20.8.2011   

MT

Il-Ġurnal Uffiċjali tal-Unjoni Ewropea

L 215/4

(1)

Ir-Regolament tal-Kummissjoni (KE) Nru 1881/2006 li jiffissa l-livelli massimi ta' ċerti kontaminanti fl-oġġetti tal-ikel (2) jistabbilixxi l-livelli massimi għall-benzo(a)pyrene f'varjetà ta' oġġetti tal-ikel.

(2)

Benzo(a)pyrene jagħmel parti mill-grupp ta’ idrokarburi poliċikliki aromatiċi (polycyclic aromatic hydrocarbons, PAH) u jintuża bħala markatur għall-okkurenza u l-effett ta’ PAH karċinoġeniċi fl-ikel ibbażat fuq opinjoni xjentifika ta' dak li kien il-Kumitat Xjentifiku dwar l-Ikel (Scientific Committee on Food, SCF) (3). Fl-opinjoni tiegħu ta’ Diċembru 2002, l-SCF issuġġerixxa l-ħtieġa ta’ analiżi oħra tal-proporzjonijiet relattivi ta’ dawn il-PAH fl-ikel għal reviżjoni futura dwar jekk il-benzo(a)pyrene hux addattat biex jinżamm bħala markatur jew le.

(3)

Inġabret dejta ġdida dwar l-okkurenza ta' PAH karċinoġeniċi f’oġġetti tal-ikel mill-Istati Membri fil-qafas tar-Rakkomandazzjoni tal-Kummissjoni 2005/108/KE (4). Il-Kummissjoni staqsiet lill-Awtorità Ewropea dwar is-Sigurtà fl-Ikel (European Food Safety Authority, EFSA) biex tirrevedi l-opinjoni tal-SCF u tikkunsidra d-dejta ġdida dwar l-okkurenza, tagħrif xjentifiku ieħor ġdid li huwa rilevanti kif ukoll l-approċċ tal-Marġni tal-Esponiment (Margin of Exposure, MOE). Permezz ta’ din ir-reviżjoni, l-EFSA ntalbet teżamina mill-ġdid jekk il-benzo(a)pyrene hux addattat biex jinżamm bħala markatur jew le.

(4)

Il-Bord Xjentifiku dwar l-Aġenti ta’ Kontaminazzjoni fil-Katina Alimentari (il-Bord tal-CONTAM) tal-EFSA adotta opinjoni dwar l-Idrokarburi Poliċikliċi Aromatiċi fl-Ikel fid-9 ta’ Ġunju 2008 (5). F’din l-opinjoni l-EFSA kkonkludiet li l-benzo(a)pyrene mhuwiex markatur adattat għall-okkurenza ta’ idrokarburi aromatiċi poliċikliċi fl-ikel u li sistema ta’ erba’ sustanzi speċifiċi (PAH4 (6)) jew tmien sustanzi speċifiċi (PAH8 (7)) tkun l-aktar indikatur addattat għal-PAH fl-ikel. L-EFSA kkonkludiet li sistema ta’ tmien sustanzi (PAH8) ma toffriex wisq valur miżjud meta mqabbla ma’ sistema ta’ erba’ sustanzi (PAH4).

(5)

Barra minn hekk, il-Bord tal-CONTAM, permezz tal-approċċ tal-Marġni tal-Esponiment (MOE), ikkonkluda li hemm periklu baxx għas-saħħa tal-konsumatur fil-medja stmata tal-esponiment tad-dieta. Madankollu, għal konsumaturi ta' livell għoli l-MOE kien qrib l-10 000 jew inqas, li jindika periklu għoli għas-saħħa tal-konsumatur.

(6)

Skont l-opinjoni tal-EFSA, is-sistema fis-seħħ tal-użu tal-benzo(a)pyrene bħala l-uniku markatur għall-grupp ta’ idrokarburi aromatiċi poliċikliċi, ma tistax tinżamm. Għalhekk hemm il-ħtieġa ta’ emenda tar-Regolament (KE) Nru 1881/2006.

(7)

Għandhom ikunu introdotti livelli massimi ġodda għas-somma ta’ erba’ sustanzi (PAH4) (benzo(a)pyrene, benz(a)anthracene, benzo(b)fluoranthene u chrysene), filwaqt li jinżamm livell massimu separat għall-benzo(a)pyrene.

(8)

Din is-sistema tiżgura li l-livelli ta’ PAH fl-ikel jinżammu f’livelli li ma joħolqux periklu għas-saħħa u li l-ammont ta’ PAH jista’ wkoll ikun ikkontrollat f’dawk il-kampjuni li fihom il-benzo(a)pyrene mhux osservat, imma fejn huma preżenti PAH oħrajn.

