52009DC0325

[pic] | KUMMISSJONI TAL-KOMUNITAJIET EWROPEJ |

Brussel 2.7.2009

KUMM(2009) 325 finali

KOMUNIKAZZJONI MILL-KUMMISSJONI LILL-KUNSILL U LILL-PARLAMENT EWROPEW

dwar l-għażla ta' raggruppament għall-iskop tal- VAT prevista fl-Artikolu 11 tad-Direttiva tal-Kunsill 2006/112/KE dwar is-sistema komuni ta' taxxa fuq il-valur miżjud

KOMUNIKAZZJONI MILL-KUMMISSJONI LILL-KUNSILL U LILL-PARLAMENT EWROPEW

dwar l-għażla ta' raggruppament għall-iskop tal- VAT prevista fl-Artikolu 11 tad-Direttiva tal-Kunsill 2006/112/KE dwar is-sistema komuni ta' taxxa fuq il-valur miżjud

1. INTRODUZZJONI

L-Artikolu 11 tad-Direttiva tal-Kunsill 2006/112/KE tat-28 ta' Novembru 2006 dwar is-sistema komuni ta' taxxa fuq il-valur miżjud [1] minn hawn 'il quddiem imsejħa "id-Direttiva tal-VAT") jipprovdi l-għażla lill-Istati Membri li jdaħħlu skemi ta' ragruppament għall-iskop tal-VAT fil-leġiżlazzjoni nazzjonali tagħhom. Stat Membru jista' jikkunsidra żewġ persuni jew iżjed stabbiliti f'dak l-Istat Membru, li huma legalment independenti minn xulxin, u jkollhom x'jaqsmu mill-qrib ma' xulxin b'rabtiet finanzjarji, ekonomiċi u organizzattivi, bħala persuna unika taxxabbli għal skopijiet ta' VAT. L-Istati Membri li jixtiequ jeżerċitaw din l-għażla għandhom jissottomettu konsultazzjoni minn qabel lill-Kumitat Konsultattiv dwar taxxa fuq il-valur miżjud (minn hawn 'il quddiem imsejjaħ "il-Kumitat tal-VAT") u jistgħu jadottaw kwalunkwe miżura meħtieġa kontra l-evażjoni jew l-evitar tat-taxxa li jista' jirriżulta minħabba l-użu ta' din l-għażla.

Fejn l-għażla ta' raggruppament għall-iskop tal-VAT, prevista fl-Artikolu 11, tintgħażel minn Stat Membru, din għandha titqies bħala devjazzjoni partikolari nazzjonali mir-regoli normali tal-Komunità dwar il-VAT.

Minkejja li l-għażla ta' raggruppament għall-iskop tal-VAT ilha disponibbli għall-Istati Membri mis-snin sebgħin, il-Kummissjoni xorta waħda nnutat żieda fl-interess mill-Istati Membri biex jużaw din l-għażla Skont l-informazzjoni li għandha l-Kummissjoni, jeżistu llum il-ġurnata 15-il Stat Membru[2] , li daħħlu skemi ta' raggruppament għall-iskop tal-VAT fil-leġiżlazzjoni nazzjonali tagħhom.

L-istruzzjonijiet tal-Artikolu 11 huma fil-qosor, u minħabba f'hekk l-istabbiliment ta' regoli ddetaljati dwar l-implimentazzjoni tal-għażla ta' raggruppamenti tal-VAT jaqa' taħt ir-responsabbilità tal-Istati Membri. Barra minn hekk, id-Direttiva tal-VAT ma fiha l-ebda dispożizzjoni oħra relatata b'mod speċifiku mar-raggruppament għall-iskop tal-VAT. Mill-konsultazzjoni min-naħa tal-Istati Membri li saret mal-Kumitat tal-VAT, ħareġ ċar li jeżistu diverġenzi wesgħin fost l-iskemi ta' raggruppament għall-iskop tal-VAT li qegħdin jiġu implimentati mill-Istati Membri.

Minħabba l-vantaġġi li skema ta' raggruppament għall-iskop tal-VAT tista' toffri għal ċerti persuni taxxabbli, l-iskema tista', skont il-karatteristiċi tagħha, tmur kontra l-prinċipju ta' newtralità fiskali u tista' sservi bħala sors ta' kompetizzjoni fiskali bejn l-Istati Membri. F’dan id-dawl, id-differenzi preżenti bejn l-iskemi ta' raggruppament għall-iskop tal-VAT nazzjonali jinvolvu impatt potenzjali fuq is-suq intern u fuq il-prinċipju bażiku tas-Sistema tal-VAT tal-Komunità. Dan huwa konfermat mill-fatt li l-għamla nnifisha ta’ ħafna skemi ta' raggruppament, ma tiżgurax li l-effetti tagħhom ikunu limitati biss għat-territorju nazzjonali.

Għalhekk, huwa essenzjali li jiġi żgurat li din id-dispożizzjoni tkun applikata b'mod aktar uniformi.

F’dan l-isfond, din il-Komunikazzjoni tfittex li tispjega l-fehma tal-Kummissjoni dwar kif id-dispożizzjonijiet tal-Artikolu 11 għandhom ikunu trasposti f'arraġamenti prattiċi filwaqt li jkunu rispettati l-prinċipji bażiċi tas-sistema tal-VAT Komunitarja.

Fid-dawl tar-reazzjonijiet għal din il-Komunikazzjoni, il-Kummissjoni se tirrifletti dwar jekk azzjoni ultejuri hijiex meħtieġa u jekk iva, meta din għandha tittieħed. Azzjoni bħal din tista' tikkonsisti fi proposti ta’ emendi konkreti fl-Artikolu 11 iżda anke billi jsir kontribut permezz ta' mezzi oħra, biex l-applikazzjoni tar-regoli attwali jkunu aktar uniformi u fiskalment newtrali.

2. L-GħAN ORIġINALI TAD-DISPOżIZZJONI DWAR IR-RAGGRUPPAMENTI GħALL-ISKOP TAL-VAT

Il-kunċett ta' raggruppament għall-iskop tal- VAT ġie introdott biss fil-leġiżlazzjoni tal-Komunità permezz tal-Artikolu 4(4) tas-Sitt Direttiva dwar il-VAT[3] Skont il-Memorandum ta' Spjegazzjoni [4] , l-għan tad-dispożizzjoni dwar ir-raggruppament għall-iskop tal-VAT kien li permezz tiegħu l-Istati Membri, għall-fini ta' simplifikazzjoni amministrattiva jew ta' azzjoni kontra prattiki ta' abbuż (pereżempju, meta negozju jinqasam f'diversi persuni taxxabbli ħalli b'hekk kull persuna tista' tibbenfika minn skema speċjali), biex ma jikkunsidrawx bħala persuni taxxabbli separati lil dawk li l-"indipendenza" tagħhom hija purament teknikalità legali.

