1.

It-terminu ‘titjira’ ifisser settur wieħed ta’ titjira, jiġifieri titjira jew serje ta’ titjiriet li jibdew mill-post tal-parkeġġ tal-inġenju tal-ajru u jispiċċaw fil-post tal-parkeġġ tal-inġenju tal-ajru.

2.

It-terminu ‘ajrudrom’ ifisser żona definita ta’ art jew ilma, li tinkludi l-bini, l-installazzjonijiet u t-tagħmir, intenzjonata sabiex tintuża kollha jew parti minnha għall-wasla, it-tluq u l-moviment fis-superfiċi tal-inġenju tal-ajru.

3.

Jekk operatur tal-inġenju tal-ajru jagħmel attività tal-avjazzjoni elenkata fl-Anness I għad-Direttiva 2003/87/KE, din tidħol taħt l-iskema tal-Komunità indipendentament jekk hijiex fuq il-lista tal-operaturi tal-inġenji tal-ajru ppubblikata mill-Kummissjoni skont l-Artikolu 18a(3) tad-Direttiva 2003/87/KE.

4.

Taħt il-kategorija tal-attività ‘Avjazzjoni’, l-Anness I għad-Direttiva 2003/87/KE jelenka liema tipi ta’ titjiriet huma eżentati mill-iskema tal-Komunità.

5.

Din l-eżenzjoni se tkun interpretata skont l-iskop esklussiv tat-titjira.

6.

Il-familja immedjata tinkludi esklussivament il-persuna kkonċernata, kwalunkwe sieħeb/sieħba kkunsidrat/a ekwivalenti tal-persuna kkonċernata, it-tfal u l-ġenituri.

7.

Il-Ministri tal-Gvern huma membri tal-gvern kif elenkat fil-ġurnal uffiċjali nazzjonali tal-pajjiż ikkonċernat. Il-membri tal-gvernijiet reġjonali jew lokali ta’ pajjiż ma jikkwalifikawx għal eżenzjoni taħt dan is-subparagrafu.

8.

Missjoni uffiċjali tfisser missjoni fejn il-persuna kkonċernata qed topera f’kapaċità uffiċjali.

9.

It-titjiriet għall-ippożizzjonar jew it-tressiq tal-inġenju tal-ajru mhumiex koperti b’din l-eżenzjoni.

10.

It-titjiriet li l-Uffiċju tal-Imposti tar-Rotta Ċentrali tal-Eurocontrol, identifika għall-applikabbiltà tal-eżenzjoni tal-imposti tar-rotta (minn issa ‘il quddiem ‘kodiċi ta’ eżenzjoni CRCO’) bħala ‘S’ qed jiġi preżunt li huma titjiriet li saru esklussivament għat-trasport, ta’ missjoni uffiċjali, ta’ Monarka sovran u l-familja immedjata tiegħu, il-Kapijiet ta’ Stat, il-Kapijiet ta’ Gvern u l-Ministri ta’ Gvern issostanzjati b’indikatur tal-istatus xieraq fil-pjan tat-titjira.

11.

Titjiriet militari ifissru titjiriet direttament relatati mal-aġir tal-attivitajiet militari.

12.

It-titjiriet militari li jsiru minn inġenji tal-ajru rreġistrati ċivili mhumiex koperti minn din l-eżenzjoni. Bl-istess mod, it-titjiriet ċivili li jsiru minn inġenji tal-ajru militari mhumiex eżentati taħt is-subparagrafu (b).

13.

It-titjiriet bil-kodiċi ta’ eżenzjoni CRCO ‘M’ jew ‘X’ qed jiġi preżunt li huma titjiriet militari eżentati.

14.

Id-dwana u t-titjiriet tal-pulizija li jsiru kemm mill-inġenji tal-ajru rreġistrati ċivili u dawk militari huma eżentati.

15.

It-titjiriet bil-kodiċi ta’ eżenzjoni ‘P’ tas-CRCO qed jiġi preżunt li huma titjiriet tad-dwana jew tal-pulizija eżentati.

16.

