EUR-Lex Access to European Union law
This document is an excerpt from the EUR-Lex website
Document 52013DC0420
REPORT FROM THE COMMISSION TO THE EUROPEAN PARLIAMENT AND THE COUNCIL on the implementation of Regulation (EC) No 1445/2007 of the European Parliament and of the Council of 11 December 2007 establishing common rules for the provision of basic information on Purchasing Power Parities and for their calculation and dissemination
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni tar-Regolament (KE) Nru 1445/2007 tal-Parlament Ewropew u tal-Kunsill tal-11 ta’ Diċembru 2007 li jistabbilixxi regoli komuni għall-provvista ta’ informazzjoni bażika dwar il-Paritajiet tas-Setgħa tal-Infiq u għall-kalkolu u d-disseminazzjoni tagħhom
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni tar-Regolament (KE) Nru 1445/2007 tal-Parlament Ewropew u tal-Kunsill tal-11 ta’ Diċembru 2007 li jistabbilixxi regoli komuni għall-provvista ta’ informazzjoni bażika dwar il-Paritajiet tas-Setgħa tal-Infiq u għall-kalkolu u d-disseminazzjoni tagħhom
/* COM/2013/0420 final */
RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-implimentazzjoni tar-Regolament (KE) Nru 1445/2007 tal-Parlament Ewropew u tal-Kunsill tal-11 ta’ Diċembru 2007 li jistabbilixxi regoli komuni għall-provvista ta’ informazzjoni bażika dwar il-Paritajiet tas-Setgħa tal-Infiq u għall-kalkolu u d-disseminazzjoni tagħhom /* COM/2013/0420 final */
RAPPORT TAL-KUMMISSJONI LILL-PARLAMENT
EWROPEW U LILL-KUNSILL dwar l-implimentazzjoni tar-Regolament (KE)
Nru 1445/2007 tal-Parlament Ewropew u tal-Kunsill tal-11 ta’ Diċembru 2007
li jistabbilixxi regoli komuni għall-provvista ta’ informazzjoni bażika dwar
il-Paritajiet tas-Setgħa tal-Infiq u għall-kalkolu u d-disseminazzjoni tagħhom (Test b'rilevanza għaż-ŻEE) 1. Introduzzjoni Dan ir-rapport jeżamina d-dispożizzjonijiet
tar-Regolament (KE) Nru 1445/2007 tal-Parlament Ewropew u tal-Kunsill tal-11 ta’ Diċembru 2007
li jistabbilixxi regoli komuni għall-provvista ta’ informazzjoni bażika dwar
il-Paritajiet tas-Setgħa tal-Infiq u għall-kalkolu u d-disseminazzjoni tagħhom
(minn hawn ’il quddiem imsejjaħ “ir-Regolament”), kif jeżiġi l-Artikolu 14
tiegħu. Ir-rapport jiġbor fil-qosor l-istat ta’
implimentazzjoni tar-Regolament u l-iżviluppi varji li kien hemm mill-adozzjoni
tiegħu ’l hawn. Jipproponi reviżjoni tal-qafas regolatorju għall-Paritajiet
tal-Kapaċità tal-Akkwist biex dan ikun jirrifletti dawk l-iżviluppi, kif ukoll
biex jinġieb f’konformità mat-Trattat ta’ Lisbona. 2. Sfond Il-Paritajiet tal-Kapaċità tal-Akkwist
(il-PPPs) huma indikaturi tad-differenzi fil-livell
tal-prezzijiet minn pajjiż għall-ieħor. Dawn jindikaw kemm-il unità tal-valuta
tiswa kwantità partikulari ta’ prodotti u servizzi f’pajjiżi differenti.
Il-PPPs jistgħu jintużaw bħala rati tal-kambju tal-munita biex l-ispejjeż
mogħtija fil-muniti nazzjonali jinbidlu f'munita komuni artifiċjali
(l-Istandard tal-Poter tal-Akkwist, il-PPS), u b'hekk jiġi eliminat l-effett
tad-differenzi fil-livell tal-prezzijiet bejn pajjiż u ieħor. L-użi ewlenin tagħhom huma: ·
biex il-valuri aggregati tal-kontijiet nazzjonali
jinqalbu f’valuri aggregati tal-volum komparabbli. Il-PPPs b’mod partikolari
jistgħu jintużaw biex il-Prodott Domestiku Gross (il-PDG) ta’ pajjiżi
differenti jiġi kkumparat mingħajr ma l-figuri jiġu affettwati mil-livelli
differenti tal-prezzijiet f'dawk il-pajjiżi; ·
biex jiġu analizzati l-livelli relattivi
tal-prezzijiet bejn pajjiż u ieħor. Għal dan il-għan,
il-PPPs jiġu diviżi bir-rata tal-iskambju nominali attwali biex jinkiseb indiċi
tal-livell tal-prezzijiet (PLI) li jesprimi l-livell tal-prezzijiet ta’ pajjiż
partikolari meta kkumparat ma' oħrajn. Il-PPPs għandhom ukoll għanijiet amministrattivi
importanti. Għandhom rwol fid-definizzjoni tal-kriterji tal-eliġibbiltà
tal-Fondi Strutturali u tal-Fond ta' Koeżjoni. L-indikatur prinċipali li
jiddetermina l-eliġibbiltà għall-Fondi Strutturali huwa l-PDG reġjonali per
capita ddeflatat mill-PPPs, filwaqt li dak għall-Fond ta’ Koeżjoni huwa
l-Introjtu Nazzjonali Gross (l-ING) iddeflatat mill-PPPs. Il-Fond Monetarju Internazzjonali (FMI) juża
l-PPPs meta jiġi biex jiddeċiedi l-kwoti tal-membri tiegħu. Is-somma
sottoskrtta tal-kwota ta’ pajjiż tiddetermina r-riżorsi finanzjarji li huwa
obbligat jipprovdi lill-FMI, fost affarijiet oħrajn. Il-piż tal-PDG ddeflatat
mill-PPPs fil-formola għall-kalkolu tal-kwota huwa ta’ 20 fil-mija. L-Eurostat jipproduċi l-PPPs annwali għal 37
pajjiż: is-27 Stat Membru tal-UE, tliet Stati Membri tal-Assoċjazzjoni Ewropea
tal-Kummerċ Ħieles (l-EFTA), pajjiż wieħed aderenti, erba' pajjiżi kandidati u
żewġ pajjiżi li huma kandidati potenzjali[1]
Il-produzzjoni tal-PPPs hija eżerċizzju multilaterali li jinvolvi l-Istituti
Nazzjonali tal-Istatistika tal-pajjiżi parteċipanti, l-Eurostat u
l-Organizzazzjoni għall-Kooperazzjoni u l-Iżvilupp Ekonomiċi (l-OECD).
L-eżerċiżżju huwa magħruf bħala l-“programm tal-PPP”. L-Eurostat ilu jipproduċi l-PPPs sa
mis-sebgħinijiet, iżda kien biss fl-2007 li l-programm tal-PPP ingħata bażi
legali soda permezz ta’ Regolament. Dan prinċipalment ikkodifika l-prattiki ta’
dak iż-żmien, u żgura l-ġbir sostenibbli tad-dejta bażika u l-kalkolu u
d-disseminazzjoni tal-PPPs. Il-karatteristika l-ġdida ewlenija tiegħu kienet
it-twaqqif ta' sistema formalizzata tal-kontroll tal-kwalità. Sa mill-2007 ’l hawn, il-programm tal-PPP kompla
jiżviluppa. Ġiet introdotta metodoloġija ġdida jew se tiġi introdotta b’mod
imminenti f’għadd ta’ oqsma importanti bħall-edukazzjoni, is-saħħa, l-enerġija
u l-bini (ara t-Taqsima 4.2). Il-programm tal-PPP huwa relatat mill-qrib
mal-programm tal-kontijiet nazzjonali tal-Eurostat minħabba li huwa bbażat fuq
is-Sistema Ewropea tal-Kontijiet (l-ESA). L-adozzjoni tal-verżjoni tal-2010
tal-ESA u l-implimentazzjoni tagħha fl-2014 se tkun riflessa wkoll fil-programm
tal-PPP. L-Artikolu 14 tar-Regolament jeżiġi li
d-dispożizzjonijiet tiegħu jiġu eżaminati ħames snin wara d-dħul fis-seħħ
tiegħu. L-Artikolu jgħid ukoll: “Għandu jkun rivedut, jekk ikun xieraq, fuq
il-bażi ta’ rapport u proposta tal-Kummissjoni, imressqa quddiem il-Parlament
Ewropew u l-Kunsill.” Dan ir-rapport jipproponi li r-Regolament jiġi
rivedut u joffri għadd ta’ suġġerimenti għal dan il-għan. 3. Implimentazzjoni tar-Regolament 3.1. Trażmissjoni tad-dejta bażika L-Istati Membri tal-UE u l-pajjiżi tal-EFTA kollha
jikkonformaw bis-sħiħ mar-rekwiżiti rigward it-trażmissjoni tad-dejta stipulati
fir-Regolament. Dan jinkludi l-kompletezza, il-frekwenza, il-puntwalità u
l-osservanza tal-istandards minimi tal-kwalità ddefiniti fl-Anness I
tar-Regolament. Il-pajjiżi aderenti u l-pajjiżi kandidati kollha
(ħlief għall-Montenegro) wkoll huma diġà konformi għal kollox. Il-Montenegro u
ż-żewġ pajjiżi tal-Balkani tal-Punent li huma pajjiżi kandidati potenzjali
jikkonformaw, minn ftit sa ħafna, mar-rekwiżiti. Id-dgħjufijiet ewlenin
identifikati għal dawn il-pajjiżi għandhom x’jaqsmu mal-provvediment ta’ dejta
ddettaljata dwar il-kontijiet nazzjonali. 3.2. Kalkolu u disseminazzjoni
tal-PPPs L-Eurostat jikkalkula u jxerred il-PPPs fuq bażi
annwali, hekk li jmur lil hinn mir-rekwiżiti minimi tar-Regolament. L-ewwel
stimi tal-PPPs għas-sena t jiġu ppubblikati f’Ġunju tas-sena t+1, u jkun
hemm reviżjonijiet sussegwenti f’Diċembru tas-sena t+1, f’Diċembru
tas-sena t+2 u f’Diċembru tas-sena t+3 (stimi finali). Dawn il-PPPs
finali ma jerġgħux jiġu riveduti, skont ir-Regolament. L-Eurostat jippubblika l-PPPs, l-indiċi tal-livell
tal-prezzijiet, l-indiċi tal-volum per capita u għadd ta’ indikaturi oħrajn
għal 60 kategorija. 3.3. Manwal dwar il-metodoloġija Ir-Regolament jitlob lill-Eurostat jipproduċi
manwal dwar il-metodoloġija u jżommu aġġornat. L-ewwel verżjoni tal-Manwal
tal-Eurostat u tal-OECD dwar il-metodoloġija b’rabta mal-Paritajiet
tal-Kapaċità tal-Akkwist, bl-Ingliż imsejjaħ “Eurostat-OECD Methodological
Manual on Purchasing Power Parities”, ġiet ippubblikata lejn l-aħħar tal-2006.
Fl-2012, il-Manwal ġie rrivedut kompletament u aġġornat biex ikun jirrifletti
l-aktar metodoloġija riċenti. Il-Manwal huwa disponibbli fuq il-websajt
tal-Eurostat[2]. 3.4. Kontroll tal-kwalità Ir-Regolament (fl-Artikolu 7 tiegħu)
introduċa proċess formali ta’ kontroll tal-kwalità fil-programm tal-PPP.
Il-pajjiżi kollha pprovdew sett strutturat ta’ dokumenti dwar is-sorsi u l-metodi
tagħhom għall-ġbir u l-provvediment tad-dejta bażika. Is-sett jikkonsisti minn
rapport ta’ stħarriġ għal kull stħarriġ tal-prezzijiet tal-prodotti
għall-konsumaturi (ara t-Taqsima 5 tal-Anness I tar-Regolament), kif
ukoll minn “Inventarju” tas-sorsi u tal-metodi, li jagħti deskrizzjoni sħiħa
tal-mod kif ġie implimentat ir-Regolament (ara l-paragrafu 5.3.1
tal-Anness I tar-Regolament). Għaż-żewġ tipi ta’ informazzjoni,
l-istruttura hija stipulata fir-Regolament tal-Kummissjoni (UE) Nru 193/2011
tat-28 ta’ Frar 2011 li jimplimenta r-Regolament (KE) Nru 1445/2007
tal-Parlament Ewropew u tal-Kunsill rigward is-sistema tal-kontroll tal-kwalità
użata għall-Paritajiet tas-Setgħa tal-Infiq. Dan ir-Regolament tal-Kummissjoni
kien meħtieġ mill-Artikolu 7(4) tar-Regolament. Fl-2011 l-Eurostat ta bidu għall-valutazzjonijiet
formali tal-prattiki tal-Istati Membri (ara l-paragrafu 5.3.2
tal-Anness I tar-Regolament), wara perjodu li fih il-pajjiżi ħolqu abbozzi
tal-Inventarji tagħhom. Sal-aħħar tal-2012, 10 pajjiżi kienu sarulhom żjarat u
valutazzjonijiet mill-Eurostat. Ir-rapporti ta’ valutazzjoni huma disponibbli
fuq il-websajt tal-Eurostat. Dawn il-valutazzjonijiet jinkludu analiżi fil-fond
tas-sorsi u tal-metodi użati minn kull pajjiż u verifika tal-konformità tal-pajjiż
partikulari mar-Regolament u mal-manwal dwar il-metodoloġija. 3.5. Finanzjament Il-PPPs huma essenzjalment statistiki internazzjonali
u għandhom għanijiet nazzjonali limitati. Din hija r-raġuni għaliex
l-Artikolu 13 tar-Regolament jistipula li l-Istati Membri għandhom
jirċievu kontribuzzjoni finanzjarja mill-Kummissjoni. Din il-kontribuzzjoni
tammonta għal massimu ta’ 70 % tal-ispejjeż eliġibbli skont ir-regoli
rigward l-għotjiet tal-Kummissjoni. Il-Kummissjoni qed tipproponi li żżomm dan
l-appoġġ finanzjarju, li huwa meħtieġ biex tkun żgurata s-sostenibbiltà
tal-programm tal-PPP. 4. Żviluppi li kien hemm mill-adozzjoni
tar-Regolament ’l hawn 4.1. Analiżi kontinwa Fl-2010 twettqet analiżi kontinwa tal-programm
tal-PPP fil-kuntest tal-Qafas tal-Assigurazzjoni tal-Kwalità tal-Eurostat.
L-analiżi kontinwa kienet tikkonsisti minn stħarriġ fost l-utenti, stħarriġ
fost is-sħab (prinċipalment l-Istituti Nazzjonali tal-Istatistika) u
awtovalutazzjoni mill-Eurostat. Is-sommarju eżekuttiv tar-rapport finali huwa
disponibbli fuq il-websajt tal-Eurostat[3]. L-analiżi kkonkludiet li l-utenti u s-sħab kienu
kuntenti ħafna bil-kwalità tal-PPPs ippubblikati. Fiha nsibu hekk: “Il-produzzjoni tal-PPPs Ewropej hija bbażata
fuq ir-Regolament tal-PPPs u dan jiżgura livell għoli ta’ armonizzazzjoni
tad-dejta dwar il-PPPs. Barra minn hekk, il-ġbir tad-dejta jissejjes fuq bażi
metodoloġika qawwija u fuq definizzjonijiet u nomenklaturi Ewropej u
internazzjonali stabbiliti sew. Il-ħidma fil-programm tal-PPP hija organizzata,
ikkoordinata u ggwidata b'mod effiċjenti mill-Eurostat u mill-OECD. Il-piż
tar-rispons huwa baxx ħafna għall-individwi jew l-intrapriżi tan-negozju. L-użu
ta’ għodod komuni tas-softwer għall-ġestjoni tal-lista tal-oġġetti u għad-dħul
u l-validazzjoni tad-dejta u ta' standards tat-trażmissjoni tad-dejta
jiffaċilita ferm il-ħidma tal-Eurostat u tas-sħab tiegħu." Ir-rapport tal-analiżi kien fih sett ta’
rakkomandazzjonijiet li l-Eurostat qed isegwi. 4.2. Metodoloġija ġdida f’oqsma
speċjali Il-metodoloġija biex jiġu kkumparati l-prezzijiet
