EUR-Lex Access to European Union law
This document is an excerpt from the EUR-Lex website
Document 02015R0288-20140101
Commission Delegated Regulation (EU) 2015/288 of 17 December 2014 supplementing Regulation (EU) No 508/2014 of the European Parliament and of the Council on the European Maritime and Fisheries Fund with regard to the period of time and the dates for the inadmissibility of applications
Consolidated text: Regolament ta' Delega tal-Kummissjoni (UE) 2015/288 tas- 17 ta' Diċembru 2014 li jissupplimenta r-Regolament (UE) Nru 508/2014 tal-Parlament Ewropew u tal-Kunsill dwar il-Fond Ewropew għall-Affarijiet Marittimi u s-Sajd fir-rigward tal-perjodu ta' żmien u d-dati għall-inammissibbiltà tal-applikazzjonijiet
Regolament ta' Delega tal-Kummissjoni (UE) 2015/288 tas- 17 ta' Diċembru 2014 li jissupplimenta r-Regolament (UE) Nru 508/2014 tal-Parlament Ewropew u tal-Kunsill dwar il-Fond Ewropew għall-Affarijiet Marittimi u s-Sajd fir-rigward tal-perjodu ta' żmien u d-dati għall-inammissibbiltà tal-applikazzjonijiet
Dan it-test ikkonsolidat jista’ ma jinkludix l-emendi li ġejjin:
Att li jemenda | Tip ta’ emenda | Is-subdiviżjoni kkonċernata | Data tal-effett |
---|---|---|---|
32015R2252 | Emendata minn | artikolu 9 punt (e) | 06/12/2015 |
32015R2252 | Emendata minn | artikolu 1 | 06/12/2015 |
32015R2252 | Emendata minn | artikolu 9 punt (d) | 06/12/2015 |
32015R2252 | Emendata minn | artikolu 9 L | 06/12/2015 |
32015R2252 | Emendata minn | artikolu 4a | 06/12/2015 |
2015R0288 — MT — 01.01.2014 — 000.001
Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu
REGOLAMENT TA' DELEGA TAL-KUMMISSJONI (UE) 2015/288 tas-17 ta' Diċembru 2014 (ĠU L 051 24.2.2015, p. 1) |
Emendat bi:
|
|
Il-Ġurnal Uffiċjali |
||
Nru |
Paġna |
Data |
||
REGOLAMENT TA' DELEGA TAL-KUMMISSJONI (UE) 2015/2252 tat-30 ta' Settembru 2015 |
L 321 |
2 |
5.12.2015 |
REGOLAMENT TA' DELEGA TAL-KUMMISSJONI (UE) 2015/288
tas-17 ta' Diċembru 2014
li jissupplimenta r-Regolament (UE) Nru 508/2014 tal-Parlament Ewropew u tal-Kunsill dwar il-Fond Ewropew għall-Affarijiet Marittimi u s-Sajd fir-rigward tal-perjodu ta' żmien u d-dati għall-inammissibbiltà tal-applikazzjonijiet
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 508/2014 tal-Parlament Ewropew u tal-Kunsill tal-15 ta' Mejju 2014 dwar il-Fond Ewropew għall-Affarijiet Marittimi u s-Sajd u li jħassar ir-Regolamenti tal-Kunsill (KE) Nru 2328/2003, (KE) Nru 861/2006, (KE) Nru 1198/2006 u (KE) Nru 791/2007 (UE) u r-Regolament (UE) Nru 1255/2011 tal-Parlament Ewropew u tal-Kunsill ( 1 ), u b'mod partikolari l-Artikolu 10(4) tiegħu,
Billi:
(1) |
Il-kisba tal-objettivi tal-Politika Komuni tas-Sajd (PKS) ma għandhiex tiddgħajjef mill-operaturi li jiksru r-regoli tal-PKS. Skont l-Artikolu 42(1) tar-Regolament (UE) Nru 1380/2013 tal-Parlament Ewropew u tal-Kunsill ( 2 ), l-għajnuna finanzjarja mill-Fond Ewropew għall-Affarijiet Marittimi u s-Sajd (“FEMS”) tingħata jekk l-operaturi jikkonformaw mar-regoli tal-PKS. |
(2) |
Skont l-Artikolu 42(2) tar-Regolament (KE) Nru 1380/2013, il-ksur serju mill-operaturi tar-regoli tal-PKS għandu jirriżulta fi projbizzjonijiet temporanji jew permanenti fuq l-aċċess għall-għajnuna finanzjarja mill-Unjoni. Dawn il-miżuri għandhom ikunu dissważivi, effettivi u proporzjonati. |
(3) |
