Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52015XC0321(02)

Linji gwida tad- 19 ta’ Marzu 2015 dwar il-valutazzjoni tar-riskju formalizzata għall-iżgurar ta' prattiki ta' manifattura tajba adatti għall-eċċipjenti ta' prodotti mediċinali għall-użu mill-bniedem Test b'rilevanza għaż-ŻEE

OJ C 95, 21.3.2015, p. 10–13 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

21.3.2015   

MT

Il-Ġurnal Uffiċjali tal-Unjoni Ewropea

C 95/10

Linji gwida

tad-19 ta’ Marzu 2015

dwar il-valutazzjoni tar-riskju formalizzata għall-iżgurar ta' prattiki ta' manifattura tajba adatti għall-eċċipjenti ta' prodotti mediċinali għall-użu mill-bniedem

(Test b'rilevanza għaż-ŻEE)

(2015/C 95/02)

Introduzzjoni

Dawn il-linji gwida huma msejsa fuq il-ħames paragrafu tal-Artikolu 47 tad-Direttiva 2001/83/KE (1).

Skont it-tieni paragrafu tal-Artikolu 46(f) tad-Direttiva 2001/83/KE, id-detentur tal-awtorizzazzjoni tal-manifattura huwa meħtieġ jiżgura li l-eċċipjenti jkunu adatti għall-użu fil-prodotti mediċinali billi jiżgura liema hija l-prattika ta’ manifattura tajba (GMP) adatta. Il-GMP adatta għal eċċipjenti ta’prodotti mediċinali għall-użu mill-bniedem għandha tiġi żgurata abbażi ta’ valutazzjoni tar-riskju formalizzata skont dawn il-linji gwida. Il-valutazzjoni tar-riskju għandha tikkunsidra r-rekwiżiti taħt sistemi ta’ kwalità oħra xierqa kif ukoll is-sors u l-użu maħsub tal-eċċipjenti u istanzi preċedenti ta’ difetti ta’ kwalità. Id-denetur tal-awtorizzazzjoni tal-manifattura għandu jiżgura li l-GMP adatta hija applikata. Id-detentur tal-awtorizzazzjoni tal-manifattura għandu jiddokumenta l-miżuri meħuda.

Il-proċedura tal-valutazzjoni tar-riskju/ġestjoni tar-riskju tal-eċċipjent għandha tkun inkorporata fis-sistema tal-kwalità farmaċewtika tad-detentur tal-awtorizzazzjoni tal-manifatura.

Id-detenturi tal-awtorizzazzjoni tal-manifattura għandu jkollhom id-dokumentazzjoni tal-valutazzjoni/ġestjoni tar-riskju għal GMP adatta tal-eċċipjenti disponibbli fuq il-post għal reviżjoni mill-ispetturi tal-GMP. Għandha tingħata konsiderazzjoni għall-qsim tal-informazzjoni mill-valutazzjoni tar-riskju mal-manifattur tal-eċċipjent biex jiġi ffaċilitat titjib kontinwu.

Valutazzjoni tar-riskju kif stabbilit f’dawn il-linji gwida għandha titwettaq għal eċċipjenti ta’ prodotti mediċinali awtorizzati għall-użu mill-bniedem mill-21 ta’ Marzu 2016.

KAPITOLU 1 — KAMP TA’ APPLIKAZZJONI

1.1.

Dawn il-linji gwida japplikaw għall-valutazzjoni tar-riskju biex jiġu żgurati GMP adatti għal eċċipjenti ta’ prodotti mediċinali għall-użu mill-bniedem. Skont l-Artikolu 1(3)(b) tad-Direttiva 2001/83/KE, eċċipjent huwa kwalunkwe kostitwenti ta’ prodott mediċinali għajr is-sustanza attiva u l-materjal tal-imballaġġ.

1.2.

Dawn il-linji gwida ma jkoprux sustanzi miżjuda biex jistabbilizzaw sustanzi attivi li ma jistgħux jeżistu waħedhom.

KAPITOLU 2 — DETERMINAZZJONI TA’ GMP ADATTA ABBAŻI TAT-TIP U L-UŻU TAL-EĊĊIPJENT

2.1.

F’EudraLex Volum 4, Guidelines for Good Manufacturing Practice, Medicinal Products for Human and Veterinary Use, Part III: GMP related documents, ICH guideline Q9 on Quality Risk Management (ICH Q9), wieħed jista’ jsib prinċipji u eżempji ta’ għodod għal ġestjoni tar-riskju ta’ kwalità li jistgħu jiġu applikati għal aspetti differenti ta’ kwalità farmaċewtika, inklużi l-eċċipjenti.

2.2.

Dawn il-prinċipji tal-ġestjoni tar-riskju tal-kwalità għandhom jintużaw biex jivvalutaw ir-riskji ppreżentati għall-kwalità, is-sikurezza u l-funzjoni ta’ kull eċċipjent u għall-klassifikazzjoni tal-eċċipjent inkwistjoni, pereżempju bħala ta’ riskju baxx jew ta’ riskju medju jew ta’ riskju għoli. L-għodod tal-ġestjoni tar-riskju tal-kwalità bħal dawk elenkati f’EudraLex Volum 4, Parti III, ICH Q 9 (eż. analiżi tal-periklu u l-punti kritiċi ta’ kontroll — HACCP) għandhom jintużaw għal dan il-għan.