L-Artikolu 4(4) ġie emedat bid-Direttiva tal-Kunsill 2006/69/KE tal-24 ta' Lulju 2006[5] meta ġie miżjud it-tieni sottoparagrafu. Skont il-Memorandum ta' Spjegazzjoni tal-Proposta[6] , l-għan tal-emenda li saret kien li, tgħin lill-Istati Membri biex jiskansaw riżultat inġust li jitqajjem mit-tħaddim ta' raggruppament għall-iskop tal-VAT Għalhekk, permezz tat-tieni sottoparagrafu l-Istati Membri jistgħu jadottaw miżuri li jipprevjenu d-dispożizzjonijiet tar-raggruppament għall-iskop tal-VAT milli jwasslu għal evażjoni jew evitar tat-taxxa.

Wara t-tfassil mill-ġdid tas-Sitt Direttiva, l-Artikolu 11 tad-Direttiva tal-VAT issa fih id-dispożizzjonijiet dwar raggruppament għall-iskop tal-VAT. It-tfassi mill-ġdid ma mmodifika li l-qasam tal-applikazzjoni tal-iskemi ta' raggruppament għall-iskop tal-VAT u lanqas il-prerekwiżiti formali tagħhom.

Fl-aħħar, ta’ min jenfasizza li din il-Komunikazzjoni ma tirreferix għall-kunċett ta' ‘arraġamenti dwar il-kondiviżjoni tal-ispejjeż’ li, fuq il-bażi tal-Artikolu 132(1)(f) tad-Direttiva tal-VAT, attwalment jikkostitwixxu eżenzjoni obbligatorja għal ċerti attivitajiet fl-interess pubbliku u forma ġdida li diġà ġiet introdotta fil-proposta reċenti tal-Kummissjoni dwar it-trattament tal-VAT fir-rigward tas-servizzi ta' assigurazzjoni u dawk finanzjarji[7]. Bħala kunċetti, dawn l-arraġamenti dwar il-kondiviżjoni tal-ispejjeż huma fil-fatt totalment differenti mill-kunċett dwar ir-raggruppament għall-iskop tal-VAT, peress li mgħandhomx, per eżempju, l-effett li joħolqu persuna unika taxxabbli ġdida.

3. L-ANALIżI TAD-DISPOżIZZJONI DWAR IR-RAGGRUPPAMENT GħALL-ISKOP TAL-VAT

L-Artikolu 11 tad-Direttiva tal-VAT għandu jiġi interpretat fid-dawl tal-għanijiet oriġinali li ssemmew qabel.

3.1. Il-ħtieġa għal konsultazzjoni minn qabel mal-Kumitat tal-VAT

Qabel ma tiddaħħal skema nazzjonali ta' raggruppament għall-iskop tal-VAT għandha ssir konsultazzjoni obbligatorja mal-Kumitat tal-VAT. Il-kliem innifsu tad-dispożizzjoni, jagħmilha ċara li skema ta' raggruppament għall-iskop tal-VAT tista' tiġi implimentata biss wara li l-Kumitat tal-VAT ikun ġie kkonsultat[8] Il-Kummissjoni hija tal-fehma li din għandha tfisser li l-obbligu ta' konsultazzjoni mal-Kumitat tal-VAT għandu jiġi ssodisfatt qabel ma r-regoli nazzjonali li jirregolaw l-iskema ta' raggruppamenti għall-iskop tal-VAT ikunu ġew ippubblikati. L-istess japplika għal emendi sostantivi għall-iskemi ta' ragruppament għall-iskop tal-VAT eżistenti.

Sabiex din id-dispożizzjoni tingħatalha t-tifsira sħiħa, u b'mod partikolari biex tkun tista' ssir diskussjoni ġenwina fil-Kumitat tal-VAT, konsultazzjoni bħal din għandha ssir sew minn qabel.

Peress li t-tieni paragrafu tal-Artikolu 11 huwa parti integrali tad-dispożizzjoni tar-raggruppamenti għall-iskop tal-VAT, ir-rekwiżit ta' konsultazzjoni mal-Kumitat tal-VAT japplika f'dan il-każ ukoll anke jekk din l-għażla tinsab f'paragrfu separat.

3.2. L-għan prinċipali tal-għażla dwar ir-raggruppamenti għall-iskop tal-VAT

L-effett essenzjali tal-implimentazzjoni tal-għażla ta' raggruppamenti għall-iskop tal-VAT, prevista fl-Artikolu 11, huwa li permezz tagħha persuni assoċjati ma' xulxin minħabba xi rabta finanzjarja, ekonomika jew ta' organizzazzjoni jistgħu ma jibqgħux ikunu ttrattati bħala persuni taxxabbli separati għal skopijiet ta' VAT, iżda jkunu kkunsidrati bħala persuna unika taxxabbli . Fi kliem ieħor, numru ta' persuni taxxabbli assoċjati ma' xulxin fil-qrib huma magħqudin flimkiem f'persuna unika taxxabbli għal skopijiet ta' VAT. Dan l-effett ġie kkonfermat mill-Qorti Ewropea tal-Ġustizzja fil-Każ C 162/07, Ampliscientifica [9]

F'dan ir-rigward, grupp għall-iskop tal-VAT jista' jiġi mfisser bħala "fittizju", li ġie maħluq għal skopijiet ta' VAT, fejn is-sostanza ekonomika tieħu preċedenza fuq il-forma legali. Grupp għall-iskop tal-VAT huwa tip partikolari ta' persuna taxxabbli li teżisti biss għal skop ta' VAT. Huwa bbażat fuq rabtiet attwali finanzjarji, ekonomiċi u organizzattivi bejn diversi kumpaniji. Filwaqt li kull membru tal-grupp iżomm il-forma legali tiegħu, għal skopijiet ta' VAT biss, it-tiswir tal-grupp għall-iskop tal-VAT jingħata preċedenza fuq forom legali skont, pereżempju, il-liġi ċivili jew dik dwar il-kumpaniji. Għalhekk, permezz tal-għaqda ta' grupp għall-iskop tal-VAT il-membru, għal skopijiet ta' VAT, jinħall minn kwalunkwe forma legali possibbli li teżisti f'dak iż-żmien partikolari u minflok isir parti minn persuna separata taxxabbli ġdida għal skopijiet ta' VAT – jiġifieri, il-grupp għall-iskop tal-VAT.

Mit-trattament ta' grupp għall-iskop tal-VAT bħala persuna taxxabbli unika, wieħed jista’ jikkonkludi loġikament li l-grupp jista' biss ikun identifikat għal skopijiet ta' VAT peremezz ta' numru uniku tal-VAT, b'konformità mal-Artikolu 214 tad-Direttiva tal-VAT, għall-esklużjoni ta' kwalunkwe numru ieħor individwali tal-VAT . L-użu ta' numru uniku huwa meħtieġ biex kemm l-operaturi ekonomiċi kif ukoll l-awtoritajiet tat-taxxa tal-Istati Membri jkunu jistgħu jidentifikaw, b'doża ta’ ċertezza, lil dawk li qegħdin jaffettwaw it-tranżazzjonijiet li huma soġġetti għal VAT[10] In-numru ta' identifikazzjoni individwali għal kull membru jista' jinżamm mill-awtoritajiet tal-VAT, iżda biss biex l-attavitajiet interni tal-grupp għall-iskop tal-VAT ikunu jistgħu jiġi sorvelajti.

