EUR-Lex Access to European Union law
This document is an excerpt from the EUR-Lex website
Document 32010R0097
Commission Regulation (EU) No 97/2010 of 4 February 2010 entering a name in the register of traditional specialities guaranteed [Pizza Napoletana (TSG)]
Regolament tal-Kummissjoni (UE) Nru 97/2010 tal- 4 ta’ Frar 2010 li jdaħħal denominazzjoni fir-reġistru tal-ispeċjalitajiet tradizzjonali garantiti [Pizza Napoletana (STG)]
Regolament tal-Kummissjoni (UE) Nru 97/2010 tal- 4 ta’ Frar 2010 li jdaħħal denominazzjoni fir-reġistru tal-ispeċjalitajiet tradizzjonali garantiti [Pizza Napoletana (STG)]
OJ L 34, 5.2.2010, p. 7–16
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
Special edition in Croatian: Chapter 03 Volume 053 P. 231 - 240
In force
5.2.2010 |
MT |
Il-Ġurnal Uffiċjali tal-Unjoni Ewropea |
L 34/7 |
REGOLAMENT TAL-KUMMISSJONI (UE) Nru 97/2010
tal-4 ta’ Frar 2010
li jdaħħal denominazzjoni fir-reġistru tal-ispeċjalitajiet tradizzjonali garantiti [Pizza Napoletana (STG)]
IL-KUMMISSJONI EWROPEA,
wara t-Trattat dwar il-funzjonament tal-Unjoni Ewropea,
Wara li kkunsidrat ir-Regolament tal-Kunsill (KE) Nru 509/2006 tal-20 ta' Marzu 2006 dwar prodotti agrikoli u oġġetti tal-ikel bħala speċjalitajiet tradizzjonali garantiti (1), u b'mod partikolari t-tielet subparagrafu tal-Artikolu 9(5) tiegħu,
Billi:
(1) |
F'konformità mal-ewwel subparagrafu tal-Artikolu 8(2) tar-Regolament (KE) Nru 509/2006 u b’applikazzjoni tal-Artikolu 19(3) tar-Regolament imsemmi, it-talba mressqa mill-Italja biex id-denominazzjoni “Pizza Napoletana” tkun irreġistrata ġiet ippubblikata f’Il-Ġurnal Uffiċjali tal-Unjoni Ewropea (2). |
(2) |
Il-Ġermanja u l-Polonja ddikjaraw oġġezzjonaw għar-reġistrazzjoni skont l-Artikolu 9(1) tar-Regolament (KE) Nru 509/2006. Dawn l-oġġezzjonijiet tqiesu eliġibbli abbażi tal-Artikolu 9(3), l-ewwel subparagrafu, il-punti a) sa d) tar-Regolament imsemmi. |
(3) |
Id-dikjarazzjoni ta’ oġġezzjoni mill-Ġermanja twieldet minħabba l-biża’ li d-dqiq tal-qamħ Ġermaniż hu żvantaġġat ladarba tip ta’ dqiq tal-qamħ wieħed biss, disponibbli fi Stat Membru wieħed, jiġifieri fl-Italja, huwa awtorizzat skont l-ispeċifikazzjonijiet. |
(4) |
Id-dikjarazzjoni ta’ oġġezzjoni mill-Polonja kienet tirrigwarda partikolarment il-fatt li l-isem innifsu mhuwiex speċifiku u li t-talba ta’ reġistrazzjoni kif inhi ppubblikata ma tinkludix spjegazzjonijiet xierqa. |
(5) |
Bl-ittri tas-17 ta’ Settembru 2008, il-Kummissjoni stiednet lill-Istati Membri konċernati jilħqu qbil bejniethom skont il-proċeduri interni tagħhom. |
(6) |
Intlaħaq qbil, innotifikat lill-Kumissjoni fl-24 ta’ Frar 2009 u approvat minnha, bejn l-Italja u l-Ġermanja f’perjodu ta’ sitt xhur. Skont dan il-qbil, tneħħew ir-restrizzjonijiet marbuta mal-użu ta’ ċertu dqiq tal-qamħ. |
(7) |
Peress li l-ebda qbil ma ntlaħaq bejn l-Italja u l-Polonja fiż-żmien stipulat, il-Kummissjoni jkollha tadotta deċiżjoni skont il-proċedura stipulata fl-Artikolu 18(2) tar-Regolament (KE) Nru 509/2006. |
(8) |
F’dan il-kuntest u wara l-oġġezzjoni tal-Polonja, l-ispjegazzjonijiet li juru l-isem, li għandu jkun irreġistrat, huwa speċifiku fih innifsu, jiġu inklużi mal-ispeċifikazzjonijiet. |
(9) |
Fid-dawl ta’ dawn l-elementi, id-denominazzjoni “Pizza Napoletana” għandu għalhekk jinkiteb fir-‘Reġistru tal-ispeċjalitajiet tradizzjonali garantiti’. Ma ntalbitx il-protezzjoni msemmija fl-Artikolu 13(2) tar-Regolament (KE) Nru 509/2006. |
(10) |
Il-miżuri previsti f'dan ir-Regolament huma skont l-opinjoni tal-Kumitat Permanenti għall-Ispeċjalitajiet Tradizzjonali Garantiti, |
ADOTTAT DAN IR-REGOLAMENT:
Artikolu 1
Id-denominazzjoni li tinsab fl-Anness I ta' dan ir-Regolament hija b'dan irreġistrata.