B’relazzjoni mal-kategoriji tat-titjiriet imsemmija hawn isfel, it-titjiriet għall-ippożizzjonar jew it-tressiq tal-inġenju tal-ajru u t-titjiriet li qed iġorru esklussivament tagħmir jew persunal direttament involut fil-provediment tas-servizzi relatati huma koperti bl-eżenzjoni. Barra minn hekk, dawn l-eżenzjonijiet ma jagħmlux differenza bejn it-titjiriet magħmula permezz tal-użu tar-riżorsi pubbliċi jew privati.

17.

It-titjiriet relatati mat-tiftix u s-salvataġġ ifissru titjiriet li joffru servizzi ta’ tiftix u salvataġġ. Servizz ta’ tiftix u salvataġġ ifisser il-prestazzjoni ta’ monitoraġġ tal-periklu, komunikazzjoni, koordinazzjoni u funzjonijiet ta’ tiftix u salvataġġ, għajnuna medika inizjali jew evakwazzjoni medika, bl-użu ta’ riżorsi pubbliċi jew privati, inkluż inġenji tal-ajru li jikkoperaw, bastimenti u inġenji u installazjonijiet oħra.

18.

Titjiriet bil-kodiċi tal-eżenzjoni CRCO “R” u titjiriet identifikati bl-STS/SAR fiż-żona 18 tal-pjan tat-titjira qed jiġi preżunt li huma titjiriet tat-tiftix u s-salvataġġ eżentati.

19.

It-titjiriet tat-tifi tan-nar ifissru titjiriet li jsiru esklussivament sabiex jipprovdu servizzi fl-ajru tat-tifi tan-nar, li jfisser l-użu ta’ inġenju tal-ajru u servizzi oħra fl-ajru sabiex jikkontrollaw in-nirien.

20.

It-titjiriet identifikati bl-STS/FFR fiż-żona 18 tal-pjan tat-titjira qed jiġi preżunt li huma titjiriet tat-tifi tan-nar eżentati.

21.

It-titjiriet umanitarji ifissru titjiriet li joperaw esklussivament għal skopijiet umanitarji li jġorru persunal tal-għajnuna u materjali tal-għajnuna bħall-ikel, ħwejjeġ, ilqugħ, mediċini u affarijiet oħra matul jew wara emerġenza u/jew diżastru u/jew jintużaw sabiex jevakwaw il-persuni minn post fejn il-ħajja jew is-saħħa tagħhom hija mhedda minn din l-emerġenza u/jew fejn hemm diżastru lejn post sikur fl-istess Stat jew Stat ieħor li huwa lest jirċievi dawn il-persuni.

22.

Titjiriet bil-kodiċi tal-eżenzjoni CRCO ‘H’ u titjiriet identifikati bl-STS/HUM fiż-żona 18 tal-pjan tat-titjira qed jiġi preżunt li huma titjiriet umanitarji eżentati.

23.

It-titjiriet tas-servizz mediku ta’ emerġenza ifissru titjiriet li l-għan esklussiv huwa li jiffaċilitaw l-assistenza għall-emerġenza medika, fejn it-trasportazzjoni immedjata u ta’ malajr hija essenzjali, billi jġorru l-persunal mediku, l-affarijiet mediċi, inkluż it-tagħmir, id-demm, l-organi, il-mediċini, jew persuni morda jew imweġġgħa u persuni oħra involuti direttament.

24.

It-titjiriet identifikati bl-STS/MEDEVAC jew STS/HOSP fiż-żona 18 tal-pjan tat-titjira qed jiġi preżunt li huma titjiriet tas-servizz mediku ta’ emerġenza eżentati.

25.

Titjiriet bil-kodiċi tal-eżenzjoni CRCO ‘T’ u titjiriet identifikati bl-RMK/“Training flight” (Titjira ta’ taħriġ) fiż-żona 18 tal-pjan tat-titjira qed jiġi preżunt li huma eżentati taħt is-subparagrafu (f).

26.

B’relazzjoni mal-kategoriji tat-titjira hawn isfel, it-titjiriet għall-ippożizzjonar jew it-tressiq tal-inġenju tal-ajru mhumiex koperti.

