EUR-Lex Access to European Union law
This document is an excerpt from the EUR-Lex website
Document 52013PC0315
Proposal for a DECISION OF THE EUROPEAN PARLIAMENT AND OF THE COUNCIL on the deployment of the interoperable EU-wide eCall
Proposta għal DEĊIŻJONI TAL-PARLAMENT EWROPEW U TAL-KUNSILL dwar il-varar ta’ eCall interoperabbli fl-UE kollha
Proposta għal DEĊIŻJONI TAL-PARLAMENT EWROPEW U TAL-KUNSILL dwar il-varar ta’ eCall interoperabbli fl-UE kollha
/* COM/2013/0315 final - 2013/0166 (COD) */
Proposta għal DEĊIŻJONI TAL-PARLAMENT EWROPEW U TAL-KUNSILL dwar il-varar ta’ eCall interoperabbli fl-UE kollha /* COM/2013/0315 final - 2013/0166 (COD) */
MEMORANDUM TA'
SPJEGAZZJONI 1. KUNTEST TAL-PROPOSTA Din il-proposta tindirizza l-parti li
tikkonċerna l-infrastruttura tas-Sejħiet marbutin mas-Sikurezza
Pubblika (il-PSAPs) fl-istrateġija tal-Kummissjoni dwar l-eCall,
ibbażata fuq approċċ regolatorju fuq tliet binarji li jinkludi
s-sistema mmuntata fil-vettura, netwerks tat-telekomunikazzjoni u l-PSAPs. 1.1. Kuntest
ġenerali Is-sikurezza fit-toroq hija waħda
mill-kwistjonijiet ewlenin fil-politika tat-trasport tal-Unjoni Ewropea.
Fl-2011, inqatlu madwar 30 000 persuna u aktar minn 1,5 miljun
sfaw midruba f'madwar 1,1 miljun aċċident tat-traffiku fit-toroq
tal-UE. Minbarra t-traġedja ta’ telf ta’ ħajja u korriment, dan
iġib miegħu wkoll piż ekonomiku ta’ madwar EUR 130 biljun
fi spejjeż għas-soċjetà kull sena. L-UE hija impenjata
bis-sħiħ li tnaqqas l-għadd ta' aċċidenti stradali
(prevenzjoni tal-aċċidenti jew sikurezza attiva), li ttaffi
l-konsegwenzi tal-aċċidenti meta dawn iseħħu (sikurezza
passiva), u li ttejjeb l-effiċjenza tas-servizzi ta' emerġenza u
l-effikaċja tal-kura medika ta' wara l-inċidenti (sikurezza
terzjarja). F’dan il-kuntest, is-servizz tal-eCalls jista’ jikkontribwixxi
għat-tnaqqis tal-imwiet fit-toroq u t-taffija tas-severità ta’ korrimenti
minn aċċidenti tat-traffiku. Kull minuta hija kruċjali biex jiġu
salvati l-ħajjiet u titnaqqas il-gravità tal-korrimenti meta jissejħu
s-servizzi ta’ emerġenza għal aċċident tat-triq.
It-tagħmir tal-eCall iwissi minnufih lis-servizzi ta’ emerġenza, anke
jekk is-sewwieq jew il-passiġġier ikun mitluf minn sensih jew inkella
ma jkunx jista’ jċempel, u jħaffef il-wasla tal-ekwipaġġ
tal-emerġenza b’madwar 40 % fiz-zoni urbani u 50 % f’żoni
rurali. Is-servizz tal-eCalls jista’ jkollu wkoll impatt sinifikanti fuq it-tnaqqis
tal-konġestjoni kkawżata minn aċċidenti tat-traffiku u
għalhekk tal-konġestjoni inġenerali fit-toroq Ewropej. L-implimentazzjoni armonizzata ta’ servizz
interoperabbli ta’ tal-eCalls offrut madwar l-UE kollha ilha fuq l-aġenda
tal-Kummissjoni Ewropea sa mill-2005, u issa saret azzjoni ta’ prijorità
għat-titjib tas-sikurezza fit-toroq u għall-użu tas-sistemi
intelliġenti tat-trasport fl-Ewropa. Bħala parti minn approċċ ta'
mobilizzazzjoni volontarja, il-Kummissjoni fil-Komunikazzjoni tagħha
tal-2005 – intitolata "t-twassil ta' eCall liċ-Ċittadini"[1] – ħeġġet
bil-qawwi lill-gvernijiet nazzjonali u reġjonali li jaġixxu u
jinvestu fl-infrastruttura neċessarja ta’ emerġenza għas-servizz
ta' eCall, bil-ħsieb li fl-2009 jitnieda s-servizz pan-Ewropew sħiħ.