Artikolu 2
l-ispeċifikazzjonijiet konsolidati jinsabu fl-Anness II ta’ dan ir-Regolament.
Artikolu 3
Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-4 ta’ Frar 2010.
Għall-Kummissjoni
Il-president
José Manuel BARROSO
ANNESS I
Oġġetti tal-ikel imsemmija fl-Anness I tar-Regolament (KE) Nru 509/2006
Klassi 2.3. Ħelu, ħobż, prodotti moħmija, prodotti tad-dulċiera, galletti u gallettini
L-ITALJA
Pizza Napoletana (STG)
ANNESS II
APPLIKAZZJONI GĦAR-REĠISTRAZZJONI TA' GTS
Ir-Regolament tal-Kunsill (KE) Nru 509/2006 dwar prodotti agrikoli u oġġetti tal-ikel bħala speċjalitajiet tradizzjonali garantiti
“PIZZA NAPOLETANA”
Nru KE: IT/TSG/007/0031/09.02.2005
1. ISEM U INDIRIZZ TAL-KUMPANIJA LI QED TRESSAQ L-APPLIKAZZJONI
Isem |
: |
Associazione Verace Pizza Napoletana |
Indirizz |
: |
Via S. Maria La Nova 49, Napoli |
Tel. |
: |
0814201205 |
Feks |
: |
0814201205 |
Posta elettronika |
: |
info@pizzanapoletana.org |
Isem |
: |
Associazione Pizzaiuoli Napoletani |
Indirizz |
: |
Corso S. Giovanni a Teduccio, 55 Napoli |
Tel. |
: |
0815590781 |
Feks |
: |
0815590781 |
Posta elettronika |
: |
info@pizzaiuolinapoletani.it direttivo@pizzaiuolinapoletani.it |
2. STAT MEMBRU JEW PAJJIŻ TERZ
L-Italja
3. SPEĊIFIKAZZJONIJIET TAL-PRODUZZJONI
3.1. Isem għar-reġistrazzjoni
“Pizza Napoletana”
Ir-reġistrazzjoni hija mitluba bil-lingwa Taljana biss.
Il-frażi “Prodotta secondo la Tradizione napoletana” (Prodotta skont it-tradizzjoni Naplitana) u l-akronimu STG li jidhru fuq il-logo/tikketta tal-“Pizza Napoletana” STG, huma tradotti bil-lingwa tal-pajjiż fejn qed issir il-produzzjoni.
3.2. Jiġi indikat jekk l-isem
X |
huwa speċifiku fih innifsu |
|
tiġi indikata l-ispeċifiċità tal-prodott agrikolu jew tal-oġġett tal-ikel |
L-isem “Pizza Napoletana” huwa tradizzjonalment użat biex jiddeskrivi dan il-prodott, kif juru sorsi differenti indikati fil-punt 3.8.
3.3. Jiġi indikat jekk hix mitluba r-riżerva tal-isem skont l-Artikolu 13(2), tar-Regolament (KE) Nru 509/2006
|
Reġistrazzjoni bir-riżerva tal-isem |
X |
Reġistrazzjoni mingħajr riżerva tal-isem |
3.4. Tip ta’ prodott
Klassi 2.3. |
Ħelu, ħobż, prodotti moħmija, prodotti tad-dulċiera jew gallettiu gallettini |
3.5. Deskrizzjoni tal-prodott agrikolu jew tal-oġġett tal-ikel li ismu huwa indikat fil-punt 3.1
Il-“Pizza Napoletana” STG hija ppreżentata bħala prodott ta’ għamla tonda li jinħema fil-forn, b'dijametru li jista' jkollu daqsijiet differenti bla ma jaqbeż il-35 ċm, bix-xifer imtella’ 'il fuq u bil-parti tan-nofs miksija b'xi ingredjenti. Il-parti tan-nofs ikollha ħxuna ta' 0.4 ċm b'limitu li jista' jvarja b’+ 10 %, filwaqt li x-xifer jista' jvarja b'1–2 ċm. B’mod ġenerali l-pizza għandha tkun ratba, elastika, li tintlewa f’erbgħa faċilment.
Il-“Pizza Napoletana” STG hija kkaratterizzata minn xifer imtella’ 'il fuq, ta’ lewn dehbi, bħal kull prodott li jinħema fil-forn, artab kemm meta tmissu kif ukoll meta dduqu; mill-parti tan-nofs miksija b’xi ingredjenti, fejn jispikka l-aħmar tat-tadam, imħallat maż-żejt u, skont l-ingredjenti li jintużaw, l-aħdar tar-riegnu u l-abjad tat-tewm; mill-abjad tal-mozzarella mqatta' bċejjeċ imqiegħda xi ftit jew wisq qrib xulxin, l-aħdar tal-weraq tal-ħabaq, li mbagħad jiskura xi ftit meta jsir.
