Prodotti relatati mad-difiża: regoli dwar it-trasferiment fi ħdan l-UE

 

SOMMARJU TA’:

Id-Direttiva 2009/43/KE — l-issimplifikar tat-termini u l-kundizzjonijiet tat-trasferimenti ta’ prodotti relatati mad-difiża fi ħdan l-UE

X’INHU L-GĦAN TAD-DIRETTIVA?

• L-għan tagħha huwa li telimina d-disparità bejn il-liġijiet u r-regoli tal-Istati Membri tal-Unjoni Ewropea (UE) dwar it-trasferiment ta’ prodotti relatati mad-difiża (li jvarjaw minn xkubetti, bombi u torpidows, għal sottomarini u ajruplani għall-użu militari).
• Din tistabbilixxi sistema ta’ awtorizzazzjoni bbażata fuq il-ħruġ ta’ liċenzji tat-trasferiment lill-fornituri.
• Hija tiffaċilita ċ-ċirkolazzjoni trasparenti u sikura ta’ prodotti relatati mad-difiża fl-UE, u b’hekk tgħin sabiex tingħata spinta lill-kompetittività tas-settur tad-difiża tal-UE.

PUNTI EWLENIN

Hemm tliet tipi ta’ liċenzji

• 1.

  Liċenzji ġenerali, maħruġa minn Stat Membru lil fornituri stabbiliti fit-territorju tiegħu (sakemm dawn jikkonformaw mal-kundizzjonijiet tal-liċenzji) u jitolbu li jittrasferixxu prodotti relatati mad-difiża lil riċevituri fi Stat Membru ieħor.

• 2.

  Liċenzji globali, li jingħataw minn Stat Membru (li jiddetermina l-ambitu u t-tul ta’ żmien) lil fornituri li jitolbu li jittrasferixxu prodotti lil riċevituri fi Stat Membru wieħed jew aktar.

• 3.

  Liċenzji individwali, li jingħataw minn Stat Membru lil fornituri li jitolbu trasferiment wieħed ta’ prodotti lil riċevitur wieħed.

L-obbligi tal-fornituri

• L-Istati Membri għandhom jiżguraw li l-fornituri ta’ prodotti relatati mad-difiża stabbiliti fit-territorju tagħhom:
  • Iżommu rekords dettaljati tat-trasferimenti tagħhom;
  • jinfurmaw lir-riċevituri dwar il-kundizzjonijiet tal-liċenzja (jiġifieri l-limitazzjonijiet li jikkonċernaw l-użu aħħari jew l-esportazzjoni ta’ prodotti relatati mad-difiża);
  • jinfurmaw lill-awtorità kompetenti tal-Istat Membru minn liema territorju fejn jixtiequ jittrasferixxu l-prodotti bl-intenzjoni tagħhom li jużaw liċenzja ġenerali għall-ewwel darba.
• L-Istati Membri li joqogħdu riċevituri ta’ prodotti relatati mad-difiża taħt liċenzji ta’ trasferiment iridu jiċċertifikaw li r-riċevituri huma responsabbli għall-osservanza tal-limitazzjonijiet tal-esportazzjoni tal-prodotti li jirċievu.

Il-prodotti relatati mad-difiża li tirreferi għalihom din id-direttiva huma elenkati fl-anness għad-direttiva. L-anness jiġi aġġornat b’mod regolari permezz ta’ atti delegati adottati mill-Kummissjoni Ewropea sabiex tkun tikkorrispondi mal-Lista Militari Komuni tal-Unjoni Ewropea. L-anness ġie aġġornat l-aktar riċentement mid-Direttiva Delegata 2023/277 fl-2023. Il-Kummissjoni taġġorna din il-lista regolarment sabiex tkun tikkorrispondi mal-lista militari komuni, li l-aktar reċenti tagħha tiddaħħal mit-28 ta’ Frar 2023.

MINN META JAPPLIKAW IR-REGOLI?

Id-direttiv kellha tiġi trasposta fil-liġi nazzjonali sat-30 ta’ Ġunju 2011.

Dawn ir-regoli għandhom japplikaw mit-30 ta’ Ġunju 2012.

Id-Direttiva Delegata (UE) 2023/277 għandha tiġi trasposta fil-liġi nazzjonali sal- 31 ta’ Mejju 2023 u r-regoli għandhom japplikaw mis-7 ta’ Ġunju 2023.

SFOND

Qabel id-Direttiva 2009/43/KE daħlet fis-seħħ, it-trasferiment ta’ prodotti relatati mad-difiża fi ħdan l-UE kien soġġett għal liġijiet ta’ liċenzjar nazzjonali. Dawn kienu jvarjaw b’mod konsiderevoli f’termini ta’ proċeduri, l-ambitu u ż-żmien meħtieġ biex jinkisbu l-liċenzji. Konsegwentement, il-kompetittività tas-settur tad-difiża Ewropew, kif ukoll l-istabbiliment ta’ suq Ewropew ġenwin ta’ prodotti tad-difiża kienu mxekkla.

Għal aktar informazzjoni, ara:

• Trasferimenti tal-UE ta’ prodotti relatati mad-difiża (il-Kummissjoni Ewropea).

DOKUMENT PRINĊIPALI

Id-Direttiva 2009/43/KE tal-Parlament Ewropew u tal-Kunsill tas-6 ta’ Mejju 2009 dwar l-issimplifikar tat-termini u l-kundizzjonijiet tat-trasferimenti ta’ prodotti relatati mad-difiża fil-Komunità (ĠU L 146, 10.06.2009, pp. 1–36).

Emendi u korrezzjonijiet suċċessivi għad-Direttiva 2009/43/KE u l-Annessi tagħha ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Id-Direttiva Delegata tal-Kummissjoni (UE) 2023/277 tal-5 ta’ Ottubru 2022 li temenda d-Direttiva 2009/43/KE tal-Parlament Ewropew u tal-Kunsill fir-rigward tal-aġġornament tal-lista ta’ prodotti relatati mad-difiża skont il-Lista Militari Komuni aġġornata tal-Unjoni Ewropea tal-21 ta’ Frar 2022 (ĠU L 42, 10.2.2023, pp. 1–39).

Lista Militari Komuni tal-Unjoni Ewropea (ĠU C 72, 28.2.2023, pp. 2–37).

l-aħħar aġġornament 15.02.2023