Sabiex jitħarsu l-interessi finanzjarji tal-Unjoni u tal-kontribwenti tagħha, l-operaturi li, fi żmien partikolari qabel ressqu applikazzjoni għal għajnuna finanzjarja, ikunu wettqu xi ksur serju, reat jew frodi, kif stipulat fl-Artikolu 10 tar-Regolament (UE) Nru 508/2014 ma għandhomx jibbenefikaw mill-għajnuna finanzjarja mill-FEMS. |
(4) |
L-operaturi li japplikaw għall-appoġġ tal-FEMS għandhom ikunu identifikabbli b'mod ċar sabiex tiġi vverifikata l-ammissibbiltà tal-applikazzjonijiet tagħhom. Sabiex jinkisbu l-objettivi tal-kundizzjonalità tal-appoġġ tal-FEMS, huwa xieraq li jiġu stabbiliti d-dispożizzjonijiet neċessarji li jiżguraw li dawn l-operaturi jikkonformaw mal-kundizzjonijiet ta' ammissibbiltà għall-appoġġ tal-FEMS fir-rigward tal-bastimenti kollha tas-sajd taħt il-kontroll effettiv tagħhom. |
(5) |
Skont l-Artikolu 10(4) tar-Regolament (UE) Nru 508/2014, it-tul tal-perjodu ta' inammissibbiltà għandu jkun proporzjonat man-natura, il-gravità, it-tul ta' żmien u r-repetizzjoni tal-ksur serju, ir-reat jew il-frodi. Għalhekk, huwa neċessarju li jiġu stabbiliti r-regoli għall-kalkolu tat-tul ta' żmien tal-inammissibbiltà u jiġu identifikati d-dati rilevanti tal-bidu u tat-tmiem tal-perjodu ta' inammissibbiltà. |
(6) |
Skont l-Artikolu 42(3) tar-Regolament (UE) Nru 1380/2013 u l-Artikolu 10(4)(a) tar-Regolament (UE) Nru 508/2014, jekk awtorità kompetenti tistabbilixxi li operatur ikun wettaq ksur serju, l-applikazzjoni ta' dak l-operatur għandha tkun inammissibbli għall-appoġġ tal-FEMS għal perjodu ta' mill-inqas 12-il xahar. Peress li r-Regolament (UE) Nru 508/2014 japplika mill-1 ta' Jannar 2014, biex tiġi żgurata l-proporzjonalità u ċ-ċertezza legali, għall-kalkolu tal-perjodu ta' inammissibbiltà għandu jitqies biss il-ksur serju ddeterminat b'deċiżjoni li tkun ittieħdet mill-1 ta' Jannar 2013. |
(7) |
Madankollu, l-applikazzjoni immedjata u awtomatika tal-inammissibbiltà għall-appoġġ tal-FEMS tkun sproporzjonata f'każijiet ta' ksur li, filwaqt li jżommu n-natura serja tagħhom kif stabbilit mill-awtoritajiet kompetenti, mhux bilfors jikkawżaw, b'mod dirett, preġudizzju serju għar-riżorsi tas-sajd u għall-ambjent tal-baħar imsemmija fl-Artikolu 90(4) tar-Regolament tal-Kunsill (KE) Nru 1224/2009 ( 3 ). Dawn il-każijiet jinkludu, pereżempju, każijiet minuri ta' rappurtar ħażin tal-qabdiet li ma għandhomx jirriżultaw fl-inammissibbiltà immedjata tal-applikazzjonijiet għall-appoġġ tal-FEMS. |
(8) |
Il-ksur serju relatat mat-teħid abbord, it-trażbord jew il-ħatt l-art ta' ħut żgħir wisq, għandu jiġi evalwat fir-rigward tad-dħul fis-seħħ gradwali tal-eliminazzjoni tal-iskartar kif previst mill-PKS. Jidher li la hija neċessarja u lanqas xierqa li jsiru immedjatament inammissibbli l-applikazzjonijiet għall-appoġġ tal-FEMS mill-operaturi li jkunu wettqu dan il-ksur. |
(9) |
F'dawk il-każijiet eċċezzjonali msemmija fil-premessi (7) u (8), biex tiġi żgurata li l-inammissibbiltà tal-applikazzjonijiet mill-operaturi għall-appoġġ tal-FEMS tikkonforma mal-prinċipju tal-proporzjonalità, huwa xieraq li l-kalkolu jkun ibbażat fuq il-perjodu ta' inammissibbiltà tas-sistema eżistenti ta' għoti ta' punti għal ċertu ksur serju kif stabbilit fl-Artikolu 92 tar-Regolament (KE) Nru 1224/2009 u l-Artikolu 126 u l-Anness XXX tar-Regolament ta' Implimentazzjoni tal-Kummissjoni (UE) Nru 404/2011 ( 4 ). F'dawk il-każijiet eċċezzjonali mniżżla fil-punti 1, 2 u 5 tal-Anness XXX tar-Regolament ta' Implimentazzjoni (UE) Nru 404/2011, id-data tal-bidu tal-applikazzjoni u l-kalkolu tal-perjodu ta' inammissibbiltà għandhom jiġu ddefiniti fir-rigward tal-Artikolu 126(4) tar-Regolament ta' Implimentazzjoni (UE) Nru 404/2011. |
