Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52014XG0131(01)

Konklużjonijiet tal-Kunsill dwar id-dimensjoni globali tal-edukazzjoni għolja Ewropea

OJ C 28, 31.1.2014, p. 2–5 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

31.1.2014   

MT

Il-Ġurnal Uffiċjali tal-Unjoni Ewropea

C 28/2

Konklużjonijiet tal-Kunsill dwar id-dimensjoni globali tal-edukazzjoni għolja Ewropea

2014/C 28/03

IL-KUNSILL TAL-UNJONI EWROPEA,

BILLI:

1.

Id-Dikjarazzjoni ta' Bolonja tad-19 ta' Ġunju 1999 stabbilixxiet proċess intergovernattiv bil-għan li tinħoloq Żona Ewropea ta' Edukazzjoni Għolja (EHEA) li huwa appoġġat b'mod attiv mill-Unjoni Ewropea, u l-Ministri responsabbli għall-edukazzjoni għolja fil-pajjiżi parteċipanti, li ltaqgħu f'Bukarest f'April 2012, adottaw l-istrateġija Mobbiltà għal Tagħlim Aħjar 2020 għall-EHEA bħala parti integrali tal-isforzi biex tiġi promossa l-internalizzazzjoni tal-edukazzjoni għolja (1).

2.

Id-Direttiva tal-Kunsill 2004/114/KE (2) tat-13 ta' Diċembru 2004 dwar il-kondizzjonijiet ta' ammissjoni ta' ċittadini ta' pajjiżi terzi għal skopijiet ta' studju, skambju ta' studenti, taħriġ bla ħlas jew servizz volontarju tagħraf li wieħed mill-objettivi tal-azzjoni tal-Komunità fil-qasam tal-edukazzjoni huwa li l-Ewropa b'mod ġenerali tiġi promossa bħala ċentru dinji ta' eċċellenza għall-istudju u t-taħriġ vokazzjonali.

3.

Id-Direttiva tal-Kunsill 2005/71/KE (3) tat-12 ta' Ottubru 2005 dwar proċedura speċifika għall-ammissjoni ta' ċittadini ta' pajjiżi terzi għall-finijiet ta' riċerka xjentifika għandha għan simili, dak li tagħmel lill-Komunità aktar attraenti għal riċerkaturi minn madwar id-dinja u tagħti spinta lill-pożizzjoni tal-UE bħala ċentru internazzjonali għar-riċerka.

4.

L-istrateġija internazzjonali adottata fil-laqgħa ta' Mejju 2007 tal-ministri ta' Bolonja f'Londra (4) enfasizzat il-ħtieġa li ż-Żona Ewropea ta' Edukazzjoni Għolja tkun miftuħa u attraenti għal partijiet oħrajn tad-dinja, u li tissaħħaħ il-kooperazzjoni u d-djalogu ta' politika fl-edukazzjoni għolja ma' pajjiżi barra mill-Ewropa.

5.

Il-konklużjonijiet tal-Kunsill tat-12 ta' Mejju 2009 dwar qafas strateġiku għall-kooperazzjoni Ewropea fl-edukazzjoni u t-taħriġ enfasizzaw l-importanza tal-appoġġ tal-isforzi tal-Istati Membri biex jimmodernizzaw l-edukazzjoni għolja permezz ta' sinerġija mill-qrib mal-proċess ta' Bolonja, b'mod partikolari fir-rigward tal-assigurazzjoni tal-kwalità, ir-rikonoxximent, il-mobbiltà u l-istrumenti ta' trasparenza.

6.

L-Istrateġija Ewropa 2020 għal tkabbir intelliġenti, sostenibbli u inklussiv adottata f'Ġunju 2010 (5) stabbilixxiet l-objettiv li ttejjeb il-livelli tal-edukazzjoni, b'mod partikolari billi żżid il-proporzjon ta’ żgħażagħ li jkunu temmew b'suċċess l-edukazzjoni terzjarja jew ta’ livell ekwivalenti sa mill-inqas 40 % sal-2020.

7.