Il-Kummissjoni talbet ukoll lill-Organizzazzjonijiet Ewropej
għall-Istandardizzazzjoni (ETSI, CEN) li jfasslu l-istandards komuni
Ewropej meħtieġa, u pprovdiet appoġġ għal dan
il-għan. Fil-21 ta' Awwissu 2009,
il-Komunikazzjoni "eCall: Iż-Żmien tal-Varar"[2] irrapportat dwar il-progress
fl-introduzzjoni tal-eCall, u kkonkludiet li l-approċċ volontarju ma
kienx suffiċjenti. Il-Kummissjoni indikat li, sakemm ma jsirx progress
sinifikanti sal-aħħar tal-2009, se tikkunsidra l-adozzjoni ta'
miżuri regolatorji sabiex tiżgura li jiġi installat tagħmir
standard tal-eCall fil-vetturi l-ġodda kollha tal-Ewropa, billi tibda minn
kategoriji partikolari (karozzi tal-passiġġieri u vetturi
kummerċjali ħfief). F’Awwissu tal-2010, id-Direttiva 2010/40/UE
tal-Parlament Ewropew u tal-Kunsill tas-7 ta’ Lulju 2010 dwar il-qafas
għall-varar ta’ Sistemi ta’ Trasport Intelliġenti fil-qasam
tat-trasport bit-triq u għall-interkonnessjonijiet ma’ modi oħrajn
ta’ trasport [3]
daħlet fis-seħħ b’ "il-forniment armonizzat ta’ eCall
interoperabbli fl-UE kollha" bħala waħda mis-sitt azzjonijiet
ta’ prijorità identifikati għall-adozzjoni tal-ispeċifikazzjonijiet. Fir-riżoluzzjoni
non-leġiżlattiva "Rapport dwar l-eCall: servizz ġdid tal-112
għaċ-ċittadini"[4]
adottata fit-3 ta' Lulju 2012, il-Parlament Ewropew iddikjara dan li ġej: –
"Jikkunsidra li s-sistema eCall għandha
tkun sistema pubblika ta' telefonati ta' emerġenza madwar l-UE,
inkorporata fil-vettura u bbażata fuq il-112 u fuq standards komuni
pan-Ewropej", –
"Ifakkar li l-valutazzjoni tal-impatt
tal-Kummissjoni turi li l-adozzjoni ta' miżuri regolatorji sabiex
isseħħ l-introduzzjoni mandatorja tas-sistema eCall bħalissa
hija l-unika possibbiltà biex jinkisbu l-effetti pożittivi kollha"; –
"Iħeġġeġ lill-Kummissjoni
tissottometti proposta fi ħdan il-qafas tad-Direttiva 2007/46/KE sabiex
sal-2015 tiżgura l-użu mandatorju ta' sistema pubblika ta' eCall
ibbażata fuq il-112 fil-karozzi l-ġodda approvati kollha u fl-Istati
Membri kollha", –
"Jilqa' r-rakkomandazzjoni tal-Kummissjoni
tat-8 ta' Settembru 2011 u jħeġġeġ
lill-Istati Membri u lill-Operaturi ta' Netwerks Mobbli (MNOs) sabiex
jimplimentaw il-miżuri u l-aġġornamenti meħtieġa
tagħha sa mhux aktar tard mill-aħħar tal-2014;
jiddispjaċih, madankollu, li 18-il Stat Membru biss irrispondew
fil-ħin; jistieden lill-bqija tal-Istati Membri biex jagħmlu dan
mill-aktar fis possibbli", –
"Iħeġġeġ lill-Kummissjoni
tadotta speċifikazzjonijiet għal PSAPs fi ħdan il-qafas
tad-Direttiva dwar l-STI sal-aħħar tal-2012, u tipproponi direttiva
dwar l-implimentazzjoni tal-eCall". Il-varar tal-eCall se jikkostitwixxi wkoll
twassil tal-Pjan ta' Azzjoni CARS 2020, li hija inkluża fil-Komunikazzjoni
tat-8 ta' Novembru 2012 "CARS 2020: Pjan ta’ azzjoni għal
industrija tal-karozzi kompetittiva u sostenibbli fl-Ewropa"[5]. Fis-26 ta’ Novembru 2012,
il-Kummissjoni adottat ir-Regolament Delegat Nru 305/2013 li jissupplimenta
d-Direttiva 2010/40/UE tal-Parlament Ewropew u tal-Kunsill fir-rigward ta'
forniment armonizzat ta’ eCall interoperabbli fl-UE kollha[6] li jistabbilixxi
l-ispeċifikazzjonijiet għall-aġġornament tal-infrastruttura
taċ-Ċentru li jwieġeb għas-Sejħiet marbutin
mas-Sikurezza Pubblika (PSAP) meħtieġa sabiex l-eCalls jiġu
riċevuti u ttrattati kif suppost, sabiex jiġu żgurati
l-kompatibbiltà, l-interoperabbiltà u l-kontinwità tas-servizz armonizzat ta’
eCall fl-UE kollha. 1.2. Raġunijiet
għall-proposta Minħabba n-nuqqas ta' progress
sinifikanti fil-mobilizzazzjoni volontarja tal-eCall sal-aħħar
tal-2009, il-Kummissjoni ddeċidiet li twettaq Valutazzjoni tal-Impatt
sabiex tivvaluta l-aktar għażla politika xierqa biex timplimenta
s-servizz ta' eCall madwar l-UE kollha. Kif inhu spjegat fil-Valutazzjoni tal-Impatt[7], l-eCall teħtieġ
