EUR-Lex Access to European Union law
This document is an excerpt from the EUR-Lex website
Document 52013DC0181
REPORT FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS concerning the European Union Strategy for the Danube Region
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI dwar l-Istrateġija tal-Unjoni Ewropea għar-Reġjun tad-Danubju
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI dwar l-Istrateġija tal-Unjoni Ewropea għar-Reġjun tad-Danubju
/* COM/2013/0181 final */
RAPPORT TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI dwar l-Istrateġija tal-Unjoni Ewropea għar-Reġjun tad-Danubju /* COM/2013/0181 final */
RAPPORT TAL-KUMMISSJONI LILL-PARLAMENT
EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U
LILL-KUMITAT TAR-REĠJUNI dwar l-Istrateġija tal-Unjoni Ewropea
għar-Reġjun tad-Danubju 1. Introduzzjoni Ir-reġjun tad-Danubju jinkludi 14-il
pajjiż, tmienja minnhom Stati Membri tal-UE. Jilqa’ fih aktar minn
100 miljun ruħ, wieħed minn ħamsa tal-popolazzjoni tal-UE.
Il-pajjiżi huma differenti f'termini ta' saħħa ekonomika,
iżda r-Reġjun huwa interkonness sew, b’potenzjal għal aktar
integrazzjoni u tkabbir. Ir-Reġjun ittrasforma ruħu
bl-aħħar żewġ tkabbiriet tal-UE: Il-Kroazja se
tissieħeb dalwaqt. Hemm ħames pajjiżi oħra li qed
jiżviluppaw ir-rabtiet politiċi, soċjoekonomiċi u
settorjali tagħhom mal-UE f'diversi modi. Ir-reġjun għandu
pożizzjoni strateġika, li jiftaħ l-UE għall-ġirien
tagħha, ir-reġjun tal-Baħar l-Iswed, in-Nofsinhar tal-Kawkasu u
l-Asja Ċentrali. Jospita l-aktar xmara internazzjonali fid-dinja, li hija
fus ewlieni ta' trasport, baċir idroloġiku interkonness u kuritur
ekoloġiku magħruf mad-dinja kollha. Ir-Reġjun huwa għalhekk konness
permezz ta' opportunitajiet u sfidi. Il-politiki tal-pajjiżi huma
interdipendenti. Huma jistgħu madankollu jibbenefikaw bil-kbir minn
kooperazzjoni akbar u mtejba, pereżempju, fit-tlestija tal-ħolqiet
nieqsa fit-trasport, it-tnaqqis tat-tniġġis u l-periklu
mill-għargħar, tnaqqis mid-dipendenza fuq fornituri tal-enerġija
minn barra r-reġjun, u fl-indirizzar tat-tibdil demografiku jew
l-eżodu tal-imħuħ. Il-kompetittività tar-Reġjun tista'
wkoll tgawdi sostanzjalment minn azzjoni konġunta fl-oqsma tal-SMEs,
il-politiki tas-suq tax-xogħol, l-edukazzjoni u s-sigurtà. Hemm bżonn
li tittejjeb il-kapaċità istituzzjonali fil-livelli kollha. Fil-Konklużjonijiet
tal-Presidenza tat-18 ta’ Ġunju 2009 il-Kunsill Ewropew talab
lill-Kummissjoni tħejji Strateġija tal-UE għar-Reġjun
tad-Danubju (EUSDR). Il-Kummissjoni wieġbet għat-talba tal-Kunsill
fil-Komunikazzjoni tagħha tat-8 ta' Diċembru 2010.
F'April 2011, il-Kunsill approva l-Komunikazzjoni flimkien mal-Pjan ta' Azzjoni
anness magħha, li jidentifika azzjonijiet u eżempji konkreti ta’
proġetti fi 11-il Qasam ta' Prijorità tematika. Isegwi l-approċċ
użat għall-ewwel darba mill-Istrateġija tal-UE
għar-Reġjun tal-Baħar Baltiku. L-Istrateġija tipprovdi qafas integrat u
robust għall-pajjiżi u r-reġjuni biex jindirizzaw kwistjonijiet
li ma jistgħux jiġu maniġġati sodisfaċentement b’mod
iżolat, iżda minflok jeħtieġu approċċi
strateġiċi, proġetti u netwerking transnazzjonali. Tippermetti
li jkun hemm kooperazzjoni aħjar sabiex tittejjeb l-effettività,
l-ingranaġġ u l-impatt tal-politiki fil-livell tal-UE, nazzjonali u
lokali, billi jintużaw il-politiki u l-programmi eżistenti u
jinħolqu sinerġiji bejniethom. L-Istrateġija taħdem fuq livell
intermedju bejn ħidma nazzjonali u mal-UE kollha fuq suġġetti
bħar-riċerka u l-innovazzjoni, il-migrazzjoni jew is-sigurtà.
