, akariċida, fungiċida, batteriċida u prevenzjoni għat-tnibbit.

Prodotti kif speċifikati fl-Anness tar-Regolament ta' Implimentazzjoni tal-Kummissjoni (UE) Nru 540/2011 (****)

A

Piretrini estratti minn Chrysanthemum cinerariaefolium

Insettiċida

A

Kwassja estratta minn Quassia amara

Insettiċida, repellent

2.   Mikroorganiżmi użati fil-ġlieda bijoloġika kontra l-parassiti u l-mard

Awtorizzazzjoni

Isem

Deskrizzjoni, rekwiżiti kompożizzjonali, kundizzjonijiet għall-użu

A

Mikroorganiżmi

Prodotti kif speċifikati fl-Anness tar-Regolament ta' Implimentazzjoni tal-Kummissjoni (UE) Nru 540/2011 u li ma joriġinawx minn OĠM”

(b)

It-Taqsima 4 hija sostitwita b'dan li ġej:

“4.   Sustanzi li jridu jintużaw f'nases u/jew distributuri

Awtorizzazzjoni

Isem

Deskrizzjoni, rekwiżiti kompożizzjonali, kundizzjonijiet għall-użu

A

Feromoni

Sustanzi li jattiraw, interferent tal-imġiba sesswali; użati biss f'nases u f'distributuri.

Prodotti kif speċifikati fl-Anness tar-Regolament ta' Implimentazzjoni tal-Kummissjoni (UE) Nru 540/2011 (in-numri 255, 258 u 259)

A

Piretrojdi (id-deltametrina jew il-lambdaċjalotrina biss)

Insettiċida; f'nases b'sustanzi speċifiċi li jattiraw biss; kontra Bactrocera oleae u Ceratitis capitata Wied. biss”

(c)

It-Taqsimiet 6 u 7 huma sostitwiti b'dan li ġej:

“6.   Sustanzi oħra minn użu tradizzjonali f'agrikoltura organika

Awtorizzazzjoni

Isem

Deskrizzjoni, rekwiżiti kompożizzjonali, kundizzjonijiet għall-użu

B

Komposti tar-ram fil-forma ta': idrossidu tar-ram, ossiklorur tar-ram, ossidu tar-ram, taħlita Bordeaux, u sulfat tar-ram tribażiku

Użi biss bħala batteriċida u fungiċida sa 6 kg ta' ram għal kull ettaru fis-sena.

Għal għelejjel perenni, l-Istati Membri jistgħu, b'deroga mill-ewwel paragrafu, jipprevedu li l-limitu ta' 6 kg ta' ram jista' jinqabeż f'sena partikolari sakemm il-kwantità medja effettivament użata tul perjodu ta' 5 snin li jkun jikkonsisti minn dik is-sena u l-erba' snin preċedenti, ma tkunx taqbeż is-6 kg.

Għandhom jittieħdu miżuri ta' mitigazzjoni tar-riskju sabiex jipproteġu l-ilma u l-organiżmi mhux fil-mira bħal żoni ta' lqugħ.

Il-prodotti kif speċifikati fl-Anness tar-Regolament ta' Implimentazzjoni tal-Kummissjoni (UE) Nru 540/2011 (in-numru 277)

A

Etilen

Għall-maturazzjoni tal-banana, tal-kiwi u tal-kaki; għall-maturazzjoni tal-frott taċ-ċitru biss bħala parti minn strateġija għall-prevenzjoni tal-ħsara mid-dbieben tal-frott fiċ-ċitru; induzzjoni tal-fjura tal-ananas; għall-inibizzjoni tat-tinbit fil-patata u fil-basal.

Jistgħu jiġu awtorizzati biss l-użi fuq ġewwa bħala regolatur tal-iżvilupp tal-pjanti. L-awtorizzazzjonijiet għandhom ikunu limitati għall-utenti professjonali.

A

Il-melħ xaħmi aċiduż tal-potassju (sapun artab)

Insettiċida

A

Kubrit tal-ġir (polisulfur tal-kalċju)

Fungiċida

A

Żejt tal-paraffina

Insettiċida, akariċida

Prodotti kif speċifikati fl-Anness tar-Regolament ta' Implimentazzjoni (UE) Nru 540/2011 (in-numri 294 u 295)

A

Ramel kwarzuż

Repellent

A

Kubrit

Funġiċida, akariċida

B

Repellenti permezz ta' riħa ta' oriġini mill-annimali jew mill-pjanti/xaħam tan-nagħaġ

Repellent

Fuq partijiet mhux tajbin għall-ikel tal-għelejjel u fejn materjal tal-għelejjel ma jiġix inġerit min-nagħaġ jew mill-mogħoż