u l-volumi ta’ prodotti u servizzi differenti minn pajjiż għall-ieħor qed
tevolvi kontinwament. ·
Fil-qasam tal-edukazzjoni, l-Eurostat
introduċa metodoloġija ġdida fl-2008. Din tkejjel il-volum tal-produzzjoni
direttament, minflok ma tibbaża l-PPPs fuq il-prezzijiet tal-inputs
(bħas-salarji tal-għalliema). Dan il-metodu jintuża għall-PPPs tas-snin ta’
referenza mill-2005 ’l quddiem. ·
Għas-saħħa, fl-2013 għandha tiġi introdotta
metodoloġija ġdida, żviluppata flimkien mal-OECD, għas-snin ta’ referenza mill-2010
’l quddiem. Dan il-metodu l-ġdid huwa bbażat fuq l-evalwazzjoni
tal-kważi-prezzijiet għal sett ta' trattamenti mediċi standard. ·
Għall-kostruzzjoni, l-implimentazzjoni
tal-istħarriġ inbidlet fl-2010 billi l-ġbir tad-dejta nqasam fuq perjodu ta’
sentejn u simultanjament tnaqqas l-għadd ta’ proġetti tal-kostruzzjoni li
l-prezzijiet tagħhom għandhom jiġu ffissati. ·
Fl-aħħar nett, fil-qasam tal-enerġija (b'mod
aktar speċifiku għall-konsum tal-gass u tal-elettriku), l-Eurostat qed
jisfrutta s-sinerġiji li hemm mal-Istatistiki dwar il-Prezz tal-Enerġija[4]. It-titjib fil-metodoloġija huwa kontinwu u se
jibqa’ għaddej. Madanakollu, kull meta jiġi introdott metodu ġdid, tieqaf
il-kontinwità fis-serje kronoloġika tal-PPPs, minħabba li d-dejta ta' qabel
l-innovazzjoni ma tibqax strettament komparabbli mad-dejta li tinġabar wara
l-istess innovazzjoni[5].
Ir-Regolament, fl-Artikolu 9(4) tiegħu, jgħid li l-PPPs finali ppubblikati
ġeneralment ma jiġux riveduti. Dan l-Artikolu effettivament ma jħallix
lill-Eurostat jipprovdi servizz aħjar lill-utenti, li jkun possibbli li kieku
l-metodu l-ġdid kellu jiġi applikat b’mod retroattiv għall-iktar dejta antika
possibbli fis-serje. Din hija r-raġuni għaliex dan ir-rapport jipproponi li
jiġi investigat jekk il-politika tar-Regolament dwar ir-reviżjoni tistax issir
inqas severa. L-adozzjoni tal-metodoloġija l-ġdida f’kull qasam
teħtieġ li tiġi adattata l-klassifikazzjoni tal-intestaturi bażiċi
fl-Anness II tar-Regolament. 4.3. Klassifikazzjoni tal-konsum
individwali skont l-iskop tiegħu (COICOP) Għall-għanijiet tal-kalkoli tal-PPPs, in-nefqa fuq
il-konsum tal-unitajiet domestiċi tinqasam f'kategoriji li jittieħdu
mill-Klassifikazzjoni tal-konsum individwali skont l-iskop tiegħu (COICOP). Il-verżjoni tal-COICOP li ntlaħaq qbil dwarha
fil-livell internazzjonali tasal sal-livell tal-kategorija, li jkun fih erba'
figuri. Din mhix iddettaljata biżżejjed għal ċerti applikazzjonijiet
tal-istatistika, u minħabba f’hekk hemm verżjonijiet differenti tal-COICOP
fil-livell tas-sottokategoriji, li jkun fih ħames figuri. Fl-Unjoni Ewropea, ġew żviluppati tliet
verżjonijiet tal-COICOP li jinkludu livell b’ħames figuri: waħda
għall-Istħarriġ dwar il-Baġit tal-Unitajiet Domestiċi (l-HBS), waħda
għall-Indiċi Armonizzat tal-Prezzijiet tal-Konsum (l-HICP) u waħda għall-PPPs.
It-tliet verżjonijiet mhumiex l-istess u dan jikkomprometti l-komparabbiltà
bejn it-tliet setturi statistiċi. L-armonizzazzjoni tal-COICOP għall-PPPs u
tal-COICOP għall-HICP hija ta’ importanza partikolari għall-Programm tal-PPP:
minħabba li se ttejjeb il-kwalità tal-estrapolazzjonijiet tal-PPPs mis-snin
tal-istħarriġ għas-snin fejn ma kienx hemm stħarriġ li twettqu bl-użu tal-HICP. Fl-2010, l-Eurostat beda proċess ta’ żvilupp ta’
verżjoni tal-COICOP li tinkludi livell b’ħames figuri biex tintuża għall-istatistika
kollha tal-Eurostat. Il-proċess kien limitat għal-livell ta’ ħames figuri.