Issaħħaħ l-integrazzjoni tal-pajjiżi mal-UE, u tqarreb lejn
l-Unjoni lill-pajjiżi fil-Punent tal-Balkani, il-Moldova u r-reġjuni
tal-Ukraina. Wara 18-il xahar
ta' implimentazzjoni, huma evidenti kisbiet sinifikanti. L-Istrateġija: –
tippromwovi proġetti transnazzjonali konkreti
b'impatti fuq ir-Reġjun u tagħti impuls ġdid lill-azzjoni
fir-Reġjun; –
tappoġġja l-koordinazzjoni ta’ politiki u
fondi nazzjonali u tal-UE differenti, u twitti t-triq għal aktar koerenza
u riżultati aħjar, b’impatt ikbar għall-2014-2020; –
tiżviluppa pjattaforma ta’ kooperazzjoni
wiesgħa, tindirizza l-isfidi li ġew identifikati bħala li
jeħtieġu attenzjoni konġunta. Hemm 24 Koordinatur ta’ Oqsma
ta’ Prijorità u 14-il Punt ta' Kuntatt Nazzjonali li jmexxu 'l quddiem
l-implimentazzjoni; –
tenfasizza l-importanza politika tar-Reġjun,
permezz ta' appoġġ strateġiku fil-livell ministerjali u avvanzi
konkreti f’termini ta’ implimentazzjoni; Il-kapitoli li ġejjin jirrapportaw dwar
dawn il-kisbiet, jagħtu eżempji konkreti, filwaqt li jidentifikaw
oqsma li jeħtieġu aktar attenzjoni. Il-Kapitolu 5 jiġbor
fil-qosor it-tagħlimiet miksuba u l-Kapitolu 6
jissuġġerixxi rakkomandazzjonijiet għall-futur. 2. Proġetti, politiki u netwerks
għar-Reġjun tad-Danubju L-Istrateġija tiffoka partikolarment fuq
proġetti u inizjattivi konkreti u strateġiċi b'impatt
makroreġjonali. L-Istrateġija u l-Pjan ta’ Azzjoni tagħha huma
organizzati f'erba’ pilastri biex jiġu indirizzati l-kwistjonijiet ewlenin.
Tiffaċilita proġetti ġodda, tagħti impetu ġdid
lill-proġetti eżistenti u tappoġġja n-netwerks
għar-Reġjun[1]. 2.1. Nikkollegaw ir-Reġjun
tad-Danubju Proġetti ġodda –
Proġetti ġodda ta' riċerka fuq
bastimenti innovattivi, bħall-proġett NEWS, qed jiżviluppaw
soluzzjonijiet teknoloġiċi biex tiġġedded il-flotta
tad-Danubju, b'approċċi li huma aktar kompetittivi u
ekoloġiċi, eż. permezz ta' magni aktar effiċjenti u nodfa,
u d-disinn aħjar tal-qafas tal-bastimenti. Dan jikkontribwixxi lejn
l-għan kumplessiv li sal-2020 it-trasport sostenibbli tal-merkanzija fuq
ix-xmara jiżdied b'20 %, meta mqabbel mal-2010; –
Qed jitneħħew il-fdalijiet ta' bastimenti
mid-Danubju, is-Sava u t-Tisa u b'hekk jitjiebu l-kundizzjonijiet
tan-navigazzjoni u ekoloġiċi. Il-proġett biex
jitneħħew il-fdalijiet tal-bastimenti li jlaħħqu għal
madwar 15 000 tunnellata, li mbeda mill-Kamra tal-Kummerċ tas-Serbja
bħala parti mill-istrateġija, jinvolvi lis-settur privat ukoll; –
Ix-xogħol fuq l-interkonnettur tal-gass bejn
il-Bulgarija u s-Serbja miexi sew, u se jgħaqqad iż-żona
tal-Baħar Baltiku mal-Baħar Adrijatiku u l-Eġew u lil hinn
sal-Baħar l-Iswed. Il-pajp tal-gass se jkun twil 150 km. Se
jikkontribwixxi għad-diversifikazzjoni tal-provvista tal-gass,
jiżgura sigurtà fil-provvista tal-gass u jikkompleta
ċ-"ċirku" reġjonali importanti tal-provvista tal-gass. Momentum ġdid għall-proġetti
eżistenti –
L-approċċ kooperattiv iffaċilita
t-tlestija mill-Pont Calafat-Vidin, li jgħaqqad ir-Rumanija u l-Bulgarija.