Il-konsistenza tal-“Pizza Napoletana” għandha tkun ratba, elastika, li tista' tintlewa faċilment; il-prodott jinqata' faċilment; għandha togħma karatteristika, bnina, liema togħma ġejja mix-xifer imtella', li għandu t-togħma tipika tal-ħobż li għola sew bil-ħmira u moħmi tajjeb, togħma mħallta ma' dik kemmxejn aċiduża tat-tadam, mal-aroma, rispettivament, tar-riegnu, tat-tewm jew tal-ħabaq u mat-togħma bnina tal-mozzarella msajra.
Fi tmiem il-proċess tas-sajran, mill-pizza toħroġ riħa karatteristika tfuħ u delizzjuża; it-tadam, li jitlef biss l-ilma żejjed tiegħu, jibqa' magħqud u solidu; il-Mozzarella di Bufala Campana DPO jew il-Mozzarella STG tidher maħlula fuq il-pizza; kemm il-ħabaq kif ukoll it-tewm u r-riegnu joħolqu aroma intensa, u ma għandhomx dehra maħruqa.
3.6. Deskrizzjoni tal-metodu li bih jinkiseb il-prodott bl-isem indikat fil-punt 3.1
Il-materja prima bażika li tikkaratterizza il-“Pizza Napoletana” tinkludi: dqiq artab mill-qamħ, ħmira tal-birra, ilma naturali tajjeb għax-xorb, tadam imqaxxar u/jew tadam żgħir frisk (pomodorini), melħ tal-baħar jew melħ tat-tisjir, żejt extra-verġni taż-żebbuġa. Fost ingredjenti oħra li jistgħu jintużaw fit-tħejjija tal-“Pizza Napoletana” huma: tewm u riegnu; Mozzarella di Bufala Campana DPO, ħabaq frisk u Mozzarella STG.
Il-karatteristiċi tad-dqiq huma dawn li ġejjin:
— |
: |
W |
: |
220–380 |
— |
: |
P/L |
: |
0,50–0,70 |
— |
: |
Assorbiment |
: |
55–62 |
— |
: |
Stabbiltà |
: |
4–12 |
— |
: |
Value index E10 |
: |
max. 60 |
— |
: |
Falling number |
: |
300–400 |
— |
: |
Glutina mnixxfa |
: |
9,5–11 g % |
— |
: |
Proteini |
: |
11–12,5 g % |
It-tħejjija tal-“Pizza Napoletana” tinvolvi biss il-fażijiet li ġejjin, li jitwettqu f'ċiklu kontinwu fl-istess stabbiliment:
Tħejjija tal-għaġina
Ħawwad flimkien id-dqiq, l-ilma, il-melħ u l-ħmira. Ferra' litru ilma fil-magna tal-għaġina, ħoll kwantità ta' bejn 50 u 55 g melħ tal-baħar, żid 10 % tad-dqiq skont il-kwantità ta' għaġina prevista, u wara li tħoll 3g ħmira, ħaddem il-magna tal-għaġina filwaqt li żżid bil-mod il-mod 1,8 kg dqiq W 220-380 sakemm it-taħlita tilħaq il-konsistenza mixtieqa u tista' titqies bħala għaġina. Din il-biċċa xogħol għandha tieħu 10 minuti.
It-taħlita għandha tinħadem bil-mod fil-magna tal-għaġina, u preferibbilment din ikollha għamla ta’ furketta, għal 20 minuta sakemm issir biċċa għaġina sħiħa. Biex it-taħlita tilħaq l-aħjar konsistenza, importanti ħafna l-kwantità ta' ilma li d-dqiq jista' jassorbi. It-taħlita ma għandhiex tinħass twaħħal, u għandha tkun ratba u elastika.
Il-karatteristiċi tat-taħlita huma dawn li ġejjin, liema karatteristiċi jista' jkollhom tibdil ta' ± 10 %:
— |
: |
Temperatura ta' fermentazzjoni |
: |
25 °C |
— |
: |
pH finali |
: |
5,87 |
— |
: |
Aċidità totali titrattabbli |
: |
0,14 |
— |
: |
Densità |
: |
0,79 g/cm3 (+ 34 %) |
Teħmir tal-għaġina
L-ewwel fażi: ladarba l-għaġina tinħareġ mill-magna, titqiegħed fuq wiċċ tal-mejda fil-pizzerija u titħalla toqgħod għal sagħtejn, mgħottija b'biċċa umda, sabiex il-wiċċ tagħha ma jibbiesx, u biex ma tiffurmax xorta ta’ qoxra minħabba l-evaporazzjoni tal-umdità li titla’ minn ġot-taħlita stess. Kif jgħaddu sagħtejn tiġi ffurmata ħobża żgħira. Biex jagħmel dan il-pizzar irid juża jdejh biss. Bl-għajnuna ta' sikkina wiesgħa, tinqata’ parti mill-għaġina li tkun għoliet biex tingħata l-għamla ta’ ħobża żgħira. Għall-“Pizza Napoletana”, il-ħobżiet żgħar għandhom jiżnu bejn 180 u 250 g.
