Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32009L0139

Direttiva 2009/139/KE tal-Parlament ewropew u tal-Kunsill tal- 25 ta’ Novembru 2009 dwar markar statutorju għal vetturi bil-mutur b’żewġ jew tliet roti (Verżjoni kkodifikata) (Test b’relevanza għaż-ŻEE)

OJ L 322, 9.12.2009, p. 3–11 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
Special edition in Croatian: Chapter 07 Volume 020 P. 156 - 164

Legal status of the document No longer in force, Date of end of validity: 31/12/2015; Imħassar b' 32013R0168

ELI: http://data.europa.eu/eli/dir/2009/139/oj

9.12.2009   

MT

Il-Ġurnal Uffiċjali tal-Unjoni Ewropea

L 322/3

DIRETTIVA 2009/139/KE TAL-PARLAMENT EWROPEW U TAL-KUNSILL

tal-25 ta’ Novembru 2009

dwar markar statutorju għal vetturi bil-mutur b’żewġ jew tliet roti

(verżjoni kodifikata)

(Test b’relevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b’mod partikolari l-Artikolu 95 tiegħu,

Wara li kkunsidraw il-proposta mill-Kummissjoni,

Wara li kkunsidraw l-opinjoni tal-Kumitat Ekonomiku u Soċjali Ewropew (1),

Filwaqt li jaġixxu skont il-proċedura stabbilita fl-Artikolu 251 tat-Trattat (2),

Billi:

(1)

Id-Direttiva tal-Kunsill 93/34/KEE tal-14 ta’ Ġunju 1993 dwar markar statutorju għal vetturi bil-mutur b’żewġ jew tliet roti (3) ġiet emendata kemm-il darba (4) b’mod sostanzjali. Fl-interess taċ-ċarezza u tar-razzjonalità, l-imsemmija Direttiva għandha tiġi kodifikata.

(2)

Id-Direttiva 93/34/KEE hija waħda mid-Direttivi separati tas-sistema tal-approvazzjoni tat-tip KE msemmija fid-Direttiva tal-Kunsill 92/61/KEE tat-30 ta’ Ġunju 1992 dwar l-approvazzjoni tat-tip KE ta’ vetturi bil-mutur b’żewġ jew tliet roti, kif sostitwita bid-Direttiva tal-Parlament Ewropew u tal-Kunsill 2002/24/KE tat-18 ta’ Marzu 2002 dwar l-approvazzjoni tat-tip ta’ vetturi bil-mutur b’żewġ roti jew bi tlieta (5), u li tistabbilixxi rekwiżiti tekniċi dwar id-disinn u l-kostruzzjoni ta’ vetturi bil-mutur b’żewġ roti jew bi tlieta rigward l-immarkar statutorju. Dawk irrekwiżiti tekniċi jikkonċernaw l-approssimazzjoni tal-liġijiet tal-Istati Membri sabiex jippermettu l-applikazzjoni, fir-rigward ta’ kull tip ta’ vettura, tal-proċedura tal-approvazzjoni tat-tip KE stabbilita fid-Direttiva 2002/24/KE. Għaldaqstant, id-dispożizzjonijiet imsemmija fid-Direttiva 2002/24/KE dwar sistemi ta’ vetturi, komponenti u unitajiet tekniċi separati japplikaw għal din id-Direttiva.

(3)

Fir-rigward ta’ markar statutorju applikabbli għal vetturi bil-mutur b’żewġ roti jew tlieta, din id-Direttiva m’għandhiex timpedixxi lil ċerti Stati Membri milli jżommu, fuq bażi mhux diskriminatorja, dispożizzjonijiet speċifiċi mandatarji bil-għan li japplikaw regolamenti tat-traffiku, kemm-il darba dawn ir-rekwiżiti speċifiċi jikkonċernaw l-użu ta’ dawn il-vetturi u ma jinvolvux xi modifikazzjonijiet fil-kostruzzjoni tagħhom li x’aktarx joħolqu ostaklu għall-approvazzjoni tat-tip tal-Komunità ta’ din it-tip ta’ vettura.

(4)

Din id-Direttiva għandha tkun bla ħsara għall-obbligi tal-Istati Membri relatati mal-limiti ta’ żmien għat-traspożizzjoni fil-liġi nazzjonali u l-applikazzjoni tad-Direttivi elenkati fl-Anness II, Parti B,

ADOTTAW DIN ID-DIRETTIVA:

Artikolu 1

Din id-Direttiva tapplika għall-markar statutorju għal kull tip ta’ vettura kif definita fl-Artikolu 1 tad-Direttiva 2002/24/KE.

Artikolu 2

Il-proċedura għall-għoti ta’ approvazzjoni tat-tip tal-komponent KE fir-rigward ta’ markar statutorju għal tip ta’ vettura bil-mutur b’żewġ roti jew tlieta u l-kondizzjonijiet li jirregolaw il-moviment liberu ta’ tali vetturi għandhom ikunu kif stabbiliti fil-Kapitoli II u III tad-Direttiva 2002/24/KE.

Artikolu 3

L-emendi neċessarji għall-addattament tar-rekwiżiti tal-Anness I għall-progress tekniku għandhom jiġu adottati skont il-proċedura msemmija fl-Artikolu 18(2) tad-Direttiva 2002/24/KE.

Artikolu 4

1.   Għal vetturi b’żewġ roti jew tlieta li jkunu kompatibbli mad-dispożizzjonijiet stipulati f’din id-Direttiva, l-Istati Membri m’għandhomx, għal raġunijiet li għandhom x’jaqsmu ma markar statutorju, jiċħdu l-għoti ta’ approvazzjoni tat-tip tal-KE jew jipprojbixxi r-reġistrazzjoni, l-bejgħ jew id-dħul fis-servizz ta’ tali vetturi.

2.   L-Istati Membri għandhom jiċħdu, għal raġunijiet li għandhom x’jaqsmu ma markar statutorju, l-għoti ta’ approvazzjoni tat-tip ta’ kwalunkwe tip ġdid ta’ vettura bil-mutur b’żewġ roti jew tlieta li ma tkunx konformi mad-dispożizzjonijiet stipulati f’din id-Direttiva.

3.   L-Istati Membri għandhom jikkomunikaw lill-Kummissjoni t-test tad-dispożizzjonijiet prinċipali tal-liġi nazzjonali li huma jadottaw fil-qasam regolat minn din id-Direttiva.

Artikolu 5

Id-Direttiva 93/34/KEE, kif emendata mid-Direttivi elenkati fl-Anness II, Parti A hija mħassra, bla ħsara għall-obbligi tal-Istati Membri relatati mal-limiti ta’ żmien għat-traspożizzjoni fil-liġi nazzjonali u l-applikazzjoni tad-Direttivi elenkati fl-Anness II, Parti B.

Referenzi għad-Direttiva mħassra għandhom jinftiehmu bħala referenzi għal din id-Direttiva u għandhom jinqraw skont it-tabella ta’ korrelazzjoni stabbilita fl-Anness III.

Artikolu 6

Din id-Direttiva għandha tidħol fis-seħħ fl-għoxrin jum wara l-pubblikazzjoni tagħha f’Il-Ġurnal Uffiċjali tal-Unjoni Ewropea.

Għanda tapplika mill-1 ta’ Ġunju 2010.

Artikolu 7

Din id-Direttiva hija indirizzata lill-Istati Membri.

Magħmul fi Strasburgu, il-25 ta’ Novembru 2009.

Għall-Parlament Ewropew

Il-President

J. BUZEK

Għall-Kunsill

Il-President

Å. TORSTENSSON

(1)  ĠU C 77, 31.3.2009, p. 41.

(2)  Opinjoni tal-Parlament Ewropew tat-18 ta’ Novembru 2008 (għadha m’hijiex ippubblikata fil-Ġurnal Uffiċjali) u Deċiżjoni tal-Kunsill tal-10 ta’ Novembru 2009.

(3)  ĠU L 188, 29.7.1993, p. 38.