(9)

Il-livell massimu separat ta’ benzo(a)pyrene huwa miżmum biex ikun żgurat il-qbil ta’ dejta preċedenti ma’ dik futura. Wara xi żmien ta’ implimentazzjoni ta’ din l-emenda u abbażi ta' dejta ġdida li se tkun iġġenerata fil-futur, għandu jkun eżaminat mill-ġdid il-bżonn taż-żamma ta' livell massimu għall-benzo(a)pyrene.

(10)

Dwar is-somma tal-erba’ sustanzi (PAH4), għandhom jintużaw limiti ta’ konċentrazzjoni aktar baxxi bħala bażi għad-deċiżjonijiet ta' konformità.

(11)

Il-livelli massimi għall-idrokarburi aromatiċi poliċikliċi ma għandhomx ikunu perikolużi u għandhom jinżammu raġonevolment baxxi kemm jista’ jkun (l-ALARA) u msejsa fuq prattiċi tajba tal-fabbrikazzjoni u tal-biedja u/jew is-sajd. Id-dejta l-ġdida dwar l-okkurenza tal-PAH turi li l-livelli fl-isfond ta’ PAH f’xi oġġetti tal-ikel huma anqas minn dawk maħsuba. Il-livelli massimi ta’ benzo(a)pyrene għalhekk ġew adattati biex jirriflettu livelli fl-isfond anqas kif ukoll aktar realistiċi f’molluski b’żewġ valvoli friski jew iffumigati.

(12)

Dejta għal ħut iffumigat u laħam iffumigat uriet ukoll li huma possibbli livelli massimi aktar baxxi. Madankollu, f’xi każijiet jista’ jkun hemm il-bżonn tal-adattament tat-teknoloġija għall-iffumigar li qed tintuża. Għalhekk, għandha tkun stabbilita proċedura b’żewġ stadji għal laħam iffumigat u ħut iffumigat li toffri transizzjoni ta' sentejn mid-data tal-applikazzjoni ta' dan ir-Regolament qabel ma jibdew japplikaw il-livelli massimi aktar baxxi.

(13)

Instab li sardin iffumigat u sardin iffumigat fil-bott kellu livelli ogħla ta’ PAH minn ħut ieħor iffumigat. Għandhom ikunu stabbiliti livelli massimi speċifiċi għal sardin iffumigat u sardin iffumigat fil-bott biex juru dak li huwa possibbli f'dawn l-oġġetti tal-ikel.

(14)

Qabel, livell massimu ta’ benzo(a)pyrene fil-“laħam tal-muskoli tal-ħut, għajr ħut iffumigat” kien stabbilit bħala indikatur għat-tniġġiż ambjentali potenzjali. Madankollu, intwera li f’ħut frisk il-PAH jiġu metabolizzati malajr u ma jakkumulawx fil-laħam tal-muskoli. Għalhekk, iż-żamma ta’ livell massimu ta’ PAH f’ħut frisk ma għadhiex meħtieġa.

(15)

Instabu livelli għoljin ta’ PAH f’xi tipi ta’ laħam ittrattati bis-sħana u prodotti tal-laħam ittrattat bis-sħana mibjugħin lill-konsumatur finali. Dawn il-livelli jistgħu jkunu evitati jekk jintużaw kundizzjonijiet ta’ proċessar xierqa kif ukoll apparat adattat. Għalhekk ikun xieraq li jiġu stabbiliti livelli massimi ta’ PAH f’laħam u fi prodotti tal-laħam li jkunu għaddew minn proċess ta’ trattament tas-sħana li huwa magħruf li potenzjalment jirriżulta fil-formazzjoni ta’ PAH, jiġifieri xiwi jew barbecue biss.

(16)

Il-butir tal-kakaw kien temporanjament eżenti mil-livell massimu fis-seħħ għal benzo(a)pyrene fi żjut u xaħmijiet skont ir-Regolament (KE) Nru 1881/2006 u sal-1 ta’ April 2007 kienet imbassra reviżjoni tal-ħtieġa li jkun iffissat livell massimu ta’ PAH għall-butir tal-kawkaw. Ir-reviżjoni mbagħad ġiet posposta u r-riżultat tal-eżami xjentifiku tal-EFSA dwar il-PAH li kien qed isseħħ dak iż-żmien ġie sospiż.

(17)

Il-butir tal-kawkaw fih livelli ogħla ta’ PAH minn żjut u xaħmijiet oħra. Dan jiġri primarjament minħabba t-tnixxif b’mod mhux adattat taż-żerriegħa tal-kawkaw u l-fatt li l-butir tal-kawkaw ma jistax jiġi raffinat bħal żjut u xaħmijiet oħra veġetali. Il-butir tal-kawkaw huwa l-element prinċipali tal-prodotti tal-kawkaw mhux ipproċessati (eż. żerriegħa tal-kawkaw, żerriegħa tal-kawkaw nejja u pproċessata (cocoa mass), żerriegħa tal-kawkaw imneħħija minn ġol-qoxra (cocoa nibs) jew likur tal-kawkaw) u jinstab fiċ-ċikkulata u prodotti oħra tal-kawkaw li spiss jikkunsmaw it-tfal. B’hekk dan jikkontribwixxi għall-esponiment tal-bniedem, partikolarment għall-esponiment tat-tfal. Għalhekk huwa meħtieġ li jiġu stabbiliti livelli massimi għal PAH fiż-żerriegħa tal-kawkaw u fil-prodotti tagħha, għaldaqstant inkluż il-butir tal-kawkaw.