Il-konklużjonijiet tal-Kunsill tal-11 ta' Mejju 2010 dwar l-internalizzazzjoni tal-edukazzjoni għolja (6) enfasizzaw li programmi ta' kooperazzjoni internazzjonali u djalogi ta' politika ma' pajjiżi terzi fil-qasam tal-edukazzjoni għolja mhux biss jippermettu li l-għarfien jasal b'aktar libertà, iżda wkoll jikkontribwixxu biex jissaħħu l-kwalità u l-isem internazzjonali tal-edukazzjoni għolja Ewropea, biex jagħtu spinta lir-riċerka u l-innovazzjoni, jitrawmu l-mobbiltà u d-djalogu interkulturali, kif ukoll jiġi promoss l-iżvilupp internazzjonali f'konformità mal-objettivi tal-politika esterna tal-UE.

8.

Il-konklużjonijiet tal-Kunsill tat-28-29 ta' Novembru 2011 dwar punt ta’ riferiment għall-mobbiltà għat-tagħlim (7) stabbilixxew punt ta' riferiment li skontu medja tal-UE ta' mill-inqas 20 % ta' gradwati fl-edukazzjoni għolja għandhom, sal-2020, ikollhom perjodu ta' studju jew taħriġ marbut mal-edukazzjoni għolja (inkluż taħriġ fuq post tax-xogħol) barra.

9.

Il-konklużjonijiet tal-Kunsill tat-28-29 ta' Novembru 2011 dwar il-modernizzazzjoni tal-edukazzjoni għolja laqgħu l-intenzjoni tal-Kummissjoni li tiżviluppa strateġija internazzjonali tal-UE għall-edukazzjoni għolja bil-għan li jiżdiedu l-għoti ta' informazzjoni u l-viżibbiltà internazzjonali, u tinvolvi ruħha ma' sħab bil-ħsieb li ssaħħaħ ir-relazzjonijiet u żżid il-bini tal-kapaċità fis-settur tal-edukazzjoni għolja.

U FID-DAWL TA':

Il-konferenza tal-Presidenza dwar l-Edukazzjoni Għolja Ewropea fid-Dinja li saret f'Vilnjus fil-5-6 ta' Settembru 2013, li ssottolinjat il-ħtieġa li l-Istati Membri u l-istituzzjonijiet tal-edukazzjoni għolja jiżviluppaw strateġiji komprensivi ta' internalizzazzjoni li:

—

jtejbu l-kwalità u l-kompetittività tal-edukazzjoni Ewropea għolja;

—

jmorru lil hinn mill-mobbiltà u jqisu aktar id-dimensjoni globali fit-tfassil u l-kontenut tal-kurrikuli u l-proċessi ta' tagħlim (spiss imsejħa "internalizzazzjoni d-dar");

—

jindirizzaw firxa aktar varja u għadd akbar ta' studenti billi jikkombinaw ir-riżorsi diġitali ġodda ma' forom aktar tradizzjonali ta' tagħlim, filwaqt li jiżguraw kwalità għolja;

—

jsaħħu l-kooperazzjoni għall-iżvilupp permezz ta' sħubijiet strateġiċi u bini tal-kapaċità.

JINNOTA B'INTERESS:

—

Il-komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni bl-isem L-edukazzjoni għolja Ewropea fid-dinja  (8); u

—

Il-komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni bl-isem Niftħu l-Edukazzjoni: Tagħlim innovattiv għal kulħadd permezz ta' Teknoloġiji ġodda u Riżorsi Edukattivi Miftuħa  (9).

JAGĦRAF LI:

1.

L-edukazzjoni għolja għandha rwol kruċjali x'taqdi fl-iżvilupp ta' ċittadini involuti, elokwenti u li jilħqu l-milja tagħhom u hija xprun qawwi ta' soċjetajiet intelliġenti, sostenibbli u inklużivi, riżq individwali u tkabbir ekonomiku. Il-mobbiltà internazzjonali tal-individwi u l-inklużjoni ta' perspettiva globali fi programmi tal-edukazzjoni għolja jistgħu jkomplu jikkontribwixxu għal dan l-iżvilupp.

