(i)

Il-klima u l-enerġija saru prijoritajiet, għaliex l-UE qiegħda minn ta' quddiem fil-bini ta' ekonomija globali b'emissjonijiet tal-karbonju baxxi. F'Marzu 2007, il-Kunsill Ewropew adotta konklużjonijiet (1) dwar it-tnaqqis tal-emissjonijiet tal-gass b'effett serra mill-anqas b' 20 % sal-2020 meta mqabbel mal-1990 (30 % bħala parti minn ftehim internazzjonali dwar miri globali) u biex tiġi stabbilita mira obbligatorja ta' 20 % għall-użu ta' sorsi tal-enerġija rinnovabbli sal-2020, inkluż sehem ta' 10 % ta' bijokarburanti fil-konsum mit-trasport tal-petrol u tad-diżil. L-agrikoltura u l-forestrija jistgħu jagħtu kontribut importanti fil-forniment ta' stokkijiet ta' għalf għall-bijoenerġija, għall-iżolament tal-karbonju u għal aktar tnaqqis fl-emissjonijiet tal-gass b'effett serra.

(ii)

L-objettivi tal-UE fir-rigward tal-politika dwar l-ilma huma stabbiliti fid-Direttiva 2000/60/KE tal-Parlament Ewropew u tal-Kunsill tat-23 ta' Ottubru 2000 li tistabbilixxi qafas għal azzjoni Komunitarja fil-qasam tal-politika tal-ilma (2), li ser tibda tilħaq l-implimentazzjoni sħiħa fil-perijodu 2010-2012. Bħala utenti prinċipali tal-ilma u tar-riżorsi tal-ilma, l-agrikoltura u l-forestrija għandhom rwol prinċipali fil-ġestjoni sostenibbli tal-ilma kemm f'termini ta' kwantità u ta' kwalità. Il-ġestjoni tal-ilma ser tkun parti dejjem aktar importanti fl-istrateġija ta' adattament biex jiġi trattat it-tibdil fil-klima li diġà huwa inevitabbli.

(iii)

L-Istati Membri impenjaw lilhom infushom biex iwaqqfu t-tnaqqis fil-bijodiversità sal-2010, mira li tidher dejjem aktar improbabbli li tintlaħaq. Parti kbira tad-diversità bijoloġika tal-Ewropa tiddependi fuq l-agrikoltura u l-forestrija u l-isforzi għall-protezzjoni tal-bijodiversità ser ikollhom jiżdiedu, b'mod partikolari fid-dawl tal-effetti negattivi mistennija tat-tibdil fil-klima u mid-domanda għall-ilma dejjem tiżdied.

(iv)

Il-produtturi ta' prodotti tal-ħalib jagħmlu kontribut sostanzjali għaż-żamma tal-kampanja permezz tal-attività agrikola sostenibbli, speċjalment f'reġjuni żvantaġġati. Minħabba l-ispejjeż għolja ta' produzzjoni tagħhom u t-tibdil strutturali li jridu jiffaċċjaw bħala riżultat tat-tneħħija gradwali tas-sistema tal-kwoti tal-ħalib, miżuri ta' appoġġ akkumpanjat għandhom ikunu disponibbli għall-produtturi tal-prodotti tal-ħalib, sabiex ikunu jistgħu jadattaw aħjar għall-kondizzjonijiet ġodda tas-suq.

(v)

Jistgħu jintużaw b'mod partikolari miżuri għall-iżvilupp rurali biex titħeġġeġ l-innovazzjoni fil-ġestjoni tal-ilma, fil-produzzjoni u l-użu ta' sorsi rinnovabbli, fil-protezzjoni tal-bijodiversità u fl-ittrattar tal-mitigazzjoni u l-adattament għat-tibdil fil-klima u biex jiġu promossi soluzzjonijiet b'vantaġġi reċiproċi għall-kompetittività u l-ambjent. Sabiex jiġi promoss l-użu sħiħ tal-innovazzjoni, għandu jkun disponibbli l-appoġġ speċifiku għal operazzjonijiet innovattivi marbutin mal-isfidi ġodda.”.