(4)  Ara l-Anness II, Parti A.

(5)  ĠU L 124 tad-9.5.2002, p. 1.

ANNESS I

REKWIŻITI DWAR IL-MARKAR STATUTORJU GĦAL VETTURI BIL-MUTUR B’ŻEWĠ ROTI JEW TLIETA

1.   ĠENERALI

1.1.

Il-vetturi kollha għandhom jirċievu pjanċa u markar kif deskritt hawn taħt. Dik il-pjanċa u dak l-immarkar għandhom jitwaħħlu mill-manufattur jew mir-rappreżentant awtorizzat tiegħu.

2.   PJANĊA TAD-DATA TAL-MANUFATTUR

2.1.

Pjanċa tad-data tal-manufattur, li mudell tagħha jidher fl-Appendiċi 1 trid titwaħħal b’mod sod, f’punt faċilment aċċessibbli, ma’ parti li normalment aktarx ma tinbidilx waqt l-użu; trid tkun tinqara faċilment u jkun fiha l-informazzjoni li ġejja f’forma li ma titħassarx, fl-ordni li ġejja:

2.1.1.

isem il-manufattur;

2.1.2.

marka ta’ approvazzjoni tat-tip KE kif deskritta fl-Artikolu 8 tad-Direttiva 2002/24/KE;

2.1.3.

in-numru ta’ identifikazzjoni tal-vettura (VIN);

2.1.4.

il-livell ta’ ħoss meta wieqaf: … dB(A) … rev/min.

2.2.

Il-marka ta’ approvazzjoni tat-tip kif meħtieġa mill-punt 2.1.2, il-valur tal-livell tal-ħoss meta wieqaf u n-numru ta’ dawra/minuta kif meħtieġa mill-punt 2.1.4 mhumiex inklużi fl-approvazzjoni tat-tip tal-komponent KE ta’ markar statutorju. Madankollu, dawk il-biċċiet ta’ informazzjoni jridu jkunu mwaħħla mal-vetturi kollha manufatturati b’mod konformi mat-tip li ġie approvat.

2.3.

Il-manufatturi jistgħu jwaħħlu informazzjoni addizzjonali taħt jew maġenb il-markar statutorju, ‘l barra minn rettangolu mmarkat b’mod ċar li jkun fih biss l-informazzjoni meħtieġa mill-punti 2.1.1 sa 2.1.4 (ara Appendiċi 1).

3.   NUMRU TA’ IDENTIFIKAZZJONI TAL-VETTURA

In-numru ta’ identifikazzjoni tal-vettura jikkonsisti minn kombinazzjoni strutturata ta’ karattri mogħtija lil kull vettura mill-manufattur tagħhom. L-iskop tiegħu huwa li jagħmilha possibbli li kull vettura tiġi identifikata mingħajr ambigwità permezz tal-manufattur tagħha - mingħajr il-ħtieġa ta’ xi informazzjoni oħra - għal perjodu ta’ 30 sena. L-identifikazzjoni trid tissodisfa r-rekwiżiti li ġejjin:

3.1.

in-numru ta’ identifikazzjoni tal-vettura jrid jidħol fil-pjanċa tad-data tal-manufattur. Irid ukoll ikun martellat jew ippanċjat b’tali mod li jkun evitat li jitħassar jew jinbidel fuq ix-chassis jew frame f’punt li jista’ jkun faċilment aċċessibbli, u jrid ikun fuq in-nofs tal-lemin tal-vettura;

3.1.1.

in-numru ta’ identifikazzjoni tal-vettura għandu jkun fi tliet partijiet kif muri hawn taħt:

3.1.1.1.

