It-tfal fiċ-ċentru tal-azzjoni esterna tal-UE

 

SOMMARJU TAD-DOKUMENT:

Komunikazzjoni (COM(2008) 55 final) — Post Speċjali għat-Tfal fl-Azzjoni Esterna tal-UE

X’INHU L-GĦAN TAL-KOMUNIKAZZJONI?

• Din għandha l-għan li tibni approċċ komprensiv tal-Unjoni Ewropea (UE) lejn il-protezzjoni u l-promozzjoni tad-drittijiet tat-tfal fil-pajjiżi mhux tal-UE.
• L-approċċ huwa bbażat fuq viżjoni olistika u universalment applikabbli tad-drittijiet tat-tfal u huwa parti mill-istrateġiji usa’ tal-UE għall-iżvilupp u t-tnaqqis tal-faqar.

PUNTI EWLENIN

• L-approċċ globali għall-promozzjoni tad-drittijiet tat-tfal fil-pajjiżi mhux tal-UE jikkonsisti minn din il-komunikazzjoni flimkien mal-Pjan ta’ Azzjoni dwar id-Drittijiet tat-Tfal fl-Azzjoni Esterna u d-Dokument ta’ Ħidma dwar it-Tfal f’Sitwazzjonijiet ta’ Emerġenza u Kriżi.
• Id-drittijiet tat-tfal huma parti mid-drittijiet universali tal-bniedem li l-UE hija impenjata sabiex tosserva taħt trattati internazzjonali u tal-UE, bħal ma huma:
  • il-Konvenzjoni tan-NU dwar id-Drittijiet tat-Tfal (CRC);
  • l-Għanijiet ta’ Żvilupp tal-Millennju, li fl-2016 ġew sostitwiti bl-Għanijiet ta’ Żvilupp Sostenibbli;
  • il-Karta tad-Drittijiet Fundamentali tal-Unjoni Ewropea;
  • u l-Linji Gwida tal-UE dwar it-Tfal u l-Konflitti Armati.
• L-UE għandha tuża l-għodod segwenti biex tippromwovi d-drittijiet tat-tfal f’pajjiżi mhux tal-UE:
  • il-kooperazzjoni għall-iżvilupp sabiex teqred il-faqar fis-sors;
  • politika kummerċjali li hija konsistenti mal-protezzjoni u l-promozzjoni tad-drittijiet tat-tfal;
  • djalogu politiku bejn l-UE u pajjiżi sħab li jagħmel enfasi fuq l-impenji taħt is-CRC
  • l-għoti ta’ setgħa lit-tfal u l-adolexxenti biex jaqdu rwol aktar attiv fi kwistjonijeit li jolqtuhom;
  • għajnuna umanitarja biex jiġu megħjuna tfal affetwati minn konflitti, emerġenzi kumplessi u diżastri naturali.
• Fil-25 anniversarju (2014) tas-CRC tan-NU, il-Parlament Ewropew għaddariżoluzzjoni li titlob lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà biex “tagħti prijorità lid-drittijiet tat-tfal fl-azzjoni esterna kollha tal-UE” u sabiex tirrapporta lill-Parlament kull sena.

SFOND

• It-tfal u ż-żgħażagħ huma ċentrali għall-progress u s-suċċess futuri tas-soċjetajiet L-investiment fit-tfal ifisser investiment fil-futur. Madankollu, 47 % tal-persuni li qed jgħixu f’faqar estrem għandhom 18-il sena jew inqas, u minnhom, ħafna jsofru minn esklużjoni soċjali, vjolenza u abbuż, li jirrestrinġu l-opportunitajiet li wieħed jgħix ħajja sodisfaċenti u jikkontribwixxu għan-nuqqas ta’ stabbilità fis-soċjetà.
• Din il-komunikazzjoni ssegwi l-komunikazzjoni tal-2006 imsemmija Lejn Strateġija tal-UE dwar id-Drittijiet tat-Tfal, li tistabbilixxi l-pedamenti għal strateġija fit-tul għall-UE fil-qasam tad-drittijiet tat-tfal. Din hija marbuta mal-Linji gwida tal-UE għall-Promozzjoni u l-Protezzjoni tad-Drittijiet tat-Tfal tal-2007, li huma l-bażi għall-azzjoni tal-UE biex tippromwovi d-drittijiet tat-tfal fil-politika esterna.

DOKUMENT EWLIENI

Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni — Post Speċjali għat-Tfal fl-Azzjoni Esterna tal-UE (COM(2008) 55 final, 5.2.2008)

DOKUMENTI RELATATI

Dokument ta’ ħidma tal-persunal tal-Kummissjoni - It-tfal f’sitwazzjonijiet ta’ emerġenza u kriżi (SEC(2008) 135 final, 5.2.2008)

Dokument ta’ ħidma tal-persunal tal-Kummissjoni— Il-Pjan ta’ Azzjoni tal-Unjoni Ewropea dwar id-Drittijiet tat-Tfal fl-Azzjoni Esterna (SEC(2008) 136 final, 5.2.2008)

l-aħħar aġġornament 06.12.2016