2.

Il-qawwa tas-sistemi ta' edukazzjoni għolja tal-Ewropa tinsab fl-għoti ta' edukazzjoni u riċerka ta' kwalità għolja, fid-diversità tal-istituzzjonijiet tagħha, u fl-appoġġ tagħha għall-kooperazzjoni f'oqsma fejn din tipprovdi valur miżjud, bħal programmi ta' lawrji konġunti u doppji, skejjel u studji għad-dottorat, u sħubijiet internazzjonali.

3.

Fil-klima ekonomika attwali l-edukazzjoni għolja, kif ukoll l-edukazzjoni u t-taħriġ vokazzjonali terzjarju, għandhom rwol kruċjali x'jaqdu fit-tisħiħ tal-ħila tal-Ewropa għar-riċerka u l-innovazzjoni u billi jipprovdulha r-riżorsi umani b'ħiliet avvanzati li teħtieġ sabiex tiżgura l-impjiegi, it-tkabbir ekonomiku u r-riżq.

4.

Il-kompetenzi tal-gradwati mhux dejjem jaqblu mal-ħtiġijiet li qed jiżviluppaw tas-suq tax-xogħol u tas-soċjetà, u min iħaddem fil-pubbliku u fil-privat jirrapporta differenzi u diffikultajiet fis-sejbien ta' kandidati xierqa biex jissodisfaw il-ħtiġijiet ta' ekonomija bbażata fuq l-għarfien.

5.

It-tixjiħ demografiku fl-UE x'aktarx li jħalli impatt kbir fl-għexieren ta' snin li ġejjin, peress li r-rati ta' twelid konsistement baxxi jirriskjaw li jiggravaw il-problema tan-nuqqas ta' ħiliet ta' nies gradwati għal min iħaddem fl-Ewropa.

6.

Bħala sorsi ta' għarfien u innovazzjoni, l-istituzzjonijiet tal-edukazzjoni għolja għandhom ukoll responsabbiltà soċjali li jikkontribwixxu għall-iżvilupp uman u l-ġid komuni, kemm fil-kuntest nazzjonali kif ukoll fil-bqija tad-dinja.

JIKKUNSIDRA LI:

1.

L-impenn attiv ta' persunal, riċerkaturi u studenti internazzjonali f'istituzzjonijiet Ewropej tal-edukazzjoni għolja, l-għoti ta' appoġġ finanzjarju u organizzattiv għall-mobbiltà internazzjonali kemm tal-istudenti kif ukoll tal-persunal, u aktar sforzi biex il-kurrikuli jiġu internazzjonalizzati jistgħu jgħinu lill-istudenti jiksbu kompetenzi rilevanti għas-suq tax-xogħol dinji.

2.

L-Istati Membri u l-istituzzjonijiet Ewropej tal-edukazzjoni għolja għamlu - bl-appoġġ tal-UE - progress sinifikanti fl-iżvilupp ta' mekkaniżmi għall-iżgurar tal-kwalità transkonfinali u r-rikonoxximent ta' kwalifiki fil-Proċess ta' Bolonja, permezz ta' netwerks bħal ENIC/NARIC kif ukoll permezz ta' azzjonijiet bħall-programmi Erasmus Mundus u Tempus.

3.

Iż-żieda globali ta' Riżorsi Edukattivi Miftuħa, Softwer Edukattiv Miftuħ u Korsijiet Onlajn Miftuħa Massivi (MOOCs) hija żvilupp internazzjonali li jista' jkollu implikazzjonijiet importanti għas-sistemi ta' edukazzjoni għolja u jiftaħ opportunitajiet għal forom innovattivi ta' kooperazzjoni transkonfinali globali.

GĦALDAQSTANT JISTIEDEN LILL-ISTATI MEMBRI, KIF XIERAQ, JIKKOOPERAW MAL-ISTITUZZJONIJIET TAL-EDUKAZZJONI GĦOLJA, FILWAQT LI JQISU KIF MISTĦOQQ L-AWTONOMIJA TAGĦHOM, SABIEX:

1.

