ANNESS

Skema ta' ttestjar meħtieġa sabiex tiġi aċċertata l-kisba tal-mira tal-Unjoni għat-tnaqqis tas-serotipi rilevanti tas-Salmonella fil-qatgħat adulti għat-tgħammir tal-Gallus gallus

1.   QAFAS GĦAT-TEĦID TAL-KAMPJUNI

Il-qafas għat-teħid tal-kampjuni għall-individwazzjoni tal-preżenza tas-Salmonella Enteritidis, Salmonella Infantis, Salmonella Hadar, Salmonella Typhimurium u Salmonella Virchow (“is-serotipi rilevanti tas-Salmonella”) għandhom ikopru l-qatgħat ta' adulti għat-tgħammir ta' tjur domestiċi kollha (Gallus gallus) li jinkludu mill-anqas 250 tajra (“qatgħat għat-tgħammir”). Dan għandu jkun bla ħsara għad-dispożizzjonijiet tar-Regolament (KE) Nru 2160/2003 u d-Direttiva 2003/99/KE rigward ir-rekwiżiti ta' monitoraġġ fil-popolazzjonijiet ta' annimali oħra jew serotipi oħra.

2.   MONITORAĠĠ FIL-QATGĦAT GĦAT-TGĦAMMIR

2.1.   Il-post, il-frekwenza u l-istatus tat-teħid tal-kampjuni

Il-kampjuni minn qatgħat għat-tgħammir għandhom jittieħdu fuq l-inizjattiva tal-operatur tan-negozju tal-ikel u bħala parti minn kontrolli uffiċjali.

2.1.1.   Teħid ta’ kampjuni fuq l-inizjattiva tal-operatur tan-negozju tal-ikel

It-teħid tal-kampjuni għandu jsir kull ġimgħatejn fil-post magħżul mill-awtorità kompetenti minn fost iż-żewġ għażliet possibbli li ġejjin:

(a)	fil-mafqas; jew

(b)	fl-istabbiliment.

L-awtorità kompetenti tista’ tiddeċiedi li timplimenta waħda mill-għażliet imsemmija fil-punti (a) jew (b) għall-iskema kollha ta’ ttestjar għall-qatgħat kollha għat-tgħammir tal-brojler u waħda minn dawk l-għażliet għall-qatgħat għat-tgħammir tat-tiġieġ li jbidu. Għaldaqstant, it-teħid tal-kampjuni tal-qatgħat għat-tgħammir li jbidu bajd ta' tfaqqis maħsub għall-kummerċ fl-Unjoni għandu jseħħ fl-istabbiliment.

Proċedura għandha tiġi stabbilita biex tiggarantixxi li l-individwazzjoni tal-preżenza tas-serotipi rilevanti tas-Salmonella matul it-teħid tal-kampjuni b'inizjattiva tal-operatur tan-negozju tal-ikel tiġi notifikata mingħajr dewmien lill-awtorità kompetenti mill-laboratorju li jwettaq l-analiżi. In-notifika f’waqtha tal-individwazzjoni tal-preżenza ta' kwalunkwe serotipi rilevanti tas-Salmonella, għandha tibqa’ r-responsabbiltà tal-operatur tal-ikel u tal-laboratorju li jwettaq l-analiżi.

Permezz ta’ deroga mill-ewwel paragrafu ta' dan il-punt, jekk il-mira tal-Unjoni tkun inkisbet għal mill-anqas sentejn kalendarji konsekuttivi fl-Istati Membri kollha, it-teħid ta’ kampjuni fl-istabbiliment jista’ jiġi estiż biex iseħħ kull tliet ġimgħat, fuq id-diskrezzjoni tal-awtorità kompetenti. Għaldaqstant, l-awtorità kompetenti tista’ tiddeċiedi li żżomm jew terġa’ lura għal intervall ta’ ttestjar ta’ ġimgħatejn fil-każ ta’ individwazzjoni tal-preżenza ta' serotipi rilevanti tas-Salmonella fil-qatgħa għat-tgħammir fl-istabbiliment u/jew f’kull każ ieħor meqjus xieraq mill-awtorità kompetenti.