3.3. Min jista' jifforma grupp għal skop ta’ VAT?

Taħt l-Artikolu 11, L-Istati Membri jistgħu jikkunsidraw bħala persuna taxxabbli unika kwalunkwe persuna li hija stabbilita fi ħdan it-territorju tagħhom.

3.3.1. Il-kunċett ta' ‘persuni’

Il-Kummissjoni hija tal-fehma li r-referenza għal ‘persuni’ fl-Artikolu 11 tapplika biss għal dawk il-persuni li jissodisfaw il-kriterji biex ikunu persuni taxxabbli għal skopijiet ta’ VAT. Għalhekk, entità li mhix persuna taxxabbli, sew jekk għaliex li dik il-persuna ma tissodisfax id-definizzjoni fl-Artikolu 9(1) jew minħabba li hija korporazzjoni pubblika li qiegħda taġixxi taħt il-kundizzjonijiet stipulati fl-ewwel sottoparagrfu tal-Artikolu 13(1), ma tistax tkun membru ta' grupp għall-iskop tal-VAT.

Wieħed għandu jżomm f’moħħu li l-Artikolu 11 jaqa' taħt it-Titolu III ’Persuni taxxabbli’ fid-Direttiva tal-VAT Barra minn hekk, l-Artikolu 11 ma jipprovdi għall-ebda deroga mid-definizzjoni ta' persuna taxxabbli fl-Artikolu 9 (1) ta' dik id-Direttiva.

Hija loġika li l-persuni li huma meqjusin bħala persuna ‘unika’ taxxabbli għandhom ikunu huma stess, persuni taxxabbli, peress li t-tifsira tal-kunċett ta' formazzjoni ta’ grupp hija li ‘tgħaqqad flimkien’ persuni li huma involuti f'attivitajiet li jaqgħu fi ħdan l-ambitu tad-Direttiva tal-VAT. B’rabta ma’ dan, l-aġġettiv ‘uniku’ jimplika li, mingħajr il-grupp, kienu jeżistu diversi persuni taxxabbli; il-qagħda ta' persuna taxxabli hija għalhekk preżenti b'mod impliċitu fil-każ ta' kull wieħed mill-membri tal-grupp.

It-terminu "persuni" intuża mil-leġiżlatur sabiex jevita r-ripetizzjoni tat-terminu "persuni taxxabbli", iżjed milli biex jinkludi dawk li mhumiex dovuti jħallsu t-taxxa. L-istess teknika ta' abbozzar intużat ukoll b'mod konsistenti f'diversi verżjonijiet f’lingwi differenti,[11] Din it-teknika ta' abbozzar intużat mil-leġiżlatur f'partijiet oħra tad-Direttiva, fost l-oħrajn fl-ewwel sentenza tal-Artikolu 9 (2) fejn it-terminu "persuni" intuża b'mod ċar biex issir referenza għal persuni taxxabbli.

Jidher ċar ukoll mill-każistika stabbilita tal-Qorti, li t-termini bażiċi fid-Direttiva tal-VAT bħal "persuna taxxabbli" u "attivitajiet ekonomiċi" huma di natura oġġettivi, mingħajr kunsiderazzjoni għall-iskop jew għar-riżultati tat-tranżazzjonijiet ikkonċernati[12] Barra minn hekk, b'konformità mal-fini tad-Direttiva, li fost l-oħrajn huwa li tinstab sistema ta' VAT komuni mfassla fuq definizzjoni uniformi ta' "persuna taxxabbli", li l-istatus għandu jiġi evalwat biss fuq il-bażi tal-kriterji li ġew stipulati f'dik id-Direttiva[13]

Il-kliem li ntuża mill-Qorti fil-każ Ampliscientifica[14] jikkonferma din l-interpretazzjoni, Skont il-Qorti:

‘Minn dan isegwi li l-klassifikazzjoni ta’ persuna taxxabbli waħedha teskludi li l-imsemmija persuni taxxabbli jkomplu jippreżentaw prospetti tal-VAT separatament u jibqgħu jiġu identifikati , fil-grupp jew barra l-grupp, bħala persuni taxxabbli […]’.

Fid-dawl ta' dak li ntqal qabel, il-Kummissjoni hija tal-fehma li huwa essenzjali li l-applikazzjoni tal-iskemi ta' raggruppament għall-iskop tal-VAT ma' jkollhom l-ebda effett fuq il-kunċett ta' persuna taxxabbli. Jekk persuni mhux taxxabbli jitħallew jingħaqdu ma' raggruppament għall-iskop tal-VAT, huwa ċert li dik id-definizzjoni se tiġi affettwata. Meta persuna mhux taxxabbli tingħaqad ma' raggruppament tal-VAT, dik il-persuna ssir parti minn persuna taxxabbli "unika"[15] Persuna mhux taxxabbli li, la għandha drittijiet u lanqas obbligazzjonijiet taħt id-Direttiva tal-VAT m'għandhiex titħalla ssir persuna taxxabbli biss fuq il-bażi li din il-persuna mhux taxxabbli ser tingħaqad ma' raggruppament għall-iskop tal-VAT. Dan isir sabiex biex wieħed idur mal-kriterji li jittederminaw dak li jikkostitwixxi persuna taxxabbli.

3.3.2. Il-kunċett ta' ’persuna stabbilita fit-territorju ta' dak l-Istat Membru’

3.3.2.1. L-interpretazzjoni ta' dan il-kunċett:

Il-kliem innifsu tal-Artikolu 11, jillimitaw l-ambitu territorjali ta' skema ta' raggrupament għall-iskop tal-VAT li ġiet implimentata minn Stat Membru fir-rigward ta' persuni stabbiliti fit-territorju ta' dak l-Istat Membru partikolari. Għalhekk huwa kruċjali li jkun magħruf min seta’ jitqies bħala "stabbilit", fi ħdan it-tifsira ta' din id-dispożizzjoni.

Ma teżisti l-ebda gwida dwar it-tifsira ta' dan il-kunċett. Il-Memorandum ta' Spjegazzjoni tal-proposta għas-Sitt Direttiva tal-VAT ma jipprovdi l-ebda spjegazzjoni fir-rigward tal-limitazzjoni tal-applikazzjoni territorjali fl-Istat Membru kkonċernat.