Il-pont huwa kofinanzjat minn Fondi Ewropej u huwa biss it-tieni pont tul
is-630 km ta' xmara tul il-fruntiera, u għalhekk jipprovdi ħolqa
importanti li kienet nieqsa fin-Netwerk tat-Trasport Trans-Ewropew (TEN-T). Inizjattivi ġodda ta’ koordinazzjoni
politika –
Fuq stedina tal-Kummissjoni, il-ministri
tat-trasport tar-Reġjun tad-Danubju,
fis-7 ta' Ġunju 2012, adottaw dikjarazzjoni dwar
il-manutenzjoni tal-passaġġ navigabbli tad-Danubju, u kkommettew
ruħhom għal miżuri konkreti, inkluża s-sorveljanza tal-fond
tal-ilma u s-sinjalazzjoni tar-rotot ta’ navigazzjoni f’partijiet baxxi. Dan
wassal għal ftehim bejn ir-Rumanija u l-Bulgarija biex jippjanaw
ix-xogħlijiet flimkien b'mod konġunt u biex jikkondividu
t-tagħmir; –
Il-Mudell tas-Suq tal-Gass tar-Reġjun
tad-Danubju ġie żviluppat biex jikkwantifika l-impatt reġjonali
tal-proġetti tal-infrastruttura tal-gass ippjanati għar-Reġjun u
wassal biex il-pajjiżi tad-Danubju issa laħqu ftehim dwar sett ta'
rakkomandazzjonijiet politiċi għal proġetti bħal dawn fil-ġejjieni. 2.2. Protezzjoni tal-ambjent
fir-Reġjun tad-Danubju Proġetti ġodda –
Id-Direttorat Ġenerali tal-Kummissjoni
għar-Riċerka u l-Innovazzjoni nieda sejħa għal
proġetti ta' riċerka, biex titfassal riċerka ambjentali u
titjieb l-adozzjoni tar-riżultati fir-Reġjun. Dan mobilizza atturi u
riżorsi sinifikanti mis-settur pubbliku (nazzjonali u tal-UE) u sorsi
privati għall-immaniġġjar kumplessiv u effikaċi tad-delta
tax-xmara u l-kosta tal-baħar; –
It-Task Force "Danube Sturgeon"
inħolqot biex jiġu żgurati popolazzjonijiet vijabbli ta' din
il-ħuta importanti fix-xmara, u tiffaċilita proġetti,
miżuri u inizjattivi biex jirritorna l-isturjun. Tippromwovi
approċċ trasversali, li jgħaqqad il-bijodiversità ma' oqsma ta'
politika bħall-kwalità tal-ilma, il-permeabilità ta' ħabitats,
l-iżvilupp ekonomiku, l-edukazzjoni ambjentali, u anki l-prevenzjoni
tal-kriminalità (b'rabta mal-kummerċ illegali tal-kavjar). Momentum ġdid għall-proġetti
eżistenti –
Il-proġett DANUBE FLOODRISK jesplora metodi u
bażijiet tad-dejta li l-pajjiżi jistgħu jaħdmu fuqhom
flimkien b’mod konġunt. B'kollox, 19-il istituzzjoni fi 8
pajjiżi tad-Danubju qed jipparteċipaw, u qed jaċċelleraw
il-progress lejn bażijiet tad-dejta kondiviżi u l-immappjar
tal-għargħar. Is-Sistema Ewropea ta' Sensibilizzazzjoni dwar
l-Għargħar (European Flood Awareness System - EFAS) qiegħda
wkoll twettaq ħidma komplimentari. 2.3. Ħolqien tal-prosperità
fir-Reġjun tad-Danubju Proġetti ġodda –
Id-Direttorat Ġenerali tal-Kummissjoni
għan-Netwerks tal-Komunikazzjoni, il-Kontenut u t-Teknoloġija nieda
proġett ġdid ta' infrastruttura-e skont is-Seba' Programm Kwadru biex
itejjeb l-aċċess għal servizzi tal-kompjuter avvanzati
għar-riċerkaturi u l-forniment tagħhom. L-infrastruttura-e
l-ġdida se sservi ta' pont għall-faċilitajiet tas-superkompjuter
tal-inizjattiva Ewropea PRACE għall-pajjiżi fir-reġjun
tad-Danubju, u tabilħaqq anki għal xi pajjiżi tal-Kawkażu.
Il-proġett SEERA-EI jikkapitalizza fuq dan u b'hekk ipoġġiha,
flimkien ma’ xogħol ieħor, fuq l-aġenda reġjonali tad-Danubju; –
Il-Forum Kummerċjali tar-Reġjun
tad-Danubju, ikkoordinat mill-Kamra tal-Kummerċ Awstrijaka, jipprovdi
pjattaforma ta' netwerking importanti għal iktar minn 300 SME.
Iħeġġeġ laqgħat bejn in-negozji, u jappoġġja
rabtiet ma' fornituri tal-għarfien bħal istituti ta’ riċerka u
universitajiet. –
Fir-Reġjun tad-Danubju qed jiġu
stabbiliti ċentri ta' trasferiment teknoloġiku, b'ħames
proġetti pilota marbuta ma' universitajiet importanti fir-reġjun
tad-Danubju, biex itejbu r-rabtiet bejn il-qasam akkademiku u s-settur privat; –
Fi proġett pilota ieħor, skejjel u
studenti mid-Danubju qegħdin jiżviluppaw b'mod konġunt korsijiet
ta' taħriġ innovattivi u programmi edukattivi kreattivi biex
jippromwovu kuntatti transnazzjonali bejn il-kulturi, b’enfasi fuq
iċ-ċittadinanza attiva u l-impenn lejn l-iżvilupp sostenibbli.