It-tieni fażi tat-teħmir: meta jiġu ffurmati dawn il-ħobżiet żgħar, it-teħmir isir għat-tieni darba ġo kontenituri tal-ikel. Din il-fażi tieħu minn erbgħa sa sitt sigħat. Din l-għaġina, li tinżamm f'temperatura normali, tkun lesta biex tintuża sa sitt sigħat wara.
L-iffurmar
Wara li jgħaddi l-perjodu tat-teħmir, il-ħobża tinħareġ minn ġol-kontenitur permezz ta' sikkina wiesgħa u titqiegħed fuq il-bank tal-pizzerija fuq kisja rqiqa ta' dqiq biex jiġi evitat li l-għaġina teħel mal-wiċċ li fuqu qed tinħadem. B’moviment li jimxi miċ-ċentru lejn ix-xifer u bil-pressjoni tas-swaba’ taż-żewġ idejn fuq il-ħobża, li tinqaleb bosta drabi, il-pizzar jagħti forma tonda lill-għaġina b’mod li fiċ-ċentru l-ħxuna ma tkunx iktar minn 0.4 cm u tista’ tiżdied b’± 10 % u li x-xifer ma jaqbiżx 1–2 ċm u b’hekk jifforma xifer imtella’ ’l fuq.
Għat-tħejjija tal-“Pizza Napoletana” STG mhumiex aċċettati metodi oħra ta’ kif tinħadem l-għaġina, speċjalment bl-użu ta’ xi lembuba u/jew xi makkinarju li jippressa l-għaġina u jaqtagħha tonda.
Il-mili
Il-“Pizza Napoletana” tiġi mħawra kif ġej:
— |
bl-imgħarfa poġġi minn 70 sa 100 g tadam imqaxxar u mqatta' biċċiet żgħar fiċ-ċentru tal-għaġina; |
— |
b'moviment spirali xerred it-tadam mal-parti tan-nofs kollha; |
— |
b'moviment spirali żid il-melħ fuq it-tadam; |
— |
bl-istess mod roxx ftit riegnu; |
— |
qatta' sinna tewm, li qabel tkun qaxxart, f'biċċiet żgħar u poġġihom fuq it-tadam; |
— |
b'kontenitur taż-żejt li jkollu żennuna u b'moviment spirali, ibda xerred minn 4 sa 5 g żejt extra verġni taż-żebbuġa min-nofs 'il barra, liema ammont jista' jiżdied b'20 %. |
Jew:
— |
bl-imgħarfa poġġi fin-nofs tal-għaġina tonda bejn 60 sa 80 g tadam imqaxxar u mqatta' biċċiet żgħar u/jew tadam żgħir frisk imqatta'; |
— |
b'moviment spirali xerred it-tadam mal-parti tan-nofs kollha; |
— |
b'moviment spirali żid il-melħ fuq it-tadam; |
— |
poġġi minn 80 sa 100 g Mozzarella di Bufala Campana DOP mqatta' biċċiet fuq it-tadam; |
— |
fuq il-pizza poġġi xi weraq tal-ħabaq frisk; |
— |
b'kontenitur taż-żejt li jkollu żennuna u b'moviment spirali, ibda xerred minn 4 sa 5 g żejt extra verġni taż-żebbuġa min-nofs ’il barra, liema ammont jista' jiżdied b'20 %. |
Jew:
— |
bl-imgħarfa poġġi fin-nofs tal-għaġina tonda bejn 60 sa 80 gramma tadam imqaxxar u mqatta' biċċiet żħar; |
— |
b'moviment spirali xerred it-tadam mal-parti tan-nofs kollha; |
— |
b'moviment spirali żid il-melħ fuq it-tadam |
— |
poġġi minn 80 sa 100 g Mozzarella STG mqatta' biċċiet minn qabel fuq it-tadam; |
— |
fuq il-pizza poġġi xi weraq tal-ħabaq frisk; |
— |
b'kontenitur taż-żejt li jkollu żennuna u b'moviment spirali, ibda xerred minn 4 sa 5 g żejt extra verġni taż-żebbuġa min-nofs 'il barra, liema ammont jista' jiżdied b'20 %. |
Sajran
Il-“pizzaiolo” (il-pizzar) ipoġġi l-pizza bil-mili fuq pala tal-injam (jew tal-aluminju) bl-għajnuna ta' ftit dqiq li jxerrdu b'moviment rotatorju u jżerżaqha fil-forn b'moviment ħafif tal-polz sabiex il-mili ma jiġrix. Is-sajran tal-“Pizza Napoletana” STG isir biss fi fran tal-ħatab, fejn tintlaħaq temperatura ta’ sajran ta' 485°C, essenzjali biex tinkiseb il-“Pizza Napoletana” STG.