(10) |
Skont l-Artikolu 92(4) tar-Regolament (KE) Nru 1224/2009, jekk id-detentur ta' liċenzja tas-sajd ma jwettaqx ksur serju ieħor fi żmien tliet snin mid-data tal-aħħar ksur serju, il-punti kollha fuq il-liċenzja tas-sajd tiegħu għandhom jitħassru. B'konsegwenza ta' dan, il-punti fuq il-liċenzja tas-sajd jibqgħu validi għal mill-inqas tliet snin. Peress li d-dispożizzjonijiet tal-FEMS japplikaw mill-1 ta' Jannar 2014, biex tiġi żgurata l-proporzjonalità u ċ-ċertezza legali, il-punti għall-ksur serju mniżżla fil-punti 1, 2 u 5 tal-Anness XXX tar-Regolament ta' Implimentazzjoni (UE) Nru 404/2011 għandhom jitqiesu biss għall-kalkolu tal-perjodu ta' inammissibiltà jekk jiġu assenjati mill-1 ta' Jannar 2013. |
(11) |
Is-sajd illegali, mhux irrappurtat u mhux irregolat (IUU) jikkostitwixxi waħda mit-theddidiet l-aktar serji għall-isfruttament sostenibbli tar-riżorsi akkwatiċi ħajjin u jdgħajjef b'mod qawwi l-ksib tal-objettivi tal-PKS. Għalhekk huwa xieraq li jiġu stabbiliti r-regoli dwar l-inammissibbiltà tal-applikazzjonijiet għall-appoġġ tal-FEMS mill-operaturi tal-bastimenti tas-sajd li jtajru l-bandiera ta' pajjiżi inklużi fil-lista tal-Unjoni ta' bastimenti involuti fis-sajd IUU jew ta' bastimenti li jtajru l-bandiera ta' pajjiżi identifikati bħala pajjiżi terzi li ma jikkooperawx. |
(12) |
L-Artikolu 10(3) tar-Regolament (UE) Nru 508/2014 jistipula li l-applikazzjonijiet ippreżentati mill-operaturi li wettqu frodi fil-kuntest tal-Fond Ewropew għas-Sajd (“FES”) jew tal-FEMS se jkunu inammissibbli għal ċertu perjodu ta' żmien. Peress li l-frodi tikkostitwixxi waħda mill-akbar theddidiet għall-interessi finanzjarji tal-Unjoni u għall-kontribwenti tagħha, u biex jiġi provdut trattament armonizzat u ugwali għall-operaturi fl-Istati Membri kollha, għandhom jiġu definiti regoli adattati għall-gravità ta' din it-theddida fir-rigward tal-perjodu li fih l-applikazzjonijiet ippreżentati mill-operaturi li wettqu din il-frodi se jkunu inammissibbli. |
(13) |
Sabiex tiġi żgurata l-applikazzjoni proporzjonata u effettiva tar-regoli dwar l-inammissibbiltà tal-applikazzjonijiet mill-operaturi għall-appoġġ tal-FEMS, huwa xieraq li jiġu stabbiliti r-regoli għall-kalkolu tal-perjodi ta' inammissibbiltà f'każijiet fejn operatur wieħed għandu aktar minn bastiment wieħed tas-sajd. Dawn ir-regoli għandhom jiżguraw li l-appoġġ tal-FEMS ma jkunx ta' benefiċċju għall-bastimenti tas-sajd li ntużaw biex iwettqu ksur serju u li b'hekk l-applikazzjonijiet minn dawk l-operaturi jirriżultaw inammissibbli. Huwa wkoll xieraq li jiġu stabbiliti regoli għar-reviżjoni tal-perjodu ta' inammissibbiltà f'każijiet fejn l-operatur iwettaq ksur serju matul dan il-perjodu. |
(14) |
Għandhom jiġu stabbiliti regoli biex jiġi żgurat it-trattament ġust tal-operaturi li saru proprjetarji ġodda ta' bastimenti tas-sajd wara li jkun sar bejgħ jew kull tip ieħor ta' trasferiment tas-sjieda, filwaqt li fl-istess ħin ma tiddgħajjifx is-sistema tal-Unjoni għall-kontroll, l-ispezzjoni u l-infurzar stabbilita fir-Regolament (KE) Nru 1224/2009 li hija neċessarja biex jinkisbu l-objettivi tal-PKS. |
(15) |