Isegwu approċċi strateġiċi komprensivi għall-internalizzazzjoni, b'kooperazzjoni mal-partijiet interessati rilevanti, li jkopru tliet oqsma ewlenin:

(a)

mobbiltà tal-istudenti u tal-persunal;

(b)

l-internazzjonalizzazzjoni ta’ kurrikuli u tagħlim diġitali;

(c)

kooperazzjoni strateġika, sħubijiet u l-bini-tal-kapaċità.

2.

Jippromwovu lawrji internazzjonali bidirezzjonali u mobbiltà tal-kreditu għall-istudenti, kif ukoll jipprovdu opportunitajiet għall-mobbiltà tal-persunal bejn l-Ewropa u l-pajjiżi terzi, fost l-oħrajn billi:

(i)

jiżguraw li l-istrateġiji ta’ internazzjonalizzazzjoni jkun fihom komponent qawwi ta' mobbiltà tal-istudent, tar-riċerkatur u tal-persunal, appoġġat minn qafas ta' kwalità li jista' jinkludi fost l-oħrajn servizzi ta' gwida u konsulenza;

(ii)

joħolqu skemi ta' mobbiltà bidirezzjonali ta' interess reċiproku ma' pajjiżi terzi, li jilħqu bilanċ raġonevoli bejn mobbiltà fiżika u virtwali, kif ukoll bejn mobbiltà 'l ġewwa u 'l barra, li fihom firxa wiesgħa ta' suġġetti u, fejn xieraq, li jimmiraw għal oqsma b'nuqqas ta' ħiliet;

(iii)

jappoġġaw ir-rikonoxximent ta' krediti, lawrji, kwalifiki u kompetenzi miksuba barra minn studenti, riċerkaturi u persunal mobbli internazzjonalment, f'konformità mal-leġislazzjoni u l-prattika nazzjonali;

(iv)

tissaħħaħ il-konċentrazzjoni fuq ir-riżultati tat-tagħlim, kif ukoll koerenza mal-għodod ta' trasparenza Ewropej bħas-Sistema Ewropea għall-Akkumulazzjoni u t-Trasferiment ta’ Krediti, is-Suppliment tad-Diploma u l-Qafas Ewropew tal-Kwalifiki, u ma' mekkaniżmi li jiżguraw il-kwalità; u

(v)

jaċċelleraw il-progress fuq ir-riformulazzjoni proposta tad-direttivi dwar il-kundizzjonijiet ta' dħul u residenza ta' ċittadini minn pajjiżi terzi għall-iskopijiet ta' riċerka u studji.

3.

Jippromwovu l-iternazzjonalizzazzjoni d-dar u t-tagħlim diġitali biex jiżguraw li l-maġġoranza kbira ta' studenti Ewropej li ma jipparteċipawx f'azzjonijiet ta' mobbiltà fiżika jkunu jistgħu wkoll jiżviluppaw ħiliet internazzjonali, fost l-oħrajn billi:

(i)

jiżguraw l-għoti ta' faċilitajiet u servizzi għall-istudenti ta' kwalità għolja fl-edukazzjoni terzjarja li huma rilevanti għall-ħtiġijiet tal-istudenti;

(ii)

jagħmlu użu effettiv mill-esperjenza u l-kompetenzi internazzjonali li għandu l-persunal tal-istituzzjonijiet tal-edukazzjoni għolja (HEIs) u jħeġġuhom jikkontribwixxu għall-iżvilupp ta' kurrikuli ta' kwalità għolja b'direzzjoni internazzjonali għall-ġid kemm ta' studenti mobbli kif ukoll le;