l-ewwel parti tikkonsisti f’kodiċi mogħti lill-manufattur tal-vettura li jagħmilha possibbli li dik il-persuna tkun identifikata. Il-kodiċi għandu jikkonsisti fi tliet karattri (ittri jew ċifri) maħruġa mill-awtoritajiet kompetenti fil-pajjiż li fih il-manufattur għandu l-indirizz reġistrat tiegħu bi qbil mal-prattika tal-aġenzija internazzjonali li taġixxi fuq l-awtorizzazzjoni tal-Organizzazzjoni Internazzjonali għal Standardization (ISO). L-ewwel karattru jimmarka ż-żona ġeografika, it-tieni l-pajjiż ġewwa żona ġeografika u t-tielet karattru l-manufattur partikolari. Fejn il-manufattur jipproduċi anqas minn 500 vettura fis-sena, it-tielet karattru jkun dejjem 9. Biex ikun identifikat dak il-manufattur, l-awtorità msemmija hawn fuq għandha toħroġ ukoll it-tielet, ir-raba’ u l-ħames karattru tat-tielet parti;

3.1.1.2.

It-tieni parti tikkonsisti f’sitt karattri (ittri jew ċifri) bil-għan li jiddeskrivu l-karatteristiċi ġenerali tal-vettura (tip, varjant, u fil-każ ta’ moped, verżjoni); kull karatteristika tista’ tkun rappreżentata b’diversi karattri. Jekk il-manufattur tagħha ma jużax wieħed jew aktar minn dawn il-karattri l-ispazji mhux użati għandhom jimtlew b’karattri numeriċi jew alfabetiċi, bl-għażla titħalla f’idejn il-manufattur

3.1.1.3.

it-tielet parti tikkonsisti minn tmien karattri, l-aħħar erbgħa minnhom huma meħtieġa li jkunu numeriċi u, flimkien maż-żewġ partijiet l-oħra, iridu jagħmluha possibbli li vettura partikolari tkun identifikata b’mod ċar. Kull pożizzjoni mhux użata għandha timtela b’0 biex ikun ottenut in-numru totali ta’ karattri meħtieġa;

3.1.2.

in-numru tal-identifikazzjoni tal-vettura għandu, kull fejn ikun possibbli, ikun f’rig wieħed. Il-bidu u t-tmiem ta’ dan ir-rig għandhom ikunu mmarkati b’simbolu li la jkun numru Għarbi u lanqas ittra kapitali Latina, kif lanqas ma għandu jkun possibbli li wieħed jiżbalja dan il-karattru ma’ xi ieħor bħalu.

B’eċċezzjoni u għal raġunijiet tekniċi dan jista’ wkoll jieħu żewġ rigi. Iżda, f’dan il-każ ma għandux ikun hemm spazji vojta bejn xi waħda mit-tliet partijiet u l-bidu u t-tmiem ta’ kull rig għandhom ikunu mmarkati b’simbolu li la jkun numru Għarbi u lanqas ittra kapitali Latina, kif lanqas ma għandu jkun possibbli li wieħed jiżbalja dan il-karattru ma’ xi ieħor bħalu.

L-introduzzjoni tas-simbolu msemmi ġo rig bejn it-tliet partijiet (punt 3.1.1) hija wkoll awtorizzata.

M’għandux ikun hemm spazji bejn il-karattri.

4.   KARATTRI

4.1.

Ittri Latini u numri Għarab iridu jintużaw għall-markar li hemm provdut fil-punti 2 u 3. Madankollu, l-ittri Latini użati għall-informazzjoni mogħtija fil-punti 2.1.1, 2.1.3 u 3 jridu jkunu ittri kbar.

4.2.

Fin-numru ta’ identifikazzjoni tal-vettura:

4.2.1.

l-ittri I, O u Q, jew singijiet, asteriski jew sinjali oħra speċifiċi huma projbiti;

4.2.2.

ittri u ċifri għandu jkollhom l-għoli minimu li ġej:

4.2.2.1.

4 mm fil-każ ta’ karattri li ddaħlu b’mod dirett fuq ix-chassis jew frame jew xi struttura oħra simili tal-vettura;

4.2.2.2.

3 mm fil-każ ta’ karattri mdaħħla fuq il-pjanċa tad-data tal-manufattur.