Jekk liċenzja tas-sajd ta' operatur tiġi rtirata b'mod permanenti minħabba l-frekwenza u l-gravità għolja ta' ksur li jitwettaq, l-introduzzjoni ta' projbizzjoni fuq l-aċċess għall-appoġġ tal-FEMS sal-aħħar tal-perjodu ta' eliġibbiltà stabbilit fl-Artikolu 65(2) tar-Regolament (UE) Nru 1303/2013 tal-Parlament Ewropew u tal-Kunsill ( 5 ) hija ġustifikata bil-ħtieġa li jitħarsu l-interessi finanzjarji tal-Unjoni u tal-kontribwenti tagħha. Il-projbizzjoni tkun iġġustifikata wkoll anke jekk skont il-metodu tal-kalkolu stabbilit f'dan ir-Regolament, il-perjodu ta' inammissibbiltà jispiċċa qabel tmiem il-perjodu ta' eliġibbiltà. |
(16) |
Skont l-Artikolu 10(5) tar-Regolament (UE) Nru 508/2014, l-Istati Membri għandhom jobbligaw lill-operaturi jippreżentaw applikazzjoni skont il-FEMS biex jipprovdu dikjarazzjoni ffirmata lill-awtorità maniġerjali li tikkonferma li dawn jikkonformaw mal-kriterji stabbiliti fl-Artikolu 10(1) tar-Regolament (UE) Nru 508/2014 u ma wettqu l-ebda frodi skont il-FES jew il-FEMS kif imsemmi fl-Artikolu 10(3) ta' dak ir-Regolament. L-Istati Membri għandhom jivverifikaw ukoll il-veraċità ta' dik id-dikjarazzjoni. L-Istati Membri għandhom jiżguraw li l-applikazzjoni tar-regoli nazzjonali dwar l-effetti ta' sospensjoni tal-proċeduri ta' reviżjoni ma tirriżultax fl-ineffettività tar-regoli dwar l-istabbiliment tal-perjodu ta' inammissibbiltà. |
(17) |
Fir-rigward tal-każijiet ta' ksur u r-reati serji msemmija fl-Artikolu 10(1)(c) u (d) tar-Regolament (UE) Nru 508/2014, jeħtieġ li dawk il-każijiet jiġu vvalutati u analizzati aktar biex jiġi żgurat li t-tul ta' żmien tal-perjodu ta' inammissibbiltà jkun proporzjonat man-natura, il-gravità, it-tul ta' żmien u r-repetizzjoni ta' dak il-ksur u r-reati serji. Dan ir-Regolament għandu jiġi emendat wara li ssir dik l-analiżi. |
(18) |
Sabiex tiġi żgurata l-applikazzjoni immedjata tal-miżuri pprovduti f'dan ir-Regolament u minħabba l-importanza li jiġi żgurat it-trattament armonizzat u ugwali tal-operaturi fl-Istati Membri kollha mill-bidu tal-perjodu ta' programmazzjoni, dan ir-Regolament għandu jidħol fis-seħħ fil-jum wara dak tal-pubblikazzjoni tiegħu u japplika mill-ewwel jum tal-perjodu ta' eliġibbiltà tal-FEMS, jiġifieri l-1 ta' Jannar 2014, |
ADOTTAT DAN IR-REGOLAMENT:
KAPITOLU I
DISPOŻIZZJONIJIET ĠENERALI
Artikolu 1
Suġġett u kamp ta' applikazzjoni
Dan ir-Regolament japplika għall-applikazzjonijiet tal-appoġġ mill-FEMS u jidentifika “il-perjodu tal-inammissibbiltà”, jiġifieri l-perjodu meta l-applikazzjonijiet mingħand operaturi li jkunu wettqu xi azzjoni imsemmija fl-Artikolu 10(1)(a) u (b) tar-Regolament (UE) Nru 508/2014 jew fl-Artikolu 10(3) ta' dak ir-Regolament, ma għandhomx ikunu ammissibbli.
Artikolu 2
Definizzjonijiet
Għall-finijiet ta' dan ir-Regolament:
1. “punti ta' ksur” tfisser il-punti mogħtija lill-operatur għal bastiment tas-sajd fil-kuntest tas-sistema ta' punti għall-ksur serju stabbilita fl-Artikolu 92 tar-Regolament (KE) Nru 1224/2009.
2. “operatur” tfisser operatur kif iddefinit fl-Artikolu 4(30) tar-Regolament (UE) Nru 1380/2013 li jippreżenta applikazzjoni għall-appoġġ tal-FEMS.
KAPITOLU II
TUL TA' ŻMIEN U DATA TAL-BIDU TAL-PERJODU TA' INAMMISSIBBILTÀ
Artikolu 3
Inammissibbiltà tal-applikazzjonijiet minn operaturi li wettqu ksur serju skont l-Artikolu 42(1) tar-Regolament tal-Kunsill (KE) Nru 1005/2008 ( 6 ) jew l-Artikolu 90(1) tar-Regolament (KE) Nru 1224/2009
1. Jekk awtorità kompetenti tistabbilixxi li operatur ikun wettaq ksur serju skont l-Artikolu 42(1) tar-Regolamnent (KE) Nru 1005/2008 jew l-Artikolu 90(1) tar-Regolament (KE) Nru 1224/2009, l-applikazzjonijiet ta' dak l-operatur għall-appoġġ tal-FEMS għandhom ikunu inammissibbli għal perjodu ta' 12-il xahar.
2. B'deroga mill-paragrafu 1, jekk skont l-Artikolu 42(1)(a) tar-Regolament (KE) Nru 1005/2008 Stat Membru jagħti punti ta' ksur għall-ksur serju mniżżel fil-punti 1, 2 u 5 tal-Anness XXX tar-Regolament ta' Implimentazzjoni (UE) Nru 404/2011, għandhom japplikaw ir-regoli li ġejjin:
(a) jekk il-punti ta' ksur akkumulati minn operatur fir-rigward ta' bastiment tas-sajd jibqgħu inqas minn 9, l-applikazzjonijiet ta' dak l-operatur għall-appoġġ mill-FEMS għandhom ikunu ammissibbli;
(b) jekk l-għadd ta' punti ta' ksur akkumulati minn operatur fir-rigward ta' bastiment tas-sajd huwa ta' 9 punti, il-perjodu tal-inammissibbiltà għandu jkun ta' 12-il xahar;
(c) kull punt ta' ksur mogħti lil operatur fir-rigward ta' bastiment tas-sajd flimkien mal-punti akkumulati msemmija fil-punt (b), għandu jirriżulta f'perjodu addizzjonali ta' inammissibbiltà ta' xahar.
3. Id-data tal-bidu tal-perjodu ta' inammissibbiltà għandha tkun id-data tal-ewwel deċiżjoni uffiċjali minn awtorità kompetenti li tistabbilixxi li jkun twettaq ksur serju skont it-tifsira tal-Artikolu 42(1) tar-Regolament (KE) Nru 1005/2008 jew l-Artikolu 90(1) tar-Regolament (KE) Nru 1224/2009.
Bil-għan li jiġi kkalkulat il-perjodu ta' inammissibbiltà, għandu jitqies biss dak il-ksur serju li jitwettaq mill-1 ta' Jannar 2013 u li għalih minn dik id-data tittieħed deċiżjoni skont it-tifsira tas-subparagrafu ta' hawn fuq.
4. Madankollu, għall-finijiet speċifiċi tal-paragrafu 2, id-data tal-bidu tal-perjodu ta' innammissibbiltà għandha tkun id-data tal-ewwel deċiżjoni uffiċjali minn awtorità kompetenti li tagħti punti ta' ksur lil operatur skont l-Artikolu 126(4) tar-Regolament ta' Implimentazzjoni (UE) Nru 404/2011 u li b'hekk l-operatur jingħata total ta' 9 punti ta' ksur jew aktar fir-rigward ta' bastiment tas-sajd.
Bil-għan li jiġi kkalkulat il-perjodu ta' inammissibbiltà, għandhom jitqiesu biss il-punti ta' ksur li jitwettqu mill-1 ta' Jannar 2013 u li jingħataw permezz ta' deċiżjoni uffiċjali adottata minn dak il-jum.
Artikolu 4
Inammissibbiltà tal-applikazzjonijiet mill-operaturi inklużi fil-lista tal-bastimenti IUU tal-Unjoni jew li l-bastiment tagħhom itajjar il-bandiera ta' pajjiż identifikat bħala pajjiż terz li ma jikkooperax
1. Il-perjodu ta' inammissibbiltà għal operatur li l-bastiment tas-sajd tiegħu jiġi inkluż fil-lista tal-bastimenti tas-sajd tal-Unjoni involuti f'sajd illegali, mhux irrappurtat u mhux irregolat (IUU) kif imsemmi fl-Artikolu 27 tar-Regolament (KE) Nru 1005/2008, għandu jkun il-perjodu kollu li fih il-bastiment tas-sajd jibqa' inkluż f'dik il-lista u, f'kull każ, ma jkunx inqas minn 24 xahar mid-data li fiha ġie elenkat fil-lista.
2. L-operaturi li l-bastiment tas-sajd tagħhom itajjar il-bandiera ta' pajjiż identifikat bħala pajjiż terz li ma jikkooperax, kif previst fl-Artikolu 33 tar-Regolament (KE) Nru 1005/2008, għandu jkun inammissibbli għall-perjodu kollu li fih ikun elenkat dak il-pajjiż u, f'kull każ, għal perjodu minimu ta' 12-il xahar.
3. Id-data tal-bidu tal-perjodu ta' innammissibbiltà għandha tkun id-data tad-dħul fis-seħħ tar-Regolament tal-Kummissjoni (UE) Nru 468/2010 ( 7 ) li jistabbilixxi l-lista tal-bastimenti IUU tal-Unjoni jew tad-Deċiżjoni ta' Implimentazzjoni tal-Kunsill 2004/170/UE ( 8 ) li tistabbilixxi l-lista ta' pajjiżi terzi li ma jikkooperawx jew id-data ta' xi emenda ta' tali Regolament jew Deċiżjoni li permezz tagħha bastiment tas-sajd jew pajjiż jiżdied f'din il-lista.
Artikolu 4a
L-inammissibbiltà tal-applikazzjonijiet mingħand operaturi li jkunu wettqu reati ambjentali
1. Meta fl-ewwel deċiżjoni uffiċjali, awtorità kompetenti tagħraf li operatur ikun wettaq xi reat imsemmi fl-Artikolu 3 tad-Direttiva 2008/99/KE tal-Parlament Ewropew u tal-Kunsill ( 9 ), l-applikazzonijiet għall-appoġġ mill-FEMS li jressaq dak l-operatur skont il-Kapitolu II tat-Titolu V tar-Regolament (UE) Nru 508/2014 ma għandhomx ikunu ammissibbli:
(a) għal 12-il xahar, meta r-reat ikun sar b'negliġenza serja; jew
(b) għal 24 xahar, meta r-reat ikun sar b'intenzjoni.
2. Meta fl-ewwel deċiżjoni uffiċjali, awtorità kompetenti tagħraf li operatur ikun wettaq xi reat imsemmi fl-Artikolu 4 tad-Direttiva 2008/99/KE, l-applikazzonijiet għall-appoġġ mill-FEMS li jressaq dak l-operatur skont il-Kapitolu II tat-Titolu V tar-Regolament (UE) Nru 508/2014 ma għandhomx ikunu ammissibbli għal 24 xahar.
3. Il-perjodu tal-inammissibbiltà jiżdied b'sitt (6) xhur meta fid-deċiżjoni msemmija fil-paragrafi 1 jew 2, l-awtorità kompetenti tkun:
(a) irreferiet espliċitament għall-preżenza ta' ċirkostanzi aggravanti; jew
(b) għarfet li l-operatur ikun wettaq ir-reat għal aktar minn sena.
4. Jekk il-perjodu tal-inammissibbiltà ikun dam tal-inqas 12-il xahar b'kollox, dan għandu jitnaqqas b'sitt (6) xhur meta l-awtorità kompetenti, fid-deċiżjoni tagħha msemmija fil-paragrafi 1 jew 2, tkun irreferiet espliċitament għall-preżenza ta' ċirkostanzi mitiganti.
5. Id-data tal-bidu tal-perjodu tal-inammissibbiltà hija d-data tal-ewwel deċiżjoni uffiċjali tal-awtorità kompetenti li tagħraf li jkun sar xi reat previst fl-Artikoli 3 u 4 tad-Direttiva 2008/99/KE.
6. Sabiex jiġi kkalkulat il-perjodu tal-inammissibbiltà, għandhom jitqiesu biss id-deċiżjonijiet li jirreferu għal reat li jkun sar mill-1 ta' Jannar 2013 u li għalih minn dik id-data tkun ittieħdet deċiżjoni fis-sens tas-subparagrafu ta' hawn fuq.
7. Meta l-applikazzjoni ta' operatur ma tkunx ammissibbli skont il-paragrafi 1 u 2, lanqas l-applikazzjonijiet l-oħra ta' dak l-operatur skont il-Kapitolu II tat-Titolu V tar-Regolament (UE) Nru 508/2014 ma għandhom ikunu ammissibbli.
Artikolu 5
Inammissibbiltà tal-applikazzjonijiet mill-operaturi li wettqu frodi fil-kuntest tal-FES jew tal-FEMS
1. Meta awtorità kompetenti tistabbilixxi li operatur wettaq frodi fil-kuntest tal-FES jew tal-FEMS, l-applikazzjonijiet kollha għall-appoġġ tal-FEMS minn dak l-operatur għandhom ikunu inammissibbli mid-data tal-ewwel deċiżjoni uffiċjali li tistabbilixxi l-frodi, kif iddefinit fl-Artikolu 1 tal-Konvenzjoni dwar il-protezzjoni tal-interessi finanzjarji tal-Komunitajiet Ewropej ( 10 ).
2. Il-perjodu ta' inammissibbiltà għandu jibqa' fis-seħħ sa tmiem il-perjodu ta' eliġibbiltà tal-FEMS kif stabbilit fl-Artikolu 65(2) tar-Regolament (UE) Nru 1303/2013.
KAPITOLU III
DISPOŻIZZJONIJIET KOMUNI
Artikolu 6
Kalkolu tal-perjodu ta' inammissibbiltà jekk l-operatur għandu aktar minn bastiment wieħed tas-sajd
1. Meta operatur jkun proprjetarju jew jikkontrolla aktar minn bastiment wieħed tas-sajd, il-perjodu ta' innammissibbiltà ta' applikazzjoni minn dak l-operatur għandu jiġi stabbilit b'mod separat rigward kull bastiment individwali tas-sajd, skont l-Artikolu 3 jew l-Artikolu 4.
2. Madankollu, l-applikazzjonijiet ta' dak l-operatur għall-appoġġ tal-FEMS għandhom ikunu ammissibbli wkoll:
(a) jekk l-applikazzjonijiet għal aktar minn nofs il-bastimenti tas-sajd ta' proprjetà jew ikkontrollati minn dak l-operatur ikunu inammissibbli għall-appoġġ tal-FEMS skont l-Artikolu 3 u l-Artikolu 4, jew
(b) jekk, f'każ ta' ksur serju skont l-Artikolu 42(1)(a) tar-Regolament (KE) Nru 1005/2008 elenkat fil-punti 1, 2 u 5 tal-Anness XXX tar-Regolament ta' Implimentazzjoni (UE) Nru 404/2011, il-medja ta' punti ta' ksur mogħtija għal kull bastiment tas-sajd ta' proprjetà jew ikkontrollat mill-operatur tkun ta' 7 jew aktar.
