Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32007D0412

Deċiżjoni tal-Kunsill 2007/412/ĠAI tat- 12 ta’ Ġunju 2007 li temenda d-Deċiżjoni 2002/348/ĠAI dwar is-sigurtà b’konnessjoni ma’ logħbiet tal-futbol b’dimensjoni internazzjonali

OJ L 155, 15.6.2007, p. 76–77 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
Special edition in Croatian: Chapter 19 Volume 006 P. 71 - 72

Legal status of the document In force

ELI: http://data.europa.eu/eli/dec/2007/412/oj

15.6.2007   

MT

Il-Ġurnal Uffiċjali ta’ l-Unjoni Ewropea

L 155/76

DEĊIŻJONI TAL-KUNSILL 2007/412/ĠAI

tat-12 ta’ Ġunju 2007

li temenda d-Deċiżjoni 2002/348/ĠAI dwar is-sigurtà b’konnessjoni ma’ logħbiet tal-futbol b’dimensjoni internazzjonali

IL-KUNSILL ta’ L-UNJONI EWROPEA,

Wara li kkunsidra t-Trattat dwar l-Unjoni Ewropea, u b’mod partikolari l-Artikolu 30(1)(a) u (b) u l-Artikolu 34(2)(ċ) tiegħu,

Wara li kkunsidra l-inizjattiva tar-Repubblika ta’ l-Awstrija (1),

Wara li kkunsidra l-opinjoni tal-Parlament Ewropew (2),

Billi:

(1)

L-objettiv ta’ l-Unjoni Ewropea huwa, inter alia, li tipprovdi liċ-ċittadini b’livell għoli ta’ sigurtà fi ħdan spazju ta’ libertà, ta’ sigurtà u ta’ ġustizzja billi tiġi żviluppata azzjoni komuni bejn l-Istati Membri fil-qasam tal-koperazzjoni bejn il-pulizija.

(2)

Fil-25 ta’ April 2002, il-Kunsill adotta d-Deċiżjoni 2002/348/ĠAI (3) li stabbilixxiet punt nazzjonali ta’ informazzjoni dwar il-futbol f’kull Stat Membru inkarigat bl-iskambju ta’ informazzjoni tal-pulizija fir-rigward ta’ logħbiet tal-futbol b’dimensjoni internazzjonali. Dik id-Deċizjoni stabbilixxiet il-kompiti u l-proċeduri li għandhom jiġu adotti minn kull punt nazzjonali ta’ informazzjoni dwar il-futbol.

(3)

Id-Deċiżjoni 2002/348/ĠAI għandha tiġi riveduta u aġġornata sabiex jittieħed kont ta’ l-esperjenza fis-snin reċenti, bħall-Kampjonati Ewropej fl-2004 u l-valutazzjoni mill-esperti tal-koperazjoni internazzjonali bejn il-pulizija fil-qafas ta’ dak il-kampjonat u l-koperazzjoni estensiva bejn il-pulizija fir-rigward ta’ logħbiet internazzjonali kif ukoll ta’ logħob bejn il-klabbijiet fl-Ewropa b’mod ġenerali. Fis-snin reċenti, in-numru ta’ partitarji li jivvjaġġaw għal logħbiet barra mill-pajjiż kompla jikber. Għalhekk, hemm il-ħtieġa li l-korpi kompetenti jsaħħu l-koperazzjoni tagħhom u jipprofessjonalizzaw l-iskambju ta’ informazzjoni sabiex jiġu evitati d-disturbi ta’ l-ordni pubbliku u sabiex jippermettu lil kull Stat Membru jagħmel stima effiċjenti tar-riskji. L-emendi proposti huma r-riżultat ta’ esperjenzi miġbura minn diversi punti nazzjonali ta’ informazzjoni dwar il-futbol fix-xogħol tagħhom ta’ kuljum u għandhom jgħinuhom sabiex jaħdmu b’mod aktar strutturat u professjonali, u b’hekk jiżguraw l-iskambju ta’ kwalità għolja ta’ informazzjoni.