27.

Din il-kategorija teżenta t-titjiriet li l-uniku skop tagħhom huwa li jagħmlu r-riċerka xjentifika. Ir-riċerka xjentifika trid issir parzjalment jew kollha waqt it-titjira sabiex tapplika l-eżenzjoni. It-trasport tax-xjentisti jew it-tagħmir tar-riċerka mhuwiex minnu nnifsu suffiċjenti sabiex titjira tiġi eżentata.

28.

Titjiriet bil-kodiċi tal-eżenzjoni CRCO ‘N’ u titjiriet identifikati bl-STS/FLTCK fiż-żona 18 tal-pjan tat-titjira qed jiġi preżunt li huma titjiriet eżentati taħt is-subparagrafu (g).

29.

L-eżenzjoni tat-titjiriet obbligatorji tas-servizz pubbliku (PSO) ġewwa l-iżjed reġjuni mbiegħda se tkun interpretata li se tapplika għar-reġjuni elenkati fl-Artikolu 299(2) tat-Trattat tal-KE u tinkludi esklussivament titjiriet tal-PSO ġewwa reġjun wieħed imbiegħed u titjiriet bejn żewġ reġjuni l-iżjed imbiegħda.

30.

L-operaturi kollha tat-trasport tal-ajru jrid ikollhom ċertifikat ta’ operatur tal-ajru (AOC) taħt il-Parti I tal-Anness 6 għall-Konvenzjoni ta’ Chicago. L-operaturi li ma għandhomx dan iċ-ċertifikat mhumiex “operaturi kummerċjali tat-trasport bl-ajru”.

31.

Għall-applikazzjoni tar-regola de minimis, il-karatteristika li tkun kummerċjali hija marbuta mal-operatur u mhux it-titjiriet konċernati. Dan partikolarment ifisser li t-titjiriet pprovduti minn operatur kummerċjali għandhom jitqiesu sabiex tittieħed deċiżjoni jekk l-operatur jaqax fil-kategorija ta’ fuq jew ta’ taħt il-limiti tal-eżenzjoni anke jekk dawk it-titjiriet mhumiex provduti għar-rikompens.

32.

Se jitqiesu biss it-titjiriet li jitilqu jew jaslu f’ajrudrom li jinsab fit-territorju ta’ Stat Membru li għalih japplika t-Trattat għad-deċiżjoni dwar jekk l-operatur tal-inġenju tal-ajru jaqax fil-kategorija ta’ fuq jew ta’ taħt il-limiti ta’ eżenzjoni tar-regola de minimis. It-titjiriet eżentati taħt is-sottoparagrafi (a)-(j) mhux se jitqiesu għall-istess skopijiet.

33.

It-titjiriet magħmula minn operatur ta’ inġenju tal-ajru kummerċjali li jopera inqas minn 243 titjira għal kull perjodu għal tlett perjodi konsekuttivi ta’ erba’ xhur huma eżentati. Il-perjodi ta’ erba’ xhur huma: Jannar sa April; Mejju sa Awwissu; Settembru sa Diċembru. Il-ħin lokali tat-tluq tat-titjira jiddetermina f’liema perjodu ta’ erba’ xhur se titqies dik it-titjira sabiex tittieħed deċiżjoni jekk l-operatur tal-inġenju tal-ajru jaqax fil-kategorija ta’ fuq jew ta’ taħt il-limiti tal-eżenzjoni tar-regola de minimis.

34.

Operatur kummerċjali li jopera 243 titjira għal kull perjodu jew iktar huwa inkluż fl-iskema Komunitarja għas-sena kollha tal-kalendarju li fiha l-limitu ta’ 243 titjira jintlaħaq jew jinqabeż.

35.

Operatur kummerċjali li jopera titjiriet b’emissjonijiet totali annwali ugwali għal jew iktar minn 10 000 tunnellata kull sena huwa inkluż fl-iskema Komunitarja għas-sena kollha tal-kalendarju li fiha l-limitu ta’ 10 000 titjira jintlaħaq jew jinqabeż.