Appendiċi 1

Eżempju ta’ pjanċa tad-data tal-manufattur

L-eżempju ta’ hawn taħt bl-ebda mod ma jaffettwa l-informazzjoni fil-fatt mogħtija fuq il-pjanċi tad-data tal-manufattur, l-anqas id-dimensjonijiet tal-pjanċa nnifisha, iċ-ċifri jew l-ittri. Hija mogħtija biss bħala eżempju.

It-tagħrif addizzjonali msemmi fil-punt 2.3 jista’ jiddaħħal hawn taħt jew fuq ġenb wieħed tal-informazzjoni mitluba fir-rettangolu li ġej.

STELLA FABBRICA MOTOCICLI

e3 5364

3 G S K L M 3 A C 8 B 1 2 0 0 0 0

80 dB(A) — 3 750 rev/min

Skrizzjon

Fl-eżempju ta’ hawn fuq ta’ pjanċa, il-vettura konċernata ġiet magħmula mill-“Fabbrika Muturi Stella” u type-approved fl-Italja (e3), taħt in-numru 5364.

In-numru ta’ identifikazzjoni (3GSKLM3AC8B120000) jagħti l-informazzjoni li ġejja:

—

l-ewwel parti (3GS):

—   3: żona ġeografika (Ewropa);

—   G: pajjiż fiż-żona ġeografika (Ġermanja);

—   S: manufattur (Fabbrika Muturi Stella);

—

it-tieni parti (KLM3AC):

—   KL: tip ta’ vettura;

—   M3: varjant (il-bodywork tal-vettura);

—   AC: verżjoni (magna tal-vettura);

—

it-tielet parti (8B120000):

—

:

8B12

:

identifikazzjoni tal-vettura u għaqda taż-żewġ partijiet l-oħra tan-numru ta’ identifikazzjoni;

—

:

0000

:

pożizzjonijiet mhux użati li ġew mimlija b’0 biex ikun magħmul in-numru totali ta’ karattri meħtieġa.

Il-livell ta’ ħoss meta wieqaf huwa ta’ 80 dB(A) bi 3 750 rev/min.

Appendiċi 2

Dokument ta’ informazzjoni dwar markar statutorju għal tip ta’ vettura bil-mutur b’żewg roti jew tlieta

(li għandu jjinhemez mal-applikazzjoni għall-approvazzjoni tat-tip tal-komponent KE meta din tintbgħat separatament mill-applikazzjoni għall-approvazzjoni tat-tip KE ta’ vettura)

Nru tal-ordni (mogħti mill-applikant): …

L-applikazzjoni għal approvazzjoni tat-tip tal-komponent KE dwar markar statutorju għal tip ta’ vettura bir-roti b’żewġ jew tliet roti għandu jkun fiha l-informazzjoni stabbilita taħt il-punti li ġejjin fil-Parti I, Taqsima A tal-Anness II tad-Direttiva 2002/24/KE:

—

0.1,

—

0.2,

—

0.4 sa 0.6,

—

9.3.1 sa 9.3.3.

Appendiċi 3

Isem tal-amministrazzjoni

Ċertifikat ta’ approvazzjoni tat-tip tal-komponent KE dwar markar statutorju għal tip ta’ vetturi bil-mutur b’żewġ roti jew tlieta

MUDELL

Nru tar-rapport … mis-servizz tekniku … data …

Nru ta’ approvazzjoni tat-tip tal-komponent KE: … Nru ta’ estensjoni: …

1.

Marka tad-ditta jew isem tal …

2.

Tip ta’ vettura: …

3.

L-isem u l-indirizz tal-manifattur: …

…

4.

Isem u indirizz tar-rappreżentant tal-manifattur (jekk hemm): …

…

5.

Data meta l-vettura tmur għat-test: …

…

6.

Approvazzjoni tat-tip tal-komponent KE mogħtija/miċħuda (1):

7.

Post: …

8.

Data: …

9.

Firma: …

(1)  Ħassar kif xieraq.