Il-Kummissjoni hija tal-fehma li ‘li tkun stabbilit fit-territorju ta' dak l-Istat Membru’ tinkludi negozji li l-lokalità tal-attivitajiet tagħhom tinsab fit-territorju tal-Istat Membru li qiegħed jimplimenta l-iskema ta' raggruppament għall-iskop tal-VAT, iżda m'għandux jinkludi lil dawk l-istabbilimenti fissi li jinsabu 'l barra mill-Istat Membru kkonċernat. Madanakollu, stabbilimenti fissi ta' negozji barranin li jinsabu fit-terrorju ta' dak l-Istat Membru li qed jimplimentaw l-iskema ta' raggruppament għall-iskop tal-VAT għandhom ikunu inklużi. Skont dan, huma biss in-negozji li il-lokalità tal-attività ekonomika tagħhom jew l-istabbilimenti fissi ta' negozji bħal dawn jew ta' negozji barranin, li huma fiżikament preżenti fit-territorju tal-Istat Membru li daħħal l-iskema tal-grupp għall-iskop tal-VAT, li jistgħu jingħaqdu ma' grupp għall-iskop tal-VAT.

Jeżistu numru ta’ argumenti li jsostnu intepretazzjoni bħal din:

- L-ewwel, hija konformi mal-kliem attwali tal-kriterju ta' territorjalità fl-Artikolu 11.

- It-tieni, l-iskop territorjali jikkoinċidi mal-ġurisdizzjoni tal-VAT tal-Istat Membru li qiegħed jimplimenta l-iskema ta' raggruppament għall-iskop tal-VAT, u għalhekk jikkoinċidi wkoll mar-rekwiżiti ta' identifikazzjoni tal-VAT li japplikaw fiha. B'dan il-mod, sakemm il-membri kollha ta’ grupp ikunu suġġetti għar-regoli tal-istess Stat Membru, l-iskema ta' gruppi għall-iskop tal-VAT tkun tista' tiġi ġestita u kkontrollata faċilment .

- It-tielet, il-kunċett "stabbilit" fi ħdan it-tifsira tal-Artikolu 11 jikkorispondi ma' "stabbilit" peress li t-terminu jista' jinstab f'dispożizzjonijiet oħra tad-Direttiva tal-VAT u għandu jkun interpretat bl-istess mod.

Il-ġustifikazzjoni prinċipali biex ikunu esklużi l-istabbilimenti fissi, li jinsabu 'l barra mill-pajjiż, tan-negozji li l-lokalità tal-attiviatjiet ekonomiċi tagħhom tinsab fl-Istat Membru li qiegħed jimplimenta l-iskema ta' raggruppament għall-iskop tal-VAT hija l-fatt li dawn mhumiex fiżikament stabbiliti fit-territorju ta' dak l-Istat Membru. Peress li l-iskema ta' raggruppament għall-iskop tal-VAT hija għażla, li tintagħżel minn Stat Membru wieħed, m'għandhiex ikollha l-effett li jesdendi lil hinn mit-territorju fiżiku tal-Istat Membru li jkun daħħal l-iskema ta' raggruppament għall-iskop tal-VAT. Jekk mhux hekk, is-sovranità fiskali ta' Stat Membru ieħor tista' tiġi mittiefsa. Barra minn dan, jekk żewġ Stati Membri kellhom jagħżlu li jdaħħlu skemi ta' raggruppament għall-iskop tal-VAT, huwa possibbli li l-istabbiliment fiss, li jinsab 'il barra mill-pajjiż, jista' jsir parti minn ragruppamenti tal-VAT fiż-żewġ Stati Membri. Riżultat bħal dan la huwa kompatibbli mal-prinċipji bażiċi tas-sistema tal-VAT komuni, u lanqas jista’ jiġi ġestit fl-livell ta' amministrazzjoni nazzjonali. Mill-aspett ta' kontroll, dan mhuwiex eżitu aċċettabbli.

Filwaqt li huwa ċar li l-Artikolu 11 jillimita l-ambitu territorjali tal-iskema ta' raggruppament għall-iskop tal-VAT, fl-istess ħin hija ovvja li l-interpretazzjoni għandha tkun konformi mar-rekwiżiti ekonomiċi u mal-prinċipju dwar il-libertà tal-istabbiliment kif stipulati fl-Artikolu 43, moqri flimkien mal-Artikolu 48 tat-Trattat tal-KE, li permezz tiegħu stabbilimenti fissi ta' negozji barranin jistgħu jibbenefikaw mill-istess opprtunitajiet ta' taxxa li ġew provduti lil negożji li jaqgħu taħt il-liġi nazzjonali tal-Istat Membru kkonċernat. Permezz tal-interpretazzjoni t'hawn fuq, stabbilimenti fissi ta' negożji barranin li jinsabu fl-Istat Membru li qiegħed jimplimenta l-iskema ta' raggruppament għall-iskop tal-VAT jistgħu jkunu parti minnha u b'hekk jibbenefikaw mill-istess opportunitajiet ta' taxxa li ġew provduti lil negożji li jinsabu f'dak l-Istat Membru, u jkunu b'dan il-mod konformi mat-Trattat tal-KE.

3.3.2.2. Rabta mal-każ dwar il-Bank FCE

Fil-Każ dwar il-Bank FCE[16] , il-Qorti ddikjarat li stabbiliment fiss, li ma jirrapreżentax entità legali differenti mill-kumpanija li minnha huwa parti, li ġie stabbilit fi Stat Membru ieħor li fih il-kumpanija prinċipali tforni xi servizz, m'għandux ikun meqjus bħala persuna taxxabbli minħabba l-ispejjeż li jkollu jħallas fir-rigward ta' dawk il-fornituri. Għalhekk, il-fornitura ta' servizzi fi ħdan l-istess entità legali ma taqax fi ħdan l-ambitu tal-VAT.

L-esklużjoni ta' stabbilimenti fissi li jinsabu 'l barra mill-pajjiż, li huma proprjetà ta' persuna taxxabbli stabbilita fi Stat Membru li daħħal skema ta' raggruppament għall-iskop tal-VAT tista', mad-daqqa t'għajn, tidher inkonsistenti mas-sentenza dwar il-Bank FCE. Madanakollu, din is-sentenza ma tagħmel l-ebda referenza għas-sitwazzjoni ta' raggrupament għall-iskop tal-VAT. Barra minn hekk, ta' min jinnota li, bl-adeżjoni ma’ grupp għall-iskop tal-VAT, il-persuna taxxabbli ssir parti minn persuna taxxabbli ġdida, il-grupp għall-iskop tal-VAT u, bħala konsegwenza, tholl lilha nnifisha għal skopijiet ta’ VAT mill-istabbiliment fiss tagħha li jinsab barra l-pajjiż. Dan ifisser li jekk perunsa taxxabli tingħaqad ma' raggruppament għall-iskop tal-VAT, kwalunkwe servizz li sussegwentament tforni 'il barra mill-pajjiż, ikun ikkunsidrat bħala fornitura li saret bejn żewġ persuni taxxabbli separati. Għalhekk, l-istabbiliment fiss li jkun barra l-pajjiż ikun eskluż milli jkun eliġibbli li jsir parti minn raggruppament għall-iskop tal-VAT f'dak l-Istat Membru u allura ma jirrapreżentax nuqqas ta' qbil mas-sentenza li ngħatat fil-każ dwar il-Bank FCE.