It-tibdiliet fil-livell ta’ erba’ figuri jkollu jiġi diskuss fil-kuntest ta'
reviżjoni aktar wiesgħa li tinvolvi t-Taqsima tal-Istatistika tan-Nazzjonijiet
Uniti, li tieħu ħsieb il-COICOP. L-għan fil-livell ta’ ħames figuri huwa li
titfassal klassifikazzjoni ewlenija b’sottokategoriji ddefiniti biex jilħqu
l-ħtiġijiet tal-Programm tal-PPP, tal-Programm tal-HICP u tal-HBS. Il-proċess
tlesta fl-2012. Il-klassifikazzjoni għandha tiġi introdotta fl-HICP, fil-PPPs u
fl-HBS sal-2014/l-2015. L-armonizzazzjoni tal-COICOP għall-PPPs u
tal-COICOP għall-HICP għandha twassal għal iktar konsistenza bejn il-PPPs
tal-intestaturi bażiċi u l-estrapolaturi tal-HICP tagħhom. Għandha twassal ukoll
għal iktar koerenza fil-preżentazzjoni tar-riżultati tal-PPPs u tal-HICP, u
possibbilment, fir-riżultati nfushom. Fl-aħħar nett, mhux se jkun hemm aktar
bżonn li wieħed jiġbor l-informazzjoni dwar l-indiċi tal-prezzijiet
tal-konsumatur fil-COICOP għall-PPPs b’mod separat, kif inhu l-każ dal-ħin, u
b’hekk se jitnaqqas il-piż tal-istħarriġ fuq il-pajjiżi. L-introduzzjoni tal-COICOP armonizzata li tinkludi
livell b’ħames figuri fl-eżerċizzju tal-PPPs teħtieġ li tiġi adattata
l-klassifikazzjoni tal-intestaturi bażiċi fl-Anness II tar-Regolament. 4.4. Il-verżjoni tal-2010
tas-Sistema Ewropea tal-Kontijiet Ir-Regolament, fl-Artikolu 2(2) tiegħu,
jiżgura li d-definizzjonijiet użati fil-programm tal-PPP huma kompletament
konformi ma' dawk użati fil-verżjoni tal-1995 tas-Sistema Ewropea tal-Kontijiet
(ESA 95)[6].
L-ESA 95 bħalissa qed tiġi aġġornata u Regolament ġdid tal-ESA (imsejjaħ
“ESA 2010”) se jiġi applikat mill-Istati Membri minn Settembru 2014 ’il
quddiem. L-ESA 2010 iżomm il-qafas teoretiku
tas-sistema li se jissostitwixxi. Ma hemm l-ebda differenza radikali minn
mas-sistema ta’ qablu. Barra minn hekk, it-tibdiliet se jseħħu skont
il-formazzjoni grossa tal-kapital fiss minħabba t-tibdiliet li ġew introdotti
fil-klassifikazzjoni tal-assi fissi. L-aktar tibdiliet importanti f’dan ir-rigward huma
l-klassifikazzjoni mill-ġdid tal-infiq fuq ir-riċerka u l-iżvilupp (R&Ż) u
fuq is-sistemi tal-armi militari bħala nfiq fuq l-assi fissi li għandu jiġi
inkluż taħt il-formazzjoni tal-kapital. Qabel, dan l-infiq kien jiġi ttrattat
bħala konsum intermedju. L-estensjoni tal-limitu tal-assi biex jiġi inkluż
l-infiq fuq ir-R&Ż se jgħolli kemm il-livell tal-formazzjoni grossa
tal-kapital fiss u kemm dak tal-PDG. L-inklużjoni tal-infiq fuq is-sistemi
tal-armi militari se żżid il-livell tal-formazzjoni grossa tal-kapital fiss u,
sa ċertu punt, il-livell tal-PDG, iżda se tnaqqas ukoll il-livell tas-servizzi
kollettivi minħabba li dawn huma stmati bħala t-total tal-ispejjeż
tal-produzzjoni tagħhom, u l-konsum intermedju jifforma parti minn dawn
l-ispejjeż tal-produzzjoni. L-inklużjoni tar-R&Ż u tas-sistemi tal-armi
militari fil-formazzjoni grossa tal-kapital fiss teħtieġ li tiġi adattata
l-klassifikazzjoni tal-intestaturi bażiċi fl-Anness II tar-Regolament. 4.5. Klassifikazzjoni tal-Prodotti
skont l-Attività (CPA) Is-CPA tal-2008 hija l-aktar verżjoni riċenti
tal-Klassifikazzjoni tal-Prodotti skont l-Attività. Hija reviżjoni tas-CPA tal-2002,
li kienet hija stess reviżjoni tas-CPA tal-1996. Is-CPA tal-1996 hija
l-verżjoni li ntużat fl-Anness II tar-Regolament biex jiġu ddefiniti
l-kategoriji tal-infiq fil-kuntest tal-formazzjoni grossa tal-kapital fiss.
