(1)

Ir-Regolament (KE) Nru 1/2005 jistabbilixxi r-regoli għat-trasport ta’ annimali vertebrati ħajjin ġewwa l-Unjoni, inkluż il-kontrolli speċifiċi li għandhom jitwettqu mill-uffiċjali fuq konsenji li jidħlu jew joħorġu mit-territorju doganali tal-Unjoni L-Artikolu 27(1) tar-Regolament (KE) Nru 1/2005 jipprovdi li l-awtorità kompetenti għandha tivverifika li kien hemm konformità mar-rekwiżiti ta’ dak ir-Regolament, billi twettaq spezzjonijiet mhux diskriminatorji tal-annimali, il-mezzi ta’ trasport u d-dokumenti ta’ akkumpanjament (“spezzjonijiet mhux diskriminatorji”).

(2)

Barra minn hekk, l-Artikolu 27(2) tar-Regolament (KE) Nru 1/2005 jipprovdi li sat-30 ta’ Ġunju ta’ kull sena l-Istati Membri għandhom jissottomettu lill-Kummissjoni rapport annwali għas-sena preċedenti dwar l-ispezzjonijiet mhux diskriminatorji (“ir-rapporti annwali”). Ir-rapporti annwali għandhom ikunu akkumpanjati minn analiżi tan-nuqqasijiet maġġuri misjuba u pjan ta’ azzjoni sabiex jindirizzahom.

(3)

Ir-Rapport mill-Kummissjoni lill-Parlament Ewropew u l-Kunsill dwar l-impatt tar-Regolament tal-Kummissjoni (KE) Nru 1/2005 dwar il-protezzjoni tal-annimali waqt it-trasport (2) ikkunsidra li għandhom jiġu adottati miżuri ta’ implimentazzjoni dwar il-kontrolli li għandhom jitwettqu mill-awtoritajiet kompetenti tal-Istati Membri skont l-Artikolu 27(1) tar-Regolament (KE) Nru 1/2005.

(4)

Dak ir-rapport ikkonkluda li l-istruttura tas-sistema ta’ rapportar għandha tkun iżjed armonizzata, għaliex b’hekk tkun qed tipprovdi dejta aħjar u iktar komparabbli.

(5)

Għalhekk, din id-Deċiżjoni għandha tistabbilixxi formola mudell armonizzata għar-rapporti annwali u, sabiex jonqos il-piż amministrattiv fuq l-Istati Membri, għandha tipprovdi wkoll biex ir-rapporti annwali jiġu sottomessi lill-Kummissjoni b’mod elettroniku.

(6)

L-awtorità kompetenti għandha twettaq spezzjonijiet mhux diskriminatorji matul stadji differenti tal-vjaġġ. Dawn jitwettqu qabel it-tluq, matul il-vjaġġ, kif jaslu fid-destinazzjoni u wara li jitlesta l-vjaġġ. Matul spezzjoni mhux diskriminatorja, l-awtorità kompetenti tista’ twettaq għadd ta’ kontrolli biex tivverifika l-konformità mal-leġiżlazzjoni tal-Unjoni. Dan jista’ jinkludi l-iċċekkjar tal-annimali biex tara li huma b’saħħithom biżżejjed biex jiġu ttrasportati; l-iċċekjar li l-mezz ta’ trasport jissodisfa r-rekwiżiti tal-leġiżlazzjoni tal-Unjoni jew li t-trasportatur għandu l-awtorizzazzjonijiet neċessarji. It-trasportatur jista’ jkun infurmat dwar dan minn qabel jew le.

(7)

It-trasportaturi spiss jantiċipaw li l-ispezzjonijiet mhux diskriminatorji jkunu se jitwettqu qabel it-tluq fuq vjaġġi twal bejn l-Istati Membri u ma’ pajjiżi terzi u wara li jaslu fid-destinazzjoni meta hija biċċerija, u li dawn l-ispezzjonijiet mhux diskriminatorji spiss jinkludu l-iċċekkjar ta’ għadd kbir ta’ annimali. Għalhekk, fir-rapporti annwali dawk l-ispezzjonijiet mhux diskriminatorji għandhom ikunu elenkati separatament mill-ispezzjonijiet mhux diskriminatorji aleatorji u bbażati fuq ir-riskju li spiss ma jkunux antiċipati u jistgħu jkopru għadd iżgħar ta’ annimali.