3. B'deroga mill-paragrafi 1 u 2, jekk ksur serju li jitwettaq minn operatur ma jkunx relatat ma' xi bastiment tas-sajd ta' proprjetà jew ikkontrollat minn dak l-operatur, l-applikazzjonijiet kollha għall-appoġġ tal-FEMS minn dak l-operatur għandhom ikunu inammissibbli.
Artikolu 7
Trasferiment tas-sjieda
1. F'każ ta' bejgħ jew kull tip ieħor ta' trasferiment tas-sjieda ta' bastiment tas-sajd, il-perjodu ta' inammissibbiltà li fih l-operatur jittrasferixxi l-bastiment tas-sajd u marbut ma' ksur serju li jitwettaq qabel il-bidla fis-sjieda ma għandux jiġi trasferit għall-operatur il-ġdid. L-inammissibbiltà tal-applikazzjonijiet mill-operatur il-ġdid jistgħu jirriżultaw minn ksur serju ġdid imwettaq mill-operatur il-ġdid.
2. Madankollu, jekk il-punti ta' ksur jingħataw għall-ksur serju skont it-tifsira tal-Artikolu 42(1)(a) tar-Regolament (KE) Nru 1005/2008 elenkat fil-punti 1, 2 u 5 tal-Anness XXX tar-Regolament ta' Implimentazzjoni (UE) Nru 404/2011 u mwettqa qabel il-bidla fis-sjieda tal-bastiment tas-sajd, dawk il-punti għandhom jitqiesu għall-kalkolu tal-perjodu ta' innammissibbiltà tal-operatur il-ġdid skont l-Artikolu 3(2) u l-Artikolu 6(2)(b) jekk dak l-operatur iwettaq ksur serju ġdid skont l-Artikolu 42(1)(a) tar-Regolament (KE) Nru 1005/2008 elenkati fil-punti 1, 2 u 5 tal-Anness XXX tar-Regolament ta' Implimentazzjoni (UE) Nru 404/2011.
Artikolu 8
Irtirar permanenti tal-liċenzja tas-sajd
B'deroga mill-Artikolu 6, jekk liċenzja tas-sajd ta' operatur tiġi rtirata b'mod permanenti għal xi wieħed mill-bastimenti tas-sajd ta' proprjetà jew ikkontrollati minn dak l-operatur:
(a) skont l-Artikolu 129(2) tar-Regolament ta' Implimentazzjoni (UE) Nru 404/2011; jew fejn japplika,
(b) bħala riżultat tas-sanzjonijiet għal ksur serju imposti mill-Istati Membri skont l-Artikolu 45 tar-Regolament (KE) Nru 1005/2008,
l-applikazzjonijiet kollha minn dak l-operatur għandhom ikunu inammissibbli għall-appoġġ mill-FEMS mid-data tal-irtirar sa tmiem il-perjodu ta' eliġibbiltà, kif stabbilit fl-Artikolu 65(2) tar-Regolament (UE) Nru 1303/2013.
Artikolu 9
Reviżjoni tal-perjodu ta' inammissibbiltà
Dejjem jekk il-perjodu ta' inammissibbiltà jdum total ta' mill-inqas 12-il xahar:
(a) għandu jitnaqqas b'xahrejn f'każ ta' ksur serju skont l-Artikolu 42(1)(a) tar-Regolament (KE) Nru 1005/2008 elenkat fil-punti 1, 2 u 5 tal-Anness XXX tar-Regolament ta' Implimentazzjoni (UE) Nru 404/2011 jekk jitħassru 2 punti ta' ksur skont l-Artikolu 133(3) tar-Regolament ta' Implimentazzjoni (UE) Nru 404/2011 għal dan il-ksur serju;
(b) għandu jiġi estiż bi 12-il xahar għal kull ksur serju addizzjonali li jitwettaq mill-operatur matul il-perjodu ta' inammissibbiltà skont l-Artikolu 42(1) tar-Regolament (KE) Nru 1005/2008 jew l-Artikolu 90(1) tar-Regolament (KE) Nru 1224/2009; jew
(c) b'deroga mill-paragrafu (b), għandu jiġi estiż skont ir-regoli stabbiliti fl-Artikolu 3(2)(c) għal kull ksur serju addizzjonali li jitwettaq mill-operatur matul il-perjodu ta' inammissibbiltà skont l-Artikolu 42(1)(a) tar-Regolament (KE) Nru 1005/2008 elenkat fil-punti 1, 2 u 5 tal-Anness XXX tar-Regolament ta' Implimentazzjoni (UE) Nru 404/2011;
(d) għandu jiżdied b'dawn il-perjodi għal kull reat addizzjonali previst fl-Artikolu 3 tad-Direttiva 2008/99/KE li jkun għamel l-operatur tul il-perjodu tal-inammissibbiltà:
(i) 12-il xahar addizzjonali, meta r-reat isir b'negliġenza serja;
(ii) 24 xahar addizzjonali, meta r-reat isir b'intenzjoni; jew
(e) għandu jiżdied b'24 xahar għal kull reat addizzjonali previst fl-Artikolu 4 tad-Direttiva 2008/99/KE li jkun għamel l-operatur tul il-perjodu tal-inammissibbiltà.