(4)

L-emendi huma mingħajr preġudizzju għad-dispożizzjonijiet nazzjonali eżistenti, b’mod partikolari għad-diviżjonijiet u għar-responsabbiltajiet bejn l-awtoritajiet u s-servizzi differenti fl-Istati Membri kkonċernati, u għall-eżerċizzju mill-Kummissjoni tas-setgħat tagħha taħt it-Trattat li jistabbilixxi l-Komunità Ewropea,

IDDEĊIEDA KIF ĠEJ:

Artikolu 1

Id-Deċiżjoni tal-Kunsill 2002/348/ĠAI hija b’dan emendata kif ġej:

(1)

l-Artikolu 2 għandu jiġi emendat kif ġej:

a)

il-paragrafu 2 għandu jiġi sostitwit b’dan li ġej:

“2.   Il-punti nazzjonali ta’ informazzjoni dwar il-futbol għandhom, skond ir-regoli nazzjonali u internazzjonali applikabbli, ikollhom aċċess għall-informazzjoni li tinvolvi data personali dwar sostenituri ta’ riskju”.

b)

għandu jiżdied il-paragrafu li ġej:

“6.   Il-punti nazzjonali ta’ informazzjoni dwar il-futbol għandhom regolarment jipproduċu u jiċċirkolaw valutazzjonijiet ġeneriċi u /jew tematiċi ta’ diżordni marbut mal-futbol fil-livelli nazzjonali għall-benefiċċju ta’ punti nazzjonali oħra ta’ informazzjoni dwar il-futbol”.

(2)

l-Artikolu 3 għandu jiġi emendat kif ġej:

a)

fil-paragrafu 3, l-ewwel sentenza għandha tiġi sostitwita b’dan li ġej:

“3.   Id-data personali għandha tiġi skambjata skond ir-regoli nazzjonali u internazzjonali applikabbli, b’kont meħud tal-prinċipji tal-Konvenzjoni Nru 108 tal-Kunsill ta’ l-Ewropa tat-28 ta’ Jannar 1981 għall-protezzjoni ta’ individwi fir-rigward ta’ proċessar awtomatiku ta’ data personali u, skond il-każ, tar-Rakkomandazzjoni Nru R (87)15 tal-Kumitat tal-Ministri tal-Kunsill ta’ l-Ewropa tas-17 ta’ Settembru 1987 li tirregola l-użu ta’ data personali fis-settur tal-pulizija.”

b)

għandu jiżdied il-paragrafu li ġej:

“4.   L-informazzjoni għandha tiġi skambjata permezz tal-formoli adatti li jinsabu fl-appendiċi tal-manwal b’rakkomandazzjonijiet għall-implimentazzjoni, fil-livell internazzjonali, ta’ koperazzjoni bejn il-pulizija u għal miżuri għall-prevenzjoni u l-kontroll tal-vjolenza u ta’ disturbi b’konnessjoni mal-logħbiet tal-futbol b’dimensjoni internazzjonali li jikkonċernaw mill-anqas Stat Membru wieħed. Il-punti nazzjonali ta’ informazzjoni dwar il-futbol għandhom jiżguraw li l-informazzjoni li jibgħatu tkun kompleta u konformi ma’ dawn il-formoli”.

Artikolu 2

Il-Kunsill għandu jivvaluta l-implementazzjoni ta’ din id-Deċiżjoni mhux aktar tard mit-12 ta’ Ġunju 2010.

Artikolu 3

Din id-Deċiżjoni għandu jibda jkollha effett fil-jum wara dak tal-pubblikazzjoni tagħha fil-Ġurnal Uffiċjali ta’ l-Unjoni Ewropea.

Magħmul fi Brussel, 12 ta’ Ġunju 2007.

Għall-Kunsill

Il-President

W. SCHÄUBLE

(1)  ĠU C 164, 15.7.2006, p. 30.

(2)  Opinjoni mogħtija fit-22 ta’ Marzu 2007 (għadha mhijiex pubblikata fil-Ġurnal Uffiċjali).

(3)  ĠU L 121, 8.5.2002, p. 1.

Top