3.3.3. Se jiġu inklużi l-attivitajiet kollha u membru membru ta' grupp wieħed għall-iskop tal-VAT

Minħabba li raggruppament għall-iskop tal-VAT huwa kkunisdrat bħala persuna taxxabbli unika, li ġiet identifikata permezz ta' numru tal-VAT uniku, l-attivitajiet kollha tal-membri tar-raggruppament għandhom ikunu inklużi wkoll. Membru ta' raggruppament li huwa involut f'diversi oqsma ta' attività fi Stat Membru li daħħal skema ta' raggruppament għall-iskop tal-VAT għandu, għalhekk, ma jingħatax il-poter li jeskludi wieħed jew iżjed mill-attivatjiet tiegħu mir-raggruppament għall-iskop tal-VAT li minnu jagħmel parti, bl-eċċezzjoni ta' attivitajiet li jsiru minn stabbilimenti li jinsabu 'l barra minn dak l-Istat Membru.

Għall-istess raġuni, skemi nazzjonali ta' raggruppament għall-iskop tal-VAT għandhom jipprekludu persuni taxxabbli milli jingħaqdu ma' iżjed minn raggruppament għall-iskop tal-VAT wieħed. Dan huwa wkoll essenzjali mill-aspett tas-sorveljanza tat-taxxa.

3.3.4. Il-kundizzjoni ta’ ’rabtiet finanzjarji, ekonomiċi u ta' organizzazzjoni’

Il-Kummissjoni hija tal-fehma li din il-kundizzjoni għandha tiġi interpretata li tfisser li t-tliet rabtiet ilkoll għandhom ikunu preżenti matul il-perjodu ta' żmien sħiħ li fih ir-raggruppament għall-iskop tal-VAT qiegħed jeżisti u, li kwalunkwe membru li ma jibqax jissodisfa t-tliet rabtiet, għandu jinħall mir-raggruppament għall-iskop tal-VAT. Ir-raġunijiet għal dan huma:

- L-ewwel, dan isegwi mill-użu tal-konġunzjoni ta' koordinazzjoni "u" li l-kundizzjonijiet se jkomplu jakkumulaw.

- It-tieni, peress li r-raggruppament għall-iskop tal-VAT jirrapreżenta kunċett speċjali ta' persuna taxxabbli u b'hekk jiffunzjona fuq bażi eċċezzjonali, huwa essenzjali li jkun marbut ma' kundizzjonijiet ebsin mhux ħazin, u li din ir-rabta hija żgurata mill-akkumulazzjoni tar-rekwiżiti msemmijin hawn fuq.

- It-tielet, akkumulazzjoni bħal din tinkludi garanziji ulterjuri kontra applikazzjonijiet abbużivi tar-raggruppament għall-iskop tal-VAT, peress li tgħin biex ikunu esklużi strutturi purament artifiċjali li ma fihom l-ebda sinifikat ekonomiku.

B'kunsiderazzjoni għall-prinċipji ġenerali li jiggwidaw din id-dispożizzjoni, il-Kummissjoni tikkunsidra li d-definizzjonijiet li ġejjin tat-tliet rabtiet, jistgħu jservu bħala linji gwida.

Ir- rabta finanzjarja : Hija ddefinita permezzz ta' referenza għall-persentaġġ ta' parteċipazzjoni fil-kapital jew fid-drittijiet biex tivvota ('il fuq minn 50%), jew iddefinita permezz ta' referenza għal kuntratt ta' franchising. Dan jiggranatixxi li kumpanija partikolari għandha, fil-prattika, il-kontroll ta' kumpanija oħra.

Ir- rabta ekonomika : Hija ddefinita permezz tar-referenza għall-eżistenza ta' minn tal-inqas waħda mis-sitwazzjonjiet ta' kooperazzjoni ekonomika li ġejjin. L-attività prinċipali tal-membri tar-raggruppament hija tal-istess natura, jew l-attivitajiet tal-membri tar-raggruppament huma kumplimentari jew jiddependu minn xulxin, jew wieħed mill-membri tar-raggruppament qiegħed iwettaq attivitajiet li huma bis-sħiħ jew sostanzjalment ta' benefiċċju għall-membri l-oħra.

Ir- rabta ta' organizzazzjoni : Hija ddefinita permezz ta' referenza għall-ezistenza ta' struttura ta' ġestjoni kondiviża, jew tal-inqas kondiviża parzjalment.

3.3.5. Għal liema setturi tan-negożju għandha tapplika l-iskema ta' raggruppament għall-iskop tal-VAT?

Skema ta' raggruppament għall-iskop tal-VAT għandha tkun miftuħa għas-setturi kollha involuti f'attività ekonomika li jinsabu fl-Istat Membru li jdaħħal skema bħal din. Dan isegwi mill-kliem tal-Artikolu 11, fejn ma hemm l-ebda limitu fir-rigward ta' ċerti setturi. Barra minn hekk, dan isegwi mill-prinċipju ta' newtralità fiskali. Skema nazzjonali ta' raggruppament għall-iskop tal-VAT ma tistax tiddaħħal biss għal ċerti setturi, għaliex permezz tagħha dawn in-negozji se jkunu vantaġġati aktar minn oħrajn u l-iskema tista' tiġi kkritikata wkoll mill-aspett ta' għajnuna mill-Istat (li qiegħda turi preferenza).

Limitazzjonijiet ta' disponibbilità tal-iskemi ta' raggruppament għall-iskop tal-VAT jistgħu jkunu ġġustifikati biss jekk huwa neċessarju li tittieħed xi tip ta' azzjoni kontra abbuż potenzjali marbut ma' tranżazzjonijiet li ġew identifikati b'mod ċar. Mingħjar ġustifikazzjoni bħal din mhuwiex aċċettabbli li skema ta' raggruppament għall-iskop tal-VAT tkun limitata permezz tal-liġi nazzjonali dwar settur partikolari bħal, per eżempju, is-settur finanzjarju jew dak tal-assigurazzjoni.