Qed tiġi żviluppata gwida innovattiva għall-għalliema
bl-għan li tiġi applikata fir-Reġjun tad-Danubju kollu. Inizjattivi ġodda ta’ koordinazzjoni
politika –
Inbdiet ħidma biex jinħoloq Fond
għar-Riċerka u l-Innovazzjoni għad-Danubju li jippulja fondi
nazzjonali u reġjonali u li juża l-esperjenzi tal-programm BONUS
fir-Reġjun tal-Baħar Baltiku. Fid-9 ta’ Lulju 2012,
f'Ulm, ġiet iffirmata Dikjarazzjoni konġunta mill-Ministri
tar-Reġjun tad-Danubju għar-Riċerka, li twitti t-triq
għall-ħidma preparatorja. Id-Direttorat Ġenerali
għar-Riċerka u l-Innovazzjoni u d-Direttorat Ġenerali
għall-Politika Reġjonali u Urbana jappoġġjaw din
il-ħidma, speċjalment permezz ta' Danube INCO.net u għajnuna
oħra. 2.4. Tisħiħ
tar-Reġjun tad-Danubju Proġetti ġodda –
Iċ-Ċentru Konġunt tar-Riċerka
nieda inizjattiva biex jipprovdi appoġġ xjentifiku
għall-Istrateġija, b’kooperazzjoni ma’ sħab xjentifiċi
ewlenin mir-Reġjun. Bdiet ħidma fuq il-ħolqien ta'
infrastruttura tas-servizzi u d-dejta ta' referenza għad-Danubju kollu
dwar sfidi komuni bħall-protezzjoni tal-ambjent, in-navigabbiltà,
l-irrigazzjoni u l-iżvilupp agrikolu u l-produzzjoni tal-enerġija.
Qegħdin jitnedew erba' ragruppamenti tematiċi xjentifiċi biex
titrawwem il-kooperazzjoni xjentifika u biex jiġu rrazzjonalizzati
l-attivitajiet ta' riċerka. Enfasi speċjali fuq l-Istrateġiji
Intelliġenti ta' Speċjalizzazzjoni tappoġġja lil
pajjiżi u reġjuni f’li joħolqu strateġiji reġjonali
għall-innovazzjoni; –
Bl-għan li jitjieb l-aċċess
għall-finanzi fir-Reġjun, id-Djalogu ta' Finanzjament tad-Danubju
jqabbel l-ideat tal-proġetti mal-fondi, billi jlaqqa' flimkien promoturi
ta' proġetti, bħal SMEs, ma’ banek, istituzzjonijiet finanzjarji
internazzjonali u programmi ta' finanzjament. Inizjattivi ġodda ta’ koordinazzjoni
politika –
Laqgħa tal-kapijiet tal-pulizija
f'Jannar 2012 nediet inizjattiva biex tiġi intensifikata
l-kooperazzjoni bejn l-awtoritajiet tal-pulizija fir-Reġjun tad-Danubju
billi jitjiebu l-miżuri kontra r-reati marbuta max-xmara (inkluża
l-kriminalità organizzata), u l-istabbiliment ta' pjattaforma transnazzjonali
għall-infurzar tal-liġi. Barra minn hekk, il-EUROPOL żviluppat
proġett speċifiku għall-analiżi tat-theddid
għar-Reġjun tad-Danubju. 3. Sfruttament sħiħ
minn dak li hemm: Allinjament tas-sorsi ta' finanzjament u ħolqien ta'
sinerġiji Il-ħidma saret billi tjieb il-mod kif
jiġu użati r-riżorsi u l-għarfien, li spiss diġà huma
disponibbli għar-Reġjun, permezz ta' koordinazzjoni aħjar.
Filwaqt li tibni fuq dan l-approċċ, l-Istrateġija timmira li
tikseb riżultati aħjar u impatt akbar billi tallinja l-fondi u
l-politiki eżistenti fil-livell tal-UE, nazzjonali u reġjonali.
Eżempji jinkludu: –
proġetti infrastrutturali, bħall-impjant
tat-trattament tal-ilma mormi f'Budapest, li jiżgura kwalità ta' ilma
aħjar għar-Reġjun kollu, iffinanzjat mill-Fondi Strutturali u
tal-Investiment Ewropej; –
programmi transfruntiera, bħal bejn
ir-Rumanija u s-Serbia, u l-Ungerija u s-Serbja, qegħdin dejjem aktar
jiġu allenjati mal-Istrateġija, bl-użu ta' sejħiet
speċifiċi jew billi jingħataw punti żejda fil-proċedura
tal-għażla. Is-Serbja waħidha allokat EUR 19-il miljun
għal proġetti speċifiċi tal-Istrateġija fil-komponent
tal-kooperazzjoni transfruntiera tal-IPA tal-2011; –
programmi ta' kooperazzjoni transnazzjonali,
bħax-Xlokk tal-Ewropa u l-Ewropa Ċentrali, iffinanzjaw proġetti
ġodda tal-Istrateġija tad-Danubju; –
is-Seba' Programm Kwadru tar-Riċerka nieda
tlett sejħiet li jindirizzaw b'mod speċifiku l-isfidi tar-Reġjun
tad-Danubju fir-rigward ta' flotta innovattiva, soluzzjonijiet ambjentali, u
koordinazzjoni tal-politiki tax-xjenza u t-teknoloġija; –
proġetti kofinanzjati mid-Direttorat
Ġenerali għall-Intrapriża u l-industrija tat-turiżmu
sostenibbli appoġġjaw transnazzjonali fir-reġjun tad-Danubju; –
fl-abbozz rivedut tal-linji gwida għan-Netwerk
