15.10.2010   

MT

Il-Ġurnal Uffiċjali tal-Unjoni Ewropea

C 278/9

(1)

Id-deċiżjoni annessa hija dwar E.ON AG, il-Ġermanja, is-sussidjarji tagħha E.ON Ruhrgas AG u E.ON Gastransport GmbH, kif ukoll is-sussidjarji kkontrollati minnhom (flimkien “E.ON”). L-adozzjoni tad-deċiżjoni se tagħmel vinkolanti l-impenji proposti minn E.ON sabiex issolvi l-problemi dwar il-kompetizzjoni li jirriżultaw minn investigazzjonijiet tal-Kummissjoni dwar is-swieq tal-gass Ġermaniżi.

(2)

Il-Kummissjoni kellha tħassib dwar il-fatt li bl-esklużjoni tal-aċċess għall-kapaċità għad-dħul fin-netwerk tad-distribuzzjoni tal-gass tagħha, E.ON setgħet abbużat mill-pożizzjoni dominanti tagħha fis-swieq tat-trasport tal-gass fin-netwerk tal-L-Gas tagħha u fil-qasam tas- suq tal-H-gas ta’ NetConnect Germany skont l-Artikolu 102 tat-TFUE.

(3)

Dan seta' jsir permezz ta' prenotazzjonijiet fit-tul fuq in-netwerk ta' trażmissjoni tal-gass ta' E.ON li kienu jeskludu lill-kompetituri milli jaċċedu għal dak in-netwerk. E.ON ipprenotat partijiet kbar mill-kapaċitajiet kontinwi għad-dħul disponibbli u allokabbli b'mod ħieles tal-kumpanija, fin-netwerk tal-gass tagħha stess, li, skont il-Valutazzjoni Preliminari, setgħu waqqfu lill-kompetituri milli jittrasportaw il-gass fin-netwerk ta' E.ON u lill-klijenti konnessi ma' dan in-netwerk. B'hekk E.ON setgħet irrestrinġiet il-kompetizzjoni fis-swieq downstream tal-forniment tal-gass.

(4)

E.ON ipproponiet impenji lill-Kummissjoni sabiex tindirizza t-tħassib tal-Kummissjoni dwar il-kompetizzjoni. Bħala l-ewwel pass, E.ON ipproponiet li tirrilaxxa kapaċitajiet kontinwi għad-dħul allokabbli b'mod ħieles fin-netwerk ta' trażmissjoni tal-gass tagħha, ta' volum ta' 17,8 GWh/h, sa Ottubru 2010. Bħala t-tieni pass, E.ON se tkompli tnaqqas is-sehem globali tagħha fil-prenotazzjonijiet tal-kumpanija u l-kapaċitajiet kontinwi għad-dħul allokabbli b'mod ħieles fil-qasam tas-suq tal-H-gas (NetConnect Germany) għal 50 % sa Ottubru 2015 u fin-netwerk tal-L-gas għal 64 % sa Ottubru 2015. E.ON tista' tilħaq dawn il-limiti billi tirritorna kapaċitajiet lill-operatur tas-sistema tat-trażmissjoni, permezz ta' miżuri li jżidu l-kapaċità fin-netwerk rispettiv, jew billi tidħol f’kooperazzjonijiet fil-qasam tas-suq li jżidu l-volum totali tal-kapaċitajiet fin-netwerk tagħha. E.ON timpenja ruħha li ma taqbiżx dawn il-limiti stabbiliti sal-2025.

(5)

L-Impenji Finali huma suffiċjenti biex jeliminaw it-tħassib inizjali tal-Kummissjoni, mingħajr ma jkunu sproporzjonati. L-Impenji Finali huma adatti biex jeliminaw it-tħassib tal-Kummissjoni dwar il-kompetizzjoni espressi fil-Valutazzjoni Preliminari. It-tnaqqis tal-ishma ta' E.ON fil-kapaċitajiet kontinwi għad-dħul allokabbli b'mod ħieles u d-dewmien ta' dawn l-impenji se jiżguraw li l-kompetituri u l-fornituri l-ġodda jkunu jistgħu jsiru attivi malajr u b'mod permanenti fis-swieq downstream għall-forniment tal-gass. L-Impenji Finali offruti minn E.ON huma wkoll neċessarji peress li ma jeżistu l-ebda miżuri alternattivi biex jitneħħa t-tħassib li espremiet il-Kummissjoni, li jkunu effettivi daqs ir-rilaxx ta' kapaċità li ġie propost. Fil-fatt, l-esklużjoni mill-aċċess għall-infrastruttura tat-trasport neċessarja tista' biss tiġi rrimedjata permezz ta' rilaxx ta' kapaċità tat- trasport. Fid-dawl tas-sehem għoli ta' E.ON fis-suq tal-kapaċità tad-dħul fis-swieq rilevanti u tat-tul ta' żmien twil tal-prenotazzjonijiet, il-kamp ta’ applikazzjoni tal-Impenji Finali huwa wkoll neċessarju. Minħabba n-numru kbir ta' klijenti konnessi man-netwerk tat-trażmissjoni tal-gass ta' E.ON u d-dannu potenzjalment imdaqqas għal dawn il-klijent, l-Impenji Finali għandhom finalment jitqiesu bħala adegwati u proporzjonati.

(6)

Fid-dawl tal-Impenji proposti, ma għadx hemm raġunijiet għal azzjoni min-naħa tal-Kummissjoni u, bla ħsara għall-Artikolu 9(2) tar-Regolament (KE) Nru 1/2003, il-proċedimenti f'dan il-każ għandhom għalhekk jintemmu.

(7)

Fil-15 ta' April 2010, il-Kumitat Konsultattiv fil-qasam tal-Prattiċi Restrittivi u Pożizzjonijiet Dominanti ġie kkonsultat u ta opinjoni favorevoli. Fis-16 ta' April 2010 l-Uffiċjal tas-Seduta ppreżenta r-rapport finali tiegħu.