Il-pizzar għandu jiċċekkja s-sajran tal-pizza billi jgħolliha mill-ġenb, permezz ta' pala tal-metall, u jċaqlaq il-pizza lejn in-nar, billi juża l-istess qiegħa fil-forn li intużat qabel, sabiex id-differenza fit-temperaturi ma taħraqx il-pizza. Importanti li l-pizza tissajjar b'mod uniformi mad-dawra taċ-ċirkonferenza kollha.
Dejjem permezz ta' pala tal-metall, fi tmiem is-sajran, il-pizzar joħroġ il-pizza mill-forn u jpoġġiha fuq platt tal-ikel. Il-ħin tas-sajran ma għandux jieħu iktar minn 60 sa 90 sekonda.
Wara li ssir, il-pizza għandu jkollha l-karatteristiċi li ġejjin: it-tadam, meta jitlef biss l-ilma żejjed tiegħu, jibqa' magħqud u solidu; il-Mozzarella di Bufala Campana DPO jew il-Mozzarella STG tidher maħlula fuq il-pizza; kemm il-ħabaq kif ukoll it-tewm u r-riegnu jiksbu aroma intensiva, u ma jidhrux maħruqin.
— |
It-temperatura ta' sajran fil-qiegħa tal-forn: bejn wieħed u ieħor 485 °C |
— |
It-temperatura mal-ħnejja tal-forn: bejn wieħed u ieħor 430 °C |
— |
Il-ħin tas-sajran: minn 60 sa 90 sekonda |
— |
It-temperatura li tilħaq l-għaġina: 60–65 °C |
— |
It-temperatura li jilħaq it-tadam: 75–80 °C |
— |
It-temperatura li jilħaq iż-żejt: 75–85 °C |
— |
It-temperatura li tilħaq il-mozzarella: 65–70 °C |
Preżervazzjoni
Idealment il-“Pizza Napoletana” tittiekel malli tinħareġ mill-forn, fl-istess post fejn tkun saret. Madankollu, jekk mhux possibbli li tiġi kkunsmata fuq il-post fejn saret, ma għandhiex titpoġġa fil-friża jew tiġi ffriżata jew tiġi ssiġillata f'kontenitur mingħajr arja biex tiġi mibjugħa aktar tard.
3.7. In-natura speċifika tal-prodott agrikolu u tal-ikel
L-elementi l-aktar fundamentali li jiddefinixxu n-natura speċifika tal-prodott imsemmi huma bosta u direttament marbutin mal-ħin u l-mod kif jinħadem, kif ukoll mal-ħila u l-esperjenza ta' min qed jaħdmu.
B'mod partikulari, il-proċess ta' kif tiġi maħduma l-“Pizza Napoletana” huwa kkaratterizzat minn: it-taħlita, il-konsistenza u l-elastiċità tal-għaġina (reologia) u t-tip partikolari ta' teħmir (fuq żewġ fażijiet b’kundizzjonijiet speċifiċi skont it-temperatura u l-ħin); it-tħejjija u l-iffurmar tal-għaġina f’għamla ta’ ħobżiet żgħar; It-tħaddim u t-tħejjija tal-għaġina tonda li tkun għoliet bil-ħmira; it-tħejjija tal-forn u l-karatteristiċi tas-sajran (it-tul ta’ żmien/it-temperatura); dak li jikkaratterizza l-forn li bilfors għandu jkun tal-ħatab.
Bħala eżempju għandha tiġi enfasizzata l-importanza tat-tieni proċess ta' teħmir, u tat-tħaddim u l-għodda li tintuża, jiġifieri il-forn, li bilfors irid ikun tal-ħatab, u l-paliet.
Wara t-tieni proċess ta' teħmir, l-ħobża tal-għaġina għandha tiżdied fil-volum u fl-umdità meta mqabbla ma' qabel. Meta min qed jaħdimha jagħmel pressjoni bis-swaba' taż-żewġ idejn, il-forza ta' dan il-moviment toħloq ċaqliq tal-arja li tinsab fil-bżieżaq tal-arja tal-għaġina min-nofs 'il barra tal-għaġina tonda u b'hekk jiġi ffurmat ix-xifer imtella’ tal-pizza. Din it-teknika tirrappreżenta karatteristika fundamentali tal-“Pizza Napoletana” STG għax ix-xfar imtellgħin jiżguraw li l-ingredjenti tal-mili jibqgħu kollha ġewwa u ma joħorġux. Sabiex l-għaġina tikseb dijametru ikbar, il-pizzar ikompli bit-tħejjija billi jħabbat l-għaġina bejn idejh b’ritmu mgħaġġel filwaqt li jżomm idu l-leminija f’pożizzjoni mmejla ta’ 45÷60 grad mal-wiċċ li fuqu tkun qed tinħadem l-għaġina. L-għaġina tonda titqiegħed fuq dan il-wiċċ u ddur b’moviment sinkronizzat tal-id ix-xellugija.