(iii)

jipprovdu aktar opportunitajiet għal studenti, riċerkaturi u persunal biex jiżviluppa l-kompetenzi lingwistiċi tiegħu, partikolarment permezz ta' tagħlim fil-lingwa tal-pajjiż ospitanti għal individwi li jsegwu korsijiet li mhumiex f'ilsien pajjiżhom, bil-ħsieb li jitkattru l-benefiċċji tad-diversità lingwistika Ewropea u l-integrazzjoni soċjali tal-istudenti, ir-riċerkaturi u l-persunal fil-pajjiż ospitanti tagħhom;

(iv)

joffru opportunitajiet akbar għal tagħlim kollaborattiv internazzjonali online u jesploraw l-użu ta' Teknoloġiji tal-Informazzjoni u l-Komunikazzjoni u Riżorsi Edukattivi Miftuħa għal metodi ġodda bil-għan li jinfirex l-aċċess, jiġu internazzjonalizzati l-kurrikuli u titwitta t-triq għal forom ġodda ta' sħubijiet.

4.

Jippromwovu l-ħolqien ta' sħubijiet kemm fl-Ewropa kif ukoll barra, sabiex isaħħu l-kapaċità istituzzjonali fl-edukazzjoni, ir-riċerka u l-innovazzjoni, fost l-oħrajn billi:

(i)

jipprovdu l-kurrikuli li jistimulaw l-intrapriża u l-innovazzjoni, kif ukoll jiġi promoss l-iżvilupp ta' ħiliet trasferibbli, u l-ħolqien ta' opportunitajiet ta' taħriġ internazzjonali permezz ta' kollaborazzjoni ma' min iħaddem kemm mill-UE kif ukoll minn barra;

(ii)

jippromwovu konċentrazzjoni fuq il-qawwiet u l-prijoritajiet partikolari ta' kull HEI bħala mezz ta' kif jiġi żgurat użu effiċjenti u effettiv tal-investiment pubbliku;

(iii)

jieħdu ħsieb l-ixkiel li fadal li jwaqqaf l-iżvilupp u l-implimentazzjoni ta' programmi ta' lawrji konġunti, doppji u multipli, u t-titjib tad-dispożizzjoni għall-iżgurar tal-kwalità u r-rikonoxximent transkonfinali;

(iv)

iħeġġu l-koerenza bejn l-istrateġiji ta' internazzjonalizzazzjoni tal-Istati Membri u l-politika tal-UE ta' kooperazzjoni għall-iżvilupp, billi jqisu l-prinċipji ta' ekwità u s-sjieda tal-pajjiż sieħeb, kif ukoll il-ħtiġijiet tal-HEIs;

(v)

jitgħallmu mill-esperjenzi tal-istudenti, ir-riċerkaturi u l-persunal minn pajjiżi terzi bħala ambaxxaturi tal-kooperazzjoni mal-HEIs f'dawn il-pajjiżi;

(vi)

Iħeġġu l-HEIs biex jiżviluppaw strateġiji ta' internazzjonalizzazzjoni komprensivi tagħhom infushom, billi jagħrfu n-natura trasversali tal-internazzjonalizzazzjoni, li tolqot l-oqsma kollha tal-ħajja universitarja, fosthom ir-riċerka, il-ġestjoni tat-tagħlim, l-amministrazzjoni u s-servizzi, u jappoġġawhom fl-isforzi tagħhom.

JILQA' L-INTENZJONI TAL-KUMMISSJONI LI:

1.

Tappoġġa l-isforzi tal-Istati Membri u tal-istituzzjonijiet tal-edukazzjoni għolja biex isegwu approċċi strateġiċi komprensivi lejn l-internazzjonalizzazzjoni, u jisfruttaw l-opportunitajiet għal kooperazzjoni internazzjonali fl-edukazzjoni għolja fil-programmi Erasmus+ u Orizzont 2020, fost l-oħrajn billi:

(i)

tagħti aktar appoġġ finanzjarju permezz ta' Erasmus+ għall-mobbiltà tal-istudenti u l-persunal minn pajjiżi terzi u lejnhom, u permezz ta' azzjonijiet taħt Orizzont 2020 għall-mobbiltà tar-riċerkaturi minn pajjiżi terzi u lejnhom;

(ii)

tappoġġa konsorzji internazzjonali tal-HEIs biex jiżviluppaw lawrji ta' Master u Dottorat Konġunti permezz ta' Erasmus+ u azzjonijiet Marie Sklodowska-Curie, u tagħti opportunitajiet biex studenti u kandidati għal dottorati jgawdu minn boroż ta' studju u fellowships;

(iii)

tappoġġa sħubijiet strateġiċi għall-kooperazzjoni u l-innovazzjoni fl-edukazzjoni għolja, fosthom sħubijiet għall-bini ta’ kapaċità bejn l-UE u l-HEIs ta' pajjiżi terzi.