tliet tipi ta' miżuri: l-immuntar ta' sistema speċifika fil-vetturi,
l-abbiltà tal-operaturi tan-netwerk mobbli li jibagħtu messaġġi
b'format partikolari, u fl-aħħar nett, il-kapaċità
taċ-ċentri li jwieġbu għas-sejħiet ta' emerġenza
(magħrufin ukoll bħala PSAPs – Ċentri li jwieġbu
għas-Sejħiet marbutin mas-Sikurezza Pubblika) li jittrattaw dawn
il-messaġġi. Is-sistema tista' tkun operattiva biss jekk it-tliet
partijiet jaħdmu flimkien. Il-Valutazzjoni tal-Impatt ikkonkludiet li
l-aħjar għażla biex l-eCall jiġi implimentat b’mod effettiv
huwa approċċ "regolatorju". L-eCall imbagħad
għandu jiġi bbażat fuq l-installazzjoni tal-apparat
bl-approvazzjoni tat-tip għan-Numru Uniku ta' Emerġenza Ewropew,
il-112, fil-vetturi kollha, fil-bidu f’ċerti kategoriji ta’ vetturi biss,
u qafas għat-trattament tal-eCalls fin-netwerks tat-telekomunikazzjoni u
l-PSAPs. Permezz ta' dan l-approċċ l-eCall tkun disponibbli għaċ-ċittadini
kollha fl-Ewropa bħala servizz mifrux mal-UE kollha, tiġi
aċċellerata l-implimentazzjoni tagħha u jitħaddan
il-potenzjal kollu tal-eCall biex issalva l-ħajjiet, u tittaffa s-severità
tal-ġrieħi. Il-bini fuq dan it-tagħmir standardizzat 112 jew
il-koeżistenza miegħu, emerġenza addizzjonali fil-vettura, u/jew
servizzi ta’ valur miżjud jistgħu jiġu provduti lill-utent
aħħari biex jagħtu iktar sikurezza u benefiċċji
ekonomiċi. B'riżultat ta' dan,
fit-8 ta' Settembru 2011, il-Kummissjoni żvelat l-istrateġija
tagħha dwar il-miżuri regolatorji tal-eCall, flimkien mal-adozzjoni
tal-ewwel parti ta' din l-istrateġija li kienet tikkonsisti minn
Rakkomandazzjoni tal-Kummissjoni[8]
dwar appoġġ għal servizz ta' eCalls offrut madwar l-UE kollha
fin-netwerks tal-komunikazzjoni elettronika għat-trażmissjoni ta'
sejħiet tal-emerġenza bbażati fuq in-numru 112 minn sistemi
mmuntati fil-vetturi ("eCalls"). Sabiex tiġi kompletata l-implimentazzjoni
tal-istrateġija tal-eCall tagħha u tiġi żgurata
l-implimentazzjoni parallela u f’waqtha tas-servizz tal-eCall ibbażat fuq
in-numru 112 mit-tliet gruppi ta’ partijiet interessati involuti (l-operaturi
tan-netwerks mobbli, is-servizzi pubbliċi ta’ emerġenza u
l-industrija tal-karozzi) sal-2015, il-Kummissjoni qed tipproponi li ġej: –
Sistema fil-vettura: proposta skont il-qafas
ipprovdut mid-Direttiva 2007/46/KE biex tordna l-eCall fit-tipi ġodda
kollha ta’ vetturi M1 u N1 (karozzi tal-passiġġieri u vetturi
kummerċjali ħfief). –
Netwerks ta' komunikazzjoni mobbli:
ir-Rakkomandazzjoni tal-Kummissjoni dwar l-eCall imsemmija hawn fuq. –
Ċentri li jwieġbu għas-sejħiet
marbutin mas-sikurezza pubblika: l-adozzjoni tar-Regolament Iddelegat imsemmi
hawn fuq bħala att iddelegat skont id-Direttiva 2010/40/UE sabiex
jiġu indirizzati l-ispeċifikazzjonijiet għall-PSAPs. L-Artikolu 6(2) tad-Direttiva 2010/40/UE
jitlob lill-Kummissjoni tippreżenta, sa mhux aktar tard minn 12-il xahar
wara l-adozzjoni tal-ispeċifikazzjonijiet meħtieġa għal xi
azzjoni ta’ prijorità, fejn xieraq u wara li tkun wettqet valutazzjoni
tal-impatt li tinkludi analiżi tal-ispejjeż u l-benefiċċji,
proposta lill-Parlament Ewropew u lill-Kunsill f’konformità
mal-Artikolu 294 tat-Trattat dwar il-Funzjonament tal-Unjoni Ewropea
(TFUE) dwar it-tnedija ta’ dik l-azzjoni ta’ prijorità. Dan huwa l-għan speċifiku ta’ din
il-proposta, li bih tiġi kompluta l-parti tal-“PSAP” mill-istrateġija
tal-Kummissjoni dwar l-eCall. Dawn id-diversi testi huma kumplimentari u
flimkien jippermettu li s-servizz eCall ibbażat fuq in-numru 112 ikun
operattiv bis-sħiħ sa mill-1 ta’ Ottubru 2015. 2. RIŻULTATI
TAL-KONSULTAZZJONIJIET MAL-PARTIJIET INTERESSATI U TAL-VALUTAZZJONIJIET
TAL-IMPATT 2.1. Konsultazzjonijiet
mal-partijiet interessati Din il-proposta hija r-riżultat ta’
konsultazzjonijiet estensivi mal-partijiet interessati ewlenin: Tqis il-konsultazzjonijiet kollha tul