2.1.2.   Teħid ta' kampjuni bħala kontrolli uffiċjali

It-teħid ta' kampjuni bħala kontrolli uffiċjali għandu jikkonsisti fi:

2.1.2.1.   Jekk it-teħid tal-kampjuni b'inizjattiva tal-operatur tan-negozju tal-ikel isir fil-mafqas:

(a)	teħid ta’ kampjuni ta’ rutina kull 16-il ġimgħa fil-mafqas;

(b)

teħid ta' rutina ta' kampjuni fl-istabbiliment f'żewġ okkażjonijiet matul iċ-ċiklu tal-produzzjoni, li l-ewwel waħda tkun fi żmien erba' ġimgħat wara l-qalba għall-fażi tal-produzzjoni tal-bajd jew it-trasferiment għall-istabbiliment tal-produzzjoni tal-bajd u t-tieni waħda sseħħ lejn l-aħħar tal-fażi tal-produzzjoni tal-bajd, mhux iktar kmieni minn tmien ġimgħat qabel tmiem iċ-ċiklu tal-produzzjoni;

(c)	teħid konfermattiv ta' kampjuni fl-istabbiliment, wara l-individwazzjoni tal-preżenza tas-serotipi rilevanti tas-Salmonella minn teħid ta' kampjuni fil-mafqas.

2.1.2.2.   Jekk it-teħid ta' kampjuni bl-inizjattiva tal-operatur tan-negozju tal-ikel isir fl-istabbiliment, it-teħid ta' rutina ta' kampjuni għandu jsir fi tliet okkażjonijiet matul iċ-ċiklu ta' produzzjoni:

(a)	fi żmien erba’ ġimgħat wara l-qalba għall-fażi tal-produzzjoni jew it-trasferiment għall-istabbiliment tal-produzzjoni tal-bajd;

(b)	lejn tmiem il-fażi tal-produzzjoni tal-bajd, mhux iktar kmieni minn tmien ġimgħat qabel tmiem iċ-ċiklu ta’ produzzjoni;

(c)	fi kwalunkwe żmien matul iċ-ċiklu tal-produzzjoni, li hu distanti biżżejjed mill-kampjuni msemmija fil-punti (a) u (b).

2.1.2.3.   Permezz ta’ deroga mill-punti 2.1.2.1 u 2.1.2.2 u jekk il-mira tal-Unjoni tkun intlaħqet għal mill-inqas sentejn kalendarji konsekuttivi fl-Istati Membri kollha, l-awtorità kompetenti tista’ tissostitwixxi t-teħid ta’ kampjuni ta’ rutina bit-teħid ta’ kampjuni:

(a)	(a) fl-istabbiliment f’okkażjoni waħda f’kull żmien matul iċ-ċiklu ta’ produzzjoni u darba fis-sena fil-mafqas; jew

(b)	fl-istabbiliment f’żewġ okkażjonijiet f’kull żmien distanti biżżejjed minn xulxin matul iċ-ċiklu ta’ produzzjoni.

Għaldaqstant, l-awtorità kompetenti tista’ tiddeċiedi li żżomm jew terġa’ lura għat-teħid ta' kampjuni stabbiliti fil-punti 2.1.2.1 u 2.1.2.2 fil-każ ta’ individwazzjoni tal-preżenza ta' serotipi rilevanti tas-Salmonella fil-qatgħa għat-tgħammir fl-istabbiliment u/jew f’kull każ ieħor meqjus xieraq mill-awtorità kompetenti.

It-teħid ta’ kampjuni mwettaq mill-awtorità kompetenti jista’ jieħu post it-teħid ta’ kampjuni fuq l-inizjattiva tal-operatur tan-negozju tal-ikel.

2.2.   Il-protokoll għat-teħid tal-kampjuni

2.2.1.   Teħid ta' kampjuni fil-mafqas

Għandu jittieħed mill-inqas kampjun wieħed għal kull qatgħa għat-tgħammir f’kull okkażjoni ta’ teħid tal-kampjuni.

It-teħid ta' kampjuni għandhom isiru fil-jum ta' tfaqqis meta l-kampjuni mill-qatgħat għat-tgħammir kollha jkunu disponibbli. Jekk ma jkunx possibbli, għandu jiġi ggarantit li l-kampjuni jiġu miġbura minn kull qatgħa mill-anqas bil-frekwenza stipulata fil-punt 2.1.

Il-materjal kollu mill-imfaqas kollha li minnhom jitneħħew flieles imfaqqsa fil-jum ta' teħid ta' kampjuni għandhom jikkontribwixxu b'mod proporzjonat għas-sett ta' kampjuni.