(8)

L-ispezzjonijiet mhux diskriminatorji li jitwettqu qabel jew matul il-vjaġġ jinkludu verifiki mill-awtorità kompetenti ta’ kwalunkwe dokument ta’ akkumpanjament li jkun meħtieġ li jkun magħmul disponibbli għaliha. Dawk l-ispezzjonijiet mhux diskriminatorji għandhom jiġu kkunsidrati separatament mill-ispezzjonijiet mhux diskriminatorji li jitwettqu wara li jitlesta vjaġġ, li jinkludu verifiki tar-reġistri tal-vjaġġ jew l-istampar tal-mapep tas-sistemi tan-navigazzjoni, bl-għan uniku ta’ verifika tal-konformità mar-rekwiżiti stipulati fil-paragrafi 1.4, 1.5, 1.7 u 1.8 tat-Taqsima 1 tal-Kapitolu V tal-Anness I tar-Regolament (KE) Nru 1/2005 dwar il-ħinijiet tal-vjaġġ u l-perjodi ta’ mistrieħ.

(9)

Għalhekk, sabiex ikun żgurat tqabbil kif suppost mal-informazzjoni miġbura matul l-ispezzjonijiet mhux diskriminatorji, din id-Deċiżjoni għandha tipprovdi għal tliet tipi differenti ta’ spezzjonijiet mhux diskriminatorji biex jiġu rapportati separatament għall-fini tar-rapporti annwali. Dawn it-tliet tipi ta’ spezzjonijiet mhux diskriminatorji għandhom ikopru: (a) spezzjonijiet mhux diskriminatorji li jitwettqu fil-post tat-tluq qabel ma l-annimali jiġu ttrasportati fuq vjaġġi twal bejn l-Istati Membri u ma’ pajjiżi terzi, u wara li l-annimali jinħarġu mill-mezz ta’ trasport fil-post tad-destinazzjoni meta dan ikun biċċerija; (b) spezzjonijiet mhux diskriminatorji li jitwettqu matul il-vjaġġ; u (c) spezzjonijiet mhux diskriminatorji li jitwettqu wara li jitlesta l-vjaġġ biex tiġi vverifikata l-konformità mal-ħinijiet tal-vjaġġ u l-perjodi ta’ mistrieħ.

(10)

Matul spezzjoni mhux diskriminatorja, l-awtorità kompetenti tista’ tivverifika annimal wieħed jew iktar, il-mezzi ta’ trasport u d-dokumenti ta’ akkumpanjament. Ir-riżultat tal-ispezzjoni mhux diskriminatorja jista’ jirriżulta fis-sejba ta’ każijiet ta’ nuqqas ta’ konformità mar-rekwiżiti tar-Regolament (KE) Nru 1/2005 mill-awtorità kompetenti u l-azzjoni li tittieħed minnha biex tindirizza n-nuqqas ta’ konformità. It-tqabbil kif suppost tar-riżultat ta’ spezzjonijiet mhux diskriminatorji bħal dawn fl-Istati Membri jirrikjedi li dawn jiġu kkunsidrati u jiġu rrapportati f’manjiera armonizzata.

(11)

Din id-Deċiżjoni għandha tapplika mill-1 ta’ Jannar 2015 sabiex tagħti biżżejjed żmien lill-Istati Membri biex jadattaw is-sistemi nazzjonali tagħhom tal-ġbir tad-dejta għall-informazzjoni li trid tiġi inkluża fir-rapporti annwali skont din id-Deċiżjoni.

(12)

Il-miżuri provduti f’din id-Deċiżjoni huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali,