EUR-Lex Access to European Union law
This document is an excerpt from the EUR-Lex website
Document 32010D0811(01)
Commission Decision of 10 August 2010 establishing the European Regulators Group for Postal Services Text with EEA relevance
Deċiżjoni tal-Kummissjoni tal- 10 ta’ Awwissu 2010 li tistabbilixxi l-Grupp ta’ Regolaturi Ewropej għas-servizzi tal-posta Test b’relevanza għaż-ŻEE
Deċiżjoni tal-Kummissjoni tal- 10 ta’ Awwissu 2010 li tistabbilixxi l-Grupp ta’ Regolaturi Ewropej għas-servizzi tal-posta Test b’relevanza għaż-ŻEE
OJ C 217, 11.8.2010, p. 7–9
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
Special edition in Croatian: Chapter 06 Volume 009 P. 285 - 287
In force
11.8.2010 |
MT |
Il-Ġurnal Uffiċjali tal-Unjoni Ewropea |
C 217/7 |
DEĊIŻJONI TAL-KUMMISSJONI
tal-10 ta’ Awwissu 2010
li tistabbilixxi l-Grupp ta’ Regolaturi Ewropej għas-servizzi tal-posta
(Test b’relevanza għaż-ŻEE)
2010/C 217/07
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Billi:
(1) |
Id-Direttiva 97/67/KE tal-Parlament Ewropew u tal-Kunsill tal-15 ta’ Diċembru 1997 dwar regoli komuni għall-iżvilupp tas-suq intern tas-servizzi postali tal-Komunità u t-titjib fil-kwalità tas-servizz tistabbilixxi qafas regolatorju dwar il-kundizzjonijiet li jirregolaw l-għoti tas-servizzi tal-posta fl-Unjoni Ewropea u dwar il-ħolqien ta’ suq intern għas-servizzi tal-posta. |
(2) |
Skont id-Direttiva 97/67/KE, l-Istati Membri għandhom jaħtru awtorità regolatorja nazzjonali waħda jew aktar għas-settur tal-posta, sabiex dawn iwettqu l-kompiti regolatorji mniżżlin f’dik id-Direttiva. Dawk l-awtoritajiet regolatorji nazzjonali għandhom ikunu separati legalment mill-operaturi tal-posta tal-Istati Membri u għandhom jaħdmu b’mod indipendenti minnhom. L-Istati Membri li jżommu s-sjieda u l-kontroll tal-fornituri tas-servizzi postali għandhom jiżguraw ukoll li jkun hemm separazzjoni strutturali effettiva tal-funzjonijiet regolatorji mill-attivitajiet marbutin mas-sjieda jew mal-kontroll. |
(3) |
Ir-responsabbiltajiet u l-kompiti tal-awtoritajiet regolatorji nazzjonali jvarjaw b’mod sinifikanti minn Stat Membru għall-ieħor. |
(4) |
Id-Direttiva 97/67/KE tippermetti l-flessibbiltà li r-regoli komuni jiġu applikati fid-dawl tal-kundizzjonijiet nazzjonali f’ċerti oqsma. Sabiex jiġi żviluppat b’suċċess suq intern għas-servizzi postali, huwa importanti ferm li r-regoli rilevanti jkunu applikati b’mod konsistenti fl-Istati Membri kollha. |
(5) |
Għaldaqstant jeħtieġ li jitwaqqaf grupp magħmul mill-awtoritajiet regolatorji nazzjonali tal-qasam tas-servizzi postali u jeħtieġ li jiġu ddefiniti l-kompiti u l-istruttura tiegħu. |
(6) |
Il-grupp għandu jservi bħala korp li jirrifletti, jiddiskuti u li jagħti pariri lill-Kummissjoni fil-qasam tas-servizzi postali. Huwa għandu jħaffef il-proċessi ta’ konsultazzjoni, koordinazzjoni u kooperazzjoni bejn l-awtoritajiet regolatorji nazzjonali indipendenti fl-Istati Membri u bejn dawk l-awtoritajiet u l-Kummissjoni, bil-għan li jissaħħaħ is-suq intern tas-servizzi postali u li jkun żgurat li d-Direttiva 97/67/KE tiġi applikata b’mod konsistenti fl-Istati Membri kollha. |
(7) |
Għandu jkun hemm dispożizzjoni dwar ir-regoli dwar l-iżvelar tat-tagħrif mill-membri tal-grupp, li għandha tkun bla ħsara għar-regoli tal-Kummissjoni dwar is-sigurtà kif imniżżlin fl-Anness għad-Deċiżjoni tal-Kummissjoni 2001/844/KE, KEFA, Euratom (1). |
(8) |
Id-dejta personali li għandha x’taqsam mal-membri tal-grupp għandha tkun ipproċessata skont ir-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta' individwi fir-rigward tal-ipproċessar ta’ data [dejta] personali mill-istituzzjonijiet u l-korpi tal-Komunità u dwar il-moviment liberu ta’ dik id-data (dejta) (2). |
IDDEĊIDIET KIF ĠEJ:
Artikolu 1
Is-suġġett
Il-Grupp ta’ Regolaturi Ewropej għas-servizzi tal-posta, minn hawn ’il quddiem imsejjaħ “il-grupp”, b’dan qed jitwaqqaf.
Artikolu 2
Il-kompiti
Il-kompiti tal-grupp għandhom ikunu:
(a) |
li jagħti pariri lill-Kummissjoni dwar it-tisħiħ tas-suq intern tas-servizzi postali u li jgħinha f’dan it-tisħiħ; |
(b) |
li jagħti pariri lill-Kummissjoni dwar kwalunkwe kwistjoni marbuta mas-servizzi postali li jaqgħu fi ħdan il-kompetenza tiegħu u li jgħinha fiha; |
(c) |
li jagħti pariri lill-Kummissjoni dwar l-iżvilupp tas-suq intern tas-servizzi postali u dwar l-applikazzjoni konsistenti tal-qafas regolatorju għas-servizzi postali fl-Istati Membri kollha u li jgħinha fihom; |
(d) |
li, bi qbil mal-Kummissjoni, jikkonsulta, b’mod estensiv u fi stadju bikri tal-ħidma esperta tiegħu, ma’ dawk li jieħdu sehem fis-suq, mal-konsumaturi u mal-utenti aħħarin b’mod miftuħ u trasparenti. |
Artikolu 3
Is-sħubija
1. Il-grupp għandu jkun magħmul mill-awtoritajiet regolatorji nazzjonali tal-qasam tas-servizzi postali. Dawn l-awtoritajiet għandhom ikunu rrappreżentati mill-kapijiet tagħhom jew, f’każijiet eċċezzjonali, minn rappreżentanti oħrajn tagħhom, kif imniżżel fl-Anness. Kull Stat Membru għandu jkollu membru wieħed.
2. L-ismijiet tal-awtoritajiet nazzjonali għandhom ikunu ppubblikati fir-Reġistru tal-gruppi ta’ esperti tal-Kummissjoni.
Artikolu 4
L-operat
1. Il-grupp għandu jaħtar president minn fost il-membri tiegħu. Il-president għandu jlaqqa’ lill-grupp bi qbil mal-Kummissjoni.
2. Bi qbil mas-servizzi tal-Kummissjoni, jistgħu jitwaqqfu sottogruppi biex jeżaminaw suġġetti speċifiċi skont it-termini ta’ referenza stabbiliti mill-grupp.
3. L-awtoritajiet regolatorji nazzjonali indipendenti għas-settur tal-posta tal-Istati taż-Żona Ekonomika Ewropea (iż-ŻEE) li mhumiex Stati Membri u dawk tal-Istati li huma kandidati biex jissieħbu fl-Unjoni Ewropea għandu jkollhom status ta’ osservaturi u għandhom ikunu rrappreżentati f’livell xieraq. Il-grupp jista’ jistieden ukoll, fuq bażi ad hoc, esperti u osservaturi oħrajn biex jattendu l-laqgħat tiegħu, dejjem jekk ir-rappreżentant tal-Kummissjoni jkun jaqbel ma’ dan.
4. Il-membri tal-gruppi ta’ esperti u r-rappreżentanti tagħhom, kif ukoll l-esperti u l-osservaturi li jkunu mistiedna għandhom iħarsu l-obbligi tas-segretezza professjonali mniżżlin fit-Trattati u fir-regoli ta’ implimentazzjoni taggħom, kif ukoll ir-regoli tal-Kummissjoni dwar is-sigurtà marbutin mal-ħarsien tat-tagħrif ikklassifikat tal-UE, imniżżlin fl-Anness għad-Deċiżjoni tal-Kummissjoni 2001/844/KE, KEFA, Euratom. Jekk jonqsu milli jħarsu dawk l-obbligi, il-Kummissjoni tista’ tieħu l-miżuri x-xierqa kollha.
5. Normalment il-grupp u s-sottogruppi tiegħu għandhom jiltaqgħu fil-bini tal-Kummissjoni skont il-proċeduri u l-iskeda stabbiliti minnha. Il-Kummissjoni għandha tipprovdi s-servizzi ta’ segretarjat. Uffiċjali oħrajn tal-Kummissjoni li jkollhom interess fil-proċedimenti jistgħu jattendu l-laqgħat tal-grupp u tas-sottogruppi tiegħu.
6. Il-grupp għandu jadotta r-regoli ta’ proċedura tiegħu abbażi tar-regoli standard ta’ proċedura adottati mill-Kummissjoni (3).