(18)

Il-livelli massimi ta’ PAH fiż-żerriegħa tal-kawkaw għandhom ikunu stabbiliti f’livelli kemm jista’ jkun baxxi b’kunsiderazzjoni għall-possibiltajiet teknoloġiċi kurrenti fil-pajjiżi li jipproduċu. Huma għandhom ikunu stabbiliti abbażi tax-xaħam minħabba l-konċentrazzjoni ta’ PAH fil-frazzjoni tax-xaħam, il-butir tal-kawkaw. Biex jippermettu li l-pajjiżi produtturi jagħmlu t-titjib teknoloġiku biex jadattaw għal dawn il-livelli massimi, id-data tal-applikazzjoni tal-livelli massimi għaż-żerriegħa tal-kawkaw u l-prodotti tagħha għandha tkun differita. Barra minn hekk, inizjalment, għal dawn il-prodotti għandu japplika livell massimu ogħla għas-somma tal-erba’ sustanzi. Wara perjodu tranżitorju ta’ sentejn għandu japplika livell massimu aktar baxx. Il-livelli ta’ PAH fiż-żerriegħa tal-kawkaw u l-prodotti tagħha għandhom ikunu ċċekkjati regolarment bil-ħsieb li tiġi evalwata l-possibiltà li l-livelli massimi jitnaqqsu aktar.

(19)

Dejta uriet li ż-żejt tal-ġewż tal-Indi jista’ jkollu ammonti ogħla ta’ PAH4 minn żjut u xaħmijiet veġetali oħra. Dan huwa minħabba l-preżenza proporzjonalment għolja ta’ benz(a)anthracene u chrysene li ma jistgħux jitneħħew faċilment waqt ir-raffinar taż-żejt tal-ġewż tal-Indi. Il-livelli massimi speċifiċi ta’ PAH fiż-żerriegħa tal-ġewż tal-Indi għalhekk għandhom ikunu stabbiliti f’livelli kemm jista’ jkun baxxi b’kunsiderazzjoni għall-possibiltajiet teknoloġiċi attwali tal-pajjiżi produtturi. Peress li fil-pajjiżi produtturi huwa mistenni titjib teknoloġiku, il-livelli ta’ PAH fiż-żejt tal-ġewż tal-Indi għandhom ikunu ċċekkjati regolarment bil-ħsieb li tiġi evalwata l-possibiltà li fil-futur ikunu stabbiliti livelli aktar baxxi.

(20)

Dejta attwali dwar l-okkurenza ta’ PAH f’ċereali u ħxejjex hija limitata. Id-dejta disponibbli tindika li ċ-ċereali u l-ħxejjex fihom livelli pjuttost baxxi ta’ PAH. Il-livelli baxxi li bħalissa jidhru fid-dejta ta’ okkurenza disponibbli ma jiġġustifikawx l-iffissar immedjat ta’ livelli massimi. Madankollu, l-EFSA identifikat iċ-ċereali u l-ħxejjex bħala kontributuri importanti għall-esponiment tal-bniedem minħabba l-konsum għoli tagħhom. Għalhekk għandhom ikunu ċċekkjati aktar il-livelli ta’ PAH f’dawn iż-żewġ prodotti. Abbażi ta’ aktar dejta, għandha tiġi evalwata l-ħtieġa tal-iffissar ta’ livelli massimi.

(21)

Instabu livelli għoljin ta’ PAH f’xi supplimenti tal-ikel. Madankollu, il-livelli huma varjabbli u jiddependu mit-tip speċifiku ta’ suppliment tal-ikel. Hemm il-ħtieġa u għandha tinġabar aktar dejta dwar supplimenti tal-ikel. Kemm-il darba din id-dejta ssir disponibbli, tkun evalwata l-ħtieġa li jkunu ffissati livelli massimi ta’ PAH f’supplimenti tal-ikel.

(22)

L-Istati Membri u l-operaturi fin-negozju tal-ikel għandhom jingħataw żmien biex jadattaw għal-livelli massimi stabbiliti b’dan ir-Regolament. Id-data tal-applikazzjoni ta’ dan ir-Regolament għalhekk għandha tkun differita. Għandu jingħata perjodu tranżitorju għall-prodotti diġà mqegħdin fis-suq qabel l-applikazzjoni tal-emendi introdotti b’dan ir-Regolament.

(23)

Il-miżuri stipulati f'dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali u la l-Parlament Ewropew u lanqas il-Kunsill ma opponewhom,