Mill-banda l-oħra, jekk l-għaġina tinħadem mod ieħor, bl-użu ta’ xi lembuba jew xi magna li taqta' l-għaġina tonda (bħal makkinarju li jippressa l-għaġina), ma jkunx possibbli li ċ-ċaqliq ’il barra tal-arja fil-bżieżaq li jkunu fl-għaġina jsir b'mod omoġenju bl-iskop li tinħoloq għaġina tonda li tkun uniformi fil-partijiet kollha tagħha. B'dan il-mod, fin-nofs tal-għaġina tonda, jiġu ffurmati livelli differenti ta’ għaġina li tifridhom l-arja li jkun hemm fix-xquq tal-għaġina. Għaldaqstant, jekk jintużaw dawn il-metodi, il-pizza ma jkollhiex ix-xifer imtella’ tipiku tagħha wara li tkun saret, u dan huwa meqjus bħala waħda mill-karatteristiċi prinċipali tal-“Pizza Napoletana” STG.
Barra minn hekk, it-teknika Naplitana titlob li l-pizzar, wara li jkun ħejja minn tlieta sa sitt biċċiet ta' għaġina tonda lesti bil-mili, b'moviment tal-idejn preċiż u ħafif, ipoġġi b'ħila kbira l-pizza minn fuq il-wiċċ fejn qed jaħdimha għal fuq il-pala, b'tali mod li din ma titlifx il-forma tonda oriġinali tagħha (din tiżżerżaq bil-mod mill-pizzar b'idejh it-tnejn, u, wara li jdawwarha fuqha nnifisha bejn wieħed u ieħor b'90°, ipoġġiha fuq pjanċa biex iserviha). Il-pizzar ixerred ftit dqiq fuq il-pjanċa li ħa jdaħħal fil-forn, biex b'hekk il-pizza tkun tista' tiżżerżaq faċilment minn fuq il-pala għal ġol-forn. Dan isir b'moviment ħafif tal-polz, filwaqt li jżomm il-pala f'angolatura ta' 20-25° meta mqabbla mal-livell tal-istess forn biex il-mili ma jaqax minn fuq il-pizza.
It-teknika li hija differenti mid-deskrizzjoni li ngħatat hawn fuq mhix xierqa minħabba li t-teħid tal-pizza direttament bil-pala minn fuq il-wiċċ li fuqu tkun inħadmet ma jiggarantix li l-pizza li se tinħema fil-forn se tibqa’ sħiħa.
Il-forn tal-ħatab huwa ta' importanza fundamentali għas-sajran u l-kwalità tal-“Pizza Napoletana”. Il-karatteristiċi tekniċi li jagħżluha minn oħrajn huma marbutin b'mod assolut mas-suċċess tal-“Pizza Napoletana” klassika. Il-forn Naplitan tal-pizza huwa magħmul minn bażi ta' ġebel tat-tufu, li jibqa' tiegħla fuq livell għat-tond imsejjaħ qiegħ, li fuqu tiġi mibnija speċi ta' koppla. Il-ħnejja tal-forn hija magħmula minn materjal rifrattiv li ma jħallix is-sħana tixtered. Fil-fatt, il-proporzjon ta' bejn il-partijiet differenti tal-forn huma essenzjali biex il-pizza ssir bl-aħjar mod. Ir-referenza għat-tip ta' forn huwa rrappreżentat mill-wisa' tal-qiegħ, iffurmat minn erba' sezzjonijiet ċirkolari rifrattivi li jiffurmawh. Il-pizza tiġi mgħollija b'pala tal-azzar u/jew tal-aluminju u mwassla sal-bokka tal-forn, fejn din titpoġġa u tiġi mdawra b'180°; il-pizza terġa' titpoġġa fl-istess post, b'tali mod li tikseb it-temperatura tal-qiegħ li tonqos mis-sħana li tkun ħadet il-pizza waqt is-sajran.
Jekk il-pizza titpoġġa f'post differenti, din terġa' tikseb it-temperatura tal-bidu, u b'hekk tispiċċa tinħaraq minn taħt.
Dawn il-karatteristiċi kollha jiddeterminaw il-fenomenu tal-arja li jkun hemm fil-pizza u l-aspett viżiv tal-prodott finali, il-“Pizza Napoletana” li fil-fatt hija ratba u kumpatta; Bix-xifer imtella’, bil-ħmira fuq ġewwa li għolliet l-għaġina, li hija partikolarment ratba u faċli tintlewa f’erbgħa. Importanti li jiġi enfasizzat li l-prodotti simili l-oħra li jinkisbu bi proċeduri ta’ tħejjija differenti minn dak deskritt ma jistax ikollhom l-istess karatteristiċi viżivi u organolettiċi tal-“Pizza Napoletana”.
3.8. L-aspett tradizzjonali tal-prodott agrikolu u tal-ikel
Tista' tgħid li l-“Pizza Napoletana” tmur lura għall-perjodu storiku ta' bejn l-1715 u l-1725. Vincenzo Corrado, il-kok ġenerali tal-Prinċep Emanuele ta' Francavilla, fi trattat fuq l-ikel l-aktar użat f'Napli, jiddikjara li t-tadam jintuża biex iħawwar il-pizza u l-imqarrun, bħala karatteristika komuni ta' żewġ prodotti li maż-żmien għamlu l-fortuna ta' Napli u poġġewha fl-istorja tat-tisjir. Ma' dan huwa marbut il-bidu uffiċjali tal-“Pizza Napoletana”, għaġina tonda mħawra bit-tadam.