Jekk hemm aktar minn 50 000 bajda ta' qatgħa waħda għat-tgħammir fl-imfaqas, għandu jinġabar it-tieni kampjun minn dik il-qatgħa.

Il-kampjun għandu jikkonsisti għall-inqas f’dawn li ġejjin:

(a)

kampjun wieħed kompost tal-inforri tal-qfief għat-tfaqqis, viżibbilment imċappsa, meħud każwalment minn ħamest iqfief għat-tfaqqis separati jew ħames postijiet fil-mafqas, biex jinkiseb wiċċ totali ta’ teħid ta’ kampjuni ta’ mill-inqas 1 m2; jekk il-bajd għat-tfaqqis minn qatgħa għat-tgħammir qegħdin f'iktar minn mafqas wieħed, kampjun kompost bħal dan għandu jittieħed minn kull mafqas sa mhux aktar minn ħamsa; jew

(b)

kampjun wieħed miġbur b’waħda jew aktar biċċiet niedja tat-tessut ta’ żona tal-wiċċ totali ta’ mill-inqas 900 cm2, meħud minnufih wara t-tneħħija tat-tiġieġ miż-żona kollha tal-wiċċ tal-qiegħ ta’ mill-inqas total ta’ ħamest iqfief għat-tfaqqis, jew minn tnietex minn ħames postijiet, inkluż fl-art, f'kull mafqas sa massimu ta' ħamsa bil-bajd imfaqqsa mill-qatgħa, filwaqt li jiġi żgurat li jittieħed mill-inqas kampjun wieħed għal kull qatgħa li minnha ġejjin il-bajd; jew

(c)

10 g ta’ qxur tal-bajd imkisser meħudin minn total ta’ 25 qoffa għat-tfaqqis separati, jiġifieri 250 g fil-kampjun tal-bidu, ta’ f’mhux aktar minn ħamest imfaqas bil-bajd imfaqqsa mill-qatgħa, imfarrak, mħallat u li minnu għandu jittieħed sottokampjun biex ikun ifformat sottokampjun ta’ 25 g għall-ittestjar.

Il-proċedura stabbilita fil-punti (a), (b) u (c) għandha tiġi segwita għal teħid ta’ kampjuni fuq l-inizjattiva tal-operatur tan-negozju tal-ikel kif ukoll bħala parti mill-kontrolli uffiċjali. Madankollu, mhuwiex obbligatorju li jiġi inkluż mafqas bil-bajd minn qatgħat differenti jekk mill-inqas 80 % mill-bajd jinsabu f’imfaqas oħra li tagħhom ittieħdu l-kampjuni.

2.2.2.   Teħid ta' kampjuni fl-istabbiliment:

2.2.2.1.   Rutina ta' teħid ta’ kampjuni fuq l-inizjattiva tal-operatur tan-negozju tal-ikel

It-teħid tal-kampjuni għandu jikkonsisti primarjament f’kampjuni fekali u għandu jimmira għall-individwazzjoni ta’ 1 % ta’ prevalenza fil-qatgħa, b’limitu ta’ affidabbiltà ta’ 95 %. Għal dan il-għan, il-kampjuni għandhom jikkonsistu f'wieħed minn dawn li ġejjin:

(a)

Feċi mħallta magħmula minn kampjuni separati ta’ feċi friski li lkoll jiżnu mhux inqas minn 1g meħuda każwalment minn għadd ta’ siti fil-bini fejn tinżamm il-qatgħa, jew fejn il-qatgħa għandha aċċess liberu għal iktar minn bini wieħed fi stabbiliment partikolari, minn kull grupp ta’ djar fl-istabbiliment li fih tinżamm il-qatgħa. Il-feċi jistgħu jitħalltu għall-analiżi sa minimu ta’ żewġ kampjuni mħallta. L-għadd ta’ siti li minnhom jittieħdu kampjuni separati ta’ feċi għandhom jittiedu biex jingħaqdu f’kampjun imħallat għandu jkun kif ġej: Numru ta’ tjur miżmuma fil-qatgħa għat-tgħammir Numru ta’ kampjuni ta’ feċi li jridu jittieħdu fil-qatgħa għat-tgħammir 250-349 200 350-449 220 450-799 250 800-999 260 1 000 jew aktar 300

(b)