3.4. Id-drittijiet u l-obbligi ta' grupp għall-iskop tal-VAT

3.4.1. Min se jkun responsabbli għall-obbligi?

Peress li raggruppament għall-iskop tal-VAT huwa kkunsidrat bħala persuna taxxabli unika, huwa naturali li r-raggruppament ikun soġġett għall-istess drittijiet u obbligi li japplikaw għal kwalunkwe persuna taxxabli oħra u li d-dispożizzjonijiet kollha tad-Direttiva tal-VAT, kif ukoll is-sentenzi mill-Qorti tal-Ġustizzja Ewropea, japplikaw għalih. Għalhekk, l-obbligi jaqgħu taħt ir-responsabbilità tar-raggrupament tal-VAT bħala tali, u mhux tal-membri tiegħu. Għalhekk, meta tkun qiegħda titfassal skema nazzjonali ta' raggruppament għall-iskop tal-VAT, huwa essenzjali li titfassal skema fi ħdan il-qafas legali tal-Komunità li ġiet stipulata fir-rigward ta' persuni taxxabbli ordinarji.

In-numru uniku tal-VAT tar-raggruppament għall-iskop tal-VAT għandu jintuża, per eżempju, meta toħroġ xi fattura dwar il-fornitura ta' xi prodotti, fejn huwa kkunsidrat li l-ħruġ tal-fattura sar mir-raggruppament għall-iskop tal-VAT.

Bħala kwalunkwe persuna oħra taxxabli, ir-raggruppament għall-iskop tal-VAT għandu jissottometti d-denunzja fuq il-VAT u, fejn inhu xieraq, dikjarazzjonijiet rikapitolattivi. Id-denunzja tal-VAT għandha tikkonsisti mis-somma netta tal-VAT tar-raggruppament, magħmula mill-kontijiet ta' VAT li kull membru individwali għandu jħallas, filwaqt li jkun ikkunsidrat il-fatt li t-tranżazzjonijiet li saru bejn il-membri ma jwasslux għal kont jew ħlas ta' VAT. Dan ifisser li talbiet għall-VAT minn ċerti membri tal-grupp se jiġu kkredittati kontra d-djun tal-VAT ta’ membri oħra: Għal raġunijet ta' VAT, kemm it-talbiet kif ukoll il-kontijiet jirrapreżentaw talbiet u kontijiet tar-raggruppament għall-iskop tal-VAT u mhux tal-membri individwali. Fil-każ dwar Ampliscientifica[17] il-Qorti qatgħetha li t-trattament ta' persuna taxxabbli unika jipprekludi persuni li jagħmlu parti minn raggruppament għall-iskop tal-VAT, milli jkompli jissottomettu d-denunzja tal-VAT b'mod separat bħala persuni taxxabbli individwali, peress li l-persuna taxxabbli unika waħedha, jiġifieri r-raggruppament għall-iskop tal-VAT, hija awtorizzata biex tissottometti denunzja tal-VAT bħal din.

Minn dan joħroġ li l-għażla tar-raggruppament għall-iskop tal-VAT hija prinċipalment miżura ta' simplifikazzjoni amministattiva.

3.4.2. It-trattament ta' fornituri minn u lejn partijiet terzi.

Fir-rigward ta' partijiet terzi, il-grupp tal-VAT jaġixxi bħala persuna taxxabli unika. Bħala konsegwenza, il-fornituri kollha tal-prodotti u servizzi min-naħa tal-membri tar-raggruppament lil reċipjent li ma jagħmilx parti mir-raggruppament huma kkunisdrati bħala fornituri li saru mir-raggruppament fih innfsu, u mhux mill-membri individwali. Bl-istess mod, il-fornitura ta' prodotti jew servizzi min-naħa ta' partijiet terzi lil wieħed jew iżjed mill-membri tar-raggruppament hija kkunsidrata bħala fornitura li saret lir-raggruppament fih innifsu. Similarment, importazzjonijiet u akkwisti bejn il-pajjiżi tal-Komunità li saru mir-raggruppament huma kkunsidrati bħala importazzjonijiet li saru mir-raggruppament fih innifsu. Għalhekk, is-sitwazzjoni tal-VAT tal-grupp u t-trattament tat-tranżazzjonijiet tiegħu ta' dħul u ħruġ huma kumparabbli bis-sħiħ ma' dawk ta' persuna taxxabbli li għandha fergħat differenti.

3.4.3. Fornituri fi ħdan il-grupp.

Fir-rigward tat-tranżazzjonijiet interni tal-grupp tal-VAT, jiġifieri tranżazzjonijiet għall-kunsiderazzjoni bejn il-membri individwali, din tiġi wkoll mill-grupp tal-VAT li qiegħed jiġi ttrattat bħala persuna taxxabbli unika, li dawn it-tranżazzjonijiet għandhom ikunu ikkunsidrati li saru mill-grupp għalih innifsu. Dan huwa wieħed mill-konsegwenzi l-aktar importanti marbuta mat-tiswir ta' raggruppament għall-iskop tal-VAT, peress li, bl-eċċezzjoni ta' kwalunkwe fornitura dovuta (L-Artikoli 16, 18, 26 u 27), it-tranżazzjonijiet tar-raggruppament għall-iskop tal-VAT li se jiġu kkunsidrati ma jeżistux għal raġunijiet ta' VAT; huma jinsabu " 'il barra mill-ambitu" Minn dan joħroġ li l-għażla ta' raggruppament għall-iskop tal-VAT tista' toffri vantaġġi ta’ fluss ta’ flus għan-negozji.

3.4.4. Drittijiet u obbligi meta meta jiġi ffurmat jew jiġi xolt grupp tal-VAT.

Fl-istess ħin li r-raggruppament għall-iskop tal-VAT isir persuna taxxabli unika, id-drittijiet u l-obbligi tal-VAT tal-membri individwali huma awtomatikament trasferiti lir-raggruppament għall-iskop tal-VAT. L-istess japplika meta persuna taxxabli tingħaqad ma' raggruppament għall-iskop tal-VAT li diġà jeżisti.

L-Artikolu 11 ma fih l-ebda dispożizzjoni dwar il-perjodu ta' żmien li persuna għandha tibqa' membru ma' raggruppament għall-iskop tal-VAT. Madankollu, it-tieni paragrafu tal-Artikolu 11, jippermetti lill-Istati Membri jaddottaw miżuri sabiex jiġi żgurat li l-ebda vantaġġ mhux ġġustifikat ma jista' jitgawda minn fuq l-iskema ta' raggruppament għall-iskop tal-VAT. Il-Kummissjoni hija tal-fehma li din tippermetti miżuri biex jiġi stabbilit, pereżempju, l-inqas perjodu ta' żmiem possibbli ta' sħubija.

Peress li r-raggruppament għall-iskop tal-VAT huwa kkunsidrat bħala persuna unika taxxabbli, li għaliha japplikaw id-drittijiet u l-obbligi tal-membri fir-rigward tal-VAT, għandu jsegwi li meta raggruppamet tal-VAT jiġi xolt u ma jibqax jeżisti d-drittijiet u l-obligi li japplikaw għar-raggruppament japplikaw mill-ġdid għall-membri individwali mill-mument li fih ir-raggruppament għall-iskop tal-VAT ma baqax jeżisti. Fl-istess ħin, l-ex membri tar-raggruppament jerġgħu imorru lura għall-qagħda ta' persuni taxxabbli individwali. L-istess japplika f'sitwazzjoni fejn membru jħalli l-grupp.