tat-Trasport Trans-Ewropew issa qiegħed jitqies it-tul kollu tax-Xmara
tad-Danubju; –
fil-kuntest tal-Qafas tal-Investiment
għall-Punent tal-Balkani ffinanzjat mill-Istrument għall-Assistenza
ta' Qabel l-Adeżjoni, qiegħda tingħata prijorità lil
proġetti li jikkonformaw mal-Istrateġija; –
il-Parlament Ewropew jappoġġja
proġetti pilota u azzjonijiet preparatorji għar-Reġjun
tad-Danubju billi jipprovdi lill-Koordinaturi tal-Oqsma ta’ Prijorità
b’assistenza teknika, u jinkoraġġixxi approċċi innovattivi
għall-implimentazzjoni tal-Istrateġija; –
reġjuni, bħal Baden Württemberg, warrbu
huma stess fondi biex jappoġġjaw lill-Istrateġija, inkluż
għall-fażi inizjali ta' proġetti b'impatt makroreġjonali
espliċitu; –
il-Bank Ewropew tal-Investiment, flimkien
mal-Ungerija, waqqaf il-Punt ta' Kuntatt għad-Danubju f'Budapest biex
jiffaċilita l-iżvilupp ta' proġetti b'investiment
transnazzjonali; –
għaddej xogħol simili fuq Faċilità
ta' Għajnuna Teknika għar-Reġjun tad-Danubju kumplessiva, li
tiffaċilita l-fażi ta' tħejjija ta' proġett. Fir-rigward tal-programmar importanti li jmiss
għall-perjodu 2014-2020, huwa kruċjali li jkunu jistgħu
jintużaw aktar il-programmi u l-politiki għall-implimentazzjoni
tal-Istrateġija: –
l-istrateġiji makroreġjonali qed
jiġu enfasizzati fil-Qafas Strateġiku Komuni li jkopri l-koordinazzjoni
tal-Fondi Strutturali u ta' Investiment Ewropej (European Structural and
Investment Funds - ESIF). Dan jipprovdi lill-proċess tal-programmar
b'direzzjoni strateġika u jiffaċilita l-irbit settorjali u
territorjali għall-fondi b'immaniġġjar kondiviż,
jiġifieri l-Fond ta' Koeżjoni, il-Fond Ewropew
għall-Iżvilupp Reġjonali, il-Fond Soċjali Ewropew, il-Fond
Agrikolu Ewropew għall-Iżvilupp Rurali u l-Fond Ewropew Marittimu u
tas-Sajd; –
l-approċċ makroreġjonali qed
jissemma fil-Ftehimiet ta' Sħubija, għal pajjiżi individwali,
biex jiġi żgurat li l-programmi kollha nazzjonali/reġjonali u
ta' kooperazzjoni jqisu dan l-approċċ. Dan jipprovdi finanzjament
futur għall-Istrateġija permezz tal-ESIF, u b’hekk jiżgura
s-sostenibbiltà għas-snin li ġejjin; –
qed jinħoloq programm ta’ kooperazzjoni
transnazzjonali ridefinit u speċifiku għar-Reġjun tad-Danubju,
biex jiffinanzja proġetti ta' networking, u biex jipprovdi għajnuna
istituzzjonali għall-implimentazzjoni u l-governanza. 4. Pjattaforma
tal-kooperazzjoni Għalhekk, għall-ewwel darba
fir-Reġjun u wara kunflitti u diviżjonijiet, u msejsa fuq it-tkabbir,
l-Istrateġija tistabbilixxi struttura ta' kooperazzjoni operazzjonali biex
jiġu indirizzati b’mod kooperattiv l-isfidi li r-Reġjun tad-Danubju
jikkondividi. Apparti milli tikkonsisti minn proġetti u programmar, din
hija wkoll pjattaforma importanti ġdida, li tinvolvi firxa wiesgħa
ta' partijiet interessati, inklużi pajjiżi tar-Reġjun
tad-Danubju li huma politikament impenjati fuq il-livell kumplessiv. Mingħajr ma toħloq istituzzjonijiet
ġodda, din il-pjattaforma tippermetti lill-partijiet interessati ewlenin u
lill-amministrazzjonijiet nazzjonali u reġjonali jmexxu 'l quddiem
l-implimentazzjoni ta' kuljum: –
l-Istrateġija hija organizzata fi 11-il Qasam
ta' Prijorità funzjonali li jġibu flimkien l-għarfien espert u
r-responsabbiltà: (1) Passaġġi fuq l-ilma intern u ferroviji, toroq u
trasport bl-ajru; (2) Enerġija; (3) Kultura u turiżmu; (4) Kwalità
tal-ilma; (5) Riskji ambjentali; (6) Bijodiversità; (7) Soċjetà
tal-għarfien u teknoloġiji tal-informazzjoni; (8) Kompetittività u
żvilupp ta' ragruppamenti; (9) Investimenti fin-nies u l-ħiliet; (10)
Kapaċità istituzzjonali; (11) Sigurtà. –
Dawn qed jitmexxew minn Koordinaturi tal-Oqsma ta’
Prijorità (Priority Area Coordinators - PACs), uffiċjali ta' livell
għoli mill-amministrazzjonijiet nazzjonali u reġjonali, esperti
fl-oqsma tematiċi tagħhom. Huma sostnuti mill-kontropartijiet
tagħhom mir-Reġjun tad-Danubju, u huma organizzati fi 11-il Grupp ta'
Tmexxija, wieħed għal kull Qasam ta' Prijorità. Dawn huma pjattaformi