ANNESS II

PARTI A

Direttiva mħassra flimkien ma’ lista tal-emendi suċċessivi tagħha

(imsemmija fl-Artikolu 5)

Direttiva tal-Kunsill 93/34/KEE

(ĠU L 188, 29.7.1993, p. 38)

 

Direttiva tal-Kummissjoni 1999/25/KE

(ĠU L 104, 21.4.1999, p. 19)

 

Direttiva tal-Kummissjoni 2006/27/KE

(ĠU L 66, 8.3.2006, p. 7)

L-Artikolu 2 u l-Anness II biss

PARTI B

Lista tal-limiti ta’ żmien għat-traspożizzjoni fil-liġi nazzjonali u l-applikazzjoni

(imsemmija fl-Artikolu 5)

Direttiva

Limitu ta’ żmien għat-traspożizzjoni

Data ta’ applikazzjoni

93/34/KEE

fl-14 ta’ Diċembru 1994.

fl-14 ta’ Ġunju 1995.

1999/25/KE

fil-31 ta’ Diċembru 1999.

fl-1 ta’ Jannar 2000 (*)

2006/27/KE

fil-31 ta’ Diċembru 2006 (**)

—

(*)  Skond l-Artikolu 2 tad-Direttiva 1999/25/KE:

“1.   B’effett mill-1 ta’ Jannar 2000, l-Istati Membri ma għandhomx, għal raġunijiet relatati mal-immarkar statutorju:

—

jirrifjutaw, fir-rigward ta’ tip ta’ vettura b’żewġ roti jew tlieta, li jagħtu l-approvazzjoni tat-tip tal-KE,

—

jipprojbixxu r-reġistrazzjoni, il-bejgħ jew id-dħul fis-sevizz ta’ vetturi bil-mutur b’żewġ roti jew tlieta,

jekk l-immarkar statutorju jkun konformi mar-rekwiżiti tad-Direttiva tal-Kunsill 93/34/KEE, kif emendata b’din id-Direttiva.

2.   B’effett mill-1 ta’ Lulju 2000, l-Istati Membri għandhom jirrifjutaw li jagħtu l-approvazzjoni tat-tip tal-KE għal kull tip ta’ vettura bil-mutur b’żewġ roti jew tlieta għal raġunijiet relatati mal-immarkar statutorju jekk ir-rekwiżiti tad-Direttiva 93/34/KEE, kif emendata minn din id-Direttiva, ma jkunux issodisfati.”

(**)  Skond l-Artikolu 5 tad-Direttiva 2006/27/KE:

“1.   B’effet mill-1 ta’ Jannar 2007, fir-rigward ta’ vetturi b’żewġ roti jew bi tlieta, li jikkonformaw mad-disposiżżjonijiet stabbiliti fid-Direttivi […], 93/34/KEE, […] rispettivament, kif emendati b’din id-Direttiva, l-Istati Membri m’għandhomx, għal raġunijiet relatati mad-Direttiva konċernata, jirrifjutaw mill jagħtu approvazzjoni tat-tip tal-KE jew jipprojbixxu r-reġistrazzjoni, il-bejgħ jew id-dħul fis-servizz tat-tali vettura.

2.   B’effett mill-1 ta’ Lulju 2007, l-Istati Membri għandhom jirrifjutaw, għal raġunijiet relatati mad-Direttiva konċernata, milli jagħtu l-approvazzjoni tat-tip tal-KE lil kwalunke tip ta’ vettura b’żewġ roti jew bi tlieta li ma tikkonformax mad-disposiżżjonijet stabbiliti fid-Direttivi […], 93/34/KEE, […] rispettivament, kif emendati b’din id-Direttiva.”

ANNESS III

TABELLA TA’ KORRELAZZJONI

Direttiva 93/34/KEE

Direttiva 2006/27/KE

Din id-Direttiva

Artikoli 1, 2 u 3

 

Artikoli 1, 2 u 3

Artikolu 4(1)

 

—

—

Artikolu 5(1)

Artikolu 4(1)

—

Artikolu 5(2)

Artikolu 4(2)

Artikolu 4(2)

 

Artikolu 4(3)

—

 

Artikolu 5

—

 

Artikolu 6

Artikolu 5

 

Artikolu 7

Anness

 

Anness I

—

 

Anness II

—

 

Anness III
Top