3.5. Id-dritt ta’ tnaqqis ta' taxxa għall-grupp tal-VAT

3.5.1. Ir-regoli dwar id-dritt ta' tnaqqis fi-taxxa applikabbli għal raggruppament għall-iskop tal-VAT

It-trattament tar-raggruppament għall-iskop tal-VAT bħala pesuna taxxabbli unika għal raġunjiet ta' VAT għandu l-effett li d-dritt biex titnaqqas it-taxxa mħallsa fuq ix-xiri huwa determinat fuq il-bażi tat-tranżazzjonijiet tar-raggruppament fiha nnifisha, ma' partijiet terzi.

F'dan il-kuntest, ir-regoli li jikkonċernaw l-aġġustament tad-dritt ta' tnaqqis se jiġu applikati kif suppost, pereżempju, meta persuna taxxabbli tidħol jew tħalli r-raggruppament, jew jekk l-attivitajiet ta' membru tar-raggruppament jinbidlu b'tali mod li d-dritt ta' tnaqqis tar-raggruppament irid jinbidel ukoll.

F'dan ir-rispett għandu jitfakkar li, sabiex ikun iddeterminata il-VAT li għandha titnaqqas, l-Artikolu 173 joffri lill-Istati Membri għażliet differenti. Filwaqt li r-regola ġenerali hija r-regola ta' tnaqqis proporzjonali (il-"pro-rata") kif stipulata fl-Artikoli 174 u 175, tista' tintuża wkoll sistema ta' attribuzzjoni diretta biex tirrifletti aħjar l-użu attwali.

B'dawn l-għażliet, hemm skop għal differenzi sinifikanti bejn l-Istati Membri fir-rigward tal-metodi li jintużaw biex ikun determinat id-dritt biex titnaqqas it-taxxa mħallsa fuq ix-xiri, li jistgħu jirriżultaw f'differenzi fl-ammont tal-VAT li jrid jitnaqqas fl-Istati Membri. Barra minn hekk, ma hemm l-ebda regola komuni li tillimita d-dritt biex titnaqqas it-taxxa mħallsa fuq ix-xiri fir-rigward ta' spejjeż li ma jirrapreżentawx b'mod strett spejjeż ta' negozju, li għalihom l-Istati Membri jistgħu jillimitaw it-tnaqqis skont l-Artikolu 176.

3.5.2. L-Impatt ta' raggruppament għall-iskop tal-VAT fuq id-dritt ta' tnaqqis

Wieħed mill-iżjed konsegwenzi importanti marbuta mat-tiswir ta' raggruppament għall-iskop tal-VAT hija "it-tneħħija", mill-aspett tal-VAT, tat-tranżazzjonijiet bejn il-membri tar-raggruppament. F'raggruppament għall-iskop tal-VAT li jikkonsisti biss minn persuni taxxabli li għandhom id-dritt għal tnaqqis sħiħ, l-effett fuq id-dħul fit-taxxa huwa newtrali għall-Istat Membru li fit-territorju tiegħu qiegħed jopera r-raggrupament tal-VAT.

Madanakollu, f'raggruppament għall-iskop tal-VAT li jikkonsisti wkoll minn persuni taxxabbli li ma għandhom l-ebda dritt għal tnaqqis sħiħ jew tnaqqis parzjali, huwa possibbli li l-effett fuq id-dħul tat-taxxa ma jibqax newtrali. VAT li ma tistax titnaqqas u li għandha titħallas fir-rigward ta' tranżazzjonijiet li saru minn wieħed mill-membri tar-raggruppament għall-benefiċċju ta' membru ieħor li ma għandu l-ebda dritt għal tnaqqis jew dritt għal tnaqqis parzjali biss, effettivament, se jintilef għall-Istat, peress li t-tranżazzjonijiet interni ma jeżistux aktar għal raġunijiet ta' VAT. F'dan ir-rigward, ir-raggruppament għall-iskop tal-VAT jinnewtralizza l-ispejjeż tal-VAT li jridu jitħallsu fuq tranżazzjonijiet bejn il-membri tar-raggruppament.

Minn dan joħroġ li iskema ta' raggruppament għall-iskop tal-VAT tista' toffri vantaġġi finanzjarji oħra għal gruppi tal-VAT li jinkludu vantaġġi għal membri li ma għandhom l-ebda dritt għal tnaqqis sħiħ jew tnaqqis parzjali. Dawn il-vantaġġi jistgħu ivarjaw skont il-modalitajiet għall-implimentazzjoni li ntagħżlu mill-Istati Membri, b'mod partikolari fir-rigward tar-regoli relatati mad-dritt għal tnaqqis.

Il-Kummissjoni hija tal-fehma li hija tal-akbar importanza li l-Istati Membri jiżguraw l-applikazzjoni korretta u sħiħa tar-regoli tal-Komunità li jirregolaw id-dritt għal tnaqqis tar-raggruppament għall-iskop tal-VAT.

3.5.3. Il-ħtiega li jittieħdu miżuri kontra l-evażjoni

Barra minn hekk, permezz tat-tieni paragrafu tal-Artikolu 11 l-Istati Membri jistgħu jaddottaw kwalunkwe miżura meħtieġa għall-prevenzjoni tal-evażjoni jew l-evitar tat-taxxa.

Għandu jkun imfakkar li, fis-sentenza Halifax[18] , il-Qorti għamlitha ċara li l-Istati Membri għandhom is-setgħa li jiġġieldu kontra kwalunkwe prattika ta' abbuż.

Fi kwalunkwe każ, il-Kummissjoni hija tal-fehma li ma għandu jitqajjem l-ebda vantaġġ mhux ġustifikat jew isir xi dannu bħala riżultat tal-implimentazzjoni tal-għażla ta' raggruppament għall-iskop tal-VAT.

B'kunsiderazzjoni għall-għanijiet oriġinali tal-għażla ta' raggruppament għall-iskop tal-VAT, li għandha titqies prinċipalment bħala miżura ta' simplifikazzjoni, l-ebda skema bbażata fuq din l-għażla ma għandha twassal għal distorsjonijiet fil-kompetizzjoni jew għandha tmur kontra l-prinċipju ta' newtralità fiskali. Sitwazzjoni fejn l-għażla ta' raggrupament tal-VAT qiegħda tintuża biex tiġbed in-negozju fi Stati Membri speċifiċi, u għalhekk tkun sors ta' kompetizzjoni fiskali bejniethom, għandha tiġi evitata.