ġodda importanti ta' kooperazzjoni fihom infishom; –
fil-livell nazzjonali u reġjonali,
l-implimentazzjoni hija żgurata mill-Punti ta' Kuntatt Nazzjonali (NCP),
b'hekk l-Istrateġija tiġi integrata fl-ambitu nazzjonali u
reġjonali u ġġiegħel li dawk li jfasslu l-politika
"jaħsbu fuq livell makroreġonali". L-impenn politiku
jinkiseb b'laqgħat tal-Ministri tal-Affarijiet Barranin kif ukoll ta'
ministri settorjali, u permezz ta' inizjattivi minn bliet u reġjuni; –
il-livell Ewropew jiffaċilita
l-implimentazzjoni, kif ukoll jintegra l-Istrateġija fil-politiki tal-UE,
permezz ta' kuntatt mal-partijiet interessati fil-pajjiżi tad-Danubju, li
jistabbilixxi rabtiet ma' dawk li jieħdu d-deċiżjonijiet tal-UE,
pereżempju, permezz ta’ fora regolari għall-Membri tal-Parlament
Ewropew, billi uffiċjali mill-Kummissjoni regolarment jieħdu sehem
f'laqgħat għad-Danubju kollu, u permezz ta' appoġġ
istituzzjonali provdut mill-baġit tal-UE; –
il-programm tal-UE INTERACT jipprovdi bini tal-kapaċità
u appoġġ organizzazzjonali, kif ukoll għodod ta’ komunikazzjoni
(eż. identità viżwali, websajt, bulettin) li jirriklamaw
ir-riżultati tal-Istrateġija fil-midja u lill-pubbliku ġenerali; –
waqt li tibni fuq dak li diġà ġie
stabbilit, l-Istrateġija tagħti wkoll prominenza u appoġġ
operazzjonali lill-istituzzjonijiet eżistenti fir-Reġjun,
bħall-Kummissjoni Internazzjonali għall-Protezzjoni tax-Xmara Danubju
(International Commission for the Protection of the Danube River - ICPDR), u
tindirizza kwistjonijiet ambjentali u tal-kwalità tal-ilma, u l-Kummissjoni
tad-Danubju, li taħdem fuq in-navigabbiltà. F'din il-ħidma huma
inklużi atturi mis-soċjetà ċivili, fosthom fis-seminars
għall-partijiet interessati, il-Gruppi ta' Tmexxija u l-Forum Annwali, u
partikolarment fil-Qasam ta' Prijorità nru 10, “Kapaċità
Istituzzjonali”. 5. Tagħlimiet mill-passat Wara l-perjodu inizjali ta' implimentazzjoni,
jistgħu jiġu identifikati t-tagħlimiet li ġejjin: Struttura ta' implimentazzjoni ·
Il-Punti ta' Kuntatt Nazzjonali, il-Koordinaturi
tal-Oqsma ta’ Prijorità u l-Gruppi ta’ Tmexxija tagħhom jiffurmaw il-qalba
tal-implimentazzjoni tal-Istrateġija. Il-ħidma tagħhom
teħtieġ tiġi integrata aktar fl-istrutturi politiċi u
amministrattivi. L-irwol ċentrali viżibbli tagħhom
jeħtieġ stabbilità istituzzjonali, rikonoxximent politiku u
allokazzjoni ta’ riżorsi umani biżżejjed. Persunal adegwat u
appoġġ minn ministeri huma kruċjali biex jippermettulhom jaqdu
r-rwol tagħhom; ·
L-esperjenza turi li l-koordinazzjoni nazzjonali
taħdem aħjar fil-pajjiżi li waqqfu gruppi ta’ ħidma
interministerjali għall-koordinazzjoni tax-xogħol tad-Danubju
fil-livell nazzjonali, b'mod partikolari fejn ġew stabbiliti pjattaformi
politiċi jew fuq livell ta' servizz ċivil għoli, u li huma
appoġġjati b'segretarjat tekniku fil-ħidma tagħhom. Din
hija prassi tajba, li għandha tiġi inkoraġġuta
fir-Reġjun kollu; ·
Il-baġit tal-UE jista' jipprovdi finanzjament
dirett limitat għall-implimentazzjoni tal-istruttura sal-2014. Madankollu,
peress li l-finanzjament mhuwiex żgurat wara dik id-data,
jeħtieġ li jinstabu mezzi oħra ta' appoġġ, bħal
sorsi nazzjonali, il-programm futur ta’ kooperazzjoni transnazzjonali
tad-Danubju u l-programm futur INTERACT. Appoġġ politiku ·
L-appoġġ politiku ta' livell għoli
nieda l-Istrateġija u jibqa’ kruċjali għall-implimentazzjoni
tagħha. Laqgħat ministerjali (dwar it-trasport, ir-riċerka u
l-innovazzjoni, l-enerġija) avvanzaw b'mod sinifikanti l-manutenzjoni
tax-Xmara Danubju, il-koordinazzjoni tar-riċerka nazzjonali u
reġjonali u l-politiki tal-innovazzjoni u l-appoġġ għal
pajjiżi mhux Stati Membri tal-UE li qed jimplimentaw it-Tielet Pakkett
tal-Enerġija skont il-Komunità tal-Enerġija; ·
Il-laqgħat tal-Ministri Barranin enfasizzaw
l-appoġġ politiku globali għall-Istrateġija. Ir-rwol attiv
tal-Ungerija matul il-Presidenza tagħha aċċellera l-ħidma.