Tajjar mill-buz u/jew kampjuni tat-trab:   It-tajjar mill-buz li jintużaw għandhom ikunu jassorbixxu biżżejjed biex jixorbu l-umdità. Il-“kalzetti” tat-tip tubegauze għandhom ikunu wkoll aċċettabbli għal dan l-għan.   Il-wiċċ tat-tajjara mill-buz għandu jixxarrab ftit b’dilwenti adatti (bħal 0,8 % klorur tas-sodju, 0,1 % peptun f’ilma dejonizzat sterili, ilma sterili jew kull dilwent ieħor approvat mill-awtorità kompetenti).   Il-kampjuni għandhom jittieħdu billi wieħed jgħaddi mill-bini u juża rotta li tipproduċi kampjuni rappreżentattivi tal-partijiet kollha tal-bini fejn tinżamm il-qatgħa jew tas-settur rispettiv. Din għandha tinkludi żoni maħmuġa jew miksija bil-paletti ladarba l-paletti jkunu sikuri biex wieħed jimxi fuqhom. Il-gallinari separati kollha f’bini fejn tinżamm il-qatgħa għandhom ikunu inklużi fit-teħid tal-kampjuni. Meta jitlesta t-teħid ta' kampjuni fis-settur magħżul, it-tajjar tal-buz għandu jitneħħa bil-galbu sabiex ma jinqala' l-ebda materjal imwaħħal. Il-kampjuni għandhom jikkonsistu f’dawn li ġejjin: (i) ħames pari ta’ tajjar mill-buz, b’kull wieħed jirrappreżenta madwar 20 % tal-zona tal-bini fejn tinżamm il-qatgħa; għall-analiżi, it-tajjar jista’ jitħallat f’minimu ta’ żewġ kampjuni komposti; jew (ii) għall-inqas par wieħed ta’ tajjar mill-buz li jirrappreżenta ż-żona kollha tal-bini fejn tinżamm il-qatgħa u kampjun addizzjonali tat-trab miġbur minn diversi postijiet fil-bini kollu minn uċuh bi preżenza viżibbli ta’ trab; għandhom jintużaw wieħed jew aktar kampjuni tad-drapp niedja b'żona tal-wiċċ totali ta’ mill-anqas 900 cm2 biex jinġabar il-kampjun tat-trab.

(c)

F'qatgħat għat-tgħammir li jinżammu fil-gaġeġ, it-teħid ta’ kampjuni jista’ jikkonsisti f’feċi mħallta b’mod naturali miġbura miċ-ċineg għat-twaqqigħ tal-ħmieġ, mill-barraxa jew mill-fosos fondi, skont it-tip ta’ bini. Żewġ kampjuni ta’ mill-inqas 150 g għandhom jinġabru biex jiġu ttestjati individwalment: (i) iċ-ċineg għat-twaqqigħ tal-ħmieġ taħt kull saff ta’ gaġeġ li jitħaddmu regolarment u li jarmu ġo sistema għamla ta’ trapan jew konvejer; (ii) sistema għat-twaqqigħ tal-ħmieġ f’fossa fejn ikun hemm difletturi taħt il-gaġeġ jitqaxxru f'fossa fonda taħt il-bini; (iii) sistema ta' twaqqigħ tal-ħmieġ f'fossa f'bini fejn tinżamm il-qatgħa b'gaġeġ imtarrġa fejn il-gaġeġ jiġu żbilanċjati u l-feċi jaqgħu direttament fil-fossa. Normalment ikun hemm bosta safef ta’ gaġeġ f’bini. Feċi mħallta minn kull saff għandhom ikunu rrappreżentati fil-kampjun komplessiv imħallat. Żewġ kampjuni mħallta għandhom jittieħdu minn kull qatgħa għat-tgħammir kif deskritt fit-tielet sas-sitt subparagrafi li ġejjin. F’sistemi fejn hemm ċineg jew barraxa, dawn għandhom jitħaddmu fil-jum tat-teħid tal-kampjuni qabel jittieħdu l-kampjuni. F’sistemi fejn hemm id-difletturi taħt il-gaġeġ u l-barraxa, il-feċi mħallta li jkunu weħlu mal-barraxa wara li tkun tħaddmet, għandhom jinġabru. F'sistemi ta’ bini fejn tinżamm il-qatgħa b'gaġeġ imtarrġa fejn ma hemmx sistema ta’ ċineg jew barraxa jinħtieġ li l-feċi mħallta jinġabru mill-fossa l-fonda kollha. Sistemi ta’ ċineg għat-twaqqigħ tal-ħmieġ: għandu jinġabar materjal fekali mħallat mit-truf taċ-ċineg.