Għalhekk huwa ta' importanza kbira li l-Istati Membri jagħmlu użu minn din l-għażla u jieħdu l-miżuri neċessarji kollha biex ikunu evitati l-evażjoni jew l-evitar tat-taxxa, kif ukoll miżuri kontra prattiki ta' abbuż, li jkunu ġew implimentati permezz tal-użu tal-iskemi nazzjonali tagħhom ta' raggruppament għall-iskop tal-VAT . L-ebda vantaġġ jew dannu mhux ġustifikat ma għandu jitqajjem bħala riżultat tal-implimentazzjoni tal-għażla ta' raggruppament għall-iskop tal-VAT.

4. KONKLUżJONIJIET

Il-Kummissjoni tistieden lill-Kunsill u lill-Parlament Ewropew biex jieħdu nota tal-pożizzjoni tagħha dwar l-iskemi ta' raggruppament għall-iskop tal-VAT kif stipulat minn din il-Komunikazzjoni bl-għan li

- Tikkontribwixxi għal applikazzjoni aktar uniformi tal-Artikolu 11 tad-Direttiva tal-VAT, biex b'hekk jiġu evitati l-impatti negattivi fis-suq intern u l-kontradizzjonijiet mal-prinċipji bażiċi tas-sistema tal-VAT tal-Komunità;

- Isservi bħala linji gwida għall-Istati Membri meta jiġu biex idaħħlu l-iskema ta' raggruppament għall-iskop tal-VAT tagħhom fil-leġiżlazzjoni nazzjonali tagħhom jew meta jmorru biex jagħmlu xi emendi f'tali skemi.

Din il-Komunikazzjoni ma taffettwax ir-rwol tal-Kummissjoni bħala gwardjan tat-Trattati mwettqa b'konformità mal Artikolu 211 tat-Trattat.

[1] Direttiva tal-Kunsill 2006/112/KE tat-28 ta' Novembru 2006, dwar is-sistema komuni ta' taxxa fuq il-valur miżjud (ĠU L 347, 11.12.2006, p.1). Direttiva kif l-aħħar emendata mid-Direttiva 2008/8/KE (ĠU L 44, 20.2.2008, p. 11).

[2] L-Awstrija, Il-Belġju, , Ir-Repubblika Ċeka, Ċipru, Id-Danimarka, L-Estonja, Il-Finlandja, Il-Ġermanja, L-Ungerija, L-Irlanda, L-Olanda, Ir-Romanija, Spanja, L-Iżvezja u r-Renju Unit. Is-Slovakkja se tintroduċi l-iskema ta' raggruppament għall-iskop tal- VAT f’Lulju 2009.

[3] Is-Sitt Direttiva tal-Kunsill 77/388/KEE tas-17 ta' Mejju 1977 fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ - Sistema komuni ta' taxxa fuq il-valur miżjud: bażi uniformi ta' stima (ĠU L 145, 13.6.1977, p. 1).

[4] Proposta għas-Sitt Direttiva tal-Kunsill fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ - Sistema komuni ta' taxxa fuq il-valur miżjud: bażi uniformi ta' valutazzjoni (COM(73) 950, 20.6.1973).

[5] Id-Direttiva tal-Kunsill 2006/69/KE tal-24 ta’ Lulju 2006 li temenda d-Direttiva 77/388/KEE fir-rigward ta' ċerti miżuri li jissimplifikaw il-proċedura għall-impożizzjoni tat-taxxa fuq il-valur miżjud u li jassistu fil-ġlieda kontra l-evażjoni jew l-evitar tat-taxxa, u li tħassar ċerti Deċiżjonijiet li jipprovdu derogi (ĠU L 221, 12.8.2006, p. 9).

[6] Il-Proposta għal Direttiva tal-Kunsill li temenda d-Direttiva 77/388/KEE fir-rigward ta' ċerti miżuri li jissimplifikaw il-proċedura għall-impożizzjoni tat-taxxa fuq il-valur miżjud u li jassistu fil-ġlieda kontra l-evażjoni jew l-evitar tat-taxxa, u li tħassar ċerti Deċiżjonijiet li jipprovdu derogi (COM(2005) 89 finali, 16.3.2005).

[7] Il-Proposta għal Direttiva tal-Kunsill li temenda d-Direttiva 2006/112/KE dwar is-sistema komuni ta' taxxa fuq il-valur miżjud, fir-rigward tat-trattament tas-servizzi finanzjarji u tal-assigurazzjoni (COM (2007) 747 finali/2,20.2.2008) u Proposta għal Regolament tal-Kunsill li jistipula l-miżuri ta' implimentazzjoni fir-rigward tad-Direttiva 2006/112/KE dwar is-sistema komuni ta' taxxa fuq il-valur miżjud, fir-rigward tat-trattament tas-servizzi finanzjarji u tal-assigurazzjoni (COM (2007) 747 finali/2,20.2.2008).

[8] Ara għal dan l-għan is-sentenza tal-Qorti tal-Ġustizzja Ewropea fil-Każ C-162/07, Ampliscientifica, paragrafu 18 (ĠU C 171 tal-5.7.2008, p. 8).

[9] Każ C-162/07, Ampliscientifica, paragrafu 19.

[10] Każ C-162/07, Ampliscientifica, paragrafu 20.

[11] Il-verżjoni bl-Ingliż tirreferi għal "persuni", dik bil-Franċiż tirreferi għal 'les personnes', u dik bil-Ġermaniż tirreferi għal 'ansässige Personen'.

[12] Każ C-255/02, Halifax, paragrafu 55 (ĠU C 131, 3.6.2006, p. 1).

[13] Każ C-186/89 W.M. van Tiem, paragrafu 25 (rapporti mill-Qorti Ewropea 1990 Paġna I-04363).

[14] Każ C-162/07, Ampliscientifica, paragrafu 19.

[15] L-opinjoni tal-Avukat Ġenerali tal-24 ta' April 1991, Każ C-60/90, Polysar Investments Netherlands BV, paragrafi 8 u 9. L-Opinjoni tat sett ta' raġunijiet li jispjegaw għaliex dawk biss obbligati li jħallsu l-VAT għandhom jitħallew isiru membri ta' raggruppament għall-iskop tal-VAT . B'mod partikolari, skont l-Opinjoni, it-tieni paragrafu tal-Artikolu 4(4) tas-Sitt Direttiva tal-VAT, mhuwiex immirat biex jemenda l-kundizzjonijiet taħt liema persuna hija obbligata li tħallas il-VAT li ġew stipulati fl-Artikolu 4(1). Allura, ġie konkluż li l-Artikolu 4(4) ma jagħtix poter lil Stat Membru biex jittratta żewġ persuni li kienu assoċjati flimkiem fil-qrib bħala persuna taxxabbli unika, jekk ikun ġie stabbilit li waħda min dawn il-persuni ma kinitx involuta fl-ebda 'attività ekonomika’ għal raġunijiet ta' VAT.

[16] Każ C-210/04, FCE Bank (ĠU C, 3.6.2006, p.14).

[17] Każ C-162/07, Ampliscientifica, paragrafu 19.

[18] Każ C-255/02.