2.3.

Għal kull eċċipjent minn kull manifattur użat, id-detentur tal-awtorizzazzjoni tal-manifattura għandu jidentifika r-riskji ppreżentati għall-kwalità, is-sikurezza u l-funzjoni ta’ kull eċċipjent mis-sors tiegħu — sew jekk ikun annimal, minerali, veġetali, sintetiku, eċċ. — permezz tal-inkorporazzjoni tiegħu fil-forma ta’ doża farmaċewtika lesta. Oqsma meqjusa għandhom jinkludu, iżda mhumiex limitati għal:

i.

enċefalopatiji sponġiformi li jittieħdu:

ii.

potenzjal għal kontaminazzjoni virali;

iii.

potenzjal ta’ kontaminazzjoni mikrobijoloġika jew ta’ endotossina/piroġena;

iv.

potenzjal, b’mod ġenerali, għal kwalunkwe impurità li toriġina mill-materja prima, eż. aflatossini jew pestiċidi, jew iġġenerata bħala parti mill-proċess u trasferita, eż. solventi residwi u katalisti;

v.

assigurazzjoni ta’ sterilità għall-eċċipjenti meqjusa sterili;

vi.

potenzjal għal kwalunkwe impurità riportata minn proċessi oħra, fin-nuqqas ta’ tagħmir u/jew faċilitajiet apposta;

vii.

kontroll ambjentali u kundizzjonijiet tat-trasport/ħażna inkluż il-ġestjoni tal-katina tal-kesħa, jekk ikun xieraq;

viii.

kumplessità tal-katina tal-provvista;

ix.

stabbiltà tal-eċċipjent;

x.

evidenza tal-integrità tal-imballaġġ.

2.4.

Barra minn hekk, fir-rigward tal-użu u l-funzjoni ta’ kull eċċipjent, id-dententur tal-awtorizzazzjoni tal-manifattura għandu jikkunsidra:

i.

il-forma farmaċewtika u l-użu tal-prodott mediċinali li jikkontjeni l-eċċipjent;

ii.

il-funzjoni tal-eċċipjent fil-formulazzjoni, eż. lubrikant f’prodott ta’ pilloli jew materjal preservattiv f’formulazzjoni likwida, eċċ.;

iii.

il-proporzjon tas-sustanza mhux attiva fil-kompożizzjoni tal-prodott mediċinali;

iv.

id-doża ta’ kuljum tal-eċċipjent tal-pazjent;

v.

kwalunkwe difetti ta’ kwalità magħrufa/adulterazzjonijiet frawdolenti, kemm globalment kif ukoll fil-livell ta’ kumpanija lokali li għandhom x’jaqsmu eċċipjent;

vi.

jekk l-eċċipjent huwiex kompost;

vii.

impatt magħruf jew potenzjali fuq l-attribwiti tal-kwalità kritika tal-prodott mediċinali;

viii.

fatturi oħra kif identifikati jew magħrufa li huma rilevanti biex tiġi żgurata s-sigurtà tal-pazjent.

2.5.

Wara li jkun stabbilixxa u ddokumenta l-profil tar-riskju tal-eċċipjent, id-detentur tal-awtorizzazzjoni tal-manifattura għandu jistabbilixxi u jiddokumenta l-elementi tal-EudraLex Volum 4 li huwa jemmen li huma meħtieġa li jiddaħħlu fis-seħħ sabiex jikkontrollaw u jżommu l-kwalità tal-eċċipjent, eż. l-Anness 1 jew/u l-Anness 2; Parti II: Rekwiżiti Bażiċi għal Sustanzi Attivi użati bħala Materjal tal-Bidu.

2.6.

Dawn l-elementi jvarjaw skont is-sors, il-katina tal-provvista u l-użu sussegwenti tal-eċċipjent, imma bħala minimu l-livell għoli li ġej tal-elementi tal-GMP għandu jitqies mid-detentur tal-awtorizzazzjoni tal-manifattura:

i.

stabbiliment u implimentazzjoni ta’ sistema effettiva ta’ kwalità farmaċewtika;

ii.

biżżejjed personal kompetenti u kkwalifikat kif jixraq;

iii.

deskrizzjonijiet tax-xogħol definiti għall-persunal maniġerjali u ta’ superviżjoni responsabbli mill-manifattura u l-attivitajiet ta’ kwalità;

iv.

programmi ta’ taħriġ għall-persunal kollu involut fil-manifattura u l-attivitajiet ta’ kwalità;

v.

programmi ta’ taħriġ dwar is-saħħa, l-iġjene u l-ilbies kif identifikati bħala neċessarji għall-operazzjonijiet ippjanati;

vi.

dispożizzjoni u manutenzjoni ta’ bini u tagħmir xieraq għall-operazzjonijiet ippjanati;

vii.

sistema/i ta’ dokumentazzjoni li jkopru l-proċessi kollha u l-ispeċifikazzjonijiet tal-operazzjonijiet varji ta’ manifattura u ta’ kwalità;

viii.

sistemi biex jiġu kkodifikati u identifikati l-materjali tal-bidu, is-sustanzi intermedji u l-eċċipjenti li jippermettu traċċabilità sħiħa;

ix.

programm ta’ kwalifikazzjoni tal-fornituri;

x.

sistema ta’ kontroll ta’ kwalità tas-sustanza mhux attiva u persuna responsabbli li tkun indipendenti mill-produzzjoni għar-rilaxx tal-lottijiet;

xi.