2.2.2.2.   Teħid ta' kampjuni bħala kontrolli uffiċjali

(a)	It-teħid ta’ kampjuni ta’ rutina għandu jitwettaq kif deskritt fil-punt 2.2.2.1.

(b)

It-teħid konfermattiv ta’ kampjuni wara l-individwazzjoni tas-Salmonella rilevanti minn kampjuni li jkunu ttieħdu mill-mafqas għandu jsir kif deskritt fil-punt 2.2.2.1. Jistgħu jinġabru kampjuni addizzjonali għall-ittestjar possibbli ta’ antimikrobiċi jew inibitorji tal-formazzjoni tal-batterji kif ġej: it-tjur għandhom jittieħdu każwalment minn kull bini fejn tinżamm il-qatgħa ta’ tjur fl-istabbiliment, normalment sa ħamest itjur għal kull bini, sakemm l-awtorità ma tqisx li jinħtieġ kampjun b’numru ikbar ta’ tjur. Jekk is-sors ta’ infezzjoni mhuwiex ikkonfermat, għandu jsir ittestjar ta’ antimikrobiċi jew għandu jsir ittestjar batterjoloġiku ġdid għall-preżenza tas-serotipi rilevanti tas-Salmonella fuq il-qatgħa għat-tgħammir jew il-frieħ tagħhom qabel ma jitneħħew ir-restrizzjonijiet kummerċjali. Jekk jiġu individwati antimikrobiċi jew inibitorji tal-formazzjoni tal-batterji, l-infezzjoni tas-Salmonella għandha titqies bħala kkonfermata.

(c)	Suspett ta' riżultati foloz F’każijiet eċċezzjonali fejn l-awtorità kompetenti jkollha raġunijiet biex tqajjem dubji dwar ir-riżultati tal-ittestjar (bħal riżultati pożittivi foloz jew negattivi foloz), din tista’ tiddeċiedi li tirrepeti l-ittestjar skont il-punt (b).

3.   EŻAMI TAL-KAMPJUNI

3.1.   It-trasport u t-tħejjija tal-kampjuni

3.1.1.   Trasport

Il-kampjuni għandhom preferibbilment jintbagħtu bis-servizz espress tal-posta jew kurjer lill-laboratorji msemmija fl-Artikoli 11 u 12 tar-Regolament (KE) Nru 2160/2003, fi żmien 24 siegħa wara li jinġabru. Jekk ma jintbagħtux fi żmien 24 siegħa, għandhom jinħażnu fil-kesħa. It-trasportazzjoni tista' tkun f'temperatura ambjentali sakemm sħana eċċessiva (aktar minn 25 °C) u espożizzjoni għad-dawl tax-xemx ikunu evitati. Fil-laboratorju, il-kampjuni għandhom jinżammu fil-kesħa sakemm isir l-eżami tagħhom, li għandu jingħata bidu fi żmien 48 siegħa wara li jasal il-kampjun u fi żmien 96 siegħa wara t-teħid tal-kampjun.

3.1.2.   L-inforri tal-qfief għat-tfaqqis:

(a)	qiegħed il-kampjun f’litru ta' buffered peptone water (BPW) li jkun issaħħan minn qabel sa temperatura ambjentali u ħawwad bil-mod;

(b)	kompli l-kultura tal-kampjun billi tuża l-metodu ta’ individwazzjoni deskritt fil-punt 3.2.

3.1.3.   It-tajjar mill-buz u l-kampjuni tat-trab:

(a)	Il-par(i) tat-tajjar mill-buz/kalzetti u l-kampjun tat-trab (kampjun tad-drapp) għandhom jinħarġu bil-galbu mill-ippakkjar biex jiġi evitat li jinqala’ materjal fekali mwaħħal jew materjal tat-trab maħlul u jitpoġġew f’225 ml ta’ BPW li ssaħħan minn qabel għal temperatura ambjentali.

(b)

It-tajjara mill-buz/kalzetti u l-kampjun tad-drapp għandhom jiġu mgħarrqa kompletament fil-BPW biex jipprovdu likwidu ħieles biżżejjed madwar il-kampjun għall-migrazzjoni tas-salmonella mill-kampjun u għalhekk jista’ jiżdied aktar BPW jekk ikun meħtieġ. Se jsiru preparazzjonijiet separati tat-tajjar mill-buz u tal-kampjun tad-drapp.