il-Valutazzjoni tal-Impatt tal-eCall. Dawn il-konsultazzjonijiet jinkludu,
b'mod partikolari, kontribuzzjonijiet estensivi mill-partijiet interessati
involuti f'diversi fora bħall-Pjattaforma għall-Implimentazzjoni
tal-eCall (EeIP), il-Grupp ta' esperti tal-PSAPs għall-eCall u l-Grupp
għat-Tmexxija tal-eCall fi ħdan il-Forum dwar
l-eSafety / i-Mobility, u konsultazzjoni pubblika dwar
l-implimentazzjoni tal-eCall li kienet miftuħa mid-19 ta' Lulju
sad-19 ta' Settembru 2010. Il-proposta tqis ukoll id-diskussjonijiet
fil-laqgħat li saru ma’ esperti mill-Istati Membri, il-pajjiżi
taż-ŻEE u l-Isvizzera fit-13 ta’ Ottubru 2011,
fid-29 ta’ Mejju, fid-19 ta’ Ġunju u fit-3 ta’ Lulju 2012
biex jippreparaw l-ispeċifikazzjonijiet għall-PSAPs. Dawn
il-laqgħat attendew għalihom ukoll rappreżentanti mill-Parlament
Ewropew u l-Kontrollur Ewropew għall-Protezzjoni tad-Data[9]. Fl-aħħar nett, din il-proposta tqis
ukoll l-opinjoni tal-Grupp Konsultattiv Ewropew dwar l-STI 25, magħmul
minn rappreżentanti ta’ livell għoli tal-fornituri tas-servizzi
tas-sistemi STI, l-assoċjazzjonijiet tal-utenti, l-operaturi tat-trasport
u tal-faċilitajiet, l-industrija tal-manifattura, is-sieħba soċjali,
l-assoċjazzjonijiet professjonali, l-awtoritajiet lokali u fora rilevanti
oħra[10]. 2.2. Valutazzjoni
tal-impatt u analiżi tal-ispejjeż u tal-benefiċċji Twettqet analiżi estensiva
tal-ispejjeż u l-benefiċċji bħala parti mill-Valutazzjoni
tal-Impatt tal-eCall għat-tliet għażliet proposti, li jinkludu
l-għażla ppreferuta dwar il-miżuri regolatorji. Sa fejn hija kkonċernata l-analiżi
tal-ispejjeż u l-benefiċċji tal-għażla li ġiet
magħżula (għażla 3), kull waħda mit-tliet
miżuri regolatorji tal-eCall ppjanati (sistema mmuntata fil-vettura,
telekomunikazzjoni u PSAP) ma tistax tiġi sseparata mit-tnejn l-oħra.
Filwaqt li l-ispejjeż għall-PSAPs jistgħu jiġu stmati
separatament mill-partijiet tas-sistema mmuntata fil-vettura u
mit-telekomunikazzjoni tal-eCall, il-benefiċċji jistgħu
jiġu stmati biss għall-inizjattiva sħiħa tal-eCall. 2.2.1. Analiżi
tal-ispejjeż ewlenin għall-PSAPs L-ispejjeż marġinali ta’
mmaniġġar tal-eCalls tal-112 għal kull PSAP mgħammra biex
jittrattaw is-sejħiet fuq in-numru 112 u b’kapaċitajiet ta’
lokalizzazzjoni — is-sejħiet E112 (obbligu skont id-Direttiva Servizz
Universali[11])
— ikopru dan li ġej: –
Server tal-modem tal-istess frekwenza (minn
EUR 3 000 sa EUR 20 000, skont l-għadd tal-eCalls) –
Softwer li jiddekowdja l-MSD (sett minimu ta’
dejta) u l-integrazzjoni mas-softwer tal-PSAP –
Taħriġ L-ispejjeż operattivi annwali jridu
jiżdiedu ma' dawn l-ispejjeż. Meta l-eCalls jiġu riċevuti
f’PSAP li tirċievi wkoll sejħiet oħra ta’ emerġenza,
il-maġġoranza ta’ dawn l-ispejjeż jiġu inklużi
fl-ispejjeż operattivi normali. Inkella l-ispejjeż se jiddependu
mill-għadd ta' operaturi meħtieġa biex jittrattaw l-għadd
stmat ta' eCalls[12]. L-ispejjeż stmati tal-aġġornar
tal-medja tal-PSAPs madwar EUR 1,1 miljun għal kull Stat Membru[13]. Din l-istima ġejja minn
ġabra ta' analiżijiet differenti, ibbażati fuq id-densità
tal-popolazzjoni tal-pajjiż, it-tipoloġiji tal-aċċidenti,
l-infrastrutturi tat-toroq u ta' rispons għall-emerġenzi u statistiki
ġenerali oħra. L-ispiża f'kull pajjiż tvarja b'mod
konsiderevoli skont l-għadd ta' PSAPs, iżda wkoll skont is-soluzzjoni
teknika magħżula għall-aġġornament tal-PSAPs. Ġiet pprovduta wkoll informazzjoni
addizzjonali mill-proġett pilota ta' qabel il-mobilizzazzjoni HeERO[14] (Jannar 2011 –
Jannar 2013) li involva l-awtoritajiet ta' disa' Stati Membri u
oħrajn assoċjati u erbgħin sieħeb. L-objettiv
tal-proġett huwa li jipprepara għall-mobilizzazzjoni
tal-infrastruttura neċessarja, li tinkludi t-twaqqif ta' sistema ta'