(i)

B'mod partikolari, appoġġ għall-investiment skond l-assi 1 jista' jkun immirat lejn makkinarju li jiffranka l-enerġija, l-ilma u input ieħor kif ukoll għall-produzzjoni ta' enerġija rinnovabbli għall-użu fl-irziezet. Fis-settur tal-agrikoltura u tal-ikel u fis-settur tal-forestrija, appoġġ għall-investiment għandu jgħin biex jiġu żviluppati modi innovattivi u aktar sostenibbli għall-ipproċessar tal-bijokarburanti.

(ii)

Taħt l-assi 2, il-miżuri għall-agri-ambjent u miżuri għall-forestrija jistgħu jintużaw b'mod partikolari biex isaħħu l-bijodiversità billi jikkonservaw tipi ta' veġetazzjonijiet rikki fl-ispeċijiet u billi jipproteġu u jżommu produzzjoni agrikola ta' artijiet erbaċei u b'forom estensivi. Azzjonijiet speċifiċi skond l-assi 2, bħal miżuri agro-ambjentali jew ta' afforestazzjoni, jistgħu wkoll jgħinu biex titjieb il-kapaċità li jkunu ġestiti aħjar ir-riżorsi tal-ilma disponibbli f'termini ta' kwantità u biex ikunu protetti f'termini ta' kwalità. Barra dan, ċerti azzjonijiet agro-ambjentali u tal-forestrija jikkontribbwixxu għall-kontroll ta' emissjonijiet ta' ossidu nitruż (N2O) u tal-metan (CH4) u jgħinu biex jippromwovu l-iżolament tal-karbonju.

(iii)

Taħt l-assi 3 u 4, proġetti fuq skala lokali u kooperazzjoni għal proġetti ta' enerġija rinnovabbli jistgħu jkunu appoġġjati kif ukoll id-diversifikazzjoni tal-bdiewa fil-produzzjoni tal-bijoenerġija. Il-konservazzjoni tal-wirt naturali tista' tgħin fil-ħarsien ta' ħabitats ta' valur naturali għoli u ta' korpi tal-ilma ta' valur għoli.

(iv)

Minħabba li ż-żoni rurali kollha qegħdin jiffaċċjaw kwistjonijiet ta' tibdil fil-klima u tal-enerġija rinnovabbli, l-Istati Membri jistgħu jħeġġu lill-gruppi ta' azzjoni lokali taħt l-assi 4 (Leader) biex jittrattaw dawn il-kwistjonijiet fl-istrateġiji għall-iżvilupp lokali tagħhom bħala tema transversali. Il-gruppi qegħdin f'pożizzjoni tajba biex jikkontribbwixxu għall-adattament għat-tibdil fil-klima u għal soluzzjonijiet ta' enerġija rinnovabbli mfassla għas-sitwazzjoni lokali.

(v)

L-innovazzjoni għandha l-potenzjal li jinkisbu effetti partikolarment pożittivi biex jintlaħqu l-isfidi ġodda tat-tibdil fil-klima, il-produzzjoni tas-sorsi tal-enerġija rinnovabbli, prattiki aktar sostenibbli tal-ġestjoni tal-ilma u li jitwaqqaf it-tnaqqis tal-bijodiversità. L-appoġġ għall-innovazzjoni f'dawn l-oqsma jista' jieħu l-forma ta' inkoraġġiment għall-iżvilupp, li jittieħdu u jiġu applikati teknoloġiji, prodotti u proċessi rilevanti.

(vi)

Bħala prinċipju ġenerali, l-appoġġ għandu jkun immirat fuq tipi ta' operazzjonijiet li jkunu koerenti mal-objettivi u d-dispożizzjonijiet stabbiliti fir-Regolament (KE) Nru 1698/2005 u li jikkontribwixxu għall-iġġenerar ta' effetti potenzjalment pożittivi meta jitqiesu l-isfidi l-ġodda bħal dawk speċifikati fl-Anness II għal dak ir-Regolament.”.