Id-dokumenti storiċi li jiċċertifikaw l-oriġini Naplitana ta’ din l-ispeċjalità kulinarja huma bosta. B’dan il-mod il-kittieb Franco Salerno jiddikjara li dan il-prodott huwa wieħed mill-ikbar invenzjonijiet tal-ikel Naplitan.
Saħansitra d-dizzjunarji tal-lingwa Taljana u l-enċiklopedija Treccani jitkellmu speċifikament fuq il-“Pizza Napoletana”. L-espressjoni “Pizza Napoletana” hija wkoll ikkwotata f'bosta testi tal-letteratura.
Bla dubju, l-ewwel “pizzerie” (pizzeriji) bdew f'Napli u, sal-ewwel nofs tas-seklu għoxrin l-prodott kien jeżisti biss f'Napli u fil-pizzeriji. Mis-seklu XVIII kien hemm bosta ħwienet bl-isem “pizzeria” li kienu attivi fil-belt. Ir-reputazzjoni tagħhom waslet saħansitra għand ir-Re ta' Napli, Ferdinandu ta’ Bourbon li, biex iduq dan il-platt tipiku tat-tradizzjoni Naplitana, ma rrispettax l-etikett monarkiku u daħal f'waħda mill-pizzeriji l-aktar famużi. Minn dak il-ħin il-“pizzeria” saret l-iktar post tal-moda, post iddedikat biss għat-tħejjija tal-“pizza”. Il-pizez l-aktar popolari u famużi f'Napli kienu l-“Marinara” li bdiet fl-1734 u l-“Margherita” fl-1796 - 1810, li ġiet offruta lir-Reġina tal-Italja meta din żaret Napli fl-1889 proprju minħabba l-kulur tal-ħwawar tagħha (tadam, mozzarella u ħabaq) li jfakkru l-kuluri tal-bandiera Taljana.
Maż-żmien, il-pizzeriji bdew jidhru fl-ibliet kollha tal-Italja kif ukoll f'pajjiżi oħra. Madankollu, dawn il-pizzeriji, għalkemm ma kinux ġewwa Napli, baqgħu jsemmu din il-belt permezz tal-frażi “pizzeria napoletana” jew inkella użaw xi terminu li b’xi mod seta’ jfakkar ir-rabta tagħhom ma’ Napli, fejn, kważi għal 300 sena, dan il-prodott baqa’ awtentiku.
Fix-xahar ta' Mejju tal-1984, kważi l-pizzara Naplitani ħejjew speċifikazzjoni qasira ffirmata minnhom kollha u rreġistrata bħala att uffiċjali għand in-nutar Antonio Carannante ta' Napli.
Matul is-sekli, il-kelmiet “Pizza Napoletana” tant xterdu li kullimkien, anke barra mill-Ewropa, fl-Amerka tan-Nofs u t’Isfel (bħall-Messiku u l-Gwatemala) u fl-Ażja (bħat-Tajlandja u l-Malażja), dan il-prodott baqa’ magħruf bħala “Pizza Napoletana” anke jekk in-nies tal-post saħanistra lanqas għandhom idea tal-lokalità ġeografika tal-belt ta' Napli.
3.9. Ir-rekwiżiti minimi meħtieġa u l-proċeduri ta' kontroll tan-natura speċifika tal-prodott
Il-kontrolli maħsubin għall-STG “Pizza Napoletana” jirrigwardaw l-aspetti li ġejjin:
il-kumpaniji, waqt il-fażi tat-tagħġin, tat-teħmir tat-tħejjija tal-pizza, għandhom isegwu l-proċedura u s-sekwenza korretti tal-fażijiet deskritti; filwaqt li jikkontrollaw bir-reqqa l-punti kruċjali tal-kumpaniji; jiċċekkjaw li l-materja prima tikkonforma ma’ dik deskritta fl-ispeċifikazzjonijiet tal-eżekuzzjoni; jiċċekkjaw li l-materja prima li se tiġi użata tkun ippreżervata u maħżuna bl-aħjar mod u jiġi ċċekkjat li l-karatteristiċi tal-prodott finali jkunu konformi ma' dak li hu previst fl-ispeċifikazzjonijiet tal-produzzjoni.
3.10. Il-logo
L-akronimu STG (GTS), u l-frażijiet “Specialità Tradizionale Garantita” (Speċjalità Tradizzjonali Garantita) u “Prodotta seconda la tradizione napoletana” (Prodotta skont it-tradizzjoni Naplitana) huma tradotti bil-lingwi uffiċjali tal-pajjiż fejn issir il-produzzjoni.