sejħiet ta' emerġenza mmuntata fil-vettura interoperabbli u armonizzata
bbażata fuq in-numru 112. Il-proġett se jkun segwit
mill-proġett pilota HeERO2 imniedi fil-bidu tal-2013 u li se jibqa’
għaddej 24 xahar, li jinvolvi disa’ Stati Membri addizzjonali u
pajjiżi assoċjati. Il-proġett pilota HeERO għen biex
juri li s-soluzzjonijiet innovattivi jistgħu jnaqqsu l-ispejjeż meta
mqabbla mal-approċċ pjuttost konservattiv segwit fil-valutazzjoni
tal-impatt tal-eCall, speċjalment għal dawk l-Istati Membri fejn hemm
għadd kbir ta' PSAPs. Dan ikkonferma wkoll li l-ispejjeż stmati u
l-ispejjeż reali għall-implimentazzjoni kienu fil-limiti mistennija. 2.2.2. Analiżi
tal-benefiċċji ewlenin Il-benefiċċji identifikati permezz
tal-valutazzjoni tal-impatt u ta' diversi studji, inklużi dawk nazzjonali,
jinkludu: –
Tnaqqis tal-fatalitajiet (bil-vetturi kollha
mgħammra bl-eCall, bejn 1 % u 10 % skont id-densità
tal-popolazzjoni tal-pajjiż, l-infrastruttura tat-triq u r-rispons
għall-emerġenza)[15]. –
Tnaqqis fis-serjetà tal-ġrieħi (bejn
2 % u 15 %)[16] –
Tnaqqis fl-ispejjeż ta' konġestjoni
kkawżati mill-aċċidenti tat-traffiku. Dan jirriżulta
mit-titjib fil-ġestjoni tal-aċċidenti, peress li
l-aċċident jiġi nnotifikat mill-ewwel lill-PSAPs u għalhekk
jista' jiġi ttrasferit għall-kontroll tal-ġestjoni tat-traffiku
x-xieraq, li jista' jinforma mal-ewwel lill-utenti tat-triq u b'hekk jgħin
biex inaqqas l-aċċidenti sekondarji. –
Faċilitazzjoni akbar tass-servizzi ta'
salvataġġ u żieda fis-sigurtà tat-tim ta' salvataġġ
(eż. il-ħaddiema tat-tifi tan-nar) meta ssir l-estrazzjoni
tal-okkupanti li jkunu maqbuda fil-vettura, peress li fost l-oħrajn, l-MSD
se jipprovdi informazzjoni dwar it-tip ta' fjuwil. –
Tnaqqis fl-infrastruttura ta' għajnuna SOS ta'
maġenb it-triq, peress li kull utent ikun kapaċi jagħti bidu
għal sejħa ta' emerġenza mill-vettura tiegħu. 2.2.3. Proporzjon
bejn l-ispejjeż u l-benefiċċji Il-benefiċċji ġew ukoll stmati fi
flus[17]
u ġiet imfassla analiżi tal-ispejjeż u l-benefiċċji
għall-għażliet differenti u għat-tipi ta' kategoriji
differenti affettwati. L-istimi huma kkalkulati sas-sena 2033 peress li
din hija s-sena mistennija għall-penetrazzjoni sħiħa tas-servizz
tal-eCall fil-każ tal-għażla ta' politika ppreferuta. || Għażla ta' Politika 1 L-ebda azzjoni min-naħa tal-UE || Għażla ta’ Politika 2 Approċċ volontarju || Għażla ta’ Politika 3 Miżuri regolatorji Proporzjon bejn il-Benefiċċji u l-Ispejjeż || 0.29 || 0.68 || 1.74 3. L-ELEMENTI LEGALI TAL-PROPOSTA 3.1. Bażi
legali L-Artikolu 6(2)
tad-Direttiva 2010/40/UE jeħtieġ li l-Kummissjoni
tippreżenta proposta lill-Parlament Ewropew u lill-Kunsill sa mhux aktar
tard minn 12-il xahar wara l-adozzjoni tal-ispeċifikazzjonijiet
meħtieġa għal xi azzjoni ta’ prijorità, fejn xieraq u wara li
tkun wettqet valutazzjoni tal-impatt li tinkludi analiżi tal-ispejjeż
u l-benefiċċji, f’konformità mal-Artikolu 294 tat-TFUE dwar
il-varar ta’ dawn l-ispeċifikazzjonijiet. 3.2. Sussidjarjetà
u proporzjonalità Skont il-prinċipju tas-sussidjarjetà
(l-Artikolu 5(3) tat-Trattat tal-UE), azzjoni fuq il-livell tal-UE
għandha tittieħed biss fejn l-għanijiet previsti ma jkunux
jistgħu jinkisbu b’mod suffiċjenti mill-Istati Membri waħedhom,
u li għaldaqstant, minħabba l-iskala jew l-effetti tal-azzjoni
proposta, jistgħu jinkisbu aħjar mill-UE. Is-sikurezza stradali hija kwistjoni ta'
tħassib kbir fl-Unjoni Ewropea kollha u għaċ-ċittadini
kollha tagħha: 500 miljun ċittadin fis-27 Stat Membru
jużaw aktar minn 230 miljun vettura fuq madwar 5 miljun km ta'
toroq. L-għan tal-inizjattiva ta' eCall interoperabbli fl-UE kollha huwa
li tintroduċi fil-vetturi kollha tal-Ewropa l-funzjonalitajiet minimi
meħtieġa biex jiżguraw it-trattar adegwat tas-sejħiet ta'
emerġenza mis-servizz ta' rispons għall-emerġenzi.