(c)

Fejn ħames pari tat-tajjar mill-buz/kalzetti jitħalltu f’żewġ kampjuni, għandhom jitpoġġew kull kampjun imħallat f’225 ml ta’ BPW, jew aktar jekk ikun meħtieġ, biex il-kampjun jiġi mgħaddas kompletament u jiġi pprovdut biżżejjed likwidu ħieles madwar il-kampjun għall-migrazzjoni tas-salmonella mill-kampjun.

(d)	Ħawwad biex il-kampjun jixxarrab kompletament u kompli l-kultura permezz tal-metodu ta’ individwazzjoni deskritt fil-punt 3.2.

3.1.4.   Kampjuni ta’ materjal fekali ieħor:

(a)	Il-kampjuni fekali għandhom jitħalltu flimkien u jitħawdu sew u għandu jittieħed sottokampjun ta’ 25 gramm għall-koltura.

(b)	Is-sottokampjun ta’ 25 gramm għandu jiżdied ma’ 225 ml ta’ BPW imsaħħan minn qabel għal temperatura ambjentali;

(c)	Il-kultura tal-kampjun għandha titkompla billi jintuża l-metodu ta’ individwazzjoni deskritt fil-punt 3.2.

Jekk ikun hemm ftehim rigward l-istandards tal-ISO dwar il-preparazzjoni ta’ kampjuni rilevanti għall-individwazzjoni tas-Salmonella, dawn għandhom jiġu applikati u għandhom jieħdu post dawk imsemmija fil-punti 3.1.2, 3.1.3 u 3.1.4 rigward il-preparazzjoni tat-teħid tal-kampjuni.

3.2.   Metodu ta’ individwazzjoni

L-individwazzjoni tas-serotipi rilevanti tas-Salmonella għandha titwettaq skont l-Emenda 1 tal-EN/ISO 6579-2002/Amd1:2007. “Mikrobijoloġija tal-ikel u tal-għalf tal-annimali - Metodu orizzontali għall-individwazzjoni tas-Salmonella spp. – Emenda 1: Anness D: L-individwazzjoni tas-Salmonella spp. fil-feċi tal-annimali u fil-kampjuni ambjentali mill-istadju primarju ta’ produzzjoni”.

Fir-rigward tal-kampjuni tat-tajjar mill-buz, il-kampjuni tat-trab u l-kampjuni ta’ materjal fekali ieħor imsemmija fil-paragrafu 3.1, huwa possibbli li jitħallat il-brodu inkubat ta’ BPW ta’ arrikiment għall-kultura futura. Sabiex isir dan, iż-żewġ kampjuni għandhom jiġu inkubati fil-BPW kif imsemmija fil-punt 3.1.3. Neħħi 1 ml ta’ brodu inkubat minn kull kampjun u ħawwad sewwa, imbagħad neħħi 0,1 ml mit-taħlita u laqqam il-pjastri semisolidi mmodifikati tar-Rappaport-Vassiliadis (MSRV).

Il-kampjuni fil-BPW ma għandhomx jiġu mċaqalqa, imħawwda jew bi kwalunkwe mod ieħor imħarrka wara l-inkubazzjoni billi dan jirrilaxxa partikuli inibitorji u jnaqqas l-iżolament sussegwenti fil-MSRV.

3.3.   Klassifikazzjoni fuq il-bażi tas-serotipi

Għall-inqas iżolat wieħed minn kull kampjun li juri reazzjoni pożittiva għandu jkun ikklassifikat, skont l-iskema Kaufmann-White.

3.4.   Metodi alternattivi

Fir-rigward tal-kampjuni meħuda fil-bidu tal-operatur tan-negozju tal-ikel, metodi alternattivi jistgħu jintużaw minflok il-metodi għall-preparazzjoni tal-kampjuni, metodi ta’ stħarriġ u tas-serotipi previsti fil-punt 3.1, 3.2 u 3.3 ta’ dan l-Anness, jekk ivvalidati skont l-aktar verżjoni riċenti tal-EN/ISO 16140.