Artikolu 5
L-ispejjeż tal-laqgħat
1. Il-Kummissjoni għandha tħallas lura l-ispejjeż tal-ivvjaġġar u, fejn xieraq, l-ispejjeż tal-għajxien tal-membri, tal-esperti u tal-osservaturi li jkunu marbutin mal-attivitajiet tal-grupp skont ir-regoli tal-Kummissjoni dwar il-ħlas lura tal-ispejjeż tal-esperti esterni.
2. Il-membri, l-esperti u l-osservaturi ma għandhomx jitħallsu għas-servizzi li jagħtu.
3. L-ispejjeż tal-laqgħat jitħallsu lura fil-limiti tal-baġit annwali allokat għall-grupp mis-servizzi responsabbli tal-Kummissjoni.
Artikolu 6
Ir-rapport annwali
Il-grupp għandu jagħti lill-Kummissjoni rapport annwali tal-attivitajiet tiegħu.
Artikolu 7
L-applikabbiltà
1. Din id-Deċiżjoni għandha tidħol fis-seħħ dakinhar tal-pubblikazzjoni tagħha f’Il-Ġurnal Uffiċjali tal-Unjoni Ewropea.
2. Il-Grupp għandu jibda jwettaq dmirijietu fid-data tad-dħul fis-seħħ ta’ din id-Deċiżjoni.
Magħmul fi Brussell, l-10 ta’ Awwissu 2010.
Għall-Kummissjoni
Il-President
José Manuel BARROSO
(1) ĠU L 317, 3.12.2001, p. 1.
(3) Ara r-regoli standard ta’ proċedura – l-Anness III tad-dokument SEC(2005) 1004.
ANNESS
Lista tal-membri tal-Grupp ta’ Regolaturi Ewropej għas-servizzi tal-posta
Pajjiż |
Awtorità regolatorja nazzjonali |
Belgique/België |
Institut belge des services postaux et des télécommunications (IBPT)/Belgisch Instituut voor postdiensten en telecommunicatie (BIPT) |
България/Bulgaria |
Комисия за регулиране на съобщенията (КРС)/Communications Regulation Commission (CRC) |
Česká republika |
Český telekomunikační úřad (ČTÚ) |
Danmark |
Færdselsstyrelsen (FSTYR) |
Deutschland |
Bundesnetzagentur für Elektrizität, Gas, Telekommunikation, Post und Eisenbahnen (BNetzA) |
Eesti |
Sideamet (SIDEAMET) |
Ελλάδα/Elláda |
Εθνική Επιτροπή Τηλεπικοινωνιών και Ταχυδρομείων Hellenic/Telecommunications and Post Commission (EETT) |
España |
Commissión Nacional del Sector Postal (CNSP) |
France |
Autorité de régulation des communications électroniques et des postes (ARCEP) |
Ireland |
Commission for Communications Regulation (ComReg) |
Κύπρος/Kypros |
Γραφείο Επιτρόπου Ρυθμίσεως Ηλεκτρονικών Επικοινωνιών και Ταχυδρομείων (ΓΕΡΗΕΤ)/Office of the Commissioner of Electronic Communications and Postal Regulation (OCECPR) |
Italia |
Għandha titwaqqaf awtorità regolatorja nazzjonali indipendenti skont l-Artikolu 37(2)(h) tal-“Legge 4 giugno 2010, n. 96, Disposizioni per l’adempimento di obblighi derivanti dall’appartenenza dell’Italia alle Comunita’ europee — Legge comunitaria 2009, (GU n. 146 del 25.6.2010 — Suppl. Ordinario n. 138)” |
Latvija |
Sabiedrisko pakalpojumu regulēšanas komisija (SPRK) |
Lietuva |
Ryšių reguliavimo tarnyba (RRT) |
Luxembourg |
Institut luxembourgeois de régulation (ILR) |
Magyarország |
Nemzeti Hírközlési Hatóság (NHH) |
Malta |
L-Awtorità ta’ Malta dwar il-Komunikazzjoni/Malta Communications Authority (MCA) |
Nederland |
Onafhankelijke Post en Telecommunicatie Autoriteit (OPTA) |
Österreich |
Rundfunk und Telekom Regulierungs-GmbH (RTR) |
Polska |
Urząd Komunikacji Elektronicznej (UKE) |
Portugal |
Autoridade Nacional de Comunicações (Anacom) |
România |
Autoritatea Naționala pentru Administrare si Reglementare in Comunicații (ANCOM) |
Slovenija |
Agencija za pošto in elektronske komunikacije Republike Slovenije (APEK) |
Slovensko |
Poštový regulačný úrad (PRU) |
Suomi/Finland |
Viestintävirasto/Kommunikationsverket (FICORA) |
Sverige |
Post- och telestyrelsen (PTS) |
United Kingdom |
Postal Services Commission (Postcomm) |