Bħalissa, hemm aktar minn 100 miljun vjaġġ bit-triq kull
sena madwar id-diversi Stati Membri, u l-għadd qed jiżdied
minħabba l-konsolidazzjoni ulterjuri tal-Unjoni Ewropea (permezz
tal-moviment liberu ta’ merkanzija, persuni u servizzi). Hija
meħtieġa azzjoni fil-livell tal-UE sabiex jiġu ggarantiti
l-interoperabbiltà u l-kontinwità tas-servizz madwar l-Ewropa, li ma
jistgħux jinkisbu b'mod sodisfaċenti mill-Istati Membri
waħedhom. Barra minn hekk, meta tittieħed azzjoni fuq livell tal-UE
bl-użu tal-istandards komuni Ewropej tal-eCall approvati
mill-Organizzazzjonijiet Ewropej għall-Istandardizzazzjoni (CEN u ETSI),
se jiġi żgurat il-forniment effiċjenti tas-servizz ta' rispons
għall-emerġenzi madwar l-Ewropa, pereżempju fil-każ ta'
vetturi li qed jivvjaġġaw barra l-pajjiż, u se jgħin biex
tiġi evitata l-frammentazzjoni tas-suq (li tista' sseħħ
b'riżultat tal-proliferazzjoni ta' soluzzjonijiet privati nazzjonali u/jew
ta' proprjetà li huma implimentati b'modi differenti). L-eCall fl-UE kollha, f'konformità
man-numru 112 u mal-mobilizzazzjoni tal-E112, ġiet imfassla b'tali
mod li jitnaqqas l-impatt fuq il-partijiet interessati kollha fil-katina
tal-valur (l-industrija tal-karozzi, l-operaturi tan-netwerk mobbili, l-Istati
Membri il-PSAPs), u li jitqassam dan l-impatt b'mod ġust. Il-proposta attwali tistieden lill-Istati
Membri jvaraw l-infrastruttura tal-PSAP tal-eCall meħtieġa
għar-riċeviment u t-trattament xieraq tal-eCalls kollha
fit-territorju tagħhom, skont l-ispeċifikazzjonijiet stabbiliti minn
Regolament ta’ Delega tal-Kummissjoni (UE) Nru 305/2013 tas-26 ta’
Novembru 2012 li jissupplimenta d-Direttiva 2010/40/UE tal-Parlament Ewropew u
tal-Kunsill fir-rigward ta' forniment armonizzat ta’ eCalls interoperabbli
fl-UE kollha, sabiex jiġu żgurati l-kompatibbiltà, l-interoperabilità
u l-kontinwità tais-servizz tal-eCalls offrut madwar l-UE kollha. Il-pjan huwa
li l-ispejjeż finanzjarji u amministrattivi għall-awtoritajiet
nazzjonali/reġjonali jinżammu kemm jista' jkun baxxi, proporzjonati
mal-objettivi li jridu jinkisbu. Parti sostanzjali tal-implimentazzjoni
(l-organizzazzjoni tal-PSAPs) tibqa' f'idejn il-korpi nazzjonali li jieħdu
d-deċiżjonijiet L-infrastruttura tal-PSAPs se tkun
aġġornata mill-Istati Membri bl-aktar mod adattat
għall-arkitettura nazzjonali/lokali tagħhom, u b'hekk tirrispetta
l-kwistjonijiet u ċ-ċirkustanzi speċifiċi li japplikaw
f'kull Stat Membru. Kull Stat Membru se jkun kapaċi jorganizza s-servizzi
ta’ emerġenza tiegħu bil-mod li l-aktar kosteffikaċi u xieraq
għall-bżonnijiet tiegħu, inkluża l-possibbiltà li
jiffiltraw sejħiet li mhumiex ta’ emerġenza u ma jistgħux ikunu
indirizzati mill-PSAPs tal-eCall, b’mod partikolari fil-każ ta’ eCalls
attivati manwalment. 3.3. Spjegazzjoni
dettaljata tal-proposta L-Artikolu 1 jitlob lill-Istati Membri biex
ivaraw l-infrastruttura tal-eCall tal-PSAP meħtieġa biex l-eCalls
kollha jiġu riċevuti u ttrattati fit-territorju tagħhom mhux
aktar tard mill-1 ta'Ottubru 2015. L-Artikolu 2 jeħtieġ li l-Istati
Membri jirrappurtaw lill-Kummissjoni dwar l-istat tal-implimentazzjoni ta’ din
id-Deċiżjoni mhux aktar tard minn 18-il xahar wara d-dħul
fis-seħħ ta’ din id-Deċiżjoni. L-Artikolu 3 jipprevedi li
d-Direttiva għandha tidħol fis-seħħ fl-20 jum wara dak
tal-pubblikazzjoni tagħha f'Il-Ġurnal Uffiċjali tal-Unjoni
Ewropea. 4. IMPLIKAZZJONIJIET BAĠITARJI Ma hemm l-ebda
implikazzjoni baġitarja għall-baġit tal-UE. 5. ELEMENTI FAKULTATTIVI ·
Żona Ekonomika Ewropea L-att propost jikkonċerna kwistjoni