Il-logo li jikkaratterizza l-“Pizza Napoletana” huwa kif ġej: stampa ovali orizzontali ta' lewn abjad b'bordura griża ċara, qed tirrappreżenta l-platt li fuqu titpoġġa l-pizza, li tidher b'mod realistiku u fl-istess ħin id-disinn huwa stilizzat u jirrispetta bis-sħiħ it-tradizzjoni filwaqt li jidhru l-ingredjenti klassiċi li huma t-tadam, il-mozzarella, il-weraq tal-ħabaq u qatra żejt taż-żebbuġa.
Taħt il-platt, hemm l-effett ta' dell ta’ lewn aħdar ħiereġ ’il barra, li, flimkien mal-kuluri l-oħra, jagħti rpominenza lill-kuluri Taljani fejn oriġina l-prodott.
Kemm kemm sovrapposta quddiem il-platt li fih il-pizza, tidher tieqa rettangolari ta' lewn aħmar bil-kantunieri għat-tond, li fiha hemm miktub b'ittri bojod imdawra bl-iswed, b'dell aħdar ħiereġ 'il barra u b'bordura bajda l-kliem: “PIZZA NAPOLETANA” STG. Fuq din il-kitba, 'il fuq u kemmxejn lejn il-lemin, miktubin b'tipa iżgħar, differenti u bajda, hemm miktub “Specjalità Tradizzjonali Garantita” (Speċialità Tradizionale Garantita) Iktar ’l isfel, fin-nofs, bl-istess tipa tal-logo, PIZZA NAPOLETANA STG, b'ittri kapitali ta' daqs żgħir, miktubin bl-abjad u b'bordura sewda hemm dan il-kliem sovrappost: “Prodotta skont it-tradizzjoni Naplitana” (Prodotta seconda la tradizione napoletana).
Marki |
Tipa |
PIZZA NAPOLETANA STG |
Varga |
Speċjalità Tradizzjonali Garantita |
Alternate Gothic |
Prodotta skont it-tradizzjoni Naplitana |
Varga |
L-ilwien tal-pizza |
PantoneProSim |
C |
M |
Y |
K |
Beige skur tal-bordura |
466 |
11 |
24 |
43 |
0 % |
Aħmar skur taz-zalza tat-tadam |
703 |
0 % |
83 |
65 |
18 |
Weraq tal-ħabaq |
362 |
76 |
0 % |
100 |
11 |
Il-vini tal-weraq tal-ħabaq |
562 |
76 |
0 % |
100 |
11 |
L-aħmar tat-tadam |
032 |
0 % |
91 |
87 |
0 % |
Qatra żejt taż-żebbuġa |
123 |
0 % |
31 |
94 |
0 % |
Mozzarella |
600 |
0 % |
0 % |
11 |
0 % |
Riflessi fuq il-mozzarella |
5 807 |
0 % |
0 % |
11 |
9 |
L-ilwien tal-parti grafika u tat-tipa |
PantoneProSim |
C |
M |
Y |
K |
Il-griż tal-bordura tal-platt ovali |
P.Grey – 3CV |
0 % |
0 % |
0 % |
18 |
L-aħdar tad-dell tal-platt ovali |
362 |
76 |
0 % |
100 |
11 |
L-aħmar tar-rettangolu bil-kantunieri għat-tond |
032 |
0 % |
91 |
87 |
0 % |
Il-frażi bajda bil-bordura sewda “PIZZA NAPOLETANA” STG |
|
0 % |
0 % |
0 % |
0 % |
Il-frażi bajda bil-bordura sewda “Prodotta skont it-tradizzjoni Naplitana” |
|
0 % |
0 % |
0 % |
0 % |
Il-frażi bl-abjad “Speċjalità Tradizzjonali Grantita” |
|
0 % |
0 % |
0 % |
0 % |
4. L-AWTORITAJIET U L-ENTITAJIET GĦALL-VERIFIKA TAL-OSSERVANZA TAL-ISPEĊIFIKAZZJONIJIET
4.1. Isem u indirizz
Isem |
: |
Certiquality SRL |
Indirizz |
: |
Via Gaetano Giardino, 4 – 20123 Milano |
Tel. |
: |
028069171 |
Feks |
: |
0286465295 |
Posta elettronika |
: |
certiquality@certiquality.it |
|
Pubbliku |
X |
Privat |
Isem |
: |
DNV Det Norske Veritas Italia |
Indirizz |
: |
Centro Direzionale Colleoni Viale Colleoni, 9 Palazzo Sirio 2 – 20041 Agrate Brianza (MI) |
Tel. |
: |
+39 0396899905 |
Feks |
: |
+39 0396899930 |
Posta elettronika |
: |
— |
|
Pubbliku |
X |
Privat |
Isem |
: |
ISMECERT |
Indirizz |
: |
Corso Meridionale, 6 - 80143 NAPOLI |
Tel. |
: |
0815636647 |
Feks |
: |
0815534019 |
Posta elettronika |
: |
info@ismecert.com |
|
Pubbliku |
X |
Privat |
4.2. Kompiti speċifiċi tal-awtorità jew tal-entità
It-tliet entitajiet tal-kontroll imsemmijin qabel, jagħmlu l-kontrolli fuq persuni differenti li joperaw fiż-żoni differenti tat-territorju nazzjonali.