3.5.   Ħżin ta’ varjanti

Għandu jiġi ggarantit li mill-anqas varjant wieħed iżolat tas-serotipi rilevanti tas-Salmonella minn kampjuni bħala parti mill-kontrolli uffiċjali ta' kull bini u ta' kull sena jiġu maħżuna għall-phagetyping jew l-ittestjar għas-suxxettibilità antimikrobika ġejjiena, bl-użu ta' metodi normali għal ġbir tal-kultura, li għandha tiżgura l-integrità tal-varjanti għal perjodu minimu ta' sentejn. Jekk l-awtorità kompetenti tiddeċiedi hekk, tiġi iżolata minn teħid ta' kampjuni minn operaturi tan-negozju tal-ikel għandha tiġi maħżuna għal dawn l-għanijiet.

4.   RIŻULTATI U RAPPORTAR

Qatgħa għat-tgħammir għandha tiġi kkunsidrata pożittiva għall-għan sabiex il-kisba tal-mira tal-Unjoni tiġi aċċertata,

—	meta l-preżenza ta' serotipi rilevanti tas-Salmonella (għajr għall-varjanti tal-vaċċin) ġew inidividwati f'wieħed jew aktar kampjuni meħuda mill-qatgħa, anki jekk is-serotipi rilevanti tas-Salmonella tiġi individwata fil-kampjun tat-trab biss, jew

—	meta l-kampjuni konfermattivi bħala parti mill-kontrolli uffiċjali skont il-punt 2.2.2.2(b) ma jikkonfermax l-individwazzjoni ta' serotipi rilevanti tas-Salmonella iżda antimikrobiċi jew inibitorji tal-formazzjoni tal-batterji ġew individwati fil-qatgħa.

Din ir-regola ma għandhiex tapplika f'każi eċċezzjonali deskritti fil-punt 2.2.2.2(c) fejn ir-riżultat pożittiv tal-bidu tas-Salmonella minn teħid ta' kampjuni fuq inizjattiva tal-operatur tan-negozju tal-ikel ma kienx ikkonfermat permezz ta' teħid ta' kampjuni bħala parti mill-kontrolli uffiċjali.

Qatgħa għat-tgħammir pożittiva għandha tingħadd darba biss irrispettivament minn kemm-il darba s-serotipi rilevanti tas-Salmonella ġew individwati f'din il-qatgħa matul il-perjodu ta' produzzjoni jew jekk it-teħid ta' kampjuni seħħx fuq l-inizjattiva tal-operatur tan-negozju tal-ikel jew mill-awtorità kompetenti. Madankollu, jekk it-teħid ta' kampjuni matul il-perjodu ta' produzzjoni jkun mifrux matul sentejn kalendarji, ir-riżultat ta' kull sena għandu jiġi rraportat b'mod separat.

Ir-rapport għandu jinkludi:

(a)	deskrizzjoni dettaljata tal-għażliet implimentati għall-iskema ta’ teħid ta’ kampjuni u t-tip ta’ kampjuni li ttieħdu, kif jixraq;

(b)	in-numru totali tal-qatgħat ta' adulti għat-tgħammir li jinkludu mill-anqas 250 tajra li ġew ittestjati mill-anqas darba matul is-sena ta' rappurtar;

(c)

ir-riżultati tal-ittestjar jinkludu: (i) in-numru totali tal-qatgħat għat-tgħammir pożittivi bi kwalunkwe Salmonella fl-Istati Membri; (ii) in-numru tal-qatgħat għat-tgħammir pożittivi mill-anqas b'wieħed mis-serotipi rilevanti tas-Salmonella; (iii) in-numru ta' qatgħat għat-tgħammir pożittivi għal kull serotip tas-Salmonella jew għal Salmonella mhux speċifikata (iżolati li ma ngħatawx tip jew serotip);

(d)	in-numru ta' każi fejn il-kampjun tal-bidu tas-Salmonella pożittiv minn teħid ta' kampjuni fuq l-inizjattiva tal-operatur tan-negozju tal-ikel ma kienx ikkonfermat permezz tat-teħid ta' kampjuni bħala parti mill-kontrolli uffiċjali;

(e)	spjegazzjonijiet dwar ir-riżultati, partikolarment dawk li jikkonċernaw każi eċċezzjonali.

Ir-riżultati u kull informazzjoni rilevanti addizzjonali għandhom jiġu rrapportati bħala parti mir-rapport dwar it-tendenzi u s-sorsi previst fl-Artikolu 9(1) tad-Direttiva 2003/99/KE.