Il-prodotti kif speċifikati fl-Anness tar-Regolament ta' Implimentazzjoni tal-Kummissjoni (UE) Nru 540/2011 (in-numru 249)

7.   Sustanzi oħra

Awtorizzazzjoni

Isem

Deskrizzjoni, rekwiżiti kompożizzjonali, kundizzjonijiet għall-użu

B

Silikat tal-aluminju (Kaolin)

Repellent

A

Idrossidu tal-kalċju

Fungiċida biss f'siġar tal-frott, inklużi mixtliet, biex tkun ikkontrollata in-Nectria galligena

B

Laminarin

Stimulant tal-mekkaniżmi ta' awtodifiża tal-għelejjel

Il-kelp għandu jitkabbar organikament skont l-Artikolu 6d jew jinħasad b'mod sostenibbli skont l-Artikolu 6c

B

Il-karbonat tal-idroġenu tal-potassju (magħruf ukoll bħala bikarbonat tal-potassju)

Fungiċida u insettiċida”

(3)

Fl-Anness V, it-Taqsima 1 hija sostitwita b'dan li ġej:

“1.   MATERJALI TAL-GĦALF LI JORIĠINAW MILL-MINERALI:

A

Qxur tal-baħar kalkarużi

 

A

Maerl

 

A

Litotamnju

 

A

Glukonat tal-kalċju

 

A

Karbonati tal-kalċju

 

A

Monokalċjufosfat defluworinat

 

A

Dikalċjufosfat defluworinat

 

A

Ossidu tal-manjeżju (manjeżja anidra)

 

A

Sulfat tal-manjeżju

 

A

Klorur tal-manjeżju

 

A

Karbonat tal-manjeżju

 

A

Fosfat tal-kalċju u tal-manjeżju

 

A

Fosfat tal-manjeżju

 

A

Fosfat monosodju

 

A

Fosfat tal-kalċju u tas-sodju

 

A

Klorur tas-sodju

 

A

Bikarbonat tas-sodju

 

A

Karbonat tas-sodju

 

A

Sulfat tas-sodju

 

A

Klorur tal-potassju”

 

(4)

Fl-Anness VI, it-Taqsima (1)(d) “Agglomeranti, antiagglomeranti u koagulanti”, l-entrata dwar il-klinoptilolit hija sostitwita b'dan li ġej:

Awtorizzazzjoni

Numru ta' identifikazzjoni

Sustanza

Deskrizzjoni u kundizzjonijiet għall-użu

“B

1

1g568

Klinoptilolit ta' oriġini sedimentarja [L-ispeċijiet kollha]”

 

(*)  Ir-Regolament (KE) Nru 1069/2009 tal-Parlament Ewropew u tal-Kunsill tal-21 ta' Ottubru 2009 li jistabbilixxi regoli tas-saħħa li jirrigwardaw prodotti sekondarji tal-annimali jew derivati minnhom mhux maħsuba għall-konsum mill-bniedem u li jħassar ir-Regolament (KE) Nru 1774/2002 (Regolament dwar prodotti sekondarji tal-annimali) (ĠU L 300, 14.11.2009, p. 1).

(**)  Ir-Regolament tal-Kummissjoni (UE) Nru 142/2011 tal-25 ta' Frar 2011 li jimplimenta r-Regolament (KE) Nru 1069/2009 tal-Parlament Ewropew u tal-Kunsill li jistabbilixxi regoli tas-saħħa li jirrigwardaw prodotti sekondarji tal-annimali jew derivati minnhom mhux maħsuba għall-konsum mill-bniedem u li jimplimenta d-Direttiva tal-Kunsill 97/78/KE fir-rigward ta' ċerti kampjuni u oġġetti eżentati mill-kontrolli veterinarji skont dik id-Direttiva (ĠU L 54, 26.2.2011, p. 1).”

(***)  Ir-Regolament tal-Kunsill (KE) Nru 2371/2002 tal-20 ta' Diċembru 2002 dwar il-konservazzjoni u l-isfruttar sostenibbli ta' riżorsi tas-sajd skont il-Politika Komuni dwar is-Sajd (ĠU L 358, 31.12.2012, p. 59).”

(****)  Ir-Regolament ta' Implimentazzjoni tal-Kummissjoni (UE) Nru 540/2011 tal-25 ta' Mejju 2011 li jimplimenta r-Regolament (KE) Nru 1107/2009 tal-Parlament Ewropew u tal-Kunsill f'dak li għandu x'jaqsam mal-lista ta' sustanzi attivi approvati (ĠU L 153, 11.6.2011, p. 1).

Top