taż-ŻEE u għalhekk għandu jestendi għaż-Żona
Ekonomika Ewropea. 2013/0166 (COD) Proposta għal DEĊIŻJONI TAL-PARLAMENT EWROPEW
U TAL-KUNSILL dwar il-varar ta’ eCall interoperabbli fl-UE
kollha (Test b'rilevanza għaż-ŻEE) IL-PARLAMENT
EWROPEW U L-KUNSILL TAL-UNJONI EWROPEA, Wara li kkunsidraw it-Trattat dwar
il-Funzjonament tal-Unjoni Europea, u b’mod partikolari l-Artikolu 91
tiegħu, Wara li kkunsidraw
il-proposta mill-Kummissjoni Ewropea, Wara li bagħtu
l-abbozz tal-att leġiżlattiv lill-Parlamenti nazzjonali, Wara li kkunsidraw
l-opinjoni tal-Kumitat Ekonomiku u Soċjali Ewropew[18] Wara li kkunsidraw
l-opinjoni tal-Kumitat tar-Reġjuni[19] Filwaqt li jaġixxu
skont il-proċedura leġiżlattiva ordinarja. Billi: (1) Skont
l-Artikolu 3(d) tad-Direttiva 2010/40/UE tal-Parlament Ewropew u
tal-Kunsill tas-7 ta’ Lulju 2010 dwar il-qafas għall-varar ta’ Sistemi ta’
Trasport Intelliġenti fil-qasam tat-trasport bit-triq u
għall-interkonnessjonijiet ma’ modi oħrajn ta’ trasport [20]
id-dispożizzjoni armonizzata għal servizz interoperabbli eCall tul
l-UE kollha tikkostitwixxi azzjoni ta' prijorità għall-iżvilupp u
l-użu ta' speċifikazzjonijiet u standards. (2) L-Artikolu 6
tad-Direttiva 2010/40/UE jirrikjedi lill-Kummissjoni tadotta
speċifikazzjonijiet neċessarji biex tiżgura l-kompatibbiltà,
l-interoperabbiltà u l-kontinwità tal-varar u l-użu operattiv ta' Sistemi
tat-Trasport Intelliġenti (STI) għall-azzjonijiet ta’ prijorità. (3) Ir-Regolament Delegat
tal-Kummissjoni (UE) Nru 305/2013 tas-26 ta' Novembru 2012 li jissupplimenta
d-Direttiva 2010/40/UE tal-Parlament Ewropew u tal-Kunsill fir-rigward
forniment armonizzat ta’ eCall interoperabbli fl-UE kollha[21] li jistabbilixxi
l-ispeċifikazzjonijiet għall-aġġornament tal-infrastruttura
taċ-Ċentru li jwieġeb għas-Sejħiet marbutin
mas-Sikurezza Pubblika (PSAP) meħtieġa sabiex l-eCalls jiġu
riċevuti u ttrattati kif suppost, sabiex jiġu żgurati
l-kompatibilità, l-interoperabilità u l-kontinwità tas-servizz armonizzat ta’
eCall fl-UE kollha. (4) L-Artikolu 6(2)
tad-Direttiva 2010/40/UE jirrikjedi li l-Kummissjoni tippreżenta, sa
mhux aktar tard minn 12-il xahar wara l-adozzjoni tar-Regolament Iddelegat
imsemmi hawn fuq, fejn jixraq u wara li tkun wettqet valutazzjoni tal-impatt li
tinkludi analiżi tal-ispejjeż u l-benefiċċji, proposta
lill-Parlament Ewropew u lill-Kunsill f’konformità mal-Artikolu 294
tat-Trattat dwar il-Funzjonament tal-Unjoni Ewropea (TFUE) dwar
l-implimentazzjoni ta’ dawn l-ispeċifikazzjonijiet. (5) Huwa
mistenni li bit-tnaqqis fil-ħin ta’ rispons tas-servizzi ta'
emerġenza, l-eCall interoperabbli fl-UE kollha se tnaqqas l-għadd ta'
fatalitajiet fl-Unjoni kif ukoll is-severità tal-ġrieħi kkawżati
b'aċċidenti stradali. Is-servizz tal-eCall interoperabbli fl-UE
kollha huwa mistenni wkoll li jipprovdi ffrankar ta' flus għas-soċjetà
billi jtejjeb il-ġestjoni tal-inċidenti u billi jnaqqas
il-konġestjoni tat-toroq u l-aċċidenti sekondarji. (6) Sabiex jiġu żgurati
l-interoperabbiltà u l-kontinwità tas-servizz madwar l-UE kollha u jitnaqqsu
l-ispejjeż tal-implimentazzjoni għall-Unjoni kollha kemm hi, huwa
meħtieġ li l-Istati Membri kollha jużaw l-azzjoni prijoritarja
eCall skont l-Ispeċifikazzjonijiet Komuni stabbiliti fir-Regolament ta’
Delega (UE) Nru 305/2013. Dan għandu jkun mingħajr
preġudizzju għad-dritt ta’ kull Stat Membru li jvara aktar mezzi
tekniċi biex jittrattaw sejħiet oħra ta’ emerġenza. (7) Kif ġara bis-sistemi ta'
sejħiet oħra ta’ emerġenza, l-eCalls ġestiti manwalment
jistgħu jinkludu sehem sinifikanti ta’ sejħiet għall-assistenza.