2.

B'kooperazzjoni mal-Istati Membri, tagħmel sforzi biex iżżid il-ġibda u tippromwovi d-diversità tal-edukazzjoni għolja Ewropea madwar id-dinja, fost l-oħrajn billi:

(i)

ittejjeb il-kwalità u t-trasparenza, tippromwovi mekkaniżmi ta' assigurazzjoni tal-kwalità transkonfinali, u trawwem il-komparabilità tal-kwalifiki, tal-krediti u s-sistemi ta' rikonoxximent permezz ta’ kooperazzjoni u djalogu internazzjonali;

(ii)

ittejjeb il-kwalità tal-mobbiltà akkademika billi tissaħħaħ il-Karta Erasmus għall-Edukazzjoni Għolja fost l-oħrajn permezz ta' linji gwida għall-HEIs għall-awtovalutazzjoni u għall-monitoraġġ;

(iii)

tippromwovi, fejn rilevanti, u filwaqt li tirrispetta l-awtonomija tal-istituzzjonijiet tal-edukazzjoni għolja, l-implimentazzjoni ta' U-Multirank, l-għodda multidimensjonali internazzjonali ġdida ta' trasparenza li għandha l-għan li ttejjeb il-komparabilità bejn l-HEIs;

(iv)

tappoġġa l-kooperazzjoni bejn l-Istati Membri u fost agenziji nazzjonali ta' promozzjoni u assoċjazzjonijiet tal-alumni billi taqsam l-informazzjoni magħhom, tniedi u tikkoordina azzjonijiet konġunti sabiex tbiegħ lill-Ewropa bħala destinazzjoni ta' kwalità għolja għall-istudju u għar-riċerka, pereżempju f'fieri għall-istudenti u permezz tat-tfassil ta' għodod konġunti ta’ promozzjoni.

3.

Tippromwovi kooperazzjoni fl-edukazzjoni għolja għall-innovazzjoni u l-iżvilupp bejn l-UE u s-sħab globali tagħha, fost l-oħrajn billi:

(i)

ikollha djalogi ta' politika bilaterali u multilaterali ma' sħab internazzjonali ewlenin, f'konformità mal-politika esterna tal-UE;

(ii)

tippromwovi l-Istitut Ewropew tal-Innovazzjoni u t-Teknoloġija u l-Komunitajiet ta' Għarfien u Innovazzjoni tiegħu bħala bibien għall-kooperazzjoni internazzjonali fl-innovazzjoni, ir-riċerka u l-edukazzjoni għolja biex jiġu indirizzati l-isfidi tas-soċjetà;

(iii)

tappoġġa u ttejjeb it-tfassil ta' politika fuq il-bażi ta' evidenza fil-qasam tal-edukazzjoni internazzjonali, permezz tar-riċerka, tal-ġbir u l-analiżi ta' statistika, u d-djalogu ma’ esperti.

(1)  Komunikat ta' Bukarest, 27 ta' April 2012, p. 3.

(2)  ĠU L 375, 23.12.2004, p. 12.

(3)  ĠU L 289, 3.11.2005, p. 15.

(4)  Iż-Żona Ewropea ta’ Edukazzjoni Għolja f'Xenarju Globali

(5)  EUCO 13/10.

(6)  ĠU C 135, 26.5.2010, p.12.

(7)  ĠU C 372, 20.12.2011, p. 31.

(8)  12453/13.

(9)  14116/13 + ADD 1

Top