Jekk xi reat addizzjonali msemmi fil-punti (d) jew (e) tal-ewwel paragrafu jkun tal-istess tip ta' reat ambjentali bħal dak li kkawża l-perjodu tal-inammissibbiltà jew ikun diġà wassal għar-reviżjoni tiegħu, minħabba dan ir-reat kif previst fil-punti (d) u (e), il-perjodu tal-inammissibbiltà għandu jiżdied b'sitt (6) xhur oħra.
KAPITOLU IV
DISPOŻIZZJONIJIET FINALI
Artikolu 10
Dħul fis-seħħ
Dan ir-Regolament jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Għandu japplika mill-1 ta' Jannar 2014.
Dan ir-Regolament jorbot fl-intier tiegħu u japplika direttament fl-Istati Membri kollha.
( 1 ) ĠU L 149, 20.5.2014, p. 1.
( 2 ) Ir-Regolament (UE) Nru 1380/2013 tal-Parlament Ewropew u tal-Kunsill tal-11 ta' Diċembru 2013 dwar il-Politika Komuni tas-Sajd, li jemenda r-Regolamenti tal-Kunsill (KE) Nru 1954/2003 u (KE) Nru 1224/2009 u li jħassar ir-Regolamenti tal-Kunsill (KE) Nru 2371/2002 u (KE) Nru 639/2004 u d-Deċiżjoni tal-Kunsill 2004/585/KE (ĠU L 354, 28.12.2013, p. 22).
( 3 ) Ir-Regolament tal-Kunsill (KE) Nru 1224/2009 tal-20 ta' Novembru 2009 li jistabbilixxi sistema Komunitarja ta' kontroll għall-iżgurar tal-konformità mar-regoli tal-Politika Komuni tas-Sajd, li jemenda r-Regolamenti (KE) Nru 847/96, (KE) Nru 2371/2002, (KE) Nru 811/2004, (KE) Nru 768/2005, (KE) Nru 2115/2005, (KE) Nru 2166/2005, (KE) Nru 388/2006, (KE) Nru 509/2007, (KE) Nru 676/2007, (KE) Nru 1098/2007, (KE) Nru 1300/2008, (KE) Nru 1342/2008 u li jħassar ir-Regolamenti (KEE) Nru 2847/93, (KE) Nru 1627/94 u (KE) Nru 1966/2006 (ĠU L 343, 22.12.2009, p. 1).
( 4 ) Ir-Regolament ta' Implimentazzjoni tal-Kummissjoni (UE) Nru 404/2011 tat-8 ta' April 2011 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 1224/2009 li jistabbilixxi sistema Komunitarja ta' kontroll għall-iżgurar tal-konformità mar-regoli tal-Politika Komuni tas-Sajd (ĠU L 112, 30.4.2011, p. 1).
( 5 ) Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta' Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (ĠU L 347, 20.12.2013, p. 320).
( 6 ) Ir-Regolament tal-Kunsill (KE) Nru 1005/2008 tad-29 ta' Settembru 2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat, li jemenda r-Regolamenti (KEE) Nru 2847/93, (KE) Nru 1936/2001 u (KE) Nru 601/2004 u li jħassar ir-Regolamenti (KE) Nru 1093/94 u (KE) Nru 1447/1999 (ĠU L 286, 29.10.2008, p. 1).
( 7 ) Ir-Regolament tal-Kummissjoni (UE) Nru 468/2010 tat-28 ta' Mejju 2010 li jistabbilixxi l-lista tal-UE ta' bastimenti involuti f'sajd illegali, mhux rappurtat u mhux regolat (ĠU L 131, 29.5.2010, p. 22).
( 8 ) Id-Deċiżjoni ta' Implimentazzjoni tal-Kunsill 2004/170/UE tal-24 ta' Marzu 2014 li tistabbilixxi lista ta' pajjiżi terzi li ma jikkooperawx fil-ġlieda kontra s-sajd IUU skont ir-Regolament (KE) Nru 1005/2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat (ĠU L 91, 27.3.2014, p. 43).
( 9 ) Id-Direttiva 2008/99/KE tal-Parlament Ewropew u tal-Kunsill tad-19 ta' Novembru 2008 dwar il-protezzjoni tal-ambjent permezz tal-liġi kriminali (ĠU L 328, 6.12.2008, p. 28).
( 10 ) L-Att tal-Kunsill tas-26 ta' Lulju 1995 li jfassal il-Konvenzjoni dwar il-protezzjoni tal-interessi finanzjarji tal-Komunitajiet Ewropej (ĠU C 316, 27.11.1995, p. 48).