Jekk meħtieġ, l-Istati Membri jistgħu jimplimentaw il-mezzi
tekniċi u organizzattivi xierqa kollha sabiex jiffilterjaw dawn
is-sejħiet biex jiġi żgurat li s-sejħiet tal-assistenza ta’
emerġenza reali biss jiġu ġestiti mill-PSAPs tal-eCall. (8) Ladarba l-għan ta’ din
id-Deċiżjoni, jiġifieri li tiżgura l-varar kkoordinat u
koerenti tas-servizz interoperabbli ta' servizz eCall madwar l-Ewropa kollha u
tiżgura l-interoperabbiltà u l-kontinwità tas-servizz madwar l-Ewropa ma
jistax jinkiseb suffiċjentement mill-Istati Membri u/jew mis-settur privat
u jista’ għalhekk, minħabba l-iskala u l-effetti tiegħu,
jinkiseb aħjar fil-livell tal-Unjoni, l-Unjoni tista’ tadotta miżuri,
f’konformità mal-prinċipju tas-sussidjarjetà kif stabbilit fl-Artikolu 5
tat-Trattat dwar l-Unjoni Ewropea. F’konformità mal-prinċipju tal-proporzjonalità
kif stabbilit f’dak l-Artikolu, din id-Direttiva ma tmurx lil hinn minn dak li
hu meħtieġ sabiex jinkiseb dak l-għan. ADOTTAW DIN
ID-DEĊIŻJONI: Artikolu 1 L-Istati Membri għandhom ivaraw mhux
iktar tard mill-1 ta’ Ottubru 2015 l-infrastruttura tal-eCall tal-PSAP
meħtieġa riċevuti u ttrattati kif suppost ta’ eCalls kollha,
jekk meħtieġ mnaddfa mis-sejħiet li mhumiex ta’ emerġenza,
fit-territorju tagħhom, skont l-ispeċifikazzjonijiet stabbiliti
b’Regolament ta' Delega (UE) Nru 305/2013, sabiex jiġu żgurati
l-kompatibbiltà, l-interoperabilità u l-kontinwità ta’ servizz ta’ eCall
interoperabbli fl-UE kollha. Dan huwa mingħajr preġudizzju
għad-dritt ta' kull Stat Membru se jkun kapaċi jorganizza s-servizzi
ta’ emerġenza tiegħu bil-mod li huwa l-aktar kosteffikaċi u
xieraq għall-bżonnijiet tiegħu, inkluża l-possibbiltà li
jiffiltraw sejħiet li mhumiex ta’ emerġenza u ma jistgħux ikunu
indirizzati mill-PSAPs tal-eCall, b’mod partikolari fil-każ ta’ eCalls
attivati manwalment. Artikolu 2 Sa mhux aktar tard minn 18-il xahar wara
d-dħul fis-seħħ ta’ din id-Deċiżjoni, l-Istati Membri
għandhom jirrappurtaw lill-Kummissjoni dwar l-istat tal-implimentazzjoni
ta’ din id-Deċiżjoni. Dan ir-rapport
għandu jinkludi minn tal-inqas il-lista ta’ awtoritajiet kompetenti
għall-valutazzjoni tal-konformità tal-operazzjonijiet tal-PSAPs ta’ eCall,
bil-lista tar-rekwiżiti elenkati fl-Artikolu 3 tar-Regolament
tad-Delega (UE) Nru 305/2013, il-lista u l-kopertura ġeografika
tal-PSAPs tal-eCall, id-deskrizzjoni tat-testijiet ta’ konformità u
d-deskrizzjoni tal-protokolli dwar il-privatezza u l-protezzjoni tad-dejta. Artikolu 3 Din id-Deċiżjoni għandha
tidħol fis-seħħ fl-20 jum wara dak tal-pubblikazzjoni
tagħha f'Il-Ġurnal Uffiċjali tal-Unjoni Ewropea. Artikolu 4 Din id-Deċiżjoni
hija indirizzata lill-Istati Membri. Magħmul fi Brussell, Għall-Parlament
Ewropew Għall-Kunsill Il-President Il-President [1] COM(2005) 431 finali. [2] COM(2009) 434. [3] ĠU L 207, 6.8.2010, p. 1. [4] P7_TA(2012)0274. [5] COM(2012) 636 finali. [6] ĠU L 91, 3.4.2013, p. 1. [7] SEC(2011) 1019 finali. [8] 2011/750/EU. [9] Ara l-aġenda u r-rapport fil-qosor http://ec.europa.eu/transparency/regexpert/index.cfm?do=groupDetail.groupDetail&groupID=1941 [10] http://ec.europa.eu/transparency/regexpert/index.cfm?do=groupDetail.groupDetail&groupID=2736 [11] Id-Direttiva 2002/22/KE, Artikolu 26 [12] SEC(2011) 1019 finali, Anness III [13] SEC(2011) 1019 finali, Anness XIV [14] http://ec.europa.eu/information_society/apps/projects/factsheet/index.cfm?project_ref=270906 [15] L-istudji SEiSS, E-MERGE, eIMPACT u AINO. Għal
analiżi aktar iddettaljata dwar il-kalkoli, jekk jogħġbok ara
l-Anness IV tal-Valutazzjoni tal-Impatt tal-eCall. [16] L-istudji SEiSS, E-MERGE, eIMPACT u AINO. Għal
analiżi aktar iddettaljata dwar il-kalkoli, jekk jogħġbok ara
l-Anness IV tal-Valutazzjoni tal-Impatt tal-eCall. [17] SEC(2011) 1019 finali, Annessi IV u XIV. [18] ĠU C , , p. . [19] ĠU C , , p. . [20] ĠU L 207, 6.8.2010, p. 1. [21] ĠU L 91, 3.4.2013, p. 1.