żamma ta’ rekords għal materjali u eċċipjenti li jidħlu u żamma ta’ kampjuni ta’ eċċipjenti għall-perjodi meħtieġa minn EudraLex Volum 4, Parti II;

xii.

sistemi li jiżguraw li kull attività mogħtija b’kuntratt tkun soġġetta għal kuntratt bil-miktub;

xiii.

manutenzjoni ta’ sistema effettiva li biha l-ilmenti jkunu riveduti u l-eċċipjenti jistgħu jiġu rtirati;

xiv.

sistema ta’ ġestjoni tat-tibdil u tad-devjazzjoni;

xv.

programm ta’ awtospezzjoni;

xvi.

kontroll ambjentali u kundizzjonijiet ta’ ħżin.

KAPITOLU 3 — DETERMINAZZJOINI TAL-PROFIL TAR-RISKJU TAL-MANIFATTUR TAL-EĊĊIPJENT

3.1.

Wara d-determinazzjoni tal-GMP adatta, għandha titwettaq analiżi tal-lakuni tal-GMP meħtieġa kontra l-attivitajiet u l-kapaċitajiet tal-manifattur tal-eċċipjent.

3.2.

Id-dejta jew l-evidenza li ssostni l-analiżi tad-differenzi għandha tinkiseb permezz ta’ verifika jew minn informazzjoni mibgħuta mill-manifattur tal-eċċipjent.

3.3.

Iċ-ċertifikazzjoni tas-sistemi tal-kwalità u/jew il-GMP miżmuma mill-manifattur tal-eċċipjent u l-istandards li fuqhom dawn ġew mogħtija għandhom jiġu kkunsidrati minħabba li tali ċertifikazzjoni tista’ tissodisfa r-rekwiżiti

3.4.

Kwalunkwe lakuna identifikata bejn il-GMP meħtieġa u l-attivitajiet u l-kapaċitajiet tal-manifattur tal-eċċipjent għandha tiġi dokumentata. Barra minn hekk, id-detentur tal-awtorizzazzjoni tal-manifattura għandu jwettaq valutazzjoni oħra tar-riskju, li tiddetermina l-profil tar-riskju, pereżempju, b’riskju baxx, riskju medju jew riskju għoli, għat-tali manifattur tal-eċċipjent. EudraLex Volum 4, Parti III, ICH Q 9 għandha tintużaw għal dan il-għan. Għodod ta’ kwalità tal-ġestjoni tar-riskju bħal dawk elenkati hemmhekk — HACCP, eċċ. — għandhom jintużaw għal dan.

3.5.

Id-detentur tal-awtorizzazzjoni tal-manifattura għandu jkollu serje ta’ strateġiji li jvarjaw mill-aċċettazzjoni permezz tal-kontroll sa profili differenti tar-riskju mhux aċċettabbli u abbażi ta’ dawn għandha tiġi stabbilita strateġija ta’ kontroll, eż. l-ivverifikar, il-ġbir u l-ittestjar ta’ dokumenti.

KAPITOLU 4 — KONFERMA TAL-APPLIKAZZJONI TAL-GMP ADATTA

4.1.

Ladarba jkunu identifikati l-GMP adatta għall-eċċipjent u l-profil tar-riskju tal-manifattur tal-eċċipjent, għandha ssir reviżjoni kontinwa tar-riskju permezz ta’ mekkaniżmi bħal:

i.

numru ta’ difetti konnessi ma’ lottijiet ta’ eċċipjenti riċevuti;

ii.

tip/ħruxija tat-tali difetti;

iii.

monitoraġġ u analiżi tat-tendenzi tal-kwalità tal-eċċipjent;

iv.

telf tas-sistema ta’ kwalità rilevanti u/jew iċ-ċertifikazzjoni tal-GMP mill-manifattur tal-eċċipjent;

v.

osservazzjoni tax-xejriet fl-attribwiti tal-kwalità tal-prodott mediċinali; dan jiddependi fuq in-natura u r-rwol tal-eċċipjent;

vi.

bidliet organizzattivi, proċedurali jew tekniċi/fil-proċess osservati fil-manifattur tal-eċċipjent;

vii.

verifika/verifika mill-ġdid tal-manifattur tal-eċċipjent;

viii.

kwestjonarji.

Abbażi tal-eżitu tal-analiżi tar-riskju, jekk ikun meħtieġ, għandha tiġi analizzata mill-ġdid jew reveduta l-istrateġija tal-kontroll stabbilita.

(1)  Id-Direttiva 2001/83/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (ĠU L 311, 28.11.2001, p. 67).

Top