Dan huwa partikolarment utli meta l-livell politiku huwa marbut
maċ-ċiklu tal-avvenimenti tal-Istrateġija. Finanzjament ta' azzjonijiet konkreti ·
Huwa kruċjali li jsir l-aħjar użu
mill-politiki u l-programmi eżistenti, bħal Fondi Strutturali u ta’
Investiment Ewropej (ESIF), l-Istrument ta' Qabel l-Adeżjoni, il-programm
TEN-T, il-Programm Qafas għar-Riċerka u l-Iżvilupp jew fondi
privati. Fir-rigward tal-2014-2020, huwa essenzjali li l-Istrateġija
tiġi integrata sistematikament fil-programmi. Hemm bżonn li jsir
sforz konġunt mill-pajjiżi u r-reġjuni tad-Danubju u
mill-Kummissjoni Ewropea; ·
Tnedew inizjattivi importanti
għall-appoġġ ta' proġetti fil-fażi preparatorja
tagħhom u biex jitjieb l-aċċess għall-finanzi, bħall-Faċilità
ta’ Assistenza Teknika għar-Reġjun tad-Danubju, il-fondi mill-Istat
ta' Baden-Württemberg, il-Punt ta' Kuntatt tad-Danubju ta' Budapest jew
id-Djalogu Finanzjarju tad-Danubju. Ir-rabtiet bejn l-inizjattivi għandhom
jiġu msaħħa. Tisħiħ tal-inizjattivi
eżistenti ·
Ġew stabbiliti sinerġiji ma' korpi u
inizjattivi eżistenti, bħalma huma l-ICPDR, il-Komunità
tal-Enerġija jew l-Organizzazzjoni Internazzjonali għall-Migrazzjoni,
u dawn jeħtiġielhom jissaħħu. L-involviment ta'
istituzzjonijiet, korpi u netwerks eżistenti jkompli jibni fuq esperjenzi
pożittivi oħrajn, notevolment fir-Reġjun tal-Baħar Baltiku.
Dan qiegħed dejjem iktar jiġi ffaċilitat mill-Grupp ta’ Livell
Għoli, stabbilit biex jiggwida l-inizjattiva makroreġjonali, li
jagħti pariri dwar din il-ħidma, isaħħaħ
l-għarfien espert disponibbli, jevita strutturi paralleli u jagħmel
l-aħjar użu mir-riżorsi disponibbli. Orjentazzjoni tar-riżultati u
l-miri ·
Miri, stadji importanti u pjani majjistri
jipprijoritizzaw il-ħidma, jikkontribwixxu għal implimentazzjoni
f’waqtha u jiffaċilitaw il-komunikazzjoni tal-potenzjal
tal-Istrateġija. Għandhom jiġu analizzati u mmonitorjati
kontinwament. Integrazzjoni tal-politiki u l-fondi ·
Hemm valur speċifiku fl-approċċi
integrattivi, pereżempju billi jiġu kkombinati n-navigazzjoni u
l-interessi ambjentali fl-iżvilupp tax-xmara, bħal fil-medda
tal-Lvant ta' Vjenna. Il-Kummissjoni tiffaċilita l-kooperazzjoni
transsettorjali, pereżempju fil-qasam xjentifiku permezz tal-attivitajiet
taċ-Ċentru Konġunt tar-Riċerka, li jinvolvi servizzi
rilevanti u diversi sorsi ta’ finanzjament. B’mod ġenerali, l-oqfsa
fil-livell tal-UE għandhom jintużaw aktar, b'enfasizzi li
r-Reġjun tad-Danubju jinkludi ħafna iktar minn sempliċement
ix-xmara. Integrazzjoni ta' pajjiżi mhux
fl-UE ·
L-Istrateġija tinvolvi sitt pajjiżi mhux
fl-UE fuq livell ugwali, b'sostenn għall-proċessi ta’ integrazzjoni u
ż-żieda fil-kooperazzjoni fir-Reġjun. Iridu jinstabu u jiġu
msaħħa soluzzjonijiet innovattivi biex tiġi ffaċilitata
l-parteċipazzjoni ta' dawn il-pajjiżi u biex tiġi ffinanzjata
l-implimentazzjoni tal-proġett. Dan diġà jinkludi
l-parteċipazzjoni sħiħa fil-koordinazzjoni tal-Qasam ta'
Prijorità u fil-Gruppi ta' Tmexxija, fejn qed tingħata attenzjoni
speċjali għal appoġġ b'rabta mal-parteċipazzjoni.