Is-CPA tal-2008 ġiet introdotta fil-kontijiet nazzjonali tal-Istati Membri fl-2011.
Reviżjoni tal-Anness II tar-Regolament għalhekk hija meħtieġa biex
il-klassifikazzjoni tal-PPPs tinġieb f’konformità mas-CPA l-ġdida tal-2008. 4.6. It-Trattat ta’ Lisbona Ir-Regolament jeħtieġ li jiġi adattat ukoll biex
jitqies id-dħul fis-seħħ tat-Trattat ta' Lisbona fl-2009. B’mod partikolari,
l-Artikoli li jittrattaw il-“komitoloġija” (l-Artikoli 11 u 12) jeħtieġ li
jiġu rriveduti biex jinġiebu f’konformità mal-proċeduri l-ġodda. 5. Konklużjoni Ir-Regolament tal-PPPs żgura l-affidabbiltà u
l-kwalità tal-PPPs kif ippubblikati mill-Eurostat. Madanakollu, is-sommarju
mogħti hawn fuq tal-iżviluppi li seħħew sa mill-adozzjoni tar-Regolament fl-2007
’l hawn juri l-ħtieġa għal aġġornament ġenerali tiegħu sabiex jiġu riflessi
l-prattiki u r-rekwiżiti legali attwali. Għalhekk, il-Kummissjoni qed tippjana li fl-2013
tipproponi reviżjoni tal-qafas regolatorju għall-PPPs, inkluża reviżjoni
tal-klassifikazzjoni mogħtija fl-Anness II, sabiex dan il-qafas jinġieb
f’konformità mad-dispożizzjonijiet tat-Trattat ta’ Lisbona u jkun jirrifletti
l-iżviluppi li seħħew matul dawn l-aħħar ħames snin. [1] Ovvjament ir-Regolament japplika biss għall-Istati
Membri u l-pajjiżi tal-EFTA. Il-bqija tal-pajjiżi jipparteċipaw fil-kuntest
tal-adeżjoni tagħhom jew tal-preparazzjonijiet tal-adeżjoni potenzjali tagħhom. [2] Ara http://epp.eurostat.ec.europa.eu/cache/ITY_OFFPUB/KS-RA-12-023/EN/KS-RA-12-023-EN.PDF. [3] Ara s-sit tal-internet li ġej: http://epp.eurostat.ec.europa.eu/portal/page/portal/quality/documents/PPP%20Final%20Report_Executive%20Summary_0.pdf. [4] Il-metodoloġiji l-ġodda huma
spjegati fid-dettall fil-manwal rivedut dwar il-PPPs. [5] Għal din ir-raġuni, mad-dejta tal-2005
żdied indikatur “b’” għall-“waqfa fis-serje” (bl-Ingliż imsejħa “break in
series”) fil-bażi tad-dejta ta’ disseminazzjoni tal-Eurostat għall-fatturi
varjabbli kollha li huma affettwati mill-introduzzjoni tal-metodu l-ġdid
għall-edukazzjoni. [6] Ir-Regolament tal-Kunsill (KE)
Nru 2223/96 tal-25 ta' Ġunju 1996 dwar is-sistema Ewropea
tal-kontijiet nazzjonali u reġjonali fil-Komunità.