Ġew identifikati fondi mill-allokazzjonijiet tal-UE
għall-attivitajiet tal-Istrateġija tad-Danubju minn mill-inqas
pajjiż wieħed li mhuwiex fl-UE u din hija prassi tajba li
l-oħrajn jistgħu jsegwu. Komunikazzjoni ·
Identità viżwali komuni, websajt komprensiva
li tkopri l-Oqsma ta’ Prijorità kollha, bulettin, u materjal promozzjonali
żviluppati bl-appoġġ qawwi tal-programm INTERACT, żiedu
l-viżibbiltà u ffaċilitaw il-komunikazzjoni. Ikun utli li
l-informazzjoni dwar il-laqgħat u l-konferenzi dwar id-Danubju jiġu
ċentralizzati sabiex tkun tista' ssir komunikazzjoni dwarhom aktar
armonizzata. ·
L-ewwel Forum Annwali, li sar f'Regensburg
f'Novembru 2012, ikkonferma l-appoġġ politiku
għall-Istrateġija u pprovda opportunità biex tintwera u tiġi
diskussa l-implimentazzjoni tagħha. Hemm valur miżjud jekk konferenza
bħal din tibda ssir fuq bażi regolari u bħala l-avveniment
ewlieni tal-Istrateġija, flimkien ma’ laqgħa tal-Ministri
tal-Affarijiet Barranin. 6. Rakkomandazzjonijiet L-Istrateġija tal-UE
għar-Reġjun tad-Danubju wriet potenzjal ċar fl-ewwel fażi
ta' implimentazzjoni tagħha. Tefgħet l-enfasi fuq Reġjun
b’potenzjal konsiderevoli għal żvilupp u integrazzjoni ulterjuri,
billi tindirizza b'mod konġunt sfidi bħal l-użu sostenibbli
tar-riżorsi jew it-tibdil fil-klima b'mod kooperattiv. Sabiex tiġi
żgurata li kontinwazzjoni tal-ħidma fuq il-kwistjonijiet ewlenin li
jħabbat wiċċu magħhom ir-Reġjun, u abbażi
tal-esperjenza rapportata hawnhekk, kif ukoll fid-diskussjonijiet fl-ewwel Forum
Annwali, il-Kummissjoni tirrakkomanda li l-pajjiżi u r-reġjuni
parteċipanti: ·
issaħħu l-istrutturi interni tagħhom
tal-implimentazzjoni, jipprovdu sostenn finanzjarju u appoġġ politiku
adegwati, u aktar stabbiltà istituzzjonali; ·
jiżguraw il-kontinwità u mandati xierqa
għar-rappreżentanti li jintbagħtu fil-Gruppi ta' Tmexxija,
jużaw il-programmi tal-Fondi Strutturali u ta' Investiment Ewropej
għall-2014-2020 biex jappoġġjaw l-istrutturi
tal-implimentazzjoni; ·
jistabbilixxu tmexxija sostenibbli u ppjanar
strateġiku għall-Istrateġija, megħjuna mill-Kummissjoni
Ewropea, sabiex il-pajjiżi u r-reġjuni parteċipanti jassumu
r-responsabbiltajiet tagħhom bis-sħiħ. L-implimentazzjoni
tal-Istrateġija għandha ssir iktar awtosostenibbli fejn l-istrutturi
tagħha jiżguraw il-kontinwità anki jekk jinbidlu l-persuni involuti; ·
jimmonitorjaw b'mod kontinwu l-implimentazzjoni
tal-Oqsma ta’ Prijorità kollha, inkluż l-impenn fuq livell politiku u
f’termini ta’ kisbiet konkreti, bil-ħsieb li l-attenzjoni tiġi
kkonċentrata fuq sfidi speċifiċi, u tinżamm
il-konċentrazzjoni kif ukoll tingħata bażi
għall-prijoritizzazzjoni u struttura iżgħar u orjentata aktar
lejn ir-riżultati; ·
jiżguraw li jkun hemm aktar enfasi fuq
ir-riżultati billi jagħtu aktar attenzjoni lil miri u indikaturi
xierqa, stadji importanti u pjanijiet majjistri; ·
jiżguraw l-integrazzjoni sistematika
tal-Istrateġija fil-programmi tal-UE, nazzjonali u reġjonali
għall-perjodu 2014-2020, speċjalment il-Fondi Strutturali u ta’
Investiment Ewropej, il-Horizon 2020, il-COSME u l-Faċilità
Nikkollegaw l-Ewropa, bl-użu tal-għarfien espert tan-netwerks
tad-Danubju u tal-partijiet interessati ewlenin fil-programmar u
l-implimentazzjoni; ·
isaħħu l-kontribut tal-Istrateġija
tal-Ewropa 2020 permezz ta' azzjonijiet konkreti għar-Reġjun
tad-Danubju marbuta mat-tkabbir intelliġenti, sostenibbli u inklużiv; ·
isaħħu l-koerenza tal-azzjonijiet
tad-Danubju mal-politiki tal-UE billi jiżguraw li l-ħidma
tal-Istrateġija tiġi diskussa mill-istituzzjonijiet eżistenti,
f'Kunsilli settorjali rilevanti, u fejn meħtieġ f'laqgħat
ministerjali speċifiċi; ·
iżidu l-attivitajiet tal-komunikazzjoni biex
jilħqu udjenza usa’; ·
jistabbilixxu l-Konferenza Annwali bħala
l-avveniment ewlieni tas-sena, li jagħti direzzjoni strateġika,
joħloq rabtiet u approċċi komuni u jippubbliċizza
r-riżultati; ·
isaħħu, flimkien mal-Kummissjoni Ewropea,
il-koordinazzjoni u l-koerenza mal-inizjattivi eżistenti u futuri
possibbli tal-UE ta' dan it-tip jew ta' tip makroreġjonali u
tal-baċiri tal-baħar simili. [1] Rapport sħiħ skont kull Qasam ta' Prijorità
jista' jitniżżel mill-websajt tal-Istrateġija tal-UE
għar-Reġjun tad-Danubju (www.danube-region.eu/pages/reports)